%Kubjikāmatatantra 
%ed. Goudriaan \& Schoterman 
%Leiden 1988
%typed   by S.D.Vasudeva 1998--2000
%
1.1a: saṃvartāmaṇḍalānte kramapadanihitānandaśaktiḥ subhīmā
1.1b: saṃsṛjyādyaṃ catuṣkam akulakulagataṃ pañcakaṃ cānyaṣaṭkam  
1.1c: catvāraḥ pañcako 'nyaḥ punar api caturas tattvato maṇḍaledaṃ
1.1d: saṃsṛṣṭaṃ yena tasmai namata guruvaraṃ bhairavaṃ śrīkujeśam 
1.2 śrīmaddhimavataḥ pṛṣṭhe trikūṭaśikharāntagam  
santānapuramadhyagam anekākārarūpiṇam  
1.3 tryasraṃ vai triprakāraṃ tu triśaktitriguṇojjvalam  
candrasūryakṛtālokaṃ vahnidedīpyavarcasam  
1.4 trisandhyāveṣṭitaṃ divyaṃ prākāratripathānvitam  
dvārapālatrayopetaṃ trikapāṭārgalānvitam  
1.5 anekaratnasandīptam udyānavanamaṇḍitam  
vasantaguṇasampannaṃ satatānandapūritam  
1.6 santānabhuvanaṃ divyaṃ divyādivyair niṣevitam  
tatra taṃ bhuvaneśānaṃ vyaktāvyaktaṃ sanātanam  
1.7 kāryakāraṇabhāvena kiñcit kālam apekṣayā 
tiṣṭhate bhairavīśāno maunam ādāya niścalam 
1.8 tatra devagaṇāḥ sarve sakinnaramahoragāḥ 
kurvanti kalakalārāvaṃ samāgatya samīpataḥ 
1.9 śrutvā kalakalārāvaṃ ko bhavān kim ihāgataḥ 
himavān tu prasannātmā gacchāmo 'nveṣaṇaṃ prati 
1.10 yāvat sa paśyate tatsthaṃ  śivajñānāvalokanāt 
tāvat paśyati śrīnātham āgataṃ tu mamāśrame 
1.11 gatas tūrṇaṃ prayatnena yatrāste bhagavān prabhuḥ 
sakuṭumbaḥ stutiṃ divyāṃ himavān vākyam abravīt 
1.12 adya me saphalaṃ janma adya me saphalaṃ tapaḥ 
adya me saphalaṃ sthānaṃ jīvitaṃ saphalaṃ mama 
1.13 adya dhanyaḥ kṛtārtho 'ham adya me saphalā gatiḥ 
adya me saphalaṃ sarvaṃ trailokyaṃ sacarācaram 
1.14 yan nātha bhavadaṅghribhyām aṅkitaṃ mastakaṃ mama 
tena vikhyātakīrtis tu bhaviṣyāmi jagattraye 
1.15 tvatprasādena deveśa sarvajñatvaṃ labhāmy aham 
kim anena na paryāptaṃ yad āyāta-m-iha prabhuḥ 
1.16 kiṃ kurmaḥ kā gatir mahyam ādeśo dīyatāṃ prabho 
himavantavilāpo 'yaṃ śrutvaivaṃ sakuṭumbinaḥ 
1.17 uvāca bhagavān nāthaḥ prahasyemāṃ giraṃ śubhām 
himavanta gire sādhu tuṣṭo 'haṃ tava klinnayā 
1.18 prārthayasva varaṃ kiñcid dāsyāmo manasepsitam 
himavanta mahāprājña tuṣṭo 'haṃ paramārthataḥ 

himavān uvāca 

1.19 kiṃ kṛtaṃ me maheśāna svakīyadayayā prabho 
rucitaṃ kuru deveśa himavān abravīd idam 
1.20 parvatollapitaṃ śrutvā uvācedaṃ sureśvaraḥ 
prasannagirayā divyaṃ varaṃ dātuṃ samudyataḥ 
1.21 prathamaṃ tāvat tubhyaṃ hi pañca ślokān paṭhet tu yaḥ 
sannidhānaḥ prayatnena bhaviṣyāmo hy avaśyataḥ 
1.22 dvitīyaṃ sannidhāno 'haṃ bhaviṣyāmi tavādhvare 
tṛtīyaṃ sarvaśailānāṃ rājatvaṃ cakradhāriṇaḥ 
1.23 caturthaṃ mama tulyatvaṃ pañcamaṃ mokṣadaṃ nṛṇām 
evaṃ pañca varās tubhyaṃ himavanta punar vada 

himavān uvāca  

1.24 kim anyena mahādeva ātmatulyas tvayā kila 
kṛto 'haṃ tat kim anyena kiṃ tu devābhayaṃ dada 
1.25 evaṃ brūtha punaḥ kiñcid yat te manasi rocate 
tad arpayāmy ahaṃ sarvaṃ pūrvam evoditaṃ mayā 

himavān uvāca

1.26 āśrame sati sarvatra prāticāraṃ vinā na hi 
tatra ḍikkarikā mahyaṃ kariṣyaty upalepanam 
1.27 sā ca dharmapravṛttā ca yena tat kriyatāṃ prabho 
iṣṭā sā mama deveśa kālikā ca kumārikā 
1.28 evaṃ babhūva tasmād vai tatrasthā guṇaśālinī 
prasādayati deveśaṃ vinayādyair anekadhā 
1.29 vinayenopasaṅgamya stutistotrair anekadhā 
kālena bahunā kālīm uvācedaṃ kuleśvaraḥ 
1.30 tuṣṭo 'haṃ kālike tubhyaṃ brūhi kiñcin manepsitam 
yat tvayā dhāritaṃ citte tat prārthaya hy aśaṅkitā 
1.31 labdh[v]ā praṇayasadbhāvaṃ tyaktalajjā manotsukā 
vadate nātha nāthas tvaṃ bhavāsmākaṃ surārcitaḥ 
1.32 evaṃ śrutvā maheśāno vākyam ānandasambhavam 
tataḥ sampāditaṃ śīghram ājñānandaguṇojjvalam 
1.33 ājñāsanasamārūḍhaṃ preritānantaśambhunā 
darśitaṃ nikhilaṃ sarvaṃ pūrvasantānagocaram 
1.34 tataḥ prabuddhabhāvātmā vadaty evaṃ kuleśvarī 
darśitaṃ nikhilaṃ mahyaṃ kim āścaryaṃ kujeśvara 
1.35 viditaṃ nātha me sarvaṃ kriyākāraṇagocaram 
yasmāt sampadyate hy evaṃ tad ācakṣva kujésvara 
1.36 ājñāto guṇam aiśvaryaṃ sañjātaṃ parameśvara 
asya tantrārthasadbhāvaṃ brūhi me paramārthataḥ 
1.37 dṛṣṭaṃ samastaparyantaṃ bhavadājñāṣaḍadhvaram 
brūhi nirdeśataḥ sarvaṃ yadi tuṣṭaḥ kujeśvara 
1.38 ājñāto guṇasadbhāvaṃ brūhi deva guṇodayam 
yathā drakṣyāpitaṃ sarvam ājñādvāreṇa me 'khilam 
1.39 pūrvavṛttāntasadbhāvaṃ pūrvapāṭhaśrutaṃ ca yat 
pūrvakalpārthanirdeśam ājñāto jñāpitaṃ tvayā 
1.40 pūrvasandarśitaṃ deva ājñāguṇamahodayam 
tadbhraṃśād bhraṃśam utpannam ato 'rthaṃ kathaya sphuṭam 
1.41 kalpe kalpe tvayā deva saṃhitārtham anekadhā 
mantratantrakriyāyogāḥ kathitā nāvadhāritāḥ 
1.42 idānīṃ saṃsphuṭaṃ sarvam ājñāguṇamahodayam 
yasmāt sañjāyate sarvaṃ tatprabhāvaṃ vada prabho 
1.43 ānandaś cāvaliś caiva prabhur yogī tathaiva ca 
atītaś caiva pādaś ca ṣaṭ prakārāḥ kathaṃ sthitāḥ 

śrībhairava uvāca 

1.44 sādhu sādhu mahābhāge mahānandavidhāyini 
pṛcchitaṃ yat tvayā vākyam atyadbhutam anāmayam 
1.45 gopitaṃ sarvarudrāṇāṃ vīrāṇāṃ bhairaveṣu ca 
siddhakramaṃ nirācāraṃ tathāpi kathayāmi te 
1.46 siddhamārgakramāyātaṃ siddhapaṅktivyavasthitaṃ 
gopitaṃ sarvamārgeṣu tavādya prakaṭīkṛtam 
1.47 pūrvasañcodito devi tvayāhaṃ tvaṃ mayā punaḥ 
atra kalpe mayā tubhyaṃ tvaṃ punar mama dāsyasi 
1.70 ārādhayantaṃ deveśaṃ na jānāti tapotkaṭā 
tataḥ stavena divyena devenānandabhṛdgirā 
divyastotraṃ samārabdham aśeṣārthaprabodhakam 

%After 70ef ABEFG continue with:

1.71 evaṃ samyagvidhānena rudraśaktiḥ svayambhunā 
nirmitā svāṅgajair varṇair nādiphāntasvarūpiṇī 
1.72 sarvākṣaramayī devī sarvalakṣaṇalakṣitā 
utpannā sumahātejā bhairavābhimukhe sthitā 
1.73 vadate mālinī kas tvaṃ devo  haṃ kim upāgataḥ 
māṃ tvaṃ kathaṃ na jānāsi devi tvaṃ kena nirmitā 
1.74 sṛṣṭikrīḍāvatārārthe mayā utpāditā priye 
tvam evotpāditaḥ kena brūhi vākyaṃ tu bhairava 
1.75 varṇarāśir ahaṃ bhadre svayambhūr jagataḥ patiḥ 
mamāṅgasambhavair bījais tvam evotpāditā mayā 
1.76 vīrāvalīti tena tvaṃ rudraśaktiḥ praśasyase 
vadate mālinī kruddhā tvatsvakīyaiḥ śarīrajaiḥ 
1.77 varṇair utpāditāhaṃ te gṛhṇa varṇān svakān iha 
prasārya varṇamālāṃ tu tattvākāraṃ svarūpiṇam 
1.78 pūrvabījatanur bhūtvā prasuptāmṛtakuṇḍalī 
kutaḥ sarve gatā varṇā bhrāntacittaḥ sureśvaraḥ 
1.79 paraṃ vismayam āpannaḥ kṣaṇam ekaṃ vitarkitaḥ 
lolībhūtās tu te sarve jīvatattve layaṃ gatāḥ 
1.80 aho devyāḥ prabhāvas tu iti cintā jagatpateḥ 
stunoti vividhaiḥ stotrair devo bhuvanamālinīm 
1.81 kāvarṇā kāmarūpe pur eva purigatā jālapīṭhe jikā yā
ṣaḍbhinnā madhyapīṭhe tripathapadagatā tvaṃ ca śṛṅgātakārā 
siddhair yā veṣṭitāṅgī parivṛtacaturaiḥ ṣaṣṭibhir yogivṛndair
yuktā hṛtpaṅkajena ḍaralakasahajā pātu māṃ rudraśaktiḥ 

iti kulālikāmnāye śrīkubjikāmate candradvīpāvatāro nāma
prathamaḥ paṭalaḥ 


śrībhairava uvāca  

2.1 jaya tvaṃ mālinī devī nirmale malanāśinī 
jñānaśaktiḥ prabhur devī buddhis tvaṃ tejavardhanī  
2.2 jananī sarvabhūtānāṃ saṃsāre 'smin vyavasthitā  
mātā vīrāvalī devī kāruṇyaṃ kuru vatsale  

Daṇḍaka

(1) jayati paramatattvanirvāṇasambhūtitejomayī niḥsṛtā vyaktarūpā
(2) parā jñānaśaktis tvam icchā kriyā ṛjvirekhā punaḥ suptanāgendravat
(3) kuṇḍalākārarūpā prabhur nādaśaktis tu saṅgīyase bhāsurā
(4) jyotirūpā surūpā śivā jyeṣṭhanāmā ca vāmā ca raudrī manākhyāmbikā
(5) bindurūpāvadhūtārdhacandrākṛtis tvaṃ trikoṇā a-u-ma-kāra i-kāra
(6) e-kārasaṃyojitaikatvam āpadyase tattvarūpā bhagākāravat sthāyinī
(7) āditattvodbhavā yonirūpā ca śrīkaṇṭhasambodhanī rudramātā
(8) tathānantaśaktiḥ susūkṣmā trimūrtyāmarīśārghinī bhārabhūtis
(9) tithīśātmikā sthāṇubhūtā harākhyā ca jhaṇṭīśabhauktīśa-
(10) sadyātmikānugraheśārcitā krūrasaṅge mahāsenasambhoginī
(11) ṣoḍaśāntāmṛtā bindusandohaniṣyandadehaplutāśeṣasamyakparānanda-
(12) nirvāṇasaukhyaprade bhairavī bhairavodyānakrīḍānuṣakte
(13) parā mālinī rudramālārcite rudraśaktiḥ khagī siddhayogeśvarī
(14) siddhamātā vibhuḥ śabdarāśīti yonyārṇavī vāgviśuddhāsi vāgeśvarī
(15) mātṛkāsiddham icchā kriyā maṅgalā siddhalakṣmī vibhūtiḥ subhūtir
(16) gatiḥ śāśvatā khyāti nārāyaṇī raktacaṇḍā karālekṣaṇā bhīmarūpā
(17) mahocchuṣmayāgapriyā tvam jayantyājitā rudrasammohanī
(18) tvaṃ navātmānadevasya cotsaṅgayānāśritā
(19) mantramārgānugair mantribhir vīrapānānuraktaiḥ subhaktaiś ca
(20) sampūjyase devi pañcāmṛtair divyapānotsavair ekajanmadvijanma-
(21) trijanmacatuḥpañcaṣaṭsaptajanmodbhavais taiś ca nāraiḥ
(22) śubhaiḥ phalguṣais tarpyase madyamāṃsapriye
(23) mantravidyāvratodbhāṣibhir muṇḍakaṅkālakāpālibhir
(24) divyacaryānurūḍhair namaskāra oṃkārasvāhāsvadhākāravauṣaḍvaṣaṭ-
(25) kāraphaṭkārahūṃkārajātībhir etaiś ca mantrākṣaroccāribhir
(26) vāmahastasthitaiś cākṣasūtrāvalījāpibhiḥ sādhakaiḥ putrakair
(27) mātṛbhir maṇḍale dīkṣitair yogibhir yoginīvṛndamelāpakai
(28) rudrakrīḍālasaiḥ pūjyase yogināṃ yogasiddhiprade devi tvaṃ
(29) padmapattropamair locanaiḥ snehapūrṇais tu yaṃ paśyase
(30) tasya divyāntarīkṣasthitā saptapātālasatkhecarī siddhir avyāhatā
(31) vartate. bhaktito yaḥ paṭhed daṇḍakaṃ ekakālaṃ dvikālaṃ trikālaṃ
(32) śuciḥ saṃsmared yaḥ sadā mānavaḥ so'pi śastrāgnicaurārṇave
(33) parvatāgre 'pi saṃrakṣase devi putrānurāgān mahālakṣmi ye
(34) hemacaurānyadārānuṣaktāś ca brahmaghnagoghnā mahādoṣaduṣṭā
(35) vimuñcanti saṃsmṛtya devi tvadīyaṃ mukhaṃ pūrṇacandrānukāraṃ
(36) sphuraddi vyamāṇikyasatkuṇḍalodghṛṣṭagaṇḍasthalaṃ
(37) ye 'pi baddhā dṛḍhair bandhanair nāgapāśair bhujābaddha-
(38) pādārgalais te 'pi tvannāmasaṅkīrtanād devi muñcanti
(39) ghorair mahāvyādhibhiḥ saṃsmṛtya pādāravindadvayaṃ te
(40) mahākāli kālāgnitejaḥprabhe skandagovindabrahmendracandrārka-
(41) puṣpāyudhair maulimālālisatpadmakiñjalkasatpiñjaraiḥ sevyase
(42) sarvavīrāmbike bhairavī bhairavas te śaraṇyāgato ' haṃ
(43) kṣamasvāparādhaṃ kṣamasvāparādhaṃ śive 

2.3 evaṃ stutā mahādevī bhairaveṇa mahātmanā 
tato liṅgaṃ vinirbhidya nirgatā parameśvarī 
2.4 nīlāñjanasamaprakhyā kubjarūpā vṛkodarā 
īṣatkarālavadanā barbarordhvaśiroruhā 
2.5 surūpā ca virūpā ca anekākārarūpiṇī 
vāmaprasāritakarā vāmadevī-m-uvāca ha 
2.6 ājñānandasamāviṣṭā stutyānandākulīkṛtā 
na vedmi ko 'tra māṃ stauti kāhaṃ kasya varapradā 
2.7 uvācaivaṃ mahāsattvā dṛṣṭipāto madīyakaḥ 
āśīviṣeva duṣprekṣyaḥ sa kathaṃ dhāritas tvayā 
2.8 prārthayasva tadā kiñcid yat te manasi rocate 

śrībhairava uvāca 

2.9 prasādāya mahādevi dadājñānugrahaṃ mama 
tapasā tava cogreṇa mama hāniḥ kujāmbike 
2.10 sañjātā tena me devi pūrvam uktam idaṃ mayā 
evaṃ śrutvā mahādevī salajjā gadgadekṣanā 
2.11 kiṃ te siddhaṃ mahādeva yena lajjāpitā vayam 
śrībhairava uvāca 
2.12 pūrvam uktaṃ mayā tubhyam ājñāsamayagocare 
mattulyānugṛhītvā tu paścād bhava gaṇāmbikā 
2.13 kasyedaṃ siddhasantānaṃ pāramparyakramāgatam 
matsakāśāt punas tubhyaṃ tvatsakāśāt punar mama 
2.14 evaṃ tad bhairavaṃ vākyaṃ śrutvā devī parāṅmukhī 
sañjātā kubjikārūpā lajjāto rabhasoditā 
2.15 kiṃ tu lajjāyase devi pūrvam ājñā mayā tava 
idānīṃ dada me śīghraṃ mā śaṅkā mā vilambaya 

śrīkubjikā uvāca 

2.16 aprabuddhapramattena yadā tad rabhasoditam 
tat kiṃ nigrahabuddhyā vā yuktaṃ tvedaṃ kujeśvara 
śrībhairava uvāca 
2.17 sarvānugrahake devi kiṃ na budhyasi cātmani 
na mayā rahitaṃ kiñcin na tvayā rahitaṃ kvacit 
2.18 anyonyaguṇayogena kāryakāraṇayogataḥ 
tvaṃ gurur mama deveśi ahaṃ te na vicāraṇāt 
2.19 rudrabhairavavīrāṇām eṣā cājñā na kasyacit 
yadi śiṣyaṃ na manyetha mitratvena tadā dada 
2.20 evaṃ brūte tadā devyā sarvam etad bhaviṣyati 
paścimedaṃ kṛtaṃ deva pūrvabhāgavivarjitam 
2.21 candradvīpaṃ manoramyaṃ deva tyaktuṃ na me manaḥ 
paścimaṃ sarvamārgāṇāṃ tvaṃ tāvad anuśīlaya 
2.22 paścimāmnāyamārgo 'yaṃ siddhānām akhilaṃ dada 
gacchāmy ahaṃ punas tatra bhārate kulaparvatam 
2.23 anādiyugaparyantaṃ kīrtayāmāsa tadvidām 
śrīparvataṃ kumārākhyaṃ chāyāchatravibhūṣitam 
2.24 evam uktvā gatā tūrṇaṃ śrīmatkaumāraparvatam 
tatra chāyātmikā devī avyaktā vyaktarūpiṇī 
2.25 kṣapitvā kālaparyāyaṃ yāvad ālokayed diśām 
uttarāṃ tāvat tat sarvaṃ liṅgapūrṇaṃ mahāvanam 
2.26 aśītiyojanāyāmaṃ samantāt parimaṇḍalam 
caturdvārasamopetaṃ tīrthakoṭibhir āvṛtam 
2.27 anekasiddhasaṃchannaṃ manoramyam anopamam 
tamoguṇagaṇākīrṇam anekāścaryasaṃkulam 
2.28 devyādṛṣṭinipātena akasmāc chrīr upasthitā 
tena śrīśailam uddiṣṭaṃ devyānāmapratiṣṭhitam 
2.29 aṅguṣṭhena kṛtā rekhā svasthānasya ca tasya vai 
tatra jātā nadī divyā sāsīmā ubhayor api 
2.30 tacchāyāṃ niścalāṃ kṛtvā ājñāṃ dattvā tu śāmbhavīm 
atra yo viśate kaścit sa me tulyo bhaviṣyati 
2.31 hartā kartā svatantro 'sau bhraṣṭajñānaprakāśakaḥ 
ājñāto guṇam aiśvaryaṃ trailokye sacarācare 
2.32 evam ākṣepayitvā tu gatā trikūṭaparvatam 
tatra kālaṃ kṣapitvā tu kiṣkindhākhyam anugrahet 
2.33 tasya cājñāvibhūtiṃ tu dattvānugṛhya rākṣasān 
yena tiṣṭhāmy ahaṃ tīre samudrasya tv aśaṅkitā 
2.34 tatra kanyākumārī tvaṃ gatvā kālasya paryayam 
samudram anugṛhītvā daradaṇḍīṃ gatā punaḥ 
2.35 tatra chāyādharī devī avyaktaguṇacetasā 
lokānugrahahetvarthaṃ tatrājñāṃ mocayet punaḥ 
2.36 pūrvasthāne tu yā vācā sā tv atraiva bhaviṣyati 
evam uktvā gatā dūraṃ paścimaṃ himagahvaram 
2.37 yatra olambikā nāma tiṣṭhate vanapallikā 
raktāmbaradharā raktā raktasthā ratilālasā 
2.38 tatrasthā gahvarāntasthā guhāgahanavāsinī 
yāvat santiṣṭhate kālaṃ tāvad yogimayaṃ khilam 
2.39 tais tu santoṣitā devī nayopāyair anekadhā 
tataḥ prasannagambhīrā uvācedaṃ kujeśvarī 
2.40 anekopāyaracanā vivekaguṇaśālinī 
oḍḍitā yena aṅghribhyāṃ tenedam oḍḍiyānakam 
2.41 bhaviṣyati purāvastham aṣṭakoṭiguṇāśrayam 
āgatya khecarīcakrāt tv amoghājñāprasādataḥ 
2.42 aṣṭau te mānasāḥ putrā bhaviṣyanti ca ṣaḍguṇāḥ 
śākinyaṣṭakamātā tvam aṣṭasiṃhāsanādhipāḥ 
2.43 rudrāṇī rudraśākī ca gomukhī sumukhī tathā 
vānarī kekarī caiva kālarātrī ca bhaṭṭikā 
2.44 vāmano harṣaṇaś caiva siṃhavaktro mahābalaḥ 
mahākālaikavīraś ca bhairavaś ca pracaṇḍakaḥ 
2.45 caturbhujo gaṇādhyakṣo gajavaktro mahotkaṭaḥ 
airāvato vināyakṣaḥ ṣaḍ ete prāticārakāḥ 
2.46 putrīputrāṣṭakopetā nivṛttisthā niyāmikā 
anekasṛṣṭikartā ca susampūrṇaguṇojjvalaḥ 
2.47 kṛte coḍḍamaheśāno mitrānandaḥ patis tava 
aṣṭau putrāḥ kariṣyanti adhikāraṃ paścimānvaye 
2.48 adhikāraṃ kariṣyanti ṣaṭ kulādhipatīśvarāḥ 
yuge yuge bhaviṣyanti pṛthaksaṃjñākramodayāḥ 
2.49 evaṃ te sūcitaṃ sarvaṃ kramaughaḥ kulapaddhatiḥ 
bhaviṣyadraktacāmuṇḍe gamiṣyāmo yathepsitam 
2.50 evaṃ dattvā varaṃ tebhyaḥ karālaṃ ca samāgatā 
mahājvālālisandīptaṃ dīptatejānalaprabham 
2.51 mahājvālāvalīṭopaṃ devyās tejo mahādbhutam 
dhṛtaṃ yena pratāpo 'syās tena taj jālasaṃjñakam 
2.52 kiñcitkālasya paryāye prabuddhakiraṇojjvalā 
vicitraracanānekaṃ paśyaty agrendrajālavat 
2.53 kasyaiṣā racanā divyā pūrvam āsīd ihādhvare 
mattejasaḥ pratāpena bhraṣṭā tvaṃ na palāyitā 
2.54 karālavadane tubhyaṃ māyājālaprasārike 
jālandharādhipatyatvaṃ bhaviṣyaty acireṇa tu 
2.55 āgatya khecarīcakrāc chrīsiddhakauṇḍalīśvaraḥ 
aśeṣārthavido nāthaḥ sa te nātho bhaviṣyaty 
2.56 bhaviṣyanti karālinyo daśaiva duhitā tava 
bhaviṣyanty uttarānandā daśaite guṇavattarāḥ 
2.57 prāticārās tu ṣaḍ bhadre bhaviṣyanty anugocare 
ājñānandasamekatvaṃ karālīduhitājanam 
2.58 mālā śivā tathā durgā pāvanī harṣaṇī tathā 
jayā tu suprabhā caiva prabhā caṇḍā ca rugminī 
2.59 śakuniḥ sumatir nando gopālaś ca pitāmahaḥ 
pallavo meghanirghoṣaḥ śikhivaktro mahādhvajaḥ 
2.60 kālakūṭo daśaivaite putrāḥ siṃhāsanādhipāḥ 
bhaviṣyanti bhave tubhyaṃ meghavarṇādito gaṇāḥ 
2.61 bṛhatkukṣaikadaṃṣṭraś ca gaṇeśo vighnarāṭ prabhuḥ 
mahānandaḥ ṣaḍ evaite bhaviṣyanti gaṇeśvarāḥ 
2.62 uttarānandam īśānāḥ kariṣyanti yuge yuge 
jñānabhraṃśāvasāne tu saṃjñābhedān punaḥ punaḥ 
2.63 karālī tava santāne bhaviṣyanti mamājñayā 
evam uktvā maheśānī gatā sahyaṃ mahāvanam 
2.64 sampūrṇamaṇḍalārcībhiḥ pūrayantī jagattrayam 
niḥśeṣaṃ nikhilaṃ viśvaṃ lokālokāntasaṃsthitam 
2.65 yāvat santiṣṭhate tatsthā nayopādair anekadhā 
tāvac caṇḍākṣī balavat paricaryām anekadhā 
2.66 kurvantī vividhopāyaiḥ saukaryaracanān bahūn 
tejobhābhiḥ pradīpyante caṇḍākṣīguṇapūritāḥ 
2.67 yasminn adrau sthitā devī dedīpyārcir ghanojjvalā 
tat pradeśaṃ sthiraṃ jātam anyad dagdhaṃ carācaram 
2.68 āpūritam idaṃ sarvam anekaracanādibhiḥ 
paśyate parvataṃ mātā kālānte muditekṣaṇā 
2.69 tāvac caṇḍākṣiṇīty agre paśyaty amitatejasā 
viśvāmṛtaiḥ pūrayantī divyaughaguṇalālasā 
2.70 uvācedaṃ mahādevī sādhu pūrṇamanorathe 
yenedaṃ pūritaṃ sthānaṃ tena tvaṃ pūrṇarūpiṇī 
2.71 bhaviṣyaty ādhipatyatvaṃ parvato 'yaṃ tavodbhavaḥ 
viṣuvena tu yogena yenedaṃ saṃskṛtaṃ tvayā 
2.72 tena pīṭheśvarī tvaṃ vai bhaviṣyasi yuge yuge 
tejaskandhāsanaṃ tubhyaṃ dvāparāntādhikāriṇī 
2.73 bhaviṣyati bhave 'vaśyaṃ cakrānandaḥ patis tava 
sampūrṇamaṇḍalākāro granthādhāraḥ kuleśvaraḥ 
2.74 dvādaśaiva bhave tubhyaṃ bhaviṣyanti kumārikāḥ 
tābhyas tv ekaikakoṭiś ca ādhipatyādhikārikāḥ 
2.75 bhaviṣyanti tathā putrāḥ prāticārās tadardhataḥ 
āgantuṃ khecarīcakrāt preritās tu mamājñayā 
2.76 yena te nāmato brūmi yathā te 'haṃ prasāditā 
haṃsāvalī sutārā ca harṣā vāṇī sulocanā 
2.77 mahānandā sunandā ca koṭarākṣī vṛkānanā 
yaśovatī viśālākṣī sundarī dvādaśī tathā 
2.78 siṃhāsanādhipatye tāḥ pūrṇādrau kulakanyakāḥ 
valir nando daśagrīvo hayagrīvo hayas tathā 
2.79 sugrīvo gopatir bhīṣmaḥ śikhaṇḍī khaṇḍalas tathā 
śakraś caṇḍādhipaḥ siddhāḥ sarvānugrahakārakāḥ 
2.80 haṃsabhedādimārgasya bhaviṣyanti prakāśakāḥ 
āmodaś ca pramodaś ca sumukho durmukhas tathā 
2.81 avighno vighnakartā ca tava mārgeṣu rakṣakāḥ 
etat sarvaṃ yathānyāyaṃ caṇḍākṣī puratas tava 
2.82 bhaviṣyati mamājñāto gacchāmaḥ kāmikaṃ yathā 
evam uktvā gatā śīghraṃ yatrocchuṣmā nadī śubhā 
2.83 mahocchuṣmavanāntasthā divyādivyaughavāhinī 
mahocchuṣmahradaṃ yatra yatra nīlo mahāhradaḥ 
2.84 tatra sā ram ate devī divyājñāguṇaśālinī 
ubhayos taṭayos tasthā ramitvā kālaparyayam 
2.85 yāvat paśyati viśvāṅgī tattvāṅgī tāvat paśyati 
kāmabhogakṛtāṭopāṃ vasantatilakojjvalām 
2.86 dravayantīṃ dravantīṃ tām icchayā bhuvanatrayam 
tāṃ dṛṣṭvā prahasitā mātā kā tvaṃ kasmād ihāgatā 
2.87 tāṃ dṛṣṭvā mohitā mātā jānanty api na jānatī 
viśramya ca muhūrtaikaṃ yāvad ālokayet punaḥ 
2.88 tāvocchuṣma ihāyātā mamāgre śokavāhinī 
sādhu kāmini sarvatra yat tvayā darśitaṃ mama 
2.89 kāmānandaphalāvāptis tena kāmeśvarī bhava 
kāruṇyāt kāmarūpaṃ tu mamāgre vividhaṃ kṛtam 
2.90 tenedaṃ kāmarūpaṃ tu mahat pīṭhaṃ tavādhvaram 
bhaviṣyati kalau prāpte candrānandaḥ patis tava 
2.91 vāyuskandhopaviṣṭo 'sau ātmabhedaprakāśakaḥ 
aśeṣārthavido nāthaḥ sarvajñaḥ parameśvaraḥ 
2.92 kāmike kāmukas tubhyaṃ kāmadevo bhaviṣyati 
bhaviṣyanti mahānandās trayodaśa guṇānvitāḥ 
2.93 yoginyo yogasampannās tava ḍikkarikāḥ śubhāḥ 
putrās trayodaśā hy evaṃ saptaite prāticārakāḥ 
2.94 bhaviṣyanti jagaddīpā jagadānandakārakāḥ 
prabhā prasūtiḥ śāntābhā bhānuvatyā ca śrībalā 
2.95 hārī ca hāriṇī caiva śālinī kandukī tathā 
muktāvalī tathā cānyā gautamī kauśikī tathā 
2.96 śākodarī ca vikhyātā rājñāḥ siṃhāsanādhipāḥ 
bhānur anantahetuś ca surājaḥ sundaras tathā 
2.97 mahāvaktrārjuno bhīmo droṇako bhasmako 'ntakaḥ 
ketudhvajo viśālākṣaḥ kalyāṇaś caturānanaḥ 
2.98 eṣo'vatāro vividhaḥ kalau prāpte bhaviṣyati 
lampaṭo ghaṇṭakarṇaś ca sthūladanto gajānanaḥ 
2.99 bṛhatkukṣiḥ surānandaḥ saptamas tu balotkaṭaḥ 
saptaite viṣamāḥ kruddhāḥ sarvasantānapālakāḥ 
2.100 pīṭhopapīṭhasandohe kṣetre kṣetre mahābalāḥ 
sarvasādhāraṇā hy ete bhaviṣyanti kalau yuge 
2.101 anyat kāmāmbike kiñcid bhaṇiṣyāmaḥ kariṣyatha 
sarvasādhāraṇaṃ tac ca caturṇāṃ tu vijānatha 
2.102 bhaviṣyati kalācakraṃ maccharīrasamudbhavam 
parāparavibhāgajñaṃ mātaṅgakulasambhavam 
2.103 nīlasyottarabhāge tu mahocchuṣmavanāntagam 
parāparaṃ tu tenedaṃ pañcamaṃ pīṭhanāyakam 
2.104 mātaṅginīkulāntastham ādyaṃ caivātha pañcamam 
tena jātaṃ jagat sarvaṃ tat sañjātaṃ kulākulam 
2.105 maccharīrāṅgasambhūtaṃ bhaviṣyanti tavādhvare 
kāryadṛṣṭau praśastaṃ tu apraśastam itare jane 
2.106 madhyadeśasthitaṃ tac ca matsamīpe vyavasthitam 
siddhapālakasaṃyuktaṃ bhaviṣyaty avatārakam 
2.107 nirācāraṃ jagat sarvaṃ nirācāravivarjitam 
nirācāreṇa yogena kariṣyanti nirākulam 
2.108 hārikā hāri gāndhārī vīrā caiva nakhī tathā 
jvālinī sumukhī caiva piṅgalī ca sukeśinī 
2.109 śrīphalaḥ kaṣmalaś caṇḍaś caṇḍālaś ceṭakas tathā 
mātaṅgo bāhuko vīro avyakto navamaḥ smṛtaḥ 
2.110 herambo dhūlisaṃjñas tu piśācaḥ kubjavāmanaḥ 
parāparaṃ tu tat pīṭhaṃ kāmapīṭhordhvamadhyagam 
2.111 triśrotraṃ pūritaṃ yasmāt triśrotrā tvaṃ tathā bhava 
nadīrūpāsi māṅgalye bhava tvaṃ kāmarūpiṇī 
2.112 mātaṅgānāṃ kulotpanne yas tvāṃ nityābhivādayet 
teṣu kṣemakarī nityaṃ na manyante kṣayaṅkarī 
2.113 tvāṃ muktvā yo 'nyavarṇas tu yo 'tra pīṭhe bhaviṣyati 
tasyāpadakarī nityaṃ bhaviṣyasi kulāmbike 
2.114 evaṃ tiṣṭha mamānande jagānandakarī ciram 
bhaviṣyati purāvastham amoghājñāprasādataḥ 
2.115 evam uktvā gatā śīghraṃ devīkoṭaṃ kṛtakṣaṇāt 
ālokanena mahatā aṭṭahāso 'ṭṭahāsataḥ 
2.116 kolāgiryāṃ tathojjenī prayāgavaraṇādikam 
virajekāmrakādyaṃ ca anyac cānyaṃ carācaram 
2.117 yatra yatra gatā devī yatra yatrāvalokayet 
tatra sandohatīrthaṃ ca upakṣetrāṇy anekadhā 
2.118 kṛtaṃ tu bhārate varṣe ātmakīrtikumārikā 
tena kaumārikākhaṇḍaṃ sañjātaṃ puṇyapāvanam 
2.119 pūrvasantānadevena yad uktaṃ bhārataṃ vraja 
tadāvasāne kubjeśi ubhābhyāṃ melakaṃ tv iha 
2.120 tat kṛtaṃ sakalaṃ devyā ājñānandāvabodhakam 
āgatā tu punas tatra pūrvarūpānuyāyinī 
2.121 devo 'pi pūrvasantāne śiṣyaḥ suravarārcite 
śrīmadoḍramaheśānaṃ kṛtvā cājñāṃ punar dadet 
2.122 vraja tvaṃ bhārate varṣe itaḥ prabhṛty anugrahaḥ 
uḍḍapīṭhe punaḥ sthātuṃ kuru sṛṣṭim anekadhā 
2.123 evam uktvā punas tatra trikūṭaśikharāntagaḥ 
adṛṣṭavigraheśānaś cāntardhānam abhūt kṣaṇāt 

iti kulālikāmnāye śrīkubjikāmate ājñāparyāyakaumāryādhikāro nāma dvitīyaḥ paṭalaḥ 



śrīkubjikā uvāca  

3.1 tvayā sārdhaṃ mahādeva vivāho jāyate yathā 
kiṃ nimittaṃ ca kasyārthe tan me nigada bhairava 

śrībhairava uvāca 

3.2 tvam eva devi sā bhadre gatāsi pitṛmandiram 
krauñcasya ca vadhārthāya devais tv ārādhitā vayam 
3.3 sa ca krauñco yathotpannas tat sarvaṃ kathayāmi te 
sthānāt sthānaṃ kramantyāśu prasvedaḥ patitaḥ kvacit 
3.4 tatrāsau dānavo jātaḥ krauñcākhyo baladarpitaḥ 
tena devagaṇāḥ sarve saptalokāntasaṃsthitāḥ 
3.5 upadrutās tu balinā gatā brahmapuraṃ tu te 
brahmāpi taiḥ samaṃ devi viṣṇoḥ pārśvam upāgatāḥ 
3.6 viṣṇunā saha ālocya kiṃ kurvāma upadrutāḥ 
krauñcāsureṇa balinā tasyopāyaṃ vada prabho 
3.7 sphoṭanārthaṃ garutmīśa tenāham idam āgataḥ 
hariṇāpi punaś coktaṃ vadhituṃ tasya na kṣamaḥ 
3.8 devadevīsutaṃ muktvā kasmāt so 'pi tadudbhavaḥ 
tata evaṃ samālocya kva sthānasthaḥ kujeśvaraḥ 
3.9 devīdehojjhito deva uvācedaṃ pitāmahaḥ 
prahasya pālako hy evam uvācedaṃ pitāmahaḥ 
3.10 idānīṃ kim asau dakṣo nirvaped utthito 'nalaḥ 
tasya kopānalād dagdhaḥ kāryotpanne kutas tu saḥ 
3.11 mahādarpavaśād bhraṣṭā naṣṭā yūyaṃ divaukasaḥ 
evopalambhitāḥ sarve hariṇā brahmaṇoditāḥ 
3.12 ūcus tv evaṃ punaḥ paścād upāyaḥ ko 'sti sāmpratam 
himavadgirer duhitā tiṣṭhaty ekā subhāvitā 
3.13 jagannāthāṅghriniratā jagannātho hi tatra ca 
evam uktvā vasantasya kāmasya guṇaśālinaḥ 
3.14 devaiḥ pracoditau tau dvau devadevyor manoharau 
evaṃ tai racitaṃ sarvaṃ puṣpapallavakādibhiḥ 
3.15 kokilārāvajhaṅkāraṃ ṣaṭpadonmattasaṅkulam 
vasantam uditaṃ dṛṣṭvā prasannagirayā kila 
3.16 uvādecaṃ tadā kāle kāmo vidhyati bhairavam 
3.17 madālasānandabhṛtekṣaṇekṣitaḥ prapaśyatām eva kumārikorum 
dhṛtvā karotkaṇṭhitayā ca kaṇṭhe āliṅgayantyā ca diśaṃ vilokya 
3.18 lajjāyamānena sakopanena trailokyasaṃhāramahānalena 
sandīpito 'sau patitaḥ kṣaṇena kāmo hataḥ kāmanirīkṣaṇena 
3.19 kāmānande dagdhe prītiratī rodanātmike duḥsaham 
dṛṣṭvā te rudamāne nānaṅgaḥ patir bhavati mā rudathaḥ 
3.20 nigrahītvā tu taṃ kāmaṃ trinetrarūpadhāriṇā 
nigrahānugrahaś caiva bhairavecchā pravartate 
3.21 etad antaram āsādya brahmaviṣṇupuraḥsarāḥ 
sarve devagaṇāḥ prāptā ṛṣisiddhāḥ saguhyakāḥ 
3.22 stutistotraravair divyais toṣayitvā kujeśvaram 
uvācedaṃ harir brahmā deva cotkaṇṭhitā vayam 
3.23 bhavatpādavinirmuktā devadevā hy upadrutāḥ 
pracaṇḍabalinākrāntāḥ krauñcena parameśvara 
3.24 prasīda dayayā nātha bruvāmas tv abhayaṃ dada 
devīm udvāhyatāṃ nātha kleśāyāsaprapīḍitām 

śrībhairava uvāca 

3.25 kutra tiṣṭhati kasyaiṣā kā mātā kaḥ pitāmahaḥ 
ko me dadāti ko yācyaḥ kiṃ kurvāmaḥ kulojjhitāḥ 
3.26 uktaṃ tu brahmaṇā hy evaṃ yācyo 'haṃ yācakā vayam 
yajñayājī himantākhyo adhvaryuḥ parameśvaraḥ 
3.27 evam uktvā tu vṛddhena vasiṣṭhapramukhān ṛṣīn 
preṣitā vada śīghredaṃ sampradānakriyāṃ kuru 
3.28 tair gatai rucitaṃ sarvam ādeśaṃ śirasā dhṛtam 
bahuvittaprabhāreṇa vivāhānandakṛd dhy abhūt 
3.29 sarvamaṅgalamāṅgalyam ānandānandapūritam 
tadā prabhṛti sarvedam abhūt pūrṇamanoratham 
3.30 bhairave mathanāsakte jagadyoniḥ sadoditā 
trailokyasṛṣṭihetvarthaṃ manthānastho bhavet tada 
3.31 krīḍāvinodair atilālasasthaṃ kulāmṛtānandavidhau pravṛttam 
kuleśvaraṃ kubjibhṛtānurāgaṃ sampṛcchatedaṃ praṇatā kujeśī 
3.32 praṇayena tu yogena drāvitāṅgaṃ tvayā mama 
kubjenaiva tu rūpeṇa pīḍitātīva bhairava 

śrībhairava uvāca 

3.33 vinodakuśale devi anekārthavidhāyinī 
toṣito'dya tvayā nāthe pṛccha pṛccha sudurlabham 

śrīkubjikā uvāca 

3.34 pūrvakāle tvayā mahyaṃ prasādo yaḥ kṛtaḥ prabho 
kubjatvaṃ śabdarūpeṇa pūrvaṃ vyāharitaṃ yataḥ 
3.35 tena kāryeṇa deveśa kālasthānaṃ na me prabho 
pṛcchāmi praṇayāviṣṭā ajñānaguṇaśālinī 
3.36 kathaṃ me kubjikā nāma kiṃ khañjī pūrva sūcitā 
etad ācakṣva yatnena sarvopāyasamanvitam 
3.37 paramārthaṃ yadā deva tadā syāt siddhisādhanam 
atha cet tan mṛṣā vākyaṃ tat kiṃ nāma pratiṣṭhitam 
3.38 kathayasva prasādena samācāro guruḥ katham 
sādhanaṃ sarvavastūnāṃ yenaikena prapadyate 
3.39 mantratantreṇa yogena ājñātaḥ sampravartate 
tat sarvaṃ helayā nātha ekoccārād vada prabho 

śrībhairava uvāca 

3.40 krīḍānandasvarūpeṇa pṛṣṭo 'haṃ klinnacetase 
tena te kledanāmārgaṃ kathayāmi surārcite 
3.41 nityānandaprakartāraṃ kalyāṇārthaprabodhakam 
gurum anveṣayed yatnāt subhagaṃ priyadarśanam 
3.42 śubhajātisuvṛttisthaṃ śubhadeśasamudbhavam 
jñānavijñānasampannaṃ samastārthaviśāradam 
3.43 kālajñaṃ nipuṇaṃ dakṣaṃ sāmarthajñam akutsitam 
sarvāvayavasampannaṃ vyaṅgadoṣavivarjitam 
3.44 vedhaghaṭṭanirodhajñaṃ lokamārgaviśāradam 
kriyākāṇḍarataṃ śāntaṃ subhaktaṃ guruvatsalam 
3.45 susantuṣṭam alobhiṣṭhaṃ tapasvijanavatsalam 
pratipannajanānandaṃ śauryavantaṃ dṛḍhavratam 
3.46 vidyām abhayadātāraṃ laulyacāpalyavarjitam 
ācārapālakaṃ dhīraṃ samayeṣu kṛtāspadam 
3.47 āgataṃ na tyajed vastuṃ yo gatvā na parigrahet 
sa gurur na manuṣyānāṃ devānām api durlabhaḥ 
3.48 śaktihīnaṃ guruṃ prāpya śiṣye muktiḥ kutaḥ priye 
mūlacchinne yathā vṛkṣe kutaḥ puṣpaphalādikam 
3.49 evaṃvidhaṃ guruṃ prāpya ko na mucyeta bandhanāt 
taṃ dṛṣṭvā sarvabhāvena śiṣyaś cārādhayed gurum 
3.50 ātmanā ca dhanenaiva dāsatvena bhajet tu tam 
tāvad ārādhayed devi prasanno yāvat sa guruḥ 
3.51 prasanno dadate dīkṣāṃ yayā pāśakṣayo bhavet 
prabodho bhavate tasya gṛhṇāti yadi tatkramāt 
3.52 akramād dadate yas tu akramād gṛhṇate tu yaḥ 
dvāv etau niścitau baddhau pāśaiḥ kulasamudbhavaiḥ 
3.53 yāvad aṣṭau tathā pañca trīṇy abdāni subhāvitaḥ 
tāvan na kārayed dīkṣāṃ niṣiddhas tu kulānvaye 
3.54 atha ced gurusāmarthyād dadate dayayā śiśoḥ 
tathāpi tena kartavyaṃ dāsatvaṃ tu guroḥ kule 
3.55 ākruṣṭaḥ śatadhā vāpi tāḍitas tu sahasradhā 
evaṃ kṛte na yasyāsti virāgas tasya yogyatā 
3.56 guruṇā roṣito vātha yo dadyād uttaraṃ kvacit 
sa tu naśyati duṣṭātmā ajīrṇe bhojanaṃ yathā 
3.57 guroḥ kopaṃ na kartavyaṃ vāṅmanaḥkāyakarmabhiḥ 
tasya kopād dahiṣyanti prāptajñānaṃ marīcayaḥ 
3.58 martyalokaṃ samāsādya kiñcijjñā guravo yadi 
tadā jñānasya kā rakṣā jñānacauraṃ haranti tāḥ 
3.59 kṣamāśīlaṃ guruṃ matvā yadi śiṣyo 'pamānayet 
prāptaṃ me jñānasadbhāvaṃ gacchāmaḥ kathanaṃ vinā 
3.60 tasya rodhādikā devyo mūkatvaṃ janayanti vai 
na rohati yathā bījaṃ dagdhaṃ tadvad idaṃ priye 
3.61 ājñāyogaṃ kriyāmantraṃ muṣitvā yaḥ palāyate 
na ca tena samaṃ yāti tatraivāyāti niścitam 
3.62 sa kathaṃ tiṣṭhate mūḍho bhuktodgīrṇe vapur yathā 
nābubhukṣā bubhukṣā vā ghṛṇī kṣīṇatanur bhavet 
3.63 śubhaṃ vā aśubhaṃ vātha kurvāṇaṃ na hased gurum 
hasanād dhvaṃsam āyāti hasite hiṃsito hi saḥ 
3.64 sāmānyapratipattyā vā na vaded guruṇā saha 
mukhe hastaṃ pradattvā tu dadādeśam iti bruvan 
3.65 aṅgarakṣā na kartavyā na śāṭhyaṃ guruṇā saha 
uktānukteṣu kāryeṣu upekṣāṃ naiva kārayet 
3.66 śaṭhas tu duṣṭabhāvaś ca mṛṣāvādyapravādakaḥ 
antaraṅgī na sadbhāvī sa naṣṭaḥ kañjinī yathā 
3.67 dvidhābhāvābhipannasya bhinnabhāva itas tataḥ 
ya evaṃ vartate mūḍhaḥ sa naṣṭaḥ kañjikaṃ yathā 
3.68 ājñāsphurantam ānandaṃ guruṃ tyaktvānyam āśrayet 
sanniruddhas tu sarvatra rājyabhraṣṭo yathā nṛpaḥ 
3.69 śarīraṃ dravyavijñānaṃ vastravāhanabhūṣaṇam 
gurvarthaṃ dhārayed yas tu sa vai saṃskāram arhati 
3.70 gurur mānyo guruḥ pūjyaś cārādhyo guravaḥ sadā 
gurau santoṣite sarvaṃ toṣitaṃ sacarācaram 
3.71 guroḥ samo naiva hi martyaloke tathā viśeṣeṇa tu cāntarikṣe 
yas tārayed duḥkhamahārṇavaughāt kiṃ tasya kartuṃ sa karoti śiṣyaḥ 
3.72 na mātā na pitā caiva na bhrātā naiva bāndhavāḥ 
upakāraṃ hi kurvanti kurute yādṛśaṃ guruḥ 
3.73 evaṃ matvā varārohe duḥkhe duḥkhī sukhe sukhī 
guror vairodhikaṃ sthānaṃ pramādād api na vrajet 
3.74 upaviṣṭasya pārśve tu kartavyaṃ mārjanādikam 
bhikṣāpātraṃ nivedyeta puṣpadhāṭīṃ vahet sadā 
3.75 antaraṅgaṃ na kartavyaṃ vāṅmanaḥkāyakarmaṇā 
yat kiñcid gurave kāryaṃ tat kartavyam aśaṅkitaiḥ 
3.76 ya evaṃ vartate śiṣyaḥ sukhaduḥkhasamāśrayī 
tasya siddhir na dūrasthā mokṣaḥ svādhīnatāṃ gataḥ 
3.77 guruṇāpāditaṃ sarvam upadeśaṃ prapūjayet 
tasmād evaṃ viditvā tu gurur devo na cānyathā 
3.78 triṣkālaṃ praṇipātena dhyānayogena taṃ yajet 
adṛṣṭavigraheśānam upalabhyeta nānyathā 
3.79 mantradhyānatapopāyaiś caryāyogair anekadhā 
na paśyanti paraṃ śambhuṃ yāvan nopāsayed gurum 
3.80 dhyāyanto 'pi sadā bhaktyā madrūpaṃ guruṇoditam 
tathāpi na bhavet saukhyaṃ śāmbhavaṃ paramārthataḥ 
3.81 yāvan mūrdhnopari pādā ājñāyuktaḥ subhāvitaḥ 
tāvan na jāyate śīghram adṛṣṭaguṇalakṣaṇam 
3.82 gururūpavidhau yadi niścalatā tad upāsati mūrdhni dhṛtāṅghriyugam 
acireṇa bhavaty upaladbhiguṇā aṇimādiguṇāṣṭakaśambhupadam 
3.83 ājñāhīne parokṣatvaṃ trayāṇāṃ darśitaṃ mayā 
rudrabhairavavīrāṇāṃ kathanād yogaḥ pravartate 
3.84 siddhe siddhaṃ vinirdiṣṭaṃ  pratyakṣaguṇalakṣaṇam 
ājñātaḥ sampravarteta sā cājñā guravo viduḥ 
3.85 śāstre śāstre smṛtaṃ jñānaṃ mayānekavidhānataḥ 
pratyakṣamantranihitā siddhājñā siddhagocare 
3.86 tenedaṃ siddhasantānaṃ gurudevopalakṣitam 
yasya cājñānipātena sambodhaḥ śāmbhavo bhavet 
3.87 pratyakṣaṃ guravaṃ tyaktvā jñānarūpaṃ kuleśvaram 
katham ārādhanānyatra kurute mohitātmanaḥ 
3.88 nirvāṇāgnau jvaladdīpte yo 'nyatrāgnau vrajet kudhīḥ 
devāgāraṃ guruṃ tyaktvā vrajaty adhobhavaṃ tu saḥ 
3.89 pūrvakarmaviśuddhasya śaktipātaḥ sunirmalaḥ 
tīvraśaktinipāto 'sya śīghram eva prapadyate 
3.90 malakāyaprapūrṇasya mandaṃ mandaṃ pravartate 
abhāgyasyāpi ṣaṇmāsāt tīvratvaṃ samprapadyate 
3.91 yāvan na sarvabhāvena martyalokam upāgatam 
gurumūrtidharaṃ śambhuṃ tāvat pāto na śāmbhavaḥ 
3.92 madvīryaḥ pārado yadvat patitaḥ sphuṭitaḥ kaṇaiḥ 
tadvac ca deśikendrāṇāṃ rūpeṇa prabhramāmy aham 
3.93 mama vīryaprasūtās te ācāryāḥ sūtakeva hi 
vindhanti saṃskṛtāḥ santo bhaktyoṣadhisujāraṇāt 
3.94 aham ekaḥ kulālo vai khecarādau guṇojjvalaḥ 
sṛjāmi nikhilaṃ sarvaṃ gurutve saṃvyavasthitaḥ 
3.95 sādākhyaḥ khecarāṇāṃ ca piṅgo 'haṃ pavanodbhavaḥ 
tejase 'nantarūpo 'haṃ 'nugrahīśo jalodbhavaḥ 
3.96 śrīkaṇṭho 'haṃ nivṛt[ t ]yante kulīśo 'haṃ kṣitītale 
'nughrahāmy akhilaṃ sarvam eko 'py anekadhā sthitaḥ 
3.97 yena yena hi bhāvena pṛcchito 'haṃ yathā yathā 
tathā tathā mayā sarvaṃ gurutve sampradarśitam 
3.98 atraiva siddhasantāne pratyakṣo 'haṃ vyavasthitaḥ 
gurumūrtau sthito nityaṃ yasyājñā sampravartate 
3.99 suvarṇasya yathākārāḥ saṃjñābhedair anekadhā 
kaṭakaṅkaṇakeyūraiḥ kaṇṭhīmudrāṅgulīyakaiḥ 
3.100 tathā te guravo jñeyā mamājñāṅgasamudbhavāḥ 
rasavad vedhakā jñeyā stokaṃ stokaṃ bahuṃ bahum 
3.101 palakoṭipalānāṃ ca guñjād evaṃ na saṃśayaḥ 
evaṃ vibhūtir ākhyātā yugarūpānusāriṇī 
3.102 palena vihito vedhaḥ kiṃ guñjāto na vidhyati 
saṃskāre sati sarvatra bahustokaṃ na cintayet 
3.103 parāparavibhāgena kālabhāvavaśena ca 
bahustokaṃ na mantavyaṃ pratyayaś cātra kāraṇam 
3.104 rasaviddhaṃ yathā tāmraṃ na bhūyas tāmratāṃ vrajet 
ājñāviddhas tathāpy evaṃ na saṃsāram anukramet 
3.105 sā cājñā vidyate yasya mama tulyaḥ kujāmbike 
palamātraraso bhavyaṃ guñjāmātrarasena kim 
3.106 palamātraraso hy ahaṃ guñjāmātras tatodbhavaḥ 
evaṃ matvā gurūṇāṃ ca na vikalpo vibhūtaye 
3.107 ājñāto bhukti muktiś ca sarvaṃ sādhayate kṣaṇāt 
vāñchitaṃ labhate sarvaṃ yadi bhaktiḥ suniścalā 
3.108 ājñā tu dvividhā proktā sādhakānugrahātmikā 
samarthācārayuktasya tatas tāṃ tu pramocayet 
3.109 prāthamikasya yā ājñā; sā viśuddhiprabodhikā 
adhikāranimittārthaṃ punaś cājñāṃ daded guruḥ 
3.110 ājñāmātreṇa santuṣṭo anyasyājñāṃ dadāti ca 
nehatre tu sukhaṃ tasya paratre bādhyate tu saḥ 
3.111 vācāsiddhiḥ purakṣobhaṃ yāvaj jñātaṃ na yoginaḥ 
tāvan na kārayed dīkṣām ity ājñā pārameśvarī 
3.112 jñātvāmnāyaṃ varārohe divyādivyair niṣevitam 
catuṣkaṃ pañcakaṃ ṣaṭkaṃ catuṣkaṃ pañcakaṃ catuḥ 
3.113 ślokadvādaśakaṃ cānyat pañcaratnaṃ satadgraham 
ṣoḍhānyāsakramaṃ jñātvā etat sarvaṃ vidhānataḥ 
3.114 sa yogyaḥ kramiko śiṣyo anyathā nāmadhārakaḥ 
tataḥ prabhṛti siddho 'sau pūjyaḥ pūjāpakaḥ smṛtaḥ 
3.115 etadguṇaviśiṣṭo 'yaṃ śiṣyaḥ sarvārthadāyakaḥ 
mahadanyāyasamprāpto gurus taṃ na tiraskaret 
3.116 evaṃ gurutvam āpnoti siddhāmnāye kujeśvari 
anyathā jīvikārthaṃ tu ātmānaṃ ca viḍambitaḥ 
3.117 ājñāyā guṇam aiśvaryaṃ yasya jātaṃ yaśasvini 
tasmāt sampadyate sarvaṃ yadi dattā prasādataḥ 
3.118 krameṇa vihitā cājñā ājñāmoghakramaṃ viduḥ 
te jyeṣṭhāḥ kramasantāne yady eṣāṃ 'nukramo na hi 
3.119 kiṃ tu maṇḍalayogyās te na bhavanti kuleśvarāḥ 
candanākṣatadīpānāṃ nārhatvaṃ ca bhajanti te 
3.120 adhikārājñā prathamā prasādājñā dvitīyakā 
sā yadi kramaśaḥ prāptā sakramānukrameṇa tu 
3.121 tatra kālaṃ samārabhya gurutvaṃ bhajate tu saḥ 
sa yatra tiṣṭhate deśe tatra ye 'nye tu kanyasāḥ 
3.122 bhrātR̥ṇāṃ bhrātṛputrāś ca tatputrāś ca gurur yathā 
pūjayanty avikalpena siddhimārge vidhir hy ayam 
3.123 ārādhyas tiṣṭhate yatra tatra kiñcin na kārayet 
mantratantrakriyāyogam adhikāraṃ prabhutvatā 
3.124 pañcayojanamātreṇa gatvā karma samārabhet 
tatpure dāsavat tiṣṭhed ājñāśravaṇatatparaḥ 
3.125 svapurasthaṃ prayatnena yadārādhyaṃ na paśyati 
bhuñjate mohitātmānaḥ kilbiṣaṃ bhuñjate tu saḥ 
3.126 prāyaścittaṃ cared devi kubjikāyāyutadvayam 
atha ced darpamūḍhas tu jñātvā bhuñjaty aśaṅkitaḥ 
3.127 lakṣaṃ japtvā bhavec chuddhi[r] gurupūjā tv anantaram 
samapādena cāruhya guror agre ajānataḥ 
3.128 kubjikāyutam ekaṃ tu śudhyate gurupūjayā 
guror āsthānasaṃsthāne cāruhya pādukaiḥ saha 
3.129 gurudṛṣṭigate pāde japate tasya pūrvavat 
jyeṣṭho bhrātā guror mātā guroḥ sthānārcakās tu ye 
3.130 trīṇy etās tatsamā jñeyā draṣṭavyā guruvad yathā 
apamānya yadā hy etān ātmasambhāvitaḥ kudhīḥ 
3.131 prāyaścittī salakṣeṇa śudhyate gurupūjayā 
upamardya guroḥ sthānaṃ pāpātmā yatra tiṣṭhati 
3.132 tasya darśanasambhāṣāt pātakino bhavanti te 
yadā sādhuḥ prasannātmā tadā lakṣatrayeṇa vai 
3.133 maṇḍalānāṃ sahasreṇa gurupūjā tv anantaram 
pādukopānahau chattraṃ śayyāpaṭṭo 'tha bhājanam 
3.134 pādena saṃspṛśed yas tu śire dhṛtvāṣṭakaṃ japet 

iti kulālikāmnāye śrīkubjikāmate manthānabhedapracāraratisaṅgamo nāma tṛtīyaḥ paṭalaḥ 


