%śivastotrāvalī of utpaladeva %ed. CR. Bailly %reprinted as Garib Dass Oriental Series 109 % Delhi 1990 %input by SḌ. Vasudeva in 199?, never proof-read. bhaktivilāsākhyaṃ prathamaṃ stotram oṃ 1.1ab: na dhyāyato na japataḥ syād yasyāvidhipūrvakam 1.1cd: evam eva śivabhāsas taṃ numo bhaktiśālinam 1.2ab: ātmā mama bhavadbhaktisudhāpānayuvāpi san 1.2cd: lokayātrārajorāgāt palitair iva dhūsaraḥ 1.3ab: labdhatatsaṃpadāṃ bhaktimatāṃ tvatpuravāsinām 1.3cd: saṃcāro lokamārge 'pi syāt tayaiva vijṛmbhayā 1.4ab: sākṣādbhavanmaye nātha sarvasmin bhuvanāntare 1.4cd: kiṃ na bhaktimatāṃ kṣetram mantraḥ kvaiṣām na siddhyati 1.5ab: jayanti bhaktipīyūṣarasāsavavaronmadāḥ 1.5cd: advitīyā api sadā tvaddvitīyā api prabho 1.6ab: anantānandasindhos te nātha tattvaṃ vidanti te 1.6cd: tādṛśa eva ye sāndrabhaktyānandarasāplutāḥ 1.7ab: tvam evātmeśa sarvasya sarvaś cātmani rāgavān 1.7cd: iti svabhāvasiddhāṃs tvadbhaktiṃ jānañ jayej janaḥ 1.8ab: nātha vedyakṣaye kena na dṛśyo 'syekakaḥ sthitaḥ 1.8cd: vedyavedakasaṃkṣobhe 'py asi bhaktaiḥ sudarśanaḥ 1.9ab: anantānandasarasī devī priyatamā yathā 1.9cd: aviyuktāsti te tadvad ekā tvadbhaktir astu me 1.10ab: sarva eva bhavallābhahetur bhaktimatāṃ vibho 1.10cd: saṃvinmārgo 'yam āhlādaduḥkhamohais tridhā sthitaḥ 1.11ab: bhavadbhaktyamṛtāsvādād bodhasya syāt parāpi yā 1.11cd: daśā sā māṃ prati svāmin nāsavasyeva śuktatā 1.12ab: bhavadbhaktimahāvidyā yeṣām abhyāsam āgatā 1.12cd: vidyāvidyobhayasyāpi tā ete tattvavedinaḥ 1.13ab: āmulād vāglatā seyaṃ kramavisphāraśālinī 1.13cd: tvadbhaktisudhayā siktā tadrasāḍhyaphalāstu me 1.14ab: śivo bhūtvā yajeteti bhakto bhūtveti kathyate 1.14cd: tvam eva hi vapuḥ sāraṃ bhaktair advayaśodhitam 1.15ab: bhaktānāṃ bhavadadvaitasiddhyai kā nopapattayaḥ 1.15cd: tadasiddhyai nikṛṣṭānāṃ kāni nāvaraṇāni vā 1.16ab: kadācit kvāpi labhyo 'si yogenetīśa vañcanā 1.16cd: anyathā sarvakakṣyāsu bhāsi bhaktimatāṃ katham 1.17ab: pratyāhārādyasaṃspṛṣṭo viśeṣo 'sti mahānayam 1.17cd: yogibhyo bhaktibhājām yad vyutthāne 'pi samāhitāḥ 1.18ab: na yogo na tapo nārcākramaḥ ko 'pi pranīyate 1.18cd: amāye śivamārge 'smin bhaktir ekā praśasyate 1.19ab: sarvato vilasadbhaktitejodhvastāvṛter mama 1.19cd: pratyakṣasarvabhāvasya cintānām api naśyatu 1.20ab: śiva ity ekaśabdasya jihvāgre tiṣṭhataḥ sadā 1.20cd: samastaviṣayāsvādo bhakteṣv evāsti ko 'py aho 1.21ab: śāntakallolaśītācchasvādubhaktisudhāmbudhau 1.21cd: alaukikarasāsvāde susthaiḥ ko 'nāma gaṇyate 1.22ab: sādṛśaiḥ kiṃ na carvyeta bhavadbhaktimahauṣadhiḥ 1.22cd: tādṛśī bhagavan yasyā mokṣākhyo 'nantaro rasaḥ 1.23ab: tā eva paramarthyante sampadaḥ sadbhir īśa yāḥ 1.23cd: tvad bhaktirasasambhogavisrambhaparipoṣikāḥ 1.24ab: bhavadbhaktisudhāsāras taiḥ kim apy upalakṣitaḥ 1.24cd: ye na rāgādi paṅke 'smiṃḷ lipyante patitā api 1.25ab: aṇimādiṣu mokṣānteṣv aṅgeṣv eva phalābhidhā 1.25cd: bhavadbhakter vipakvāyā latāyā iva keṣu cit 1.26ab: citraṃ nisargato nātha duḥkhabījam idaṃ manaḥ 1.26cd: tvadbhaktirasasaṃsiktam niḥśreyasamahāphalam sarvātmaparibhāvanākhyaṃ dvitīyaṃ stotram 2.1ab: agnīṣomaravibrahmaviṣṇusthāvarajaṅgama 2.1cd: svarūpa bahurūpāya namaḥ saṃvinmayāya te 2.2ab: viśvendhanamahākṣārānulepaśucivarcase 2.2cd: mahānalāya bhavate viśvaikahaviṣe namaḥ 2.3ab: paramāmṛtasāndrāya śītalāya śivāgnaye 2.3cd: kasmai cid viśvasaṃploṣaviṣamāya namo 'stu te 2.4ab: mahādevāya rudrāya śaṅkarāya śivāya te 2.4cd: maheśvarāyāpi namaḥ kasmai cin mantramūrtaye 2.5ab: namo nikṛttaniḥśoṣatrailokyavigaladvasā- 2.5cd: vasekaviṣamāyāpi maṅgalāya śivāgnaye 2.6ab: samastalakṣanāyoga eva yasyopalakṣaṇam 2.6cd: tasmai namo 'stu devāya kasmai cid api śambhave 2.7ab: vedāgamaviruddhāya vedāgamavidhāyine 2.7cd: vedāgamasatattvāya guhyāya svāmine namaḥ 2.8ab: saṃsāraikanimittāya saṃsāraikavirodhine 2.8cd: namaḥ samsārarūpāya niḥsaṃsārāya śambhave 2.9ab: mūlāya madhyāyāgrāya mūlamadhyāgramūrtaye 2.9cd: kṣīnāgramadhyamūlāya namaḥ pūrṇāya śambhave 2.10ab: namaḥ sukṛtasaṃbharavipākaḥ sakṛd apy asau 2.10cd: yasya nāmagrahas tasmai durlabhāya śivāya te 2.11ab: namaścarācarākāraparetanicayaiḥ sadā 2.11cd: krīḍate tubhyam ekasmai cinmayāya kapāline 2.12ab: māyāvine viśuddhāya guhyāya prakaṭātmane 2.12cd: sūkṣmāya viśvarūpāya namaś citrāya śambhave 2.13ab: brahmendraviṣṇunirvyūḍhajagatsaṃhārakelaye 2.13cd: āścaryakaraṇīyāya namas te sarvaśaktaye 2.14ab: taṭeṣv eva paribhrāntaiḥ labdhās tās tā vibhūtayaḥ 2.14cd: yasya tasmai namas tubhyam agādhaharasindhave 2.15ab: māyāmayajagatsāndrapaṅkamadhyādhivāsine 2.15cd: alepāya namaḥ śambhuśatapatrāya śobhine 2.16ab: maṅgalāya pavitrāya nidhaye bhūṣaṇātmane 2.16cd: priyāya paramārthāya sarvotkṛṣṭāya te namaḥ 2.17ab: namaḥ satatabaddhāya nityanirmuktibhāgine 2.17cd: bandhamokṣavihīnāya kasmai ci d api śambhave 2.18ab: upahāsaikasāre 'sminn etāvati jagattraye 2.18cd: tubhyam evādvitīyāya namo nityasukhāsine 2.19ab: dakṣiṇācārasārāya vāmācārābhilāṣiṇe 2.19cd: sarvācārāya śarvāya nirācārāya te namaḥ 2.20ab: yathā tathāpi yaḥ pūjyo yatra tatrāpi yo 'rcitaḥ 2.20cd: yo 'pi vā so 'pi vā yo 'sau devas tasmai namo 'stu te 2.21ab: mumukṣujanasevyāya sarvasantāpahāriṇe 2.21cd: namo vitatalāvaṇyavarāya varadāya te 2.22ab: sadā nirantarānandarasanirbharitākhila- 2.22cd: trilokāya namas tubhyaṃ svāmine nityaparvaṇe 2.23ab: sukhapradhānasaṃvedyasambhogair bhajate ca yat 2.23cd: tvām eva tasmai ghorāya śaktivṛndāya te namaḥ 2.24ab: munīnām apy avijñeyaṃ bhaktisambandhaceṣṭitāḥ 2.24cd: āliṅganty api yaṃ tasmai kasmai cid bhavate namaḥ 2.25ab: paramāmṛtakośāya paramāmṛtarāśaye 2.25cd: sarvapāramyapāramyaprāpyāya bhavate namaḥ 2.26ab: mahāmantramayaṃ naumi rūpaṃ te svacchaśītalam 2.26cd: apūrvamodasubhagaṃ parāmṛtarasolvaṇam 2.27ab: svātantryāmṛtapūrṇatvad aikyakhyātimahāpaṭe 2.27cd: citraṃ nāsty eva yatreśa tan naumi tava śāsanam 2.28ab: sarvāśaṅkāsaniṃ sarvālakṣmīkālānalaṃ tathā 2.28cd: sarvāmaṅgalyakalpāntaṃ mārgaṃ māheśvaraṃ numaḥ 2.29ab: jaya deva namo namo 'stu te sakalaṃ viśvam idaṃ tavāśritam 2.29cd: jagatāṃ parameśvaro bhavān paramekaḥ śaraṇāgato 'smi te praṇayaprasādākhyaṃ tṛtīyaṃ stotram 3.1ab: sadasattvena bhāvānāṃ yuktā yā dvitayī gatiḥ 3.1cd: tām ullaṅghya tṛtīyasmai namaś citrāya śambhave 3.2ab: āsurarṣijanād asminn asvatantre jagattraye 3.2cd: svatantrās te svatantrasya ye tavaivānujīvinaḥ 3.3ab: aśeṣaviśvakhacitabhavadvapur anusmṛtiḥ 3.3cd: yeṣām bhavarujām ekaṃ bheṣajaṃ te sukhāsinaḥ 3.4ab: sitātapatraṃ yasyenduḥ svaprabhāparipūritaḥ 3.4cd: cāmaraṃ svardhunīsrotaḥ sa ekaḥ parameśvaraḥ 3.5ab: prakāśāṃ śītalām ekāṃ śuddhāṃ śaśikalām iva 3.5cd: dṛśaṃ vitara me nātha kām apy amṛtavāhinīm 3.6ab: tvaccidānandajaladheś cyutāḥ saṃvittivipruṣaḥ 3.6cd: imāḥ kathaṃ me bhagavan nāmṛtāsvādasundarāḥ 3.7ab: tvayi rāgarase nātha na magnaṃ hṛdayaṃ prabho 3.7cd: yeṣām ahṛdayā eva te 'vajñaspadam īdṛśāḥ 3.8ab: prabhuṇā bhavatā yasya jātaṃ hṛdayamelanam 3.8cd: