%Śāktavijñānam of Somānanda
%ed. Jagaddhar Zadoo, KSTS 000, Śrīnagara 1947, pp.47--49

1ab: sthānaṃ  praveśo rūpaṃ ca & lakṣaṃ lakṣaṇam eva ca 
1cd: utthāpanaṃ bodhanaṃ ca & cakraviśrāmam eva ca 
2ab: bhūmikāgamanaṃ caiva & antāvasthā tathaiva ca 
2cd: viśrāmaḥ pariṇāmaś ca & tathāgamanam eva ca 
3ab: iti trayodaśavidhaṃ & śāktaṃ  vijñānam uttamam 
3cd: sarveṣu trikaśāstreṣu & sūcitaṃ śambhunā svayam 
4ab: nābhyadha aṅgulāḥ pañca & meḍhrasyordhvāṅguladvayam 
4cd: tanmadhye kandanāmā ca & cakrasthānam iti smṛtam 
5ab: prāṇāpānanirodhena & manas tatraiva niḥkṣipet 
5cd: samyag vāyugatiṃ jitvā & yāvan madhyagatāṃ nayet
6ab: eṣa praveśa ity āhu & rūpaṃ vakṣyāmi cādhunā 
6cd: śṛṅgāṭakanibhaṃ cakraṃ & ṣaḍaraṃ cāparaṃ dhruvam 
7ab: dāḍimīkusumaprakhyaṃ & kandaṃ vai jātilohitam 
7cd: etad rūpaṃ samākhyātaṃ & tṛtīyaṃ cintanātmakam 
8ab: tanmadhye nikṣipec cittaṃ & yāvat tatra sthirīkṛtam 
8cd: tyaktaruddho yadā vāyus & tadā lakṣaṃ vinirdiśet
9ab: kandacakrasya madhyasthā & tv anāhatamayī kalā 
9cd: adhordhve rekhāsaṃyuktā & bhujaṅgakuṭilākṛtiḥ 
10ab: ūrhdvādho 'vasthitāvasthā & sūryacandramasāv ubhau 
10cd: satyaṃ virājamānā sā & sahasrārkasamaprabhā 
11ab: tām evālokayec chaktiṃ & manāk kumbhakavṛttinā 
11cd: etal lakṣaṇam uddiṣṭam utthāpanam ataḥ param 
12ab: juṣadrecakavṛttyā tu & mantraṃ caiva samuccaret 
12cd: prabuddhaṃ cintayec chaktiṃ & daṇḍavat parameśvarīm 
13ab:  ādhāramadhyād āyātā & suṣumnāmārgam āśritā 
13cd:  utthāpanaṃ samākhyātaṃ & bodhanaṃ paratas tathā 
14ab:  kandastho vedhayen nābhiṃ & tato hṛtsthaṃ pitāmaham 
14cd:  kaṇṭhastham acyutaṃ sākṣād & rudraṃ tālutale sthitam 
15ab:  bhruvor madhyagataṃ tv īśaṃ & brahmadvāre sadāśivam 
15cd:  bodhayitvā vrajed āśu & padaṃ cānāśritaṃ śivam 
16ab:  etad bodhanam uddiṣṭaṃ & cakraviśrāmaṇaṃ tataḥ 
16cd:  svābhāvikaṃ dalaṃ dīptaṃ & dravaṃ sthiranabhopamam 
17ab:  amṛtaṃ śekharaṃ caiva & śaktir brahmā tathaiva ca 
17cd:  bindunādaṃ tathā proktaṃ & cakradvādaśakaṃ kila 
18ab:  vedhayantī kramāc chaktiś & cakre cakre pratikṣaṇam 
18cd:  viśramet sā mahādevī & cakraviśrāma uttamaḥ 
19ab:  hṛdayaṃ kampate pūrvaṃ & tālukadvāram eva ca 
19cd:  śiraś ca bhramate tasya & dṛṣṭisaṃkrāntilakṣaṇam 
20ab:  ekaikaṃ bhramayaty aṅgam & aṅgapratyaṅgasandhiṣu 
20cd:  ghūrṇate hṛdayaṃ cāsya & samyagvidyāprabhāvataḥ 
21ab:  yāni yāni vikārāṇi & avasthā  kurute sataḥ 
21cd:  teṣu teṣu na bhetavyaṃ & krīḍati parameśvari 
22ab:  amṛte seyam unmattā & vikārān kurute bahūn 
22cd:  malatrayavikāreṇa & bahujanmasu yat kṛtam
23ab:  dhunoti samalān pāśāt & paraśaktisamutthitān 
23cd:  bhūmikāgamanaṃ proktaṃ & antāvasthā tathocyate 
24ab:  yat saṃkrāntau romaharṣo 'srupāto & jṛmbhārambho gadgadā gīrgiro 'ntaḥ
24cd:  granthisphoṭaḥ sparśadivyapraharṣo & binduspandā nābhikandāt sphuranti 
25ab: antāvasthā samākhyātā & viśrāmas tv adhunocyate 
25cd: nābhicakraviniryātā & yadā śāktiḥ prabudhyate 
26ab: tadā tv astam itaṃ sarvam & akṣagrāmaṃ bahiḥ sthitam 
26cd: yadā sā paramā śaktiḥ & sulīnā parame pade 
27ab: tadā na vindate kiṃ cid & viṣayī viṣayāntaram 
27cd: śive viśrāmyate śāktis & tadā viśrāma ucyate 
28ab: yatra viśramaṇaṃ śakter & manas tatra layaṃ vrajet 
28cd: tadātmā paramātmatve & jñātavyo niścitātmabhiḥ 
29ab: śivībhūto bhavaty ātmā &  pariṇāmaḥ sa eva hi 
29cd: sadā sa varṣate divyam & amṛtaṃ jantujīvanam
30ab: cittaṃ tatra tu sandhārya & punar daivī viśet tu sā 
30cd: tadā tv āgamanaṃ proktam & evaṃ samyak trayodaśa 

iti śrīsomānandapādaviracitaṃ śāktavijñānaṃ saṃpūrṇam //
śivam astu lekhakapāṭhakayoḥ //