śrīkubjikā uvāca
 
4.1 tṛptāhaṃ devadeveśa bījamantrair anekadhā 
cakraiś ca vividhākāraiḥ sadyaḥpratyayakārakaiḥ 
4.2 adyāpi saṃśayo nātha mantrāṇāṃ nirṇayaṃ prati 
pūrvaṃ ca kathitā mantrāḥ saptakoṭir asaṅkhyayā 
4.3 sādhanāni punas teṣāṃ  sadyaḥpratyayakārakāḥ 
kliṣyanti manujātyantaṃ japahomaparāyaṇāḥ 
4.4 vrataiś ca vividhākāraiḥ kaṣṭaiś cāndrāyaṇādibhiḥ 
kimarthaṃ te na sidhyanti japtvā koṭiśatair api 
4.5 tvaṃ ca devo vibhuḥ kartā tvayoktaṃ sat yam ucyate 
avicāreṇa tad grāhyaṃ mithyā kiṃ deva bhāṣitam 
4.6 dhvaṃsitāś ca tvayā lokā māyārūpeṇa bhairava 

śrībhairava uvāca 

4.7 sādhu sādhu mahāprājñe vastucodyavikalpini 
ye mayā kathitā mantrāḥ pūrvaṃ ye kāmasiddhidāḥ 
4.8 te gopitā mayā devi varṇarūpāḥ prakāśitāḥ 
tena te na prasidhyanti japtvā koṭiśatair api 
4.9 oṃkāreṇa tu te guptā namaskāreṇa bhāmini 
tena guptena guptās te śeṣā varṇās tu kevalāḥ 
4.10 ekākṣarā dvyakṣarāś ca catuḥpañcanavākṣarāḥ 
kūṭamantrāś ca ye kecit piṇḍamantrās tathaiva ca 
4.11 ekāśītipadāś cānye sahasrāntāḥ śatārdhikāḥ 
sarve te niṣphalāḥ proktāḥ kiṃ tu jīvavivarjitāḥ 
4.12 loke prasiddham evaṃ hi jīvahīnā mṛtāḥ kila 
mṛtasya copacāreṇa kiṃ teṣāṃ jīvitaṃ bhavet 
4.13 evaṃ mantrā varārohe akṣarārthe vyavasthitāḥ 
vratacaryair na sidhyanti sat yam etad udāhṛtam 
4.14 sidhyante jīvayuktās tu kim atra pravicāryate 
anyonyavalitāś caiva bheditā dvādaśasvaraiḥ 
4.15 rañjitāḥ śaktibījena sidhyante varavarṇini 
uktāḥ kāmapradāḥ sarve sarve cāmoghaśaktayaḥ 
4.16 śivavaktrodbhavāḥ sarve mananatrāṇadharmiṇaḥ 
trāṇaṃ tu rakṣaṇaṃ proktaṃ tac ca varṇavivarjitam 
4.17 śuddhasphaṭikasaàkāśaṃ cāroccāravivarjitam 
jvalantaṃ svena tejena hṛtpadme saṃvyavasthitam 
4.18 bhāvayec chūnyam ātmānam ekībhūtaṃ tayā saha 
suṣumṇācārayogena udyantaṃ ravibimbavat 
4.19 o-jā-pū-kā-kramān bhittvā vidyākubjapade sthitam 
tāvat kampaty asau yogī stobham āyāti tatkṣaṇāt 
4.20 mudrā mantraṃ tathā bhāṣā sarvaṃ jānāti tattvataḥ 
kubjīśānapadaṃ prāptaṃ suptāvasthā prajāyate 
4.21 īṣanmātraṃ vijānāti suptāvasthāvyavasthitaḥ 
brahmarandhragatā cājñā kāṣṭhavat tiṣṭhate tadā 
4.22 yavamātrapramāṇaṃ tu trikoṇākṛtim uttamam 
vaḍavāmaṇīndriyaṃ yadvan mīlanonmīlanāni ca 
4.23 tatra madhye gataṃ cetaḥ kāṣṭhāvasthā tu jāyate 
bherīmṛdaṅgaśabdādyair gītavādyair anekadhā 
4.24 na śṛṇoti na paśyeta na cānyaṃ manyate prabhum 
khaḍgacakrādibhiḥ śastraiś chidyamāno na vindati 
4.25 īṣanmātraṃ vijānāti śaktyāvasthā varānane 
śaktyantaṃ tu yadā prāptas tadā cotpatate kṣaṇāt 
4.26 evaṃ krameṇa deveśi śaktyuccāraṃ samabhyaset 
satatābhyāsayogena vāgīśatvaṃ prajāyate 
4.27 māsam ekaṃ yadābhyastaṃ kāvyakartā na saṃśayaḥ 
dvibhir māsair vapuṣmantaḥ kṣuttṛṣṇādyair na bādhyate 
4.28 vicared akhilān lokān yāvadābhūtasamplavam 
akṣarārthena ye mantrās teṣām eva vidhiḥ sphuṭam 

śrīkubjikā uvāca 

4.29 akṣarārthopadeśaś ca sampradāyaś ca kaulikaḥ 
yathā vijñāyate deva prasādaṃ kuru bhairava 

śrībhairava uvāca 

4.30 śṛṇu devi pravakṣyāmi mantrāṇāṃ nirṇayaṃ sphuṭam 
prastārādi-r-anekaiś ca ye mantrāś coditāḥ priye 
4.31 akṣarārthena te jñeyāḥ khaṇḍamantrāḥ śivoditāḥ 
rañjakena samāyuktā upadeśaḥ surārcite 
4.32 sampradāyo bhaved devi so 'pi ṣaṭsu prabhedataḥ 
pallavo yogarodhaś ca sampuṭo grathanas tathā 
4.33 vidarbhaś ca ṣaḍ ete hi sampradāyāḥ prakīrtitāḥ 
mālinī śabdarāśiś ca kauliko vidhir uttamaḥ 
4.34 sā tu jñeyā varārohe bhedāḥ pañcāśa suvrate 
kulaṃ tu ṣaḍvidhaṃ jñeyaṃ tasya vakṣyāmi lakṣaṇam 
4.35 paraṃ bījaṃ tathā mūlam āgamo vidhir eva ca 
varṇarāśisamāyuktaḥ ṣaḍvidhas tu kulakramaḥ 
4.36 sakalo niṣkalaś caiva tathā sakalaniṣkalaḥ 
sūkṣmo bhinnakalaś caiva kalātīto varānane 
4.37 ṣaṭprakāro bhaven mantro jñātavyaḥ siddhim icchatā 
śuddhadvandvajasaṭkīrṇa upadeśas tribhedataḥ 

śrīkubjikā uvāca 

4.38 sūcitā mantramārge tu ye mantrā lakṣaṇānvitāḥ 
te jñeyās tvatprasādena dhyānadhāraṇayogataḥ 
4.39 kulamārgagatā deva yathā bhavati tat katham 
kathaṃ tu pallavo yoga ādi ṣaṭsu prakārataḥ 
4.40 kaulikaṃ ṣaḍvidhaṃ kiṃ tu mantrāṇāṃ ṣaḍvidhā gatiḥ 
trividhaś copadeśaś ca etad icchāmi veditum 

śrībhairava uvāca 

4.41 pallavo ādideśe tu yogo madhye vijānataḥ 
rodhas tu ādimadhyānte sampuṭaś cādi-r-antagaḥ 
4.42 grathanaṃ cāntare jñeyam akṣarākṣarayogataḥ 
vidarbho mantra-m-ādau tu mantrānte vīranāyike 
4.43 mālāgrathanam etad dhi jñātavyaṃ mantravādinā 
pallavo mantrabodhe tu yogo jñeyas tu sarvadā 
4.44 amalīkaraṇe caiva sandhānasya vidhau priye 
yogas tu kathito hy evaṃ rodhaś caivānukathyate 
4.45 tīvramantrapadastambhe vākstambhe sainyastambhane 
hastyādiśakaṭayantre nāvānte ca prakīrtitaḥ 
4.46 teṣu rodhaḥ praśasyeta paśūnām utkrameṣu ca 
sampuṭo mantrarakṣāsu vaśyārthe caiva yojayet 
4.47 amṛtīkaraṇe caiva viṣe sthāvarajaṅgame 
śāntikādiṣu kāryeṣu sampuṭas tu praśayate 
4.48 grathanaṃ rūpakāryeṣu ākṛṣṭyādiṣu karmasu 
sandhāne tu varārohe grathanaṃ samudāhṛtam 
4.49 vidarbhaḥ sarvakāryeṣu uktānukteṣu vastuṣu 
kartavyaṃ satataṃ devi yadi siddhiṃ samīhate 
4.50 etad devi samākhyātaṃ sampradāyavidhiḥ śubhaḥ 
na mayā kasyacit khyātaṃ satyaṃ satyaṃ gaṇāmbike 
4.51 sāmprataṃ kulamārgas tu yathā bhavati tac chṛṇu 
paraṃ binduḥ samākhyāto hṛtpadme suranāyike 
4.52 grahaṇaṃ tasya copāyas taṃ jñeyaṃ kaulikaṃ param 
bījaṃ kuṇḍalinī śaktir yā karoti gamāgamam 
4.53 tasyāntaṃ tu tato jñātvā bījaṃ kaulikam uttamam 
mūlaṃ śaktiḥ smṛtā kubjī jagataḥ kāraṇātmikā 
4.54 tasyā jātam aśeṣaṃ tu ābrahmabhuvanāntikam 
sṛjate yena suśroṇi kāryakāraṇayogataḥ 
4.55 jñeyā dharmiṇi dharmitvaṃ yathoṣmā kṛṣṇavartmanaḥ 
etat kaulikam ākhyātaṃ mūlasaṃjñā varānane 
4.56 āgamas tatra sūtrārtho vidhis tatraiva coditā 
varṇarāśikramo jñeyo nādiphāntasvarūpataḥ 
4.57 ādikṣāntaś ca deveśi śabdarāśikramo viduḥ 
etat kaulikam ākhyataṃ ṣaṭprakāraṃ varānane 
4.58 sakalādikrameṇaiva vakṣyamānaṃ nibodhata 
brahmasthaḥ sakalo mantra aṣṭatriṃśatkalair yutaḥ 
4.59 pūryaṣṭakasamopeta udbhavastho vijānataḥ 
kaṇṭhastho niṣkalo devi kalākālavivarjitaḥ 
4.60 rudrasthānagato bhadre mantro bhāvair dvibhir yutaḥ 
sthūlajālakalair yukto bindvādīnāṃ ca sambhavaiḥ 
4.61 sūkṣmādhārasthito hy ekaḥ sparśākhyo mantravedakaḥ 
sakalo niṣkalaś cāsau mantro jñeyas tu suvrate 
4.62 vilīno bindudeve tu yonyākārasvarūpataḥ 
śabdasparśavinirmukto mantro jñeyas tu niṣkalaḥ 
4.63 sūkṣmāt sūkṣmataro devi sa ca sūkṣmo nigadyate 
kālarūpaḥ smṛto bindus taṃ bhittvā vrajate yadi 
4.64 ūrdhvapade pravṛttasya suṣumṇādhāragocaraḥ 
pralīnaḥ śabdadeve tu cicchaktipratibodhitaḥ 
4.65 bhinnakalaḥ smṛto hy evaṃ layātītas tu mokṣadaḥ 
pañcāvasthā samākhyātā mantrāṇām amitaujasām 
4.66 yāvad evaṃ na vindeta tāvat siddhiḥ kuto bhavet 
hṛtkaṇṭhatālujihvauṣṭhau dantanāsodbhavākṣarāḥ 
4.67 kṣaṇapradhvaṃsino devi yathotpattis tathā kṣayaḥ /
kṛtakā hy acetanā śūnyā anityā jalpakārakāḥ 
4.68 pañcāvasthāprabhinnas tu tadā mantra-m ihocyate 
evaṃ mantragatiṃ jñātvā sidhyante līlayā narāḥ 
4.69 udbhave śuddham ity ukto viśleṣe dvandvajaḥ smṛtaḥ 
saṅkīrṇe layasaṃsthā hi upadeśas tridhā smṛtaḥ 
4.70 sparśanaṃ cāvalokaṃ ca sambhāṣaṃ cātmadarśanam 
svayamāveśanaṃ caiva saṅkrāntiḥ pañcalakṣaṇā 
4.71 sparśanaṃ hṛdisaṃsthaṃ tu ālokaṃ kaṇṭhadeśataḥ 
tālusthāne tu sambhāṣaṃ darśanaṃ bindumadhyataḥ 
4.72 svayamāveśanaṃ devi kubjirandhre na saṃśayaḥ 
sparśane kampanaṃ jñeyam āloke dhunanaṃ bhavet 
4.73 sambhāṣe tu bhavet stobhaḥ śāstrārthaṃ caiva manyate 
darśanena guṇāvāptir aṇimādiguṇāṣṭakam 
4.74 svayamāviśane devi utpaten nātra saṃśayaḥ 
evaṃ mantragatiṃ jñātvā sidhyate nātra saṃśayaḥ 
4.75 ataḥ paraṃ pravakṣyāmi mantroddhāraṃ varānane/
sugupte bhūsame śuddhe gomayenopalepite 
4.76 puṣpaprakaragandhāḍhye gahvaraṃ tu samālikhet 
saptatrayodaśair bhāgaiḥ ṣaḍ lopyāḥ ṣaṭkrameṇa tu 
4.77 yathā caivaikapārśve tu dvitīyam evam eva hi 
ekaṃ trīṇi tathā pañca sapta nava tathaiva ca 
4.78 ekādaśa tathāpy evaṃ trayodaśāvasānataḥ 
pañcāśad ūnam ekena kartavyaṃ hi yathāvidhi 
4.79 kāmarūpād akārādau likhed evaṃ krameṇa tu 
svarāḥ sparśā yathāvṛttyā yāvan madhyam upāgatāḥ 
4.80 oḍḍiyānagataṃ devi haṃsākhyaṃ tu mahātmanam 
ka-ṣākhyaṃ mantrarājānaṃ saṃyogena tu jāyate 
4.81 evaṃ nyāse kṛte devi uddharen mālinīṃ śubhām 
nādiphāntakrameṇaiva yathā bhavati tac chṛṇu 
4.82 pa-dha-madhye śikhā jñeyā adhaḥśiravyavasthitā 
e-pūrvākṣaracatuṣkaṃ śiromālā nigadyate 
4.83 ai-śa-madhye śiro devyāḥ kārayec chubhalakṣaṇam 
tṛtīyaṃ nayanaṃ devyā ṅa-cha-madhyagataṃ punaḥ 
4.84 na-da-madhyagataṃ jñeyaṃ dvidhābhūtaṃ varānane 
nayanau ca smṛtau devyāḥ kramād dakṣiṇavāmagau 
4.85 ṭa-pūrve nāsikā jñeyā saṃsṛṣṭā caiva madhyagā 
ḍha-ta-madhyagataṃ gṛhya dvirabhyāsapaderitam 
4.86 ṭha-ḍa-pūrvau yutau 'dhastād bhūṣaṇau karṇayoḥ smṛtau 
vāmadakṣiṇamārgeṇa karṇabhūṣasthitāv iha 
4.87 sa-ca-madhyagataṃ vaktraṃ devyāyā vīranāyike 
visargānta-kha-madhyasthaṃ ka-ga-madhyagataṃ punaḥ 
4.88 kha-paścimaṃ samuddiṣṭaṃ paścimottaram eva ca 
gha-ca-madhyagataṃ caiva uddhared akṣaraṃ śubham 
4.89 ete pañca smṛtā varṇā devyā daśanakalpanā 
ña-pūrve rasanā devyā jha-ūrdhvena sarasvatī 
4.90 sa-ta-madhyasthitaḥ kaṇṭhaḥ ma-cha-madhyagatoddharet 
ra-ma-madhyagataṃ tadvad akṣarau tu śubhātmakau 
4.91 śikharau tau smṛtau bhadre vāmadakṣiṇagau śubhau 
ū-ḍha-madhyagataṃ gṛhya ḍa-ṇa-madhye dvitīyakam 
4.92 vāmadakṣiṇagau dvau tu bāhū devyāḥ surārcite 
ṭa-ḍa-madhyagataṃ caiva dvidhābhūtaṃ tu kārayet 
4.93 karatalau smṛtau devyāḥ savyāsavyau vijānataḥ 
ja-ma-pūrvau tu aṅgulyau vāmadakṣiṇagau śubhau 
4.94 aṃ-ka-madhye karapṛṣṭhe dvidhābhūtaṃ prakalpayet 
ña-ṭha-madhyagataṃ gṛhya vāmahaste pradāpayet 
4.95 ūrdhvavaktrakapālaṃ tu amṛtākhyena pūritam 
dakṣiṇe tu kare jñeyaṃ ya-ḍha-madhye tu daṇḍakam 
4.96 śūlasya kathitaṃ bhadre uddhāreṇa samuddhṛtam 
a-cha-madhyagataṃ śūlam uttānam ūrdhvavaktragam 
4.97 jñātavyaṃ tu vipaścidbhir yathālakṣaṇalakṣitam 
gha-na-madhye tu hṛdayaṃ devyāyāḥ sarvakāmadam 
4.98 ma-ṣa-madhyagataṃ gṛhya ātmabījaṃ śivātmakam 
visargasahitaṃ bhadre uddhṛtaṃ mantram uttamam 
4.99 ya-sa-madhyagataṃ prāṇaṃ devyāyā vīranāyike 
ja-ca-madhyagataṃ gṛhya ra-va-sandhigataṃ tathā 
4.100 vāmadakṣiṇagau dvau tu akṣarau tau stanātmakau 
jha-pūrve tu payo jñeyam amṛtaṃ ca udāhṛtam 
4.101 na-sa-madhyagataṃ gṛhya udaram uddhṛtaṃ 'naghe 
ka-ṣākhyaṃ tattvarājānaṃ nābhiṃ devyāḥ prakalpayet 
4.102 bha-ña-madhyagataṃ devi nitambaṃ sakalātmakam 
va-ṣa-madhyagataṃ guhyam au-paścimasamanvitam 
4.103 ūrvākāraṃ bhaved bījaṃ ṇa-tha-madhyagataṃ 'naghe 
ṇa-ta-dakṣiṇagau bījau jānunī dve prakalpayet 
4.104 savyāsavyagatau jñeyau krameṇaiva śubhekṣaṇe 
tha-da-dakṣiṇagau dvau tu jaṅghau dve vāmadakṣiṇau 
4.105 tha-da-madhyagataṃ devi pa-ba-madhyaṃ tathaiva ca 
dvau bījau coddhṛtau bhadre pādau jñeyau vipaścitā 
4.106 vāmadakṣiṇagau proktau lakṣaṇena samanvitau 
evaṃ samyagvidhānena uddhṛtā mālinī priye 
4.107 sapta koṭyas tu vidyānāṃ mantrāṇām amitaujasām 
eṣā hy ekā parā yonir mālinī sarvakāmadā 
4.108 mālayitvā sthitā yena tenaiṣā mālinī smṛtā 
ye bhūtā ye bhaviṣyanti aprameyā varānane 
4.109 rudrāṇāṃ yoginīnāṃ ca sā mātaiva nigadyate 
avarṇā varṇasaṃyogā jñātavyā tu śubhekṣaṇe 
4.110 sarvarudrātmakā mantrā rudrāḥ śaktyātmakāḥ priye 
śaktis tu mātṛkā jñeyā sā jñeyā tu śivātmikā 
4.111 evaṃ mantrapramāṇaṃ tu kathitaṃ tava śobhane 
etad ādyaṃ samākhyātaṃ gopanīyaṃ prayatnataḥ 
4.112 ekavīravidhānaṃ tu prāg uktam anya āgame 

iti kulālikāmnāye śrīkubjikāmate mantranirṇayagahvaramālinyuddhāro nāma caturthaḥ paṭalaḥ 



śrībhairava uvāca 

5.1 umāmāheśvaraṃ cakraṃ kathayāmi suniścitam 
padaṃ ca padabhedaṃ ca yo jānāti sa sidhyati 
5.2 aiṃ namo bhagavate rudrāya padaṃ caiva daśākṣaram 
namaś cāmuṇḍe dvitīyaṃ syāt pañcākṣaram udāhṛtam 
5.3 namaś cākāśamātR̥ṇāṃ padam anyat tṛtīyakam 
aṣṭākṣaraṃ samākhyātaṃ lakṣaṇena vilakṣitam 
5.4 sarvakāmārthasādhakīnāṃ padaṃ caiva caturthakam 
navākṣaram idaṃ devi padaṃ yat samudāhṛtam 
5.5 ajarāmarīṇāṃ padaṃ cātra kathitaṃ pañcaguṇāvaham 
akṣarāṇāṃ samāsena rasasaṅkhyā udāhṛtā 
5.6 sarvatrāpratihatagatīnāṃ  padaṃ ṣaṣṭhaṃ varānane 
daśākṣaraṃ samākhyātaṃ kathitaṃ vīranāyike 
5.7 svarūpapararūpaparivartanīnāṃ padaṃ saptamakaṃ bhavet 
akṣarāṇāṃ samāsena daśatritayam uttamam 
5.8 sarvasattva vaśīkaraṇocchādanonmūlanasamastakarmapravṛttīnāṃ padaṃ cāṣṭamakaṃ bhavet 
akṣarāṇāṃ samāsena viṃśaccatvārisaṅkhyayā 
5.9 sarvamātṛguhyahṛdayaparamasiddhaṃ padaṃ tu navamaṃ bhavet 
akṣarāṇāṃ samāsena śakrasaṅkhyā varānane 
5.10 parakarma tathā devi chedanakaraṃ prakīrtitam 
siddhikaraṃ ca evātra padaṃ caiva dvipañcakam 
5.11 akṣarāṇāṃ tathā saṅkhyā ekatra samudāhṛtā 
dvisaptaparimāṇena sphuṭam etat kuleśvari 
5.12 śṛṇu cānyaṃ varārohe mātR̥ṇāṃ vacanaṃ śubham 
akṣarāṇāṃ pramāṇena dvicatuṣkaṃ varānane 
5.13 ekādaśamam etad dhi padaṃ sarvaguṇāvaham 
tad yatheti samārabhya dvitīyaṃ śobhanaṃ priye 
5.14 brahmāṇīti padaṃ pūrvaṃ māheśvarī dvitīyakam 
kaumārīti tṛtīyaṃ syād vaiṣṇavyā tu caturthakam 
5.15 vārāhyā pañcamaṃ jñeyam aindrī ṣaṣṭhamakaṃ bhavet 
aiśānī saptamaṃ proktam āgneyī cāṣṭamaṃ priye 
5.16 evamādyāḥ sthitā devyaḥ kathitās tava śobhane 
aghore amoghe varade vicce vai vacanaṃ śubham 
5.17 sarvāsāṃ caiva mātR̥ṇāṃ svāhāpraṇavasaṃyutam 
aiṃ cāmuṇḍe padaṃ pūrvam ūrdhvakeśi dvitīyakam 
5.18 jvalitaśikhe tṛtīyaṃ tu vidyujjihve caturthakam 
tārakākṣi tathā devi pañcamaṃ parikīrtitam 
5.19 piṅgalabhruve nāmena ṣaṣṭhamaṃ tu sulocane 
vikṛtadaṃṣṭre padaṃ hy etat saptamaṃ parikīrtitam 
5.20 kruddhe ti ca tathā cānyam aṣṭamaṃ śubhalakṣaṇam 
māṃsaśoṇitasurāsavapriye navamaṃ daśamaṃ tu hasadvayam 
5.21 nṛtyadvayaṃ tathā coktaṃ daśa-m-ekaṃ tu suvrate 
vijṛmbha ca tathā yugmaṃ daśadve ca prakāśitam 
5.22 māyātrailokyarūpeti daśatritayam uttamam 
sahasraparivartanīnāṃ dvisaptamaṃ parameśvari 
5.23 nudayugmaṃ tripañcaiva kūṭayugmaṃ dviraṣṭakam 
ciriyugmaṃ tathā bhadre daśasapta ca ekataḥ 
5.24 hiridvitayam ekatra daśa-aṣṭa śubhekṣaṇe 
bhiri caiva dvirabhyāsād viṃśa-m-ekonasaṅkhyayā 
5.25 trāsanidvitayaṃ caiva padaṃ viṃśamakaṃ bhavet 
bhrāmaṇiyugmam etad dhi viṃśa-m-ekaṃ tu uttamam 
5.26 vidrāvaṇi dvirabhyāsād viṃśadvayaṃ tathānaghe 
kṣobhaṇīti dvirabhyāsād viṃśatrikam udāhṛtam 
5.27 māraṇidvitayaṃ caiva viṃśacatvārisaṅkhyayā 
sañjīvanipade dve tu pañcaviṃśapadaṃ priye 
5.28 heriyugmaṃ smṛtaṃ bhadre ṣaḍviṃśakam anuttamam 
geriyugmaṃ tathā proktaṃ saptaviṃśatimaṃ padam 
5.29 ghuri caiva dvirabhyāsād aṣṭāviṃśa varānane 
ghurileti tathāpy evam ūnatriṃśam udāhṛtam 
5.30 namo mātṛgaṇāyeti triṃśakaṃ kathitaṃ sphuṭam 
namo namaḥ aiṃ vicce svāhā triṃśam ekottaraṃ padam 
5.31 samastapadasaṃyogāt parimāṇaṃ śatārdhakam 
varṇānāṃ ca śate dve tu dvānavatyā varānane 
5.32 adhikaṃ kathitaṃ bhadre mātR̥ṇāṃ nāmavarjitam 
padabhedas tu vidyāyā jñātavyaḥ sādhakena tu 
5.33 prayatnena varārohe tantrāmnāyaprapālakaḥ 
sakṛd uccāritā vidyā samayajño bhavaty asau 
5.34 pañcapraṇava-m-uddhāraṃ yathā tvaṃ gahvare śṛṇu 
e-o-madhye samuddhṛtya bindunāda-m-alaṅkṛtam 
5.35 bhagākhyaṃ prathamaṃ bījam uddhṛtaṃ paramākṣaram 
va-ṣa-madhyagataṃ gṛhya ṇa-ṭa-madhyāsane sthitam 
5.36 i-u-madhyena sambhinnam aḥ-au-madhya-m-alaṅkṛtam 
dvitīyaṃ kathitaṃ devi tṛtīyaṃ va-ma-madhyagam 
5.37 ṭha-la-madhyāsanāsīnaṃ caturthasvarabheditam 
bindunā mastakākrāntaṃ na-ca-madhye caturthakam 
5.38 ī-ta-madhye samāruddham ai-pūrveṇa vibheditam 
bindunādasamākrāntaṃ caturthaṃ praṇavaṃ bhavet 
5.39 pañcamaṃ ya-sa-madhyasthaṃ ba-ha-madhyāsane sthitam 
aṃ-pūrveṇa samāyuktam au-paścimavibhūṭitam 
5.40 ardhacandrānvitaṃ kṛtvā bindunādayutaṃ kuru 
pañcapraṇava-m-uddhāraṃ rahasyaṃ kathitaṃ tava 
5.41 mantrāṇāṃ dīpakaṃ devi yathākarmaṇi yojayet 
vidyāyās tu prasaṅgena pañcapraṇavam uddhṛtam 
5.42 sāmprataṃ śṛṇu kalyāṇi vidyāmāhātmyam uttamam 
sevanāj japahomād vā dhyānāc ca kramaśo bhavet 
5.43 ṣaṇmāsāc cotpated devi sat yam etad udāhṛtam 
kṛtvā sāmrāṭajān doṣān uccārāt kalmaṣāpaham 
5.44 devadrohe gurudrohe koṭitriṃśaiḥ sa śudhyati 
chedane puṣpapattrāṇām āvartāc chudhyate tu saḥ 
5.45 sandhyālope kṛte devi trirāvarteṇa śudhyati 
āhnikacchedasañjāte śatam ekam udīrayet 
5.46 laṅghane samayānāṃ ca abhakṣyasya tu bhakṣaṇe 
avācyavācite devi sahasrāc chuddhir iṣyate 
5.47 kākolūkakapotānāṃ pakṣiṇāṃ ghātane kṛte 
sahasrair dvibhiḥ śudhyeta satyaṃ satyaṃ na saṃśayaḥ 
5.48 chāgameṣa tathānyāni mṛgajambūka ṛkṣayoḥ 
śuddhis trisahasrād devi yathā bhairava-m-abravīt 
5.49 sarpamārjārahantāro dundubhomatsyaghātakaḥ 
caturbhiś ca sahasrair hi śīghraṃ śuddhim avāpnuyāt 
5.50 śvasūkaranakulādi mūṣakaś cātha vāpi vā 
pañcabhiḥ śuddhir iṣyeta sahasrais tu kulānvaye 
5.51 gavāṃ hatvā praśudhyeta daśalakṣais tu saṅkhyayā 
brāhmaṇas tu yadā devi pramādād ghātito budhaiḥ 
5.52 lakṣair viṃśati śudhyeta naktāśī tu jitendriyaḥ 
bauddhārahantahantā ca dvijād dviguṇa śudhyati 
5.53 lākulā mauṣalāś caiva ye cānye lātapāṇayaḥ 
hatvā śuddhim avāpnoti koṭitrayajapena tu 
5.54 guruṃ hatvā pañca koṭyaḥ śudhyate tu pramādataḥ 
striyo ghātī durācāro daśa koṭyo japet priye 
5.55 naktāśī śuddhim āpnoti kṣetrapīṭhān bhramed yadi 
anyeṣāṃ varṇajātīnām adhamottamamadhyamāḥ 
5.56 lakṣais tu bhavate śuddhir dvitricatvārisaṅkhyayā 
ekād ekona kartavyaṃ varṇāṇāṃ ca krameṇa tu 
5.57 nindate yoginīṃ yas tu śivabhaktāṃś ca nindati 
śāstrāṇi dūṣayed yas tu striyam ākoṭayeti ca 
5.58 kroṣanti kanyakā devi sahasrāc chuddhir iṣyate 
vāmadakṣiṇasiddhānte śivavratadharo hataḥ 
5.59 koṭicaturbhir deveśi śudhyate japatatparaḥ 
yaḥ punas tattvavettā ca ṣoḍhānyāsaviśāradaḥ 
5.60 smaraṇāc chuddhir iṣyeta tathyaṃ bhairava-m-abravīt 
krodhena tu yadā devi uccaiḥśabdapralāpitam 
5.61 trivārāvartayed vidyāṃ śāntim āśu prayacchati 
kṛte karmaṇi bālānāṃ lūtācipiṭagaṇḍayoḥ 
5.62 jvaragrahaviṣādibhyaḥ oṣadhākhyāpanāya ca 
pañcāvartād viśudhyeta anvayī yas tu śāsane 
5.63 yaḥ punaḥ kramavettā ca śuddhāśuddhair na bādhyate 
deśikaṃ putrakaṃ vāpi sādhakaṃ samayajñakam 
5.64 pramādān nindate yas tu daśāvartād viśudhyati 
aliṃ jugupsayed yas tu phalguṣaṃ vā yadi priye 
5.65 ekoccāreṇa śudhyeta annaṃ vā yaj jugupsate 
kandukaṃ mallakoṣāḍhyā chippakaṃ carmakārakam 
5.66 dhvajaṃ sūnākaraṃ vāpi matsyaghātaṃ tu lubdhakam 
koṅkaṇaṃ cīnabāhlīkaṃ vaṅgālaṃ kāmarūpakam 
5.67 māgadhaṃ saindhavaṃ vāpi gujjaraṃ lāṭasaṃjñakam 
anye 'pi deśamadhyasthā vanavāsāntyajātayaḥ 
5.68 veśyādikramaśaḥ sarve nindanāc chuddhir iṣyate 
trirāvarteṇa deveśi akāmāt kāmato 'pi vā 
5.69 kāmato dviguṇaṃ devi kartavyaṃ siddhim icchatā 
trikhaṇḍā yādṛśaṃ proktaṃ prāyaścittaṃ kulānvaye 
5.70 dvātriṃśākṣarayā tadvat kartavyaṃ tattvavedibhiḥ 
ete nirodharūpās tu sādhakānāṃ prakāśitāḥ 
5.71 tadarthe kathitā vidyā yena sidhyanti sādhakāḥ 
śreyārthināṃ mayākhyātā madbhaktāḥ kṛtaniścayāḥ 
5.72 anyeṣāṃ na kadācit syāl laulyārthe ye sthitānaghe 
iyaṃ vidyā samākhyātā upayogād varānane 
5.73 sāmprataṃ padabhedas tu yathā yojyas tu bhairavi 
tathā te kathayiṣyāmi tac chṛṇuṣva samāsataḥ 
5.74 yā vidyā kathitā pūrvaṃ nādiphāntakrameṇa tu 
taccharīragatā varṇāḥ pañcapraṇavabheditāh 
5.75 pañcayonyāḥ svarūpeṇa varṇam ekaikasaṅkhyayā 
bhairavaḥ śabdarāśis tu ādikṣāntakrameṇa tu 
5.76 te varṇāḥ pañcapraṇavaiḥ sampuṭe[c] ca pṛthak pṛthak 
ādikṣāntakrameṇaiva niyojanam udāhṛtam 
5.77 dvābhyāṃ tu grathanaṃ kāryaṃ samastasyāpi śobhane 
sapta varṇān dadec cādau madhye vidyāpadaṃ dadet 
5.78 punaḥ sapta padasyānte tasyānte tu padaṃ punaḥ 
punaḥ saptakam uccārya padaṃ ca tadanantaram 
5.79 anena kramayogena nirvāhena tu yojayet 
kṣāntaṃ vai yāva deveśi tāvad eva niyojayet 
5.80 padasaṅkhyā samastasya nirvāhobhayadīpite 
mālinī dvādaśair bhedaiḥ śabdarāśis tu ṣoḍaśaiḥ 
5.81 anena kramaśaḥ sarve varṇāś caiva pṛthak pṛthak 
calacakravibhāgena padavidyāṃ yadā yajet 
5.82 tadā kṣobhaṃ karoty āśu divyādivyetaraṃ priye 
yonayaḥ pañcadhā yās tu sarvāḥ klidyanti nānyathā 
5.83 drāvaṇaṃ kṣobhaṇaṃ mohaṃ jṛmbhaṇaṃ śoṣaṇaṃ tathā 
sarvān tān kurute devi yadā śaktisamo bhavet 
5.84 prasuptabhujagākārā dvādaśānte varānane 
nābhiṣṭhā tu tathāpy evaṃ draṣṭavyā parameśvari 
5.85 dṛśyate dehamadhye tu vyomānte ca parāparā 
tasyāgre tu tato mantraṃ hutāśakaṇikākṛtim 
5.86 uccāreta tato mantraṃ śabdarūpaṃ hṛdi priye 
śabdānte śaktir uccāryā īṣanmandagamārutā 
5.87 padmasūtranibhākārā uccāryā sānunāsikā 
uccārāntāvasāne tu jñātavyālātacakravat 
5.88 tatra madhyagataṃ devi caitanyaṃ mantrasaṃyutam 
prasphuratkiraṇānekaiḥ koṭiśo dikṣv avasthitaiḥ 
5.89 tasyāpy ante tato devi śaktir ādyā manonmanī 
atītā tu yadā sā vai tadā bindvī udāhṛtā 
5.90 bindvante vyāpako devo māyātīto nirāmayaḥ 
sa śivo bhāvanātīto nirguṇo guṇasambhavaḥ 
5.91 adhikārī sarvakārī ca śaktyātīto mahāprabhuḥ 
anena kramayogena kramaḥ kāryaḥ suniścitaiḥ 
5.92 ātmā manaś ca mantraś ca śivaḥ śaktis tathaiva ca 
ekībhāvagato devi jñātavyaḥ siddhim īhakaiḥ 
5.93 tasmāt prāṇasamaṃ jāpyaṃ mantrānte nādagocare 
nādasyānte tato jñātvā etat smaraṇam ucyate 
5.94 smaraṇaṃ śaktir uddiṣṭā yā karoti gamāgamam 
tasyānte tu parā sūkṣmā sā kalā amṛtātmikā 
5.95 layātītā arūpā tu svayaṃvedyāvicārataḥ 
na tasya lakṣaṇaṃ devi na lakṣo naiva yojanā 
5.96 na kṣayo naiva vṛddhiś ca śuklakṛṣṇau na caiva hi 
na rātrir na dinaṃ caiva na sandhyā ayanaṃ tathā 
5.97 viṣuvaṃ naiva deveśi saṅkrāntir naiva vidyate 
sarvāvasthagatiṃ jñātvā vijñānam upajāyate 
5.98 etat kaulikam ākhyātam umāmāheśvaraṃ priye 
utpateta na sandeho lakṣajāpāc calasya tu 
5.99 calā śaktiḥ samākhyātā lakṣaṇena udāhṛtā 
avarṇā varṇasaṃyogā mālinī sā udāhṛtā 
5.100 padabhedagatā hy ekā asaṅkhyātā varānane 
evaṃ tadgraha-m-ākhyātaḥ sadyaḥpratyayakārakaḥ 
5.101 na kasyacin mayākhyātam umāmāheśvaraṃ priye 
satataṃ japate yas tu yoginīvallabho bhavet 
5.102 ṣaṇmāsāc chudhyate devi brahmaghno 'pi na saṃśayaḥ 
paśyate virajāṃ śāntāṃ jyotirūpāṃ mahādyutim 
5.103 japasya lakṣaṇaṃ devi idānīṃ śṛṇu sāmpratam 
ekoccāraśatānte tu parāvasthā tu gīyate 
5.104 śatabhedaḥ samākhyātas tadguṇo daśa eva tu 
sahasrabhedam ity uktaṃ lakṣaḥ śataguṇaḥ smṛtaḥ 
5.105 koṭibhedaḥ śatānāṃ tu lakṣāṇāṃ varavarṇini 
etaj japavidhānaṃ tu kathitaṃ tava śobhane 
5.106 muktakaḥ śatabhedena yuktaṃ śataguṇaṃ śatam 
calacakravibhāgena lakṣabhedam udāhṛtam 
5.107 calacakraṃ yadā devi koṭibhedo varānane 
bāhyataḥ kathito bhadre adhyātmikam ataḥ śṛṇu 
5.108 udbhave śatabhedas tu sahasro viśleṣake viduḥ 
laye tu lakṣabhedo vai layātīte tu koṭayaḥ 
5.109 vāmā jyeṣṭhā tathā raudrī bindvī ca samudāhṛtā 
icchā jñānī kriyā śāntā krameṇaiva surārcite 
5.110 ātmacāragatiṃ jñātvā japaḥ kāryaḥ sadā budhaiḥ 
anenaivākṣasūtreṇa lakṣalakṣaṇalakṣite 
5.111 kartavyo hi japo nityaṃ  sarvaśāstraviśāradaiḥ 
bhuvanākhye varārohe śaktyākhye tu tathaiva hi 
5.112 cāroccāravibhāgena japaḥ śreṣṭha udāhṛtaḥ 
mālā pañcāśikā proktā sūtraṃ śaktiḥ śivātmikā 
5.113 grathanaṃ kuṇḍalī śaktir layānte merusaṃsthitam 
etad guptataraṃ kāryam akṣasūtraṃ śivātmakam 
5.114 prakaṭaṃ naiva kartavyaṃ na meruṃ laṅghayet kvacit 
śaṅkhasphaṭikarudrākṣaputrañ jīvakariṣṭakāḥ 
5.115 evamādyāḥ smṛtā ye tu maṇimālā varānane 
na tatra vidyate devo na mantro naiva cetanā 
5.116 yatra yatra sthitā mālā na doṣo vidyate priye 
mantranyāse kṛte devi kila gopyaṃ tu kārayet 
5.117 śarīraṃ kutra gopyaṃ tu kārayīta varānane 
mantranyāse kṛte hy ātmā sakalīkṛtavigrahaḥ 
5.118 yathā gopyaṃ na yuñjeta tadvac caivākṣamālikā 
akṣaṃ cendriyam ity uktaṃ sūtraṃ kuṇḍalinī smṛtā 
5.119 lakṣaṃ tu sā parā sūkṣmā kalā hy amṛtavāhinī 
saṃyogakāriṇī vyomni tena sūtreti kīrtitā 
5.120 saṅkhyāgrahaṇakāryeṣu sā coktā akṣamālikā 
śaṅkhādyās tu varārohe japakarmaṇi śasyate 
5.121 śaṅkhajaṃ tu śriyākāmaḥ sphāṭikaṃ muktihetave 
padmākṣā padmajā proktā śriyāpuṣṭikarā priye 
5.122 rudrākṣaiḥ siddhim āpnoti yac cānyaṃ khecarīpadam 
jīvakā sarvadā jñeyā gopucchāgrathitānaghe 
5.123 vidrumā vaśyakāryeṣu mauktikā sarvakāmadā 
anyāni tu smṛtā ye vai ratnajā parameśvari 
5.124 sarvadā te samuddiṣṭā nātra kāryavicāraṇāt 
riṣṭakākṣāsthijā mālā abhicāre praśasyate 
5.125 nāgavaṅgas tathā lohā miśrāś cānye 'pi ye smṛtāḥ 
māraṇe tāṃ praśasyeta stambhane mohane tathā 
5.126 kampane dhvaṃsane devi kartavyā cābhicārake 
evam anye 'pi ye proktās teṣāṃ śreṣṭhā tu śaṅkhajā 
5.127 praśastā sarvakāryeṣu japakarmaṇi śasyate 
śaṅkhāvartā tu yā nāḍī śikhānte tu vyavasthitā 
5.128 tena śaṅkhamayaṃ proktam akṣasūtraṃ surādhipe 
sphuṭate mastake yā sā dvidhā caiva visarpiṇī 
5.129 sphāṭikaṃ tena coddiṣṭaṃ guruvaktre pratiṣṭhitam 
raudrībhāva[ḥ] smṛto rudras tālvagre ca vyavasthitaḥ 
5.130 śabdasparśaraso rūpaṃ gandhatanmātrasaṃyutam 
vikāritve pravarteta nirodhāl lakṣam eva ca 
5.131 tena rudrākṣamālāyā japaḥ śreṣṭha udāhṛtaḥ 
putravad udare kṛtvā prasuptāmṛtakuṇḍalī 
5.132 tayā nīyaty asau jīva adhaś cordhvena bhāvini 
putrañjīvakasaṃjñā tu tenaiṣā samudāhṛtā 
5.133 ariṣṭāni anekāni sukhaduḥkhātmikāni tu 
bhuñjate satataṃ devi arjitaṃ yat purā dhanam 
5.134 ariṣṭākhyā smṛtā mālā aprameyā bhavāntare 
hṛtpadme saṃsthitā nityam akṣarāṇāṃ prabodhikā 
5.135 padmākṣamālā sā proktā śāstre śāstre varānane 
evamādyāḥ smṛtā ye tu paryāyā akṣamālayā 
5.136 te sarve ātmanaś caiva kathitāś ca kuleśvari 
akṣasūtravidhiḥ khyātaḥ samyak kaulikavedinām 
5.137 sāmprataṃ nyāsam ākhyāmi śṛṇu tattvena śobhane 
svābhāvikaṃ calaṃ dīptaṃ sthiraṃ dravanabhoyutam 
5.138 nyāsamātraṃ samākhyātaṃ ṣoḍhādvādaśabhedataḥ 
ṣoḍhā śaktiḥ samākhyātā parā caivākṣarā śubhā 
5.139 kuṇḍalī nābhideśasthā parā sā vyomarūpiṇī 
ekā eva parā sūkṣmā akṣayā tejarūpiṇī 
5.140 jñātavyā sā parā devī ṣaḍvarṇarahitā kalā 
brahmasthānagatā sūkṣmā svābhāvikam udāhṛtā 
5.141 viṣṇusthāne calā proktā dīptā rudrapade smṛtā 
īśvare sthirasaṃjñā tu sadākhye dravasambhavā 
5.142 śaktisthā vyomarūpā tu jñātavyā tattvavedibhiḥ 
aṇimādiguṇādhārā ṣaḍguṇā guṇabodhanī 
5.143 vyāpinī vyomarūpā ca anantānāthanāśritā 
saṃyoktrī ca viyoktrī ca sadbhāvaguṇasaṃsthitā 
5.144 ekā eva parā śaktiḥ  saṃsthitā kṛtyabhedataḥ 
kṛtyabhedena bhedo 'syā na bhedaḥ paramārthataḥ 
5.145 evaṃ nyāse kṛte devi antaraṅge pravartate 
bahiraṅge varṇarūpā ca ekā caiva anekadhā 
5.146 ṣoḍhādvādaśabhedena nyāsaḥ prokto gamāgame 

iti kulālikāmnāye śrīkubjikāmate bṛhatsamayoddhāraḥ śabdarāśimālinītadgrahavyāptinirṇayo nāma pañcamaḥ paṭalaḥ 


śrīkubjikā uvāca 

6.1 japasya lakṣaṇaṃ deva pūrvaṃ hi kathitaṃ tvayā 
ekoccāraśataṃ jñeyaṃ sahasraṃ lakṣam eva ca 
6.2 koṭayas tu tathā śambho pṛthaglakṣaṇalakṣitāḥ 
na me jñātaṃ pramāṇaṃ tu japasya suranāyaka 
6.3 tad ahaṃ śrotum icchāmi mandabuddhyālpacetasā 

śrībhairava uvāca 

6.4 yā sā kuṇḍalinī śaktis cidrūpā ca parā kalā 
ādyā śaktir maheśasya aṇumātrā hṛdi sthitā 
6.5 sā aṇu[ḥ ] kathitā tantre dve aṇū truṭim āśritā 
truṭibhūtā tu sā devī japtavyā tu parāparā 
6.6 varṇahīnā parā proktā aparā varṇarūpiṇī 
evaṃ jñātvā varārohe japaḥ kāryaḥ sadā budhaiḥ 
6.7 truṭirūpā tu sā devī tadādhāre vyavasthitā 
kalate prāṇagā nityaṃ daśasthāne hy anukramāt 
6.8 brahmā viṣṇus tathā rudra īśvaro 'tha sadāśivaḥ 
kuṇḍalī vyāpinī caiva praśāntā viṣuvat tathā 
6.9 śaktisthānaṃ tu deveśi ete sthānā daśa smṛtāḥ 
yeṣāṃ sañcarate devaḥ śivaḥ paramakāraṇaḥ 
6.10 ūrdhve vā yadi vā tiryak svasthāne vā sureśvari 
prasphureta kalair yuktā daśabhis tu mahābalaiḥ 
6.11 daśadhā kalanaṃ tena kathitaṃ tava śobhane 
prayatnena kṛtoccāraṃ yāvac chaktir layaṃ gatā 
6.12 tāvad devi śataṃ proktaṃ varṇoccāre na saṃśayaḥ 
svābhāvikam anuccārya sūkṣmādhāro jagatpatiḥ 
6.13 śatadhā kalanaṃ tasya truṭirūpasya yoginaḥ 
sahasraṃ tu samuddiṣṭaṃ daśadhā parameśvari 
6.14 ubhayasya parityāgād kalādhāraḥ sadāśivaḥ1
dṛkkriyājñānanirmuktaḥ kalate ca sahasradhā 
6.15 lakṣabhedaḥ samuddiṣṭa iti śāstre na saṃśayaḥ 
japo hy evaṃ samuddiṣṭo yogināṃ tattvavedinām 
6.16 lakṣātīto manātīto nirmuktas tattvabandhanaiḥ 
unmanatve sadā līno aṇurūpo nakiñcanaḥ 
6.17 sattāmātrasthito dehī guṇānāṃ pratibodhakaḥ 
viṣayabhāvanirmuktaḥ kalate lakṣadhā priye 
6.18 koṭis tu bhavate hy evaṃ jñātavyaṃ mantravādibhiḥ 
soccāropāṃśubhūtas tu mānaso manavarjitaḥ 
6.19 japaḥ pūrvaṃ samākhyātaḥ śāstre śāstre surārcite 
saśabdoccārayogena śuddhyarthe kathitaṃ sphuṭam 
6.20 siddhyarthe 'pāṃśur uddiṣṭaḥ svapravṛtto hṛdi sthitaḥ 
mānaso yogahetvarthe ubhayatra vivarjitaḥ 
6.21 manātīto bhaved devi mokṣadas tu na saṃśayaḥ 
evaṃ devi samākhyāto japaḥ prāṇasamas tava 
6.22 japaḥ prāṇasamaḥ kāryo dṛṣṭādṛṣṭaphalārthinām 
avarṇā varṇasaṃyogā mayā te samudāhṛtā 
6.23 nirālambe mahāśūnye yat tejam upajāyate 
tadgarbhe abhyasen nityaṃ bhāgyahīno 'pi sidhyati 
6.24 yogamūlī viśuddhī ca sārṇave sā ca ekatā 
ekatra saṃsthitānandaṃ kularatnaṃ tridhā priye 

śrīkubjikā uvāca 

6.25 mudrā tu sūcitā nātha na me jñātā mahāprabho 
tan mamācakṣva deveśi yena bhrāntir vinaśyati 
śrībhairava uvāca 
6.26 pātālordhvagataṃ yac ca śṛṅgāṭapuramadhyagam 
golākāraṃ tato devi randhrasyordhvagataṃ priye 
6.27 cakradvayam idaṃ proktaṃ prādhānyena vyavasthitam 
vedhaghaṭṭanirodhaṃ ca uccārākṛṣṭikārakam 
6.28 stobhastambhanam āveśo gamaṃ caivātra suvrate 
etadvirahito mantrī hāsyatāṃ yāti niścitam 
6.29 anena jñātamātreṇa pratyayān kurute bahūn 
vṛttirājā varārohe niveśya cakramadhyataḥ 
6.30 vṛttihīnas tatas tatra kāvyakartā na saṃśayaḥ 
cakramadhye ca sañcintya suśuklāṃ ca parāparām 
6.31 pustakavyagrahastāṃ ca jñānamudrādharāṃ tathā 
sphāṭikenākṣasūtreṇa sarvābharaṇabhūṣitām 
6.32 sragdāmalambitagalāṃ prabhāmaṇḍalamaṇḍitām 
dvibāhu-r-ekavadanāṃ candrakoṭisamaprabhām 
6.33 udgirantī[ ṃ ] mahaughena śāstrakoṭīr anekaśaḥ 
evaṃ dhyānasamāviṣṭaḥ sākṣād vāgīśvaro bhavet 
6.34 saṃskṛtaṃ prākṛtaṃ caiva vedasiddhāntagahvaram 
granthataś cārthataś caiva udgiren nātra saṃśayaḥ 
6.35 pīṭhamadhyagatābhyāsāt pīṭhadvāre 'thavā priye 
sampradāyam idaṃ kaulaṃ śāktaṃ śaktipadānugam 
6.36 mātrāyogena deveśi mudrābandhaṃ tu kārayet 
sā mātrā gīyate cātra uccāravaśavartinī 
6.37 uccaraṃ sahajaṃ devi dehamadhye vyavasthitam 
śatasaṅkhyāpramāṇena yāvad uccarate parām 
6.38 tāvad āviṣṭadehas tu śāstrārthaṃ vadate sudhīḥ 
nityārūpeṇa saivātra dhyāyed raktasamaprabhām 
6.39 lākṣālaktakasaṅkāśāṃ caturvaktrāṃ caturbhujām 
mūrtitrayasamopetāṃ tribhir bhedair vyavasthitām 
6.40 tristhāṃ trimārgagāṃ devīṃ trināḍīsamatāṃ gatām 
nityaklinnāṃ ca deveśi tathā caiva madadravām 
6.41 devyārūpadharāṃ sarvām ekavaktrāṃ dvibāhukām 
pāśāṅkuśadharāṃ sarvāṃ madavibhrāntalocanām 
6.42 yauvanasthāṃ madonmattāṃ madirānandananditām 
smared devyāḥ svarūpaṃ tu tatprayogavyavasthayā 
6.43 taḍitsahasrabandhūkadāḍimīkusumadyutim 
pañcaśṛṅgāṭakādhārāṃ sā parā pararūpiṇī 
6.44 mahāyogavilāsā tu śivādyavanigocaram 
vyāpayitvā sthitā devī ravinakṣatramaṇḍalam 
6.45 śṛṅgāṭakaṃ cordhvamukhaṃ tiryagrekhāgramūlagam 
śikhordhvakuṇḍalākāraṃ kāmaśakti-r-adhisthitam 
6.46 pañcaśṛṅgāṭakāsīnaṃ sthitaṃ tatra varānane 
devyārūpadharaṃ cakraṃ dhyāyed evaṃ na saṃśayaḥ 
6.47 eṣa bandhas tu mudrāyāḥ kathitas te kuleśvari 
tritattvena tu mantreṇa vakṣyamānena kārayet 
6.48 drāvaṇaṃ kṣobhaṇaṃ caiva ākarṣavaśam eva ca 
pūjāvidhānaṃ deveśi devyāyā vīravandite 

śrīkubjikā uvāca 

6.49 triśikhā padmamudrā ca yonimudrā viśeṣataḥ 
tāsāṃ lakṣaṇam ākhyāhi yathāvat sphuṭato vada 

śrībhairava uvāca 

6.50 mudrāṇāṃ lakṣaṇaṃ devi kathayāmi samāsataḥ 
hastābhyāṃ kārayed ādau sampuṭaṃ cordhvadiṅmukham 
6.51 aṅgulyā grathayet sarvāḥ saṃśliṣṭam ubhayeṣv api 
tarjanyānāmikau kuñcya saṃśliṣṭau madhyasaṃsthitau 
6.52 tābhyāṃ mūle mukhaṃ kāryaṃ tarjanyāyā varānane 
saṃśliṣṭau sammukhau dvau tu madhyamau ūrdhvadiṅmukhau 
6.53 saṃyogena varārohe aṅguṣṭhau ca kaniṣṭhakau 
tādṛśīva hi kartavyā triśikhā tu vidhīyate 
6.54 karābhyāṃ sampuṭaṃ kāryaṃ maṇibandhau tu saṃhatau 
agrāṅgulyā prasāryeta aṅguṣṭhau madhyasaṃsthitau 
6.55 padmamudrā samākhyātā yonimudrām ataḥ śṛṇu 
hastābhyāṃ sampuṭaṃ kāryaṃ kaniṣṭhā madhya yojayet 
6.56 puṭākārau karau kṛtvā aṅguṣṭhau madhyasaṃsthitau 
niḥsṛtā vāmahastasya aṅgulyā tu kanīyasī 
6.57 yonimudrā smṛtā bhadre sarveṣāṃ kṣobhakārikā 
etā mudrāḥ samākhyātā dhyānapūjāvisarjane 
6.58 sāmprataṃ khecarīṇāṃ tu yathā mudrā khagādhipe 
kathayāmi samāsena tvatprītyā khagagāminī 
6.59 anāmā karṇike yojyā ṣoḍaśāraṃ tu pīḍayet 
pīḍanād ṛjutāṃ yāti khagamārge tu bhāvini 
6.60 phādināntagate lakṣe khagatiś ca na saṃśayaḥ 
ṣaṭpattraṃ mūrdhnitaḥ kṛtvā tarjanyāgre tu yojayet 
6.61 śūnye śūnyamano bhūtvā sampīḍyeta parasparam 
ṣaṭpattraṃ tu vikāśyeta udānapreritena tu 
6.62 bhāvayen nādiphāntaṃ tu khagatīti na saṃśayaḥ 
dvādaśārordhvanālena lambikānte niveśayet 
6.63 bhedanaṃ kuñcitenaiva cārgalaṃ kūrmasaṃyutam 
bhāvayen nādiphāntaṃ tu khagatiṃ vīravandite 
6.64 padmamudrā tridhā proktā yonimudrām ataḥ śṛṇu 
yoniṃ yonau samākramya mudgareṇa tu bhedanam 
6.65 visargadvayasaṃyogāt khagagāmī bhaved dhruvam 
amṛtākhyā parā yonir bhāvayen mastakopari 
6.66 ākramya gandhamārgaṃ tu yojanā nādiphāntagā 
khagatir bhavate-d-evaṃ yonimārge vicakṣaṇaḥ 
6.67 uccārya vāmaśaktiṃ tu sandhayed granthimadhyataḥ 
vikṣepam ūrdhvataḥ kṛtvā pare yonau tu bhāvanā 
6.68 anena khagagāmitvaṃ bhavate tu na saṃśayaḥ 
yonimudrā samākhyātā tribhedā parikīrtitā 
6.69 triśikhālakṣaṇaṃ devi kathyamānaṃ nibodhata 
karābhyāṃ caiva tarjanyāṃ pīḍayet tat prayatnataḥ 
6.70 brahmanāḍyā dvirabhyāsād āsanaṃ mandarasya tu 
triśikhā nāma mudreyam arpaṇaṃ khagamārgayoḥ 
6.71 golakaṃ śūnyamārgasthaṃ pathatrayagataṃ priye 
kṣepaṇaṃ bindukoṭyūrdhvam avanīṃ kramya pādayoḥ 
6.72 guhye niveśya mantrajñas triśikhaṃ khecaraṃ priye 
anena khagagāmī 'sau bhavate sādhakottamaḥ 
6.73 karaṇaṃ cordhvamūlaṃ syād bandhayet khagamaṇḍalam 
ākramya pañcamaṃ tatra karābhyāṃ caiva śūlini 
6.74 jānukau kurpare yojya vikṣepo guhyamadhyataḥ 
vedhanaṃ brahmarandhrasya kathitaṃ tu tapodhane 
6.75 khagamārgagatis tv evaṃ bhavate tu sulocane 
eṣā mudrā samākhyātā navabhedair vyavasthitā 
6.76 mudrā śaktir iti khyātā mudritaṃ drāvayiṣyati 
tena mudrā samākhyātā kathitā parameśvari 
6.77 mudritaṃ gopitaṃ proktaṃ cicchaktyā yā parāparā 
na jñāyate varārohe sā tu mudrā udāhṛtā 
6.78 ajñānamalarūpeṇa yāvad baddhaḥ sa pudgalaḥ 
na jānāti parātmānaṃ tāvan māyā pravartate 
6.79 bhinne tamasi caikatvaṃ yadā paśyati mānavaḥ 
tadā sā tu parā proktā bandhamokṣakarī priye 
6.80 ekā sā paramā śaktiḥ saṃsthitā tu śivecchayā 
mocayanti grahādibhyaḥ pāśaughān drāvayanti ca 
6.81 mocanād drāvaṇād yasmān mudrākhyāḥ śaktayaḥ smṛtāḥ 
khagatir hy ūrdhvabhāvena khagamārgeṇa nityaśaḥ 
6.82 carate sarvajantūnāṃ khecarī tena sā smṛtā 
paratv' ekā tu sā jñeyā punaś caiva tridhā smṛtā 
6.83 icchā jñānī kriyā sā tu varṇarūpam upāgatā 
pañcāśabhedabhinnā sā ekā eva-m-udāhṛtā 
6.84 aṅgāvayavasampūrṇā mālayitvā jagat sthitā 
nādiphāntasvarūpeṇa tena sā mālinī smṛtā 
6.85 sapta koṭyas tu mantrāṇām aprameyās tu yāḥ smṛtāḥ 
svatantrasthās tu tāḥ sarvā mudritāḥ parameśvari 
6.86 tena mudrā samākhyātā sadyaḥpratyayakārikā 
avayave mātṛrūpā tu svaiḥ svair aṃśair vyavasthitā 
6.87 brahmāṃśā caiva rudrāṃśā kaumāryāṃśā varānane 
vaiṣṇavyā caiva yāmyāṃśā aindryāṃśā ca tathānaghe 
6.88 yogeśvaryā ca yogāṃśā yogayogīśanāyikā 
ete hy aṃśāḥ smṛtāḥ sapta punaḥ saptasu saptasu 
6.89 brahmāṇyāḥ sapta-m-uddiṣṭāḥ sapta māheśvarī punaḥ 
kaumāryāḥ sapta-m-uddiṣṭā vaiṣṇavyāḥ sapta eva ca 
6.90 vārāhī sapta-m-uddiṣṭā aindrāṇyāḥ sapta eva tu 
cāmuṇḍā sapta-m-uddiṣṭā evaṃ vai sapta saptasu 
6.91 pañcāśaikona vai devyā bhuvanāvalisaṃsthitā[ḥ ] 
atra bhedair anekaiś ca saṃsthitā bhuvanāvaliḥ 
6.92 tasya dehagatā romā[ḥ ]  koṭyas trīṇi prakīrtitāḥ 
lakṣāṇi caiva pañcāśad romāṇāṃ tu tadudbhavā 
6.93 ekaikaromakūpeṣu yoginyaḥ koṭisaṃsthitāḥ 
trikoṭikoṭikoṭīnāṃ koṭayas tu anekadhā 
6.94 yathā cāmbaraparyantā pṛthivyādiṣu sambhavāḥ 
aṇavas tv apramāṇās tu tattve tattve tv anekadhā 
6.95 sūkṣmarūpās tathā rudrā eṣāṃ saṅkhyā na vidyate 
vyāpitaṃ tu samastaṃ hi rudraiḥ sūkṣmataraiḥ priye 
6.96 evaṃ mudrā samākhyātā vyāpayitvāprameyataḥ 
ekā eva parā mudrā yasyedaṃ tiṣṭhate jagat 
6.97 yaṃ yaṃ spṛśati sā hy aṅgaṃ sā sā mudrā vidhīyate 
nṛtyaṃ valgaṃ tathā hāsyaṃ rodanaṃ sphoṭam eva ca 
6.98 yad vikāraṃ prakurvanti tat sarvaṃ mudrasaṃjñakam 
aṅgulyā aṅganā proktā aṅge carati nityaśaḥ 
6.99 aṅgulyā tena coddiṣṭā mudrābandhe varānane 
kaṃ śarīram iti khyātaṃ nyastā tasmin pravartate 
6.100 helāgamanamārgeṇa tena nāmā kanīyasī 
anāmā nāmarahitā koṭibhedair vyavasthitā 
6.101 nāmaṃ na śakyate vaktum anāmā tena gīyate 
madhye pravartate nit yam āśrayā pudgalasya tu 
6.102 tatrādhārād vrajed ūrdhvaṃ punarāgamanaṃ priye 
madhyamā nāma tenātra kathitā mantravādinām 
6.103 tarjanaṃ kurute nityaṃ saṃyojanaviyojanam 
tarjayantī mahāmohaṃ pāśajālam anantakam 
6.104 tarjanī tena sā proktā mudrā sarveṣu cottamā 
aṅguṣṭhaś caughabhūtā tu pravāhe satataṃ priye 
6.105 uccāreṇa pravarteta aṅguṣṭhas tena sa smṛtaḥ 
aha-m-ūrdhvagatiḥ proktaḥ stau ti rātrī nigadyate 
6.106 hastau tena samākhyātau vāmadakṣiṇa ucyate 
vāme sṛṣṭir iti proktā saṃhāraṃ dakṣiṇe viduḥ 
6.107 savyāsavyagatau tena kathitau vīranāyike 
vāmāvyāptaṃ jagat kṛtsnaṃ saṃhārāntaṃ tadā priye 
6.108 saṃyogena varārohe ātmā kuṇḍalinī smṛtā 
iyaṃ sā paramā yonir yonīnām uttamā priye 
6.109 yo jānāti varārohe śaktir ādyā manonmanī 
tena jñātaṃ jagat sarvaṃ varṇāvarṇavivarjitam 
6.110 sā mudrā tu samākhyātā viśvavyāptikarī parā 
dvau bindū cūlike dve tu visargaśaktisampuṭam 
6.111 tadūrdhvam iha nādāntaṃ vibhvī śūnyam udāhṛtam 
janmasthānāt samudyantī yāvat tadbhavamaṇḍalam 
6.112 sṛṣṭisaṃhārayogena meḍhram-ādhāramadhyagam 
evaṃ mudrā samākhyātā vāṅmanaḥkāyakarmabhiḥ 
6.113 kim anyat pṛcchase devi tat sarvaṃ kathayāmy aham 

iti kulālikāmnāye śrīkubjikāmate japamudrānirṇayo nāma ṣaṣṭhaḥ
paṭalaḥ 


śrīkubjikā uvāca 

7.1 yā sā devī (deva Ed.) parā yoniḥ samayā kubjinī parā 
tām ācakṣva prayatnena saṃsphuṭaṃ vyāptilakṣaṇam 