prābhavīṇāṃ vibhūtīnāṃ paramekaḥ sa bhājanam 3.9ab: harṣāṇām atha śokānāṃ sarveṣāṃ plāvakaḥ samam 3.9cd: bhavaddhyānāmṛtāpūro nimnāṇimnabhuvām iva 3.10ab: keva na syād dṛśā teṣāṃ sukhasambhāranirbharā 3.10cd: yeṣām ātmādhikeneśa na kvāpi virahas tvayā 3.11ab: garjāmi bata nṛtyāmi pūrṇā mama manorathāḥ 3.11cd: svāmī mamaiṣa ghaṭito yat tvam atyantarocanaḥ 3.12ab: nānyad vedyaṃ kriyā yatra nānyo yogo vidā ca yat 3.12cd: jñānaṃ syāt kiṃ tu viśvaikapūrṇā cittvaṃ vijṛmbhate 3.13ab: durjayānām anantānām duḥkhānāṃ sahasaiva te 3.13cd: hastāt palāyitā yeṣāṃ vāci śaśvacchivadhvaniḥ 3.14ab: uttamaḥ puruṣo 'nyo 'sti yuṣmaccheṣaviśeṣitaḥ 3.14cd: tvaṃ mahāpuruṣas tv eko niḥśeṣapuruṣāśrayaḥ 3.15ab: jayanti te jagadvandyā dāsās te jagatāṃ vibho 3.15cd: saṃsārārṇava evaiṣa yeṣāṃ krīḍāmahāsaraḥ 3.16ab: āsatāṃ tāvad anyāni dainyānīha bhavajjuṣām 3.16cd: tvam eva prakaṭībhūyā ity anenaiva lajjyate 3.17ab: matparaṃ nāsti tatrāpi jāpako 'smi tadaikyataḥ 3.17cd: tattvena japa ity akṣamālayā diśasi kvacit 3.18ab: sato 'vaśyaṃ paramasat sac ca tasmāt paraṃ prabho 3.18cd: tvaṃ cāsataḥ sataś cānyas tenāsi sadasanmayaḥ 3.19ab: sahasrasūryakiraṇādhikaśuddhaprakāśavān 3.19cd: api tvaṃ sarvabhuvanavyāpako 'pi na dṛśyase 3.20ab: jaḍe jagati cidrūpaḥ kila vedye 'pi vedakaḥ 3.20cd: vibhur mite ca yenāsi tena sarvottamo bhavān 3.21ab: alam ākranditair anyair iyad eva puraḥ prabhoḥ 3.21cd: tīvraṃ viraumi yan nātha muhyāmy evaṃ vidann api surasodbalākhyāṃ caturthaṃ stotram 4.1ab: capalam asi yad api mānasa tatrāpi ślāghyase yato bhajase 4.1cd: śaraṇānām api śaraṇaṃ tribhuvanagurum ambikākāntam 4.2ab: ullaṅghya vividhadaivatasopānakramam upeya śivacaraṇān 4.2cd: āśrityāpy adharatarāṃ bhūmiṃ nādyāpi citram ujjhāmi 4.3ab: prakaṭaya nijam adhvānaṃ sthagayatarām akhilalokacaritāni 4.3cd: yāvad bhavāmi bhagavaṃs tava sapadi sadodito dāsaḥ 4.4ab: śiva śiva śambho śaṅkara śaraṇāgatavatsalāśu kuru karuṇām 4.4cd: tava caraṇakamalayugalasmaraṇaparasya hi sampado 'dūre 4.5ab: tāvakāṅghrikamalāsanalīnā ye yathāruci jagad racayanti 4.5cd: te viriñcim adhikāramalenāliptam asvavaśam īśa hasanti 4.6ab: tvatprakāśavapuṣo na vibhinnaṃ kiṃ cana prabhavati pratibhātum 4.6cd: tat sadaiva bhagavan parilabdho 'sīśvara prakṛtito 'pi vidūraḥ 4.7ab: pādapaṅkajarasaṃ tava ke cid bhedaparyuṣitavṛttim upetāḥ 4.7cd: ke canāpi rasayanti tu sadhyo bhātam akṣatavapur dvayaśūnyam 4.8ab: nātha vidyud iva bhāti vibhāte yā kadā cana mamāmṛtadigdhā 4.8cd: sā yadi sthirataraiva bhavet tat pūjito 'si vidhivat kim utānyat 4.9ab: sarvam asyaparam asti na kiṃ cid vastv avastu yadi veti mahatyā 4.9cd: prajñāya vyavasito 'tra yathaiva tvaṃ tathaiva bhava suprakaṭo me 4.10ab: svecchayaiva bhagavan nijamārge kāritaḥ padam ahaṃ prabhunaiva 4.10cd: tat kathaṃ janavad eva carāmi tvatpadocitam avaimi na kiṃ cit 4.11ab: ko 'pi deva hṛdi teṣu tāvako jṛmbhate subhagabhāva uttamaḥ 4.11cd: tvatkathāmbudaninādacātakā yena te 'pi subhagīkṛtāś ciram 4.12ab: tvajjuṣāṃ tvayi kayāpi līlayā rāga eṣa paripoṣam āgataḥ 4.12cd: yad viyogabhuvi saṅkathā tathā saṃsmṛtiḥ phalati saṃgamotsavam 4.13ab: yo vicitrarasasekavardhitaḥ śaṅkareti śataśo 'py udīritaḥ 4.13cd: śabda āviśati tiryagāśayeṣv apy ayaṃ navanavaprayojanaḥ 4.14ab: te jayanti mukhamaṇḍale bhraman asti yeṣu niyataṃ śivadhvaniḥ 4.14cd: yaḥ śāśīva prasṛto 'mṛtāśayāt svādu saṃsravati cāmṛtaṃ param 4.15ab: parisamāptam ivogram idaṃ jagad vigalito 'viralo manaso malaḥ 4.15cd: tad api nāsti bhavatpurārgalakavāṭavighaṭṭanam aṇva pi 4.16ab: satataphullabhavanmukhapaṅkajodaravilokanalālasacetasaḥ 4.16cd: kim api tat kuru nātha manāg iva sphurasi yena mamābhimukhasthitiḥ 4.17ab: tvadavibhedamater aparaṃ nu kiṃ sukham ihāsti vibhūtir athāparā 4.17cd: tad iha tāvakadāsajanasya kiṃ kupatham eti manaḥ parihṛtya tām 4.18ab: kṣaṇam apīha na tāvakadāsatāṃ prati bhaveyam ahaṃ kila bhājanam 4.18cd: bhavadabhedarasāsavam ādarād avirataṃ rasayeyam ahaṃ na cet 4.19ab: na kila paśyati satyam ayaṃ janas tava vapur dvayadṛṣṭimalīmasaḥ 4.19cd: tad api sarvavidāśritavatsalaḥ kim idam āraṭitaṃ na śṛṇoṣi me 4.20ab: smarasi nātha kadācid apīhitaṃ viṣayasaukhyam athāpi mayārthitam 4.20cd: satatam eva bhavadvapurīkṣaṇāmṛtamabhīṣṭamalaṃ mama dehi tat 4.21ab: kila yadaiva śivādhvani tāvake kṛtapado 'smi maheśa tavecchayā 4.21cd: śubhaśatānyuditāni tadaiva me kim aparaṃ mṛgaye bhavataḥ prabho 4.22ab: yatra so 'stam ayam eti vivasvāṃś candramaḥ prabhṛtibhiḥ saha sarvaiḥ 4.22cd: kāpi sā vijayate śivarātriḥ svaprabhāprasarabhāsvararūpā 4.23ab: apy upārjitam ahaṃ triṣu lokeṣv adhipatyam amareśvara manye 4.23cd: nīrasaṃ tad akhilaṃ bhavadaṅghrisparśanāmṛtarasena vihīnam 4.24ab: bata nātha dṛḍho 'yam ātmabandho bhavadakhyātimayas tvayaiva kḷptaḥ 4.24cd: yad ayaṃ prathamānam eva me tvām avadhīrya ślathate na leśato 'pi 4.25ab: mahatām amareśa pūjyamāno 'py aniśaṃ tiṣṭhasi pūjakaikarūpaḥ 4.25cd: bahirantarapīha dṛśyamānaḥ sphurasi draṣṭṛśarīra eva śaśvat svabalanideśanākhyaṃ pañcamaṃ stotram 5.1ab: tvatpādapadmasamparkamātrasambhogasaṅginam 5.1cd: galepādikayā nātha māṃ svaveśma praveśaya 5.2ab: bhavatpādāmbujarajorājirañjitamūrdhajaḥ 5.2cd: apārarabhasārabdhanartanaḥ syām ahaṃ kadā 5.3ab: tvad ekanātho bhagavann iyad evārthaye sadā 5.3cd: tvadantarvasatir mūko bhaveyaṃ mānyathā budhaḥ 5.4ab: aho sudhānidhe svāminn aho mṛṣṭa trilocana 5.4cd: aho svādo virūpakṣety eva nṛtyeyam āraṭan 5.5ab: tvatpādapadmasaṃsparśaparimīlitalocanaḥ 5.5cd: vijṛmbheyabhavadbhaktimadirāmadaghūrṇitaḥ 5.6ab: cittabhūbhṛd bhuvi vibho vaseyaṃ kvāpi yatra sā 5.6cd: nirantaratvatpralāpamayī vṛttir mahārasā 5.7ab: yatra devīsametas tvam āsaudhādā ca gopurāt 5.7cd: bahurūpaḥ sthitas tasmin vāstavyaḥ syām ahaṃ pure 5.8ab: samullasantu bhagavan bhavadbhānumarīcayaḥ 5.8cd: vikasatveṣa yāvan me hṛtpadmaḥ pūjanāya te 5.9ab: prasīda bhagavan yena tvatpade patitaṃ sadā 5.9cd: mano me tattadāsvādya kṣīved iva galed iva 5.10ab: praharṣād vātha śokād vā yadi kuṅyād dhaṭād api 5.10cd: bāhyād athāntarād bhāvāt prakaṭībhava me prabho 5.11ab: bahir apy antar api tat syandamānaṃ sadāstu me 5.11cd: bhavatpādāmbujasparśāmṛtam atyantaśītalam 5.12ab: tvatpādasaṃsparśasudhāsaraso 'ntarnimajjanam 5.12cd: ko 'py eṣa sarvasambhogalaṅghī bhogo 'stu me sadā 5.13ab: niveditam upādatsva rāgādi bhagavan mayā 5.13cd: ādāya cāmṛtīkṛtya bhuṅkṣva bhaktajanaiḥ samam 5.14ab: aśeṣabhuvanāhāranityatṛptaḥ sukhāsanam 5.14cd: svāmin gṛhāṇa dāseṣu prasādālokanakṣaṇam 5.15ab: antarbhakticamatkāracarvaṇāmīlitekṣaṇaḥ 5.15cd: namo mahyaṃ śivāyeti pūjayam syāṃ tṛṇāny api 5.16ab: api labdhabhavadbhāvaḥ svātmollāsamayaṃ jagat 5.16cd: paśyan bhaktirasābhogair bhaveyam aviyojitaḥ 5.17ab: ākāmkṣaṇīyam aparaṃ yena nātha na vidyate 5.17cd: tava tenādvitīyasya yuktaṃ yat paripūrṇatā 5.18ab: hasyate nṛtyate yatra rāgadveṣādi bhujyate 5.18cd: pīyate bhaktipīyūṣarasas tat prāpnuyāṃ padam 5.19ab: tat tad apūrvāmodatvaccintākusumavāsanā dṛḍhatām 5.19cd: etu mama manasi yāvann aśyatu durvāsanāgandhaḥ 5.20ab: kva nu rāgādiṣu rāgaḥ kva ca haracaraṇāmbujeṣu rāgitvam 5.20cd: itthaṃ virodharasikaṃ bodhaya hitam amara me hṛdayam 5.21ab: vicaran yogadaśāsv api viṣayavyāvṛttivartamāno 'pi 5.21cd: tvaccintāmadirāmadataralīkṛtahṛdaya eva syām 5.22ab: vāci manomatiṣu tathā śarīraceṣṭāsu karaṇaracitāsu 5.22cd: sarvatra sarvadā me puraḥsaro bhavatu bhaktirasaḥ 5.23ab: śivaśivaśiveti nāmani tava niravadhi nātha japyamāne 'smin 5.23cd: āsvādayan bhaveyaṃ kam api mahārasam apunaruktam 5.24ab: sphuradanantacidātmakaviṣṭape parinipītasamastajaḍādhvani 5.24cd: agaṇitāparacinmayagaṇḍike pravicareyam ahaṃ bhavato 'rcitā 5.25ab: svavapuṣi sphuṭabhāsini śāśvate sthitikṛte na kim apy upayujyate 5.25cd: iti matiḥ sudṛḍhā bhavatāt paraṃ mama bhavaccaraṇābjarajaḥ śuceḥ 5.26ab: kim api nātha kadācana cetasi sphurati tad bhavadaṃghritalaspṛśām 5.26cd: galati yatra samastamidaṃ sudhāsarasi viśvam idaṃ diśa me sadā adhvavisphuraṇākhyaṃ sastham stotram 6.1ab: kṣaṇamātram apīśāna viyuktasya tvayā mama 6.1cd: nibiḍaṃ tapyamānasya sadā bhūyā dṛśaḥ padam 6.2ab: viyogasāre saṃsāre priyeṇa prabhuṇā tvayā 6.2cd: aviyuktaḥ sadaiva syāṃ jagatāpi viyojitaḥ 6.3ab: kāyavāṅmanasair yatra yāmi sarvaṃ tvam eva tat 6.3cd: ity eṣa paramārtho 'pi paripūrṇo 'stu me sadā 6.4ab: nirvikalpo mahānandapūrṇo yadvad bhavāṃs tathā 6.4cd: bhavatstutikarī bhūyād anurūpaiva vāṅ mama 6.5ab: bhavadāveśataḥ paśyan bhāvaṃ bhāvaṃ bhavanmayam 6.5cd: vicareyaṃ nirākāṅkṣaḥ praharṣaparipūritaḥ 6.6ab: bhagavanbhavataḥ pūrṇam paśyeyam akhilaṃ jagat 6.6cd: tāvataivāsmi santuṣṭas tato na parikhidyase 6.7ab: vilīyamānās tvayy eva vyomni meghalavā iva 6.7cd: bhāvā vibhāntu me śaśvat kramanairmalyagāminaḥ 6.8ab: svaprabhāprasaradhvastāparyantadhvāntasantatiḥ 6.8cd: santataṃ bhātu me ko 'pi bhavamadhyād bhavanmaṇiḥ 6.9ab: kāṃ bhūmikāṃ nādhiśeṣe kiṃ tat syād yan na te vapuḥ 6.9cd: śrāntas tenāprayāsena sarvatas tvām avāpnuyām 6.10ab: bhavadaṅgapariṣvaṅgasambhogaḥ svecchayaiva me 6.10cd: ghaṭatām iyati prāpte kiṃ nātha na jitaṃ mayā 6.11ab: prakaṭībhava nānyābhiḥ prārthanābhiḥ kadarthanāḥ 6.11cd: kurmas te nātha tāmyantas tvām eva mṛgayāmahe vidhuravijayanāmadheyaṃ saptamaṃ stotram 7.1ab: tvayy ānandasarasvati samarasatām etya nātha mama cetaḥ 7.1cd: pariharatu sakṛd iyantaṃ bhedādhīnaṃ mahānartham 7.2ab: etan mama na tv idam iti rāgadveṣādinigaḍadṛḍhamūle 7.2cd: nātha bhavanmayataikyapratyayaparaśuḥ patatvantaḥ 7.3ab: galatu vikalpakalaṅkāvalī samullasatu hṛdi nirargalatā 7.3cd: bhagavann ānandarasaplutāstu me cinmayī mūrtiḥ 7.4ab: rāgādimayabhavāṇḍakaluṭhitaṃ tvadbhaktibhāvanāmbikā tais taiḥ 7.4cd: āpyāyayatu rasair māṃ pravṛddhapakṣo yathā bhavāmi khagaḥ 7.5ab: tvaccaraṇabhāvanāmṛtarasasārāsvādanaipuṇaṃ labhatām 7.5cd: cittam idaṃ niḥśeṣitaviṣayaviṣāsaṅgavāsanāvadhi me 7.6ab: tvadbhaktitapanadīdhitisaṃsparśavaśān mamaiṣa dūrataram 7.6cd: cetomaṇir vimūñcaturāgādikataptavahnikaṇān 7.7ab: tasmin pade bhavantaṃ satatam upaślokayeyam atyuccaiḥ 7.7cd: hariharyaśvaviriñcā api yatra bahiḥ pratīkṣante 7.8ab: bhaktimadajanitavibhramavaśena paśyeyam avikalaṃ karaṇaiḥ 7.8cd: śivamayam akhilaṃ lokaṃ kriyāś ca pūjāmayī sakalāḥ 7.9ab: māmakamanogṛhītatvadbhaktikulāṅganāṇimādisutān 7.9cd: sūtvā subaddhamūlā mameti buddhiṃ dṛḍhīkurutām alaukikodbalanākhyam aṣṭamaṃ stotram 8.1ab: yaḥ prasādalava īśvarasthito yā ca bhaktir iva mām upeyuṣī 8.1cd: tau parasparasamanvitau kadā tādṛśe vapuṣi rūḍhim eṣyataḥ 8.2ab: tvatprabhutvaparicarvaṇajanmā ko 'py udetu paritoṣaraso 'ntaḥ 8.2cd: sarvakālam iha me param astu jñānayogamahimādi vidūre 8.3ab: lokavadbhavatu me viṣayeṣu sphīta eva bhagavanparitarṣaḥ 8.3cd: kevalaṃ tava śarīratayaitān+ lokayeyam aham astavikalpaḥ 8.4ab: dehabhūmiṣu tathā manasi tvaṃ prāṇavartmani ca bhedam upete 8.4cd: saṃvidaḥ pathiṣu teṣu ca tena svātmanā mama bhava sphuṭarūpaḥ 8.5ab: nijanijeṣu padeṣu patantv imāḥ karaṇavṛttaya ullasitā mama 8.5cd: kṣaṇamapīśa manāg api maiva bhūt tvadavibhedarasakṣatisāhasam 8.6ab: laghumasṛṇasitācchaśītalaṃ bhavadāveśavaśena bhāvayan 8.6cd: vapur akhilapadārthapaddhater vyavahārān ativartayeya tān 8.7ab: vikasatu svavapur bhavadātmakaṃ samupayāntu jaganti mamāṅgatām 8.7cd: vrajatu sarvam idaṃ dvayavalgitaṃ smṛtipathopagame 'py anupākhyatām 8.8ab: samudiyād api tādṛśatāvakānana viloka parāmṛtasamplavaḥ 8.8cd: mama ghaṭeta yathā bhavadadvayāprathanaghoradarīparipūraṇam 8.9ab: api kadācana tāvakasaṅgamāmṛtakaṇācchuraṇena tanīyasā 8.9cd: sakalalokasukheṣu parāṅmukho na bhavitāsmy ubhayacyuta eva kim 8.10ab: satatam eva bhavaccaraṇāmbujākaracarasya hi haṃsavarasya me 8.10cd: upari mūlatalād api cāntarād upanamatv aja bhaktimṛṇālikā 8.11ab: upayāntu vibho samastavastūny api cintāviṣayaṃ dṛśaḥ padaṃ ca 8.11cd: mama darśanacintanaprakāśāmṛtasārāṇi paraṃ parisphurantu 8.12ab: parameśvara teṣu teṣu kṛcchreṣv api nāmopanamatsv ahaṃ bhaveyam 8.12cd: na paraṃ gatabhīs tvadaṅgasaṅgādupajātādhikasammado 'pi yāvat 8.13ab: bhavadātmani viśvam umbhitaṃ yad bhavataivāpi bahiḥ prakāśyate tat 8.13cd: iti yad dṛḍhaniścayopajuṣṭaṃ tad idāniṃ sphuṭam eva bhāsatām svātantryavijayākhyaṃ navamaṃ stotram 9.1ab: kadā navarasārdrārdrasambhogāsvādanotsukam 9.1cd: pravarteta vihāyānyan mama tvatsparśane manaḥ 9.2ab: tvadekaraktas tvatpādapūjāmātramahādhanaḥ 9.2cd: kadā sākṣātkariṣyāmi bhavantam ayam utsukaḥ 9.3ab: gāḍhānurāgavaśato nirapekṣībhūtamānaso 'smi kadā 9.3cd: paṭapaṭiti vighaṭitākhilamahārgalas tvām upaiṣyāmi 9.4ab: svasaṃvitsārahṛdayādhiṣṭhānāḥ sarvadevatāḥ 9.4cd: kadā nātha vaśīkuryāṃ bhavadbhaktiprabhāvataḥ 9.5ab: kadā me syād vibho bhūri bhaktyānandarasotsavaḥ 9.5cd: yadālokasukhānandī pṛthaṅ nāmāpi lapsyate 9.6ab: īśvaram abhayam udāraṃ pūrṇam akāraṇam apahnutātmānaṃ 9.6cd: sahasābhijñāya kadā svāmijanaṃ lajjayiṣyāmi 9.7ab: kadā kām api tāṃ nātha tava vallabhatām iyām 9.7cd: yayā māṃ prati na kvāpi yuktaṃ te syāt palāyitum 9.8ab: tattvato 'śeṣajantūnāṃ bhavatpūjāmayātmanām 9.8cd: dṛṣṭyānumoditarasāplāvitaḥ syāṃ kadā vibho 9.9ab: jñānasya paramā bhūmir yogasya paramā daśā 9.9cd: tvadbhaktir yā vibho karhi pūrṇa me syāt tadarthitā 9.10ab: sahasaivasādya kadā gāḍham avaṣṭabhya harṣavivaśo 'ham 9.10cd: tvaccaraṇavaranidhānaṃ sarvasya prakaṭayiṣyāmi 9.11ab: paritaḥ prasaracchuddhatvadālokamayaḥ kadā 9.11cd: syāṃ yatheśa na kiñcin me māyācchāyābilaṃ bhavet 9.12ab: ātmasātkṛtaniḥśeṣamaṇḍalo nirvyapekṣakaḥ 9.12cd: kadā bhaveyaṃ bhagavaṃs tvadbhaktagaṇanāyakaḥ 9.13ab: nātha lokābhimānānām apūrvaṃ tvaṃ nibandhanam 9.13cd: mahābhimānaḥ karhi syāṃ tvadbhaktirasapūritaḥ 9.14ab: aśeṣaviṣayāśūnyaśrīsamāśleṣasusthitaḥ 9.14cd: śayīyam iva śītāṅghrikuśeśayayuge kadā 9.15ab: bhaktyāsavasamṛddhāyās tvatpūjābhogasampadaḥ 9.15cd: kadā pāraṃ gamiṣyāmi bhaviṣyāmi kadā kṛtī 9.16ab: ānandabāṣpapūraskhalitaparibhrāntagadgadākrandaḥ 9.16cd: hāsollāsitavadanas tvatsparśarasaṃ kadāpsyāmi 9.17ab: paśujanasamānavṛttām avadhūya daśām imāṃ kadā śambho 9.17cd: āsvādayeya tāvakabhaktocitam ātmano rūpam 9.18ab: labdhāṇimādisiddhir vigalitasakalopatāpasantrāsaḥ 9.18cd: tvadbhaktirasāyanapānakriḍhāniṣṭaḥ kadāsīya 9.19ab: nātha kadā sa tathāvidha ākrando me samuccared vāci 9.19cd: yat samanantaram eva sphurati puras tāvakī mūrtiḥ 9.20ab: gāḍhagāḍhabhavadaṅghrisarojāliṅganavyasanatatparacetāḥ 9.20cd: vastv avastv idam ayatnata eva tvāṃ kadā samavalokayitāsmi avicchedabhaṅgākhyaṃ daśamaṃ stotram 10.1ab: na soḍhavyam avaśyam te jagadekaprabhor idam 10.1cd: māheśvarāś ca lokānām itareṣāṃ samāś ca yat 10.2ab: ye sadaivānurāgeṇa bhavatpādānugāminaḥ 10.2cd: yatra tatra gatā bhogāṃs te kāṃś cid upabhuñjate 10.3ab: bhartā kālāntako yatra bhavāṃs tatra kuto rujaḥ 10.3cd: tatra cetarabhogāśā kā lakṣmīr yatra tāvakī 10.4ab: kṣanamātrasukhenāpi vibhur yenāsi labhyase 10.4cd: tadaiva sarvaḥ kālo 'sya tvadānandena pūryate 10.5ab: ānandarasabindus te candramā galito bhuvi 10.5cd: sūryas tathā te prasṛtaḥ saṃhārī tejasaḥ kaṇaḥ 10.6ab: baliṃ yāmas tṛtīyāya netrāyāsmai tava prabho 10.6cd: alaukikasya kasyāpi māhātmyasyaikalakṣmaṇe 10.7ab: tenaiva dṛṣṭo 'si bhavaddarśanādyo 'tihṛṣyati 10.7cd: kathañcid yasya vā harṣaḥ ko 'pi tena tvam īkṣitaḥ 10.8ab: yeṣām prasanno 'si vibho yair labdhaṃ hṛdayaṃ tava 10.8cd: ākṛṣya tvatpurāttais tu bāhyam ābhyantarīkṛtam 10.9ab: tvad ṛte nikhilaṃ viśvaṃ samadṛgyātam īkṣyatām 10.9cd: īśvaraḥ punar etasya tvam eko viṣamekṣaṇaḥ 10.10ab: āstāṃ bhavatprabhāveṇa vinā sattaiva nāsti yat 10.10cd: tvaddūṣaṇakathā yeṣām tvad ṛte nopapadyate 10.11ab: bāhyāntarāntarāyālīkevale cetasi sthitiḥ 10.11cd: tvayi cet syān mama vibho kim anyad upayujyate 10.12ab: anye bhramanti bhagavann ātmany evātiduḥsthitāḥ 10.12cd: anye bhramanti bhagavann ātmany evātisusthitāḥ 10.13ab: apītvāpi bhavadbhaktisudhām anavalokya ca 10.13cd: tvām īśa tvatsamācāramātrāt siddhyanti jantavaḥ 10.14ab: bhṛtyā vayaṃ tava vibho tena trijagatāṃ yathā 10.14cd: bibharṣy ātmānam evaṃ te bharttavyā vayam apy alam 10.15ab: parānandāmṛtamaye dṛṣṭo 'pi jagadātmani 10.15cd: tvayi sparśarase 'tyantatarasutkaṇṭhito(?) 'smi te 10.16ab: deva duḥkhāny aśeṣāṇi yāni saṃsāriṇām api 10.16cd: ghṛtyākhyabhavadīyātmayutāny āyānti sahyatām 10.17ab: sarvajñe sarvaśaktau ca tvayy eva sati cinmaye 10.17cd: sarvathāpy asato nātha yuktāsya jagataḥ prathā 10.18ab: tvatprāṇitāḥ sphurantīme guṇā loṣṭopamā api 10.18cd: nṛtyanti pavanoddhūtāḥ kārpāsāḥ picavo yathā 10.19ab: yadi nātha guṇeṣv ātmābhimāno na bhavet tataḥ 10.19cd: kena hīyeta jagatas tvadekātmatayā prathā 10.20ab: vandyās te 'pi mahīyāṃsaḥ pralayopagatā api 10.20cd: tvatkopapāvakasparśapūtā ye parameśvara 10.21ab: mahāprakāśavapuṣi vispaṣṭe bhavati sthite 10.21cd: sarvato 'pīśa tat kasmāt tamasi prasarāmy aham 10.22ab: avibhāgo bhavān eva svarūpam amṛtaṃ mama 10.22cd: tathāpi martyadharmāṇām aham evaikam āspadam 10.23ab: maheśvareti yasyāsti nāmakaṃ vāgvibhūṣaṇam 10.23cd: praṇāmāṅkaś ca śirasi sa evaikaḥ prabhāvitaḥ 10.24ab: sadasac ca bhavān eva yena tenāprayāsataḥ 10.24cd: svarasenaiva bhagavaṃs tathā siddhiḥ kathaṃ na me 10.25ab: śivadāsaḥ śivaikātmā kiṃ yan nāsādayet sukham 10.25cd: tarpyo 'smi devamukhyānām api yenāmṛtāsavaiḥ 10.26ab: hṛnnābhyor antarālasthaḥ prāṇināṃ pittavigrahaḥ 10.26cd: grasase tvaṃ mahāvahniḥ sarvaṃ sthāvarajaṅgamam autsukyaviśvasitanāmaikādaśaṃ stotram 11.1ab: jagad idam athavā suhṛdo bandhujano vā na bhavati mama kim api 11.1cd: tvaṃ punar etat sarvaṃ yadā tadā ko 'paro me 'stu 11.2ab: svāmin maheśvaras tvaṃ sākṣāt sarvaṃ jagat tvam eveti 11.2cd: vastv eva siddhim etv iti yācñā tatrāpi yācñaiva 11.3ab: tribhuvanādhipatitvam apīha yat tṛṇam iva pratibhāti bhavajjuṣaḥ 11.3cd: kim iva tasya phalaṃ śubhakarmaṇo bhavati nātha bhavatsmaraṇād ṛte 11.4ab: yena naiva bhavato 'sti vibhinnaṃ kiñcanāpi jagatāṃ prabhavaś ca 11.4cd: tvadvijṛmbhitam ato 'dbhutakarmasv apy udeti na tava stutibandhaḥ 11.5ab: tvanmayo 'smi bhavadarcananiṣṭhaḥ sarvadāham iti cāpy avirāmam 11.5cd: bhāvayann api vibho svarasena svapnago 'pi na tathā kim iva syām 11.6ab: ye manāg api bhavaccaraṇābjodbhūtasaurabhalavena vimṛṣṭaḥ 11.6cd: teṣu visram iva bhavati samastaṃ bhogajātam amarair api mṛgyam 11.7ab: hṛdi te na tu vidyate 'nyad anyad vacane karmaṇi cānyad eva śaṃbho 11.7cd: paramārthasato 'py anugraho vā yadi vā nigraha eka eva kāryaḥ 11.8ab: mūḍho 'smi duḥkhakalito 'smi jarādidoṣabhīto 'smi śaktirahito 'smi tavāśrito 'smi 11.8cd: śambho tathā kalaya śīghram upaimi yena sarvottamāṃ dhuram apojjhitaduḥkhamārgaḥ 11.9ab: tvatkarṇadeśama dhiśayya mahārghabhāvam ākranditāni mama tucchatarāṇi yānti 11.9cd: vaṃśāntarālapatitāni jalaikadeśakhaṇḍāni mauktikamaṇitvam ivodvahanti 11.10ab: kim iva ca labhyate bata na tair api nātha janaiḥ kṣaṇam api kaitavād api ca ye tava nāmni ratāḥ 11.10cd: śiśiramayūkhaśekhara tathā kuru yena mama kṣatamaraṇo 'ṇimādikam upaimi yathā vibhavam 11.11ab: śambho śarva śaśaṅkaśekhara śiva tryakṣākṣamālādhara śrīmann ugrakapālalāñchana lasadbhīmatriśūlāyudha 11.11cd: kāruṇyāmbunidhe trilokaracanāśīlograśaktyātmaka śrīkaṇṭhāśu vināśayāśubhabharān ādhat svasiddhiṃ parām 11.12ab: tat kiṃ nātha bhaven na yatra bhagavān nirmātṛtām aśnute bhāvaḥ syāt kim u tasya cetanavato nāśāsti yaṃ śaṅkaraḥ 11.12cd: itthaṃ te parameśvarākṣatamahāśakteḥ sadā saṃśritaḥ saṃsāre 'tra nirantarādhividhuraḥ kliśyāmy ahaṃ kevalam 11.13ab: yady apy atra varapradoddhatatamāḥ pīḍājarāmṛtyava ete vā kṣaṇam āsatāṃ bahumataḥ śabdādir evāsthiraḥ 11.13cd: tatrāpi spṛhayāmi santatasukhākāṅkṣī ciraṃ sthāsnave bhogāsvādayutatvadaṅghrikamaladhyānāgrya jīvātave 11.14ab: he nātha praṇatārtināśanapaṭo śreyonidhe dhūrjaṭe duḥkhaikāyatanasya janmamaraṇatrastasya me sāmpratam 11.14cd: tac ceṣṭasva yathā manojñaviṣayāsvādapradā uttamā jīvann eva samaśnuve 'ham acalāḥ siddhīs tvadarcāparaḥ 11.15ab: namo mohamahādhvāntadhvaṃsanānanyakarmaṇe 11.15cd: sarvaprakāśātiśayaprakāśāyendulakṣmaṇe rahasyanirdeśanāma dvādaśaṃ stotram 12.1ab: sahakāri na kiñcid iṣyate bhavato na pratibandhakaṃ dṛṣi 12.1cd: bhavataiva hi sarvam āplutaṃ katham adyāpi tathāpi nekṣase 12.2ab: api bhāvagaṇād apīndriyapracayād apy avabodhamadhyataḥ 12.2cd: prabhavantam api svataḥ sadā paripaśyeyam apoḍhaviśvakam 12.3ab: kathaṃ te jāyeran katham api ca te darśanapathaṃ vrajeyuḥ kenāpi prakṛtimahatāṅkena khacitaḥ 12.3cd: tathotthāyotthāya sthalajalatṛṇāder akhilataḥ padārthadyānsṛṣṭisravadamṛtapūrair(?) vikirasi 12.4ab: sākṣatkṛta bhavadrūpaprasṛtāmṛtatarpitāḥ 12.4cd: unmūlitatṛṣo mattā vicaranti yathāruci 12.5ab: na tadā na sadā na caikadety api sā yatra na kāladhīr bhavet 12.5cd: tad idaṃ bhavadīyadarśanaṃ na ca nityaṃ na ca kathyate 'nyathā 12.6ab: tvadvilokanasamutkacetaso yogasiddhir iyatī sadāstu