śrībhairava uvāca 

7.2 śṛṇu devi yathātathyaṃ devyā māhātmyam uttamam 
kārye vātha akārye vā uktānukteṣu vastuṣu 
7.3 kubjīśānīṃ japed yas tu tasya pāpaṃ na vidyate 
yaḥ punaḥ śuddhabhāvātmā samayākhyāṃ maheśvarīm 
7.4 japet tasya pa tad vastu yan na sidhyati bhūtale 
etat paramasamayaṃ devītantre prakīrtitam 
7.5 na deyaṃ yasya kasyāpi yasmāt sarvaṃ prapadyate 
tantre tantre tu samayā kathitānekadhā mayā 
7.6 anyakalpopacāreṣu niruddhā tatra śāsane 
eṣā sā samayā devi atra sarvaṃ pratiṣṭhitam 
7.7 catuṣpīṭheṣu samayās te 'tra sarve vinirgatāḥ 
eṣā rājeśvarī devī samayācāranirgatā 
7.8 nirācāreṇa yogena sidhyate hy avicārataḥ 
pañcavyāptam ataḥ sarvaṃ sarvavyāptyantasaṃsthitam 
7.9 asyoccāraṇamātreṇa tan nāsti yan na sādhayet 
kampate bhuvanaṃ sarvaṃ trailokyaṃ suraḍāmaram 
7.10 samayākhyaṃ japantasya kṣubhyate sacarācaram 
vāmadakṣiṇatantreṣu sāmānyā samayā parā 
7.11 tasyā devyāḥ prabhāvo 'yaṃ yā pañcāśapadātmikā 
siddhamārge 'nyathā devi dvātriṃśaguṇalakṣitā 
7.12 kubjikā nāma vikhyātā samayasthā kuleśvarī 
yatra viśveśvaraṃ sarvaṃ samayādyaṃ vinirgatam 
7.13 mantramudrāgaṇo hy atra vidyāmaṇḍalakādikam 
yasyāḥ kamalinī devī hṛdisthā sampravartate 
7.14 yayā sṛṣṭam idaṃ sarvam ābrahmastambhagocaram 
kuladīpā śirasthāsyāḥ ṣaḍvidhādhvaprabodhikā 
7.15 barbarākhyā śikhā hy asyās tritattvordhvavyavasthitā 
mudrādhāragatā devī bahurūpātra nirgatā 
7.16 chādayantī samastāṃ tu śabdarāśiṃ tu mālinī 
kavacaṃ yasyā mahādevyā mantramāyātmakaṃ mahat 
7.17 kiṇikiṇiṃ taṃ pracaṇḍograṃ tejodedīpyavarcasam 
jñeyaṃ vṛddhopamaṃ netraṃ tattvārthaguṇasaṅkulam 
7.18 saṃvartādiśivāntasthaṃ ṣaḍasraṃ piṅgalocanam 
tad astraṃ koṅkaṇeśānyā yena vyāptaṃ ṣaḍadhvaram 

śrīkubjikā uvāca 

7.19 kathaṃ tu kubjikā nātha vada mantrapadānvitam 
sarvajñā sarvadā devī lakṣaṇena samanvitā 
7.20 uvāca bhairavo hy evaṃ kubjikāṃ śṛṇu kubjike 
kiṃ tu tvayā na vaktavyā yāvan nādeśitaḥ śiśuḥ 
7.21 ccevīti padaṃ prathamaṃ ṇiki ṇiki dvitīyakam 
chīṃ chāṃ padaṃ tṛtīyaṃ tu khimurāgho-a caturthakam 
7.22 me na ṇa ña ṅa pañcamaṃ hrauṃ hrīṃ hrāṃ ṣaṣṭhamaṃ padam 
yaikābjikuśrī saptamaṃ tivagabha mona aṣṭamam 
7.23 vilomena padāny aṣṭau dvātriṃśākṣaramālikā 
pañcapraṇava-m-ādyantā viyuktā lakṣaṇādhikā 
7.24 ādikūṭāvasāne tu catvāriṃśad dhi mālinī 
vilomenoddhared devī[ṃ]  guruvaktropadeśataḥ 
7.25 rephasaham idaṃ kūṭaṃ vidyāsaptamakaṃ padam 
śrīlope sanniyoktavyaṃ jīvitaṃ kubjike mama 
7.26 svamanīṣikāto 'nyathā sa vidviṣṭo marīcibhiḥ 
yasmād bhāṇḍāram ity evaṃ sarvasvaṃ yoginīkule 
7.27 atha cet sarvapīṭheṣu māteyaṃ samayātmikā 
asyāḥ smaraṇamātreṇa vihvalaṃ tu jagattrayam 
7.28 bhavate nātra sandeha iti mātā surakṣitā 
hṛdayādyastraparyantam ekoccāreṇa suvrate 
7.29 siddhamārgaṃ yathā brūmi vilomena vilomataḥ 
7.30 yastrā-a yaivvāṇāṅkako ccevi ṇiki ṇiki / yayātratrane
yaikārintāhama chīṃ chāṃ / yacāvaka yaipārūhuba khimurāgho-a me
na ṇa ña ṅa / yaikhāśi kheśirarbaba hrauṃ hrīṃ hrāṃ / seraśi
yaipādīlaku yaikābjikuśrī / yayādahṛ yailāmatkahṛ tivagabha mona 
7.31 pañcadaśākṣaraṃ hṛdayaṃ śiraś caiva trayodaśa 
ekādaśākṣarā śikhā viṃśadekona kavacam 
7.32 netraṃ trayodaśaiḥ proktam astraṃ caiva caturdaśam 
pañcapraṇava-m-ādyantā yathā vidyā tathā kuru 
7.33 etat kaulikabhāṣāyāṃ kathitaṃ tu sapratyayam 
saṃsphuṭaṃ guruvaktrasthaṃ vilomasthaṃ na sidhyati 
7.34 kaulikedaṃ samākhyātaṃ siddhamārgasudurlabham 
ccevi ti prathamaṃ padaṃ ṇiki ṇiki dvitīyakam 
7.35 chīṃ chāṃ caiva tṛtīyaṃ syāt hrauṃ hrīṃ hrāṃ rdhvekhośitri caturthakam 
hreṃ me na ṇa ña ṅa pañcamaṃ khimurāgho-aśrī ṣaṣṭham 
7.36 yaikābjiku mona hrīṃ saptamam 
raphasaha eaṃ kūṭam aiṃ vilomena cāṣṭamam 
7.37 dvātriṃśadakṣarā devī niyuktā guṇaśālinī 
ādikūṭakrameṇaiva vilomenoddhṛtā iyam 
7.38 guruvaktropadeśena saṃsphuṭaṃ kathitaṃ tava 
7.39 stram-a vvāṇāṅkako ccevi / traṃne nijiteśvavi ṇiki ṇiki caṃvaka keghvila chīṃ chāṃ / yaikhāśi kerintāhama hrauṃ hrīṃ hrāṃ me na ṇa ña ṅa / seraśi rarbaba khimurāgho-aśrī / yaṃdahṛ yaikābjikulamaka mona hrīṃ hsphreṃ aiṃ 
7.40 sarvasādhāraṇaṃ kaulaṃ brūmi anyopadeśataḥ 
pañcamaṃ tu padādisthaṃ hṛdayaṃ ca daśākṣaram 
7.41 śiram aṣṭākṣaraṃ viddhi dvādaśārdhaṃ śikhā smṛtā 
dvisaptakaṃ ca kavacaṃ netraṃ saptākṣaraṃ śubham 
7.42 astraṃ navākṣaraṃ proktaṃ jātayaś ca pṛthak pṛthak 
kavacāntaṃ caturvaktraṃ pañcamaṃ tu tadagrataḥ 
7.43 paripāṭis tu vaktrāṇām ūrdhvavaktrāditaḥ kramāt 
eṣā sā samayā devī kulamārge vyavasthitā 
7.44 sakalasthā tu sācārā aśeṣārthaviśodhikā 
kaulabhāṣoditā yā tu sā tu siddhā kulānvaye 
7.45 aśeṣārthapradātārā anekārthaprabodhikā 
yānty anena tu dehena khecaratvaṃ tadāśritāḥ 
7.46 akṣarākṣarasantānaṃ yojayellakṣasaṅkhyayā 
kubjīśaguṇatulyo 'sau hartā kartā svayaṃ prabhuḥ 
7.47 khecarīṇāṃ padaṃ so hi paśyate hy avicārataḥ 
nirācāreṇa yogena cintayantaḥ kuleśvarīm 
7.48 atha sāmānyarūpeṇa tadā bhūcaratāṃ vrajet 
kupitaḥ pātayec chailān śoṣayej jaladhīśvarān 
7.49 sphoṭayec chailavṛkṣāṃś ca taddhyānaguṇam āśritaḥ 
bhūcarīṇāṃ patitvaṃ ca kṣudrakarmopajīvinām 
7.50 kurute vividhāścaryaṃ pūjyate sa śivo yathā 
yatra tiṣṭhaty asau deśe tatra vighnaṃ palāyate 
7.51 kubjikāyāś ca yā dūtī kālikā nāma viśrutā 
kālikākhye mahātantre svatantrā sā udaḥrtā 
7.52 śṛṇuṣvekamanā bhadre jñānavijñānadāyinī 
sarvasiddhikarī devī sarvakāryaprasādhanī 
7.53 vyāghrasiṃhagajavyālabhūtavetālaśatravaḥ 
smaraṇān nāśam āyānti vighnasaṅghāni yāni ca 
7.54 praśnakāle parīkṣeta kumāry āveśapūrvikā 
śubhāśubhaṃ vadaty āśu yad bhūtaṃ yad bhaviṣyati 
7.55 asyoddhāraṃ pravakṣyāmi yathāvad anupūrvaśaḥ 
aḥ-kha-madhyagataṃ gṛhya jha-pūrveṇa samanvitam 
7.56 prathamam uddhṛtaṃ bījaṃ dvitīyaṃ ṇa-ha-sandhigam 
bheditaṃ tu ña-pūrveṇa etad varṇadvayaṃ punaḥ 
7.57 ā-sa-randhragataṃ gṛhya ya-sa-madhyagataṃ punaḥ 
dvitīyena tu sambhinnaṃ ṣaṣṭhaṃ vai bījam uttamam 
7.58 prathamaṃ saptamaṃ jñeyaṃ dvitīyasya dvitīyakam 
aṣṭamam uddhṛtam bījaṃ navamaṃ bha-ña-madhyagam 
7.59 ña-uttarasamāyuktaṃ śūnyamastakabhūṣitam 
ma-ṣa-madhyagataṃ gṛhya daśamaṃ kevalaṃ priye 
7.60 ṣa-va-madhyagatoddhṛtya au-pūrveṇa tu bheditam 
ekādaśākṣaraṃ proktam ai-ṭha-madhyagataṃ dadet 
7.61 ña-pūrveṇa tu sambhinnaṃ daśadvitayam uttamam 
e-va-randhragataṃ gṛhya kevalaṃ tridaśaṃ punaḥ 
7.62 ja-sa-madhyagataṃ gṛhya ai-au-madhyena āhatam 
caturdaśoddhṛtaṃ bījam a-cha-sandhigataṃ punaḥ 
7.63 kevalaṃ kathitaṃ bījaṃ daśapañcākṣaraṃ priye 
pa-dha-madhyagataṃ gṛhya ña-pūrveṇa tu bheditam 
7.64 ṣoḍaśam uddhṛtaṃ bījaṃ sa-ya-madhyagataṃ dadet 
la-ṭha-madhyāsanāsīnaṃ jha-pūrveṇa tu bheditam 
7.65 nādabindukalākrāntaṃ daśasaptakam uddhṛtam 
va-ma-madhyagatoddhṛtya ṭa-ṇa-madhyāsane sthitam 
7.66 ṭa-pūrveṇa tu sambhinnaṃ śūnyayuktaṃ daśāṣṭamam 
vahniyuktaṃ mahāprāṇam aṃ-pūrveṇa tu bheditam 
7.67 caturdaśasvarākrāntaṃ bindunādasaśaktigam 
viṃśamaṃ nyūnam ekena uddhṛtaṃ bījam uttamam 
7.68 ya-ḍha-madhyagataṃ gṛhya kevalaṃ viṃśamaṃ bhavet 
kha-pūrvavarṇam uddhṛtya tha-pūrvāsanasaṃsthitam 
7.69 viṃśam ekādhikaṃ bhadre aḥ-kha-madhyagataṃ punaḥ 
R̥-pūrvāsanam ārūḍhaṃ dvāviṃśatim udāhṛtam 
7.70 da-ca-randhragatoddhṛtya ta-pūrvāsanasaṃsthitam 
viṃśatritayam ākhyātaṃ ya-ja-madhyagataṃ punaḥ 
7.71 pañcamasvarasaṃyuktaṃ caturviṃśatimaṃ punaḥ 
ga-pūrvaṃ tu samuddhṛtya caturthasvarasaṃyutam 
7.72 pañcaviṃśa samākhyātam o-ṣa-madhyagataṃ punaḥ 
ai-pūrveṇa tu sambhinnaṃ ṣaḍviṃśakam udāhṛtam 
7.73 sa-ta-madhyagataṃ cānyaṃ ṭa-pareṇa samāhatam 
saptāviṃśatimaṃ bhadre ā-sa-madhyagataṃ punaḥ 
7.74 jha-pūrveṇa samāyuktam aṣṭāviṃśa tu pārvati 
punar evaṃ daded devi triṃśatyūnaṃ sabindukam 
7.75 gha-na-madhyagataṃ gṛhya kevalaṃ triṃśamaṃ bhavet 
dha-ha-randhragataṃ devi vāyvāsanasamanvitam 
7.76 triṃśam ekādhikaṃ proktaṃ ka-ṣa-madhyagataṃ punaḥ 
tha-ṇa-madhyāsanārūḍhaṃ pañcamasvarayojitam 
7.77 dvātriṃśamaṃ samākhyātaṃ kevalaṃ va-ṣa-madhyagam 
trayastriṃśa samuddiṣṭaṃ ṇa-tha-madhyagataṃ punaḥ 
7.78 vahninā dīpitaṃ kṛtvā triṃśamaṃ caturādhikam 
sa-ta-randhragataṃ bījaṃ kevalaṃ sṛṣṭisaṃyutam 
7.79 pañcatriṃśa smṛtā varṇāḥ pañcapraṇavasampuṭāḥ 
yojitavyā mahāvidyā kālikā siddhikāṅkṣiṇā 
7.80 adṛśīkaraṇe hy eṣā sarvasampadadāyinī 
na deyā duṣṭabuddhīnāṃ devīdūtyā mahābalā 
7.81 dūtī tu kathitā hy evaṃ mudrābandham ataḥ śṛṇu 
padmāsanasthito yogī samakāya ṛjuḥśiraḥ 
7.82 recya vāyuṃ svakād dehāt punar ākṛṣya dhārayet 
hṛdaye yaḥ sthito granthis tasya nābhau kṣipen manaḥ 
7.83 mantraṃ caiva tathātmānam ekīkṛtya trayaṃ budhaḥ 
daṇḍākāraṃ nayet'tāvad yāvad brahmabilāntagam 
7.84 tatsthānāt prerayet tūrṇaṃ mahāyānena sundari 
karābhyāṃ caiva tarjanyāṃ pīḍayeta punaḥ punaḥ 
7.85 lalanāghaṇṭike yojya pañcamaṃ sthānam ākramet 
ākramed guhyacakraṃ tu karaṇaṃ cordhvamūlakam 
7.86 lagne granthitrayaṃ devi khagatir nātra saṃśayaḥ 
aṅgaṣaṭkaṃ śṛṇuṣvedaṃ kubjikāyāḥ kuleśvari 
7.87 hṛdayena tu devyāyāḥ kṣobhayec cāsurīgaṇam 
navalakṣakṛte jāpye rājikālavaṇe hute 
7.88 rājarājeśvarāṇāṃ tu martyaloke 'thavā patiḥ 
sāmānyajapahomena sadyaḥsampadadāyinaḥ 
7.89 strījanaṃ kṣobhayet sarvaṃ bālavṛddhayuvān paśūn 
śiro [']dhiṣṭhitayogena bhūtavetālarākṣasān 
7.90 yakṣiṇīyakṣakanyāś ca piśācīnāṃ ca sādhanam 
kurute vividhāścaryaṃ phalapuṣpādikarṣaṇam 
7.91 yakṣiṇyākarṣaṇaṃ devi mṛtakotthāpanādikam 
sākinīkulasāmānyaḥ pāśacchedaṃ paśugraham 
7.92 kurute vividhāścaryaṃ śiraḥsiddho hy anekadhā 
asiddhasya tu karmāṇi karmayogād vadāmy aham 
7.93 aśaktah sādhane vīras tasyedaṃ dveṣaṇaṃ prati 
śiroruhasamutpannā caṇḍālī juṣṭapūrvikā 
7.94 rakṣaṇārthaṃ tu sā dūtī śāsane sampratiṣṭhitā 
paṭhanād eva saṃsiddhā japahomavivarjitā 
7.95 śiraso vaśagā dūtī tadājñā nigrahātmikā 
7.96 oṃ hāsvā ṭpha 2 hūṃ 2 sagra 2 yaramā kaṃmu-a 2 capa 2 madha 2 hada 2 naha ṇiridhāṅgaṭvākhalapāka ṇikṣabhasamāṃradhiru līṇḍācāṣṭaju tivagabha mona oṃ 
7.97 vilomena kṛtābhyāsam uddhared upadeśataḥ 
sampūjya yoginīṣaṭkaṃ rāmaṇīśirasānvitam 
7.98 dāgham utpādayet prathamaṃ lekhya mātrā na saṃśayaḥ 
ṣaḍasrapuramadhyasthaṃ rakāraṃ tu adhordhvataḥ 
7.99 rakāraṃ tu tad evaṃ syād bahiṣkoṇe pṛthak pṛthak 
ṣaṭprakāraṃ pradātavyaṃ jvālāsañchannalāñchitam 
7.100 kopakāle samutpanne citivastre nṛcarmaje 
likhitavyaṃ sakruddhena viṣonmattarasena ca 
7.101 śmaśānāṅgārasaṃyuktaṃ sādhyanāmaṃ tu madhyataḥ 
likhitvā tāpayet paścāj jvaro bhavati dāruṇaḥ 
7.102 jvaram utpādayitvā tu sadantam ānayec chiraḥ 
pūrvadravyair likhitvā tu nāma tasya gale kṣipet 
7.103 viparītamukhaṃ kṛtvā ūrdhvagrīvaṃ yathā bhavet 
tathā saṃsthāpayed bhūmau kapālaṃ mantravit sudhīḥ 
7.104 śmaśāne vā nadītīre kṛtvā vedīṃ tadūrdhvataḥ 
paścād dhomaṃ prakurvīta ugradravyaiḥ samāhitaḥ 
7.105 viṣeṇa gandhakenaiva kunaṭyā tālakena ca 
rājikālavaṇenaiva nimbapattrais trisaptakam 
7.106 prathame 'hani chāgāntraṃ raktāktaṃ homayed budhaḥ 
paścād dhyānaṃ prakurvīta kṛṣṇavarṇaṃ sudāruṇam 
7.107 jvalantaṃ pādasandhīni mastakāntaṃ vicintayet 
rakāraṃ tu lalāṭasthaṃ japen mantraṃ punaḥ punaḥ 
7.108 homamaṇḍalakaṃ yac ca caturasraṃ vajralāñchitam 
evaṃ vai bhavate kālo yadi sākṣāt sacīpatiḥ 
7.109 evaṃ nigraham ākhyātaṃ śirodevyāḥ samudbhavam 
caṇḍālīti prayogo 'yaṃ gopitavyaṃ prayatnataḥ 
7.110 śāsanasya ca yo dveṣṭā yo dveṣṭā guravopari 
teṣv amoghinī cāṇḍālī yojayet paramārthataḥ 
7.111 lakṣam-eke kṛte jāpye vācāmātreṇa mārayet 
ato'rthaṃ gopayed devi siddhājñāmoghacaṇḍikā 
7.112 śirodūtī parā hy eṣā kṣudrakarmasv anekadhā 
sarvaṃ svacchandadeveśī kariṣyati śikho[j]jvalā 

iti kulālikāmnāye śrīkubjikāmate mantroddhāre ṣaḍaṅgavidyādhikāro nāma saptamaḥ paṭalaḥ 


śrīkubjikā uvāca 

8.1 śrutaṃ deva mayākhyātam aśeṣārthasuvistaram 
kathaṃ devyāḥ śikhāsaṃsthā svacchandaḥ katirūpadhṛk 
8.2 prayogavipulaṃ deva sarvopāyavivarjitam 
adhunāśrotum icchāmi sārāt sārataraṃ vibho 
8.3 āpyāyanaṃ śarīrasya ākāśādiprasādhanam 
arcanaṃ caiva saṅkṣepād grahamardakaraṃ yathā 
8.4 ripumardakaraṃ caiva bilayantraprasādhanam 
jvaraduṣṭaviṣādīnāṃ sarvaduḥkhavimardanam 
8.5 yathā smaraṇamātreṇa vyādhito mucyate kṣaṇāt 
dharmakāmārthasaṃsiddham arthamokṣaprasādhanam 
8.6 vaśīkaraṇakarmāṇi ākarṣaṇavidhikriyā 
divyādivyeṣu kāryeṣu nāgakāryeṣu bhairava 
8.7 śarīrasthaṃ yathā brūhi nāḍisthaṃ mudrayā saha 
saṅkṣepārcanakarma ca saṃsiddhaṃ bhogasādhanam 
8.8 vratayāgavihīnaṃ ca vittopāyavivarjitam 
smaraṇāt kevalo mantraḥ sukham utpādayed yathā 

śrībhairava uvāca 

8.9 sādhu kubjini bhadre tvaṃ kathayataḥ śṛṇuṣva me 
śikhā guṇakalā yasya svacchandasyāmitadyuteḥ 
8.10 kubjikāyāḥ śikhā raudrā raudrasiddhipradāyikā 
sārāt sārataraṃ devi satyaṃ satyaṃ na cānyathā 
8.11 aghorān na paro mantraḥ kasmāc cūlīgatas tu saḥ 
śamanaṃ sarvaduḥkhānāṃ vyādhīnāṃ ca nikṛntanam 
8.12 sarvānugrahakaṃ devi bhuktimuktipradāyakam 
kālanirṇāśanaṃ devi jarāsiṃham udāhṛtam 
8.13 dāridraśamanaṃ cedam acireṇa gaṇāmbike 
āśāḥ saṃśodhayitvā tu devyā nyāsaṃ hi pūrvavat 
8.14 hṛdayādiprabhedena astrāntaṃ yāvadāvadhim 
svasthānanyāsavinyāsaṃ pūrvavac ca yathāsthitam 
8.15 śikhāsvacchandadeveśaṃ mantredaṃ pārameśvaram 
ṣaḍaṅgayajanād vātha nirācāreṇa sidhyati 
8.16 tato mudrāṃ parāṃ baddhvā cintayed yonimadhyagām 
mahāmudreti vikhyātā nākhyātā kasyacin mayā 
8.17 dhyātvā pretaṃ purā devi sarvakāraṇakāraṇam 
mahāyogī mahāsiddhaḥ sarvalokadharaḥ prabhuḥ 
8.18 sarvajñaguṇasaṃyuktaṃ padmaṃ tasyopari sthitam 
karṇikopari dīpyantaṃ prajvalantaṃ mahaujasam 
8.19 anantaṃ tad vijānīyāt tasyordhve tacchikhāśivam 
aṣṭapattrāsanāsīnaṃ dvātriṃśārcibhir āvṛtam 
8.20 nānālaṅkārasampannaṃ nānāvarṇaṃ vicintayet 
daśabāhuṃ mahāghoraṃ caturvaktraṃ sulālasam 
8.21 sarvavarṇadharaṃ devam atha śyāmaṃ vincintayet 
kapālaṃ caiva khaṭvāṅgam anyat paraśuśūladhṛk 
8.22 ḍamaruṃ cākṣamālāṃ ca phalaṃ haste niveśayet 
gajacarmadharau cobhau hastau tu parikīrtitau 
8.23 garjantaṃ bhīṣaṇaṃ nādaṃ sarvakāraṇakāraṇam  
bhakṣantaṃ cintayed vyādhiṃ viśveśvarakujeśvaram 
8.24 khādyamānāṃ raṭantīṃ tāṃ tāḍyamānāṃ vibheditām 
bhedayantīṃ triśūlena chedayantīṃ mahāsinā  
8.25 kruddhabhāvād dhunantīṃ tāṃ pūrvavyādhiṃ vicintayet 
tasyopari tam aikāram īśatattvāvadhisthitam 
8.26 śikhāsvacchandadeveśaṃ tat sthāpyopari pūjayet 
svakīyāṅgasamudbhūtam ekavīrāṅgapañcakam 
8.27 āgneyyāṃ hṛdayaṃ nyasya śiras tv īśānagocare 
śikhāṃ śikhātmakāṃ rakṣe tanutrāṇaṃ tu vāyave 
8.28 astraṃ diśāsu vinyasya bhūyo madhye prapūjayet 
juṣṭacaṇḍeśvaraṃ kṣetre pūjādau vighnarāṭ kule 
8.29 calādīnām adhiṣṭhānaṃ jānīyād gurupaṅktivat 
dhūpacandananaivedyaṃ trayāṇāṃ prathamaṃ dadet 
8.30 siddhisādhanayuktasya mārgo 'yaṃ hy avicārakaḥ 
nirācārapadasthānāṃ  kṣetracaṇḍīśavighnarāṭ 
8.31 balipūjāsu naivedyaṃ trayāṇāṃ prathamaṃ dadet 
paścāt kramasya kubjīśe ataḥ śāṭhyaṃ na kārayet 
8.32 pāramparyakramaṃ pūjya paścān maṇḍalakopari 
śikhāsvacchandadeveśaṃ yāmalaṃ tu catuṣkalam 
8.33 hṛttanutrāṇaparyantaṃ yajed devaṃ catuṣkalam 
yogamārgāvalambānāṃ śrīsiddhākhyaṃ catuṣkalam 
8.34 pūjya svacchandadeveśaṃ kramāgre maṇḍalopari 
tato japec chikhānātham aghoraṃ parameśvaram 
8.35 praṇavādyaṃ namaskāram asiddhānāṃ niyuñjayet 
siddhārthayogayuktānām aiṃpādādyantayojitam 
8.36 tato ' gnipūjanaṃ kṛtvā yathā pūjā tathāhutim 
sahasraṃ vā śataṃ vātha pañcāśat pañcaviṃśa vā 
8.37 tilair homaṃ prakurvīta dadhimadhvājyasaṃyutaiḥ 
ghṛtasaktvā ca madhunā sarvaduḥkhapramardakam 
8.38 vyādhinirṇāśanaṃ kubji śeṣahomaṃ tu bhūtidam 
sahasreṇa mahābhūtiḥ śatena vyādhināśanam 
8.39 śatam aṣṭaśataṃ kubji devatulyo bhaviṣyati 
sarvaduḥkhavinirmuktaṃ japapūjāsamanvitam 
8.40 śatato ' ṣṭasahasreṇa triṣkālena tu sundari 
ṣaṇmāsāj jāyate siddhiḥ sākṣāt paśyati bhairavīm 
8.41 yatheṣṭaṃ jāyate siddhir nāsty atra-m-anṛtaṃ vacaḥ 
sahasreṇa jvaraṃ yāti chāgasya piśitair hutaiḥ 
8.42 triṣkālaṃ māsam ekaṃ tu sahasraṃ hunate tu saḥ 
sidhyate māṃsahomena kṣaudrājyadadhisaṃyutam 
8.43 yavakṣīrānnahomena śālitaṇḍulasādhitam 
prīyate tu śikhādevaḥ svacchando ghorarūpadhṛk 
8.44 dadhihomāt parā puṣṭiḥ kṣīrahomena śāntikam 
ṣaṇmāsāt tu ghṛtaṃ hutvā sarvavyādhivināśanam 
8.45 rājayakṭmaṃ tilair homād āyuvṛddhir yavair hutaiḥ 
kuṣṭhasyaiva sadā homāt triyuktais taṇḍulaiḥ priye 
8.46 samasaktughṛtenāśu nāśayeta bhagandaram 
tilair homaṃ prakurvīta dadhimadhvājyasaṃyutam 
8.47 vyādhinirṇāśanaṃ kubji śeṣahomas tu bhūtidaḥ 
ghṛtakevalahomena sarvavyādhinikṛntanam 
8.48 prayogaṃ sampravakṣyāmi yad uktaṃ te purā mayā 
dharmakāmārthamokṣāṇāṃ caturvargaphalodayam 
8.49 tava kubji pravakṣyāmi śṛṇuṣvekamanādhunā 
sarvavyādhiharaṃ dhyānaṃ paraṃ puṣṭivivardhanam 
8.50 āśāṃ saṃśodhayet pūrvaṃ nyāsaṃ kṛtvā tu pūrvakam 
pūrvaṃ nyasya ca mantreśaṃ nāḍīvarṇais tathākṣaraiḥ 
8.51 adhaḥsrotaṃ tu vāmena dakṣiṇordhvagataṃ priye 
nyāsaṃ kṛtvā śarīre tu mantrarājam anusmaret 
8.52 pañcapraṇava-m-ādyena aghoreṇa surādhipe 
adhyuṣṭamātrād uttīrṇaṃ jñātvā mantram anusmaret 
8.53 akulāditrimadhyasthaṃ kulā[c] cādes trimadhyagam 
madhyamāditrimadhyasthaṃ piṇḍādes tu trimadhyagam 
8.54 trayārdhamātrasaṃyuktaṃ praṇavedaṃ śikhāśivam 
trināḍīpiṇḍasambhūtaṃ mudrayā cordhvadīpitam 
8.55 tripakṣakṣayakartāraṃ tridhābaddhaṃ triśūlinam 
trimūrtiguṇasambhūtaṃ tenāsau tridaśeśvaraḥ 
8.56 trimārgavihitaṃ śāntaṃ tripathāntasamudbhavam 
tripathena vinā bhadre bhrājate yonimaṇḍalam 
8.57 yoniṃ vinā na niṣpattir divyādivyeṣu vastuṣu 
uttamottamamadhyasthā kanyasāntavyavasthitā 
8.58 bindu śaktis tathā nādaṃ mātrātrayam udāhṛtam 
trayāṇām api saṃyogān niṣpadyeta bhagālayam 
8.59 parārdhamātrasambhinnaṃ praṇavo 'yaṃ kulāgame 
a-u-ma-kārasaṃyuktaṃ praṇavedaṃ kriyātmakam 
8.60 sādākhyeśvararudrāṇāṃ brahmaviṣṇu-r-anukramāt 
ete te praṇavāḥ pañca kriyākāraṇagocare 
8.61 praṇavādisamudbhūtāḥ pañcaite guṇavattarāḥ 
pañcapraṇava-m-ādyantaṃ tatordhve tu śikhāśivam 
8.62 evaṃ tu praṇavaṃ divyaṃ sugopyaṃ prakaṭīkṛtam 
atra devi sphuṭaṃ tubhyaṃ bhrāntaṃ cātra jagattrayam 
8.63 jñātvevaṃ saṃsmared yas tu sannidhāno 'sti tasya vai 
sudurlabhaḥ prayogo 'yaṃ guruvaktrāt tu labhyate 
8.64 yatrotpannaṃ tato yāti layaṃ kṛtvā surādhipe 
utpattipralayaṃ jñātvā tato mantram anusmaret 
8.65 yat kiñcit kurute kāryaṃ sādhakaḥ sādhanātmakaḥ 
uccaret tu layāntasthaṃ tarjanyāgre vyavasthitam 
8.66 nāḍīsūtreṇa vinyastaṃ bahir ante ca mātaraḥ 
yā nāḍī sā bhaved varṇas tayā nāḍyā tu veṣṭayet 
8.67 yadi candraṃ vahec cakraṃ sūryaṃ vā cakram uttamam 
tasya madhye svayaṃ sthitvā viśvo 'ham iti cintayet 
8.68 ahaṃ brahmā tathā viṣṇur ahaṃ devo maheśvaraḥ 
bhairavo 'ham iti devi cintayitvā tu sādhakaḥ 
8.69 hṛnmadhye cintayec cakraṃ nāḍīvarṇais tathākṣaraiḥ 
ādyakṣaraṃ japen mantraṃ punar ādyaṃ niyojayet 
8.70 evaṃ saṃsmṛtya vidhivat sarvakarmāṇi sādhayet 
arcanaṃ havanaṃ dhyānaṃ japam ekāntarūpiṇam 
8.71 karma kṛtvā kujeśāni kujeśāya nivedayet 
tato dhyānaṃ prakurvīta viśuddhenāntarātmanā 
8.72 sa eva mantram uccārya ādyādau yāvad antimam 
nādena tu gatiṃ kuryāt svacchandagatibhāvitaḥ 
8.73 brahmaṃ bhittvā tato viṣṇuṃ rudram īśvaram eva ca 
setumadhyena gamanaṃ kuñcikodghāṭayed bilam 
8.74 udghāṭya paramaṃ sthānam aghoraṃ yatra saṃsthitam 
aṣṭākapāla ghorīśaṃ tryakṣaraṃ samanusmaret 
8.75 sarvamantreṣu hṛdayaṃ yat kubjīśaśikhātmakam 
manasā smṛtamātreṇa khecaratvaṃ prajāyate 
8.76 sarvavighnopaśamanaṃ mantraṃ tryakṣaram uttamam 
śeṣaṣaṭkaṃ tu yad devi tadaṅgāny asya kalpayet 
8.77 japtavyaṃ tu śikhāsūtraṃ sakṛt siddhiḥ prajāyate 
ākāśādiprasiddhyarthaṃ siddhir anyāsu kā kathā 
8.78 mantrasannaddhadehas tu sarvāvastho 'pi sādhakaḥ 
tiṣṭhan jāgran svapan gacchan bhuñjāno maithune rataḥ 
8.79 caryādhārī nirācāro mantrasaṃsmaraṇāc chuciḥ 
sāmānyasmaraṇād eva vyādhibhir nābhibhūyate 
8.80 prajvalan dṛśyate bhūtair yasyedaṃ tu śarīragam 
ataḥ kiṃ bahunoktena siṃhasyaiva yathā mṛgāḥ 
8.81 gandhena pralayaṃ yānti satyaṃ satyaṃ mahātape 
japena sādhayet sarvaṃ vratastho yas tu sādhakaḥ 
8.82 pūrvam eva japel lakṣaṃ sidhyate ghoramūrdhajam 
aviditvā vidhānena kiñcit kāryaṃ na sādhayet 
8.83 yaḥ kuryād vidhihīnaṃ tu sa vighnaiś cābhibhūyate 
tasmāt padārthanavakaṃ jñātavyaṃ tu kujeśvari 
8.84 kṣetrasthānāni suśroṇi jñātavyāni suniścitaiḥ 
kṣetraṃ vratāni mantrāś ca akṣasūtraṃ japaṃ tathā 
8.85 dhyānaṃ pūjā tathā dravyaṃ varṇaṃ mukhasamanvitam 
mukhahīnā na sidhyanti agnihotravivarjitāḥ 
8.86 mukham āhavanīyaṃ syāt tasmin mantrāḥ sadā sthitāḥ 
aghoraṃ kālam ity uktam aghoraṃ viṣṇur ucyate 
8.87 aghoras tvaṃ maheśāni aghoraś cāham eva ca 
bahurūpadharo hy agniḥ pracaṇḍaḥ kāla-m-antagaḥ 
8.88 sa śivaḥ paramo brahmā nirvāṇaḥ sa sadāśivaḥ 
īśvaraḥ sa paro nityam asmāt parataro na hi 
8.89 anena smṛtamātreṇa sarvaduḥkhaiḥ pramucyate 
dāridrasiṃho 'ghorīśo vyādhisiṃhaḥ kuleśvari 
8.90 pracaṇḍaduṣṭasiṃhaś ca mahāpātakanāśanaḥ 
sarvatīrthābhiṣekaś ca saptajaptena jāyate 
8.91 śatajaptena devena sarvayajñaphalaṃ labhet 
dīkṣānirvāṇakārī syāt trisaptaparivartanāt 
8.92 daśāvartena duritaṃ brahmahatyāṃ vyapohati 
daśāvartād guropekṣī smaraṇād eva mucyate 
8.93 vidhihīne tathā pāne pañcabhiś copapātakī 
śatena caiva triṣkālyaṃ varṣāt siddhir yathepsitā 
8.94 balavatāṃ ripūṇāṃ tu vyastam āvartayet prabhuḥ 
dakṣiṇāsyo mahādevi sahasreṇa nipātayet 
8.95 saṅgrāmakāle smartavyam asipattragataṃ hṛdi 
veṣṭantaṃ mātṛbhiḥ sainyaṃ bhakṣa bhakṣeti bhāṣayet 
8.96 hatadarpāḥ prajāyante na punaḥ saṃharanti ca 
duḥsvapne dviguṇaṃ jāpyaṃ vraṇe caiva caturguṇam 
8.97 lūtā daśaguṇaṃ caiva viṣe vai viṃśatis tathā 
dine dine śataṃ japtvā vibhūtir vardhate ' cirāt 
8.98 prāṅmukho yasya nāmnā tu sādhyārūḍho hṛdi sthitaḥ 
vaśībhavati rājānaṃ śatajāpyena dhīmatā 
8.99 saptāhāt sa balopeto vaśībhavati nānyathā 
dine dine sahasreṇa nāsti tad yan na sādhayet 
8.100 ādityābhimukho bhūtvā sahasraṃ parivartayet 
yat kiñcid vihitaṃ citte saptāhāt sādhayiṣyati 
8.101 nyastaṃ sarvāṅgikaṃ mantraṃ bhairavākārasaṃsthitam 
sa tu bhojanakāle tu pātre sañcintya sādhakaḥ 
8.102 sampūrṇaśaśinaṃ dhyāyed bhuñjāno 'mṛtam aśnute 
sampūrṇacandramadhyastham adhordhvasampuṭīkṛtam 
8.103 paryaṭet sādhako nityaṃ sarvaśreyam avāpnuyāt 
yad icchet sādhakaḥ siddhiṃ hṛdi kṛtvā kujeśvaram 
8.104 candramaṇḍalamadhyasthaṃ svacchandagatibhāvitam 
tatpraviṣṭaṃ vicinteta antyād antaṃ parāparam 
8.105 parasparaṃ tu sañcintya yāvad brahmabilaṃ gataḥ 

iti kulālikāmnāye śrīkubjikāmate svacchandaśikhādhikāro nāmāṣṭamaḥ paṭalaḥ 

śrībhairava uvāca 

9.1 bhedayitvā paraṃ tattvaṃ hakāraṃ nāma nāmataḥ 
so 'ṣṭākapālo vijñeyas tasyākāśaṃ tu tac chiraḥ 
9.2 aghoram iti vikhyātaṃ dvātriṃśākṣarabhūṣitam 
tasmāt sañjāyate sṛṣṭiḥ sā tu sṛṣṭir hṛdi sthitā 
9.3 dvātriṃśa mātaras tās tu cakrārūḍhā vicintayet 
caṇḍā ghaṇṭā mahānāsā sumukhī durmukhī balā 
9.4 revatī prathamā ghorā saumyā bhīmā mahābalā 
jayā ca vijayā caiva ajitā cāparājitā 
9.5 mahotkaṭā virūpākṣī śuṣkā cākāśamātarā 
sehārī jātahārī ca daṃṣṭrālī śuṣkarevatī 
9.6 pipīlikā puṣpahārī aśanī sasyahārikā 
bhadrakālī subhadrā ca bhadrabhīmā subhadrikā 
9.7 manasā pūjayet tasthā bhakṣyabhojyādibhiḥ kramāt 
puṣpair nānāvidhair devi nānālaṅkārakādibhiḥ 
9.8 sravantaṃ cintayet tastham amṛtaṃ sarvatomukham 
tenāpyāyitadehas tu tatkṣaṇād virajo bhavet 
9.9 yāgaṃ tu mānasaṃ kṛtvā kasya siddhir na jāyate 
sampūrṇamaṇḍalaṃ dhyātvā aghoraṃ nāma nāmataḥ 
9.10 so 'ṣṭākapālaḥ pravaras tattvavyāpī nirakṣaraḥ 
sa eva candrarūpī syāt karṇikāyāṃ vicintayet 
9.11 tattvaṃ tatra mahānādaṃ hakāraṃ nāma nāmataḥ 
ṣaṭpadārthayuto devi navakena prasidhyati 
9.12 sa eva līyate viṣṇor viṣṇu rudrasamāśritaḥ 
sa eva kālo vijñeyaḥ sarvabhakṣo hutāśanaḥ 
9.13 sa eva līyate māyā sā ca viṣṇuḥ prakīrtitā 
sā śaktir nirmalā kubji kālo vai yena bhakṣitaḥ 
9.14 sa viṣṇuḥ śivatāṃ yāti setuṃ bhittvā kuleśvari 
sa ca turyapadaṃ prāpya unmanatvaṃ hi tat padam 
9.15 āśrayaṃ devadevasya aghorasya mahātape 
nirvāṇaṃ tu paraṃ vindyāt sa kubjīśaḥ prakīrtitaḥ 
9.16 sa dhruvo vāsudevaś ca ajātaḥ parikīrtitaḥ 
tatra śaktiṃ sadā kuryāt tatrāsaktaḥ sadā bhavet 
9.17 na pāpair lipyate devi mahāpāpaiḥ sudāruṇaiḥ 
na kālasya vaśaṃ gacchen na jarā na ca duḥkhitaḥ 
9.18 sarvatīrthaphalaṃ caiva sarvayajñeṣu dīkṣitaḥ 
hṛnnādaṃ manasotthāpya vrajen nirvāṇajaṃ padam 
9.19 cetasā tv amṛtaṃ gṛhya āgacched ghaṇṭikāśrayam 
tadutthaṃ bhāratīmūle kṛtvāsau 'mṛtam aśnute 
9.20 āpūrya vadanaṃ tena svacchandena kujeśvari 
anangadhenavīṃ dugdh[ v ]ā tattvaṃ vyāpyeśvareṇa tu 
9.21 aghoraṃ pañcamadhye tu ātmatattvaṃ vicintayet 
yo 'gnir jvalati cāpena ekas tiṣṭhati pañcadhā 
9.22 trailokyaṃ vyāpitaṃ tena yajante brahmavādinaḥ 
tasyaiva yaḥ śikhāṃ vetti āhitāgniḥ sa ucyate 
9.23 so' gnir devamukhaṃ vindyād aghoraḥ sarvatomukhaḥ 
mukheṣu ca mukhaṃ devi trailokye 'pi pragīyate 
9.24 vinā tena varārohe na homo na ca bhojanam 
śucir agnir bhaved devo bahurūpaḥ kujeśvari 
9.25 tadantaṃ tu japaṃ kuryāt kṛtvā hṛtsthaṃ tu keśavam 
adhastāt setumārgasya tiṣṭhate tu kujeśvaraḥ 
9.26 sa cāsanaṃ paraṃ tasya sevyate kiṃ na mantrarāṭ 
vidyārājeti vikhyāto mantrarājeti kathyate 
9.27 mudrārājeti mahatāṃ maṇḍalādhipatiḥ smṛtaḥ 
brahmaviṣṇvīśvarādyeṣu patir devi pracakṣyate 
9.28 nānena sadṛśo devi mantrakoṭiśatair api 
hṛdayaṃ sarvamantrāṇāṃ paramaṃ parikīrtitam 
9.29 anena hīnā deveśi mahān api na sidhyati 
grahayantreṣu sarveṣu vyādhiteṣu kuleśvari 
9.30 ripunāśe ca balavān dāridrabhayanāśanam 
tasmād ārādhya yatnena duḥkhasiṃhaḥ prakīrtitaḥ 
9.31 nānena sadṛśaḥ kaścin nānyo 'sti sacarācare 
devāsuramanuṣyānāṃ tattvarūpo maheśvari 
9.32 mūrdhnaḥ pādatalaṃ yāvat tattvaṃ carati dehinām 
niṣkalāt sakalaṃ yāti sakalān niṣkalaṃ padam 
9.33 ekenāṃśena vīrāṇāṃ sarveṣāṃ kim api stutam 
sa bhairavaḥ śivo bhāti sarvajñaḥ sarvajantuṣu 
9.34 yāvat tiṣṭhaty asau gātre tāvaj jīvanti jantavaḥ 
vinā tena varārohe nāsti nāstīti kathyate 
9.35 tasya devādhidevasya sarvavyāpimayasya ca 
sarvadevamayo devi kathaṃ bhaktyā na sidhyati 
9.36 yena vijñānamātreṇa smṛtenaiva tu sundari 
akṣayān labhate lokān muktisthānaṃ gamiṣyati 
9.37 sarvalakṣaṇahīno 'pi smaraṇāt kalmaṣāpahaḥ 
aho mantrasya māhātmyaṃ japyamānasya nityaśaḥ 
9.38 vināpi layayogena yoginīsamatāṃ vrajet 
sādhakāya prayacchanti trailokyajñānam uttamam 
9.39 ākāśādi prayacchanti divyadṛṣṭiśrutāgamam 
sarvabhūtā vaśaṃ yānti grahāś caiva viśeṣataḥ 
9.40 viṣaṃ ca nirviṣaṃ kuryād darśanād eva sarvataḥ 
na tasya tiṣṭhate gātre viṣaṃ sthāvarajaṅgamam 
9.41 kīṭalūtās tu bhūtāś ca apamṛtyur na tiṣṭhati 
garajaṃ yogajaṃ doṣaṃ pralayaṃ yānti dūrataḥ 
9.42 cūrṇalepāñjanādīni kuhakāni tu yāni vai 
ye kariṣyanti ripavaḥ striyo vā puruṣasya vā 
9.43 tatkṣaṇāt pralayaṃ yānti teṣāṃ pratyaṅgirā bhavet 
smaraṇād devadevasya indraṃ yāti narottamaḥ 
9.44 jvalanto dṛśyate bhūtair hṛccakre vidhisaṃsthitaḥ 
duṣṭāś ca pralayaṃ yānti siṃhasyaiva yathā mṛgāḥ 
9.45 eko doṣo hi mantrasya japyamānasya jāyate 
jarā mṛtyuś ca dāridryaṃ vyādhayo vividhāḥ priye 
9.46 smaraṇāt pralayaṃ yānti tuhinaṃ tu raver iva 
japyate yeṣu rāṣṭreṣu deśe vā surasundari 
9.47 na rujā jāyate tatra svāmī tatra vivardhate 
ekenāpi suputreṇa ghoradevāṅgapūjanāt 
9.48 ghorīśaṃ tu yadā jñātaṃ sa kulaṃ tārayiṣyati 
paśavaś ca na naśyanti sadā vardhati gokulam 
9.49 vandhyā na jāyate nārī na mriyante ca bālakāḥ 
jvararogādibhis tasya kuṭumbaṃ naiva pīḍyate 
9.50 sarvalokasya sampūjyo jāyate rājavallabhaḥ 
dhāraṇīyaṃ sadā gātre yathāvat pravadāmy aham 
9.51 puṣpeṇa guḍikāṃ kṛtvā mantraṃ bhūrje samālikhet 
kuṅkumena likhed devi rocanāyāthavā punaḥ 
9.52 akāracaturo madhye ātmanāma samālikhet 
mantreṇa chāditaṃ nāma aṅkusena tu rakṣitam 
9.53 māyayācchādayitvā tu śivaṃ mūrdhni gataṃ likhet 
yāṣṭaṃ ṣaṣṭhasamāyuktaṃ bindunādāṅkitaṃ priye 
9.54 tac chivaṃ tu varārohe caturāśramapūjitam 
sarvaṃ kṣasthaṃ paraṃ mantraṃ sarvarakṣākaraṃ param 
9.55 nāmnā tu guḍikā hy eṣā sarvarogavimardanī 
sāntā pūrvaṃ tu kartavyā tataḥ kṣasthāṃ tu kārayet 
9.56 kṣakāraṃ kālam ārūḍham okāroparidīpitam 
ṣaṣṭhasvarayutaṃ devi amaratvaṃ prayacchati 
9.57 yas tu dhārayate divyāṃ guḍikāṃ śivapūjitām 
tasya vakṣyāmi suśroṇi guṇān nānāvidhān śṛṇu 
9.58 sarvatīrtheṣu yaḥ snātaḥ sarvayajñeṣu dīkṣitaḥ 
na bhayaṃ vidyate tasya dharaṇad ajarāmaraḥ 
9.59 sarvavratāni cīrṇāni sarvatīrthanamaskṛtaḥ 
avaniṃ vicaret sarvāṃ bhairavas tu yathā hi saḥ 
9.60 sarve te darśanāt tasya sādhakasya mahātmanaḥ 
duṣṭāś ca pralayaṃ yānti vyādhayo vidravanti ca 
9.61 abrahmacārī cārī syād asnātaḥ snānam āpnuyāt 
na bhayaṃ vidyate tasya saṅgrāme ca sadā jayaḥ 
9.62 abhakṣyabhakṣaṇaṃ kṛtvā agamyāgamanaṃ tathā 
nāsau lipyati pāpena paṅkasthaṃ kamalaṃ yathā 
9.63 guḍikā tu sadā siddhā mahābhairavadhāritā 
yogeśvarādimunibhiḥ sarvadevair namaskṛtā 
9.64 bahunāpi kim uktena satyaṃ satyaṃ yaśasvini 
jvalanto dṛśyate bhūtair yathā rudro makhāntakṛt 
9.65 supto bhuktaḥ prabuddhaś ca atha maithunam āgate 
mahāhave mahādevi duṣṭasiṃhagajeṣu ca 
9.66 vidyudvajrāśaniś caiva utpāteṣv aśanīṣu ca 
śatrunāśe ca gonāśe viṣaśaṅkāgataṃ ca yat 
9.67 ārṇaveṣu ca sarveṣu dhāraṇān na bhayaṃ bhavet 
śākinyo vaśagās tasya duṣṭavetālarākṣasāh 
9.68 śucir vāpy aśucir vāpi vidravanti diśo daśa 
guḍikaiṣā samākhyātā trilohapariveṣṭitā 
9.69 dhāraṇīyā prayatnena śivalokam avāpnuyāt 
sarvāvasthagato vāpi muktiṃ yāti surādhipe 
9.70 matsamo dhāraṇād devi satyaṃ satyaṃ yaśasvini 
mayāpi dhāritā hy eṣā brahmaṇāpi tataḥ punaḥ 
9.71 viṣṇunā devarājena yuddhe daityās tu nirjitāḥ 
agnivāyukubereṇa yamena varuṇena ca 
9.72 mātṛbhir guhyakaiś caiva garuḍena ca dhīmatā 
dadhīcinā ca śukreṇa durvāsenāpi dhīmatā 
9.73 ṛṣibhiś ca tathā sarvair devadaityaiḥ kujeśvari 
tatas tv anyaiś ca rājānair balibhir nahuṣādibhiḥ 
9.74 yuddhe jayārthibhir devi ugravyādhijayārthibhiḥ 
prajāvaśyārthibhiś caiva guḍikā kaṇṭhadhāritā 
9.75 nānayā sadṛśī vidyā guḍikā bhuvi vidyate 
piṇḍaṃ tu prathamaṃ mantryam aghoreṇa susaṃskṛtam 
9.76 bhuñjīyāc caiva niḥśaṅkaṃ tatas tasyāmṛtāyate 
diśo 'bhimantrya gaccheta vāmaṃ cāgrapadaṃ nyaset 
9.77 ubhayoś candramadhye tu paryaṭeta sadā sthitaḥ 
bhuñjāne śayane caiva candramadhye sadā sthitaḥ 
9.78 candrārūḍhena satataṃ sthātavyaṃ varavarṇini 
nāghorasadṛśo mantro mantrā yasmād vinirgatāḥ 
9.79 guruvaktrāt tu vijñeyo madhye oṃkāramadhyagam 
sa eva nādasaṃlīno yāvad brahmabilaṃ gataḥ 
9.80 dhāraṇād dhāritaṃ kṛtvā tribhiḥ prāṇair alaṅkṛtam 
svacchandasahitaṃ devaṃ varṇāntapariveṣṭitam 
9.81 mukhe 'naṅgāṃ tato dugdhvā dhenavīṃ cāmbarāṃ priye 
grāhyagrāhavimardaś ca triśūlaṃ vaḍavāmukham 
9.82 kuñcikā ghaṇṭikā caiva rājadantāmṛtāgamam 
āyuṣo jñānam utkrāntir aghorasya vaśe sthitaḥ 
9.83 nāghorasadṛśo mantro mantrakoṭiśatair api 
satyaṃ satyaṃ punaḥ satyaṃ bhūyaḥ satyaṃ punaḥ punaḥ 
9.84 sarvajñaṃ paramaṃ mantraṃ muktidaṃ vyādhināśanam 
jarāmṛtyuharaṃ devi vidyārājeti kīrtitam 
9.85 viṣuvaṃ ca sadā tatra yatra sarvaṃ pratiṣṭhitam 
utpattisthitikartāraṃ yatra sarve layaṃ gatāḥ 
9.86 kiṃ na sevyati deveśi bahurūpaṃ kujeśvari 
devādhidevaṃ paramaṃ yat tat kāraṇam avyayam 
9.87 tattvavyāpīti paramaṃ vyomavyāpīti kathyate 
brahmaviṣṇusurādīnām utpattipralayāntikam 
9.88 aghoraṃ ghorarūpeti aghorīśa iti smṛtaḥ 

iti kulālikāmnāye śrīkubjikāmate śikhākalpaikadeśo nāma navamaḥ paṭalaḥ 

śrībhairava uvāca 

10.1 kavacasya tu māhātmyaṃ śṛṇu devi vadāmy aham 
yena saṃrakṣayet sarvaṃ kruddhaḥ śatrūn nipātayet 
10.2 āgataṃ rakṣayet kālaṃ kruddhaḥ kālaṃ vināśayet 
kālavat kulasiddho 'sau tanutrāṇāvalambakaḥ 
10.3 śākinībhūtavetālān nāśayet sādhayeti ca 
māyārūpadharo mantrī māhendraguṇaśālinaḥ 
10.4 kurute vividhāścaryaṃ picchakabhrāmaṇena vai 
kavacaṃ tu samākhyātam asiddhabhedakṛd bhavet 
10.5 asya dūtīṃ pravakṣyāmi sadyaḥsiddhāṃ kulodbhavām 
yasyā lekhanamātreṇa prasrāvo 'ṅghritalaṃ bhavet 
10.6 ākhkhilla bheṭṭā durvasa ākhkhille usi ānnidi 
āṭṭi vasaṃ viha pūrvasa aṭṭi masi ālitto u 
10.7 evaṃ pārampareṇaiva kaulabhāṣā samuddhṛtā 
guruvaktrād vilomena tarjanyagreṣu siddhidā 
10.8 kavacaṃ tu samākhyātaṃ śṛṇu netraṃ yathāsthitam 
netrasiddho mahāyogī lokālokaṃ carācaram 
10.9 paśyate nikhilaṃ sarvaṃ śivādyavanigocaram 
kruddhaḥ saṃśoṣayet sarvaṃ sāgarāṃś ca nadānadīn 
10.10 āpyāyati tadāvasthaṃ pañcavyāptyantagocaram 
nirācārapadastho 'sau tattvastho japate yadi 
10.11 asya dūtī parā devyā paradṛṣṭisamudbhavā 
sadyaḥsiddhā mahādevi sadyaḥpratyayakārikā 
10.12 hāsvā yairīśvaṇḍemucā kterahāma ktera ktera oṃ 
10.13 guruvaktropadeśena pāramparyakrameṇa vai 
tithisaṅkhyākalair yuktā kulabhāṣāsurakṣitā 
10.14 asyopacāraḥ kartavyaḥ kaumāryau dve samāharet 
gandhadhūpapayaḥpānaṃ śucau sthāne nayet tu te 
10.15 śuklavastradharāṃ tāṃ vai devīṃ dhāyed yathā tu tām 
bhāvanāntānusāreṇa mardayed dārikānanām 
10.16 śikhinocchiṣṭayogena śarīraṃ tasya lāñchitam 
svastikena tu kumbhordhvaṃ sitavastrāvaguṇṭhitam 
10.17 kuryāt snānaṃ tu tailāktā bhuñjānas tilapiṣṭakam 
tṛptāḥ santaḥ prapaśyanti dārikānanamadhyataḥ 
10.18 yat kiñcid vāṅmayaṃ loke cintayitvā tu sādhakaḥ 
bhūtabhavyārthanirdeśaṃ tat pasyati tadodare 
10.19 eṣā netragatā dūtī sadyaḥsiddhiphalapradā 
kālavelāvinirmuktā sādhitā sati sarvadā 
10.20 astraṃ pracaṇḍadaṇḍograṃ sādhitaṃ vidhinā yadi 
hṛdādau kramaśo vṛddhyā saṅkruddhaḥ saṃharet khilam 
10.21 aśuddhaṃ śodhayet sarvaṃ sakṛduccāraṇāt tu tam 
tan na vastvantaraṃ kiñcid yad anena na sidhyati 
10.22 asya dūtī mahāmāyā śrīmadguhyeśvarī parā 
guhyakālīti nāmena sarvāyudhavimardanī 
10.23 rakṣaṇī kālapāśānāṃ śatrūṇāṃ tu nikṛntanī 
chedanī paramantrāṇāṃ yantramantrāpavādinām 
10.24 yasyeṣā tiṣṭhate kaṇṭhe mahākṛtyā sudāruṇā 
tasya yaḥ kurute kiñcit tasyaiva tu punar bhavet 
10.25 aśubhe vā śubhe vātha karmavṛttau niyojayet 
sādhakendrasya yaḥ kaścit tasya pratyaṅgirā bhavet 
10.26 mahābhaye samutpanne sitagandhāmbarānvitaḥ 
cintayanto niśābhāge śatror yuddhaṃ parasparam 
10.27 evam anyāni karmāṇi sādhayet parameśvarī 
devyāḥ śastrasya dhāreṇa amoghotkaṭavarcasā 
10.28 śrūyatāṃ kula-m-īśāni kālasya kālarūpiṇī 
amoghā śakti vikhyātā saṃvartāṅgasamudbhavā 
10.29 hāsvā yaikābjikuhyagu ṭpha hūṃ hreṃ hūṃ hrīṃ hreṃ lirākaṣṭrādaṃ naha naha rvānsa tān tiṣyarika taṃpirākā taṃkṛ naye kaṃdigāyoprarṇacūntratantramantrayavāndraparvosa mama ṭpha hūṃ kebjikuhyagu oṃ 
10.30 svāhā oṃ vai parityajya siddhavarṇās triṣaṣṭi ca 
khādakāstreti vikhyātā sarvārthaguṇarūpadhṛk 
10.31 asya nāmnā pṛthaktantraṃ svatantraṃ siddhasāgaram 
guhyakālīti nāmena sapādalakṣapūrvakam 
10.32 vyāvarṇitaṃ tu tatrastham atra kiñcid udāhṛtam 
kubjikāstrasya māhātmyaṃ kulālītantranirgatam 
10.33 pāramparyakramāyātam upadeśasamanvitam 
vilomavihitaṃ sarvaṃ khādakāstre 'py ayaṃ vidhiḥ 
10.34 khādakāstrasya lakṣeṇa nirācāreṇa yojayet 
māṃsāhārasvarūpasya parivartaṃ karoti ca 
10.35 tatkṣaṇād viṣṇupaṅkena lepanāt siṃharūpadhṛk 
jāyate nārasiṃhatvaṃ yad dhṛtaṃ viṣṇunā purā 
10.36 viṣṇunāpi purā cīrṇaṃ vrataṃ hy asyāḥ subhīṣaṇam 
tena taṃ nārasiṃhatvaṃ tasya siddhaṃ sudāruṇam 
10.37 nāyātaṃ martyalokedaṃ kvacit siddhaṃ krame sthitam 
māhātmyaṃ gopitaṃ hy asyāḥ siddhair bhṛgupuraḥsaraiḥ 
10.38 astrasya dūtikā hy eṣā kubjikāmnāyanirgatā 
siddhavidyāmahaughaiṣā āśusiddhā sugopitā 
10.39 kuleśvaryāṅgasambhūtā suvratā yā guṇojjvalā 
gopitā anyatantreṣu pratyakṣā kubjikāmate 
10.40 etad devyāṅgaṣaṭkaṃ tu nānānandapradāyakam 
devyā hṛdayamāhātmyaṃ nityātantram aśeṣakam 
10.41 nityānandakarī dūtī devyā hṛdi samudbhavā 
tena nityā samākhyātā svādhiṣṭhānaṃ samāśritā 
10.42 siddhātantraṃ śirodbhūtaṃ tatra devyā mahābalā 
siddhayogeśvarī nāma raudraśaktir mahojjvalā 
10.43 anāhatena saṃyuktā raudradevyā mahābalā 
siddhayogeśvarītantre asyāḥ kīrtir anekadhā 
10.44 devyāḥ śikhiśikhodbhūtā svacchandānekabhedataḥ 
maṇibhedāntarālena svacchandādyaṃ vinirmitam 
10.45 svatantrā sahajā śāntā svacchandagatigāminī 
maṇibhedaṃ pūrayantī svacchandārthaprabodhikā 
10.46 svacchandena svarūpeṇa śikhāsūtraṃ pravartate 
svacchandāghorarūpasya tasyedaṃ tantram uttamam 
10.47 tanutrāṇasamudbhūtaṃ tantraṃ sammohanādikam 
viśuddhibhāvanāsīnaṃ dūtyanekasusaṅkulam 
10.48 anekāścaryakartāraṃ sammohadhvaṃsakārakam 
sammohanaṃ tu tenedaṃ māhātmyaṃ tatra tasya vai 
10.49 devyā netrasamudbhūtaṃ jyotiḥśāstraṃ svarodayam 
ājñādhāragataṃ hy etat sāmarthyānekasaṅkulam 
10.50 kaivalyādyaṃ ca yat kiñcit tan netrāṅgasamudbhavam 
asyāṅgasya tu māhātmyaṃ jyotiṣeśvarasāgare 
10.51 paramāstrasya madhye tu khādakāstraṃ mahābalam 
tasya vyāvarṇitaṃ pūrvaṃ tantraṃ svābhāvalakṣaṇam 
10.52 abhiṣekaṃ pravakṣyāmi sarvapāpapraṇāśanam 
paramāstraprayogena sarvaṃ tatra na saṃśayaḥ 
10.53 śūladaṇḍaṃ samuddhṛtya nābhisthaṃ varṇam uddharet 
śūladaṇḍāsanasthaṃ tu karṇabhūṣaṇavāmakam 
10.54 vāmajaṅghāsamāyuktaṃ nitambālaṅkṛtaṃ priye 
etad devyāstraparamaṃ nāpuṇyo labhate sphuṭam 
10.55 kramapūjāvidhānena yathāvibhavavistaram 
dīpamālābhir uddyotaṃ kṛtvā dhūpādhivāsitam 
10.56 śaṅkhaṃ vā kalaśaṃ vāpi abhimantrya svavidyayā 
uttamādhamamadhyasya karmasevānusārataḥ 
10.57 tayā vidyābhiṣekaṃ tu nyastavyā kalaśe tu sā 
śiṣyahaste tu taṃ dattvā idaṃ kūṭaṃ tu yojayet 
10.58 yāvat kṣubhyaty asau hastaḥ svayam eva calaty asau 
dhāraṇād iva saṃyātaṃ yadā patati mastake 
10.59 tadā tu jāyate 'sau vai sādhyalakṣaṇasādhakaḥ 
dagdhapāpaḥ prajāyeta nātra kāryavicāraṇāt 
10.60 nāśiṣyāya pradātavyaṃ na dhūrtāya na nindake 
bhaktāya śraddadhānāya gurubhaktāya sundari 
10.61 tasya deyam idaṃ devi abhiṣekaṃ varānane 
tadā tu sādhayet karma yad uktaṃ karmasantatau 
10.62 3 ṭpha 3 hūṃ 2 yataghāvi 2 yataghā 2 mava 2 haka 2 ṭacapra 2 ṭaca parūnuta rataragho 2 rasphupra hrauṃ hrīṃ hrāṃ 
10.63 lakṣaṃ vai pūrvasevāyāṃ sidhyate nātra saṃśayaḥ 
ṣaḍaṅgaṃ ṣaṭprakāraṃ ca ṣaḍyoginyaḥ ṣaḍadhvaram 
10.64 ṣaṭ prakārāṇi ṣaṭ siddhā jñātvaitān bhinnadṛṣṭinā 
sa jānāti varārohe samastāmnāyapaddhatim 
10.65 anyathā na bhavet siddhiḥ kiñcijjñaḥ paścimānvaye 
śrutvā savismayaṃ vākyam ānandapraṇayānvitam 
10.66 uvācedaṃ punaḥ kubjī ṣaḍadhvaṃ vada me prabho 

śrībhairava uvāca 

10.67 yuktam uktaṃ ca deveśi śrūyatāṃ paramārthataḥ 
saṅkṣepāt kathayiṣyāmi śeṣānyat purataḥ punaḥ 
10.68 bhūtaṃ bhāvaṃ tathā śāktaṃ māntraṃ raudraṃ ca śāmbhavam 
ājñātaḥ sampravarteta ṣaḍadhvedaṃ kulānvaye 
10.69 bhūtaṃ bhuvanāvaraṇaṃ padaṃ bhāvaṃ prayujyate 
śāktaṃ varṇāḥ samākhyātā māntraṃ dvādaśa kīrtitāḥ 
10.70 raudraṃ kalādhvaraṃ proktaṃ śāmbhavaṃ tattvalakṣaṇam 
ājñānalavatī dīkṣā mantrāṇāṃ sādhane hitā 
10.71 sā cājñā pūrvikā siddhā anyathā tilaghātakī 
sā ca tattvavatāṃ caiva tattvaṃ vai śāmbhavam padam 
10.72 tat padaṃ vidyate yasya sāmarthajñaḥ sa sarvaśaḥ 
jñānamārgaprasiddhyarthaṃ dīkṣā vedhavatī śubhā 
10.73 yogyatātaḥ pradātavyā subhaktasya kulādhvare 
sarvāsām eva dīkṣānāṃ cottamā parikīrtitā 
10.74 tena vedho na kartavyo na jñātaṃ yāva niścayam 
śāmbhavājñābhimānena lobhamohaḥ prakīrtitaḥ 
10.75 sāmarthyo 'nyo na me tulyo ya evaṃ manyate kudhīḥ 
ājñātaḥ sampravarteta kiṃ tu bhūtavatī bhavet 
10.76 atha cet paripakvasya ṣaḍvidho hy alpasvalpavat 
pṛthivyādīni bhūtāni cāviśanti ca yasya vai 
10.77 bhūtāveśaṃ tu tad viddhi bhāvāveśam ataḥ śṛṇu 
śabdaḥ sparśas tathā rūpaṃ raso gandhaś ca bhāvajam 
10.78 śrotraṃ tvak cakṣuṣī jihvā ghrāṇaṃ śaktimano viduḥ 
vācā pāṇis tathā pādaṃ pāyūpasthaṃ tu māntrajam 
10.79 mano buddhis tathā garvaḥ prakṛtau guṇa raudrajam 
puruṣādinivṛt[t]yantam unmanatvaṃ parāntikam 
10.80 etat te śāmbhavaṃ jñānaṃ bhuvanādyaṃ mahāhradam 

śrīkubjikā uvāca 

10.81 bhūtādiśāmbhavāntasya bhedopāyaṃ pṛthak pṛthak 
kathitaṃ tu yathā nātha tathā tatpratyayaṃ vada 

śrībhairava uvāca 

10.82 sādhu devi mahāprājñe kathayāmi sapratyayam 
anyathā tat kathaṃ tasya bhrāntijñānaṃ vinaśyati 
10.83 kampate bhramate rodec cotpaten nipated vadet 
anibaddharavonmādī sasaṃjño bhūtavad yathā 
10.84 bhūtāveśasya cihnedaṃ bhāvāveśam ataḥ śṛṇu 
yāni cihnāni jāyante bhāvaviddhasya bhāvini 
10.85 ghūrmaṇaṃ svedaromāñca aśrupātāṅgamoṭanam 
ārādhya smaraṇād evaṃ sampadyante svabhāvadhṛk 
10.86 bhramate cakravat pātaḥ kāṣṭhavat kṣubhitekṣaṇaḥ 
paśyate vibhramāpannaḥ śaktivedhopalakṣayet 
10.87 kampate bhramate caiva jalpate vadate 'khilam 
mantrāveśasya cihnedaṃ kathitaṃ tava śobhane 
10.88 raudraṃ caivam ato brūmi pañcāvasthā[ s] tu raudrajāḥ 
anādhītāni śāstrāṇi granthataś cārthataḥ sudhīḥ 
10.89 atītānāgataṃ sarvaṃ vartamānasya yat phalam 
raudraśaktisamāveśāt sarvam eva prapadyate 
10.90 yasyedaṃ vartate cihnaṃ raudrāveśaṃ tad ucyate 
śāmbhavena tu vedhena sarvāṇy etāni suvrate 
10.91 śuddhaśāmbhavavedhasya sāmprataṃ nirṇayaṃ śṛṇu 
yena viddhasya loke 'smin sarvajñatvaṃ prapadyate 
10.92 pūrvoktena tu kālena śodhitas tu yadā śiśuḥ 
tadā sampadyate tasya śāmbhavaṃ guṇadāyakam 
10.93 kubjīśo yaṃ yadāyātaḥ puṃso janmany apaścime 
tadā sampadyate tasya śāmbhavaṃ kubjike tanau 
10.94 bahvarthakāle 'pi viśodhitātmā ātmaiva sau paśyati sarvabhūtān 
na me samāno bhuvanāntarāle viśuddhabhāvo bhavate hy akāle 
10.95 ekaikaṃ bhuvanaṃ paśyet puṃsādau conmanāvadhim 
viśuddhatanujo hy evaṃ dehenānena cotpatet 
10.96 na kampadhunane tasya īśadghūrmiḥ pravartate 
viṣonmūrchāgatas tv evaṃ tiṣṭhate bhūtakumbhavat 
10.97 paśyate cāgrataḥ sarvaṃ tattvavrātaṃ sadoditam 
tatkṣaṇād viṣayān mucyej jīrṇakañcur yathoragaḥ 
10.98 sadānandamadonmattaḥ sarvajñaguṇabhūṣitaḥ 
śāmbhavena tu viddhasya cihnedaṃ sampravartate 
10.99 bhūtabhāvanaśaktīnāṃ mantrāveśa[ ṃ ] saraudrajam 
krameṇa śāmbhavas teṣāṃ viśuddhatvaṃ yathā yathā 
10.100 jhalajhaleti yad vedhaṃ sampūrṇaghaṭavad yathā 
bhūtāntaśaktimantrādau tathedaṃ sampracakṣyate 
10.101 gurubhaktivihīnānāṃ vañcakānāṃ yaśasvini 
pūrvaṃ śāmbhavaviddhasya bhūtādyaṃ sampravartate 

śrīkubjikā uvāca 

10.102 vedhadīkṣāparaṃ nāsti kathaṃ sā pratyayātmikā 
pratyaye sati sañjāte kathaṃ tan mokṣalakṣaṇam 

śrībhairava uvāca 

10.103 pratyaye sati mokṣo ' sti piṇḍapātena sarvathā 
viṣayeṣu na mucyeta siddhabhāvaṃ na gacchati 
10.104 śāmbhavena tu vedhena tatkṣaṇād viṣayojjhitaḥ 
viṣayojjhita-ātmā vai dehenānena cotpatet 
10.105 yena vedhena viddhasya sukhāsvādo na vidyate 
sa kathaṃ svārthanirmukto viṣayeṣu virajyate 
10.106 śāmbhave na hi samprāpte darpeṇākulitekṣaṇaḥ 
nāyakaiḥ so 'bhibhūyeta na sidhyaty adhikārakṛt 
10.107 ājñānande samutpanne na gantavyaṃ guroḥ kulāt 
kasmāt sāmarthyahetvarthaṃ yāvan notpādayed guṇān 
10.108 divā preṣaṇatanniṣṭho rātrau jñānaparigrahaḥ 
evaṃ sampādayet sarvaṃ sāmarthyaṃ tu guroḥ kule 
10.109 apreṣite na gantavyaṃ na kuryāc colbaṇādikam 
ye na kopavaśād ājñāṃ dāsyanti gamanaṃ prati 
10.110 śāmbhavājñāsamutpanne ya evaṃ kurute kudhīḥ 
tasya pīṭhādhipāḥ pālāś cābhibhūyanty anekadhā 
10.111 anuṣṭhānatapopāyair yadānandabhṛtas tanuḥ 
tadādhikāraḥ kartavyo yasyājñā tasya tatpade 
10.112 anujñāto 'bhiṣiktasya nāmamālāṃ prakāśayet 
navapañcavidhaṃ dravyaṃ pūjārthe sampradarśitam 
10.113 śubhe 'hani muhūrte ca caturdaśyāṣṭamīṣu ca 
darpaṇodarabhūbhāge vastre vātha suśobhane 
10.114 tatopari yajet siddhān sarvajñaguṇaśālinān 
caturviṃśa ṣoḍaśaivam aṣṭau caiva tripaṅktiṣu 
10.115 dvau siddhau madhyadeśe tu kuṅkumena tu cākṣataiḥ 
trihastaṃ maṇḍalaṃ kuryād ūrdhvādau pūrvapaścimam 
10.116 śṛṅgātakākṛti hy evaṃ tatra pūjāṃ samārabhet 
pūjayitvā vidhānena dravyaiḥ pañcanavādibhiḥ 
10.117 pṛthagdīpaiḥ pūjayitvā phalguṣālisugandhibhiḥ 
supraṇītaṃ subhaktaṃ ca ājñāguṇavidhāyinam 
10.118 tataḥ praveśayec chiṣyaṃ puṣpaṃ mocāpayed iti 
yasmin mārge patet puṣpaṃ tan nāma tasya dāpayet 
10.119 prakaṭaṃ śiva vijñeyaṃ guptam ānanda-m-ucyate 
akārādikṣakārāntaṃ pañcāśaguṇalakṣitam 
10.120 akṣare akṣare siddhaṃ  puṣpapātād vilakṣayet 
śrīkaṇṭhānantasūkṣmeśaṃ trimūrtir amaro 'rghinaḥ 
10.121 tithīśo bhārabhūtiś ca sthāṇunāmo haras tathā 
jhaṇṭīśo bhauktikaś caiva sadyojātas tv anugrahī 
10.122 krūrasenas tathānyo vai mahāsenas tataḥ paraḥ 
prathamādau sthitā hy ete upariṣṭād vilakṣayet 
10.123 krodhaś caṇḍaḥ pracaṇḍaś ca śivaikarudra eva ca 
kūrmaś caivaikanetraś ca caturāsyo 'vasānugaḥ 
10.124 prathamā yā sthitā paṅktiḥ pīṭhatrayavibhūṣitā 
ajeśaḥ śarma somaś ca lāṅgulīśo 'tha dārukaḥ 
10.125 ardhanāryo hy umākānto āṣāḍhī diṇḍir eva ca 
dhātrīśaś ca tathā mīno meṣo lohita-m-eva ca 
10.126 śikhīśaś chagalaṇḍaś ca dviraṇḍo madhyapaṅktigāḥ 
mahākālaś ca vālākhyo bhujaṅgākhyaḥ pinākinaḥ 
10.127 khaḍgānando bakānandaḥ śvetānandas tathaiva ca 
bhṛguś caivāntime cakre aṣṭau tāṃś ca prapūjayet 
10.128 lākulānanda madhyasthaṃ saṃvartānandasaṃyutam 
tayor madhyagatāṃ devīṃ kubjikāṃ parameśvarīm 
10.129 pūjayet pīṭhasaṃyuktāṃ pāramparyeṇa saṃyutām 
yathā siddhās tathā devyāḥ saṃhāryādi prapūjayet 
10.130 vāgeśyantāḥ krameṇaiva guruvaktraprasādataḥ 
ṣaḍāre ḍādiṣaṭkaṃ tu krameṇaiva prapūjayet 
10.131 kulāṣṭakaṃ tato bāhye aṣṭāre paṅkaje kramāt 
pañcadravyabhṛtaṃ pātraṃ tadagre sanniveśayet 
10.132 kramāmnāyaṃ punaḥ pātre kuryāt tenābhiṣecanam 
mukhena vātha kartavyaṃ yasyopari subhāvanā 
10.133 tataś cādeśayet taṃ tu kuru kāryaṃ yadṛcchayā 
adhikārapadaṃ sarvaṃ mokṣitaṃ te prasādataḥ 
10.134 tataḥ prabhṛti deveśi yogyo bhavati śāsane 
śāsanaṃ bhūṣayen nityaṃ guptācāravidhau sthitaḥ 
10.135 avyaktena tu liṅgena vyaktaliṅgena vā punaḥ 
yena liṅgena yasyedaṃ talliṅgaṃ na parityajet 
10.136 ākāśāt patitaṃ toyaṃ yathā gacchati sāgaram 
gartānadyopacāreṇa tathā sarvaṃ kulānvaye 
10.137 yāsyanti liṅginaḥ sarve niścayārtho 'nyathā na hi 
kasmāt pratyakṣarūpeṇa tatrājñā vartate yataḥ 
10.138 samudravat kulānandaṃ yasmāt tat sarvatomukham 
kulaṃ tad eva vijñeyaṃ sarvānugrahakārakam 
10.139 brāhmaṇaṃ kṣatriyaṃ vaiśyaṃ śūdraṃ prākṛtam antyajam 
mātaṅgamlecchajātyutthaṃ bauddhasāṅkhyadigambaram 
10.140 tridaṇḍamuṇḍakhaṭvāṅgamuṣalānyakriyānvitam 
yāsyanti paramaṃ śaivaṃ śaivo yāti na kutracit 
10.141 tac ca kaulabhṛtānandaṃ  netaraṃ tu kriyākulam 
sarvajñamārgavihitaṃ sarvācāraprapālakam 
10.142 kaulikācāramārgeṇa bhāvādvaitena sarvathā 
tattvādvaitena mārgeṇa sarvathā yatra saṃsthitaḥ 
10.143 pālayel laukikācāram advaitaṃ samanuṣṭhayet 
gopayed guptaliṅgāni tatpraviṣṭāni sarvathā 
10.144 adhamād uttamaṃ jñānaṃ yady arthī uttamo bhavet 
liṅgino vā dvijanmā vā ājñārthī tu na vañcayet 
10.145 ekānte vihitaṃ sarvaṃ kurvīta na janākule 
anyathā sthitibhaṅgaḥ syān naśyate śāsanaṃ priye 
10.146 varjayet kaulikān bauddhān tathā mīmāṃsakāsthitān 
kasmād bhraṣṭakriyā teṣāṃ na mokṣo naiva sādhanam 
10.147 jihvopasthanimittārtham advaitaṃ teṣu sarvathā 
kaulikācāranirmuktāḥ śvānavad vicaranti te 
10.148 nirācāraṃ prakurvanti nirācāravivarjitāḥ 
viṣaṃ bhakṣanti te mūḍhā yathājñāmantravarjitāḥ 
10.149 yady api te trikālajñās trailokyākarṣaṇakṣamāḥ 
tathāpi saṃvṛtācārāḥ pālayanti kulasthitim 
10.150 nirācāreṇa yogena paśyanti viṣayojjhitāḥ 
viṣayastho 'pahāsitvaṃ nirācāreṇa yāty asau 
10.151 bhraṣṭanaṣṭakulaṃ tyajya kulakaulaṃ samāśrayet 
tatra yogigurūṇāṃ ca pūjyate caraṇāmbujam 
10.152 samayena vinā devi samartho bhavate katham 
sāmarthyena vinā caryā nirācārātmikā bhavet 
10.153 jñātvāmnāyapadaṃ sarvaṃ yathāvasthaṃ kuleśvaram 
ṣaṭprakāravidhānena nirgatācārarūpiṇam 
10.154 sāmarthyaguṇayuktātmā viṣayātīto jitendriyaḥ 
virajo rañjitātmā vai nirācāro bhavet tu saḥ 
10.155 etat te kathitaṃ devi sarahasyaṃ sugopitam 
anyad yat te manasthaṃ tu tat pṛccha vadato mama 

iti kulālikāmnāye śrīkubjikāmate devyāsamayo nāma mantroddhāre daśamaḥ paṭalaḥ 


śrīkubjikā uvāca 

11.1 mantratantrais tvayā deva bhrāmitāhaṃ kriyādibhiḥ 
dhyānadhāraṇayogaiś ca idānīṃ kathaya sphuṭam 
11.2 pūrvatantre tvayā deva sūcitaṃ na prakāśitam 
adhunā śrotum icchāmi ṣaṭpadārthavinirṇayam 

śrībhairava uvāca 

11.3 mahānandakaraṃ vākyaṃ mahāścaryakaraṃ param 
gopitaṃ sarvadevānāṃ tathā te kathayāmy aham 
11.4 anādinidhaneśānāc chivāt paramakāraṇāt 
divyājñāyāḥ kramo jātaḥ pāramparyaughasantatiḥ 
11.5 akulaṃ ca kulaṃ caiva kulākulavinirṇayam 
adhunā kathayiṣyāmi navadhā nirṇayo yathā 
11.6 parasya paramāṃ viddhi yonim ādyāṃ mahāmbike 
rūpātītādiyogena pareccheyaṃ caturvidhā 
11.7 rūpātītaṃ tu kāmākhyaṃ rūpaṃ pūrṇagirir mahān 
padaṃ jālandharākhyaṃ tu piṇḍam oḍraṃ prakīrtitam 
11.8 antimāmṛta sūkṣmā ca susūkṣmādyaṃ catuṣṭayam 
akuleśvaradevasya sambandhaḥ prathamaḥ smṛtaḥ 
11.9 rūpātītāt paro hinduḥ śaktyādhiṣṭhita bhāsvaraḥ 
tato nādo nirodhaś ca ardhacandram anukramāt 
11.10 etat tat pañcakaṃ proktaṃ jñānaratnamahodayam 
sā yoniḥ paramā jñeyā kriyādhvānamahodadhiḥ 
11.11 bindutattvāt paro bindur makārokāra-m-eva ca 
akāras tu samākhyātaḥ ṣaṭpadārthavibhedakaḥ 
11.12 rūpāt padaṃ samutpannaṃ kālarūpaṃ ṣaḍānanam 
ṣaḍvidhādhvānayogena sṛjate saṃharanti ca 
11.13 ādhārādheyayogena ṣaṭpadārthapadena ca 
kurute vividhāṃ sṛṣṭiṃ yena tat kathyate ' dhunā 
11.14 ātmā dhārayate śaktim ātmā haṃsoparisthitaḥ 
haṃsaḥ samīraṇāntasthaḥ sa ca nāḍīpathe sthitaḥ 
11.15 nāḍyaḥ piṇḍe sakarmādyaḥ paśur māyāmalānvitāḥ 
etat ṣaṭkaṃ samākhyātaṃ kulamārgaprabodhakam 
11.16 atra jātaṃ jagat sarvaṃ kriyākāraṇagocaram 
parāc ca śāmbhavaṃ jñānaṃ vijñānānekasaṅkulam 
11.17 viśuddhir bodhajananī ṣoḍaśānta-m-adhordhvataḥ 
maṇipūraka śabdasthaṃ daśapañcāvatārakam 
11.18 sā tu māyā parā jñeyā caturyonir mahāmbike 
śabdasūtreṇa yenaitāḥ pañcāśa maṇayo mahān 
11.19 āpūritāś ca mahatā tenedaṃ maṇipūrakam 
asyādhāraṃ tu vijñeyaṃ karṇakubjaṃ mahāpuram 
11.20 vijñānaiḥ pañcadaśabhiḥ pūritaṃ bhuktimuktidam 
maṇipūrakamālāyāṃ granthir jātā caturvidhā 
11.21 maṇḍalaṃ mantravidyāś ca mudrā granthiś caturvidhā 
māyāyantrodare cānyā puṃsāṃ sṛṣṭir anāhatā 
11.22 nadate daśadhā sā tu divyānandapradāyikā 
ciṇīti prathamaṃ śabdaṃ ciñcinī tu dvitīyakam 
11.23 cīravākī tṛtīyaṃ tu śaṅkhaśabdaṃ caturthakam 
pañcamaṃ tantrinirghoṣaṃ ṣaṣṭhaṃ vaṃśaravas tathā 
11.24 saptamaṃ kaṃsatālaṃ tu meghaśabdaṃ tu cāṣṭamam 
navamaṃ dāghanirghoṣaṃ daśamaṃ dundubhisvanaḥ 
11.25 navaśabdam parityajya daśamaṃ mokṣadaṃ param 
hananena vinā yena vyāhared daśadhā ravam 
11.26 tenaivānāhataṃ jātaṃ karṇakubjād vinirgatam 
daśadhā ravate-d-evam aṣṭapattroparisthitam 
11.27 daśadhā guṇadātāraṃ ciccetāhṛdayātmakam 
pramāṇapadayogena kṣobhayitvā navān bahūn 
11.28 kalākarmasamāyogāt svādhiṣṭhānaṃ vinirmitam 
śatakoṭisuvistīrṇaṃ bhuvanānekasaṅkulam 
11.29 māyākālakalākīrṇam ādhāraṃ brahmaṇas tu tat 
catuṣkalasamopetaṃ śivaśaktisamanvitam 
11.30 ṣaṭprakāram idaṃ kubji svādhiṣṭhānaṃ pṛthak pṛthak 
ṣaṭpadārthavibhāgo 'yaṃ durlabhaḥ prakaṭīkṛtaḥ 
11.31 kriyātattvārthanirdeśaṃ kubjike 'nyatra gopitam 
kulākulam idaṃ ṣaṭkam uttaraṃ te prakāśitam 
11.32 dakṣiṇasyāpi ṣaṭkasya sāmprataṃ nirṇayaṃ śṛṇu 
maṇipūrakadevasya tat tejo bhāsvaras tu yaḥ 
11.33 tatra tad dakṣiṇaṃ ṣaṭkam ājñāpūrvaṃ kulodbhavam 
sṛṣṭimārgakramāyātaṃ śivaśakteḥ kulākulam 
11.34 saṃhārapadaṣaṭkasya kulaṃ śaktyāntadakṣiṇam 
gudam ādhāram ity uktaṃ svādhiṣṭhānaṃ tu liṅgajam 
11.35 maṇipūraka nābhisthaṃ hṛdisthaṃ ca anāhatam 
viśuddhiḥ kaṇṭhadeśe tu ājñā netradvayāntare 
11.36 viśuddhiḥ ṣoḍaśair bhedair daśadhā tu anāhatam 
maṇipūraka vijñeyaṃ bhedair dvādaśabhiḥ sthitam 
11.37 anekārthaguṇādhāraṃ  svādhiṣṭhānaṃ tu ṣaṭkalam 
catuṣkalaṃ tu ādhāram ājñābhedadvayaṃ viduḥ 

śrīkubjikā uvāca 

11.38 ājñābhedadvayaṃ nātha kathaṃ tat parameśvara 
ācacakṣva prayatnena yena bhrāntir vinaśyati 

śrībhairava uvāca 

11.39 lakṣavārasahasrais tu vāraṃ vāraṃ punaḥ punaḥ 
eṣa sāṅketiko hy arthaḥ kathyamānaṃ na budhyasi 
11.40 śāmbhavaṃ kathitaṃ jñānaṃ sṛṣṭimārgeṇa śaktigam 
icchāśaktisamāyuktam uttaraṃ te prakāśitam 
11.41 icchājñānaṃ parityajya śambhur atrāpi dakṣiṇam 
kriyāśaktir adhobhāge saṃyogāt pratyayāyate 
11.42 ūrdhvaśaktinipātena adhaḥśaktinikuñcanāt 
kurute vividhāṃ sṛṣṭim anekākārarūpiṇīm 
11.43 na śivena vinā śaktir na śivaḥ śaktivarjitaḥ 
kriyātattvasya mārgo 'yaṃ parecchādhvaṃ tu kevalam 
11.44 uttarasya tu mārgasya yac chatuṣkaṃ susūkṣmagam 
kṣobhitaṃ tena cātmānaṃ punaḥ ṣoḍaśadhā kṛtam 
11.45 viśuddhaṃ paratattvāntaṃ tenātmānaṃ visarpitam 
catustriṃśatibhedena tasmān 'nekavidhākṛtiḥ 
11.46 sapratyayaguṇādhāram avasthāguṇadāyakam 
lakṣyate yena suśroṇi tac chṛṇuṣva yathārthataḥ 
11.47 muktāphalanibhākāraṃ kvacij jvālācalācalam 
kvacin markaṭijālābhaṃ mṛgatṛṣṇeva cāpalam 
11.48 rūpātītaṃ ca rūpaṃ ca padapiṇḍaṃ caturvidham 
viśuddhatanudevasya ādyabhedaṃ catuṣṭayam 
11.49 sarahasyaṃ prabuddhānāṃ kṣubdhānāṃ tu kriyādhvare 
tasmāt pīṭhacatuṣkaṃ tu sañjātaṃ tu kulākulam 
11.50 kalābhṛttanudevasya kailāsoparisaṃsthitam 
madhyadeśe tu randhrasthaṃ śrīmadoḍrakuleśvaram 
11.51 prathamaṃ pītavarṇaṃ tu saśailavanakānanam 
vanopavanasaṃyuktaṃ hemaprākāramaṇḍitam 
11.52 nadīnadasamākīrṇam anekārthasamākulam 
sarvabījasamākīrṇaṃ caturasraṃ samantataḥ 
11.53 vajrārgalasamopetaṃ vajrahastā tu mālinī 
tatrādhipatyayogena pīṭhapīṭheśvarīyutam 
11.54 tasyaiva dakṣiṇe koṇe candrābhaṃ candravarcasam 
ardhacandra purākāraṃ  sari tsarasamākulam 
11.55 jalakallolagambhīraṃ ṣaḍrasārṇavasaṅkulam 
vīcītaraṅgakallolais taṭāsphālanabhīṣaṇaiḥ 
11.56 tattvanāthoparisthaṃ tu puraṃ tat pārameśvaram 
himacandraśilābhiś ca samantān nicitaṃ tu tam 
11.57 prākāreṇa vicitreṇa gopurāṭṭālaśobhitam 
anekaguṇasañchannam anekāścaryasaṅkulam 
11.58 tatra tattveśvaraṃ devaṃ devyādhiṣṭhitavigraham 
śyāmavarṇaṃ sutejāḍhyaṃ pāśahastaṃ sulocanam 
11.59 ādhāraṃ sarvasṛṣṭes tu mahāpīṭhoparisthitam 
kailāsadakṣiṇe śṛṅge anekaguṇasaṅkulam 
11.60 śrīmajjālandharaṃ pīṭhaṃ tatrasthaṃ lakṣayet priye 
kailāsasyottare śṛṅge anekārcisamākulam 
11.61 grasantam iva trailokyaṃ sūryakoṭisamaprabham 
piṅgalaṃ dahanāvasthaṃ lelihānaṃ sudāruṇam 
11.62 mamāpi devi duṣprekṣyaṃ kiṃ punas tv itarair janaiḥ 
trikoṇapuramadhyasthaṃ vajraprākāramaṇḍitam 
11.63 vajrastambhamayaṃ divyaṃ puraṃ vai pārameśvaram 
kālāgnigopurāṭṭālaṃ samantāt pariveṣṭitam 
11.64 bahurūpasamākīrṇaṃ vidyāguṇavibhūṣitam 
anekāścaryasampannaṃ jīvabhūtaṃ jagattraye 
11.65 āpūritam idaṃ yena tena tat pūrṇasaṃjñitam 
saptajihvāsamopetaṃ kālarūpaṃ ṣaḍānanam 
11.66 pūrṇamāyā samāyuktaṃ sāñjanaṃ cārurūpiṇam 
śaktihastaṃ mahāvīryaṃ sṛṣṭisaṃhārakārakam 
11.67 napuṃsakaguṇāntasthaṃ vyāptibhūtaṃ vinirgatam 
madhyapīṭhasya pūrveṇa cāgraśṛṅge vyavasthitam 
11.68 padminīdalasaṅkāśaṃ dhūmravat tāmravarcasam 
mahāpracaṇḍadaṇḍaughaiḥ sphālanollālalālasaiḥ 
11.69 dhūyamānaṃ samantāt tu śoṣayantaṃ carācaram 
ṣaḍasramaṇḍalāntasthaṃ sarvavyāpikuleśvaram 
11.70 na tena rahitaṃ kiñcit sṛṣṭisaṃhāragocare 
indranīlanibhaiḥ stambhaiḥ samantān nicitaṃ puram 
11.71 prākāragopurāṭṭālaṃ dhvajāekuśadhanurdharam 
pañcabāṇadharaṃ devaṃ kāmadevyā samanvitam 
11.72 drāvayantaṃ jagat sarvaṃ śrutirūpaṃ tanūjjhitam 
caturdaśavidhasyāpi nāyako daṇḍadhārakaḥ 
11.73 tasyecchāpreritaṃ sarvaṃ kāmādyaṃ sampravartate 
tenedaṃ cāgrakoṭisthaṃ manonmanyordhvasaṃsthitam 
11.74 strīpuṃnapuṃsake dve tu pīṭhavyāptau pare viduḥ l 
kāmena kṣubhitaṃ tattvaṃ sthāṇusaṃjñā manonmanam 
11.75 manonmanena samanaṃ dvāv etau tu napuṃsakau 
puṭarūpau samākhyātau tasmān 'nyo vyāpinaḥ paraḥ 
11.76 sā tu māyā parā devī durbhedyā cākṣayāvyayā 
vyāpinī sarvatattvānām ātmādau tv apare 'dhvani 
11.77 māyaiva sā ṣaḍadhvasya ṣaṭtriṃśānāṃ viśeṣataḥ 
yayā vibhajya cātmānaṃ svarūpe cādhvanirmitam 
11.78 ardhakoṭyā adhaḥsthāne nādāntaṃ sanniveśitam 
unmanaḥ samanaś caiva vyāpino dhvanir eva ca 
11.79 pīṭhacatuṣkam etat tu sa evānyonyataḥ kramāt 
dhvaner nādaḥ samutpannaḥ sa cānekavidhaḥ sthitaḥ 
11.80 sūkṣmaś caiva susūkṣmaś ca vyaktāvyakto 'tha kṛtrimaḥ 
ātmano 'py ardhakoṭyante adhaḥsthāne niveśitaḥ 
11.81 tasmāt sa kurute sṛṣṭim anekākārarūpiṇīm 
sūkṣmanādo guhāvāsī kālāgnau tu susūkṣmagaḥ 
11.82 svasthānasthas tu avyaktaḥ padānte vyakta-m-āśritaḥ 
kṛtrimaś caiva saṃyogāt sa cākāśe vyavasthitaḥ 
11.83 tasmād akṣarasantānaṃ vāgvilāsaṃ pravartate 
tena saṅkṣobhya cātmānaṃ avyaktāvyaktarūpiṇam 
11.84 nirodhitaṃ tu tenedaṃ sūkṣmabhāvasya sambhavaḥ 
tena nairodhikaṃ nāma golākāraṃ vyavasthitam 
11.85 ātmalagnasvarūpeṇa pratimūrti dvitīyakam 
tena saṅkṣobhya cātmānam ardhacandravinirmitam 
11.86 sravantam amṛtaṃ divyaṃ sarvasya jagataḥ sthitam 
tasya samplāvanātyarthaṃ visargābhiratas tu yaḥ 
11.87 tatrādityaṃ samutpannaṃ varṇānāṃ prabhum īśvaram 
bindurūpaṃ jagannāthaṃ kriyākālaguṇottaram 
11.88 varṇasṛṣṭes tu kartāraṃ dedīpyantaṃ suvarcasam 
unmanādicatuṣkasya sañjātedaṃ catuṣkalam 
11.89 kṣubhitaṃ kramayogena viśuddhatanu śāmbhavam 
sthitaṃ ṣoḍaśabhedena catuṣkena pṛthak pṛthak 
11.90 kulātītaśarīrasya piṇḍam ādyaṃ catuṣkalam 
dvādaśāṅgaṃ kuleśasya mastake saṃvyavasthitam 
11.91 catuṣkalaṃ dvitīyaṃ tu pīṭharūpaṃ jagāmbike 
nādāntordhvaṃ tu māyādyaṃ vijñeyaṃ tu puṭatrayam 
11.92 lalāṭordhvaṃ kuleśasya jñātavyaṃ tu kuleśvari 
tadadhaḥ pañcadhā nādaṃ kṛtrimaṃ mukhamaṇḍale 
11.93 nirodhaṃ tatsamaṃ jñeyaṃ candrasūryaṃ tatodare 
evaṃ viśuddhadevena ṣoḍaśāvayavaṃ tanum 
11.94 akuleśakuleśānaṃ vibhajya ca niveśitam 
atra yogābhipannānām avasthāṃ śṛṇu bhāvini 
11.95 romāñcaś cāśrupātaś ca viṣuvaṃ candradarśanam 
pipīlikāparaḥ sparśaḥ sūryaṃ rātrau ca paśyati 
11.96 utpated gaganāmbhobhiḥ śabdān muñcati dāruṇān 
vāgīśatvaṃ prapadyeta kiṃ tv abaddhapralāpinaḥ 
11.97 kṣobhaḥ kṣudhājayo nidrā unmanatvaṃ kṣanāt kṣanāt 
sugandhaś ca sudīptaś ca vācāsiddhiḥ pravartate 
11.98 ṣoḍaśaite mahāvasthāḥ pratyakṣānubhaved yadi 
tadā tena tu dehena khecarīkulanandanaḥ 
11.99 etat te sarahasyaṃ tu viśuddhaṃ kathitaṃ mayā 
idānīṃ śṛṇu kalyāṇi yathāvastham anāhatam 
11.100 kaṇṭhādhastāt kuleśasya udarordhvam avasthitam 
krodhaśarmādibhiḥ siddhaiś cakravartidaśānvitaḥ 
11.101 ekarudraḥ suśarmā ca granthau nāle vyavasthitaḥ 
krodhājeśādayaḥ siddhāś cakravartidale sthitāḥ 
11.102 pūrveśagocarāntās te madhye devaḥ sadāśivaḥ 
cāroccāravicāraiś ca ebhiḥ sārdhaṃ ramet tu saḥ 
11.103 rājyakrīḍām athordhve ca saṃhārātmā jagattrayam 
māṃsādapiśunatvena hy abhilāṣo ' dhunā punaḥ 
11.104 āpyāyitamano hṛṣṭas tuṣṭacittas tu vatsalaḥ 
pṛthvīṃ bhramāmi nikhilāṃ vrajāmo girigahvaram 
11.105 dravyam āvarjayām āsa vilasāmo dadāmy aham 
paraṃ vairāgyam āpanno mokṣānveṣaṇatatparaḥ 
11.106 gurum anveṣayiṣyāmi yena bhūyo na sambhavaḥ 
sandhinālāntarastho 'sau pātālam anukāṅkṣati 
11.107 divyasiddho bhaviṣyāmaḥ krīḍāmaḥ kāminījanaiḥ 
madhyadeśāntarastho 'sau na kiñcid api cintayet 
11.108 sukhāvastho jitakrodhaḥ sattvāvastho jitendriyaḥ 
tiṣṭhate 'nāhato devaś cakravartyaṣṭakair vṛtaḥ 
11.109 daśadhāvasthite cakre bhāvābhāvasamanvitaḥ 
guruvaktragato devaś cakravartisamanvitaḥ 
11.110 svabhāvaguṇasaṃyuktaṃ cintayantopadeśataḥ 
abhyasantasya deveśi avasthāḥ sambhavanti hi 
11.111 puṃso bhedena jāyante sāttvarājasatāmasāḥ 
uttamo madhyamaś ceti kanyasas tu tṛtīyakaḥ 
11.112 kanyase tāmasāvasthā rājasā sāttvikā punaḥ 
madhyame rajasā yuktaṃ sattvāvasthāditottamaḥ 
11.113 yāś ca tāḥ śṛṇu kalyāṇi yeṣu yogasya sādhanam 
tamo moho rajaḥ śokaś catuṣkaṃ kanyasādikam 
11.114 lolupā rāgavatyā ca kāmukā cāpalāyinī 
madhyamādiṣv avasthaitāḥ kanyase tu dvitīyakā 
11.115 prabhāvatī sutārā ca bimbā bimbakhageśvarī 
jyeṣṭhādimadhyame dvisthā tristhā kanyasagocare 
11.116 udayanti kramā hy etāḥ samādhiviṣaye sthitāḥ 
antimaikā dvimadhyasthā tridhāvasthā tu kanyase 
11.117 kiṃ tu jyeṣṭhacatuṣkasya dve 'vasthā na bhavanti hi 

iti kulālikāmnāye śrīkubjikāmate ṣaṭprakāranirṇayo nāma
ekādaśamaḥ paṭalaḥ 


śrīkubjikā uvāca 

12.1 kuleśānām avasthānāṃ lakṣaṇaṃ vada bhairava 
yena vai 'nāhataṃ devaṃ jānīmaḥ parameśvara 

śrībhairava uvāca 

12.2 kathayāmi varārohe pratyayaṃ tu salakṣaṇam 
tām avijñāya bhraṣṭatvam avaśyaṃ hitakāriṇi 
12.3 akramājñā bhaved yeṣāṃ rabhasājñā prakāśitā 
sāmarthyato 'tha dayayā uktakālād avāntare 
12.4 tāmasās te samākhyātās tamo'vasthāntarānvitāḥ 
samayāni na manyante gurvājñālopakārakāḥ 
12.5 kalidvandvapriyā nityaṃ chidrānveṣaṇatatparāḥ 
guropavādaniratā nirapekṣā muhur muhuḥ 
12.6 apavādaṃ ruṣitvā tu guror yānti parāṅmukhāḥ 
yenāsau nidhanaṃ yāti tat karoti tamo'nvitaḥ 
12.7 mohāviṣṭo na jānāti ātmasambhāvitaḥ kudhīḥ 
ahaṅkāratamolubdhaḥ pūrvajātim anusmaret 
12.8 guruṃ vicārayitvā tu śokenāntaritātmanaḥ 
prayāti gṛhasāyojyaṃ tamenākulitekṣaṇaḥ 
12.9 tenādhamapadaṃ yāti jīvann eva mṛtas tu saḥ 
buddhimanto mahāprājñaḥ svāgamārthaviśāradaḥ 
12.10 tataḥ kṣamāpayen nāthaṃ tadvidāmnāyapūjanam 
trisaptakaṃ tu maunena sarvopaskaraṇaiḥ saha 
12.11 avasthāś copaśāmyante tamo 'vasthācatuṣṭayam 
lolupādau tu catvāri kramād dhy evaṃ vyapohayet 
12.12 māyayā bhṛtacittas tu dāsatvena tu rañjayet 
uktakālārdhamānena rañjito 'nugrahed guruḥ 
12.13 tīvratve 'pi hi sañjāte mandatvaṃ sampravartate 
upadeśopacāreṇa avasthālakṣaṇaṃ bhavet 
12.14 rājaso 'yaṃ samākhyātaś cāhaṅkāraguṇānvitaḥ 
paṇḍito 'haṃ subhakto 'haṃ vaktāhaṃ bodhako hy aham 
12.15 jñānino 'haṃ samartho 'haṃ vayaṃ sarvaguṇeśvarāḥ 
karoti guruṇā sārdhaṃ vādam ajñānacetasaḥ 
12.16 idaṃ tattvam idaṃ tattvam āgamoktaṃ na jānatha 
evaṃ 'sau rajasālipto yady ātmānaṃ na saṃsmaret 
12.17 tadāvasthācatuṣkeṇa lolupādyena gṛhyate 
parastriyaṃ hasen nityaṃ dhāvayitvā vilagyate 
12.18 sa śṛṅgārī madasrāvī nit yam evaṃ gajo yathā 
ātmānaṃ vikrayitvā tu madyamāṃsaṃ samācaret 
12.19 viveko yadi cittasthas tadārādhyaṃ samāśrayet 
atha cet pūrvavihitāṃ kramapūjāṃ samācaret 
12.20 madhyamasya tataḥ paścād avasthā śubhadāyikā 
uttamaṃ parayā bhaktyā āviṣṭas tu sadā guroḥ 
12.21 uktakālena cādeśānugrahaḥ samprapāditaḥ 
triśuddhāntarabhāvena yasya bhāvo na cānyathā 
12.22 tasya caivottare mārge dakṣiṇāmnāyapūrvakam 
vindate nikhilaṃ jñānaṃ nirahaṅkārī dṛḍhavrataḥ 
12.23 udayanti śubhāvasthāḥ prabhāvatyāditaḥ kramāt 
ṣaṭkamārgeti yāḥ proktāḥ śubhās tāś codayanti vai 
12.24 prabhābhirañjitātmā vai paśyate bhuvanatrayam 
tārakāntastham ātmānaṃ dedīpyantaṃ suvarcasam 
12.25 candrarūpaṃ yadā paśyet tārāmaṇḍalamadhyataḥ 
tārāvatī tu sā proktā avasthā siddhidāyikā 
12.26 abhyasyantaḥ svarūpeṇa samādhisthaḥ prapaśyati 
ātmabimbapurasthaṃ tu bimbā sāvaśyasiddhidā 
12.27 samādhisthaḥ svabimbaṃ tu āsanena samanvitam 
utpatantaṃ yadā paśyet tadā sā bimbakhecarī 
12.28 dṛṣṭvaitāṃ tu mahāvasthāṃ siddhe[r] bhrāntiṃ na kārayet 
avaśyaṃ yāti khecakre hy uktakālaṃ kuleśvari 
12.29 eṣāvasthā samāsādya daśāvasthā[s] tyajet punaḥ 
guṇān utpādayitvā tu anāhatapadaṃ vrajet 
12.30 athānyat paramaṃ vakṣYe maṇipūraṃ yathā sthitam 
tathā tvaṃ śṛṇu kalyāṇi kalyāṇānandavardhanam 
12.31 sthitaṃ dvādaśabhedena someśādau śikhāntikam 
nābhyudaranitamborujaṅghāṅghrīm anukramāt 
12.32 kulanāthamaheśasya saṃsthito maṇipūrakaḥ 
tanucakre samāvṛtya yathāvasthaṃ tathā śṛṇu 
12.33 someśodarasaṃsthaṃ tu dvādaśārcisamanvitam 
dvīpakṣetrasamāyuktaṃ tad evānyān vilakṣayet 
12.34 lāṅgalī dakṣiṇe kukṣau vāme dārukajaṃ vibhum 
ardhanārīśvaraṃ nābhau svacakraparivāritam 
12.35 dakṣiṇena hy umākāntaṃ nitambe vāmato 'ṣaḍhim 
ḍiṇḍitriyugalorubhyāṃ jānubhyāṃ mīnameṣakau 
12.36 lohitākhyaṃ śikhīnāthaṃ dakṣādau vāmam āśritau 
pīṭhanāthaṃ tathā kṣetraṃ dvīpaṃ dvīpādhipaiḥ saha 
12.37 maṇivad dyotayantaṃ tu pūrayantaṃ diśo daśa 
sūryakāntimaṇiprakhyaṃ bhāskareva prapaśyate 
12.38 kālasaṅkhyākaraṃ devaṃ kalair dvādaśabhir yutam 
pīṭhanāthaṃ tu dvīpasthaṃ māsamāsāditaḥ kramāt 
12.39 pūrayed varṣasantānaṃ yugamanvantarāṇi ca 
kalpaṃ ceti mahākalpaṃ maṇidvādaśabhiḥ khilam 
12.40 yataḥ pūrayed viśvātmā tenedaṃ maṇipūrakam 
śaktimārgaprapannānāṃ bhuktimuktiphalapradam 
12.41 ekaikaṃ cintayec cakraṃ nāthājñā hy upadeśataḥ 
bhavanti sarvasiddhīni uttamādhamamadhyamāḥ 
12.42 maṇipūraka pādasthaṃ pīṭheśvarasamanvitam 
dvīpadvīpādhipair yuktaṃ māsam ekaṃ yadābhyaset 
12.43 pādacāri jagat sarvaṃ kṣobhayed avicārataḥ 
pūjādhyānasamādhisthaḥ śaktimārgeṇa yogavit 
12.44 ṣaṇmāsena avaśyaṃ hi vatsarāntaṃ na saṃśayaḥ 
anyac chīghragatis tasya ātmanaḥ sampravartate 
12.45 pāduke pādalepaṃ vā manovegaḥ prajāyate 
evaṃ jānuni abhyāsād bhūtavetālanayakaḥ 
12.46 kurute vividhāścaryaṃ kalpasthāyī bhavet tu saḥ 
ātmavanto mahotsāha ūrubhyāṃ urageśvaraḥ 
12.47 kiṃ tu taddviguṇenaiva kālena prathamāditaḥ 
krameṇa sidhyate sarvam ādyantena vilakṣayet 
12.48 nitambābhyāsayogena guhyakānāṃ patir bhavet 
yakṣavidyādharāṇaṃ ca pretapaiśācarākṣasām 
12.49 krīḍate nāyako bhūtvā pūrvamārgavidhau sthitaḥ 
kukṣimārgagate cakre abhyasantaḥ śriyaṃ labhet 
12.50 kinnarendra sagandharvo lokālokeṣu pūjyate 
vāyuvad bhramate so hi sarvatraivam aśaṅkitaḥ 
12.51 madhyanābhigate cakre mūlameḍhre yadābhyaset 
śāntipuṣṭivaśākarṣaṃ sarvajñatvaṃ pṛthuśriyam 
12.52 sakṛtsaṃsmaraṇād evam abhyasantaḥ khageśvaraḥ 
brahmāṇḍāntaraniḥśeṣaṃ bhramate kāmarūpiṇaḥ 
12.53 sāṅkhyajñānavido bhūtvā vicaret svapuraṃ punah 
atha spaṣṭataraṃ devi śaktityāgaṃ śṛṇuṣva me 
12.54 yad etat paramaṃ bījaṃ haṃsākhyaṃ hṛdi saṃsthitam 
vinā tenopalabdhiṃ ca na jānāti kadācana 
12.55 tasya rūpatrayaṃ bhadre nādaṃ saṃyogam eva ca 
viyogaṃ ceti suśroṇi lakṣaṇīyaṃ prayatnataḥ 
12.56 caitanyatritayaṃ cātra ātmaśaktiśivātmakam 
avinābhāvayogena caitanyatritayasthitam 
12.57 tenopacaryate bhadre haṃsadevaḥ parāparaḥ 
saṅkoce tu parā śaktir vikāse bhairavaḥ smṛtaḥ 
12.58 madhye ātmā sadā tiṣṭhet pūryaṣṭakasamanvitaḥ 
vikāsaś cordhvanāḍis tu saṅkoco'dhaḥ prakīrtitaḥ 
12.59 madhye nābhir iti proktas trayam etat sudurlabham 
ūrdhvanāḍīnirodhena adhonāḍīnikuñcanāt 
12.60 madhye cittaṃ samādāya mathanaṃ tatra kārayet 
yonimadhyagataṃ liṅgaṃ yonyodarapuṭīkṛtam 
12.61 tanmadhye cātmano rūpaṃ lakṣayeta punaḥ punaḥ 
mathanaṃ hy etad ākhyātam ajñānamalanāśanam 
12.62 madhyamanthānayogena jñānāgnir jvalate kila 
jvalite tu tadā vahnau jyotir evaṃ pravardhate 
12.63 pravardhanān mahājyoter ānandam upajāyate 
mathanād bhagaliṅgābhyāṃ yathānandaḥ prajāyate 
12.64 mathanāc chivaśaktyos tu tathānandaḥ prajāyate 
niścayatvaṃ bhaved devi śivaśaktyor abhedataḥ 
12.65 mathanaṃ hy etad evoktam amṛtotpādakaṃ priye 
tenāmṛtena cātmānaṃ plāvyamānaṃ vicintayet 
12.66 eṣā sā paramā vṛttiḥ paratattvam idaṃ smṛtam 
etat tat paramaṃ brahma paramānandalakṣaṇam 
12.67 tad ānandaparānandaṃ śaktityāgam iti smṛtam 
eṣa te maṇipūras tu sarahasyaṃ prakāśitam 
12.68 gopitaṃ pūrvatantreṣu kubji tubhyaṃ prakāśitam 
dvīpamārgavibhāgena pīṭhanāthakrameṇa tu 
12.69 durlabhaṃ siddhamārgasya kiṃ punas tv itareṣu ca 
uktakālena sidhyanti avaśyaṃ nānṛtaṃ vacaḥ 
12.70 śṛṇu devi yathāvasthaṃ svādhiṣṭhānaṃ vadāmi te 
kalākalitadehasya yathāsthānaṃ nigadyate 
12.71 pūrvam ekārṇave ghore tamobhūte jagattraye 
liṅgarūpadharaś cāhaṃ parecchāvaśavartinaḥ 
12.72 ṣaṇmukhaḥ kālarūpo 'haṃ liṅgākāro vyavasthitaḥ 
ṣaṭkalābhir vṛto nityaṃ viśvamadhye ramāmy aham 
12.73 ṣaṭkauṣikena yukto 'haṃ piṇḍo 'haṃ 'naṅgavarcasaḥ 
tataḥ pravartitā sṛṣṭir mamecchā tu punaḥ priye 
12.74 brahmaviṣṇvādibhiḥ siddhaiḥ pūjitārādhita[ḥ] stutaḥ 
tato 'haṃ varam āpannas teṣu bhāvānuvartinām 
12.75 ṣaḍasraṃ caturasraṃ tu ātmānaṃ ca samarpitam 
tena te kāraṇatvena sṛṣṭikṛt kāraṇeśvarāḥ 
12.76 hartā kartā svatantrās te madrūpaguṇacetasaḥ 
punaḥ stotraṃ samārabdhaṃ tais tu nāthaiḥ punar hy ah am 
12.77 yāvan 'nekavidhānena tāvat teṣāṃ varapradaḥ 
punaḥ santoṣito 'tīva varaṃ prārthaya puṣkalam 
12.78 tair uktaṃ devadeveśa liṅgedaṃ sarvatomukham 
yena pūjyo bhavāmīha tad varaṃ dada me prabho 
12.79 asya liṅgasya māhātmyaṃ vyāptibhūtaṃ yathāsthitam 
tathā kuru maheśāna jānīmo niścayaṃ yathā 
12.80 tatas teṣāṃ mahādevi vyāptimārga[ḥ] pradarśitaḥ 
vyaktaliṅgaṃ kṛtaṃ paścāt ṣaḍadhvaguṇagocaram 
12.81 ṣaḍadhvaropadeśena tanus teṣāṃ pradarśitā 
dviraṇḍena kṛtaṃ dehaṃ śeṣā vaktrāṇi cordhvataḥ 
12.82 vāmādikramayogena sañjātāni vidur budhāḥ 
chagalaṇḍottaraṃ vaktraṃ mahākālordhvataḥ sthitaḥ 
12.83 vālivaktraṃ bhavet pūrvaṃ puruṣaṃ jīvarūpiṇam 
bhujaṅgaṃ dakṣine krūraṃ nāgarūpaṃ mahadbhutam 
12.84 paścimaṃ tu pinākākhyaṃ nivṛttisthaṃ niyāmakam 
avidyākhyaṃ purā proktaṃ kṣaṇadhvaṃsīvināśakam 
12.85 atra madhye trayaṃ śreṣṭham avināśākṣayāvyayam 
māyā śambhuś ca puruṣaṃ kṣīYate na kadācana 
12.86 pañcavaktratanūdbhūtaṃ ṣaṭkauṣakulasambhavam 
teṣāṃ pradarśitaṃ rūpaṃ kalādhvaṃ kulanāyakam 
12.87 sādhito 'haṃ tvayā viṣṇo niścalenāntarātmanā 
bhāvādhiṣṭhānayogena tenedaṃ darśitaṃ mayā 
12.88 svādhiṣṭhānaṃ paraṃ yogaṃ praviśya mama sarvathā 
liṅgaṃ praviśya medhāvī yena pūjyo bhaviṣyasi 

iti kulālikāmnāye śrīkubjikāmate ṣaṭprakārādhikārārṇavo nāma dvādaśamaḥ paṭalaḥ 


śrībhairava uvāca 

13.1 evaṃ devi mayāsau tu pūrvaṃ cakradharaḥ sudhīḥ 
liṅge svādhiṣṭhito yena svādhiṣṭhānaṃ tu tena vai 
13.2 māyāśāmbhavasaṃsthānaṃ kalādhiṣṭhānaśāsanam 
puruṣāṇusamāyuktaṃ svādhiṣṭhānam ato 'rthataḥ 
13.3 rāgeṇa rañjitātmā vai niyatyā yo niyāmitaḥ 
avidyāprerito gacchet svargaṃ vā svabhram eva vā 
13.4 tritayaṃ śubham uddiṣṭam aśubhaṃ tu tathā trikam 
ṣaṭkauṣikam idaṃ sthānaṃ vyāptibhūtaṃ mayā tava 
13.5 śakte yaṃ tu samākhyātaṃ śāmbhavaṃ paratottare 
kathayiṣyāmi suśroṇi idānīṃ pratyayaṃ śṛṇu 
13.6 sādhanaṃ lokavikhyātaṃ ṣaṭsiddhādhiṣṭhitaṃ tu tat 
svādhiṣṭhānaṃ tu liṅgasthaṃ yathā sthānagataṃ śṛṇu 
13.7 dviraṇḍena tanus tasya chagalaṇḍāditaḥ kramāt 
yatra sthāne sthitā māyā mahākāla mukhāgrataḥ 
13.8 vālīśvaraṃ tu randhrasthaṃ bhujaṅga maṇimastake 
pinākinaṃ tu sīmanyāṃ saṃsthitaṃ tu niyāmakam 
13.9 atra yogaṃ pravakṣyāmi yogināṃ śubhadāyakam 
yena paśyanti taṃ liṅgaṃ pūrvoktaṃ guṇaśālinam 
13.10 dvīpadvīpeśvaraṃ nāthaṃ dvādaśārcisamanvitam 
māsamāsāvadhī 'kaikam abhyasanto guṇān labhet 
13.11 yuñjantaḥ śriyam āpnoti ṣaḍrasāsvādanaṃ kramāt 
kaṭutiktakaṣāyāmlaṃ kṣāraś ca madhurāvadhi 
13.12 nāthaṃ dvīpas tu dvīpārci dvīpādikramasaṃyutam 
dhyānasthānasamāyogāt tan nāsti yan na sādhayet 
13.13 ṣaḍvaktraṃ cintyam ātmānaṃ devīṃ ca guṇalālasām 
mukhena mukham ālagnaṃ hy ātmaliṅgoparisthitam 
13.14 bhāvānandarasālāḍhyaṃ helādolair vyavasthitam 
liṅgarandhraṃ tu randhrasthaṃ tena mārgeṇa cābhyaset 
13.15 vidyujjyotilatākāraṃ vaktramaṇḍalaniḥsṛtam 
tasya vai hy ātmanaḥ paścāt nit yam eva samabhyaset 
13.16 ṣaṇmāsena varārohe sphoṭayet parvatān api 
dvitīye 'naṅgarūpo 'sau kṣobhayeta varāṅganām 
13.17 tatsthāne tiryagālokāt kiṃ tu raktāruṇena tu 
martyajān khecarān yakṣān rakṣaḥpaiśācagocarān 
13.18 kṣobhayed dhāṭakīśasya puraṃ sādhakapuṅgavaḥ 
tatraiva brahmayogena cakrāvartena cakṣuṣā 
13.19 karṣayen nikhilān sarvān phalapuṣpāditaḥ kramāt 
martyalokāditaḥ kṛtvā pātālasvargasaṃsthitān 
13.20 tṛtīyena tu yogena caturthaṃ stambhane kṣamaḥ 
kiṃ tu pītena tattvākṣaś cakṣuṣā paripūrṇadhīḥ 
13.21 stambhayed gaganāmbhobhir vimānapavanau mahān 
nāvāgati gajānāṃ ca vājicaurāripannagān 
13.22 pañcamena tu yogena tatrasthaḥ kṛṣṇamaṇḍale 
mārayed yasya kruddho 'sau yaḥ kruddho mriyate tu saḥ 
13.23 sa devāsuratrailokyaṃ dvipadaṃ vā catuṣpadam 
caturdaśavidhasyāpi kruddhaḥ saṃharaṇe kṣamaḥ 
13.24 ṣaṣṭham ūrdhvaparaṃ sthānaṃ brahmadvāreti kīrtitam 
aprasiddhena mārgeṇa helādolaikatatparaḥ 
13.25 vidyullatāchaṭāṭopaṃ vāraṃ vāraṃ muhur muhuḥ 
abhyased yāva yogeśi tāvad ānandatāṃ vrajet 
13.26 tyajet svābhāvikaṃ sarvaṃ saṃsārapathagocaram 
niḥsaṃjño mṛtavad yogī kāṣṭhavad upalakṣyate 
13.27 sāttvikaṃ rājasaṃ bhāvaṃ tāmasaṃ tu yadā bhavet 
trayāvasthagato yogī pūrvaliṅgasamo bhavet 
13.28 pūjyate sa suraiḥ sarvaiḥ khecarasthair na cāparaiḥ 
ṣaṭprakāram idaṃ liṅgaṃ yo jānāti sa tattvavit 
13.29 etat te kathitaṃ sarvaṃ sarahasyaṃ sugopitam 
na deyaṃ duṣṭabuddhīnāṃ jñānacaureṣu śāsanam 
13.30 yāvan na sarvabhāvena kāyakleśasahā narāḥ 
tataś cedaṃ pradātavyam anyāyān narakaṃ vrajet 
13.31 etat kuleśvaraṃ liṅgaṃ pralayotpattikārakam 
yo jānāti varārohe sa siddho hy atra śāsane 
13.32 tasmālliṅgaṃ na nindeta yāvat tāvat tanau sthitam 
sarveṣāṃ vidyate hy etat kalpanā hy atra kāraṇam 
13.33 dvipadaṃ martyajaṃ liṅgaṃ raupyahemamaṇirmayam 
mantramūrtikuleśānam āvāhyāpy atra ropitam 
13.34 svādhiṣṭhānaṃ tu tat tasya pūjanāt tat padaṃ labhet 
prathamaṃ na hi sarvasya sarvajñatvaṃ prapadyate 
13.35 tasmān na nindayelliṅgaṃ tanmūrtiguṇaśālinam 
sarvajñatve 'pi samprāpte samayān samprapālayet 
13.36 tamorajaḥpraviṣṭānām ahaṅkāravaśānugām 
na teṣāṃ sādhanaṃ siddhir jāyate patanaṃ punaḥ 
13.37 śrīkuleśvaradevasya liṅgādhāraṃ śṛṇu priye 
vṛttākāraṃ sarandhraṃ tu caturasraṃ prakīrtitam 
13.38 trirandhravalayākāraṃ śṛṅgāṭākṛtivarcasam 
piṇḍikopariliṅgasya jagadyonir mahāmbike 
13.39 catuṣkalasamopetaṃ catuṣpīṭhasamanvitam 
catuḥsiddhasamāyuktaṃ jñātvā siddhiphalapradam 
13.40 khaḍgīśaḥ prathame vṛtte jalapaṭṭe niveśitaḥ 
bakaś cāṅkurarūpeṇa randhrasandhau vyavasthitaḥ 
13.41 śvetaḥ praṇālake dvisthaḥ pravāhe saṃvyavasthitaḥ 
bhṛgur mekhalarūpeṇa samantāt parimaṇḍalam 
13.42 śṛṅgāṭake tu pīṭhāni khātasyāgre vilakṣayet 
o-jā-pū-kā-matatvaṃ tu madhyadakṣiṇavāmataḥ 
13.43 agradeśe tu koṭisthaṃ śṛṅgāṭaṃ caturasrakam 
kṛ-tre-dvā-ka-kramād evam ādhāraṃ caturaṅgulam 
13.44 tatrābhyāsaṃ prakurvīta abhiṣekaguṇānvitaḥ 
ājñālabdhaparo bhaktaś caturmāsāt phalaṃ labhet 
13.45 jalapaṭṭagataṃ devam ādipīṭhasamanvitam 
śuklavarṇaṃ yadā dhyāyec chāntipuṣṭiparaṃ vrajet 
13.46 taṃ tyajya bakanāthākhyaṃ dakṣapīṭhagataṃ yadā 
tadā puṣṭiśriyārogyaṃ pūrvābhyāsaphalaṃ labhet 
13.47 śvetaṃ praṇālarandhrasthaṃ vāmapīṭhagataṃ yadā 
abhyaset kramayogena vaśyākarṣaṇamāraṇam 
13.48 rogavyādhijayaḥ puṣṭiḥ kramāt khecaratāṃ vrajet 
bhṛgu[ṃ] kāmasamāyogād abhyasanto guṇān labhet 
13.49 śāntipuṣṭivaśākarṣaṃ purakṣobhaṃ pṛthuśriyam 
valīpalitanāśas tu vāgīśatvaṃ pravartate 
13.50 sañjīvanaṃ mṛtānāṃ ca drumākṛṣṭi jalaplavam 
vātameghanadīnāṃ ca stambhakṛd vācahāriṇaḥ 
13.51 vācāsiddhiḥ prabhutvaṃ ca stobhakṛt parvatādiṣu 
stambhayet sarvasainyāni ādhāragatacetasaḥ 
13.52 ādhāraṃ kramam ity uktaṃ tad vinā sādhanaṃ na hi 
na mokṣo na ca bhuktiś ca yāvāmnāyo na veditaḥ 
13.53 etad ādhāram ity uktam ājñābhedam ataḥ śṛṇu 
yena vijñātamātreṇa sarvajñatvaṃ prapadyate 
13.54 kramaṃ śāmbhavam ity āhur yasmāt sambhavate 'khilam 
vācāsiddhes tu ādhāraṃ vācayājñā pravartate 
13.55 śāmbhavābhyāsamātraṃ tu yat kramāt sampravartate 
athāṇurudraśaktisthā bhāvabhūteṣu śāmbhavā 
13.56 adhikārātmikā hy eṣā viśuddhiguṇadāyikā 
na mokṣo vidyate teṣāṃ prasādājñā vivarjitā 
13.57 prasādaṃ kramam ity uktaṃ kramāj jñānaṃ tu śāmbhavam
śāmbhavena samastārthān vetti paśyati cāgrataḥ 
13.58 yadā dṛṣṭaḥ samastārtho gurutaḥ śāstrataḥ svataḥ 
tadāsau kramikaḥ proktaḥ kramatulyo 'thavā hi saḥ 
13.59 ājñābhyāse na muktis tu yāvāmnayo na veditaḥ 
sabāhyābhyantaraṃ bhadre ato 'rthaṃ toṣayed gurum 
13.60 sarvāṅgabhaktiyuktas tu triśuddhenāntarātmanā 
bhaktyā cārādhayen nāthaṃ tasya sarvaṃ prapadyate 
13.61 yā bhaktiḥ sā bhavec chaktiḥ śaktyā sambhavate kramaḥ 
kramāt sambhavate vācā vācayājñā pravartate 
13.62 yādṛśena tu bhāvena gurudevam upāsayet 
tādṛgbhāvena tasyājñā kiñcic cāṃśena saṅkramet 
13.63 uparodhaprasaṅgena uktakālād avāntare 
kiñcic cājñā bhavet tasya bhūtormiguṇasaṅkulā 
13.64 paripakvaphalaṃ yadvat susvādaguṇasaṃyutam 
tadvac chiṣyo 'pi kālena samastārthavido bhavet 
13.65 rasojjhitaṃ na susvādaṃ yathāmlaphalabhakṣaṇam 
tathā hy apakvaśiṣyāṇāṃ vṛthājñānapariśramaḥ 
13.66 sāmarthyenāpi dattājñā bhūtāṃśena samāviśet 
ūrmigrasto hy ahaṅkārī ahaṅkārād vinaśyati 
13.67 ekapakṣaḥ samākhyātaḥ sāmprataṃ vai 'dhikaṃ śṛṇu 
sthūlamārgeṇa sūkṣmatvaṃ kramād evaṃ prajāyate 
13.68 bhedo randhraṃ tathā chidram ekā saṃjñā yaśasvini 
sabījāś ceti nirbījāḥ sthitibhedo dvidhā sthitaḥ 
13.69 kūrmānandaṃ ca painākaṃ mahākālaṃ tṛtīyakam 
krodhīśam arghiṇā yuktaṃ vidyā caiva dvitīyakam 
13.70 jhaṇṭīśena samāyuktaṃ kulavāgeśvarī smṛtā 
praṇavaṃ kaulikaṃ gṛhya lakulīśād anantaram 
13.71 śrīkaṇṭhaṃ coṣmaṇā yuktaṃ lakulīśādimaṃ punaḥ 
upadeśasamāyuktaṃ sarvadaṃ bhṛgu-r-āvadhim 
13.72 vajrarandhrāntare yojya kodaṇḍāntaṃ vicintayet 
ślokadvādaśakopetaṃ cakradvādaśakānvitam 
13.73 guruvaktrasamopetaṃ dhyātvā vācāṃ prasādhayet 
smaraṇamātrayogena kālakṣepo na cātra vai 
13.74 atha ced abhyased evaṃ vajrakodaṇḍakāntaram 
sarvajñatvaṃ bhavet tasya kriyākhyaṃ yāva sundari 
13.75 kriyāto ' ghaṃ pravarteta vācājñāmoghaśālinī 
vāgīśatvaṃ punaḥ paścād vāgīśaḥ sṛjate 'khilam 
13.76 jvalantaṃ svena tejena lakulī vāmamārgataḥ 
sa jyeṣṭhaḥ kulasantāne raudraśaktibhir āvṛtaḥ 
13.77 trayastriṃśatime tattve hy adhikāro layaḥ pare 
saṃvartaḥ kevalo nāthaḥ sabījo bījavarjitaḥ 
13.78 asya randhrāntarasthānam ājñādhyānaṃ tu śāmbhavam 
na mantroccāraṇaṃ jñānaṃ na mudrā dhyāna cintanam 
13.79 nāyāmo na nirodhaś ca granthibhedo na dhāraṇā 
sarvopāyavihīno 'sau kiṃ tu sthānavikalpanā 
13.80 adhordhvaromasaṃsthāne tatra bhāvaṃ vinikṣipet 
ūrdhvagranthir adhaḥkando madhye kiñcin na vidyate 
13.81 tat sthānaṃ śāmbhavaṃ viddhi śambhurandhropalakṣitam 
na kiñcic cintayet tatra īṣadāropaṇaṃ citau 
13.82 evaṃ saṃsmaraṇād eva jñānānandaṃ pravartate 
vācāmātreṇa cānyeṣāṃ kurute pratyayān bahūn 
13.83 sakṛtsaṃsmaraṇād evam abhyasantaḥ śriyaṃ labhet 
vijñānāni ca sarvāṇi ṣaṇmāsābhyāsayogataḥ 
13.84 catustriṃśapadeśānaṃ vindate vatsarāṣṭakān 
tat sthānaṃ sahajaṃ tasya saṃyogaṃ yadi tasya vai 
13.85 bhujaṅgānugrahīśena mantrayuktena tat priye 
uccaranto hanet sṛṣṭiṃ lakulīśāntakārakaḥ 
13.86 bhogaś cāsya hi nādānte layaḥ syād vyāpinīpade 
ājñābhedadvayaṃ nāthe hy etat tat paramārthataḥ 
13.87 śaktimārgagataṃ viddhi śeṣo 'nyac cot tare punaḥ 
etat ṣaṭkaṃ paraṃ śāktaṃ dakṣiṇaṃ parikīrtitam 
13.88 yogiṣaṭkasamāyuktaṃ sadyomelakadāyakam 
tvayā mahyaṃ mayā tubhyaṃ tvayāhaṃ tvaṃ mayā punaḥ 
13.89 kathitaṃ tava suśroṇi tvatsaṅgānyeṣu mokṣadam 
paśu pakṣi tathā vṛkṣās tṛṇagulmasarīsṛpam 
13.90 vyākhyānaṃ yatra mārgasya mu cy ante tāny avaśyataḥ 
yena varṣasahasrāṇi bhaktyā ārādhito hy aham 
13.91 janmany apaścime puṃsāṃ jāyate 'daṃ sudurlabham 
cetaścittavihīnānāṃ prasaṅgān muktidaṃ priye 
13.92 kiṃ punaś cittayuktānāṃ saṅgād eva na muktidam 
ato 'rthaṃ saha saṃyogaṃ khānapānaṃ sahāsanam 
13.93 vastramālyopahārāṇi svajuṣṭānyaṃ na dāpayet 
asatsaṅgaṃ na kartavyaṃ satsaṅgaṃ na vivarjayet 
13.94 śuddhāśayasamācāraṃ jñānādhāraṃ prapūjayet 
viśuddhaṃ kāñcanaṃ yadvan nāgasaṅgād vinaśyati 
13.95 evaṃ viśuddhatattvo 'pi asatsaṅgād vinaśyati 
yoginīkulagarbhasthaḥ kulavīrāṅgasambhavaḥ 
13.96 siddho 'sau siddhasantāne ṣaṭpādārthaṃ sa vindati 
etat te kathitaṃ sarvaṃ dakṣiṇedaṃ salakṣaṇam 
13.97 yogaṣaṭkaṃ kulādhāraṃ pṛcchasvānyad yad icchasi 

iti kulālikāmnāye śrīkubjikāmate dakṣiṇaṣaṭkaparijñāno nāma trayodaśamaḥ paṭalaḥ 


śrīkubjikā uvāca 

14.1 dayā ca paramā mahyaṃ maṇḍalīśakulākulam 
ṣaṭpadārtho mayā jñātaḥ ṣaḍ yoginyo vada prabho 

śrībhairava uvāca 

14.2 uvāca bhagavān nāthaḥ kubjīśāni vadāmy aham 
sadyaḥpratyayakartāraṃ sadyomelakadāyakam 
14.3 kam-ba-mā-lam-vi-kā devyaḥ kramāt ṣaṭkaṃ kulākule 
mokṣabhuktipradātāraḥ ṣaḍ etāḥ ṣaṭkanāyikāḥ 
14.4 ḍa-ra-la-ka-sa-ha-jotthāḥ saṃsthitāḥ kulagocare 
kulaṣaṭkanivāsinyo nigrahānugrahe 'pi vā 
14.5 ekaikānugrahanty etā nigrahanty anulomakṛt 
ṣaṭpattre pūjitāḥ santyaḥ ṣaṭpadārthaphalapradāḥ 

śrīkubjikā uvāca 

14.6 purataḥ pṛcchayiṣyāmi prārabdhaṃ kathayasva me 
catuṣkapañcakānāṃ ca caturṇāṃ ca phalodayam 

śrībhairava uvāca 

14.7 ṣaṭpadārthopadeśena samastaṃ kathitaṃ mayā 
tathāpi kathayiṣyāmi adhikāro yathā sthitaḥ 
14.8 o-jā-pū-kāmuko bhedo dṛṣṭvākṣaraviniścitam 
mudrācatuṣṭayopetaṃ saṅketāt kathitaṃ priye 
14.9 caturyugaṃ catuṣpīṭhaṃ yonyaś catvāri yāḥ priye 
sabāhyābhyantare sarvaṃ kathayāmi yathārthataḥ 
14.10 nābhyadhodarahṛtkaṇṭhe kṛ-tre-dvā-kam anukramāt 
o-jā-pū-kāmarūpiṇyaś catvāry evaṃ vyavasthitāḥ 
14.11 sabāhyābhyantareṇaiva catuṣkaṃ parikīrtitam 
gurūpadeśasaṃyuktaṃ pañcakaṃ kathayāmi te 
14.12 devyo dūtyas tathā mātryo yoginyaḥ khecarīgaṇaḥ 
pañcadhā hy adhikāro 'yaṃ kurvanty etāḥ kulākule 
14.13 devīcatuṣṭayādhāraṃ svādhiṣṭhānaṃ ṣaḍāśrayam 
randhrakāmaśikhir golaṃ dhvajakandāntakāvadhim 
14.14 saptamaṃ tattvam uddiṣṭaṃ brahmaṇaḥ padam uttamam 
atra sṛṣṭiḥ samutpannā ṣaṭkauṣakulasambhavā 
14.15 devyādhiṣṭhitam īsānaṃ svādhiṣṭhānaguṇāśrayam 
randhradvādaśakopetaṃ  kāmadvādaśakānvitam 
14.16 vahnīśvare tathāpy evaṃ dvādaśaṃ dhvajakandayoḥ 
piṇḍadvādaśakopetaṃ caturāśīty anekaśaḥ 
14.17 śāmbhavādhiṣṭhite yoge svādhiṣṭhāne nirāmaye 
caturāśītiguṇānāṃ vijñānapadavīṃ labhet 
14.18 atra madhye maheśāni sarvakāraṇakāraṇam 
yathā niṣpadyate piṇḍaṃ tat tathā cāvadhārayet 
14.19 ādhāraśaktim ādau tu brahmaśaktim atordhvataḥ 
etad brahmāṇḍam ity uktaṃ saptalokasamanvitam 
14.20 ādhāraṃ caiva bhūrlokaṃ bhuvarlokaṃ tu kāmagam 
svarlokaṃ śikhim ity uktaṃ maharlokaṃ tu golakam 
14.21 dhvajasthaṃ janam ity uktaṃ tapolokaṃ tu kandagam 
satyalokaṃ tu tattvasthaṃ brahmagranthyāvadhisthitam 
14.22 satyalokād adhaḥ sṛṣṭiḥ kalādyā piṇḍasambhavā 
ājñātaḥ sampravartante trayāntaṃ yāva mānasī 
14.23 caturṇāṃ tu punaḥ sṛṣṭir adhastād yonisambhavā 
madhyamanthānayogena śubhāśubhanibandhanam 
14.24 bhuvarlokād adholoke vividhā sṛṣṭiḥ pravartate 
jarāyujā ca sā jñeyā bahuduḥkhasamākulā 
14.25 kandāt sañjāyate sṛṣṭiḥ kandaṃ vai saptalaukikam 
randhrādau granthiparyantaṃ vijñeyaṃ saptadhātukam 
14.26 kandāt sañjāyate 'ṅkuraḥ aṅkurān mūlasambhavaḥ 
mūlāt parṇalatāśākhā[s]  tataḥ puṣpaphalādikam 
14.27 phalaṃ śarīram ity uktaṃ dhātuvṛkṣasamudbhavam 
piṇ<;laṃ kandodbhavaṃ tac ca śubhāśubhajalāntagam 
14.28 tvagraktamāṃsa randhrādau aśubhaṃ kāmavahnigam 
śubhaṃ medo'sthimajjāntaṃ golakandadhvajānvitam 
14.29 aśubhaṃ tu rajaḥ sākṣāt triśaktiguṇa mātṛjam 
paitṛkaṃ śubham uddiṣṭaṃ reto hy ātmādi-m-īśvaraḥ 
14.30 piṇḍaṃ sarvatra sāmānyam ubhayor api kubjike 
saṅgame śivaśaktīnāṃ piṇḍabandho bhavet tadā 
14.31 yat kiñcic cintayen mātā yat kiñcic cintayet pitā 
ubhau bhāvasamāyogāt tadbhāvaḥ sahajo bhavet 
14.32 viśvarūpo maṇir yadvad upādhiviṣayo yathā 
tatkālopādhicintāyāṃ sa rāgaḥ sahajo bhavet 
14.33 etad antaram āsādya piṇḍaḥ kāraṇarūpadhṛk 
bandhate pañcadhātmānaṃ pañcapañcādibhiḥ kramāt 
14.34 puruṣaṃ prakṛtiś caiva guṇo 'haṅkāra dhīr manaḥ 
ṣaṇmukhas tu paro hy ātmā catuṣkapariveṣṭitaḥ 
14.35 adhordhvaṃ nīyate jīvaḥ koṣakīṭa-m-iva sthitaḥ 
prakāśayati cātmānaṃ badhnāti ca punaḥ punaḥ 
14.36 niyāmikācatuṣkeṇa sannaddho bhramate hy aṇuḥ 
ekaikaṃ taṃ caturdhā tu devīcakraṃ prakīrtitam 
14.37 niyāmikā bhavet pṛthvī pratiṣṭhā śabdapūrvikā 
śrotrapūrṇā bhaved vidyā śāntir vāgeśvarī smṛtā 
14.38 kṣoṇī tu prathamā jñeyā śabdadevī dvitīyakā 
tṛtīyā śrotrikā nāma vācādevī caturthikā 
14.39 devīcatuṣṭayaṃ hy etad ekaikaṃ tu catuṣṭayam 
etac catuṣṭayaṃ devi saṃsārapathavartmani 
14.40 catuṣṭayaṃ tu bhūtānāṃ tanmātrāṇāṃ catuṣṭayam 
buddhīndriyacatuṣkaṃ tu catuṣkaṃ karmayājinām 
14.41 pañcakaṃ tat tu vijñeyaṃ puṃsaḥ ṣaḍguṇasaṃyutam 
evaṃ niṣpadyate piṇḍaṃ pañcadhā pañcaviṃśakam 
14.42 ṣaṭkauśikaṃ tu mārgo 'yam ādidevīcatuṣṭayam 
kathitaṃ sarahasyaṃ tu ṣaṭsiddhapuraniścayam 
14.43 uvāca kubjikā nāthaṃ ṣaṭsiddhapuraniścayam 
na me jñātaṃ kuleśāna saṃsphuṭaṃ kathayasva me 
14.44 uvāca bhagavān nāthaḥ kubjīśāni mayā tava 
kathitā saptadhā sṛṣṭiḥ siddhān sapta vadāmy ah am 
14.45 navatattveśvaro nātho navacakreśvareśvaraḥ 
brahmāṇḍaśivasiddho ' sau  hartā kartāvatārakaḥ 
14.46 sa nāthaḥ sarvasiddhānāṃ patitve saṃvyavasthitaḥ 
kandabhūto 'ṅkuro 'sau vai ṣaṭpurādhipatiḥ prabhuḥ 
14.47 pumpuraṃ prathamaṃ kandaṃ prākṛtaṃ cāparaṃ puram 
guṇānandaṃ tu golākhyaṃ garvaṃ jālandharātmakam 
14.48 dhīpuraṃ kāmarūpākhyam ādhāraṃ tu manaḥpuram 
pumpure śrīmatkhaḍgīśaḥ khagīśaḥ prākṛte pure 
14.49 viśvanātho guṇānande jhaṇṭīśo 'hammahāpure 
dhīpure 'nugrahīśāno mitreśāno manaḥpure 
14.50 ṣaṭpurādhipatir nāthāḥ kaulīśāḥ kulanāyakāḥ 
kulasiddhāḥ samākhyātāḥ ṣaṭkramaughaprakāśakāḥ 
14.51 bhaviṣyanti purā kalpe martyalokam upāgatāḥ 
prabhur ānanda yogākhyam āvalī pādam antimam 
14.52 bhaviṣyanty apare kalpe kulasiddhāḥ kulotthitāḥ 
kulasiddhādhipo deva ājñāmoghakuleśvaraḥ 
14.53 ṣaṭkulānāṃ tv asau nāthas tasmāt sarvaṃ kulānvayam 
navānāṃ cakravartīnāṃ cakravartis tv asau prabhuḥ 
14.54 tasmāt pravartate sṛṣṭir brahmādyā kulasambhavā 
ṣaṭpurāṇāṃ tam ādhāraṃ kartāraṃ kulapaddhatau 
14.55 śāstāraṃ brahmajantūnāṃ devīnāṃ tu catuṣṭayam 
apare brahmaṇaḥ sṛṣṭau yat kiñcid vāṅmayākhilam 
14.56 tat sarvaṃ devibhir vyāptaṃ tvayādhārāntakāvadhim 
caturmukheśvarasyānte kandaḥ saptavidhaś ca yaḥ 
14.57 tatra jātaṃ jagat sarvaṃ sadevāsuramānuṣam 
devīcatuṣṭayānāṃ tu mārgo 'yaṃ kathito 'khilam 
14.58 adhunā kathayiṣyāmi dūtīnāṃ lakṣaṇaṃ yathā 
brahmādhāram iti proktaṃ saptādhārasamanvitam 
14.59 prathamaiṣā parā sṛṣṭiḥ śāmbhavī yā kulādhvare 
navatattveśvareśasya nābhyadhastāt tu maṇḍalam 
14.60 śatakoṭisuvistīrṇaṃ devīkulasamāśrayam 
trikoṇaṃ caiva ṣaṭkoṇaṃ vṛkṣavallīkramas tathā 
14.61 dvividhājñādhikāro 'yaṃ nigrahānugrahaṃ prati 

śrībhairava uvāca 

14.62 brahmaṇo 'ṇḍakaṭāhasya samantāt parimaṇḍalam  
sahasrakoṭivistīrṇam apsu viṣṇoḥ puraṃ mahat 
14.63 ardhenduśikharākāraṃ potanāvākulaṃ tu tat 
anekatattvasaṅkīrṇaṃ navanālopaśobhitam 
14.64 padmapattram anaupamyaṃ ṣoḍaśāraṃ sakarṇikam 
yatra dūtyaḥ svabhāvinyaḥ krīḍante vividhaiḥ sukhaiḥ 
14.65 yatrāsau ramate nit yam uttamaḥ puruṣottamaḥ 
tat sthānaṃ paramaṃ proktaṃ yatra dūtyo 'mṛtodbhavāḥ 
14.66 tās tu kṣubdhā yadā kāle 'mṛtaṃ muñcanti bhāvitāḥ 
tadā caturvidhā sṛṣṭir brahmacakre tu nānyathā 
14.67 ṣoḍaśāre mahāpadme divyāmṛtapariplute 
tatrastho dūtibhiḥ sārdhaṃ poṣayed brahmaṇaḥ padam 
14.68 brahmakandāntabījānām ūrdhvarandhrāṅkuratrayam 
tatra granthīśvaro 'nantaḥ svaśaktikiraṇojjvalaḥ 
14.69 sthito mahāmbhasi madhye navadūtīsamanvitaḥ 
sṛṣṭikṛd bhagavānantaḥ padārthapada-m-īśvaraḥ 
14.70 kapālaṃ caṇḍalokeśaṃ yogeśaṃ tu manonmanam 
hāṭakeśvara kravyādaṃ mudreśaṃ diṅmaheśvaram 
14.71 śrī anantīśa nāthānto navaite bhāsvareśvarāḥ 
vibhajya navadhātmānaṃ padasṛṣṭiṃ vinirmite 
14.72 ekaikā navadhātmānaṃ punaś caivaṃ sṛjanti te 
navanava padāni syur dūtīnāṃ kāraṇātmakam 
14.73 padabhuktigatānāṃ tu dūtīnāṃ ca pṛthak pṛthak 
nāmāni kīrtayiṣyāmi yā yasyāṅgasamudbhavāḥ 
14.74 śrī anantāṅgasambhūtāḥ sarve yās tu navaiva hi 
adhikārapadaṃ teṣāṃ tat pravakṣyāmy aśeṣataḥ 
14.75 bindukā bindugarbhā ca nādinī nādagarbhajā 
śaktī ca garbhiṇī cānyā parā garbhārthacāriṇī 
14.76 nirācārapadāvasthā madhyasthānantavarcasaḥ 
adhikāraṃ prakurvanti kulākulasamāśritāḥ 
14.77 caṇḍā caṇḍamukhī caiva caṇḍavegā manojavā 
caṇḍākṣī caṇḍanirghoṣā bhṛkuṭī caṇḍanāyikā 
14.78 caṇḍīśanāyakopetā hy akuleśapade sthitāḥ 
tasmāt padāt parā sṛṣṭir manonmanyādisambhavā 
14.79 manojavā mano'dhyakṣā mānasī mananāyikā 
manohārī manohlādī manaḥprītir maneśvarī 
14.80 manonmanyā samāyuktā unmanaḥpadam āśritāḥ 
navaiva paramā dūtyo manaś conmanakārikāḥ 
14.81 aindrī hutāśanī yāmyā nairṛtī vāruṇī tathā 
vāyavī caiva kauberī aiśānī kaulikeśvarī 
14.82 samanaughapadāntasthā[ḥ]  parākāśe vyavasthitāḥ 
janayanty aparāṃ sṛṣṭiṃ yogākhyā vyāpinīpade 
14.83 hiraṇyā ca suvarṇā ca kāñcanī hāṭakā tathā 
rukmiṇī ca manasvī ca subhadrā jambuhāṭakī 
14.84 vyāpinīpadam āpannā yogadūtyo mahābalāḥ 
vyāpyavyāpakabhāvena vyāpayanti carācaram 
14.85 vāgvatī vāk tathā vāṇī bhīmā citrarathā sudhī 
devamātā hiraṇyā ca yogeśī navamā smṛtā 
14.86 vāgeśvarapadāntasthā vāgīśvaryasamanvitāḥ 
mantravidyāṅgasambhūtāḥ sarvārthapratipādikāḥ 
14.87 vajriṇī śakti daṇḍī ca khaḍginī pāsinī dhvajī 
gadī ca śūlinī padmī mudreśapadasambhavāḥ 
14.88 piṅgadūtyo mahāvīryāḥ kalākālavidhāyikāḥ 
tejorūpā mahādevyo anantaguṇasambhavāḥ 
14.89 lambā lambastanī suṣkā pūtivaktrā mahānanā 
gajavaktrā mahānāsā vidyutkravyādanāyikā 
14.90 kālānalāntare dūtyaḥ saṃhārapadasaṃsthitāḥ 
anantaguṇavīryās tāḥ saṃharanti carācaram 
14.91 suprabuddhā prabuddhā ca caṇḍī muṇḍī kapālinī 
mṛtyuhantā virūpākṣī kapardī kalanātmikā 
14.92 niyāmikāpadāntasthāḥ śubhāśubhaniyāmikāḥ 
ekāśītivibhāgena dūtyo hy evaṃ mahābalāḥ 
14.93 navakeśvaradevasya udaredaṃ prakīrtitam 
ekāśītipadair vyāptam anekāścaryasaṅkulam 
14.94 padarūpasamāyuktaṃ rūpātītādisaṃyutam 
padmamārgavidhāyinyas tritattvapadavīṃ labhet 

iti kulālikāmnāye śrīkubjikāmate devīdūtīnirṇayo nāma caturdaśamaḥ paṭalaḥ 



śrībhairava uvāca 

15.1 devīdūtīmataṃ kubji kathitaṃ tu suvistaram 
idānīṃ mātarāṇāṃ ca śṛṇu tvaṃ vyāptilakṣaṇam 
15.2 padapattrordhvagaṃ padmaṃ tejorūpaṃ subhāsvaram 
lakṣakoṭisuvistīrṇam ambhodhiparimaṇḍalam 
15.3 tatra madhye maheśānaṃ piṅgeśaṃ piṅgarūpiṇam 
trikoṇapuramadhyasthaṃ tejorāśim anāmayam 
15.4 kāle hy aharmukhe prāpte kṣobhayitvā svakāṃ tanum 
vijñānakevalāny aṣṭau bodhayāmāsa pudgalān 
15.5 aṣṭau mudrā mahāmātryo jagadyonir mahāmbike 
tāsu jātaṃ jagat sarvaṃ yat kiñcid vāṅmayaṃ 'khilam 
15.6 prathamā khecarīmudrā ātmī nāma dvitīyakā 
tṛtīyā śaśinī jñeyā vahnināmā caturthikā 
15.7 pañcamī calanī nāma ṣaṣṭhī bhānumatī smṛtā 
saptamī mahimā nāma aṣṭamī sukṛtālayā 
15.8 etā aṣṭau mahāmātryaḥ śrīmanmitrāṅgajodbhavāḥ 
kurvanti vividhāṃ sṛṣṭiṃ sthūlasūkṣmaparāparām 
15.9 vibhājayanti cātmānam ekaikā cāṣṭadhāṣṭadhā 
teṣv anyāḥ ṣoḍaśādhārāś catuḥṣaṣṭyānta-m-antikāḥ 
15.10 khecarītanusambhūtāś cāṣṭau mātryo diśātmikāḥ 
aindrādīśāna-m-antasthāḥ sarvādhārāḥ parāparāḥ 
15.11 rudrāṇyaṃśāḥ samākhyātā devīkoṭāntasaṃsthitāḥ 
saṃvartavīrasaṃyuktāḥ śambhukalpāvatārakāḥ 
15.12 ātmamātrodbhavā hy evaṃ sakalā niṣkalāś ca ye 
vijñānapralayāntānye dharmādharme niyojayet 
15.13 tatrāṇavo 'tha māyāyā aṣṭau mātryo 'ṇusambhavāḥ 
prayāgapuramadhyasthāś caṇḍakaulīśasaṃyutāḥ 
15.14 brāhmīcakraṃ samuddiṣṭam ādikalpasya madhyagam 
ātmamātryaṣṭakaṃ proktam indramātryaṣṭakaṃ vadet 
15.15 chāyā tu śīkarā jyotsnā ṛturatnā suśītalā 
payoghṛtavatī cānyā indramātryo 'ṣṭa vaiṣṇavī 
15.16 vārāṇasīpurāntasthā amṛtādhāraśītalā 
āpyāyanti jagat sarvaṃ pālayanti jagāmbikāḥ 
15.17 kalpāvāntaram āsādya krodhakaulīśasaṃyutāḥ 
kurvanti vividhāṃ sṛṣṭim āpadāṃ mocayanti tāḥ 
15.18 tṛṣṇā rāgavatī mohā kāmā kopā tamotkaṭā 
īrṣā śokavatīty aṣṭau vahnimātryaḥ prakīrtitāḥ 
15.19 kaulīśonmattasaṃyuktāḥ kollādrau saṃvyavasthitāḥ 
mahāntakalpamadhyasthāḥ krīḍanty amitatejasā 
15.20 tvacī sparśavatī gandhā prāṇāpānī samānanī 
udānī vyāni kṛkarā marunmātryo 'ṣṭa kīrtitāḥ 
15.21 asitāṅgakuleśānam aṭṭahāsapurāntagāḥ 
divyakalpe purā mātryaḥ krīḍanty amitatejasā 
15.22 tamohantā prabhā mohā tejinī dahanī dinā 
jvalanī śoṣaṇīty aṣṭau arkamātryaḥ prakīrtitāḥ 1/
15.23 divyādivyapare kalpe jayantīpuramadhyagāḥ 
rurukauleśasaṃyuktās tena sārdhaṃ ramanti tāḥ 
15.24 nivṛttiś ca pratiṣṭhā ca vidyā śāntis tathaiva ca 
śāntātītā ca pṛthivī vajriṇī kāmadhenavī 
15.25 mahimeśānadevasya aṣṭau mātryaś caritragāḥ 
adivyakalpamadhyasthā jhaṇṭhakauleśvarānvitāḥ 
15.26 aindryādhiṣṭhitacakrasthāḥ krīḍanty amitatejasā 
pūryaṣṭakasya madhyasthā vajrahastā mahābalāḥ 
15.27 payoṣṇī vāruṇī śāntā amṛtā vyāpinī dravā 
plavanī jalamātā ca payomātryo 'ṣṭa viśrutāḥ 
15.28 vartamānikakalpe tu ekāmrakavanāntagāḥ 
kapālīśakuleśānaṃ cāmuṇḍācakramadhyagāḥ 
15.29 śrīkuleśvaradevasya hṛtpadme ' ṣṭadale sthitāḥ 
īśānakramayogena sṛṣṭimārgāvalambikāḥ 
15.30 karṇikāyāṃ sthito devaś catuṣkaparivāritaḥ 
raktākarālācaṇḍākṣīmahocchuṣmāsamanvitaḥ 
15.31 mahāraktavanāntasthas tejomaṇḍalamadhyagaḥ 
navatattveśvaraṃ devaṃ pūryaṣṭakasamanvitam li
15.32 antardehasthito yasmāt pūrayet sa carācaram 
tena pūryaṣṭakaṃ proktam aṣṭadhā tu prapūrakam 
15.33 sa śivaḥ sarvasattvānāṃ hṛdisthaḥ parameśvaraḥ 
bhrāmayeta jagat sarvaṃ yantrārūḍhas tu māyayā 
15.34 dvāsaptatisahasrāṇām uparistho 'ntare sthitaḥ 
akṣārūḍho 'kṣagamyo 'yaṃ manīśānāṃ piśācavat 
15.35 guruvaktraṃ tu tat proktaṃ guruvaktrāt tu labhyate 
gurutvaṃ yāty asau yogī guruvaktrāvalambakaḥ 
15.36 tejastattvaṃ tu taṃ devi rudraśaktibhir āvṛtam 
atordhvaṃ yoginīnāṃ tu ghaṭasthānaṃ nigadyate 
15.37 guruvaktre guror vaktraṃ guruvaktre tu saṃsthitam 
guruvaktrāt tu labhyeta tasmāt santoṣayed gurum 
15.38 stutiṃ kṛtvā uvācedaṃ kubjikā parameśvaram 
pṛcchāmi nātha yatnena ghaṭasthānaṃ suvistaram 
15.39 uvāca bhagavān devas tvatpṛcchā rahitaṃ 'naghe 
nikhilaṃ kathayiṣyāmi yathā tvaṃ kubji cetasā 
15.40 koṭikoṭisuvistīrṇaṃ ghaṭādhāraṃ tatordhvataḥ 
vajrapadmāṅkitaṃ divyaṃ piṅganāthāvadhisthitam 
15.41 anantaguṇadātāraṃ sarvārthapratipādakam 
tasmāt sampadyate sarvam aihiṃ pāratrikaṃ ca yat 
15.42 yatra bhāṇḍāni sarvāṇi labhyante ca sahasradhā 
layaṃ yānti punas tatra ghaṭasthānaṃ tad ucyate 
15.43 yasmāt sarvaṃ yathā yāti yasmād yānti truṭanti ca 
yatra nirbhedyatāṃ yānti tat sthānaṃ ghaṭikātmakam 
15.44 bhuvanāṣṭottaraṃ bhāṇḍaṃ padabhāṇḍaṃ tu tatra vai 
varṇabhāṇḍaṃ tu tatrasthaṃ mantratattvakalātmakam 
15.45 bhāṇḍāriṇo amīṣāṃ ca nivṛttyādyāḥ prakīrtitāḥ 
yasyādhāreṇa vartante bhogānte tat padaṃ punaḥ 
15.46 śrīkuleśvaradevasya hṛdyordhvaghaṭa-m-antare  
tat kuleśvaradevasya durbhedyaṃ ṣaṭpuraṃ mahat 
15.47 vibhajya svatanuṃ devaḥ ṣaṭpadārthapadena ca 
ṣaḍ yoginyo mahātejāḥ ṣaṭpure sanniveśitāḥ 
15.48 ḍāmarī rāmaṇī caiva lambakarṇī ca kākinī 
sākinī yakṣiṇī cānyā kusumbhodasamudbhavāḥ 
15.49 vajrapadmāsanārūḍhāḥ kusumbhaguṇaśālinī[ḥ] 
ṣaṭpurādhipatīnāṃ ca patitve samvyavasthitāḥ 
15.50 o-jā-pū-kāmabhedena kā-pū-jā-o-vyatikramāt 
etat kramaṃ samākhyātaṃ sṛṣṭisaṃhāragocare 
15.51 parāparavibhāgena sthūlasūkṣmaparāntagam 
yathādhipati devatvaṃ yoginīnāṃ tathā śṛṇu 
15.52 duḥśīlā ḍamarī bhīmā ādhārasthā tu ḍāmarī 
svādhiṣṭhānapurāntasthā rāmaṇī ramaṇātmikā 
15.53 maṇipūrapurāntasthā lambakarṇī mahadbhutā 
dhvanidevapure kākī viśuddhau sākinī smṛtā 
15.54 ājñāpurasya madhyasthā yakṣiṇīti nigadyate 
kubjikodarasambhūtāḥ ṣaḍ yoginyaḥ parāparāḥ 
15.55 atra jātaṃ jagat sarvaṃ rudrāntaṃ brahmaṇo 'vadhim 
saṃharanti punas tās tu vilomena prapūjitāḥ 
15.56 upadeśapragamyās tāḥ pāramparyakrameṇa vai 
jñātavyaṃ ṣaḍvidhādhvānaṃ ṣaṭprakāraṃ guror mukhāt 
15.57 śravaṇe cakṣuṣī nāsā mukhe caiva tathaiva hi 
cibuke kaṇṭhadeśe tu guruvaktrāt tu labhyate 
15.58 praṇayāviṣṭacetaskā uvācedaṃ kujeśvarī 
vyāptisthānaṃ kathaṃ teṣāṃ kā kasya pathayāyinī 
15.59 bhaktyā pṛṣṭavatī matvā prahasya parameśvaraḥ 
uvāca kubjike tubhyaṃ kathayāmy anupūrvaśaḥ 
15.60 ghaṭanti sarvavastūni yasyāṅge tu varānane 
ghaṭasthānaṃ tu tenoktaṃ  sandohaguṇalakṣaṇam 
15.61 rudrapañcāśakopetaṃ śaktipañcāśakānvitam 
cakravartyaṣṭakopetaṃ bhuvanāṣṭottaraṃ śatam 
15.62 manojanapadākīrṇam ādhāragṛhasaṅkulam 
oṃkāradalamadhyastham aghorīhṛdayānvitam 
15.63 tatra sā ḍāmarī devī jvalatpiṅgogralocanā 
manorasādhipatyasthā duḥsādhyā bhuvanātmikā 
15.64 punar japattramadhyasthā ekāśītipadāvṛtā 
śirasādhiṣṭhitā yogī svādhiṣṭhānagṛhākulā 
15.65 buddhijanapadākīrṇā padādhve rāmaṇī ramet 
duṣprekṣā duḥsahā bhīmā buddhyāsṛglolavigrahā 
15.66 maṇipūragṛhāntasthā kāmapattrāntare gatā 
taḍitsahasravarṇābhā śikhārūpā maheśvarī 
15.67 ahaṅkārajanānandā prāleyāvalisannibhā 
varṇeśvarī mahādevī kriyārūpā parāparā 
15.68 tasyāṅgasambhavā mantrāḥ sarvajñās te prakīrtitāḥ 
lambikā sā samākhyātā māṃsāhārā ca lampaṭā 
15.69 pūrṇakadalamadhye tu nīlāñjanasamaprabhā 
tanutrāṇakṛtāṭopā mantrādhvā-s-tu vibhūṣitā 
15.70 anāhatakamadhyasthā guṇānekajanāvṛtā 
kākī medavasālubdhā guṇān nāśayate kṣaṇāt 
15.71 kruddhā tamotkaṭā nityaṃ pracaṇḍogrā bhayānakā 
mantrādhvānagatā yogī layabhogādhikārikā 
15.72 punaḥ puṃdalamadhyasthā viśuddhigṛhamadhyagā 
saṃvartānalasaṅkāśā netrādhiṣṭhitabhāsvarā 
15.73 prākṛtajanasaṅkīrṇā kalādhvānasamāvṛtā 
rudraśaktisamāviṣṭā raudrabhāvapradāyikā 
15.74 asthibhaṅgapriyā nityaṃ prākṛtārthavināśanī 
sākinīyaṃ mahāghorā sthūlasūkṣmaparāntagā 
15.75 dakṣe kāmeśvarīpattre prāleyāvalisannibhā 
kadācin [']nekarūpābhā upādhiguṇagocarā 
15.76 tattvādhvapuramadhyasthā ājñāmandiraśobhitā 
puṃjanākṛtasampūrṇā mahāstraughasamāvṛtā 
15.77 majjabījāśinī yogī yakṣiṇī śakti śāmbhavī 
ṣaḍ yoginyo ghaṭādhāre ṣaḍadhvānavidhāyikāḥ 
15.78 tatra madhye sthitā kanyā viśvarūpā parāparā 
sā patiḥ sarvayogīnāṃ yogeśī [']nantavigrahā 
15.79 kam-ba-mā-lam-vi-kāntābhir āvṛtā madhyasaṃsthitā 
'nugrahanti punas tās tu ṣaḍadhvānaprayogataḥ 
15.80 bhūtaṃ bhāvaṃ tathā śāktam āṇavaṃ raudra śāmbhavam 
kramād anugrahanty etās tattvādau bhuvanāditaḥ 
15.81 dakṣiṇādhvānasaṃsthās tāḥ kṛntayanti mahāmbikāḥ 
uttarasthāḥ prakurvanti śreyaṃ cāmṛtasambhavam 
15.82 vajrapadmāsanāsīnā ghaṭāmbodadhimadhyagāḥ 
amṛtaughataraṅgaughaiḥ plāvayanti carācaram 
15.83 asyā rūpaṃ ca māhātmyaṃ sādhanaṃ siddhilakṣaṇam 
purataḥ kathayiṣyāmi idānīṃ khecarīṃ śṛṇu 

iti kulālikāmnāye śrīkubjikāmate ṣaṭprakāre yoginīnirṇayo nāma pañcadaśamaḥ paṭalaḥ 

śrībhairava uvāca 

16.1 bhuvanāṅkurasaṃyuktaṃ padapattravibhūṣitam 
varṇakaṇṭakasaṅkīrṇaṃ mantracchidrasamanvitam 
16.2 kalāsūtracitaṃ divyaṃ tattvagranthyuparisthitam 
koṭikoṭiśatāyāmaṃ caturviṃśadalāyatam 
16.3 vyomodārṇavamadhyasthaṃ nīlāñjanasamaprabham 
sahasrādityasaṅkāśaṃ kālāgnir iva varcasam 
16.4 tatrordhve maṇḍalāny āhuś caturviṃśam anukramāt 
kṣetropakṣetrasandohān pūrvādau pārthivāditaḥ 
16.5 kṣetre dve copakṣetre dve sandohe dve vijānataḥ 
dalopari virājante catuḥṣaṭkaṃ diśāditaḥ 
16.6 aṭṭahāsāditaḥ kṛtvā rājagṛham apaścimam 
pārthivādiprakṛtyantaṃ saṃyogān maṇḍalāyate 
16.7 saumyādibhagnanāsāntāḥ sūryamaṇḍalasaṃsthitāḥ 
pṛthagmaṇḍalacakrasthāḥ khecaryaḥ kulanāyikāḥ 
16.8 somamaṇḍalamadhye tu dvātriṃśānye mahābalāḥ 
kubjikāṅgasamudbhūtāḥ pracaṇḍogrā guṇotkaṭāḥ 
16.9 caṇḍā ghaṇṭā mahānāsā sumukhī durmukhī balā 
revatī prathamā ghorā saumyā bhīmā mahābalā 
16.10 jayā ca vijayā caiva ajitā cāparājitā 
mahotkaṭā virūpākṣī śuṣkā cākāśamātarā 
16.11 sehārī jātahārī ca daṃṣṭrālī śuṣkarevatī 
pipīlikā puṣpahārī aśanī sasyahārikā 
16.12 bhadrakālī subhadrā ca bhadrabhīmā subhadrikā 
dvātriṃśadguṇaśālinyaś cakreśvaryā mahāmbikāḥ 
16.13 somamaṇḍalamadhyasthā vahnisthās tu tataḥ śṛṇu 
khageśvarapatīnāṃ tu patimātryo 'tra saṃsthitāḥ 
16.14 asitāṅgatanūdbhūtāḥ kriyārūpāḥ parāparāḥ 
kurvanti vividhāṃ sṛṣṭiṃ tvaritaṃ lāghave sthitāḥ 

śrīkubjikā uvāca 

16.15 tvaritāśabdaṃ kathaṃ deva khañjīśabdaṃ kim ucyate 
kubjāśabdaṃ kathaṃ proktaṃ kathaṃ tanmaṇḍalāgaṇaḥ 
16.16 kathaṃ rūpaṃ maheśānyāḥ sarvam etad yathākramam 
ācacakṣva prayatnena yena bhrāntir vinaśyati 

śrībhairava uvāca 

16.17 sādhu devi mahādurge kiṃ na budhyasi pārvati 
yad asmāt tvam ihāyātā tat kiṃ te veditaṃ na hi 
16.18 vālāgraśatabhāgasya vibhinnasya sahasradhā 
asya kālavibhāgasya tvarāt sañcarase yathā 
16.19 tathā tvaṃ tvaritā nāma aśeṣārtivināśinī 
khañjinī kathitā tubhyaṃ vāraṃ vāraṃ punaḥ punaḥ 
16.20 yasyā madhyagataṃ viśvaṃ viśvamadhyagatā tu yā 
khañjikā tena sā proktā sūkṣme vastuni sūkṣmagā 
16.21 eṣā te khañjikā khyātā kubjinī[ṃ] śṛṇu sāmpratam 
anvarthasaṃjñikā nāma ekā tvaṃ tu kuleśvari 
16.22 sthūlasūkṣme pare tattve vyaktāvyakte nirāmaye 
sarvaṃ vyāptam idaṃ devyā sā ca tvaṃ kiṃ na budhyasi 
16.23 bṛhatkāyo yadā kaścit svalpe vyācarate gṛhe 
kuñcitāṅgo viśed yasmāt tadvad eṣā maheśvarī 
16.24 caturdvādaśadhādhāraṃ granthau ṣoḍaśakānvitam 
vaḍavākhyaṃ triśūlordhvaṃ trittattvaṃ tu kalāntagam 
16.25 nididhyāsyaṃ śrutaṃ deśyam etat kauleśvaraṃ tanum 
yasyodaragataṃ tac ca tasya kim aparaṃ param 
16.26 kūṭabhūtaṃ tu tanmadhye yasmāt sā kuṭilītayā 
gatānekakulodbhinnā iccheyaṃ pārameśvarī 
16.27 tena tvaṃ kubjikā proktā parā sarveṣu vastuṣu 
tatredaṃ durlabhaṃ devi sugopyaṃ prakaṭīkṛtam 
16.28 vedasiddhāḥ paśus cordhve ūrdhvaṃ vāme paśutvatā 
vāmaṃ dakṣiṇamārgasya dakṣiṇaṃ kulaśāsane 
16.29 taṃ tu yonyārṇave līnaṃ yoniḥ srīkubjikāmate 
ato'rthaṃ gopitaṃ tantraṃ na kasyacin mayoditam 
16.30 rabhasāviṣṭabhāvena tavādya prakaṭīkṛtam 

śrīkubjikā uvāca 

16.31 sūryasomasthitiḥ proktā vahnisthānāvadhāritā 
kathaṃ sā kurute sṛṣṭiṃ ko 'sitāṅgaḥ kuleśvaraḥ 

śrībhairava uvāca 

16.32 kubjeśi śrūyatāṃ sṛṣṭir yathāvasthā prapadyate 
asitāṅgo maheśānas tatordhve maṇḍalopari 
16.33 somamadhye ravisthānaṃ sūryamadhye śikhi[ḥ] sthitaḥ 
tatra madhye 'ṅkuraṃ divyam asitāṅgasamudbhavam 
16.34 tato niṣpadyate sṛṣṭir vicitrānekarūpiṇī 
tattvāni ca kalā varṇā mantravidyā padaḥ purā 
16.35 visṛjanti mahānandaṃ śaktibhairavamaṇḍalam 
pañcaviṃśatimadhyādau ṣoḍaśaivāṣṭa cāntimāḥ 
16.36 bhairavānandaśaktistham asitāṅgakuleśvaram 
ādimaṇḍalamadhyasthaṃ siddhaiḥ ṣoḍaśabhir vṛtam 
16.37 ādiyonipurasthaṃ tu maṇḍalaṃ khecarātmakam 
asya pūjāvidhānena ājñāyoniphalaṃ labhet 
16.38 ādimaṇḍalakaṃ hy etat pravaraṃ hy uttamottamam 
atrotpannāni sarvāṇi maṇḍalāni hy anekadhā 
16.39 pañcaviṃśātmakaṃ madhye maṇḍalānāṃ tadādimam 
catuḥsiddhānvitaikaikaṃ vijñeyaṃ pañcaviṃśakam 
16.40 vālādau khaḍgaparyantaṃ maṇḍale maṇḍale tu tam 
eṣānyat pañcakaṃ devi kulavidyā kulādhvare 
16.41 bhujaṅgakrūrasaṃyuktā trimūrtiguṇadhāraṇā 
sāmānyā sarvasiddhānāṃ pañcaviṃśatimaṇḍale 
16.42 maṇḍalo[ d]bhṛtadehā sā kriyākālaguṇottarā 
caturbhiḥ sahitā devī sṛjate varṇasāgaram 
16.43 kakārādau maparyantaṃ yakārādau ha-m-antimam 
atra mantrāḥ samutpannā vidyāmudrāgaṇo mahān 
16.44 devīdehāt samutpannā sā devī maṇḍalodbhavā 
caturviṃśakamadhyasthā ṣaṭcatuṣkavibhūṣitā 
16.45 vahnimaṇḍalamadhyasthā bahurūpā arūpiṇī 
barbaroruha piṅgākṣī danturā bṛhadodarā 
16.46 nīlameghaprabhā bhīmā gambhīrābharaṇojjvalā 
vedaiḥ kṛtaśiromālā saṣaḍaṅgapadakramāt 
16.47 brahmasūtraṃ maheśānyāḥ purāṇodbaddhamekhalā 
jyotiḥśāstrāñjitākṣī sā dhvanikarṇāvataṃsakā 
16.48 kalālambitahāraughā vijñānakaṭakojjvalā 
śabdapaṅkāmṛtodbhinnā maṇḍitaṃ mukhamaṇḍalam 
16.49 vicitravasanānekā śāstrapaṭṭāṃśukomalā 
ābaddhāṃśukaparyaṅkā prameyāsanasaṃsthitā 
16.50 īdṛgrūpadharāṃ devīṃ pañcaviṃsāntamadhyagām 
aparāṃ sṛṣṭikartārāṃ parāṃ ṣaḍviṃśa-m-ādimām 
16.51 ādimaṇḍalamadhyasthām asitotsaṅgagāminīm 
dvibhujābharaṇopetām ekavaktrāṃ trilocanām 
16.52 cārubimboṣṭhavadanām anekaguṇaśālinīm 
arūpāṃ rūpasampannāṃ tasyānte rūpasambhavām 
16.53 icchārūpadharāṃ devīṃ navātmānena labhyate 

śrīkubjikā uvāca 

16.54 navātmānamayaṃ sarvaṃ tasyaitat paramā parā 
sā parā labhyate yena sa navātmā vada prabho 

śrībhairava uvāca 

16.55 sādhu bhairavi yatnena pṛcchitaṃ nirmalārthataḥ 
na tena rahitaṃ kiñcit satyedaṃ paramārthataḥ 
16.56 prasahyaṃ pūjyate yatra tatra siddhakramo na hi 
yatra siddhakramo bhadre tatredaṃ gopitaṃ mayā 
16.57 ājñālabdharasāsvādās tyajantīdaṃ sudurlabham 
viśuddhamaṇḍalordhvedaṃ maṇḍalaṃ na tadojjhitam 
16.58 pañcaviṃśakabhedasya pūrvaṃ vidyā samuddhṛtā 
tasyaivādyaṃ dvikaṃ tyajya śeṣānyatkevalākṣarāḥ 
16.59 bhṛgulākulasaṃvartās trīṇy etāni anukramāt 
tatra lākulabhṛgveśaṃ bhujaṅgāsanasaṃsthitam 
16.60 saṃvartakamahākālaṃ pinākīguṇasaṃyutam 
khaḍgavālāsanāsīnam arghīśānandanopari 
16.61 'nugrahānandamūrdhnisthaṃ krūrānandasamanvitam 
parānandasamāyuktaṃ kūṭedaṃ maṇḍaleśvaram 
16.62 yasya garbhagataṃ sarvaṃ vāṅmayaṃ sacarācaram 
tasyopāyam idaṃ devi upeyasya mahātmanaḥ 
16.63 etat kauleśvaraṃ nāma kūṭarūpaṃ kuleśvaram 
nānena rahitā siddhiḥ sādhanaṃ khecarīpade 
16.64 maṇḍalāntargataṃ pūjya maṇḍalaṃ kāmadaṃ smṛtam 
yena pūjitamātreṇa sarvavyāptipadaṃ labhet 
16.65 mahataḥ kulavṛkṣasya ḍālāḥ syuḥ pañcaviṃśati 
ājñāpuṣpopaśobhāḍhyaṃ vijñānaphalamālitam 
16.66 paripakvarasānandaṃ mokṣatṛptikaraṃ phalam 
prāpyate yena yajñena helayā maṇḍalaṃ tu tam 
16.67 khecarīcakramadhyasthaṃ tritattvaguṇaśālinam 
maṇḍalodbhṛtadīpyantaṃ maṇḍalaṃ vaḍavāmukham 
16.68 catuḥśaktisamāyuktam ekaikaṃ pañcaviṃśakam 
ambikā raudriṇī jyeṣṭhā vāmādau sṛṣṭisāgare 
16.69 etaccatuṣṭayāntasthaṃ naveśānaṃ kuleśvaram 
vaḍavānala-m-āsīnam ājñāśūladharaṃ vibhum 