me 12.6cd: yad viśeyam abhisandhimātratas tvatsudhāsadanam arcanāya te 12.7ab: nirvikalpabhavadīyadarśanapraptiphullamanasāṃ mahātmanām 12.7cd: ullasanti vimalāni helayā ceṣṭitāni ca vacāṃsi ca sphuṭam 12.8ab: bhavanbhavadīyapādayor nivasann antara eva nirbhayaḥ 12.8cd: bhavabhūmiṣu tāsu tāsv ahaṃ prabhum arceyam anargalakriyaḥ 12.9ab: bhavadaṅghrisaroruhodare parilīno galitaparaiṣaṇaḥ 12.9cd: atimātramadhūpayogataḥ paritṛpto vicareyam icchayā 12.10ab: yasya dambhād iva bhavatpūjāsaṅkalpa utthitaḥ 12.10cd: tasyāpy avaśyam uditaṃ sannidhānaṃ tavocitam 12.11ab: bhagavann itarān apekṣiṇā nitarām ekarasena cetasā 12.11cd: sulabhaṃ sakalopaśāyinaṃ prabhum ātṛpti pibeyam asmi kim 12.12ab: tvayā nirākṛtam sarvaṃ heyam etat tad eva tu 12.12cd: tvanmayaṃ samupādeyam ity ayaṃ sārasaṃgrahaḥ 12.13ab: bhavato 'ntaracāri bhāvajātaṃ prabhuvanmukhyatayaiva pūjitaṃ tat 12.13cd: bhavato bahir apy abhāvamātrā katham īśān bhavet samarcyate vā 12.14ab: niḥśabdaṃ nirvikalpaṃ ca nirvyākṣepam athānisam 12.14cd: kṣobhe 'py adhyakṣamī kṣeyaṃ tryakṣa tvām eva sarvataḥ 12.15ab: prakaṭaya nijadhāma deva yasmiṃs tvam asi sadā parameśvarīsametaḥ 12.15cd: prabhucaraṇarajaḥsamānakakṣyāḥ kim aviśvāsapadaṃ bhānti bhṛtyāḥ 12.16ab: darśanapatham upayāto 'py apasarasi kuto mameśa bhṛtyasya 12.16cd: kṣaṇamātrakam iha na bhavasi kasya na jantor dṛśor viṣayaḥ 12.17ab: aikyasaṃvidamṛtācchadhārayā santataprasṛtayā kadā vibho 12.17cd: plāvanāt paramabhedamānayaṃs tvāṃ nijaṃ ca vapur āpnuyāṃ mudam 12.18ab: aham ity amuto 'varuddhalokād bhavadīyāt pratipattisārato me 12.18cd: aṇumātrakam eva viśvaniṣṭhaṃ ghaṭatāṃ yena bhaveyam arcitā te 12.19ab: aparimitarūpam ahaṃ taṃ taṃ bhāvaṃ pratikṣaṇaṃ paśyan 12.19cd: tvām eva viśvarūpaṃ nijanāthaṃ sādhu paśyeyam 12.20ab: bhavadaṅgagataṃ tam eva kasmān na manaḥ paryaṭatīṣṭam artham artham 12.20cd: prakṛtikṣatir asti no tathāsya mama cecchā paripūryate paraiva 12.21ab: śataśaḥ kila te tavānubhāvād bhagavan ke 'py amunaiva cakṣuṣā ye 12.21cd: api hālikaceṣṭayā carantaḥ paripaśyanti bhavadvapuḥ sadāgre 12.22ab: na sā matir udeti yā na bhavati tvadicchāmayī sadā śubham athetarad bhagavataivam ācaryate 12.22cd: ato 'smi bhavadātmako bhuvi yathā tathā sañcaran sthi to 'niśam abādhitatvadamalaṅghripūjotsavaḥ 12.23ab: bhavadīyagabhīrabhāṣiteṣu pratibhā samyag udetu me puro 'taḥ 12.23cd: tadanuṣṭhitaśaktir apy atas tadbhavadarcāvyasanaṃ ca nirvirāmam 12.24ab: vyavahārapade 'pi sarvadā pratibhātv arthakalāpa eṣa mām 12.24cd: bhavato 'vayavo yathā na tu svata evādaraṇīyatāṃ gataḥ 12.25ab: manasi svarasena yatra tatra pracaraty apy aham asya gocareṣu 12.25cd: prasṛto 'py avilola eva yuṣmatparicaryācaturaḥ sadā bhaveyam 12.26ab: bhagavan bhavadicchayaiva dāsas tava jāto 'smi parasya nātra śaktiḥ 12.26cd: katham eṣa tathāpi vaktrabimbaṃ tava paśyāmi na jātu citram etat 12.27ab: samutsukās tvāṃ prati ye bhavantaṃ pratyartharūpād avalokayanti 12.27cd: teṣām aho kiṃ tadupasthitaṃ syāt kiṃ sādhanaṃ vā phalitaṃ bhavet tat 12.28ab: bhāvā bhāvatayā santu bhavadbhāvena me bhava 12.28cd: tathā na kiñcid apy astu na kiñcid bhavato 'nyathā 12.29ab: yan na kiñcid api tanna kiñcid apy astu kiñcid api kiñcid eva me 12.29cd: sarvathā bhavatu tāvatā bhavān sarvato bhavati labdhapūjitaḥ saṃgrahastotranāma trayodaśaṃ stotram 13.1ab: saṃgrahena sukhaduḥkhalakṣaṇaṃ māṃ prati sthitam idaṃ śṛṇu prabho 13.1cd: saukhyam eṣa bhavatā samāgamaḥ svāminā viraha eva duḥkhitā 13.2ab: antar apy atitarām aṇīyasī yā tvadaprathanakālikāsti me 13.2cd: tām apīśa parimṛjya sarvataḥ svaṃ svarūpam amalaṃ prakāśaya 13.3ab: tāvake vapuṣi viśvanirbhare citsudhārasamaye niratyaye 13.3cd: tiṣṭhataḥ satatam arcataḥ prabhuṃ jīvitaṃ mṛtam athānyad astu me 13.4ab: īśvaro 'ham aham eva rūpavān paṇḍito 'smi subhago 'smi ko 'paraḥ 13.4cd: matsamo 'sti jagatīti śobhate mānitā tvadanurāgiṇaḥ param 13.5ab: devadeva bhavadadvayāmṛtākhyātisaṃharaṇalabdhajanmanā 13.5cd: tad yathāsthitapadārthasaṃvidā māṃ kuruṣva caraṇārcanocitam 13.6ab: dhyāyate tad anu dṛśyate tataḥ spṛśyate ca parameśvaraḥ svayam 13.6cd: yatra pūjanamahotsavaḥ sa me sarvadāstu bhavato 'nubhāvataḥ 13.7ab: yady athāsthitapadārthadarśanaṃ yuṣmadarcanamahotsavaś ca yaḥ 13.7cd: yugmam etad itaretarāśrayaṃ bhaktiśāliṣu sadā vijṛmbhate 13.8ab: tattadindriyamukhena santataṃ yuṣmadarcanarasāyanāsavam 13.8cd: sarvabhāvacaṣakeṣu pūriteṣv āpibann api bhaveyam unmadaḥ 13.9ab: anyavedyam aṇumātram asti na svaprakāśam akhilaṃ vijṛmbhate 13.9cd: yatra nātha bhavataḥ pure sthitaṃ tatra me kuru sadā tavārcituḥ 13.10ab: dāsadhāmni viniyojito 'py ahaṃ svecchayaiva parameśvara tvayā 13.10cd: darśanena na kim asmi pātritaḥ pādasaṃvahanakarmaṇāpi vā 13.11ab: śaktipātasamaye vicāraṇaṃ prāptam īśa na karoṣi karhicit 13.11cd: adya māṃ prati kim āgataṃ yataḥ svaprakāśanavidhau vilambase 13.12ab: tatra tatra viṣaye bahirvibhāty antare ca parameśvarīyutam 13.12cd: tvāṃ jagattritayanirbharaṃ sadā lokayeya nijapāṇipūjitam 13.13ab: svāmisaudham abhisandhimātrato nirvibandham adhiruhya sarvadā 13.13cd: syāṃ prasāda paramāmṛtāsavāpānakeliparilabdhanirvṛtiḥ 13.14ab: yatsamastasubhagārthavastuṣu sparśamātravidhinā camatkṛtim 13.14cd: tāṃ samarpayati tena te vapuḥ pūjayanty acalabhaktiśālinaḥ 13.15ab: sphārayasy akhilam ātmanā sphuran viśvam āmṛśasi rūpam āmṛśan 13.15cd: yat svayaṃ nijarasena ghurṇase tat samullasati bhāvamaṇḍalam 13.16ab: yo 'vikalpam idam arthamaṇḍalaṃ paśyatīśa nikhilaṃ bhavadvapuḥ 13.16cd: svātmapakṣaparipūrite jagaty asya nityasukhinaḥ kuto bhayam 13.17ab: kaṇṭhakoṇaviniviṣṭam īśa te kālakūṭam api me mahāmṛtam 13.17cd: apy upāttam amṛtaṃ bhavadvapur bhedavṛtti yadi rocate na me 13.18ab: tvatpralāpamayaraktagītikāni tya yuktavadanopaśobhitaḥ 13.18cd: syām athāpi bhavadarcanakriyāpreyasīparigatāśayaḥ sadā 13.19ab: īhitaṃ na bata pārameśvaraṃ śakyate gaṇayituṃ tathā ca me 13.19cd: dattam apy amṛtanirbharaṃ vapuḥ svaṃ na pātum anumanyate tathā 13.20ab: tvām agādham avikalpam advayaṃ svaṃ svarūpam akhilārthaghasmaram 13.20cd: āviśann aham umeśa sarvadā pūjayeyam abhisaṃstuvīya ca jayastotranāma caturdaśaṃ stotram 14.1ab: jayalakṣmīnidhānasya nijasya svāminaḥ puraḥ 14.1cd: jayodghoṣaṇapīyūṣarasam āsvādaye kṣaṇam 14.2ab: jayaikarudraikaśiva mahādeva maheśvara 14.2cd: pārvatīpraṇayiñ śarva sarvagīrvāṇapūrvaja 14.3ab: jaya trailokyanāthaikalāñchanālikalocana 14.3cd: jaya pītartalokārtikālakūṭāṅkakandhara 14.4ab: jaya mūrtatriśaktyātmiśataśūlollasatkara 14.4cd: jayecchāmātrasiddārthapūjārhacaraṇāmbuja 14.5ab: jaya śobhaśatasyandilokottaravapurdhara 14.5cd: jayaikajaṭikākṣīṇagaṅgākṛtyāttabhasmaka 14.6ab: jaya kṣīrodaparyastajyotsnācchāyānulepana 14.6cd: jayeśvarāṅgasaṅgottharatnakāntāhimaṇḍana 14.7ab: jayākṣayaikaśītāṃśukalāsadṛśasaṃśraya 14.7cd: jaya gaṅgāsadārbdhaviśvaiśvaryābhiṣecana 14.8ab: jayādharāṅgasaṃsparśapāvanīkṛtagokula 14.8cd: jaya bhaktimadābaddhagoṣṭhīniyatasannidhe 14.9ab: jaya svecchātapodeśavipralambhitabāliśa 14.9cd: jaya gaurīpariṣvaṅgayogyasaubhāgyabhājana 14.10ab: jaya bhaktirasārdrārdrabhāvopāyanalampaṭa 14.10cd: jaya bhaktimadoddāmabhaktavāṅnṛttatoṣita 14.11ab: jaya brahmādideveśaprabhāvaprabhavavyaya 14.11cd: jayalokeśvaraśreṇiśirovidhṛtaśāsana 14.12ab: jayasarvajagannyastasvamudrāvyaktavaibhava 14.12cd: jayātmadānaparyantaviśveśvaramaheśvara 14.13ab: jaya trailokyasargecchāvasarāsaddvitīyaka 14.13cd: jayaiśvaryabharodvāhadevīmātrasahāyaka 14.14ab: jayākramasamākrāntasamastabhuvanatraya 14.14cd: jayāvigītam ābālagīyamāneśvaradhvane 14.15ab: jayānukampādiguṇānapekṣasahajonnate 14.15cd: jaya bhīṣmamahāmṛtyughaṭanāpūrvabhairava 14.16ab: jaya viśvakṣayoccaṇḍakriyāniṣparipanthika 14.16cd: jaya śreyaḥśataguṇānuganāmānukīrtana 14.17ab: jaya helāvitīrnaitadamṛtākarasāgara 14.17cd: jaya viśvakṣayakṣepikṣaṇakopāśuśukṣaṇe 14.18ab: jaya mohāndhakārāndhajīvalokaikadīpaka 14.18cd: jaya prasuptajagatījāgarūkādhipūruṣa 14.19ab: jaya dehādrikuñjāntarnikūjañjīvajīvaka 14.19cd: jaya sanmānasavyomavilāsivarasārasa 14.20ab: jaya jāmbūnadodagradhātūdbhavagirīśvara 14.20cd: jaya pāpiṣu nindolkāpātanotpātacandramaḥ 14.21ab: jaya kaṣṭatapaḥkliṣṭamunidevadurāsada 14.21cd: jaya sarvadaśārūḍhabhaktimallokalokita 14.22ab: jaya svasampatprasarapatrīkṛtanijāśrita 14.22cd: jaya prapannajanatālālanaikaprayojana 14.23ab: jaya sargasthitidhvaṃsakāraṇaikāvadānaka 14.23cd: jaya bhaktimadālolalīlotpalamagotsava 14.24ab: jaya jayabhājana jaya jitajanmajarāmaraṇa jaya jagajjyeṣṭha 14.24cd: jaya jaya jaya jaya jaya jaya jaya jaya jaya jaya jaya jaya jaya tryakṣa bhaktistotranāma pañcadaśaṃ 15.1ab: trimalakṣālino granthāḥ santi tatpāragāstathā 15.1cd: yoginaḥ paṇḍitāḥ svasthās tvadbhaktā eva tattvataḥ 15.2ab: māyīyakālaniyatirāgādyāhāratarpitāḥ 15.2cd: caranti sukhino nātha bhaktimanto jagattaṭe 15.3ab: rudanto vā hasanto vā tvām uccaiḥ pralapanty amī 15.3cd: bhaktāḥ stutipadoccāropacārāḥ pṛthag eva te 15.4ab: na virakto na cāpīśo mokṣākāṅkṣī tvadarcakaḥ 15.4cd: bhaveyam api tūdriktabhaktyāsavarasonmadaḥ 15.5ab: bāhyaṃ hṛdaya evāntar abhihṛtyaiva yo 'rcati 15.5cd: tvām īśa bhaktipīyūṣarasapūrair namāmi tam 15.6ab: dharmādharmātmanor antaḥ kriyayor jñānayos tathā 15.6cd: sukhaduḥkhātmanor bhaktāḥ kim apy āsvādayanty aho 15.7ab: carācarapitaḥ svāmin apy andhā api kuṣṭhinaḥ 15.7cd: śobhante param uddāmabhavadbhaktivibhūṣaṇāḥ 15.8ab: śiloñchapicchakaśipuvicchāyāṅgā api prabho 15.8cd: bhavadbhaktimahoṣmaṇo rājarājam apīśate 15.9ab: sudhārdrāyāṃ bhavadbhaktau luṭhatāpy ārurukṣuṇā 15.9cd: cetasaiva vibho 'rcanti kecit tvām abhitaḥ sthitāḥ 15.10ab: rakṣaṇīyaṃ vardhanīyaṃ bahumānyam idaṃ prabho 15.10cd: saṃsāradurgatiharaṃ bhavadbhaktimahādhanam 15.11ab: nātha te bhaktajanatā yady api tvayi rāgiṇī 15.11cd: tathāpīrṣyāṃ vihāyāsyās tuṣṭāstu svāminī sadā 15.12ab: bhavadbhāvaḥ puro bhāvī prāpte tvadbhaktisambhave 15.12cd: labdhe dugdhamahākumbhe hatā dadhani gṛdhnutā 15.13ab: kim iyaṃ na siddhir atulā kiṃ vā mukhyaṃ na saukhyam āsravati 15.13cd: bhaktir upacīyamānā yeyaṃ śambhoḥ sadātanī bhavati 15.14ab: manasi maline madīyemagnā tvadbhaktimaṇilatā kaṣṭam 15.14cd: na nijān api tanute tānapauruṣeyān svasampadullāsān 15.15ab: bhaktir bhagavati bhavati trilokanāthe nanūttamā siddhiḥ 15.15cd: kiṃ tv aṇimādikavirahāt saiva na pūrṇeti cintā me 15.16ab: bāhyato 'ntar api cotkaṭonmiṣattryambakastavakasaurabhāḥ śubhāḥ 15.16cd: vāsayanty api viruddhavāsanān yogino nikaṭavāsino 'khilān 15.17ab: jyotir asti kathayāpi na kiṃ cid viśvam apy atisuṣuptam aśeṣam 15.17cd: yatra nātha śivarātripade 'smin nityam arcayati bhaktajanas tvām 15.18ab: sattvaṃ satyaguṇe śive bhagavati sphārībhavatv arcane cūḍāyāṃ vilasantu śaṅkarapadaprodyadrajaḥsaṅcayāḥ 15.18cd: rāgādismṛtivāsanām api samucchettuṃ tamo jṛmbhatāṃ śambho me bhavatāt tvadātmavilaye traiguṇyavargo 'thavā 15.19ab: saṃsārādhvā sudūraḥ kharataravividhavyādhidagdhāṅgayaṣṭiḥ bhogā naivopabhuktā yad api sukham abhūj jātu nanno cirāya 15.19cd: itthaṃ vyartho 'smi jātaḥ śaśidharacaraṇākrāntikāntottamāṅgas tvadbhaktaś ceti tan me kuru sapadi mahāsampado dīrghadīrghāḥ pāśānudbhedanāma ṣoḍaśaṃ stotram 16.1ab: na kiñcid eva lokānāṃ bhavadāvaraṇaṃ prati \var{yat kiṃ cid eva bhūtānāṃ\em \cit \Naresvaraparīksā} 16.1cd: na kiñcid eva bhaktānāṃ bhavadāvaraṇaṃ prati 16.2ab: apy upāyakramaprāpyaḥ saṅkulo 'pi viśeṣaṇaiḥ 16.2cd: bhaktibhājāṃ bhavān ātmā sakṛc chuddho 'vabhāsate 16.3ab: jayanto 'pi hasanty ete jitā api hasanti ca 16.3cd: bhavadbhaktisudhāpānamattāḥ ke 'py eva ye prabho 16.4ab: śuṣkakaṃ maiva siddheya maiva mucyeya vāpi tu 16.4cd: svādiṣṭhaparakāṣṭāptatvadbhaktirasanirbharaḥ 16.5ab: yathaivajñātapūrvo 'yaṃ bhavadbhaktiraso mama 16.5cd: ghaṭitas tadvad īśāna sa eva paripuṣyatu 16.6ab: satyena bhagavan nānyaḥ prārthanāprasaro 'sti me 16.6cd: kevalaṃ sa tathā ko 'pi bhaktyāveśo 'stu me sadā 16.7ab: bhaktikṣīvo 'pi kupyeyaṃ bhavāyānuśayīya ca 16.7cd: tathā haseyaṃ udyāṃ ca raṭeyaṃ ca śivety alam 16.8ab: viṣamastho 'pi svastho 'pi rudann api hasann api 16.8cd: gambhīro 'pi vicitto 'pi bhaveyaṃ bhaktitaḥ prabho 16.9ab: bhaktānāṃ nāsti saṃvedyaṃ tvadantar yadi vā bahiḥ 16.9cd: ciddharmā yatra na bhavān nirvikalpaḥ sthitaḥ svayam 16.10ab: bhaktā nindānukare 'pi tavāmṛtakaṇair iva 16.10cd: hṛṣyanty evāntarāviddhās tīkṣṇaromāñcasūcibhiḥ 16.11ab: duḥkhāpi vedanā bhaktimatāṃ bhogāya kalpate 16.11cd: yeṣāṃ sudhārdrā sarvaiva saṃvit tvaccandrikāmayī 16.12ab: yatra tatroparuddhānāṃ bhaktānāṃ bahirantare 16.12cd: nirvyājaṃ tvadvapuḥsparśarasāsvādasukhaṃ samam 16.13ab: taveśa bhakter arcāyāṃ dainyāṃśaṃ dvayasaṃśrayam 16.13cd: vilupyāsvādayanty eke vapur acchaṃ sudhāmayam 16.14ab: bhrāntās tīrthadṛśo bhinnā bhrānter eva hi bhinnatā 16.14cd: niṣpratidvandvi vastv ekaṃ bhaktānāṃ tvaṃ tu rājase 16.15ab: mānāvamānarāgādiniṣpākavimalaṃ manaḥ 16.15cd: yasyāsau bhaktimāṃl lokatulyaśīlaḥ kathaṃ bhavet 16.16ab: rāgadveṣandhakāro 'pi yeṣāṃ bhaktitviṣā jitaḥ 16.16cd: teṣāṃ mahīyasām agre katame jñānaśālinaḥ 16.17ab: yasya bhaktisudhāsnānapānādividhisādhanam 16.17cd: tasya prārabdhamadhyāntadaśāsūccaiḥ sukhāsikā 16.18ab: kīrtyaś cintāpadaṃ mṛgyaḥ pūjyo yena tvam eva tat 16.18cd: bhavadbhaktimatāṃ ślāghyā lokayātrā bhavanmayī 16.19ab: muktisaṃjñā vipakvāyā bhakter eva tvayi prabho 16.19cd: tasyām ādyadaśārūḍhā muktakalpā vayaṃ tataḥ 16.20ab: duḥkhāgamo 'pi bhūyān me tvadbhaktibharitātmanaḥ 16.20cd: tvatparācī vibho mā bhūd api saukhyaparamparā 16.21ab: tvaṃ bhaktyā prīyase bhaktiḥ prīte tvayi ca nātha yat 16.21cd: tadanyonyāśrayaṃ yuktaṃ yathā vettha tvam eva tat 16.22ab: sākāro vā nirākaro vāntar vā bahir eva vā 16.22cd: bhaktimattātmanāṃ nātha sarvathāsi sudhāmayaḥ 16.23ab: asminn eva jagaty antar bhavadbhaktimataḥ prati 16.23cd: harṣaprakāśanaphalam anyad eva jagatsthitam 16.24ab: guhye bhaktiḥ pare bhaktir bhaktir viśvamaheśvare 16.24cd: tvayi śambhau śive deva bhaktir nāma kim apy aho 16.25ab: bhaktir bhaktiḥ pare bhaktir bhaktir nāma samutkaṭā 16.25cd: tāraṃ viraumi yat tīvrā bhaktir me 'stu paraṃ tvayi 16.26ab: yato 'smi sarvaśobhānāṃ prasavāvanir īśa tat 16.26cd: tvayi lagnam anarghaṃ syād ratnam vā yadi vā tṛṇam 16.27ab: āvedakād ā ca vedyād yeṣāṃ saṃvedanādhvani 16.27cd: bhavatā na viyogo 'sti te jayanti bhavajjuṣaḥ 16.28ab: saṃsārasadaso bāhye kaiś cittvaṃ parirabhyase 16.28cd: svāmin parais tu tatraiva tāmyadbhis tyaktayantraṇaiḥ 16.29ab: pānāśanaprasādhanasambhuktasamastaviśvayā śivayā 16.29cd: pralayotsavasarabhasayā dṛḍham upagūḍhaṃ śivaṃ vande 16.30ab: parameśvaratā jayaty apūrvā tava viśveśa yadīśitavyaśūnyā 16.30cd: aparāpi tathaiva te yayedaṃ jagad ābhāti yathā tathā na bhāti divyakrīḍābahumānanāma saptadasaṃ stotram 17.1ab: aho ko 'pi jayaty eṣa svāduḥ pūjāmahotsavaḥ 17.1cd: yato 'mṛtarasāsvādam aśrūṇy api dadaty alam 17.2ab: vyāpārāḥ siddhidāḥ sarve ye tvatpūjāpuraḥsarāḥ 17.2cd: bhaktānāṃ tvanmayāḥ sarve svayaṃ siddhaya eva te 17.3ab: sarvadā sarvabhāveṣu yugapat sarvarūpiṇam 17.3cd: tvām arcayanty aviśrantaṃ ye mamaite 'dhidevatāḥ 17.4ab: dhyānāyasatiraskārasiddhas tvatsparśanotsavaḥ 17.4cd: pūjāvidhir iti khyāto bhaktānāṃ sa sadās tu me 17.5ab: bhaktānāṃ samatāsāraviṣuvatsamayaḥ sadā 17.5cd: tvadbhāvarasapīyūṣarasennaiṣāṃ sadārcanam 17.6ab: yasyānārambhaparyantau na ca kālakramaḥ prabho 17.6cd: pūjātmāsau kriyā tasyāḥ kartāras tvajjuṣaḥ param 17.7ab: brahmādīnām apīśāste te ca saubhāgyabhāginaḥ 17.7cd: yeṣāṃ svapne 'pi mohe 'pi sthitas tvatpūjanotsavaḥ 17.8ab: japatāṃ juhvatāṃ snātāṃ dhyāyatāṃ na ca kevalam 17.8cd: bhaktānāṃ bhavadabhyarcāmaho yāvad yadā tadā 17.9ab: bhavatpūjāsudhāsvādasambhogasukhinaḥ sadā 17.9cd: indrādīnām atha brahmamukhyānām asti kaḥ samaḥ 17.10ab: jagatkṣobhaikajanake bhavatpūjāmahotsave 17.10cd: yatprāpyaṃ prāpyate kiṃcid bhaktā eva vidanti tat 17.11ab: tvaddhāmni cinmaye sthitvā ṣaṭtriṃśattattvakarmabhiḥ 17.11cd: kāyavākcittaceṣṭādyair arcaye tvāṃ sadā vibho 17.12ab: bhavatpūjāmayāsaṅgasambhogasukhino mama 17.12cd: prayātu kālaḥ sakalo 'py ananto 'pīyadarthaye 17.13ab: bhavatpūjāmṛtarasābhogalampaṭata vibho 17.13cd: vivardhatām anudinaṃ sadā ca phalatāṃ mama 17.14ab: jagadvilayasañjātasudhaikarasanirbhare 17.14cd: tvadabdhau tvāṃ mahātmānam arcannāsīya sarvadā 17.15ab: aśeṣavāsanāgranthivicchedasaralaṃ sadā 17.15cd: mano nivedyate bhaktaiḥ svādu pūjāvidhau tava 17.16ab: adhiṣṭhāyaiva viṣayānimāḥ karaṇavṛttayaḥ 17.16cd: bhaktānāṃ preṣayanti svatpūjārtham amṛtāsavam 17.17ab: bhaktānāṃ bhaktisaṃvegamahoṣmavivaśātmanām 17.17cd: ko 'nyo nirvāṇahetuḥ syāt tvatpūjāmṛtamajjanāt 17.18ab: satataṃ tvatpadābhyarcāsudhāpānamahotsavaḥ 17.18cd: tvatprasādaikasamprāptihetur me nātha kalpatām 17.19ab: anubhūyāsamīśāna pratikarma kṣaṇāt kṣaṇam 17.19cd: bhavatpūjāmṛtāpānamadāsvādamahāmudam 17.20ab: dṛṣṭartha eva bhaktānāṃ bhavatpūjāmahodyamaḥ 17.20cd: tadaiva yad asambhāvyaṃ sukham āsvādayanti te 17.21ab: yāvan na labdhas tvatpūjāsudhāsvādamahotsavaḥ 17.21cd: tāvan nāsvādito manye lavo 'pi sukhasampadaḥ 17.22ab: bhaktānāṃ viṣayanveṣābhāsāyāsād vinaiva sā 17.22cd: ayatnasiddhaṃ tvaddhāmasthitiḥ pūjāsu jāyate 17.23ab: na prāpyam asti bhaktanāṃ nāpy eṣām asti durlabham 17.23cd: kevalaṃ vicaranty ete bhavatpūjāmadonmadāḥ 17.24ab: aho bhaktibharodāracetasāṃ varada tvayi 17.24cd: slāghyaḥ pūjāvidhiḥ ko 'pi yo na yācñākalaṃkitaḥ 17.25ab: kā na śobhā na ko hlādaḥ kā samṛddhir na vāparā 17.25cd: ko vā na mokṣaḥ ko 'py eṣa mahādevo yad arcyate 17.26ab: antarullasadacchācchabhaktipīyūṣapoṣitam 17.26cd: bhavatpūjopayogāya śarīram idam astu me 17.27ab: tvatpādapūjāsambhogaparatantraḥ sadā vibho 17.27cd: bhūyāsaṃ jagatām īśa ekaḥ svacchandaceṣṭitaḥ 17.28ab: tvaddhyānadarśanasparśatṛṣi keṣām api prabho 17.28cd: jāyate śītalasvādu bhavatpūjāmahāsaraḥ 17.29ab: yathā tvam eva jagataḥ pūjāsambhogabhājanam 17.29cd: tatheśa bhaktimān eva pūjāsambhogabhājanam 17.30ab: ko 'py asau jayati svāmin bhavatpūjāmahotsavaḥ 17.30cd: ṣaṭtriṃśato 'pi tattvānāṃ kṣobho yatrollasaty alam 17.31ab: namas tebhyo vibho yeṣāṃ bhaktipīyūṣavāriṇā 17.31cd: pūjyāny eva bhavanti tvatpūjopakaraṇāny api 17.32ab: pūjārambhe vibho dhyātvā mantrādheyāṃ tvadātmatām 17.32cd: svātmany eva pare bhaktā mānti harṣeṇa na kvacit 17.33ab: rājyalābhādivotphullaiḥ kaiś cit pūjāmahotsave 17.33cd: sudhāsavena sakalā jagatī saṃvibhajyate 17.34ab: pūjāmṛtāpānamayo yeṣāṃ bhogaḥ pratikṣaṇam 17.34cd: kiṃ devā uta muktās te kiṃ vā ke 'py eva te janāḥ 17.35ab: pūjopakaraṇībhūtaviśvaveśena gauravam 17.35cd: aho kim api bhaktānāṃ kim apy eva ca lāghavam 17.36ab: pūjāmayākṣavikṣepakṣobhādevāmṛtodgamaḥ 17.36cd: bhaktānāṃ kṣīrajaladhikṣobhād iva divaukasām 17.37ab: pūjāṃ ke cana manyante dhenuṃ kāmadughām iva 17.37cd: sudhādhārādhikarasāṃ dhayanty antarmukhāḥ pare 17.38ab: bhaktānām akṣavikṣepo 'py eṣa saṃsārasaṃmataḥ 17.38cd: upanīya kim apy antaḥ puṣṇāty arcāmahotsavam 17.39ab: bhaktikṣobhavaśād īśa svātmabhūte 'rcanaṃ tvayi 17.39cd: citraṃ dainyāya no yāvad dīnatāyāḥ paraṃ phalam 17.40ab: upacārapadaṃ pūjā keṣāṃ cit tvatpadāptaye 17.40cd: bhaktānāṃ bhavadaikātmyanirvṛttiprasaras tu saḥ 17.41ab: apy asambaddharūpārcābhaktyunmādanirargalaiḥ 17.41cd: vitanyamānā labhate pratiṣṭhāṃ tvayi kām api 17.42ab: svādubhaktirasāsvādastabdhībhūtamanaś cyutām 17.42cd: śambho tvam eva lalitaḥ pūjānāṃ kila bhājanam 17.43ab: paripūrṇāni śuddhāni bhaktimanti sthirāṇi ca 17.43cd: bhavatpūjāvidhau nātha sādhanāni bhavantu me 17.44ab: aśeṣapūjāsatkośe tvatpūjākarmaṇi prabho 17.44cd: aho karaṇavṛndasya kāpi lakṣmīr vijṛmbhate 17.45ab: eṣā peśalimā nātha tavaiva kila dṛśyate 17.45cd: viśveśvaro 'pi bhṛtyair yad arcyase yaś ca labhyase 17.46ab: sadāmurttād amūrttādvā bhāvād yad vāpy abhāvataḥ 17.46cd: uttheyān me praśastasya bhavatpūjāmahotsavaḥ 17.47ab: kāmakrodhābhimānais tvām upaharīkṛtaiḥ sadā 17.47cd: ye 'rcayanti namas tebhyas teṣāṃ tuṣṭo 'smi tattvataḥ 17.48ab: jayaty eṣa bhavadbhaktibhājāṃ pūjāvidhiḥ paraḥ 17.48cd: yas tṛṇaiḥ kriyamāno 'pi ratnair evopakalpate āviṣkāranāma aṣṭādaśaṃ stotram 18.1ab: jagato 'ntarato bhavantam āptvā punar etad bhavato 'ntarāl labhante 18.1cd: jagadīśa tavaiva bhaktibhājo na hi teṣām iha dūrato 'sti kiñcit 18.2ab: kvacid eva bhavān kvacid bhavānī sakalārthakramagarbhiṇī pradhānā 18.2cd: paramārthapade tu naiva devyā bhavato nāpi jatattrayasya bhedaḥ 18.3ab: no jānate subhagam apy avalepavanto lokāḥ prayatnasubhagā nikhila hi bhāvāḥ 18.3cd: cetaḥ punar yad idam udyatam apy avaiti naivātmarūpam iha hā tad aho hato 'smi 18.4ab: bhavanmayasvātmanivāsalabdhasampadbharābhyarcitayuṣmadaṅghriḥ 18.4cd: na bhojanācchādanam apy ajasram apekṣate yas tam ahaṃ nato 'smi 18.5ab: sadā bhavaddehanivāsasvastho 'py antaḥ paraṃ dahyata eṣa lokaḥ 18.5cd: tavecchayā