śrīkubjikā uvāca 

16.70 maṇḍalānāṃ pṛthak pūjā siddhyarthaṃ sādhakeśvara 
vyāptisthaṃ tu yathā sarvaṃ tathā vadata bhairava 

śrībhairava uvāca 

16.71 kathayāmi varārohe devyā dehagataṃ yathā 
vyāptināmavibhedena jñāsyante jñānino yathā 
16.72 kāmamaṇḍalakaṃ skandhe khecaraṃ tadadhaḥsthitam 
gurumaṇḍalakaṃ sandhau pāṇimadhye ghanojjvalam 
16.73 rudramaṇḍalakaṃ dakṣe pāṇau tat tu nakhāgratah 
candramaṇḍalakaṃ vāme chāyāmaṇḍalakaṃ tv adhaḥ 
16.74 jayantamaṇḍalaṃ sandhau jhaṅkāraṃ karamadhyataḥ 
jñānamaṇḍalakaṃ vāme aṅgulyāgre vyavasthitam 
16.75 varāṅgordhvanitambādho dakṣiṇe 'mṛtamaṇḍalam 
somamaṇḍalakorubhyāṃ sandhau ḍāmaramaṇḍalam 
16.76 kanyāmaṇḍalakaṃ padbhyām umāmaṇḍalakaṃ nakhe 
tārāmaṇḍalakaṃ vāme kuladivyorumadhyataḥ 
16.77 anantamaṇḍalaṃ sandhau pādānte mitramaṇḍalam 
aṅgulyāgre samākhyātaṃ maṇḍalaṃ merupūrvakam 
16.78 raktamaṇḍalakaṃ kukṣau dakṣiṇe vāmataḥ śikhī 
kulamaṇḍalakaṃ pṛṣṭhau vajrasaṅkhyāta madhyagam 
16.79 maṇḍalaiś caikaviṃśābhir āvṛtaḥ sa kuleśvaraḥ 
ṣaṣṭhamaṇḍalakaṃ nābhau kālamaṇḍalakaṃ hṛdi 
16.80 śrīmannāthāditaḥ kṛtvā trayaitānukrameṇa tu 
ekaikaṃ caikaviṃśānāṃ maṇḍalānāṃ patīśvarāḥ 
16.81 pañcaviṃśakayogasya catuṣkaṃ patirūpiṇam 
samudāyapatīnāṃ ca patir eko visuddhirāṭ 
16.82 randhramaṇḍalakaṃ vṛtte romakoṭyordhvasaṃsthitam 
sarvāṅgasundaraṃ devyāḥ śarīraṃ maṇḍalodbhavam 
16.83 śāmbhavīyaṃ parā mūrtiḥ svayaṃsambhṛtamaṇḍalam 
maṇḍalodbhṛtadehā sā sā ca maṇḍalamadhyagā 
16.84 svayaṅkartā svayaṃhartā maṇḍalānāṃ kuleśvarī 
vaḍavānalarūpeṇa triśūlāsanasaṃsthitā 
16.85 kaṅkāleśvaramūrdhnisthā ṣaṭpadārthoparisthitā 
caturbhujaikavadanā cākṣasūtrakarābhayā 
16.86 sarvajñānāvabodhena pustakānyavarapradā 
pañcamordhvakramo devyā maṇḍalodbhṛtavigrahā 
16.87 caturāśītipramāṇena koṭīnāṃ mūlatordhvataḥ 
śarīraṃ śrīkuleśasya tasya kumbho 'bjamaṇḍale 
16.88 sthitā sañjanate sarvaṃ tena kubjeśvarī parā 
maṇḍalodbhṛtadehā sā maṇḍaloparisaṃsthitā 
16.89 maṇḍalāntargatā devī dhyātvā maṇḍaladāyikām 
śrīmahānandavṛkṣo 'yaṃ ḍālānekacitaṃ tu tam 
16.90 śāstrapallavasaṃyuktaṃ vijñānāṅkuraśobhitam 
akhaṇḍajñānapuṣpāḍhyaṃ siddhodayaphalānvitam 
16.91 pakvānandarasālāḍhyaṃ mokṣatṛptyādisatphalam 
eṣa maṇḍalavṛkṣo 'yaṃ yasmāt sarvaṃ prapadyate 
16.92 sarvathā tad yajen nityaṃ vyākulena-m-anena kim 
nirācāreṇa yogena sācāreṇa na tad yajet 
16.93 vyāptibhāvam ato matvā bhuktvā cāṇḍālajāṃ tanum 
sa paśyati paraṃ vṛkṣaṃ khecaraṃ maṇḍalodbhavam 
16.94 tadbhāvabhāvanāṃ kṛtvā guruṃ matvāvadhārayet 
yat kiñcit puratas tasya tat sarvaṃ maṇḍalaṃ viduḥ 
16.95 yadi syān maṇḍalo dehaḥ pūjayen maṇḍalādibhiḥ 
vaḍavānalayogena ekaikaṃ māsakāvadhim 
16.96 kulavidyāsamāyuktaṃ catuṣkalasamanvitam 
kauleśānasamāyuktaṃ svasthānasthopadeśagam 
16.97 evaṃ sañcintya manasā bhaktiyukto jitendriyaḥ 
pañcaviṃśatimāsena prākṛtān labhate guṇān 
16.98 dviguṇena tu kālena paiśācaguṇakṛd bhavet 
triguṇena tu kālena daivatyaṃ bhajate tu saḥ 
16.99 caturguṇena kāmitvaṃ sāmānyatvāmarālaye 
pañcamāvasthayogena satyalokāvadhiṃ vrajet 
16.100 ṣaṣṭhamena tu yogena viṣṇutvaṃ jāyate dhruvam 
saptamena tu yogena brahmāṇḍāntam anuvrajet 
16.101 aṣṭamena tu piṅgo'sau navamānteśvaraḥ prabhuḥ 
maṇḍalīśo daśāvasthaḥ khecaraḥ khecarādhipaḥ 
16.102 maṇḍalābhyāsayogena nirācāreṇa yoginaḥ 
vaḍavānalamadhye tu vaḍavānalapūritaḥ 
16.103 vaḍavānalarūpeṇa nirācāravrataṃ caret 
vaḍavānalam ārūḍho vāḍavīyaṃ padaṃ labhet 
16.104 yataḥ sarvamayaṃ tac ca jagedaṃ vaḍavodaram 
ājñeyaṃ sakalā devī divyājñāto 'sya sambhavaḥ 
16.105 ṣaṭpadārthasya cānyasya pradhānaṃ vaḍavānalam 
mahāvṛkṣavaṭo yasya sūkṣmabījavaṭo yathā 
16.106 tathā tu hṛdayasyāsya sarvam evodare jagat 
khecarādhipatir devyā vaṭamālāvalambinī 
16.107 ājñāsūtraprayoktā sā caturāśītiguṇojjvalā 
guruvaktrāt tu labhyeta māleyaṃ vaḍavānalī 
16.108 svamanīṣikato 'nyathā paśyanto 'pi na paśyati 
etat te pañcakaṃ proktaṃ sarvavyāptibhṛtodaram 
16.109 khecarāntapadaṃ divyaṃ catuṣkānyaṃ punaḥ śṛṇu 

iti kulālikāmnāye śrīkubjikāmate ṣaṭprakāre mahānandapañcake ṣoḍaśamaḥ paṭalaḥ  

śrīkubjikā uvāca  

17.1 catuṣkaṃ pañcakaṃ nātha ṣaṭkaṃ tu pañcakaṃ tathā 
jñātaṃ vyāptibhṛtaṃ sarvaṃ catuṣkaṃ kīdṛśaṃ punaḥ 
17.2 pṛcchāmi tvāṃ na śaknomi svata eva prasādataḥ 
vada nātha guṇānandaṃ yena jānīmahe 'khilam 

śrībhairava uvāca 

17.3 kubjike 'timahāprājñe kiṃ na budhyasi mūḍhadhīḥ 
yady evaṃ lapitaṃ sarvaṃ kathayāmy avaśeṣakam 
17.4 sthitibhogalayāntasthaṃ pūjāvyāptipadaṃ yathā 
tathā taṃ nikhilaṃ sarvam uktānuktaṃ vadāmi te 
17.5 devyāpīṭhacatuṣkaṃ tu siddhapiṇḍacatuṣṭayam 
yugaiś caturbhis tad vyāptaṃ parāparavibhāgaśaḥ 
17.6 akuleśvaradevasya yathā tiṣṭhati vigrahe 
tathā śṛṇu maheśāni nirācārapadaṃ yathā 
17.7 o-jā-pū-kā-kramaṃ madhyād vāmadakṣāgratordhvataḥ 
vyāptibhūtaṃ yajet sarvaṃ nābhyadhaḥ siddhapūrvakam 
17.8 o-jā-pū-kā-kramād dhṛtsthaṃ dakṣādau vāma nābhigam 
upadeśena jānīyād guruvaktrāt tu śāmbhavam 
17.9 evaṃ karṇamukhe nāsā nāsordhvaṃ pūrvavad yajet 
pūrvoktārcisamāyuktaṃ siddhavṛndasapālakaiḥ 
17.10 balakaumāravṛddhasthaṃ triśuddhisthaṃ tritattvagam 
vaḍavānalayogena gahvarād upadeśataḥ 
17.11 kulākule pare sthāne sarvajñāṃ śāmbhavaṃ kramam 
sarvavyāptisamopetam ājñāpuṣpaiḥ prapūjayet 
17.12 rūpātītādiyogena maṇḍalodbhṛtavigrahā 
tatrasthā paramā devī madhyasthā pararūpiṇī 
17.13 kālamūrdhni sthitā śāntā kalātītā kalākalā 
kālahantā kalātītā kambalīyaṃ kuleśvarī 
17.14 vaḍavānalam uttīrṇā dedīpyantaguṇojjvalā 
sahasrādityasaṅkāśā rūpātītā kuleśvarī 
17.15 rūpaṃ pīṭhakramaṃ devyā nīlameghāñjanaprabhā 
bhujair dvādaśakopetā ṣaḍvaktrā barbarālakā 
17.16 bṛhodarā ca lamboṣṭhī stabdhākṣī viraladvijā 
bālakramasya madhyasthā rūpasthā nagnakubjikā 
17.17 vaḍavānalasandīptā atiraudrā subhīṣaṇā 
gurūpadeśagamyā sā divyājñārthapradāyikā 
17.18 kaumārakramamadhyasthā ekavaktrā caturbhujā 
pustakamaṇḍaludharā akṣasūtravarapradā 
17.19 vaḍavānalamadhyasthā saumyarūpā sulālasā 
mahānandamahāviṣṭā āveśantī jagattrayam 
17.20 mahāsaṃsāra-m-ambhodhes tārayantī vyavasthitā 
sā mahāntārikāpy atra kaumāre mahatāṃ gatā 
17.21 pāśaughakṣayakartā sā vidyāśāstrāvalambinī 
yasyoccārāt sphuṭanty āśu parvatān vajramausalān 
17.22 pañca pañca ca vidyāstraṃ mahāntārī sa eva hi 
akṣaraughena siddhā sā uccārāveśinī parā 
17.23 abhaktaṃ vā dviṣantaṃ vā vādasthaṃ vā tathetaram 
kupitaḥ pātayet sarvaṃ yasyaiṣā hṛdi śālinī 
17.24 padasthena tu yogena siddhā sā parameśvarī 
piṇḍam āveśayec chīghraṃ piṇḍasthāṃ śṛṇu kubjini 
17.25 vṛddhakramasya madhyasthāṃ laghurūpāṃ sutejasām 
dvibhujaikavadanāṃ tāṃ piṇḍasthāṃ patirūpiṇīm 
17.26 paśuprāṇaharāṃ devīṃ pāśajālanikṛntanīm 
damanīṃ sarvapāpānāṃ vijñānakaraṇīṃ parām 
17.27 pūrvaṃ vyāvarṇitaṃ yac ca rūpānte guṇaśālinīm 
vidyāṅgābharaṇopetāṃ piṇḍasthāṃ tāṃ vijānatha 
17.28 dvātriṃśākṣarasaṃyuktāṃ ṣaḍaṅgapariveṣṭitām 
yad uktaṃ karmasantānaṃ tad atra phaladaṃ kramāt 
17.29 mantrasiddhikarī devī piṇḍasiddhikarī parā 
vaḍavānalayogena sarvajñatvaṃ labhet tu saḥ 
17.30 vaḍavānalakubjasthā kūjate 'nandarūpadhṛk 
tena sā kubjikā nāma maṇirūpā1pakhañjikā 
17.31 asyā devyāḥ padaṃ rūpaṃ rūpātītaṃ pravartate 
piṇḍeśinī parā mātā caturāśītiguṇojjvalā 
17.32 sampūjya mānasaiḥ puṣpair aliphalgvādibhiḥ kramāt 
catuḥsiddhakramāmnāyaṃ svāmipādam anukramāt 
17.33 piṇḍayogasthitāṃ cājñāṃ saṃsmaren madhyatiryagām 
kubjinīkulam ārūḍhām abhyasantaḥ śriyaṃ labhet 
17.34 śāntipuṣṭivaśākṛṣṭi vāgvilāsaṃ jvarāpaham 
mṛtyunāśaṃ purakṣobhaṃ sainyastambhāmbhaśoṣaṇam 
17.35 paśupāśagrahastobhaṃ dantakāṣṭhāñjalīghaṭam 
nirbījīkaraṇādyaṃ ca vṛkṣasphoṭaṃ jalaplavam 
17.36 mudrāsphoṭaṃ śilācchedaṃ vṛkṣāṇāṃ labhanaṃ mahat 
nadīpravartanastambho nāvādiśakaṭasya ca 
17.37 anagnijvalanaṃ pātaḥ sainyastambhordhvaropaṇam 
jvālāstambhaṃ jalastambhaṃ ghaṭasastragirācalam 
17.38 stambhayed vajrapātaṃ tu aśanyaughaṃ nivārayet 
mārayeṭ ṭālayec chailān dārayed dharaṇītalam 
17.39 hastavṛddhir manaḥsiddhir dūrāśravaṇadarśanam 
vartamānam atītārthaṃ bhaviṣyaṃ ca laghutvatā 
17.40 vācāsiddhiś ca māhendram indrajālapravartakam 
kāmarūpāntaradhyānaṃ jñānaṃ mātṛkulasya ca 
17.41 jihvāprasāraṇaṃ cānyam aṅgaikaikavivardhanam 
sphoṭanaṃ śuṣkakāṣṭhānāṃ troṭanaṃ phalapuṣpayoḥ 
17.42 mṛtakotthāpanaṃ śīghraṃ dagdhasañjīvanaṃ mahat 
akāle vṛkṣaphalanaṃ puṣpadhānyāvarohaṇam 
17.43 parakāyapraveśaṃ ca anyajanmāvabodhanam 
parokṣamṛtakānayanaṃ dṛṣṭijvālāprasāraṇam 
17.44 dantavṛddhikaraṃ jñānaṃ jvālāvijñānam uttamam 
śarīre phalapuṣpāni pratimājalpakarṣaṇam 
17.45 jalpāyanaṃ kumārīṇām antardhānordhvadarśanam 
nirālambordhvaruhaṇaṃ pararūpāpakarṣaṇam 
17.46 citranṛtyāpanaṃ yuddhaṃ śatrūṇāṃ ca parasparam 
haraṇaṃ śabdadṛṣṭīnāṃ vardhataikaikahelayā 
17.47 parasāmarthyaharaṇaṃ puṃstriyopakaraṇaṃ param 
aṅgasaṅkocanānayanaṃ bhūtānāṃ bhūtasādhanam 
17.48 piṇḍakramasya pūjāyāṃ svādhiṣṭhānaphalaṃ labhet 
kubjānalena yogena kubjipiṇḍaṃ caturvidham 
17.49 aśvatthapattravat kubjaṃ śukacañcunibhaṃ param 
maṇikubjaṃ paraṃ cānyaṃ randhrakubjaṃ tato 'param 
17.50 etat te saṃsphuṭaṃ sarvaṃ kubjāmbīnāṃ catuṣṭayam 
piṇḍo 'tha pada rūpaṃ ca rūpātītāditaḥ kramāt 
17.51 ādyaṃ piṇḍasthitā kubjī kubjeśīti kuleśvarī 
padasthā kubjikā cānyā mahāntārī mahadbhutā 
17.52 rūpasthā kubjinī cānyā bindusthā barbarā parā 
rūpātītā tu randhrasthā kubjinī kamalānanā 
17.53 vijñānānekaviśliṣṭā ekaikā phaladāyinī 
piṇḍayogakrameṇaitāḥ kubjidehaphalapradāḥ 
17.54 mitreśānasamāyuktā kaṇṭhoṣṭhāliṅganānvitā 
golāntapaścimāntasthā śaṅkhabhedād vinirgatā 
17.55 vidyudanyonyatārebhyo viśaty ekā punar dvidhā 
evam abhyasate yāvat tāvat kāmaḥ svayaṃ kṣubhet 
17.56 svādhiṣṭhānagate yoge śākte śaktiṃ samabhyaset 
abdaikena jagat sarvaṃ kṣobhayet tridaśeśvaram 
17.57 durbhagānām abhāgyānām abdāt sarvaṃ bhaviṣyati 
yaḥ punaḥ sarvathā siddhaḥ sa sidhyaty acirāt priye 
17.58 sāttvikena tu rūpeṇa tyaktamāyāsukhojjhitaḥ 
pādaprakṣālanaṃ juṣṭaṃ yo na dadyāt sa sidhyati 
17.59 etat kulālikāmnāye piṇḍakubjicatuṣṭayam 
avijñāya na dātavyaṃ yāvan nādeśitaḥ śiśuḥ 
17.60 anādivimalamātaṅgī sarvajñā ca pulindikā 
yoge ca śabarī proktā siddhasaṃjñeti campakā 

śrībhairava uvāca 

17.61 adhunā śṛṇu kubjīśe padagranthivibhañjakam 
kramaṃ vakṣyāmi divyaughaṃ sāmarthyādinirākulam 
17.62 ājñāmoghapadaṃ khañji dvitīyaṃ kubjinīpadam 
śaktividyā tṛtīyaṃ tu caturthaughapadakramam 
17.63 catuṣpīṭhavibhedena punaḥ pīṭhacatuṣpadam 
ṣoḍaśaiva padāny āhur granthibhūtāḥ pṛthak pṛthak 
17.64 kalanti sakalaṃ sarvaṃ sthūlasūkṣmavibhāgataḥ 
nadanti kālarūpasthā[ḥ]  sthūlasūkṣmān tathāntimān 
17.65 tithyādyāntapadaṃ yānti vāmāntaṃ dakṣiṇaṃ punah 
candrasūryavibhāgena jīvitaṃ maraṇaṃ padam 
17.66 padaiḥ ṣoḍaśabhiḥ sarvaṃ granthiṃ baddhvādhvaraṃ 'khilam 
kālarūpās tu tāḥ kālaṃ hananty uccārayogataḥ 
17.67 o-jā-pū-kā-ḍi-lam-rṇa-ma-ā-dha-gi-rū-ṇa-ra-ri-pū 
evaṃ jñāte hanet kālam uccaranto 'nupūrvaśaḥ 
17.68 akṣare akṣare granthiḥ pīṭhaṃ granthicatuṣṭayam 
catuṣpīṭhamayā yoniś caturyonimayaṃ 'khilam 
17.69 pañcamī yā parā yonis tasyā granthiḥ pade pade 
tayā vyāptam idaṃ sarvaṃ kāraṇānalamadhyagam 
17.70 tat padaṃ paramaṃ proktaṃ yatra sarve padā gatāḥ 
ṣoḍaśākṣarabhedena tat padaṃ labhate sphuṭam 
17.71 prathamādhāranantākhyā madhyamāṅghryāṅgulīgatā 
kālagranthis tu gulphādho raudrīgranthir nalāntare 
17.72 jyeṣṭhāgranthir nitambādho vāme vāmādhasaṃsthitā 
kāmagranthir gudādhāre piṅgagranthis tatordhvataḥ 
17.73 adhordhvaromamadhye tu brahmagranthir udāhṛtā 
somagranthis tataś cordhve sūryagranthis tatordhvataḥ 
17.74 prāṇagranthiḥ punaś cordhve jīvagranthis tatordhvataḥ 
yena jīvanti bhūtāni tadviyogān mriyanti ca 
17.75 viṣṇugranthis tu sā jñeyā kaṇṭhasthā tāluke 'nyathā 
rudragranthir mahāraudrā īśagranthis tatordhvataḥ 
17.76 sādākhyas tu parā granthis trikoṭyordhvavyavasthitā 
māyā śaktis tataś cordhve icchānandāmṛtāplutā 
17.77 ṣoḍaśāvayavā devī khecarī tu khageśvarī 
padmasthā padmamadhyasthā haṃsasthā haṃsavāhinī 
17.78 niṣkalā sakalā devī vajradehā manonmanī 
padakramasya madhyasthā padāṅgābharaṇojjvalā 
17.79 kramamantrapadālabdhā helayā cāṇimāṣṭakam 
sādhayen mahatā devī ṣoḍaśākṣarasambhavā 
17.80 mālinī siddhadehā sā tritattvārcighanojjvalā 
aghoryāṣṭakasaṃyuktā dvādaśāṅgaprapūritā 
17.81 ṣaḍaṅgāvayavopetā divyadehā mahābalā 
asitāṅgatanūdbhūtā mantradehā maheśvarī 
17.82 mālinī śabdarāśiś ca trividyāghorikāṣṭakam 
dvādaśāṅgaṣaḍaṅgaṃ ca etad dehaṃ kulātmakam 
17.83 lalāṭakaṇṭhavakṣasthaṃ guhyāṅghrau ratnapañcakam 
ślokadvādaśabhir mālā pādādau cūlikāvadhim 
17.84 brahmasūtrojjvalā devyāḥ skandhobhau tadgrahānvitau 
pañcabījair mukhakoṣaṃ pañcauṃkāraiḥ khilaṃ nyaset 

śrīkubjikā uvāca 

17.85 paramaṃ vada kauleśa padamantrā yathā sthitāḥ 
yatra sthāne niyoktavyāḥ sphuṭaikaikaṃ pṛthak pṛthak 

śrībhairava uvāca 

17.86 kathayāmi varārohe padārthārthapadaṃ yathā 
siddhamantropadeśo 'yaṃ prakaṭārthaṃ vadāmi te 
17.87 mūrdhni vaktrākṣiṇau karṇau nāsāgaṇḍau dvijauṣṭhakau 
bhāratīśaṅkhinīdvāre śrīkaṇṭhāt senakāvadhim 
17.88 krameṇa ṣoḍaśaivaitān dakṣiṇādau padā nyaset 
dantauṣṭhādim adho nyasya bhāratīśaṅkhikāvadhim 
17.89 krodhādāv ekarudrāntaṃ skandhādau cāṅgulāvadhim 
dakṣiṇe vāmato 'py evaṃ kūrmādau śarmakāvadhim 
17.90 someśvarādyumākāntaṃ sphicādau 'ṅghryānta dakṣiṇam 
vāmato 'ṣāḍhimeṣāntaṃ pārśvau lohiśikhānvitau 
17.91 chagalaṇḍaṃ tu vaṃśasthaṃ dviraṇḍaṃ nābhimaṇḍale 
hṛdaye tu mahākālam aṣṭakaṃ purato 'nyathā 
17.92 vālibhaujaṅgapainākakhaḍgīśabakaśvetakāḥ 
bhṛgulākulasaṃvartāḥ kālaprāṇasaśukragāḥ 
17.93 majjāsthisnāyumāṃsasthā raktatvagvālimāditaḥ 
anulomavilomena kālavelāditaḥ kramāt 
17.94 nādinī tu śikhāgrasthā nakārākṣarasambhavā 
ṛ-R̥-ḷ-L̥ nivṛttyādyā mālikā śirasi sthitā 
17.95 tha śiro grasanī devī dha netre priyadarśanā 
ī guhyaśakti nādasthā nāsāyāṃ netramadhyataḥ 
17.96 vyāpayitvā sthitā devī ca tṛtīyaṃ tu locanam 
cāmuṇḍā parameśānī lalāṭasthā virājate 
17.97 bakāraṃ vadanaṃ devyā vajriṇī śaktir avyayā 
kavarge daśanās tīkṣṇāḥ kaṅkaṭā kālikā śivā 
17.98 ghoraghoṣā mukhīvīrā kavarge dasanā[ḥ ] śubhāḥ 
māyādevī i jihvā tu a vāg vāgeśvarī matā 
17.99 nārāyaṇī ṇa karṇau tu tayor bhūṣaṇam ī-parau 
mohanī ca tathā prajñā va kaṇṭhe śikhivāhinī 
17.100 lāmā vināyakī devī ḍaḍhau bāhudvayaṃ matam 
paurṇimā hastadeśasthā ṭhakārākhyaṃ vibhor matam 
17.101 jhaṅkārī kurdanī caiva jhañau cāṅgulayaḥ kramāt 
kapālinī vāmakare ṭakāraḥ parameśvarī 
17.102 dīpanī śūladaṇḍaṃ ca rephaḥ samyag udāhṛtam 
jayantī ja bhavec chūlam evaṃ devī virājate 
17.103 bhīṣaṇā vāyuvegā ca skandhayor ubhayor api 
pāvanī tu pa hṛllagnā ṣodaraṃ lambikā sthitā 
17.104 saṃhārikā kṣakāro 'yaṃ nābhir devyā[ś] ca bhairavi 
chagalī pūtanā caiva stanau chalau paristhitau 
17.105 āmoṭī tadgataṃ kṣīram āvarṇaḥ parikīrtitaḥ 
paramātmā sakāro 'yaṃ ha prāṇe śaktir ambikā 
17.106 icchāśaktir visargākhyā vyāpyabhāvena saṃsthitā 
ma nitambaṃ mahākālī śa guhyaṃ kusumāyudhā 
17.107 śukrā devī tv anusvāraṃ śukraṃ devyās tu bhairavi 
tārā takāram ūrusthā e ai jñānīkriyāv ubhau 
17.108 jānunī saṃsthitau devi bhairavyāś ca mahātmanaḥ 
gāyatrī caiva sāvitrī o au jaṅghau prakīrtitau 
17.109 dahanī dakṣapādasthā vāme phetkārikā matā 
nādiphāntā varārohe dehaṃ śaktimayaṃ śubham 
17.110 siddhapañcāśakopetaṃ mālinyārdhaśatānvitam 
evaṃ śataṃ samākhyātaṃ yojyamānaṃ tanau bhṛtam 
17.111 padadvayaṃ samākhyātaṃ tatra haṃso vyavasthitaḥ 
yāvac carati tau dvau tu tāvad ātmā samāpyate 
17.112 padamānam aśeṣaṃ tu atra sarvaṃ samāpyate 
ājñāto bhuñjate kālaṃ padaṃ jñātvājarāmaram 

iti kulālikāmnāye śrīkubjikāmate padadvayahaṃsanirṇayo nāma saptadaśamaḥ paṭalaḥ 

śrībhairava uvāca 

18.1 padagranthisamālabdhas tattvagranthisamāśritaḥ  
kubjigranthipadāntastho haṃsabhedapadaṃ vrajet 
18.2 haṃsabhede parā śaktiḥ sahajā śivatattvagā 
sā vidyā prathamā jñeyā dvitīyā tu parāparā 
18.3 catvāriṃśatpadā jñeyā vidyātattve niveśitā 
haṃsagranthisamārūḍhāṃ prakaṭārthaṃ vadāmi te 
18.4 someśvaraṃ samuddhṛtya patitaṃ suranāyike 
śikhīśaṃ kevalaṃ paścāl lākulaṃ tadanantaram 
18.5 arghīśāsanasaṃsthaṃ hi bindunā mastake hatam 
lākulaṃ punar uddhṛtya bhujaṅgāsanasaṃsthitam 
18.6 trimūrtinā ca cākrāntaṃ śūnyamastakabhūṣitam 
śikhīśaṃ vahnisaṃyuktaṃ jhaṇṭīśena samanvitam 
18.7 krūrānandena sambhinnaṃ lākulī tadanantaram 
bhujaṅgena tu sandīptam arghīśāsanasaṃsthitam 
18.8 tad evaṃ lākulīśaṃ tu bhujaṅgādhāram īśvaram 
trimūrtinā tu cākrāntaṃ aṃ krūraṃ śirasi sthitam 
18.9 bhujaṅgaṃ tu caturdhā vai kartavyaṃ tu kuleśvari 
kevalaṃ dvitayaṃ devi amarīśadvitayānvitam 
18.10 lākulaṃ tu tato deyaṃ jhaṇṭīśena tu bheditam 
mahāsenāhataṃ devi lākulīśaṃ samuddharet 
18.11 khaḍgīśaṃ kevalaṃ gṛhya lohitaṃ tadanantaram 
sūkṣmānandena sambhinnaṃ mahākālaṃ tu kevalam 
18.12 khaḍgīśaṃ kevalaṃ paścād umākāntaṃ tataḥ punaḥ 
jhaṇṭānandena sambhinnaṃ śvetānandaṃ kulādhipe 
18.13 kevalaṃ tu smṛtaṃ bhadre dviraṇḍaṃ tadanantaram 
trimūrtinā tu cākrāntaṃ mahākālaṃ tataḥ punaḥ 
18.14 dviraṇḍaṃ tu punar devi trimūrtyālaṅkṛtaṃ kuru 
sūkṣmānandena sambhinnaṃ caṇḍānandaṃ yaśasvini 
18.15 mahākālaṃ punaḥ paścād amarīśāsanasthitam 
bhujaṅgaṃ kevalaṃ devi śiveśaṃ sadyasaṃyutam 
18.16 lākulī bhṛgusaṃyuktaṃ nugrahīśānvitaṃ priye 
krūradevaṃ śirasthaṃ hi lohitaṃ jhaṇṭināhatam 
18.17 raktaṃ caivārghinā yuktaṃ bhujaṅgaṃ kevalaṃ punaḥ 
śivānandaṃ tu deveśi sadyojātena bheditam 
18.18 lākulam arghinā yuktaṃ śūnyamastakabhūṣitam 
bhujaṅgaṃ jhaṇṭidevena bheditaṃ kuru pārvati 
18.19 śivottamaṃ tataḥ paścāt sadyojātena bhūṣitam 
kevalaṃ tu mahākālaṃ bhujaṅgaṃ kevalaṃ punaḥ 
18.20 lohitaṃ tu punaḥ paścān mahāsenaṃ tataḥ punaḥ 
āsanasthaṃ bhṛgor devi lākulīśaṃ samuddharet 
18.21 lākulīśaṃ punar bhadre bhujaṅgāsanasaṃsthitam 
trimūrtinā tu cākrāntaṃ krūrānandasamanvitam 
18.22 jhaṇṭinā bheditaṃ devi bhujaṅgaṃ kārayet tataḥ 
śivānandaṃ tatoddhṛtya sadyānandānvitaṃ kuru 
18.23 śrīkaṇṭhaṃ kevalaṃ paścād bhauktikaṃ bindunā yutam 
eṣā parāparā devī uddhṛtā tu vilomataḥ 
18.24 catvāriṃśaddvayo varṇā ardhavarṇānvitā priye 
eṣā vidyā tathā proktā vidyātattve niveśayet 
18.25 devyā caivātmatattvasthā kriyāśaktyāparā punaḥ 
ardhasaptākṣarā devī vilomena tataḥ śṛṇu 
18.26 patitam īśa somaṃ hi śikhīśaṃ kevalaṃ tataḥ 
lākulam arghinā yuktaṃ śikhīśaṃ bhujagānvitam 
18.27 jhaṇṭīśena samāyuktaṃ lākulaṃ raktasaṃsthitam 
dvidhā bhūtaṃ tu kartavyaṃ bhedaṃ cātra vadāmi te 
18.28 arghinā pūrva sambhinnam aparaṃ tu trimūrtinā 
bhauktikaṃ kevalaṃ devi uddhṛtaṃ paramākṣaram 
18.29 bindunādānvitāḥ pañca kartavyās tu yaśasvini 
apareyam imā vidyā sarvasvaṃ yoginīkule 
18.30 parāṃ devīṃ tato vakṣye śivatattvānusāriṇīm 
lākulaṃ bhṛgusaṃsthaṃ hi bhujaṅgena samanvitam 
18.31 arghīśāsanam ārūḍhaṃ 'nugrahīśena bheditam 
bindunādakalākrāntam uddhṛtaṃ paramaṃ priye 
18.32 praṇavoccārasaṃyuktā vidyā tattvatrayātmikā 
śabdamālinimūrtisthā vidyādehaguṇojjvalā 
18.33 puryāṣṭakam aghoristhaṃ yathāvasthāṃ vadāmi te 
18.34 hrīṃ ru aghore hrīṃ shauṃ aghoryāyai prathamaṃ śiraḥ //1//
hrīṃ ru paramaghore hūṃ shauṃ paramaghorāyai mukham //2//
hrīṃ ru shauṃ ghorarūpe shauṃ ghorarūpāyai hṛdi //3// 
hrīṃ ru shauṃ ghoramukhi shauṃ ghoramukhyai guhye //4// 
hrīṃ phaṭ bhīmanāme shauṃ bhīmāyai dakṣiṇabhuje //5// 
hrīṃ hūṃ bhīṣaṇe shauṃ bhīṣaṇāyai vāmato bhuje //6// 
shauṃ hrīṃ haḥ vama shauṃ vamanyai dakṣiṇoru //7// 
hrīṃ hūṃ phaṭ piba he shauṃ pibanyai vāmatoru //8// 
18.35 etat puryāṣṭakaṃ devyā aghoryāṣṭakasaṃyutam 
nyased aṣṭavidhāṅgaṃ tu aṣṭapattreṣu sādhakaḥ 
18.36 atordhvaṃ dvādaśāṅgaṃ tu dehaniṣpattikāraṇam 
pādādau śiraso yāvan nyased aṅge yathoditam 
18.37 A siddhāīti sahaṃ padbhyāṃ ṛddhāī jānunī sahāṃ 
vidyutāyai sahim ūrubhyāṃ sahīṃ lakṣmīti guhyagā 
B dīptāikā sahuṃ nābhau sahūṃ nālāikā hṛdi 
saheṃ śivāikā kaṇṭhe sahaiṃ vasumukhī mukhe 
C sahoṃ nāsā vamanyāyai karṇe nandinikā sahauṃ 
harikeśā sahaṃ tryakṣī mahāmukhyai sahaḥ śire 
18.18.38 anena dṛḍhito hy ātmā jīvabhūtaḥ sthirīkṛtaḥ 
ṣaḍaṅganyāsayogena vyaktatvaṃ bhajate tu saḥ 
18.39 shāṃ sarvajña hṛdayāya namaḥ //1//
amṛte tejomālini tṛpti śirase shīṃ svāhā //2//
vedavedini hūṃ phaṭ shūṃ anādibodhāya śikhāyai vauṣaṭ //3//
shaiṃ vajriṇe vajradharāya svatantra kavacāya hūṃ //4//
shauṃ nit yam aluptaśakti shauṃ vauṃ dhauṃ sahaje trinetrarūpiṇe namas tubhyam anantaśakti //5//
shaḥ ślīṃ paśu hūṃ phaṭ pāśupatāstrāya sahasrākṣāya hūṃ phaṭ //6//
18.40 ṣaḍaṅganyāsayogena parādehaṃ parādhvaram 
evam niṣpannadehasya slokadvādaśamekhalā 
18.41 tadgraheṇa tu yogena brahmasūtraṃ vilambayet 
śiraḥprabhṛti pādāntaṃ pañcaratnavibhūṣitam 
18.42 yatra yat padavinyāsaṃ tat kubjīśe-m-ataḥ śṛṇu 
18.43 aiṃ haḥ a paramānande haḥ ā siddhidānandane haḥ i parāpare hrūṃ phreṃ phaṭ kṣaḥ ī śrīkulāmbike //1// 
aiṃ haḥ u kālarudrasthe haḥ ū ṛddhibalānvite haḥ ṛ śirohāre hrūṃ  phreṃ phaṭ kṣaḥ R̥ śrīkulāmbike //2//
aiṃ haḥ ḷ narakāntasthe haḥ L̥ guhyamahāmbike haḥ e sṛṣṭigate hrūṃ phreṃ phaṭ kṣaḥ ai śrīkulāmbike //3//
aiṃ haḥ o kuṇḍalaguhyānte haḥ au kuṇḍalalakṣmike haḥ aṃ kuṇḍalinī hrūṃ phreṃ phaṭ kṣaḥ aḥ kulamālinī //4//
aiṃ haḥ ka kamaladīpte haḥ kha kuṇḍalanābhige haḥ ga kālahare hrūṃ phreṃ phaṭ kṣaḥ gha svatejaśive //5//
aiṃ haḥ ṅa kamalamāle haḥ ca kramasauhṛdi haḥ cha pāpahane hrūṃ phreṃ phaṭ kṣaḥ ja kāmarūpiṇī //6//
aiṃ haḥ jha kaṇṭhakūpasthe haḥ ña śaivāmṛtātmike haḥ ṭa candrātmike hrūṃ phreṃ phaṭ kṣaḥ ṭha sukhadeśvarī //7//
aiṃ haḥ ḍa kuharāntasthe haḥ ḍha saumukhyatāmane haḥ ṇa svānandane hrūṃ phreṃ phaṭ kṣaḥ ta kālanāśanī //8//
aiṃ haḥ tha kālavamani haḥ da cogrānunāsike haḥ dha karoti sā hrūṃ phreṃ phaṭ kṣaḥ na kālarodanī //9//
aiṃ haḥ pa śrāvaṇāntasthe haḥ pha siddhim āśrite haḥ ba karoti sā hrūṃ phreṃ phaṭ kṣaḥ bha pārameśvarī //10//
aiṃ haḥ ma kālakalātīte haḥ ya śrībindunetrage haḥ ra śrīhārike hrūṃ phreṃ phaṭ kṣaḥ la sṛṣṭibinduge //11//
aiṃ haḥ va prakaṭagupte haḥ śa mahāmukhe pare haḥ ṣa svākāśage hrūṃ phreṃ phaṭ kṣaḥ sa śrīkujāmbike //12//
18.44 ajacakreśvarī rekhā dvitīyā kādibhāntagā  
mādisāntā tṛtīyā tu tribhi rekhaiḥ svareśvarī 
18.45 ambikā śūladaṇḍasthā guhyaśaktyā vibhūṣitā 
bindunādasamāyuktā uddhṛtaṃ paramākṣaram 
18.46 śrīkaṇṭha ambikā caiva dvidhārūpā tu kārayet 
punar ambā ca phetkārī dīpanyāsanasaṃsthitā 
18.47 prajñābhūṣitam ekaṃ hi jñānadevyā dvitīyakam 
bindunādayute dve tu saṃhāryā icchayānvitā 
18.48 śrīkaṇṭhādibhṛgo'ntā vai saṃsthitā kulapaddhatiḥ  
anena vidhinā devi bhinnā tu kulapaddhatiḥ 
18.49 parāmṛtapadaṃ hy etat ślokānāṃ daśakaṃ dvikam 
etasmin paṭhite devi kṣubhyante mātaraḥ sadā 
18.50 sadyāveśaḥ prajāyeta kavitvaṃ tasya jāyate 
ājñāvedhādikā siddhiḥ paṭhite ' smin prajāyate 
18.51 tvayā na kathyam abhakteṣv ity ājñā pārameśvarī 
ślokadvādaśakaṃ hy etad vaṭamālāvibhūṣitam 
18.52 vaḍavānala mantavyaṃ pādādau mastakāvadhim 
mekhaleyaṃ nyased devi vilomenopadeśataḥ 
18.53 uccāraṃ tasya cāveśaṃ sthāne sthāne pravartate 
gopanīyaṃ prayatnena na deyaṃ yasya kasyacit 
18.54 jīvasya rakṣaṇaṃ hy etad anyathā hānikṛd bhavet 
tadgraho'nyaṃ nyased devi brahmasūtravibhūṣaṇam 
18.55 dedīpyantaṃ pracaṇḍograṃ yathāvasthaṃ tathā śṛṇu 
18.56 ana aiṃ / ā tha hrīṃ / i ṛ a / ī ṛ gho / u ḷ re / ū L̥ hrīṃ / ṛ ca hsaḥ / ṛ dha pa / ḷ ṇa ra / L̥ u ma / e ū gho / ai ī re / o ba hūṃ / au ka gho / aṃ kha ra / aḥ ga rū / ka gha pe / kha ṅa hsauṃ / ga i gho / gha a ra / ṅa va mu / ca bha khi / cha ya bhī / ja ḍa ma / jha ḍha bhī / ña ṭha ṣa / ṭa jha ṇe / ṭha ña va / ḍa aḥ ma / ḍha ṭa va / ṇa ra ma / ta ja pi / tha pa va / da sa pi / dha ha va / na cha ha / pa la he / pha ā ru / ba ṣa ru / bha kṣa ru / ma ma ru / ya śa ra  / ra aṃ ra / la ta ra / va e ra / śa ai hrīṃ / ṣa o hūṃ / sa au phreṃ / ha da hsauṃ / kṣa pha aiṃ //
18.57 rudraśaktitrayaṃ hy etad ānandapadasaṃsthitam 
anyonyavalayākāraṃ pañcāśatpadabhūṣitam 
18.58 vāmaraudrāntadakṣasthaṃ dakṣaraudrāntavāmagam 
raudrāraudrasamāyuktaṃ triraudraṃ tadgraho 'py ay am 
18.59 vāgeśvarī tathā māyā mohanī ca tṛtīyakā 
jñānadevī ca gāyatrī ratnāḥ pañca ime smṛtāḥ 
18.60 nyāsamātreṇa cāveśam uccārād bhavate sphuṭam 
piṇḍasya bandhanaṃ hy etad duṣṭasiṃhavināśanam 
18.61 tadgrahābaddhamūlaṃ tu pañcaratnopaśobhitam 
ratnāṅgī ratnadehā tu ratnānāṃ nirṇayaṃ śṛṇu 
18.62 ratnāny amṛtam ity uktaṃ pañcadhā tv amṛtaṃ priye 
piṇḍabandhaṃ vinā tena jīvitaṃ tu na vidyate 
18.63 gaganāmṛtaratnaṃ tu svargaratnāmṛtaṃ tathā 
pātālamartyaratnaṃ ca nārakaṃ ratnapañcakam 
18.64 devīdehāt samudbhūtaṃ devīdehād vinirgatam 
jñānavīryaḥ savīryas tu ajñāte vīryahānikṛt 
18.65 tṛtīyaṃ daśanaṃ devyā ātmahṛtsthaṃ nitambagam 
śikhāntasahitaṃ hy etat stanavāmoparisthitam 
18.66 karṇabhūṣaṇavāmasthaṃ bījenāhatamastakam 
pañcaratnādiyogasya padoddhāraḥ prakīrtitaḥ 
18.67 prāṇaṃ vahnisamārūḍhaṃ guhyaśaktyā vibhūṣitam 
bindumastaka cākrāntaṃ pañcaratnavibhedakam 
18.68 ekaikaṃ rakṣitaṃ ratnaṃ yoginībhir yathā yathā 
tat tathā śṛṇu kalyāṇi vyāptibhedo yathā sthitaḥ  
18.69 catuḥṣaṣṭigaṇaṃ vyomni dvātriṃsat svargacāriṇaḥ 
pātālaṃ ṣoḍaśair vyāptaṃ martyaṃ caivāṣṭakānvitam 
18.70 nirayasthās tu catvāri ratnānām adhidevatāḥ 
taddīptibhāsakā jñātā ajñātā dīptihārikāḥ 
18.71 ratnaprabhāvam atulaṃ dedīpyārcisamujjvalam 
tatprabhāvād varārohe yoginyo balavattarāḥ 
18.72 ato'rthaṃ gopayanty etās tadvīryaguṇavattarāḥ 
rakṣanti svāminoddiṣṭā anādiṣṭaṃ haranti tāḥ 
18.73 amīṣāṃ darśanāt sparśāt padārthapadayogataḥ 
divyadehatvam āpnoti uccārāt kṣobhakṛd bhavet 
18.74 ṣoḍaśāvayavaṃ piṇḍaṃ ṣoḍhānyāsasuyantritam 
ślokamālānvitaṃ divyaṃ tadgrahāvalibhūṣitam 
18.75 pañcaratnakṛtāṭopaṃ parāsyam akulānvitam 
evaṃ kṛtvā śarīrasthaṃ nyāsamaṇḍalabhṛttanum 
18.76 devyā dehaṃ paraṃ hy etac chāmbhavaṃ padapūrvakam 
vaḍavānalayogasthaṃ padadehaṃ padodbhavam 
18.77 padadehopadeśena yogīnyāsaparāyaṇaḥ 
kṛtvā nyāsam aśeṣaṃ tu yas tiṣṭhati subhāvitaḥ 
18.78 tasya duṣṭāny anekāni vighnāni prabhavanti na 
śākinībhūtavetālāḥ piśācoragarākṣasāḥ 
18.79 siṃhavyāghragajā ṛkṣā duṣṭacittāny anekadhā 
ye hiṃsanti yadālabdhaṃ teṣāṃ pratyaṅgirā bhavet 
18.80 āpado rakṣayet sarvā ātmanaś ca parasya ca 
pracaṇḍayoginīghrāto nīto vā yamaśāsanam 
18.81 nyastvā ṣoḍaśavāreyaṃ satyedaṃ na mriyet tu saḥ 
sakṛnnyāse kṛte devi brahmahatyādipātakaiḥ 
18.82 samparke 'pi na lipyo 'sau sādhayed itarāṃs tu saḥ 
satyaṃ satyaṃ punaḥ satyaṃ pratyakṣedaṃ parādhvaram 
18.83 kṛtanyāsaḥ patet padbhyāṃ yasyāsau mriyate dhruvam 
guros tu na patet pāde yāvedaṃ dehasaṃsthitam 
18.84 vyādhiduḥkhaṃ bhavet tasya yady ākrośen mriyet tu saḥ 
jñāte sati na kartavyaṃ yāvad gurukule vaset 
18.85 guruhānikṛte śiṣyo na nandaty avaśaṃ priye 
ājñāniṣṭho guṇaśreṣṭhaḥ kramajñaughaviśāradaḥ 
18.86 svādhikārī tu nānyo vai vācājyeṣṭho 'bhivādayet 
pūrvasiddheṣu liṅgeṣu susiddhapratimāsu ca 
18.87 kṛtanyāsaḥ patet pādau sphuṭaty āśu na saṃśayaḥ 
sadā pravartate yas tu nyāsaṃ dehasya bhāvini 
18.88 anuṣṭhānād ṛte tasya ūrdhvenotkramaṇaṃ bhavet 
trikālanyāsayogena ardharātre tathā punaḥ 
18.89 anena vidhinā kālaṃ kṣapayanti mahāmbike 
anyaṃ ca paramaṃ devi granthibhedaṃ sudurlabham 
18.90 haṃsabhedaprayogena nyāsaṃ vakṣyāmi durlabham 
o-jā-pū-kāma-madhyasthaṃ hṛnnābhau liṅgamadhyagam 
18.91 pīṭhaṃ vā padasaṃyuktam ādyagranthicatuṣṭayam 
oghānandaṃ jayānandaṃ purānandaṃ tṛtīyakam 
18.92 kamalānandasaṃyuktam ādyabhedacatuṣṭayam 
ḍikkariyāṇa lampārṇaṃ mahānandapuraṃ tathā 
18.93 karṇau mukhe tu nāsādyaṃ pīṭhaṃ vā padasaṃyutam 
dvitīyaṃ padagranthīnāṃ nyāso 'yaṃ parikīrtitaḥ 
18.94 aṣṭakoṭisuvistīrṇaṃ trikoṭyardham ataḥ śṛṇu 
āmardakaṃ dharāpīṭhaṃ girāṅkaṃ rūpiṇīpuram 
18.95 dvau śaṅkhāv ūrdhvamāyāntaṃ madhyakoṭigataṃ nyaset 
pīṭhaṃ vā padasaṃyuktaṃ tristhaṃ granthicatuṣṭayam 
18.96 māyānirodhimadhyastham anyagranthicatuṣṭayam 
jñānaśṛṅgaṃ ramāśṛṅgam ṛṣiśṛṅgaṃ tṛtīyakam 
18.97 pūrṇaśṛṅgasamāyuktaṃ pīṭhaṃ vā padasaṃyutam 
siddhakramasamāyuktaṃ gurupaṅktisamanvitam 
18.98 jñānadṛṣṭyā nyaset taṃ tu catuṣkedaṃ kulākulam 
etat kulākulaṃ divyaṃ sarvasādhāraṇaṃ param 
18.99 padabhuktimatānāṃ ca padedaṃ parikīrtitam 
anyat parataro dehaḥ koṭidvādaśam āśritaḥ 
18.100 akulīnapadādhvānaṃ nirādhāraṃ khagālayam 
akulavyāptir ity eṣā kṣetrapīṭhasamākulā 
18.101 sācārakulayogīnāṃ ṣaṇnavatyāpadānugā 
caturāśītipadair vyāptiḥ sā cānyatra prakāśitā 
18.102 yeṣāṃ te tu punas tatra vyāvṛtante punaḥ punaḥ 
ṣaṇnavatipado haṃsaḥ sa cāmnāyavidāṃ viduḥ 
18.103 siddhakaulābhipannānām itareṣāṃ na darśitaḥ 
tatra divyakramaḥ pūjyaḥ padacāreṇa yoginā 
18.104 yena gacchen nirācāraṃ tat padaṃ paramaṃ śṛṇu 
dvādaśādhāramūrdhnisthaṃ catuṣpīṭhasamucchritam 
18.105 kṣetrāṣṭakaṃ tato 'dhastāt sandohāni tato 'py adhaḥ 
ṣoḍaśaiva pramāṇena caturdvāraṃ tatas tv adhaḥ 
18.106 upaśabdasamopetam upadvāravivarjitam 
akulīnaśarīredaṃ catuḥṣaṣṭipadānvitam 
18.107 tasmāt sañjāyate sarvaṃ sarvaṃ tatraiva līyate 
tatra dhyānaṃ japaṃ yogaṃ tatra pūjākriyādhvaram 
18.108 atra sthito na kenāpi vastunā bādhyate tu saḥ 
paro hy ātmā parā vidyā paraḥ śaivaḥ sanātanaḥ 
18.109 akulīnatanur baddhaḥ paratattvatrayeṇa tu 
ātmatattvagataṃ piṇḍaṃ satataṃ yogam abhyaset 
18.110 vidyātattvagatā mantrāḥ padayogasamanvitāḥ 
śivatattvagato yogaṃ rūpābhyāsaṃ samabhyaset 
18.111 śivatattvagato yogaṃ rūpātītaṃ tu tatra vai 
piṇḍaṃ kuṇḍalinī śaktiḥ padaṃ haṃsaḥ prakīrtitaḥ 
18.112 rūpaṃ binduḥ samākhyātaṃ rūpātītam anāmayam 
kuladehaṃ parityajya akulīnavapuḥsthitaḥ 
18.113 sa ca vai sakalaḥ piṇḍaḥ kaulikānāṃ kujīmate 
aparaṃ pāśavaṃ sarvaṃ tritattvaguṇalakṣaṇam 
18.114 śaivamārgavihīnānāṃ śaivānām anyadharmiṇām 
prasiddhena tu mārgeṇa prasiddhyarthaṃ bhajanti te 
18.115 aprasiddhojjhite siddhā na paśyanty akulāṃ tanum 
akulena vinā siddhir aihikā pātrikā na hi 
18.116 prasiddhavihite mārge mokṣaś cātra na saṃśayaḥ 
aprasiddhagatā ṛjvī ṣoḍaśāntāmṛtāhradam 
18.117 āpūrya pūrayet sarvaṃ jīvāntaṃ jīvarūpiṇī 
suprasiddhākṣabhūtā tu kālasaṅkhyākarī tu sā 
18.118 saṃsāre tu gatis tasyā mokṣamārganiyāmikā 
viṃśatyekasahasrāṇi ṣaṭśataiś ca samanvitā 
18.119 saṃsārī kurute saṅkhyā hyahorātropadeśataḥ 
apareṇa tu mārgeṇa saṃsārapathalakṣaṇam 
18.120 ahorātreṇa lakṣaikaṃ kālasaṅkhyāṃ karoti saḥ 
saptādaśāni lakṣāṇi koṭir ekā tv ahamiśi 
18.121 caturāśīti padety evaṃ kālaḥ kalati sarvathā 
padamārgavidānāṃ tu sakalād ajarāmaraḥ 
18.122 śivamārgavidānāṃ tu siddhamārge 'nyathā śṛṇu 
koṭidvādaśakopetaṃ koṭilakṣacatuṣṭayam 
18.123 ahorātrākṣasūtrasya saṅkhyeyaṃ hy akule tanau 
akuleśatanuṃ yāvat sācāraṃ kulayoginām 
18.124 taccharīrabhṛtānando nirācārapadaṃ vrajet 
kulādhvarapadaṃ hṛtsthaṃ tatrasthaṃ paramaṃ kramam 
18.125 pūjayed dhṛtstanau nābhiṃ siddhāvvāpīṭhapādukau 
śrīmadbarbaram oḍḍīśaṃ padasthaughamahārṇavam 
18.126 pūjayitvā smaret tasthām abdenoktaphalaṃ labhet 
dvibhis tu adhamā siddhis tribhir madhyamatāṃ vrajet 
18.127 ṣaḍbhir dvādaśakābdena khecara madhyamottamaḥ 
adhamaṃ bhūcaraṃ karma madhyamaṃ bilasādhanam 
18.128 uttamottamasiddhībhiḥ khecaraḥ khecarordhvagaḥ 
evaṃ devi samastedaṃ padayogakriyādhvaram 
18.129 kathitaṃ sarahasyaṃ tu padamārgaṃ sudurlabham 
padasyāpi hi rūpo 'sti rūpātītaṃ tu saṅkramaḥ 
18.130 haṃsajñānapadaṃ proktaṃ rūpasthaṃ śṛṇu sāmpratam 

iti kulālikāmnāye śrīkubjikāmate catuṣkasya padabhedam aṣṭādaśamaḥ paṭalaḥ 

śrībhairava uvāca 

19.1 rūpaṃ tu dvividhaṃ proktaṃ sthūlasūkṣmaṃ prakīrtitam 
sthūlam ekavidhaṃ bhadre sūkṣmarūpam anantagam 
19.2 kaṇṭhakūpāditaḥ kṛtvā nirodhyāntam apaścimam 
rūpopalabdhisaṃsthānaṃ vijñānānandapūritam 
19.3 pramāṇaṃ rūpamārgasya viṃśatkoṭyekasaṃsthitam 
māyāvadhis tu kūpādau atra vijñānasambhavaḥ 
19.4 etad rūpapadair vyāptaṃ rūpacakrasamanvitam 
koṭiśaḥ koṭiśaś cakraṃ cakre cakre catuṣṭayam 
19.5 vijñānānāṃ varārohe prabhāvo 'syānuśīlaya 
caturāśīti-m-ekatra kramāt sthūlaṃ pṛthak pṛthak 
19.6 kathayāmi yathānyāyaṃ citrabhānvāditaḥ priye 
dvitīyaṃ vāruṇaṃ rūpaṃ tṛtīyaṃ daṇḍapāṇikam 
19.7 prāṇarūpaṃ caturthaṃ tu haṃsarūpaṃ tu pañcamam 
ṣaṣṭham ātmavataṃ rūpaṃ saptamaṃ śaktipūrvakam 
19.8 aṣṭamaṃ brahmaṇo rūpaṃ navamaṃ keśavātmakam 
dasamaṃ tu bhaved rudraṃ candram ekādaśaṃ vidhuḥ 
19.9 dvādaśaṃ bhāskaraṃ rūpam īśvarākhyaṃ trayodaśam 
kodaṇḍadvayamadhyasthaṃ dedīpyantaṃ suvarcasam 
19.10 kodaṇḍatiryagau dvau tu vāmanau kubjikātmakau 
kodaṇḍāntargatau cānyau karṇakubjāntare sthitau 
19.11 śaṅkharūpadharau dvau tu sāṅkhyayogasya dāyakau 
aṣṭādaśam anantākhyaṃ piṅgalaikonaviṃśamam 
19.12 viṃśamaṃ sakalīśānaṃ nirodhī caikaviṃśamam 
vaḍavānalam āsīnam ekaikaṃ cakrarūpiṇam 
19.13 cintayantaḥ svabhāvena abhāvapadam āśritaḥ 
akuleśvararūpeṇa vijñānaprabhavo bhavet 
19.14 yasya yad yādṛśaṃ rūpaṃ tad rūpaṃ dharate tu saḥ 
avāntarapadasthasya pāramparyojjhitasya ca 
19.15 tasya cābhyāsayogena na sarvajñapadānugam 
yasya yad yādṛśī vyāptis tatrasthas tatphalaṃ labhet 
19.16 kāraṇānte mahādevo vibhāti kiraṇojjvalaḥ 
satatābhyāsayogena trirabdāt tatpadaṃ vrajet 
19.17 nirodhinīpadārthānāṃ mahāgranthipade sthitā 
tārayed viditā santī avijñātā prapātayet 
19.18 mahāmāyārṇavaṃ ghoraṃ tārayed viditā satī 
mahāntārīti sā proktā sarvarūpoparisthitā 
19.19 tasyā rūpam ajānantaḥ sthūlasūkṣmasusūkṣmagam 
na paśyanti guṇaṃ rūpaṃ yāvad eṣāṃ na saṅkramet 
19.20 pūjitā dhyāyitā mātā pūrvokte kramamaṇḍale 
aṣṭakoṭisuvistīrṇe trikoṭyordhvaguṇojjvale 
19.21 tatrasthoccāritā dhyātā pūjitā tu phalapradā 
sādhayet sarvarūpāṇi vaṭendīkusumārcitā 
19.22 rūpaṃ devyās tu pūrvoktam aśeṣaguṇaśālinam 
kiṃ tu noccāritaṃ tasya sthūladehaṃ yathā sthitam 
19.23 tasya coccāraṇād devi prabuddhakiraṇojjvalā 
yaṣṭīhatā bhujaṅgīva pātayed avalokanāt 
19.24 tadvad eṣā mahāvīryā mahāntārī mahābalā 
vidyāyaṣṭihatā santī sṛṣṭicakre hy anekadhā 
19.25 ṣaṭprakāroparisthā sā ṣaḍvaktrā bṛhadodarā 
bhujair dvādaśakopetā koṭarākṣā subhīṣaṇā 
19.26 vajrahastā tu vajrasthā ṣaḍyogikulamadhyagā 
ṣaṣṭḥīśānasamāyuktā siddhapaṅktau niveśitā 
19.27 vidyādaṇḍasamāyuktā tasyoccāraṃ śṛṇuṣva me 
yoginīnāṃ kuleśā tu gopitānyatra śāsane 
19.28 hā svā yai prathamaṃ padaṃ ṇḍā ka ḍu ku dvitīyakam 
ḍu ku ṭī ṅga tṛtīyaṃ tu pi ṭī ṅga ri caturthakam 
19.29 pañca pañca tathā pañca svarūpākṣaramālikā 
eṣā sāṅketikā proktā saṃsphuṭā guruvānane 
19.30 eṣopāyo mahāntāryā durlabhaḥ prakaṭīkṛtaḥ 
tasyaivoccāraṇāt sarvaṃ kampate ḍāmarīgaṇam 
19.31 saṃhārakramaṣaṭkasya vṛddhājñeyaṃ prakīrtitā 
ājñā kramati bhaktānām abhaktānāṃ na saṅkramet 
19.32 kiṃ tu cārādhitā kiñcit pāramparyaugham āgatā 
uccaranto hanec chailān kruddhasyānyeṣu kā kathā 
19.33 asyā devyārcane dhyāne jape havanatatparaḥ 
sthūlaṃ saṃsādhayet sarvaṃ mahāmāyāntakāvadhim 
19.34 yat sañcintayate rūpaṃ tat sarvam icchayā bhavet 
mahāmāyāvinā yogī māyaiva guṇakṛd bhavet 
19.35 bhūguṇo bhūcare mārge jalarūpo jaleśvaraḥ 
tejasvī tejaso mārge vāyor vāyubhṛteśvaraḥ 
19.36 vyomni vyomādhipo yogī pañcāntaguṇayogataḥ 
tripañcavarṣād ūrdhvaṃ ca sarvajño guṇa-m-īśvaraḥ 
19.37 vaṭendīvaramālābhiḥ pūjayantaughasantatim 
sādhayen nikhilaṃ rūpaṃ sthūlasūkṣmam atīndriyam 
19.38 tatprasādena māyordhvaṃ bhittvā śaktitrayaṃ vrajet 
tatraiva sā mahāmāyā sūkṣmarūpā susūkṣmagā 
19.39 khecare 'nekarūpā sā sūkṣmasūkṣmatarā parā 
dṛśyate mṛgatṛṣṇeva gurvājñātopadeśataḥ 
19.40 akuleśvaradevasya padāntam anuvartinī 
viśuddhamālinī hy eṣā tadābhyāsena sarvavit 
19.41 abhyāso 'py asya kartavyaḥ pṛṣṭhe dattvā tu bhāskaram 
prāsādagṛhavṛkṣāṇāṃ sandhyākālāntare sthitaḥ 
19.42 atha ced vṛkṣamūlādho madhyāhne samupasthite 
pasyate rūpabhṛt sarvaṃ sūkṣmasūkṣmāṇavo hradam 
19.43 rūpam anyad varārohe śṛṇuṣva karaṇātmakam 
yena sādhayate rūpaṃ khecarādim anukramāt 
19.44 sarvasādhāraṇaṃ devi na bhavaty aphalapradam 
yāvan na tatprasādena gurvājñātaḥ pravartate 
19.45 śubhe 'hani muhūrte vā śiṣyam ekāntato nayet 
ājñāṃ dattvā prapūjitvā kṛtvā maṇḍalakādikam 
19.46 tatopari ca saṃsthāpya nirmale gaganāntare 
chāyāṃ nirīkṣayitvā tu kaṇṭhakūpopadeśataḥ 
19.47 tato nirīkṣayed vyomaṃ sākāraṃ rūpadarśanam 
paśyate bhāskaraṃ bimbaṃ śivarūpaṃ sadāśivam 
19.48 taṃ dṛṣṭvā pātakānāṃ ca avasānaṃ bhaviṣyati 
ṣaṇmāsābhyāsayogena bhūcarīṇāṃ patir bhavet 
19.49 trirabdena tu bhūnātho hartā kartā svayaṃ prabhuḥ 
avasthāṃ tyajate sarvāṃ pañcāvasthāparaṃ vrajet 
19.50 nirācāreṇa yogena tan nāsti yan na sādhayet 
uktānuktaṃ tu deveśi sarvam asmāt prasādhayet 
19.51 sakṛdabhyāsayogena māse vā tv ayane 'pi vā 
vindate hy āgataṃ kālam āpado vātmanaḥ pare 
19.52 kṛṣṇavarṇena devena ṣaṇmāsān mriyate dhruvam 
vaktramūrdhni bhayaṃ vindyān mūrdhni pātān mriyed dhruvam 
19.53 lohite brahmahatyā tu pīte vyādhibhayaṃ bhavet 
pādau yatra na dṛśyete videśagamanaṃ bhavet 
19.54 ūrumārge bhaved rogaṃ guhye vai naśyate priyā 
udare arthanāśaṃ tu hṛdaye mṛtyubhāg bhavet 
19.55 bhujahīne pated bandhur vāme bhāryābhayaṃ bhavet 
ṣaṇmāsāllakṣayet sarvam ātmanaś ca parasya vā 
19.56 upadeśena deveśi śeṣaṃ ca guravānanāt 
rūpapūrṇahradāntastho rūpastho nirapekṣadhīḥ 
19.57 sūkṣmasūkṣmāntarūpeṇa rūpātītapadaṃ vrajet 
yogasiddhā mahādevi dṛśyante vyomagāgaṇāḥ 
19.58 bindurūpās tu te sarve kvacid dṛśyanti na kvacit 
ghaṭādhāragataṃ prāṇaṃ kūrmayantreṇa pīḍayet 
19.59 nocchvasen māsam ekaṃ tu tathyaṃ bhairava-m-abravīt 
bhairavovāca kalyāṇi kularūpaṃ prakāśitam 
19.60 akulaṃ vyāpakaṃ rūpaṃ susūkṣmaṃ śṛṇu sāmpratam 
ekānekavibhāgena saṃsthitā vyomamālinī 
19.61 amṛtāmbhodhimadhyasthā cārasthā cāravāhinī 
icchārūpadharā devī kubjinīti kujāmbikā 
19.62 dvibhujaikamukhī devī athānekabhujānanā 
cārasthā cāramadhyasthā cāradehā caleśvarī 
19.63 candragarbhasya caryeyaṃ cāravī caṇḍacaṇḍikā 
pīṭhamadhyagatā pūjyā candragarbhasamanvitā 
19.64 ṣoḍaśārakamadhyasthā caturvargaphalodayā 
pīṭhapīṭhādhipair yuktā sarvajñā sarvadāyikā 
19.65 ājñāvabodhajananī divyarūpaprakāśinī 
asyāḥ pragopitaṃ rūpaṃ yoginībhir varānane 
19.66 tena rūpavatānāṃ tu rūpavyāptir na sidhyati 
dedīpyantī mahānandā sahasrādityavarcasā 
19.67 sphurantī mālikā divyā ājñātaḥ sampravartate 
sadoditaṃ sadānandaṃ parānandapradāyakam 
19.68 kalātītaṃ tu kālāntam ājñārūpojjvalaṃ param 
anantaṃ sakalaṃ jñānaṃ divyājñāparamojjvalam 
19.69 uttarasya ca ṣaṭkasya rūpedaṃ parasambhavam 
dakṣiṇasyāpi ṣaṭkasya śaktiyuktasya varṇitam 
19.70 sthūlarūpaṃ varārohe sarvatraiva prakāśitam 
uttaraṃ gopitaṃ rūpaṃ devatābhiḥ susiddhidam 
19.71 kasmāt sidhyati śīghredam anyatra kṣapaṇākulam 
bhairaveṇa tu rūpeṇa bhairavatvaṃ prasādhayet 
19.72 vighnajālojjhitaṃ hy etat tenedaṃ śīghrasiddhidam 
atra rūpasamālabdhaḥ pūrvoktaṃ labhate phalam 
19.73 akulakramamārgeṇa ājñāyogena sarvathā 
akulīnakramāntasthaḥ kubjīśapadam āśritaḥ 
19.74 prāpyate bhairavānandaṃ samastānandapūrvakam 
toṣito 'haṃ tvayā devi tenedaṃ saṃsphuṭaṃ mayā 
19.75 kīrtitaṃ tava kalyāṇi sugopyaṃ rūpasādhanam 
sarvatantreṣu luptedam īṣad yogimate sphuṭam 
19.76 mauktikāvalisādṛśyaṃ sitaraktaṃ tu pītagam 
grīvā kuṇḍalinī tasya viyogaṃ tu tadā bhavet 
19.77 cañcuprasāraṇe varṣaṃ durbhikṣaṃ cañcusampuṭe 
kṛṣṇavarṇe bhaven mṛtyuḥ ṣaṇmāsāt tu na saṃśayaḥ 
19.78 sarvam eva na paśyeta sadyam eva vinaśyati 
bhrūmadhyagatam ātmānaṃ ṣaḍaṅgena mahāmate 
19.79 dṛśyate sūryavad bimbaṃ pratyakṣaṃ cāgrataḥ sthitam 
hrasve nīle bhayaṃ vindyād dīrghe sthūle hy arogatā 
19.80 dhūmre uccāṭanaṃ proktaṃ rakte rogaṃ varānane 
kṛṣṇe brahmavināśaṃ vā mṛtyur evābhijāyate 
19.81 samale tu tathā hānir nīlamāle tathāpadaḥ 
vāyavyāṃ tu yadā dhūmrāṃ mālāṃ pasyati yogavit 
19.82 tadā uccāṭanaṃ devi nairṛtyāṃ daṃṣṭriṇo bhayam 
āgneyyāṃ tu yadā bhinnāṃ mālāṃ paśyati yogavit 
19.83 deśabhraṃśo ' gnidāhaś ca rājā caiva vinaśyati 
madhye tasya yadā chidraṃ paśyate yogacintakaḥ 
19.84 mṛtyus tasya varārohe divasair daśabhir bhavet 
īśāne sthāvarabhayaṃ kauberyām arthasiddhidam 
19.85 aindryāṃ vai sthānalābhaṃ ca vāruṇyāṃ sukham edhate 
yāmyāyāṃ mriyate devi nātra kāryavicāraṇāt 
19.86 sampūrṇaṃ susamaṃ pītaṃ snigdhaṃ rūkṣatvavarjitam 
sāmalaṃ siddhidaṃ proktaṃ jīvādityaṃ varānane 
19.87 śrīmatkubjimate sarvaṃ saṃsphuṭaṃ kathitaṃ tava 
mālinī vyomasaṃsthā ca bindur vyome tathaiva ca 
19.88 kulākhyaṃ puruṣaṃ vyome rūpātītam ataḥ śṛṇu 

śrībhairava uvāca 

19.89 ūcus tv evaṃ punar bhadre rūpātītasya nirṇayam 
śṛṇuṣva sarvabhāvena avajñārahitā satī 
19.90 amanaskaṃ mano'tītaṃ bhāvābhāvavivarjitam 
layoccāravinirmuktaṃ hetutarkavivarjitam 
19.91 heyopāyavinirmuktaṃ śrutidṛṣṭāntavarjitam 
nāstikyabhāvasampannaṃ śūnyabhūtam anāmayam 
19.92 prameyāvaliyogasya atītaṃ kāraṇeśvaram 
atīndriyam anābhāṣaṃ parākāśaṃ tu tad viduḥ 
19.93 tasyopāyam idaṃ sarvaṃ yogamārgakriyādhvaram 
sādhyate yena mārgeṇa rūpātītaṃ tu tac chṛṇu 
19.94 vyomaṃ kṛtvā samākāśe sa saṃsmṛtya vilāpayet 
asmin taṃ tu cidākāśe bāhyākāśe sa eva hi 
19.95 parākāśe pare sthāne yānākāśam atordhvataḥ 
rūpātītaṃ tataś cordhve niḥsandigdhaṃ padaṃ pare 
19.96 bahunoktena kiṃ devi pūrvaṃ vyāvarṇitaṃ maya 
guror asya prasādena labhyate paramaṃ padam 
19.97 pūrvaṃ vyāvarṇitaṃ tubhyam adṛṣṭaguṇalakṣaṇam 
etat sarvaṃ samākhyātaṃ śāmbhavasya guṇāspadam 
19.98 nirācāreṇa mārgeṇa śāmbhavaṃ tu samabhyaset 
kim abhyāsaḥ punas tasya yasya sarvaṃ puraḥsaram 
19.99 yasya sambhavitaṃ śambhum anantaguṇadāyakam 
yogātmā vai sa sarvatra pūjyate yoginīkule 
19.100 yadi śambhuvidher bhaktaḥ saṃsāre viratātmanaḥ 
sa sādhayati sarvajño dehenānena sarvagaḥ 
19.101 na dhyānaṃ na japaḥ pūjā maṇḍalādiprapūjanam 
nirācāravidhānena dehenānena bhairavi 
19.102 ātmānaṃ pūjayen nityaṃ yathālabdhopajīvakaḥ 
agnivat sarvavarṇeṣu sa śīghraṃ phalabhāg bhavet 
19.103 prākṛtām adhamāṃ siddhiṃ madhyamāṃ cottamāṃ ca yām 
uttamottamatāṃ yānti ṣaḍbhir māsaiḥ kramāt kramāt 
19.104 adhikārapadasthena kartavyaṃ vidhipūrvakam 
gurumaṇḍalakādyaṃ ca pūrvāmnāyaprapūjanam 

śrīkubjikā uvāca 

19.105 śrutaṃ sarvaṃ ca deveśa padārthānāṃ ca nirṇayam 
kim āmnāyaṃ kathaṃ pūjā etad ācakṣva bhairava 
19.106 devyuktaṃ ca vacaḥ śrutvā bhairavo hasitānanaḥ 
pūjāmnāyam idaṃ sarvaṃ kathyamānaṃ na budhyasi 
19.107 dvīpāmnāyas tu prathamo devyāmnāyo dvitīyakaḥ 
pīṭhāmnāyas tṛtīyas tu siddhāmnāyaś caturthakaḥ 
19.108 asyoddhāraṇam ekatra pūjanaṃ tat prakīrtirtam 
guptadeśe sugandhāḍhye viviktopadravojjhite 
19.109 pīṭhāḥ pīṭhādhipāḥ siddhāḥ pīṭhāmbās tatsamīpataḥ 
pīṭhamadhyagatāṃ devīṃ catuḥsiddhasamanvitām 
19.110 maṇḍalottaradigbhāge gurupaṅktiṃ prapūjayet 
etad āmnāyam ākhyātaṃ kiṃ tu maṇḍalakānvitam 
19.111 talahastapramāṇena yonyagre maṇḍalādikam 
pūjyo 'haṃ maṇḍale tatra navātmānapadākṣaraiḥ 
19.112 ānandapadasaṃyuktaṃ śaktibhairavapūrvakam 
bhairaveti padaṃ paścād vīrādhipatayeti ca 
19.113 saṣoḍaśapadair yuktaḥ pūjanīyo 'tra maṇḍale 
āmnāyamaṇḍalaṃ hy etat samekhalacatuṣkalam 
19.114 sarvam etat kramāmnāyaṃ maṇḍalopari maṇḍalam 
pūjitena bhavaty āsu tat sarvam uditaṃ mayā 
19.115 alinā pūritaṃ pātraṃ samayālabdhodakaṃ pṛthak 
karmakāle prakartavyaṃ pūjānte 'rghanivedanam 
19.116 candanair dhūpanaivedyair dadyād ācamanaṃ pṛthak 
tasmāt kriyākalāpena ārādhanavidhiṃ yajet 
19.117 dīpotsavaṃ sanaivedyam alipātraṃ saphalguṣam 
cakrapūjāvidhir hy evaṃ kuryād ārādhane vidhau 
19.118 athavāmnāyam ādhāraṃ divyaughāgamapaddhatim 
pūjayet sarvabhāvena sarvāmnāyaṃ sa gopayet 
19.119 athādyamaṇḍalaṃ yones tadvad asya dine dine 
kurvantasya parā vyāptiḥ kramoghaṃ sampravartate 
19.120 oghādhāram idaṃ divyam āgamaṃ yaḥ paṭhed idam 
pādukau pūjayitvā tu caturdaśyāṣṭamīṣu ca 
19.121 puṣpāvaraṇake divye vastramālyopaśobhite 
divyagandhasugandhāḍhye dīpamālopaśobhite 
19.122 sauvarṇarajatādībhis tāmralohaśilāmṛdā 
bhaktyā-devaṃ svaśaktyā ca piṣṭadīpān ghṛtānvitān 
19.123 naivedyaphalguṣālibhyāṃ puṣpadhūpair anekadhā 
evaṃ kṛtvā tataḥ paścād vyākhyāne vācane 'pi vā 
19.124 gurumaṇḍalakaṃ kuryāt triṣkālaṃ pustakāgrataḥ 
ahaṃ vai guravas tasya yatrāste cāgamaḥ svayam 
19.125 guruvac ca pramantavyaṃ vidyābodhaparaṃ gurum 
na vinā ca guror vidyā na vidyārahito guruḥ 
19.126 yathā gurus tathā vidyā yathā vidyā tathā guruḥ 
prāptavidyā guroḥ pārśve vidyāprāpte gurutvatā 
19.127 evaṃ cāmnāyiko mārgaḥ sarvathā granthato 'rthataḥ 
vetti siddhaḥ sa me tulyaḥ sāmānyas tatsamo na hi 
19.128 eṣa te kauliko mārgaḥ paramārthopadeśataḥ 
kulaṃ ca kulavidyāṃ ca kulamārgaṃ kulakramam 
19.129 catuṣkaṃ yo vijānāti sa bhavet kulanandanaḥ 
catuṣṭayaṃ samākhyātaṃ pṛccha-m-anyaṃ yathāruci 

iti kulālikāmnāye śrīkubjikāmate catuṣkanirṇayo nāma ekonaviṃśatimaḥ paṭalaḥ 

śrīkubjikā uvāca 

20.1 purā mahyaṃ tvayā deva dvīpāmnāyaḥ pracoditaḥ 
paramārthopadeśena yathā tv evaṃ vada prabho 

śrībhairava uvāca 

20.2 satyedaṃ sādhu deveśi yat tvayā paripṛcchitam 
dvīpāmnāyāvatāraṃ tu sugopyaṃ prakaṭāmi te 
20.3 ādyakalpāvatāre tu udyānārṇavamadhyataḥ 
kṛṣṇaraktajanākīrṇaṃ dedīpyārcisamaprabham 
20.4 oghasṛṣṭes tu saṃsthānaṃ mātaṅgadvīpam uttamam 
dvitīye 'tra pare kalpe sindūrāruṇasaprabham 
20.5 pītaraktajanākīrṇaṃ brahmaghnaṃ dvīpanāyakam 
tejaḥsṛṣṭes tu saṃsthānaṃ karālāgnisamaprabham 
20.6 tṛtīye dvāpare kalpe kusumbhodakasannibham 
pītāruṇajanākīrṇaṃ rajasā dvīpam ujjvalam 
20.7 krīḍāsṛṣṭes tu saṃsthānaṃ caṇḍogrākṣisamaprabham 
udyānabhairavāmbhobhiḥ kallolālīsamākulam 
20.8 mahākalpe caturthe tu padmarāgasamaprabham 
śvetaraktajanākīrṇaṃ viśuddhāmoghasampadam 
20.9 icchāsṛṣṭes tu saṃsthānam atrodyānaṃ mahāvanam 
gandhamālyasupuṣpāḍhyaṃ mahocchuṣmopaśobhitam 
20.10 pañcame divyakalpe tu candrakoṭisamaprabham 
candrakāntimayaṃ divyaṃ viśuddhodadhimadhyagam 
20.11 kāmānandajanākīrṇaṃ catuḥsṛṣṭipravartakam 
anekānandasampannaṃ candradvīpaguṇāvṛtam 
20.12 caturvarṇaguṇānandaṃ caturvargaphalodayam 
caturmāyājanātītaṃ caturthāntamṛtātmakam 
20.13 jñānakriyām adhiṣṭhānam avyaktāvyaktarūpiṇam 
sṛṣṭisandoham ānandaṃ candradvīpaguṇāspadam 
20.14 pañcadvīpopacāro 'yam upadvīpāny ataḥ śṛṇu 
catvāry eva sabījāni vyaktiṃ yānti kulādhvare 
20.15 upadvīpāruṇaṃ cādyaṃ vāruṇaṃ tu dvitīyakam 
narasiṃhaṃ tṛtīyaṃ tu lokālokaṃ caturthakam 
20.16 dvīpopadvīpasambhūtaṃ sarvam etac carācaram 
vyaktāvyaktaṃ tu taṃ yasmāt kāraṇaṃ taṃ nigadyate 
20.17 pare catvāri dvīpāni catvāry evaṃ parāṇi ca 
candradvīpaṃ paraṃ tebhyo madhyasthaṃ vyaktikāraṇam 
20.18 dvīpasṛṣṭiparānandam udyānārṇavamadhyagam 
lakṣitavyopadeśena śeṣānyad vistṛtaṃ purā 

śrīkubjikā uvāca 

20.19 dvīpānandaṃ kathaṃ deva kathitaṃ tu mayā śrutam 
tathāpi me manoglāniḥ kathayasva yathā sphuṭam 
20.20 vyāpyavyāpakabhāvena yatsthāne saṃsthitāni tu 
yasmād utpattisaṃsthānam etat sarvaṃ vada prabho 

śrībhairava uvāca 

20.21 sādhu sādhu mahābhāge sādhu mālini sarvathā 
pṛcchitaṃ śṛṇu kalyāṇi niravadyaṃ vadāmi te 
20.22 ādau ṣoḍaśa pīṭhāni pīṭhe dvīpasamudbhavaḥ 
tāni dvādaśadhā viddhi ekaikaṃ ca pṛthak pṛthak 
20.23 kulacakrasamāyuktaṃ triḥprakāraṃ vilakṣayet 
pīṭhopapīṭhasaṃyuktaṃ kṣetrasandohalakṣitam 
20.24 upakṣetropasandohe dve dve pīṭhasamāvṛte 
lakṣitavyāni yatnena upāsya guravaṃ priye 
20.25 catustriṃśati dvīpāni dvīpasthaṃ tricatuṣṭayam 
mātarāṇāṃ varārohe ekaikasmin vyavasthitam 
20.26 dūrasthāni purasthāni dehasthāni vilakṣayet 
tair vinā sādhanaṃ siddhir yatnenāpi na jāyate 
20.27 itarasya bahisthāni kṣetrasthāni tu sādhake 
dehasthāni tu tasyaiva kiṃ tv evaṃ hi sa muktibhāk 
20.28 kurute yatra saṃsthānaṃ kvacit sādhakapuṅgavaḥ 
sādhanaṃ mantrayogasya liṅgasaṃsthāpane'pi vā 
20.29 pratimā cādhikārārthaṃ jñātvā sthānaṃ samāśrayet 
anyathā naiva bhuktis tu dvandvadveṣo rujānvitaḥ 
20.30 dvīpaṃ dvīpādhipaṃ devyā dvīpanāthasamanvitam 
pīṭhabhinnakramaṃ jñātvā sidhyate hy avicārataḥ 
20.31 kṣetragrāmapurasyaiva pīṭhasya nagarasya vā 
jñātvā pañcasu saṃsthānaṃ saṃsthānaṃ kārayet tadā 
20.32 pañca pañca tathā pañca pañcamāntaṃ kulāntikam 
calasaumye catuṣkaṃ tu īśvaraikaṃ diśāditaḥ 
20.33 pīṭhavyūhavaraṃ madhye dvīpavyūhaṃ bahisthitam 
puraṃ nāma bhaved yatra tāṃ diśaṃ tu samāśrayet 
20.34 asthigūthāvṛtaṃ cāpi doṣair dviṣṭaṃ yathā bhavet 
tathāpi bhogam āpnoti tatsthānanyāsayogataḥ 
20.35 nākṣareṇa bhaven mantraṃ yogaś caiva guṇānvitaḥ 
akṣareṇāpi mantrasya kiṃ tu tatsthānayogataḥ 
20.36 mantrasthāpitaliṅgāni nisphurāṇi yaśasvini 
dṛśyante sthānahīnāni siddhaiḥ saṃsthāpitāni tu 
20.37 sthānavaikalyabhāvena yasyāścaryaṃ kuleśvari 
svatejodīpitaṃ śambhuṃ kvacid dṛśyati nisphuram 
20.38 sarvajñaṃ sarvadaṃ mantram ajasraṃ bhāvapūrvakam 
sarvadaṃ sarvakālasthaṃ kālarūpāmṛtātmakam 
20.39 gopitaṃ sarvatantreṣu dvīpāmnāyena gopitam 
dvīpākṣaraṃ tathā vāraṃ tithinakṣatrasaṃyutam 
20.40 sādhakākṣarasaṃyuktaṃ mantram etat surārcitam 
pīṭhayuktaṃ prameyena bhidya pīṭhena cetaram 
20.41 daśa-m-ekādaśenaiva kūṭasthaṃ vā samekataḥ 
purasyādyakṣaraṃ vāpi svasthāne kṣobhakṛd bhavet 
20.42 sarvasyāpi hi kṣetrasya praveśe japam ārabhet 
svasthānātmakamantreṇa svasthānena puraṃ viśet 
20.43 diśām ālokya japtavyaṃ saptavārāvadhi priye 
tāvat kṣubhyati tat kṣetraṃ bālavṛddhayuvān api 
20.44 sthitir vai yatra mantavyā tatraiva vidhim ācaret 
sakṛd anyatra coccāraṃ japamānaṃ puraṃ viśet 
20.45 tatrānnapānaśayanaṃ kiñcid duḥkhaṃ na jāyate 
yaḥ punaḥ sarvabhāvena bhaktiyuktaḥ samabhyaset 
20.46 dvīpasthānaṃ samāsthāya sveṣṭamantrasya sādhayet 
tatrāpi tasya siddhīni bhavanty aṣṭavidhā priye 
20.47 dvīpādhipam ajānanto varṣapūrṇaśatena vā 
tathāpi na hi sidhyanti yogād dhyānāc ca mantriṇaḥ 
20.48 pīṭhādhipatayaḥ proktāḥ ṣoḍaśaiva varānane 
tais tu vyāptam idaṃ sarvaṃ catustriṃśāntagocaram 
20.49 dvīpādhipatayaḥ proktāś catustriṃśati kevalāḥ 
pīṭhādhipatibhir yuktāḥ pañcāśa patayas tu te 
20.50 ādyantasaṃsthitaṃ bhadre madhye liṅgasya lakṣayet 
pīṭhagrāmapurasyāpi lakṣayitvā nirākulam 
20.51 pālakasyākṣaraṃ yatra yad idaṃ na tad ādimam 
kasmāt pīṭheṣu adhipāḥ pīṭhabhinnaṃ na pūjayet 
20.52 na guruṃ nādimaṃ cāntaṃ na madhyaṃ pīṭhasaṃyutam 
kevalaṃ yadi labhyeta tadādyaṃ tu surārcite 
20.53 liṅgasaṃjñā tu nāmasya sarvato adhipāvṛtam 
tasmād ekatamaṃ gṛhya liṅgamūlaṃ yad akṣaram 
20.54 taṃ tu gṛhya vikalpena madhyāntaṃ varjayet priye 
evaṃ jñātvā tataḥ siddhir jāyate nirvikalpataḥ 
20.55 avijñāya na pūjyetāṃ yas tu kurvīta sādhanam 
mama tulyās tu kurvanti vighnaṃ vai pālakāḥ priye 
20.56 atra sārataraṃ proktaṃ niścayam adhipān prati 
śrutaṃ devi tvayā sarvaṃ nāma pañcāśakeṣv api 
20.57 aghoryāḍāmare tantre sūcito 'py asya nirṇayaḥ 
saṃsphuṭaṃ sarvabhāvena nirṇītaṃ kubjinīmate 

śrīkubjikā uvāca 

20.58 kathaṃ deva sthitā dehe pīṭhadvīpādhipāśrayam 
kva sthāne saṃsthitā deva etad ācakṣva niścayam 

śrībhairava uvāca 

20.59 śṛṇu devi yathā dehe pīṭhaiḥ ṣoḍaśabhiḥ śiraḥ 
āvṛtaṃ vaṃśaguhyāntaṃ dvīpaiḥ kodaṇḍakāvadhim 
20.60 grīvādho vāṃśamārgeṇa kandordhvaṃ yāva saṃsthitam 
pañca dvīpāni deveśi brahmaṇyādhiṣṭhitāni tu 
20.61 pañca nābhigatā bhadre māheśyālaṅkṛtās tu te 
jaṭhare pañca vaiṣṇavyā kaumāry eva hṛdi sthitā 
20.62 pañcadvīpānvitā kālī kaṇṭhānte saṃvyavasthitā 
aindry ākāśapadasthā tu catuṣkaparivāritā 
20.63 caturdvīpasamāyuktā cāmuṇḍā tu bhruvottare 
mahākālī tu kopasthā saṃhārapathavartiṇī 
20.64 devyādhiṣṭhānadvīpeṣu yo yatrāntavyavasthitaḥ 
daṇḍadhārī pracaṇḍaś ca daṃṣṭrālī vajratuṇḍakaḥ 
20.65 trijaṭī śaṅkhatuṇḍaś ca kapālī triśiras tathā 
ete vargādhipāḥ proktā aṣṭau vasumahābalāḥ 
20.66 yāṃ diśaṃ saṃsthitās te vai tanmukhas tu prapūjayet 
sabāhyābhyantaraṃ matvā tato 'sau siddhibhājanaḥ 
20.67 eṣa devi samāsena dvīpāmnāyaḥ prakāśitaḥ 
śeṣo 'nyo vistaro 'py asya kulasāre vadāmy aham 
20.68 vijñāna ṛddhisampannaṃ jñānamaṇḍalapūritam 
tenedaṃ śrīmataṃ proktaṃ bhuktimuktipradāyakam 
20.69 jñātena tantrasāreṇa anuṣṭhānaṃ vinā priye 
bhājano bhuktimuktīnāṃ yady evaṃ gopayet sudhīḥ 
20.70 śrīmatena vinā yuktāḥ khaṇḍajñānavimohitāḥ 
hastyandhavad vibhajyante dṛṣtihīnā yatas tu te 
20.71 āgataṃ tu gajaṃ śrutvā andhavṛndena sau vṛtaḥ 
pucchakarṇāṅghrihastābhyāṃ Pṛṣṭhakukṣodareṣu ca 
20.72 yena yatra gajaḥ spṛṣṭas tadbhāvas tena mantritaḥ 
pucchahastā vadanty evaṃ gajo 'yaṃ cāmarākṛtiḥ 
20.73 karṇalagnās tu sūrpeva pādalagnokhalaṃ yathā 
bhittirūpaṃ tu kukṣisthā pṛṣṭhasthā gṛharūpiṇaḥ 
20.74 stambhobhau hastalagnau tu muṣalau dantidantagau 
evam andhaganā mūḍhā anyonyaṃ spardhayanti te 
20.75 anyaiś cakṣuryutais tv evaṃ yudhyamānāḥ parasparam 
tān dṛṣṭvā hāsyam ārabdhaṃ taṃ śrutvā vismitās tu te 
20.76 atha śrutvā mahāhāsyaṃ kimarthaṃ hasitā vayam 
ūcus tv evākṣiyuktena mā yudhyaivaṃ vimohitāḥ 
20.77 dṛṣṭihīnās tv aho tubhyaṃ hastirūpo 'nyathā sthitaḥ 
hastino 'ṅgāni sarvāṇi yāni spṛṣṭāni tatparaiḥ 
20.78 paṭalāntaritā dṛṣṭir gatvā vaidyam upāśrayet 
yena paśyasi sarvāṅgaṃ śrīkubjaughamahāgajam 
20.79 gajo yathāndhavṛndasya tathā jñānaṃ pravartate 
ājñākramaṃ vinā lokas tatkramaṃ kubjinīmate 
20.80 kathitaṃ niravadyaṃ te gajasyāvayavo yathā 
gajāṅganyāyato yatra dakṣavāmordhvakaulike 
20.81 sarvaṃ sampāditaṃ tubhyam ājñānandakulārṇavam 
idānīṃ śṛṇu kalyāṇi kālacakraṃ yathāsthitam 

iti kulālikāmnāye śrīkubjikāmate candradvīpāvatāro nāma viṃśatimaḥ paṭalaḥ 

śrībhairava uvāca 

21.1 lakṣācāramanorūpāḥ śaktayo vīryasaṃsthitāḥ 
rudraśaktisamāveśās tābhir ātmanibṛṃhaṇam 
21.2 śivacaitanyayogena śakticaitanyabṛṃhaṇam 
śakticaitanyayogena jīvacaitanyabṛṃhaṇam 
21.3 jīvacaitanyayogena mantracaitanyabṛṃhaṇam 
mantracaitanyayogena piṇḍacaitanyabṛṃhaṇam 
21.4 piṇḍacaitanyayogena bāhyācārasya bṛṃhaṇam 
caitanyena vinā sarvam asvatantraṃ śilādivat 
21.5 niṣkriyaṃ cetanāhīnaṃ mṛtadehopamaṃ priye 
agnicaitanyayogena jalam apy atra dāhakam 
21.6 tasmāt sarvaprayatnena vidyāvīryacidātmakam 
dharāmaṇḍalagarbhe tu dvīpadeśāntaraṃ yajet 
21.7 dvādaśaivātra yoginyo dvādaśāre prapūjayet 
karṇikāyāṃ yajed devaṃ śabdarāśiṃ salakṣaṇam 
21.8 kumārī siṃhaladvīpaṃ suvarṇaṃ ca tṛtīyakam 
karṇaprāvaraṇaṃ cānyaṃ svāmukhaṃ deśam uttamam 
21.9 kulūtam oḍḍiyānaṃ ca ebhir deśair yajet sudhīḥ 
jālandharaṃ ca vikhyātam ekapādaṃ tathāparam 
21.10 pārasaukulavikhyātaṃ kuśadvīpaṃ ca śālmalī 
parṇadvīpaṃ kumārākhyaṃ yavadvīpaṃ tathāparam 
21.11 deśaṃ tu kāmarūpākhyaṃ puṣkaradvīpam eva ca 
aparaṃ kaṭāhadvīpaṃ cīnadeśam ataḥ param 
21.12 candradvīpaṃ janadvīpaṃ ratnadvīpaṃ suśobhanam 
rasadvīpaṃ ca gomedaṃ garbhodaṃ sūryadvīpakam 
21.13 āsavadvīpaṃ vikhyātaṃ marudeśasamanvitam 
vasantaṃ mahāsaradvīpam amṛtadvīpam eva ca 
21.14 dvīpam ānandagandharvau agnidvīpaṃ mahāvanam 
aṅgāradvīpaparyantaṃ nagnadvīpāvasānagam 
21.15 eṣāṃ dvīpādhipānāṃ ca nāmaṃ vakṣyāmi tac chṛṇu 
kṣetrapālā mahāraudrā rakṣāṃ kurvanti sādhake 
21.16 vidrumo gastinaś caṇḍas tathā yakṣo gaṇādhipaḥ 
mahābhṛgur jayo nāma mahājihvas tu vikramaḥ 
21.17 dhvāṅkṣaś ca jayabhadraś ca pīṭhe pīṭhe samāsate 
mahādivyo dadhīciś ca kumārīśas tathāparaḥ 
21.18 mahādhaṃṣṭraḥ karālīśaḥ śrutīdharo nigadyate 
mahādhvāṅkṣo mahānandī sugandhī ca gopālakaḥ 
21.19 puṣpadanto dhanāḍhyaś ca vipulo nandakārakaḥ 
śukro viḍālo dvāv etau śukāruṇaśubhānanau 
21.20 ratipriyasurapriyau dvau citrāṅgasudurjayau 
rasano viḍālaḥ pradyumnaḥ kṣetrapālāḥ kulakrame 
21.21 manoharā rūpiṇī devī citrā citrarathā tathā 
citrāṅgī citrarekhā ca vicitrā citranā śubhā 
21.22 citrākṣī citrarūpā ca subhadrā kāmadā śubhā 
kakārasya imā devyaḥ kanyadvīpādhikariṇī[ḥ ]  
21.23 kṣetrapālo mahāviṣṇuś cakrahasto mahābalaḥ 
krūrā ca piṅgalā caiva khaḍgikā lampaṭā satī 
21.24 daṃṣṭrālī rākṣasī dhvāṅkṣī lolupā lohitāmukhī 
bahvāśī ca virūpā ca lampaṭā āmiṣapriyā 
21.25 khakārasya imā devyaḥ siṃhaladvīpam āśritāḥ 
kṣetrapālo mahāyogī agastiś ca mahā-ṛṣiḥ 
21.26 suprakīrṇā prakīrṇā ca lambā lambamukhī tathā 
lamboṣṭhī dīrghadaṃṣṭrā ca lambajā prāṇahāmukhī 
21.27 gajakarṇā sukarṇā ca mahākālī subhīṣaṇā 
vātavegā ravā ghorā gakāre devatāḥ sthitāḥ 
21.28 svarṇadvīpādhikāriṇyaś caṇḍanātho mahābalaḥ 
ghanaravā ghoraghoṣā mahāghoṣātighoṣikā 
21.29 ghaṇṭā ghaṇṭeśvarī ghorā mahāghaṇṭā sughaṇṭikā 
atighaṇṭātighorā ca kalakalāraveti ca 
21.30 ghakāre devatā hy etāḥ karṇāprāvṛtamaṇḍale 
yakṣarājā mahādevaḥ kṣetrapālo mahābalaḥ 
21.31 vibhūtir bhogadā kāntiḥ khaḍginī padminī tathā 
gāndhāri yogamātā ca sudhārā paramojjvalā 
21.32 sehārī māṃsahārī ca prāṇahārī balāpahā 
ṛcchikā gṛdhratuṇḍī ca revatī raṅgisaṃjñikā 
21.33 ṅakāre devatā hy etāḥ svāmukhe maṇḍale sthitāḥ 
rājyaṃ pālayate deśe kavarge uttarāpathe 
21.34 kṣetrapālo gaṇapati rakṣāṃ kurvanti sādhake 
caṇḍā caṇḍamukhī caṇḍā caṇḍavegā mahāravā 
21.35 bhṛkuṭī caṇḍavīryā ca caṇḍabhrū caṇḍanāyikā 
cañcalā calavegā ca calajihvā caleśvarī 
21.36 cakāre devatā hy etāḥ kṣetrapālo mahājayaḥ 
kulūtadeśavāsinyo rakṣāṃ kurvanti sādhake 
21.37 kālarātrī ca vetālī kaṅkālī ca karaṅkiṇī 
kiṅkiṇī caṇḍaghoṣā ca aṭṭahāsā mahāravā 
21.38 caṇḍamātaṅgī caṇḍālī sūkarī kukkuṭī tathā 
gandhārī ḍombī campākṣī chakāre devatāḥ smṛtāḥ 
21.39 nāyikā oḍḍiyāne tu kṣetrapālo mahābhṛguḥ 
jvalinī jvālinī caiva mahājvālāvatī prabhā 
21.40 tejā tejavatī vahniḥ sutejā nirmalojjvalā 
jvālāvatī karālī ca visphuliṅgā śikhāśikhī 
21.41 jakāre devatā rājñaḥ sarvasattvavaśaṅkarī[ḥ] 
jālandhare ca deveśe kṣetrapālo mahājihvaḥ 
21.42 subhadrā bhīmabhadrā ca bhadrā caiva śubhānanā 
bhīmā bhīmavatī kāntī kaṅkālī ca karālinī 
21.43 bhadrakālī sukālī ca vikaṭā kaṅkaṭeti ca 
cārvākī lampaṭī caiva jhakāre devatāḥ smṛtāḥ 
21.44 maṇḍale ekapāde tu mahāmāyā balotkaṭāḥ 
citraseno mahāvīraḥ kṣetrapālo mahābhayaḥ 
21.45 subhaṭodbhaṭā vikaṭā kuṭilā caiva kaṅkaṭā 
vīramātā suvīrā ca khaḍginī śūlinī kharā 
21.46 chucchundarī viḍālī ca ñakāre devatāgaṇāḥ 
pārase tu mahādevyo adhikāraṃ prakurvate 
21.47 dhvāṅkṣo nāmeti vikhyātaḥ kṣetrapālo bhayānakaḥ 
rājā dakṣiṇadeśe tu cavarge ca kramīśvarī 
21.48 mṛgā ca śaśirekhā ca hariṇī rohiṇī tathā 
amṛtodbhavā parṇajīvī jīvarakṣā sujīvikā 
21.49 hariṇākṣī sujīvā ca candrodayāmṛtodbhavā 
ṭakāre devatā hy etāḥ kuśadvīpe vyavasthitāḥ 
21.50 kṣetrapālo jayabhadraḥ kuśadvīpaprapālakaḥ 
vyomanī vyomarūpā ca vyomavyāpī śubhodayā 
21.51 grahacārī sucārī ca viṣahārī viṣāntikā 
jṛmbhodyānā ca phetkārī devakī durjayā mahā 
21.52 ṭhakāre devatāḥ pūjyāḥ śālmalīdvīpam āśritāḥ 
kṣetrapālo mahādivyaḥ kapālahasto mahābalaḥ 
21.53 cañcalā capalā caṇḍā ḍamarī ḍāmarī śubhā 
ḍiṇḍinī muṇḍinī muṇḍā śākinī ḍākinīti ca 
21.54 kartanī kākinī devī haṭṭakī ḍākinī mahā 
ḍakāre devatā hy etāś cīnadvīpe vyavasthitāḥ 
21.55 dadhīciḥ kṣetrapālas tu tatra deśe prapūjayet 
yamadaṃṣṭrā mahādaṃṣṭrā antramālā karālikā 
21.56 vikarālā karālinyā tālajaṅghā sujaṅghikā 
lohajaṅghātijaṅghā ca mahāvegātivegagā 
21.57 vajraśaṅkhī naṭī caiva balā caiva tathāparā 
ḍhakāre devatā nāma kumārīdvīpam āśritāḥ 
21.58 kṣetrapālaḥ kumārīśo rakṣapālas tathaiva ca 
balā cātibalā caiva ajitā cāparājitā 
21.59 jayā ca vijayā devī jṛmbhanī stambhanī tathā 
andhanī mohanī māyā nigaḍā kīlanī tathā 
21.60 yavadvīpe sthitā devya adhikāraṃ prakurvate 
mahādaṃṣṭras tu vikhyātaḥ kṣetrapālo mahābalaḥ 
21.61 ṇakāre devatā hy etāḥ kāmarūpanivāsitāḥ 
danturā raudrabhāṣā ca abhramāla kulāsubhā 
21.62 calajihvāgraṇetrā ca ruru[r] hūṃkārikā tathā 
khādakā rūpanāma ca saṃhārī ca kṣayāntikā 
21.63 kaṇḍanī peṣaṇī caiva mahāgrāsī kṛtāntikā 
takāre devatāḥ khyātāḥ puṣkaradvīpam āśritāḥ 
21.64 nāyakā devatā nāma kṣetrapālaḥ śrutīdharaḥ 
ḍambhakī ḍimbhiḍimbhā ca kaivartarajalehikā 
21.65 dravaṇī drāvaṇī kṣobhā plavanī plāvanīti ca 
madotkaṭā madakṣobhā madavāhā mahābalā 
21.66 kāmasandīpanī devī atirūpā manoharā 
thakāre devatā nāma saṃsthitā[ḥ ] paratīrake 
21.67 kṣetrapālo mahādhvāṅkṣaḥ khaḍgahasto mahābalaḥ 
aruṇā ghoṣadevī ca revatī ghoradāyikā 
21.68 stambhanī ghorarakṣā ca ghorarūpā ca ghoriṇī 
ghoraghoratarāghorā ghorā vikaṭanāyikā  (em.; ghorā ghoratarāghorā 'tighorā vikaṭanāyikā Ed.)
21.69 vānarī kroṣṭakī caiva surāsavamadhupriyā 
dakāre devatā rājāś cīnadeśe suvāsitāḥ 
21.70 kṣetrapālo mahānandī śūlahasto mahābalaḥ 
bhīmarāvā surāvā ca saṃstārī savarākṣikā 
21.71 stambhanī roṣaṇī raudrā rudravatyā chalāpahā 
mahāśaktiḥ kṣāntiśīlā vajratuṇḍī vṛkodarī 
21.72 dhakāre devatā hy etāḥ pūjanīyāḥ sadā budhaiḥ 
kṣetrapālaḥ sugandhī ca gandharvo vīṇahastakaḥ 
21.73 candradvīpe suvāsinyo ārtānām ārtināśanī[ḥ] 
kalanī kṛntanī kālī kālasaṃvartanī kalā 
21.74 anteṣṭhī ca pratiṣṭhā ca śāntipuṣṭikarī tathā 
jayā dhṛtikarī saumyā kāmadā śubhadānanā 
21.75 sutejā kāmamatikā nakāre devatāḥ śubhāḥ 
janadvīparatā nityaṃ sādhakānāṃ tu vatsalāḥ 
21.76 kṣetrapālas tu gopālo dharmajñaḥ satyavādinaḥ 
dharmā dharmavatī śīlā pāpahā dharmavardhanī 
21.77 dharmarakṣitavārtā ca dharmādharmavatīti ca 
dharmakartā dharmapriyā dharmasandīpanīti ca 
21.78 pakāre devatā rājā ratnadvīpārṇave sthitāḥ 
kṣetrapālo mahākāyas tasmin deśe ' dhipo mahān /
21.79 sumatir durmatir medhā vimalā manavikāśinī 
śuddhir buddhir matiḥ kāntir balotsāhanavardhanī 
21.80 balā cātibalā caiva prāṇavṛddhikarī parā 
nirlepā nirghṛṇā māyā sarvapāpakṣayaṅkarī 
21.81 phakāre devatā rājā saradvīpe suvāsinaḥ 
puṣpadantas tu vikhyātaḥ kṣetrapālo mahābalaḥ 
21.82 raktā caiva viraktā ca udvegā śokavardhanī 
kāmatṛṣṇā kṣudhā mohā nidrālasabhayā jarā 
21.83 sukṛṣṇā rodanī kuṣmā malāṅgī śiśunāśanī 
bakāre devatā rājā hy etā gomedamaṇḍale 
21.84 dhanado nāma vikhyātaḥ kṣetrapālo mahāyaśaḥ 
tṛṣṇā ca kāmadā bhogā nirduḥkhā sukhadā tathā 
21.85 ānandā ca sunandā ca mahānandā śubhaṅkarī 
vītarāgā mahotsāhā jitarāgā manoramā 
21.86 bhakāre devatā hy etā madhye garbhodamaṇḍale 
vipulo nāma vikhyātaḥ kṣetrapālo mahābalaḥ 
21.87 manonmanī manaḥkṣobhā madonmattā madākulā 
madā gajamadā nāma kāmānandasuvihvalā 
21.88 mahāvegā suvegā ca mahāvegā kṣaṇāpahā 
kramaṇī caiva nāmā ca krāmaṇī ca tathāparā 
21.89 sūryadvīpe mahāyogī[ḥ ]  sarvāḥ kanakapiṅgalāḥ 
makārasya imā devyo rājā adhipatir mahān 
21.90 ānando nāma vikhyātaḥ kṣetrapālaḥ sadā sthitaḥ 
hayavegā suvegā ca ativegavatī mahā 
21.91 cakravegā viruddhā ca calacittavatī matī 
rodanī kṣodanī bālā 'tiroṣā kalahapriyā 
21.92 vidrutā trāsanī devī manovegā ca cañcalā 
yakāre devatā rājā āsavadvīpasaṃsthitāḥ 
21.93 śukro nāmeti vikhyātaḥ kṣetrapālo mahābalaḥ 
vidyujjihvā mahājihvā śṛṅgāṭā kuṭilā sphuṭā 
21.94 jvālā caiva sujvālā ca mahājvālā tathaiva ca 
jvālāvatī visphuliṅgā jvālābhasmakṣayāntakā 
21.95 rakāramadhyagā devyo marudeśādhipo mahān 
viḍālaḥ kṣetrapālaś ca mahābalaparākramaḥ 
21.96 ullekhā ca patākā ca bhogā bhogavatī mahā 
mahābhogātibhogā ca bhogāḍhyā bhogapāragā 
21.97 ṛddhir vṛddhir dhṛtiḥ kāntir lakāre devatāḥ śubhāḥ 
vasantadvīpavāsinyaḥ kṣetrapālaś ca kāruṇī 
21.98 variṣṭhā ca parā divyā amṛtā tu phalāśinī 
hariṇākṣī suvarṇā ca kanakareṇupiñjarā 
21.99 ratnā ca ratnadvīpā ca sudvīpā ratnamālinī 
ratnaśobhā mahāśobhā romaśobhā parādyutiḥ 
21.100 vakāre devatā hy etāḥ saradvīpādhivāsitā[ḥ] 
kṣetrapālas tu vikhyātaḥ śubhānano balotkaṭaḥ 
21.101 savarī barbarī gṛdhrī ghaṇṭakarṇā kharānanā 
hayagrīvā ca jaṅghā ca sarvagrāsā kṛtāntakā 
21.102 sarvāśī ca mahābhakṣā mahādaṃṣṭrātirauravā 
śakāre devatā nāma kathitāś ca mahāyaśāḥ 
21.103 amṛtāsavadvīpe ca kṣetrapālo ratipriyaḥ 
rāgā rāgavatī krodhā mahābhogā ca rauravā 
21.104 kruddhanī roṣaṇī kalahā kalakālī kalāntikā 
durbhedyā durbhaṭā caiva dumirīkṣā subhīṣaṇā 
21.105 yamāntakā kalī nāma ṣakāre devatāḥ śubhāḥ 
ānandadvīpavāsinyo devyo akṣayayauvanāḥ 
21.106 devaś ca kṣetrapālo 'tra surāsavavarapriyaḥ 
naṭī nāṭī kunāṭī ca vāṭakī hāṭakī viṭī 
21.107 kaṅkaṭā vikaṭā caiva subhaṭā ca bhaṭodbhavā 
sakāre devatā nāma gāndharvadvīpavāsinaḥ 
21.108 vīṇāvaṃśaratā devī nodaṃ gandharvakinnaraiḥ 
citrāṅgaḥ kṣetrapālaś ca merūrdhvavalaye sthitaḥ 
21.109 nādākṣī nādarūpā ca sarvākārī gamāgamā 
antacārī sucārī ca ūrdhvanādī suvāhinī 
21.110 saṃyogā ca viyogā ca haṃsākhyā ca visālinī 
aṅgāradvīpavāsinyo hakārākṣarasambhavāḥ 
21.111 viḍālo nāma vikhyātaḥ kṣetrapālo mahābalaḥ 
sarvagrāsī kṛtāntī ca pavanī pāvanī tathā 
21.112 bhedanī chedanī caiva sarvakārī kṣudhāśanī 
ucchuṣmā devagāndhārī bhasmāntā vaḍavānalā 
21.113 bahvāśī agnidvīpā ca kṣamā kṣemakarī parā 
kṣakāre devatā hy etā nagnadvīparatāḥ priye 
21.114 pradyumnaḥ kṣetrapālaś ca mahābalaparākramaḥ 

iti kulālikāmnāye śrīkubjikāmate dvīpāmnāyo nāma ekaviṃśatimaḥ paṭalaḥ 


śrīkubjikā uvāca 

22.1 śrutā deva mahāvyāptiḥ samastavyastavistarāt 
idānīṃ śrotum icchāmi tvatsakāśān manodbhavām 
22.2 aparāṃ dehajair bhinnāṃ śabdarāśiṃ sabhairavam 

śrībhairava uvāca 

22.3 sādhu bhadre punaḥ sādhu mahāvastuprabodhake 
tad ahaṃ sampravakṣyāmi siddhakaulaṃ mahātape 
mahākalpāntasaṃhāre mahāpralayam adbhutam 
22.4 sūryakoṭikarābhāsaṃ vidyucchaṭalatākulam 
kālāgniśikharāṭopaṃ śūlajvālormisaṅkulam 
22.5 visphuliṅgajvalantaughair mahājvālārcivartulam 
jvālāmālākulojjvālaiḥ karālair bhīmabhīṣaṇaiḥ 
22.6 svargapātālabhūrlokair antarīkṣair diśo daśa 
maccharīre samutpannā mahākrodhasamudbhavā 
22.7 akārādikṣakārāntā ekaikākṣarabheditā 
bhairavāvalinī devī vilomena samuddharet 
22.8 tad ahaṃ sampravakṣyāmi śṛṇu kubji mahādhipe 
kṣa ha sa āditaḥ kṛtvā akārāntena sampuṭam 

22.8A kṣa krodhāvali a ananta ajara bhairava
ha haṃsāvali ā mahānanda āpakumbha bhairava 
sa ānandāvali i  pracaṇḍa iḍācāra bhairava
ṣa garbhāvali ī ḍāmara indramūrti bhairava 
śa saṃhārāvali u udyāna ulkāsya bhairava 
va amṛtāvali ū vasanta ūṣmāda bhairava 
la vipulāvali ṛ ṛpudarpa ṛpusūdana bhairava 
ra kālāntakāvali R̥ kṛtānta R̥mukta bhairava 
ya pracaṇḍāvali ḷ prasanna ḷptakāya bhairava 
ma mahāmohāvali L̥ mahāmāyā L̥pāda  bhairava 
bha bhūtabhayāvali e raudra ekadaṃṣṭra bhairava 
ba vaḍavāmukhāvali ai mahādaṃṣṭra airāvata bhairava 
pha lampaṭāvali o kaṅkāla oghāmbu bhairava 
pa pavanāvali au anaṅga auṣadhīghna bhairava 
na kusumāvali aṃ svacchanda aṃjana bhairava 
dha vipulāvali aḥ manmatha aḥhvakāyabhairava 
da suratāvali ka unmatta kambala bhairava 
tha kūrmāvali kha meghanāda kharuṣānana bhairava 
ta tvaritāvali ga karāla gomukha bhairava 
ṇa mandarāvali gha vikarāla ghaṇṭāla bhairava 
ḍha khaṭvāṅgāvali ṅa mahābala ṅaṇanāntabhairava 
ḍa candrāvali ca asitāṅga caṇḍadhāra bhairava 
ṭha vajrāvali cha ulka chaṭāṭopa bhairava 
ṭa manthāvali ja ekapāda jaṭālākṣa bhairava 
ña kāntāvali jha kapāla jhaṅkīśa bhairava 
jha ambikāvali ña vyoma ñabhaṭeśvara bhairava 
ja bhedakāvali ṭa vetāla ṭaṅkapāṇi bhairava 
cha kṛtāntāvali ṭha āmardaka ṭhānubandha bhairava 
ca caturbhujāvali ḍa mahāsāha ḍāmara bhairava 
ṅa yogāvali ḍha ruru ḍhaḍhṛkarṇa bhairava 
gha bhūtāvali ṇa bhuvana ṇatīkānta bhairava 
ga abhayāvali ta vibhūti taḍidbhāsvara bhairava 
kha carcakāvali tha ūrdhvasepha thavira bhairava 
ka bhasmāntakāvali da krūra dantura bhairava 
aḥ sṛṣṭikāvali dha lohita dhanada bhairava 
aṃ vijayāvali na lampaṭa nāgakarṇa bhairava 
au brahmāvali pa carcaka pracaṇḍa bhairava 
o sadyojātāvali pha ....... phetkāra bhairava 
ai phetkārāvali ba acintya vīrasiṃha bhairava 
e karṇamoṭāvali bha mahādevāṅga bhṛkuṭi bhairava 
L̥ mahāmohāvali ma mahākālāgni meghabhāsura bhairava 
ḷ mahāmāyāvali ya mārtaṇḍa yugānta bhairava 
R̥ gāndhārāvali ra prāṇa raurava bhairava 
ṛ puṣpāvali la ananta lamboṣṭha bhairava 
ū śabdāvali va ucchuṣma vasala bhairava
u mahāghoṣāvali śa mahāyaśa śukatuṇḍa bhairava
ī sūkṣmāvali ṣa mahodyāna ṣaṭālākṣa bhairava
vidyāvali sa amṛta sunāsa bhairava
ā vyāpakāvali ha śubhaṅkara hūhūka bhairava
a mahāmāyāvali kṣa pralayāntaka kṣayānta bhairava

22.9 eṣa krodho mahādevi mama hṛdayaniḥsṛtaḥ 
pañcāśabhairavopetā mālinyā saha saṃyutā 
22.10 anena nyāsamātreṇa sakalīkṛtavigrahaḥ 
cintayed deham ātmānam uktalakṣaṇasaṃyutam 
22.11 saṃharantaṃ jagat sarvam chindantaṃ pāśapañjaram 
nirdahantaṃ jagat sarvam bhasmakūṭaṃ vicintayet 
22.12 akārādikṣakārāntaṃ paśudehe vicintayet 
adhomukhordhvapādāntaṃ saṃhārānalamadhyagam 
22.13 saṃvartānaladahyantaṃ caturdaśaviyojitam 
tadbījaṃ sampravakṣyāmi mahākrodhasya bhairavi 
22.14 mantrasāraṃ varārohe śṛṇu tvaṃ bhāvitātmanā 
22.14A oṃ hūṃ kṣaḥ hūṃ phaṭ hrīṃ chrīṃ kṣaḥ ślīṃ phreṃ hrūṃ hūṃ hūṃ phaṭ
krodhahṛdayānujā devī mahābhairava-m-abravīt 
22.15 kujākhyamantram uccārya trailokyam api saṃharet 
kailāsam api pātayed vācāsiddhiḥ pravartate 
22.16 ekaikākṣarasambhinnām uddharāmi parāparām 
akārādikṣakārāntaṃ nāmaṃ vakṣyāmi pārvati 
22.16A a anantāvali kṣa gaganavīra
ā pralayāntakāvali ha bhuvanavīra
anantaśaktyāvali sa vijayavīra
ī haṃsāvali ṣa ajayavīra
u mohāvali śa mahā-ajayavīra
ū kriyāśaktyāvali va aṅkuravīra
ṛ bṛhodarāvali la saṃhāravīra
R̥ ripumardakāvali ra kumāravīra
ḷ vidyāśaktyāvali ya mahāyaśavīra
L̥ icchāvali ma mahāsāhasavīra
e ratnāvali bha pracaṇḍavīra
ai vijñānaśaktyāvali ba mahārṇavavīra
o lohitāvali pha mahāmaravīra
au ulkāvali pa mahādambhakavīra
aṃ lolupāvali na carcikavīra
aḥ barbarāvali dha pramathavīra
ka pavanāvali da kanakavīra
kha lampaṭāvali tha kharodakavīra
ga mātāvali ta garuḍavīra
gha raudrāvali ṇa meghanādavīra
ṅa sarvabhakṣāvali ḍha mahāgarjanavīra
ca jyeṣṭhāvali ḍa carvakavīra
cha ambikāvali ṭha chedakavīra
ja vedāvali ṭa triśikhavīra
jha krodhāvali ña mārīcivīra
ña brahmaghoṣāvali jha vidhānavīra
ṭa sarvavīrāvali ja vikaṭavīra
ṭha vajrakāvali cha vasantakavīra
ḍa kanyāvali ca abhayavīra
ḍha prasannāvali ṅa vipakṣavīra
ṇa mahākrodhāvali gha mahābalivīra
ta ḍāmarāvali ga kaṭaṅkaṭavīra
tha mahādaṃṣṭrāvali kha ḍamarukavīra
da ādhārāvali ka dharmavīra
dha āsannāvali aḥ mahātibalavīra
na ujjvalāvali aṃ sarvavīra
pa sāgarāvali au mahākāyavīra
pha tribhuvanāvali o varalāmukhavīra
ba valayāvali ai bhasmāntakavīra
bha nidrāvali e durjayavīra
ma sandhyāvali L̥ mahāvetālavīra
ya candravīṇāvali ḷ mahārauravavīra
ra manmathāvali R̥ mahādurdharavīra
la vyomāvali ṛ mahābhogavīra
va ūṣmāvali ū vajravīra
śa sitāvali u kālāgnivīra
ṣa mahāmāyāvali ī sarvalokavīra
sa sarvadevatāvali i mahānādavīra
ha yogāvali ā parāparavīra
kṣa anantākhyāvali a mahākṣayāntavīra
22.17 athāparā parā khyātā mahāmāyā parāparā 
mantragarbhā mahādevī viśrutā bhuvanatraye 
22.17A yryauṃ rryauṃ lryauṃ vryauṃ śryauṃ ṣryauṃ sryauṃ hryauṃ kṣryauṃ kāmākhyasya hsryauṃ pūrṇagiri smryauṃ oḍḍiyāna kṣmryauṃ jālandhara / śrī hā ka ḍo ka śrī kāmarivāḍī śrī devavāḍī śrīṃ hrīṃ amṛtavidye putraṃ dehi āyuṃ dehi yaśaṃ dehi //

śrīkubjikā uvāca //

22.18 pramādāllopam āyāte siddhe samayamaṇḍale 
sādhakasya bhaved glāniḥ kliṣṭo vighnaiḥ prabādhyate 
22.19 kā gatis tasya deveśa kathaṃ śuddhim avāpnuyāt 
tam ācakṣasva sarvajña samayaghnaḥ śudhyate yathā 