tat kuru me yathātra tvadarcanānandamayo bhaveyam 18.6ab: svarasoditayuṣmadaṅghripadmadvayapūjāmṛtapānasaktacittaḥ 18.6cd: sakārthacayeṣv ahaṃ bhaveyam sukhasaṃsparśanamātralokayātraḥ 18.7ab: sakalavyavahāragocare sphuṭam antaḥ spurati tvayi prabho 18.7cd: upayānty apayānti cāniśam mama vastūni vibhāntu sarvadā 18.8ab: satatam eva tavaiva pure 'thavāpy arahito vicareyam ahaṃ tvayā 18.8cd: kṣaṇalavo 'py atha mā sma bhavet sa me na vijaye nanu yatra bhavanmayaḥ 18.9ab: bhavadaṅgaparisravatsuśītāmṛtapūrair bharite samantato 'pi 18.9cd: bhavadarcanasampadeha bhaktās tava saṃsārasaro 'ntare caranti 18.10ab: mahāmantratarucchāyāśītale tvanmahāvane 18.10cd: nijātmani sadā nātha vaseyaṃ tava pūjakaḥ 18.11ab: prativastu samastajīvataḥ pratibhāsi pratibhāmayo yathā 18.11cd: mama nātha tathā puraḥ prathāṃ vraja netratrayaśūlaśobhitaḥ 18.12ab: abhimānacarūpahārato mamatābhaktibhareṇa kalpitāt 18.12cd: paritoṣagataḥ kadā bhavān mama sarvatra bhaved dṛśaḥ padam 18.13ab: nivasanparamāmṛtābdhimadhye bhavadarcāvidhimātramagnacittaḥ 18.13cd: sakalaṃ janavṛttam ācareyaṃ rasayan sarvata eva kiñcanāpi 18.14ab: bhavadīyam ihāstu vastu tattvaṃ vivarītuṃ ka ivātra pātram arthe 18.14cd: idam eva hi nāmarūpaceṣṭādyasamaṃ te harate haro 'si yasmāt 18.15ab: śāntaye na sukhalipsutā manāg bhaktisambhṛtamadeṣu taiḥ prabhoḥ 18.15cd: mokṣamārgaṇaphalāpi nārthanā smaryate hṛdayahāriṇaḥ puraḥ 18.16ab: jāgaretaradaśāthavā parā yāpi kācana manāg avasthiteḥ 18.16cd: bhaktibhājanajanasya sākhilā tvatsanāthamanaso mahotsavaḥ 18.17ab: āmano 'kṣavalayasya vṛttayaḥ sarvataḥ śithilavṛttayo 'pi tāḥ 18.17cd: tvām avāpya dṛḍhadīrghasaṃvido nātha bhaktidhanasoṣmaṇāṃ katham 18.18ab: na ca vibhinnam asṛjyata kiñcid asty atha sukhetarad atra na nirmitam 18.18cd: atha ca duḥkhi ca bhedi ca sarvathāpy asamavismayadhāma namo 'stu te 18.19ab: kharaniṣedhakhadāmṛtapūraṇocchalitadhautavikalpamalasya me 18.19cd: dalitadurjayasaṃśayavairiṇas tvadavalokanam astu nirantaram 18.20ab: sphuṭam aviśa mām athāviśeyaṃ satataṃ nātha bhavantamasmi yasmāt 18.20cd: rabhasena vapus tavaiva sākṣāt paramāsattigataḥ samarcayeyam 18.21ab: tvayi na stutiśaktir asti kasyāpy athavāsty eva yato 'tisundaro 'si 18.21cd: satataṃ punar arthitaṃ mamaitad yad aviśrānti vilokayeyam īśam udyotanābhidhānam ekonaviṃśaṃ stotram 19.1ab: prārthanābhūmikātītavicitraphaladāyakaḥ 19.1cd: jayaty apūrvavṛttāntaḥ śivaḥ satkalpapādapaḥ 19.2ab: sarvavastuni ca yaikanidhānāt svātmanas tvad akhilaṃ kila labhyam 19.2cd: asya me punar asau nijā ātmā na tvam eva ghaṭase paramās tām 19.3ab: jñānakarmamayacidvapur ātmā sarvathaiṣa parameśvara eva 19.3cd: syād vapus tu nikhileṣu padārtheṣv eṣu nāma na bhavet kim utānyat 19.4ab: viṣamārtimuṣānena phalena tvaddṛgātmanā 19.4cd: abhilīya pathā nātha mamāstu tvanmayī gatiḥ 19.5ab: bhavadamalacaraṇacintāratnalatālaṅkṛtā kadā siddhiḥ 19.5cd: siddhajanamānasānāṃ vismayajananī ghaṭeta mama bhavataḥ 19.6ab: karhi nātha vimalaṃ mukhabimbaṃ tāvakaṃ samavalokayitāsmi 19.6cd: yatsravaty amṛtapūram apūrvaṃ yo nimajjayati viśvam aśeṣam 19.7ab: dhyātamātramuditaṃ tava rūpaṃ karhi nātha paramāmṛtapūraiḥ 19.7cd: pūrayet tvadavibhedavimokṣākhyātidūravivarāṇi sadā me 19.8ab: tvadīyānuttararasāsaṅgasaṃtyaktacāpalam 19.8cd: nādyāpi me mano nātha karhi syād astu śīghrataḥ 19.9ab: mā śuṣkakaṭukāny eva paraṃ sarvāṇi sarvadā 19.9cd: tavopahṛtya labdhāni dvandvāny apy āpatantu me 19.10ab: nātha sāṃmukhyam āyāntu viśuddhās tava raśmayaḥ 19.10cd: yāvat kāyamanastāpatamobhiḥ parilupyatām 19.11ab: deva prasīda yāvan me tvanmārgaparipanthikāḥ 19.11cd: paramārthamuṣo vaśyā bhūyāsur guṇataskarāḥ 19.12ab: tvad bhaktisudhāsārair mānasam āpūryatāṃ mamāśu vibho 19.12cd: yāvad imā uhyantāṃ niḥśeṣāsāravāsanāḥ plutvā 19.13ab: mokṣadaśāyāṃ bhaktis tvayi kuta iva martyadharmiṇo 'pi na sā 19.13cd: rājati tato 'nurūpām āropaya siddhibhūmikām aja mām 19.14ab: siddhilavalābhalubdhaṃ mām avalepena mā vibho saṃsthāḥ 19.14cd: kṣāmas tvadbhaktimukhe prollasadaṇimādipakṣato mokṣaḥ 19.15ab: dāsasya me prasīdatu bhagavān etāvad eva nanu yāce 19.15cd: dātā tribhuvananātho yasya na tanmādṛśāṃ dṛśo viṣayaḥ 19.16ab: tvadvapuḥsmṛtisudhārasapūrṇe mānase tava padāmbujayugmam 19.16cd: māmake vikasad astu sadaiva prasravanmadhu kim apy atilokam 19.17ab: asti me prabhur asau janako 'tha tryambako 'tha jananī ca bhavānī 19.17cd: na dvitīya iha ko 'pi mamāstīty eva nirvṛtatamo vicareyam carvanābhidhānam vimśam stotram 20.1ab: nathaṃ tribhuvananāthaṃ bhūtisitaṃ trinayanaṃ triśūladharam 20.1cd: upavītīkṛtabhoginam indukalāśekharaṃ vande 20.2ab: naumi nijatanuvinismaradaṃśukapariveṣadhavalaparidhānam 20.2cd: vilasatkapālamālākalpitanṛttotsavākalpam 20.3ab: vande tān daivataṃ yeṣāṃ haraś ceṣṭā harocitāḥ 20.3cd: haraikapravaṇāḥ prāṇāḥ sadā saubhāgyasadmanām 20.4ab: krīḍitaṃ tava maheśvaratāyāḥ pṛṣṭhato 'nyad idam eva yathaitat 20.4cd: iṣṭamātraghaṭiteṣv avadāneṣv ātmanā param upāyam upaimi 20.5ab: tvaddhāmni viśvavandye 'sminn iyati krīḍane sati 20.5cd: tava nātha kiyān bhūyānn ānandarasasambhavaḥ 20.6ab: kathaṃ sa subhago mā bhūdyo gauryā vallabho haraḥ 20.6cd: haro 'pi mā bhūd atha kiṃ gauryāḥ paramavallabhaḥ 20.7ab: dhyānāmṛtamayaṃ yasya svātmamūlam anaśvaram 20.7cd: saṃvillatās tathārūpās tasya kasyāpi sattaroḥ 20.8ab: bhaktikaṇḍūsam ullāsāvasare parameśvara 20.8cd: mahānikaṣapāṣāṇasthūṇā pūjaiva jāyate 20.9ab: sadā srṣṭivinodāya sadā sthitisukhāsine 20.9cd: sadā tribhuvanāhāratṛptāya svāmine namaḥ 20.10ab: na kvāpi gatvā hitvāpi na kiṃcid idam eva ye 20.10cd: bhavyaṃ tvaddhāma paśyanti bhavyās tebhyo namo namaḥ 20.11ab: bhaktilakṣmīsamṛddhānāṃ kim anyad upayācitam 20.11cd: etayā vā daridraṇāṃ kim anyad upayācitam 20.12ab: duḥkhāny api sukhāyante viṣam apy amṛtāyate 20.12cd: mokṣāyate ca saṃsāro yatra mārgaḥ sa śaṅkaraḥ 20.13ab: mūle madhye 'vasāne ca nāsti duḥkhaṃ bhavajjuṣāṃ 20.13cd: tathāpi vayam īśāna sīdāmaḥ katham ucyatām 20.14ab: jñānayogādinānyeṣām apy apekṣitum arhati 20.14cd: prakāśaḥ svairiṇām iva bhavān bhaktimatāṃ prabho 20.15ab: bhaktānāṃ nārtayo nāpy asty ādhyānaṃ svātmanas tava 20.15cd: tathāpy asti śivety etat kim apy eṣāṃ bahirmukhe 20.16ab: sarvābhāsāvabhāso yo vimarśavalito 'khilam 20.16cd: aham etad iti staumi tāṃ kriyāśaktim īśa te 20.17ab: vartante jantavo 'śeṣā api brahmendraviṣṇavaḥ 20.17cd: grasamānās tato vande deva viśvaṃ bhavanmayam 20.18ab: sato vināśasambandhān matparaṃ nikhilaṃ mṛṣā 20.18cd: evamevodyate nātha tvayā saṃhāralīlayā 20.19ab: dhyātam ātmupatiṣṭhata eva tvadvapur varada bhaktidhanānām 20.19cd: apy acintyam akhilādbhutacintākartṛtāṃ prati ca te vijayante 20.20ab: tāvakabhaktirasāsavasekād iva sukhitamarmamaṇḍalasphuritaiḥ 20.20cd: nṛtyati vīrajano niśi vetālakulaiḥ kṛtotsāhaḥ 20.21ab: ārabdhā bhavadabhinutir amunā yenāṅgakena mama śambho 20.21cd: tenāparyantam imaṃ kālaṃ dṛḍham akhilam eva bhaviṣīṣṭa