śrībhairava uvāca 

22.20 aṭṭahāsāditaḥ kṛtvā rājagṛham apaścimam 
āyudhaiḥ sahitāṃ devīṃ kṣetrapālasamanvitām 
22.21 kṣetropakṣetrasandohaiḥ sevanān nirmalo bhavet 
athāśaktaḥ pramādī vā pīṭhasaṅkīrtanāt priye 
22.22 samyak śuddhim avāpnoti prātar utthāya yaḥ paṭhet 
tad ahaṃ sampravakṣyāmi samayānāṃ viśuddhaye 
22.23 aṭṭahāse kadambasthāṃ saumyāsyāṃ vajradhāriṇīm 
mahāghaṇṭasamopetāṃ praṇamāmi sivaṅkarīm 
22.24 caritrāyāṃ karañjasthāṃ kṛṣṇākhyāṃ śaktidhāriṇīm 
mahābalasamopetāṃ praṇamāmi susiddhidām 
22.25 agnikena samopetāṃ daṇḍahastāṃ nagaukasām 
kolāgirye mahālakṣmīṃ naumi lakṣmīvivardhanīm 
22.26 jvālāmukhīṃ śrījayantyāṃ nimbasthāṃ khaḍgadhāriṇīm 
mahāpretasamopetāṃ naumi sarvārthasiddhidām 
22.27 aśvatthasthāṃ mahāmāyām ujjainyāṃ pāśadhāriṇīm 
mahākālasamopetāṃ naumi sarvārthasiddhidām 
22.28 uḍumbaratalāvasthāṃ vāyuvegāṃ dhvajāyudhām 
prayāge pavanopetāṃ naumi śatruvināśanīm 
22.29 vārāṇasyāṃ tu tālasthām ūrdhvakeśīṃ gadāyudhām 
praṇamya śirasā devīṃ śāṅkarīṃ śāṅkarānvitām 
22.30 karṇamoṭīṃ vaṭasthāṃ tu saśūlāṃ hetukānvitām 
śrīkoṭe śrīpadāṃ naumi rājyasampadadāyinīm 
22.31 virajāyāmbikadevīṃ mudrāpaṭṭiśadhāriṇīm 
analena samopetāṃ praṇamāmi jayāvahām 
22.32 airuḍyām agnivaktrāṃ tu vajraśaktidharāṃ śubhām 
ghaṇṭāravasamopetāṃ namāmi ripunāśanīm 
22.33 muṣalāyudhahastāṃ tu mahājaṅghasamanvitām 
namāmi śatrubhaṅgārthe piṅgākṣīṃ hastināpure 
22.34 elāpure kharāsyāṃ tu pāśahastāṃ mahābalām 
gajakarṇasamopetāṃ naumi duṣṭapramardanīm 
22.35 kāśmaryāṃ caiva gokarṇāṃ mudrālakuṭadhāriṇīm 
taḍijjaṅghasamopetāṃ namāmi ripumardanīm 
22.36 karālena samopetāṃ namāmyaṅkuśadhāriṇīm 
kramaṇīṃ marudeśe tu trailokyākṛṣṭikārikām 
22.37 romajaṅghasamopetāṃ nagare tu halāyudhām 
caitrakacchanivāsāṃ tu namāmi dhanasiddhaye 
22.38 kumbhakena samopetāṃ khaṭvāṅgakarabhūṣitām 
namāmi pāpaśuddhyarthaṃ cāmuṇḍām puṇḍravardhane 
22.39 parastīre prasannāsyāṃ vajraśṛṅkhaladhāriṇīm 
namāmi trijaṭopetāṃ bhedastambhanakārikām 
22.40 pṛṣṭhāpure vidyunmukhīṃ daṇḍaśaktyāyudhodyatām 
namāmi ghanaravopetāṃ bhedajṛmbhanakārikām 
22.41 ulkāmukhasamopetāṃ kuhudyāṃ tu mahābalām 
mudrālakuṭadhāriṇyāṃ naumi duṣṭāṅgabhañjanīm 
22.42 piśitāśasamopetāṃ naumi kaṭṭārikodyatām 
sopāre agnivaktrāṃ tu amitrapaśudāriṇīm 
22.43 kṣīrike lokamātāṃ tu khaḍgahastāṃ namāmy aham 
mahāmerusamopetāṃ mahatārtinikṛntanīm 
22.44 vajrāyudhadharāṃ saumyāṃ bhīmānanasamanvitām 
stambhākṛṣṭikarīṃ devīṃ māyāpuryāṃ tu kampinīm 
22.45 mahākrodhasamopetāṃ pūtanāmrātikeśvare 
gadāhastāyudhāṃ naumi tāḍanākṛṣṭikārikām 
22.46 rājagṛhe bhagnanāsāṃ mahākarṇasamanvitām 
vajraśaktidharāṃ naumi aśeṣaphaladāyikām 
22.47 kṣetropakṣetrasandohe sthitabhūcakramātarām 
kṣetrapālasamopetāṃ kīrtayed yaḥ samāhitaḥ 
22.48 prātar utthāya mantrajñaḥ svapnakāle 'thavā sudhīḥ 
yukto 'pi pātakair ghorair mātR̥ṇāṃ sammato bhavet 
22.49 mātṛhā pitṛhā caiva brahmaghna goghna eva ca 
vīradravyāpahārī ca pramādāt samayacyutaḥ 
22.50 mantrācāravilupto 'pi pīṭhasaṅkīrtanāt priye 
pāpakañcukam utsṛjya naiva paśyati durgatim 
22.51 yaḥ punaḥ śuddhabhāvātmā triṣkālaṃ parivartayet 
prāpnoti cintitān kāmān strīṇāṃ bhavati vallabhaḥ 
22.52 kuṇḍe 'tha maṇḍale vātha pratimāyāṃ paṭe 'pi vā 
liṅge dakṣiṇamūrtau vā jalamadhye gato 'pi vā 
22.53 triṣkālam ekakālaṃ vā yaḥ paṭhed yas tu bhāvitaḥ 
viṣaśastraja1āgnibhyo vyādhibhūtagrahair api 
22.54 ajitaḥ suciraṃ kālaṃ jāyate nirupadravaḥ 
mahābhaye samutpanne kapilāgomayena tu 
22.55 caturdikṣu caturviṃśa kārayen maṇḍalāni tu 
pūrvam uttarataś caiva vāruṇyāṃ dakṣiṇena tu 
22.56 ṣaṭkaṃ ṣaṭkaṃ tu kartavyaṃ tatra pūjya krameṇa tu 
śmaśānakalpavṛkṣe tu yoginyaḥ kṣetrapās tathā 
22.57 pūrve tu śvetapuṣpais tu dakṣiṇe pītapuṣpakaiḥ 
paścime raktapuṣpais tu uttare kṛṣṇapuṣpakaiḥ 
22.58 sāyudhān śvetapuṣpais tu gandhair dhūpair manoramaiḥ 
madhye tu kalaśaṃ sthāpya divyatoyapariplutam 
22.59 caturviṃśati dīpāṃś ca sthāne sthāne pradāpayet 
caturviṃśati pīṭhāṃś ca krameṇa parivartayet 
22.60 ahorātroṣito bhūtvā niśām ekāṃ suyantritaḥ 
prabhāte vimale mantrī vīrabhojyaṃ tu kārayet 
22.46 rājagṛhe bhagnanāsāṃ mahākarṇasamanvitām 
vajraśaktidharāṃ naumi aśeṣaphaladāyikām 
22.47 kṣetropakṣetrasandohe sthitabhūcakramātarām 
kṣetrapālasamopetāṃ kīrtayed yaḥ samāhitaḥ 
22.48 prātar utthāya mantrajñaḥ svapnakāle 'thavā sudhīḥ 
yukto 'pi pātakair ghorair mātR̥ṇāṃ sammato bhavet 
22.49 mātṛhā pitṛhā caiva brahmaghna goghna eva ca 
vīradravyāpahārī ca pramādāt samayacyutaḥ 
22.50 mantrācāravilupto 'pi pīṭhasaṅkīrtanāt priye 
pāpakañcukam utsṛjya naiva paśyati durgatim 
22.51 yaḥ punaḥ śuddhabhāvātmā triṣkālaṃ parivartayet 
prāpnoti cintitān kāmān strīṇāṃ bhavati vallabhaḥ 
22.52 kuṇḍe 'tha maṇḍale vātha pratimāyāṃ paṭe 'pi vā 
liṅge dakṣiṇamūrtau vā jalamadhye gato 'pi vā 
22.53 triṣkālam ekakālaṃ vā yaḥ paṭhed yas tu bhāvitaḥ 
viṣaśastraja1āgnibhyo vyādhibhūtagrahair api 
22.54 ajitaḥ suciraṃ kālaṃ jāyate nirupadravaḥ 
mahābhaye samutpanne kapilāgomayena tu 
22.55 caturdikṣu caturviṃśa kārayen maṇḍalāni tu 
pūrvam uttarataś caiva vāruṇyāṃ dakṣiṇena tu 
22.56 ṣaṭkaṃ ṣaṭkaṃ tu kartavyaṃ tatra pūjya krameṇa tu 
śmaśānakalpavṛkṣe tu yoginyaḥ kṣetrapās tathā 
22.57 pūrve tu śvetapuṣpais tu dakṣiṇe pītapuṣpakaiḥ 
paścime raktapuṣpais tu uttare kṛṣṇapuṣpakaiḥ 
22.58 sāyudhān śvetapuṣpais tu gandhair dhūpair manoramaiḥ 
madhye tu kalaśaṃ sthāpya divyatoyapariplutam 
22.59 caturviṃśati dīpāṃś ca sthāne sthāne pradāpayet 
caturviṃśati pīṭhāṃś ca krameṇa parivartayet 
22.60 ahorātroṣito bhūtvā niśām ekāṃ suyantritaḥ 
prabhāte vimale mantrī vīrabhojyaṃ tu kārayet 
22.61 tataḥ kṣamāpayet pīṭhān praṇipatya punaḥ punaḥ 
nirvighnas tu tato mantrī kṣipraṃ bhavati siddhibhāk 
22.62 upasargagrahādibhyaḥ kṣayakuṣṭhajvarādibhiḥ 
mucyate sarvarogaiś ca dhanavān api jāyate 
22.63 kanyā manepsitān kāmān labhate cābhiṣekataḥ 
putrārthī labhate putrān kāmukaḥ subhago bhavet 
22.64 vidyārthī labhate vidyāṃ vaṇig vai lābham aśnute 
mantrārādhanaśīlaś ca jāyate nirupadravaḥ 
22.65 yogābhyāsarato nityaṃ prāpya siddhiṃ paraṃ yayau 
dvīpāmnāyaprasaṅgena sarvam etat prakāśitam 
22.66 samastavyastavyāptis tu kṣetropakṣetrasaṃyutam 
yat tvayā pṛcchitaṃ sarvaṃ kālajñānaṃ kujeśvari 
22.67 tad ahaṃ sampravakṣyāmi bhaktānāṃ bhaktivatsale 
sarvaṃ sampāditaṃ tubhyam ājñānandakramārṇavam 
22.68 idānīṃ śṛṇu kalyāṇi kālacakraṃ yathā sthitam 

iti kulālikāmnāye śrīkubjikāmate samastavyastavyāptir nāma dvāviṃśatimaḥ paṭalaḥ 


śrībhairava uvāca 

23.1 kālacakraṃ varārohe ātmanaś ca parasya ca 
jñātvā vyapohayet kālam utkrāntiṃ vā salakṣaṇam 
23.2 yena jānāti deveśi sādhako niścayātmakaḥ 
śṛṇu tvaṃ paramānandaṃ sugopyaṃ prakaṭāmi te 
23.3 kālaṃ tu trividhaṃ proktaṃ paraṃ caiva parāparam 
aparaṃ tu kalādhāraṃ kālasya vaśasaṃsthitam 
23.4 truṭilavāt paraḥ kālaḥ kālonmeṣāt parāparaḥ 
manvantarādikāṣṭhādau sa kālaḥ kalate tanum 
23.5 kalpe parāpare kāle sthitvā kālasya vañcanam 
parāt paratare kāle sthitau kālasya kālakṛt 
23.6 iti matvā paraṃ kālaṃ mānabhūtaṃ guror mukhāt 
tataḥ kurvanti sarvatra jñānakrīḍām aśaṅkitām 
23.7 paraṃ tu ṣaṇṇavatyordhvaṃ ṣaṇṇavatyā parāparam 
caturāśītipramāṇena aparaṃ kalanātmakam 
23.8 pañcakena nibaddhaṃ tu pañcatvaṃ yāti śīghrataḥ 
nandābhadrādiyogena jayāriktādipaurṇimā 
23.9 pañca pañca tathā pañca māsā-ṛtvayanāvadhim 
saṃvatsaraṃ yugaṃ ceti manvantarasakalpakam 
23.10 evaṃ kalanti taṃ kālaṃ pañcapañcāntakāvadhim 
kālāvadhisthitān dvīpān dvīpaiḥ pīṭhān vidur budhāḥ 
23.11 pīṭhāntasthāni tattvāni pañca bhūtāni teṣu vai 
ekaikaṃ pañcakāvṛttaṃ pañcaviṃśāntakāvidhim 
23.12 svarapañcakayuktāni saṃsaranti kalārṇave 
padmanāḍīnibaddhetāḥ kālayantropariṣṭhitāḥ 
23.13 jīvatoyaṃ haraty āśu śoṣayanti kṣaṇe kṣaṇe 
candrasūryakaraiḥ kṛtvā kṛtānto vāhane kṣamaḥ 
23.14 jīvārṇavaṃ samastedam ākṛṣya ca punaḥ punaḥ 
siñcayet kṣayavṛkṣāṇi jarāmṛtyuphalārthinaḥ 
23.15 evaṃ te trividhaḥ kālaḥ kathitas tu suvistaraḥ 
lakṣyate yai rutaiḥ so hi tan nibodhayataḥ śṛṇu 
23.16 bahiraṅgāntaraṅgāni jñātvā vañcayate yathā 
vañcituṃ yo na śakyeta sa yāti gurusannidhau 
23.17 svapne vā yadi pratyakṣaṃ samādhiguṇayogataḥ 
vivarṇāṃ paśyate chāyāṃ jīved varṣatrayaṃ tu saḥ 
23.18 uttarābhimukho bhūtvā paśyate dakṣiṇādiśam 
vivarṇaṃ pūrvam ākhyātaṃ māsaikaṃ tridinojjhitam 
23.19 śuddhanirmalam ādityaṃ viraśmiṃ yadi paśyati 
varṣadvayena mantavyaṃ mṛtyum ātmani vindati 
23.20 arundhatīṃ dhruvaṃ caiva somacchāyāṃ mahāpatham 
yo na paśyati deveśi na jīved vatsarāt param 
23.21 madhye chidraṃ candramasi yas tu paśyati bhāmini 
mṛtyuṃ tasya vijānīyān māse caikādaśe tathā 
23.22 bhagnaśākhādrumaṃ paśyed gandharvanagaraṃ tathā 
paśyet pretapiśācāṃś ca daśa māsān sa jīvati 
23.23 yasya vai snātamātrasya hṛdi pādau ca śuṣyati 
dhūmo vā mastake vāsti aṣṭamāsān sa jīvati 
23.24 agrataḥ Pṛṣṭhato vāpi khaṇḍaṃ yasya padaṃ bhavet 
pāṃsau vā kardame vāpi sapta māsān sa jīvati 
23.25 raktamālyānulepāni raktakṛṣṇaṃ ca vāsasam 
labhate svapnayogena ṣaṇmāsāṃs tu sa jīvati 
23.26 āruhya mastake yasya kṛkalāsaḥ sthirībhavet 
dhārayet trīṇi rūpāṇi pañcamāsān sa jīvati 
23.27 puruṣo lohadaṇḍena kṛṣṇo yasya paricchadaḥ 
paśyate svapnayogena caturmāsān sa jīvati 
23.28 candrabimbapratīkāśam udayantaṃ divākaram 
viraśmimaṇḍalaṃ paśyet trīṇi māsān sa jīvati 
23.29 dīpam āraktatāmrābham ākāśe ravimaṇḍalam 
mañjiṣṭhāṃ medinīṃ paśyej jīven māsadvayaṃ tu saḥ 
23.30 apsu vā yadi vādarśe yady ātmānaṃ na paśyati 
viśirāṃ paśyate chāyāṃ māsam ekaṃ sa jīvati 
23.31 yadi netraṃ sraved ekaṃ  kaṇṭhasthānaṃ viśuṣyati 
vācādyaṃ kampate yasya svāṅgaṃ vahnisamaprabham 
23.32 vedanā bhavate tīvrā abdam ekaṃ sa jīvati 
lalāṭaṃ calate yasya vivarṇaṃ jāyate mukham 
23.33 dhruvasthāne tu prasvedaṃ jāyate yasya sarvadā 
ekādaśa sa māsāni jīvatety avicārataḥ 
23.34 hṛdaye yasya santāpaṃ svakaṃ kāyaṃ na paśyati 
vācā ca calate yasya dantāś ca pariśuṣyati 
23.35 vismṛtir nitya cittasya daśa māsān sa jīvati 
hṛdayaṃ śuṣyate yasya svakaṃ kāryaṃ na jānati 
23.36 guhyaṃ ca śuṣyate śīghraṃ nava māsān sa jīvati 
śuṣyate dakṣiṇāṅgaṃ tu vāmāṅgaṃ caiva śuṣyati 
23.37 ghūrmate mahatā nit yam aṣṭa māsān sa jīvati 
akasmāj jāyate sthūlaḥ sthūlo 'pi kṛṣatāṃ gataḥ 
23.38 dhūsaro dhūmravarṇaś ca sapta māsān sa jīvati 
pūrve tu udite sūrye chāyāṃ paśyaiva dakṣiṇām 
23.39 muhūrtaṃ jīvate so vai satyedaṃ kulanandini 
vakranāsā bhaved yasya māsād ūrdhvaṃ na jīvati 
23.40 chāgagandhaṃ bhaved gātraṃ dantāś ciṭiciṭāyate 
chāyātmāṃ vikṛtāṃ paśyet saptarātraṃ sa jīvati 
23.41 yasya kṛṣṇā bhavej jihvā padmavarṇaṃ mukhaṃ bhavet 
gaṇḍapṛṣṭhau suraktābhau trirātraṃ ca sa jīvati 
23.42 śyāmadantaṃ mukhaṃ caiva prakṛtir yasya dṛśyate 
viparītendriyagrāmaṃ ahorātraṃ sa jīvati 
23.43 ghoṣaṃ na śṛṇute yas tu dīpavartiṃ na paśyati 
viśirāṃ paśyate chāyāṃ kṣaṇam ekaṃ sa jīvati 
23.44 anyac ca paramopāyaṃ śṛṇuṣva varavarṇini 
yena vijñātamātreṇa kālaṃ jānāti tattvataḥ 
23.45 ṣoḍaśadvādaśārābhyāṃ yā gatis tv arkasomayoḥ 
tasmin nirīkṣayej jyotiṃ dīpyamāne hutāśane 
23.46 ṣoḍaśāntargataṃ yac ca pūrvoktaṃ yac caturdalam 
tasya madhye vijānīyāt kālajñaḥ kālalakṣaṇam 
23.47 somādhastād dale naṣṭe ṣaṇmāsān mriyate dhruvam 
trīṇi māsāṃs tathā cordhve dvau māsau dhvanisannidhau 
23.48 māsaikaṃ vāyusāmīpye tac ca pūṣodayaṃ viduḥ 
somacakram idaṃ proktaṃ sṛṇu sūryaṃ ca sāmpratam 
23.49 yadā na dṛsyate jyotir dvādaśāre caturdale 
pakṣaikaṃ tasya deveśi dināni daśa pañcakaiḥ 
23.50 tatraiva tena mārgeṇa yadā jyotir na dṛśyate 
daśa pañca tathā trīṇi ekāhaṃ tasya jīvitam 
23.51 athānyat paramaṃ vakṣye niścitaṃ kālalakṣaṇam 
jīvanti ca tadabhyāsāt tadabhāvān mriyanti te 
23.52 niścitaṃ tad varārohe kālayogaḥ sa eva hi 
vismṛtir jāyate yasya sā vārā mṛtyukāṅkṣiṇī 
23.53 dehamadhyagataṃ sarvaṃ mriyate kālacoditam 
parāpareṇa kālena bhedayitvā samabhyaset 
23.54 vāmāvartādiyogena dakṣiṇāntam anukramāt 
śuklakṛṣṇaprayogeṇa kadahāntam apaścimam 
23.55 pūrṇamāvāsyamadhyasthaṃ kālacakraṃ samabhyaset 
pañca pañca tathā pañca pratipavchuklam āditaḥ 
23.56 svaravarṇasamāyogaṃ śuklādau kṛṣṇakāvadhim 
pudgalātmā samāśritya abhyasedam ahar ahaḥ 
23.57 jarāmṛtyuvināśārthe śīghredaṃ piṇḍasādhanam 
kathayanti mahāvidyāḥ kālasya kālalakṣaṇam 
23.58 katham apy eṣa tanniṣṭho yadi siddhiṃ na gacchati 
ākṛṣṭo yoginīcakre tadā vismṛtikārikā 
23.59 vismṛtir vā tithir yāti abhyasanto muhur muhuḥ 
sā vārā sā tithir devi niścitedaṃ mayoditam 
23.60 etat te paramaṃ kālaṃ paramārthaṃ prakīrtitam 
savismayakaraṃ devi abhedyaṃ samprakāśitam 
23.61 yadīcchasi ciraṃ devi jīvitaṃ paramārthataḥ 
dehamadhyaṃ parityajya tiṣṭhasvānyatra bhāvitā 
23.62 dehāmṛtaṃ paraṃ yogaṃ na deyam aparīkṣite 
yāvaj jñānavirāgābhyāṃ pūritaṃ syāt tanur na hi 
23.63 parāparasya kālasya jñātṛtvaṃ bhavate yathā 
lekhanādiprayogeṇa vidhiyogena bhāvini 
23.64 mārgaśīrṣasya māsasyakṛṣṇāyāṃ pañcamī bhavet 
tasyāṃ sambhārasampanno rātrau jāgaraṇaṃ yajet 
23.65 āharen nirvraṇaṃ bhūrjaṃ rocanāsṛk sakuṅkumam 
likhet pūrvamukho bhūtvā dvādaśaiva svarān śubhān 
23.66 mātrābindususampannān rakṣayitvā punaḥ punaḥ 
saṃvarec chuklasūtreṇa japtavidyaḥ samālabhet 
23.67 sitacandananaivedyair jātīpuṣpair manoramaiḥ 
pūjayitvā kramāmnāyaṃ dīpamantrasusaṃyutam 
23.68 śarāvasampuṭasthaṃ tu jātīkusumamadhyataḥ 
sthāpayitvā japen mantraṃ yāvad rātrikṣayaṃ gataḥ 
23.69 tataḥ prabhātasamaye pūjayitvā punaḥ kramam 
kumāryo vai pratarpeta vidyā labdhā tathā śṛṇu 
23.70 hrīṃ hūṃ svleṃ svāhāpataye rakṣa rakṣāmṛtodbhave 
svleṃ hūṃ hrīṃ ca punar jāpyaṃ sampuṭīkṛtya mantrayet 
23.71 japtavidyās tu stubhyante kathayanti śubhāśubham 
na stubhyanti yadā devyo japtavidyāsya sampuṭam 
23.72 darśayanti mahāhāniṃ bhraṣṭatvaṃ yoginīkule 
sāmarthyato na mṛtyuḥ syād bhraṣṭasiddhiṃ na yāsyati 
23.73 evaṃ kṛtvā tataḥ paścād bhūrjapattre sthitākṣarān 
vācayan sannirūpeta samaṃ hīnaṃ suvṛddhidam 
23.74 akṣarābhyadhike yatra tatra rājyaṃ vinirdiśet 
mātrayābhyadhike lābhaṃ same cārogyavatsalam 
23.75 binduhīnaṃ yadā paśyed hānim arthasya tatra vai 
mātrāhīne bhaved vyādhir mṛtyuḥ syād akṣaraṃ vinā 
23.76 vāmādikramayogena lakṣayed upadeśataḥ 
vidyākumbhaṃ savardhanyā tatkāle pūjitaṃ tu yat 
23.77 tataḥ punaḥ samālabdhaṃ grāmasya ca purasya ca 
bhrāmayet ṣoḍaśavāraṃ dahyate na tadambhasā 
23.78 etat te kathitaṃ devi śubhāśubhavilakṣaṇam 
na deyaṃ duṣṭabuddhīnām āgamaṃ gopayet sadā 
23.79 kālāvabodhanaṃ devi pūṣākālopalakṣitam 
samasaptagate sūrye janma-ṛkṣe ca candramāḥ 
23.80 makarodayavelāyāṃ pūṣākālas tu kubjike 
ariṣṭadarśanaṃ nāthe japahomopaśāmyati 
23.81 mṛtyuñjayena yogena tac chṛṇuṣva parisphuṭam 
juṃ saḥ sampuṭanāmādyaṃ saḥ juṃ ante niyojayet 
23.82 candrodayāmṛtāntasthaṃ pudgalātmā vicintayet 
japen mṛtuñjayaṃ devi parāparatanau sthitaḥ 
23.83 akṣasūtreṇa divyena netareṇa praśasyate 

śrīkubjikovāca 

23.84 savismayakaraṃ vākyam atyadbhutam akāraṇam 
akṣasūtraṃ purā jñātaṃ divyākṣaṃ vada sāmpratam 

śrībhairava uvāca 

23.85 śṛṇu devi pravakṣyāmi divyākṣasūtranirṇayam 
yan na kasyacid ākhyātaṃ siddhidaṃ paramaṃ padam 
23.86 yan na bhidyati cakreṇa yan na dahyati cāgninā 
yan na protāpare sūtre paṭṭakārpāsike 'pi vā 
23.87 yasya madhye sthito merur granthayaś ca na tatra vai 
pañcāśākṣamayā tantu[r] yasmāt sarvaṃ carācaram 
23.88 chinnabhinneṣu mantreṣu lubdhakruddheṣu suptake 
japtānena tu sūtreṇa asiddhaṃ sādhayed dhruvam 
23.89 akṣasūtram idaṃ siddhaṃ sarvamārgaprabodhakam 
sarvamārgeṣu guptedam 'nuṣṭheyaṃ parameśvari 
23.90 prastutāyātamārgeṇa varṇitaṃ sūtranirṇayam 

śrīkubjikā uvāca 

23.91 ḍākinī rākṣasī lāmā kākinī śākinī tathā 
yakṣiṇī bhrāmaṇī caiva vada mantraṃ surādhipa 

śrībhairava uvāca 

23.92 ū-ḍha-madhyagataṃ gṛhya ṇa-ṭa-madhyagataṃ tathā 
va-kha-pūrvadvayoddhṛtya dha-ha-madhyagataṃ punaḥ 
23.93 ya-sa-madhyagataṃ gṛhya etat ṣaṭkaṃ samuddhṛtam 
ñapaścimaṃ samuddhṛtya dīrghasvarayutaṃ kuru 
23.94 ṣaṭprakāravidhānena ṣaṭkaṃ ṣaṭkaṃ niyojayet 
prabhur vai bhrāmaṇī proktā ṣaṭsvarādhiṣṭhitā tu sā 
23.95 sarvakārye niyoktavyā nigrahānugrahaṃ prati 
anyad vai hṛdayaṃ vakṣye śākinīnāṃ yaśasvini 
23.96 ū-paścimaṃ samuddhṛtya ha-pūrva-m-āsane sthitam 
rephākrāntaṃ tu kartavyaṃ da-uttarayutaṃ tathā 
23.97 jha-pūrveṇa samāyuktaṃ kūṭaṃ bindusamanvitam 
prastārāyātamārgeṇa uddhṛtaṃ ṣaṭkanirṇayam 
23.98 prastutaṃ śṛṇu kalyāṇi ucyamānaṃ nigadyate 
ariṣṭadarśanādy evam abhyasyanto 'nyathā yadi 
23.99 śuṣyate ghaṇṭikāsthānaṃ tadā dhyānaṃ parityajet 
japadhyānārcanād eva sañjātopaśamaṃ na hi 
23.100 tadātra niścitaṃ jātaṃ pañcāhān mṛtyulakṣaṇam 
niścayena tadā kāle gurudevaṃ samāśrayet 
23.101 putradārādibandhūnāṃ vyāharitvā vaded idam 
pañcāhāvāntare kāle kuryād utkrāntikāraṇam 
23.102 anyathā kurute yas tu sa pāpī hy ātmabhedakaḥ 
na duḥkhito na kopena kuryād utkrāntikāraṇam 
23.103 kīrtihetoḥ śarīrasya yadi śakto na rakṣaṇe 
guruṇāpi hi dātavyaṃ jñātvā śiṣyaṃ salakṣaṇam 
23.104 anyathā dadate yas tu liṅgabhedī gurus tu saḥ 
pañcaprakārako hy ātmā yena jñātaḥ svadehataḥ 
23.105 sarvatīrthamayaḥ so hi tīrthāni kṛtakāny api 
susiddhapumbhiḥ sarvais tu yatra baddhāspadaṃ kvacit 
23.106 tatprabhāvād bhavet tīrthaṃ na tīrthaṃ jalapūritam 
jñānāvabodhasampannā jñānasampādane kṣamāḥ 
23.107 yatra tiṣṭhanti te sthāne tat tīrthaṃ paramārthataḥ 
vārāṇasī kurukṣetraṃ naimiṣaṃ bhairavaṃ tathā 
23.108 sannidhāno gurur yatra sarvatīrthāni tatra vai 
tīrthāni toyapūrṇāni devāḥ pāṣāṇamṛṇmayāḥ 
23.109 ātmavido na manyante tat tīrtham itare janāḥ 
balinopadrute sthāne guror mānam upāgate 
23.110 jñānino 'pi na doṣo'sti ātmano hanane kṛte 
tīrthaṅkaro gurur yasmāt tatkāryojjhitajīvite 
23.111 tiryagyoniṃ hy asau yāti duḥkhāntaṃ phalam aśnute 
anyatkāle na kartavyam utkrāntyutkramaṇaṃ priye 
23.112 kīrtihetoḥ prakartavyā sā yathā kathyate ' dhunā 
dvāreṣv argalasaṃyogaṃ kuryāc codghāṭanaṃ kvacit 
23.113 jīvādhāraṃ chined granthim etad utkrāntilakṣaṇam 
gudaṃ liṅgaṃ tathā nābhir mukhaṃ nāsā śrutīkṣaṇau 
23.114 eṣu sthāne 'rgalaṃ yojya kuñcikordhvaṃ niyojayet 
argalāny upadeśena śṛṇu tvaṃ karaṇaṃ yathā 
23.115 gudādhāropari sthitvā kṛtvā vai kukkuṭāsanam 
samapādorujaṅghas tu kurparau tu tadūrdhvagau 
23.116 bhagnapṛṣṭhaśiraḥskandho hy uttānordhvamukhaḥ sthitaḥ 
muṣṭibhyāṃ pīḍayet skandhau kaṇṭhasthau cānunāsikau 
23.117 uccaret kṣurikāmūle granthicchedaṃ bhavet kṣaṇāt 
ghāṭayitvā tu dvārāṇi nityam eva samabhyaset 
23.118 ghaṇṭikāyāṃ tu deveśi ṣaṇmāsāvadhipūrvakam 
nityam evābhyasantasya pratyayāni bhavanti hi 
23.118A ghaṭādhāragataṃ prāṇaṃ kūrmayantreṇa pīḍayet 
abhyasan māsam ekaṃ tu sadyam utkrāntilakṣaṇam 
23.119 brahmarandhraṃ sphurantīva nirjīvaṃ kaṇṭhakāvadhim 
evam abhyāsayen nityaṃ yatra bandhatanu[ḥ] sthitaḥ 
23.120 gudādhāre mṛduṃ dattvā pṛṣṭhādhāraṃ suśobhanam 
jānūrubhyāṃ tu pārśve tu kīlakau dvau nidhāpayet 
23.121 tatpramāṇau samau bhūmyāṃ yantrayen mṛduyantraṇāt [[incorrḷoc. should read bhūmau]]
evaṃ saṃśodhayitvā tu pūrvasiddhi[r] yathā yathā 
23.122 tadā saṅkurute kīrtim ity ājñā pārameśvarī 
satatābhyāsayogena sadyam utkramaṇe kṣamaḥ 
23.123 kruddhaḥ saṃharate kṣipraṃ ghaṭikābhyantareṇa vai 
tṛṇa vṛkṣalatādīnāṃ ṣaṭpadākāśagāminām 
23.124 phalapuṣpaprapātena tadā siddhiṃ vilakṣayet 
akālenāpi kālas tu ṣaḍghaṭikābhyantareṇa vai 
23.125 ṣaṇmāsābhyāsayogena ātmanaḥ kurute dhruvam 
evaṃ te kathitaṃ sarvaṃ sarahasyaṃ mahāmatam 
23.126 kṣurikādyargalābhyāsaṃ kathayāmy upadeśataḥ 
etadvijñānasāro 'yaṃ vijñānānekasaṅkulam 
23.127 anādeśān na tad deyaṃ datte syālliṅgabhedakṛt 
lubdhakruddheṣu duṣṭeṣu gopayedaṃ surakṣitam 
23.128 paraṃ cājñāpahāro 'sti yasya hānir na vidyate 
evaṃ surakṣitā devi vāritāsi punaḥ punaḥ 
23.129 anādiṣṭasya śiṣyedaṃ dāsyase narakārthinī 
pañcātmānaṃ yadā jñātaṃ yadā jñātaṃ ṣaḍadhvaram 
23.130 tadā tv apaścimam idaṃ kathyam utkrāntikāraṇam 
anyad vā paścimaṃ vakṣye duḥkhākrāntasya yoginaḥ 
23.131 sarvajñavihite mārge na doṣas tatprasādhane 
ātmanaś ca parasyaiva kruddhaceto'vadhāraṇam 
23.132 kartavyaṃ bhīvane gatvā raktamaṇḍalakaṃ subham 
maṇḍalānte tu ṣaṭkoṇaṃ tatra devyaḥ subhīṣaṇāḥ 
23.133 pūjayed yakṣiṇīmūlā ḍāmaryantaṃ vidur budhāḥ 
kusuminyā sahaikatvam ātmānaṃ madhyato nyaset 
23.134 māṃsakhaṇḍaiḥ prapūjyeta raktenārghaṃ pradāpayet 
bhedayitvā tu aṣṭāṅgaṃ viṣṭhamūtrasamekataḥ 
23.135 kiñcidalisamāyuktam arghapātraṃ niyojayet 
kṣmāpalenātha nāreṇa kṛṣṇavastrodbhavena ca 
23.136 pūjayed vātha naivedyair dhātuṃ dattvā svakāṃ svakām 
raktapātraṃ pṛthakkuryān naivedyāni pṛthak pṛthak 
23.137 kapālaśakalaiḥ sarvaṃ pātrādau dhūpakāvadhim 
sānnidhyakaraṇārthaṃ tu dhūpānyaṃ sanniyojayet 
23.138 yenākṛṣṭāḥ prayānty āśu sannidhānā bhavanti hi 
kṣmāpalaṃ hi ca kṣmāpittaṃ narāsthi śailamadrajam 
23.139 kiñcidalisamāyuktaṃ dhūpo 'yaṃ paramārthataḥ 
evopacārayogena dhūpayitvā samuccaret 
23.140 vidyāṃ svadhātusaṃyuktāṃ yasya tasya śataṃ japet 
23.140A aiṃ śrīṃ hāṃ hīṃ hūṃ kusumamālinīye idaṃ pradhānadhātuṃ gṛhṇa gṛhṇa devadattasya udaragataṃ āṇimāri vaśaṅkari sarvaśatrūṇāṃ svāhā //1//
aiṃ śrīṃ yāṃ yīṃ yūṃ yakṣiṇī jambhaya jambhaya sarvaśatrūṇāṃ devadattānām asthi bhañja bhañja āṇimāri vaśīkuru kuru svāhā //2//
aiṃ śrīṃ śāṃ śīṃ śūṃ śaṅkhinī śaṅkhagrahena sarvaśatrūṇāṃ devadattānāṃ āṇimāri vaśīkuru kuru majjaṃ gṛhṇa gṛhṇa svāhā //3 //
aiṃ śrīṃ kāṃ kīṃ kūṃ kākinī kāyaṃ saṃhāraya saṃhāraya medaṃ sarvaśatrūṇāṃ devadattānāṃ āṇimāri vaśīkuru kuru svāhā //4// 
aiṃ śrīṃ lāṃ līṃ lūṃ lākinī sarvaśatrūṇāṃ devadattānāṃ āṇimāri vaśīkuru kuru māṃsaṃ bhakṣaya bhakṣaya stambhaya stambhaya svāhā //5//
aiṃ śrīṃ rāṃ rīṃ rūṃ rākiṇī āṇimāri vaśīkuru kuru sarvaśatrūṇāṃ devadattānāṃ raktaṃ gṛhṇa gṛhṇa svāhā //6 //
aiṃ śrīṃ ḍāṃ ḍīṃ ḍūṃ ḍākinī sarvaśatrūṇāṃ devadattānāṃ āṇimāri vaśīkuru kuru tvacadhātuṃ gṛhṇa gṛhṇa svāhā //7//
23.141 śataṃ śataṃ japitvā tu ekaikāyāḥ samarpayet 
gṛhṇantv idaṃ mayā dattam atrājñā pārameśvarī 
23.142 duḥkhito 'haṃ virakto 'haṃ bhraṣṭo 'haṃ samayojjhitaḥ 
gṛhṇantu devatāḥ kṣipraṃ mayā dattāṃ svakāṃ tanum 
23.143 ājñā yadi pramāṇo 'sti pramāṇaṃ yadi cānvayam 
tena satyena gṛhṇantu matpradattaṃ marīcayaḥ 
23.144 evaṃ viraktadehas tu yāvat kuryād dine dine 
tāvad āyānti yoginyaḥ saptame 'hani bhāsurāḥ 
23.145 jñānasiddhiprasiddhasya saptarātrāntakāvadhim 
kṣapayanty anyathā naiva śīghraṃ saṃhārayanti tāḥ 
23.146 atha ced duṣṭakarmāṇāṃ nigrahedaṃ prakārayet 
tad ātmāṅgasamudbhūtaṃ kiñcid dravyaṃ na gṛhṇayet 
23.147 brahmaṇālepya-m-ātmānaṃ paścād dhyānaṃ niyojayet 
paramātmasvarūpo 'haṃ bhairavo 'haṃ mahāprabhuḥ 
23.148 iti matvā prayuñjīta ṣoḍhānyāsaṃ svake tanau 
kṛtvā ṣoḍaśa vārāṇi tato vajratanur bhavet 
23.149 athātaḥ sampravakṣyāmi lohake sādhanaṃ yathā 
ayutaikena siddhiḥ syāl liṅge vai paścimāmukhe 
23.150 svayambhau bāṇaliṅge vā itare vāpi suvrate 
tatra sthitvā japed evam ekacittaḥ samāhitaḥ 
23.151 sadā kruddhena kartavyaṃ nigrahaṃ saptavāsaraiḥ 
śatam aṣṭottareṇaiva yāvat tannigraho bhavet 
23.151A ṭha ṭha ya lā ba hā ma mi mi hi hi sa gra sa gra kaṃ mu a hūṃ hūṃ la jva la jva na śa nā ra gho pa rū ra gho ra gho a ra śva the ma pra tha ma pra tha ma pra śa vi ā śa vi ā da bhiṃ da bhiṃ ya śa dhvaṃ vi ya śa dhvaṃ vi tha ma tha ma sa gra sa gra kaṃ mu aka ha lo hi e hi e ya rā śva me ra pa ya rā pa rā pa ya vā de ya sā hā ṭṭa ṅgā li sphu vi ye ta pa dhi ṇā ga hā ma ya kā ha lo mo na ya rā śva 'je ste ma na aiṃ //
23.152 atordhve yantrakarmāṇi nigrahānugrahaṃ prati 
kṛtvā kuṇḍalikās tisro aṣṭau dvādaśa ṣoḍaśa 
23.152A ya madhye kṣe ma me da abhyantaracakre vidikṣu hūṃkāreṇa nāma vidarbhya yac ca ni rā [rā] ja sa do [do] ru ṇa yo [yo] ni ra [ya] iti dvitīyacakre l oṃ hrīḥ ṣṭrīḥ vikṛtānana hūṃ hūṃ phaṭ phaṭ amukaṃ māraya vidveṣaya uccāṭaya vaśīkuru ākṛṣṭiṃ kuru śāntiṃ kuru puṣṭiṃ kuru stobhaṃ kuru stambhaṃ kuru hūṃ hūṃ phaṭ phaṭ ṭha ṭha tṛtīyacakre / māraṇe hūṃ vidveṣe hraṃḥ uccāṭe hyaḥ vaśe hsklīṃ ākṛṣṭau hrīṃ śāntike sphauṃ pauṣṭike sphaḥ stobhe hrūṃ mohe hlauṃ stambhe hlūṃ //
23.153 madhye yakāralopasya lopye niṣkadvayasya ca 
karmakarmāṇurūpeṇa śeṣā varṇā yathāsukham 
23.154 athātaḥ sampravakṣyāmi svapnamānavakāmbikām 
prāṇaṃ vahnisamārūḍhaṃ mātrādvādaśabheditam 
23.155 akṣarāntaritaṃ kṛtvā saṣaḍaṅgā bhaved ume 
hrasvā tyājyā prayatnena dīrghā grāhyā sulocane 
23.156 ayutaṃ pūrvasevāyāṃ pañcapraṇavasampuṭe 
raktāśvamārakusumaiḥ sidhyate nātra saṃśayaḥ 
23.157 aṣṭottaraśataṃ japtvā śayyārūḍho niśāsu ca 
śubhāśubhaṃ vaded rātrau siddhavidyāṃ tu kaulikīm 
23.158 athānyam api vakṣyāmi prayogaṃ mṛtyunāśanam 
saṅkocya mūlacakran tu janmasthaṃ dhārayet kṣaṇāt 
23.159 saṅghaṭṭe pīḍanaṃ kṛtvā lambakaṃ tu vidārayet 
lambakāmṛtasantṛpto jayen mṛtyuṃ na saṃśayaḥ 
23.160 dāhaśoṣas tu santāpo vaivarṇaṃ vā mahadbhutam 
nāśayeta varārohe anenābhyāsayogataḥ 
23.161 rasanāṃ śūnyamadhyasthāṃ kṛtvā caiva nirāśrayam 
na dantair daśanān spṛṣṭvā oṣṭhau naiva parasparam 
23.162 tyajya sparśanam eteṣāṃ jinen mṛtyuṃ na saṃśayaḥ 
eṣa mṛtyuñjayo yogo na bhūto na bhaviṣyati  
23.163 nābhicakrād adhaś cāgnir nivṛtte tu gamāgame 
dvandvātītaṃ padaṃ devi cintātītaṃ pracakṣyate 
23.164 pṛṣṭhavaṃśa-adhastāt tu spandane vilayaṃ gate 
kālātītaṃ paraṃ sthānaṃ cintātītam ihocyate 
23.165 gudaguhyāntare granthiḥ sīvanyā badirāsthivat 
jarātītaṃ padaṃ divyaṃ bhāvātītaṃ pracakṣyate 
23.166 gudaguhyāntare granthir guhādhāre sukhodaye 
parānandapadaṃ divyaṃ cintātītaṃ tu kathyate 
23.167 rājadantadvayor madhye adhastāt pīḍayed bhṛśam 
ūrdhvadṛṣṭiṃ parāṃ kṛtvā evam etat samabhyaset 
23.168 anena jayate mṛtyuṃ nātra kāryavicāraṇāt 
nādānte saṃsthitaṃ lakṣyaṃ pañcatattvasya madhyagam 
23.169 catuṣkalasamopetaṃ tatra sthitvā japet priye 
jarā mṛtyuś ca rogāś ca ītayo vividhāś ca ye 
23.170 naśyante nātra sandehas tuhinaṃ tu raver yathā 
adhaḥ prāṇaṃ samānīya kuṇḍalīpadamadhyagam 
23.171 tatra rundhyāt prayatnena vṛttirājavivarjitam 
ye prāṇās te mahājīve gatāyur vīravandite 
23.172 tatrāsaktaḥ sadā devi mṛtyujid bhavate kṣaṇāt 
kathitaṃ sarahasyaṃ tu sugopyaṃ tu tavānaghe 
23.173 ṣoḍhānyāsavidhānaṃ tu pūrvaṃ tu kathitaṃ mayā 
nirodhotkramaṇādīnāṃ kiṃ tvedaṃ na prakāśayet 

iti kulālikāmnāye śrīkubjikāmate triṣkālajñānam utkrāntisambandha [iti] trayoviṃśatimaḥ paṭalaḥ 

śrīkubjikā uvāca 

24.1 devadeva mahādeva śaśāṅkakṛtaśekhara 
tadgrahākhye tu ye rudrāḥ sṛṣṭinyāsena me śrutāḥ 
24.2 saṃhāreṇa sureśāna kathayasva prasādataḥ 
niścayārthaṃ mahādeva kṣakārādyā yathāsphuṭam 

śrībhairava uvāca 

24.3 kathayāmi na sandehaḥ sphuṭārthaṃ tadgrahātmakam 
pañcāśadvyutkrameṇaiva śṛṇuṣva gadato mama 
24.4 kṣa saṃvartaḥ sthitaḥ krodhe ha prāṇe lākulī sthitaḥ 
sa bhṛguḥ śukrato nityaṃ ṣa śveto majjam āsthitaḥ 
24.5 śa bakīśo 'sthimadhye tu va khaḍgīśaḥ sirānvitaḥ 
la pinākī sthito māṃse ra bhujaṅgo 'sṛgāsthitaḥ 
24.6 ya vālīśas tvacāmadhye kathitaṃ tava suvrate 
mahākālo makāras tu hṛdaye sarvajantuṣu 
24.7 dviraṇḍas tu bha nābhyāṃ tu ba vaṃśe chagalaṇḍinaḥ 
pha śikhī vāmapārśve tu kathitaṃ tu varānane 
24.8 pakāro lohito rudro dakṣiṇe kukṣim āśritaḥ 
na meṣo vāmapāde tu dha mīno jaṅgham āśritaḥ 
24.9 da dhātṛ jānumadhye tu saṃsthito varavarṇini 
tha diṇḍī ūrudeśe tu ta āṣāḍhī tatordhvataḥ 
loṇa umākānta pāde tu dakṣiṇe ca mahābalaḥ 
ḍhārdhanārī sthito devi jaṅghikāyāṃ varānane 
24.11 ḍakāre dāruko rudro jānumadhye prakīrtitaḥ 
ṭha lāṅgaly ūrudeśe tu nātra kāryavicāraṇāt 
24.12 someśvaras ṭakāre tu jaṅghāmūle sthitas tu saḥ 
ña haste saṃsthitaḥ śarmā jhājeśo vāmabāhugaḥ 
24.13 ja caturmukha madhye tu cha ekākṣas tu kakṣagaḥ 
cakāraḥ kūrma evātra śikhare vāmake sthitaḥ 
24.14 atordhve dakṣiṇe haste ṅādikāntam ataḥ śṛṇu 
ṅakāra[ḥ] kara-agre tu ekarudro vyavasthitaḥ  
24.15 gha śiveśaḥ karasyordhve ga pracaṇḍaś ca kurpare 
kha caṇḍo bāhumadhye tu ka krodhaḥ śikhare sthitaḥ 
24.16 aḥ mahāsenarudras tu visargabrahmarandhragaḥ 
aṃ krūro madhyaghaṇṭānte au 'nugrahīśordhva-oṣṭhake 
24.17 o oṣṭhe sadyadevas tu ai bhauktī dvija-m-ūrdhvagaḥ 
e jhaṇṭīśo ' dhapaṅktis tu dvijabhūto vyavasthitaḥ 
24.18 L̥ haro vāmagaṇḍe tu ḷ sthāṇur dakṣagaṇḍagaḥ 
R̥ tithīśa iḍāyāṃ tu ṛ bhārabhūti piṅgalā 
24.19 ū arghīśo vāmakarṇe u amarīśas tu dakṣiṇe 
ī trimūrtir vāmacakṣuṣi i sūkṣma dakṣacakṣugaḥ 
24.20 ā ananto maṇḍale vaktre a śrīkaṇṭho lalāṭagaḥ 
tadgrahe rudra-m-ākhyātā mālinyāṃ śṛṇu sāmpratam 
24.21 vāme phetkārikā caiva dahanī dakṣapādagā 
sāvitrī caiva gāyatrī au o jaṅghau prakīrtitau 
24.22 e ai jānū kriyā jñānī tārā takāram ūrugā 
śukradevīty anusvāraṃ śukraṃ devyās tu bhairavi 
24.23 śa guhyaṃ kusumākhyā ca mahākālī nitambagā 
kṣa saṃhārī sthitā nābhau ṣodaraṃ lambanodarā 
24.24 ha prāṇe ambikā devī sakāre ca parāparā 
āmoṭī tadgataṃ kṣīram ā varṇaṃ parikīrtitam 
24.25 pūtanā chagalaṇḍā ca la-chau stanau prakīrtitau 
pāvanī tu pa hṛllagnā jayantyā śūlajā smṛtā 
24.26 dīpanī śūladaṇḍā tu rephaṃ dakṣakare sthitam 
kapālinī vāmakare ṭa varṇaḥ parikīrtitaḥ 
24.27 icchāśaktir visargākhyā karapṛṣṭhāv ubhāv api 
kurdanī jhaṅkarī caiva ña-jhāv aṅgulayaḥ kramāt 
24.28 sampūrṇapūrṇimā caiva ṭhavarṇas talahastayoḥ 
vināyakī ca lāmā ca ḍa-ḍhau bāhudvayaṃ priye 
24.29 vāyuvegā ca bhīṣaṇyā skandhayor ubhayor api 
va kaṇṭhe śikhivāhinyā a vāg vāgeśvarī matā 
24.30 māyā devī i jihvā tu jihvā devyā virājate 
khirvirā ghoraghoṣā ca śivā kālī ca kaṅkaṭā 
24.31 kavarge daśanās tīkṣṇā evaṃ devyā virājate 
bakāraṃ vadanaṃ tasyā vajriṇī śaktir avyayā 
24.32 ī guhyaśakti nādasthā nāsāyāṃ netramadhyataḥ 
prajñā ca mohanī caiva ū u bhūṣaṇa-m-īkṣagau 
24.33 nārāyaṇī ṇa karṇau tu vāmadakṣiṇayor ubhau 
priyadarśanā dha netrasthā ubhau netrau virājate 
24.34 cāmuṇḍā ca lalāṭasthā tha vaktraṃ grasanī smṛtā 
L̥ ḷ ṛ R̥ tu śāntyādyāḥ śiromālā tu mālinī 
24.35 nādinī tu śikhāntasthā nakārākṣarasambhavā 
mālinyās tadgraho hy eṣa śaktitrayam ataḥ śṛṇu 
24.36 kriyā ca śukrasahitā bindu-ardhendusaṃyutā 
nādaśaktiśikhākrāntā prathamaṃ bījam uttamam 
24.37 ambikā śūladaṇḍasthā guhyaśaktyā tv alaṅkṛtā 
binduyuktaṃ dvitīyaṃ tu tṛtīyaṃ śṛṇu sāmpratam 
24.38 vāktattvaṃ kevalaṃ śuddhaṃ ghoraghoṣā tathāparā 
dakṣajaṅghāsamāyuktā dīpanī dakṣajānugā 
24.39 ambikā dīpanīsaṃsthā guhyaśaktīcchayānvitā 
ambikā ca parārūḍhā icchāyuktaṃ padaṃ bhavet 
24.40 abhinnā pāvanī tadvac chūladaṇḍaṃ tathaiva ca 
mahākālīsvarūpeṇa daśanaṃ tu caturthakam 1
24.41 gāyatryā bheditaṃ kāryaṃ jñānabhinnā ca dīpanī 
mohanyā bheditaṃ prāṇaṃ mahākālyā samāhitam 
24.42 ṣaḍakṣaraṃ dvitīyaṃ tu padaṃ devyāḥ samuddhṛtam 
gāyatryā bheditaṃ kṛtvā ghoraghoṣā mahābalā 
24.43 dīpanīṃ kevalāṃ dadyāt prajñayā śūladaṇḍakam 
jñānabhinnaṃ tu hṛdayaṃ prāṇaṃ jīvasamanvitam 
24.44 sāvitrīsahitaṃ kāryaṃ padaṃ vidyāt tṛtīyakam 
dakṣajaṅghāsamāyuktā ghoraghoṣā kuleśvarī 
24.45 dīpanī kevalā cātra nitambaṃ mohanānvitam 
kālikā jihvayā yuktā caturthaṃ caturakṣaram 
24.46 bhīṣaṇānāsamāyuktā mahākālī tu kevalā 
bhīṣaṇā guhyaśaktisthā lambikā kevalāpy ataḥ 
24.47 nārāyaṇī jñānaśaktyā yuktā syāt pañcamaṃ padam 
vajriṇī tu mahākālī dvir abhyāsaṃ tu kārayet 
24.48 pāvanī māyayā bhinnā abhinnā śikhivāhinī 
dvir abhyāsam idaṃ kāryaṃ prāṇam icchāsamanvitaṃ 
24.49 ṣaṣṭhamaṃ tu padaṃ devyā uddhṛtaṃ tu navākṣaram 
ambikā jñānabhinnā vai dīpanyā ca catuṣṭayam 
24.50 bhūṣitaṃ bhūṣaṇenaiva vāmakarṇasya suvrate 
dīpanyā kevalā caiva caturdhā tu prakalpayet 
24.51 navavarṇam idaṃ devi saptamaṃ padam uddhṛtam 
ambikā śūladaṇḍasthā guhyaśaktyā vibhūṣitā 
24.52 punar eva tathāpy evaṃ śūladaṇḍāsane sthitā 
prajñāyuktā tu kartavyā vāmapādaṃ tataḥ punaḥ 
24.53 śūladaṇḍāsanāsīnaṃ jñānadevyā hy alaṅkṛtam 
prāṇaṃ jīvasamāyuktaṃ śūladaṇḍāsane sthitam 
24.54 sāvitryā sahitaṃ kāryaṃ bhūṣitaṃ bhūṣaṇena tu 
vāmakarṇasya deveśi kriyādevyā tataḥ punaḥ 
24.55 binduyuktaṃ tu kartavyaṃ padaṃ devyās tu cāṣṭamam 
kubje te prītipūrveṇa kathitaṃ tu viśeṣataḥ 
24.56 phetkārādiniyogena nādiphāntaṃ tu mālinī 
vidyātrayaṃ tathāpy evaṃ [']ghoryāṣṭakasamanvitam 
24.57 dvādaśāṅgaṃ tu suśroṇi vidyāṅgāś ca navātmakam 
navātmā-aṅgasaṃyuktaṃ mālinyāṅgasamanvitam 
24.58 nigrahas tu samākhyāto vilomenopadeśataḥ 
athānyaṃ sampravakṣyāmi arcanaṃ vidhipūrvakam 
24.59 kaulikena vidhānena yathāśāstravidhānataḥ 
susame bhūpradeśe tu gomayenopalepite 
24.60 yogapīṭhe 'thavā ramye gandhadhūpasuvāsite 
puṣpaprakarasaṅkīrṇe sugupte janavarjite 
24.61 tatrārcanaṃ samārabhya ekacitto dṛḍhavrataḥ 
śuklavastraparīdhānaḥ suklayajñopavītinaḥ 
24.62 śucir bhūtvā susannaddhaḥ ṣoḍhānyāsena kubjike 
sabāhyābhyantare dhyātvā ekacitto vyavasthitaḥ 
24.63 tataḥ karma samārabhya pūrvoktena vidhānavit 
kuṅkumākṣatasammiśrais trirasraṃ vartayet kramam 
24.64 raktacandanacūrṇena sindūreṇa-m-athāmbike 
hiṅgulena tathā rakte likhyākṣaraṃ yathoditam 
24.65 nādabindusamāyuktaṃ ṣaṭprakārasamanvitam 
sarvākārasamopetaṃ paramaṃ divyarūpiṇam 
24.66 tatra pūjā prakartavyā śāstroktena vidhānavit 
ādau pīṭhāni catvāri catvāraḥ pīṭhadevatāḥ 
24.67 yoginīpañcakaṃ caiva ḍādiyāntāḥ krameṇa tu 
punar mahāntārikāḥ pañca jñānaṃ ṣaḍvidham ucyate 
24.68 sraṣṭāraḥ siddhasadbhāvāḥ siddhāś catvāry anukramāt 
oṃkārapīṭhamadhyasthaṃ devyāyā saha vinyaset 
24.69 dakṣiṇe caiva jālākhyaṃ pūrṇapīṭhaṃ tathottare 
kāmarūpaṃ tato 'gre tu devyāsiddhasamanvitam 
24.70  ṣaṭprakāravidhānena kulāṣṭakam ataḥ śṛṇu 
prayāge tu mahākṣetre ā-kṣā-maṅgalasaṃyutā 
24.71 vairiñcī ādinā pūjyā pūrvabhāge vyavasthitā 
vārāṇasyāṃ mahākṣetre ī-lā-carcikasaṃyutā 
24.72 māheśī kādinā pūjyā āgneyīṃ diśam āśritā 
kolāgirye mahākṣetre ū-hā-yogīsamanvitā 
24.73 kaumārī cādinā pūjyā yāmyāyāṃ diśi saṃsthitā 
aṭṭahāse mahākṣetre R̥-sā-siddhiharānvitā 
24.74 ṭādinā vaiṣṇavī hy evaṃ nairṛtyakoṇam āśritā 
jayantī ca mahākṣetre L̥-ṣā-bhaṭṭasamanvitā 
24.75 vārāhī tādinā hy evaṃ vāruṇyāṃ diśi bhūṣitā 
caritre ca mahākṣetre ai-śā-kilakilānvitā 
24.76 aindrī pādyena sampūjyā vāyavyakoṇake sthitā 
ekāmrake mahākṣetre kālarātryā ca au-va-kā 
24.77 cāmuṇḍā yādinā pūjyā kauberīdiśi saṃsthitā 
devikoṭṭe mahākṣetre aḥ-hlā-bhīṣaṇasaṃyutā 
24.78 lakṣmī śādyena sampūjyā aiśānyāṃ diśi bhūṣitā 
kṣavarṇe kubjinīśānaṃ madhyasaṃsthaṃ prapūjayet 
24.79 ḍakāre ḍākinī pūjyā rakāre rākṣasī tathā 
lakāre lākinī 'py evaṃ kakāre kusumālikā 
24.80 śakāre śākinī viddhi yakāre yakṣiṇī matā 
bhrāmaṇī madhyataḥ pūjyā dakṣaṣaṭkaṃ prakīrtitam 
24.81 uttaraṃ sampravakṣyāmi yathāvad anupūrvaśaḥ 
guhyākhyā ca mahākhyā ca balākhyā maṇicandrikā 
24.82 mālinī vidyayā sārdhaṃ ṣaṭkam uttarasaṃjñakam 
ūrdhvataḥ siddhasantānaṃ mitrādau guravāvadhim 
24.83 ādhārīśas tu oṃkāre kuraṅgīśas tu jālake 
cakrīśaḥ pūrṇagiryāyāṃ mathanaṃ kāmarūpake 
24.84 yoginyaś ca yugāś caiva kramaśaḥ samprapūjayet 
caṇḍā ghaṇṭā mahānāsā sumukhī durmukhī balā 
24.85 revatī prathamā ghorā bhaumyā bhīmā mahābalā 
jayā ca vijayā caiva 'jitā caivāparājitā 
24.86 mahotkaṭā virūpākṣī śuṣkā cākāśamātarā 
sehārī jātahārī ca daṃṣṭrālī śuṣkarevatī 
24.87 pipīlikā puṣpahārī aśanī śaspahārikā 
bhadrakālī subhadrā ca bhadrabhīmā subhadrikā 
24.88 kādivarṇaiḥ prapūjyaitāḥ svaraiḥ pīṭhādhipās tathā 
siddhakramam idaṃ devi siddhamātṭḥ prapūjayet 
24.89 gopanīyaṃ prayatnena yadīcchec chirajīvitam 
na deyaṃ duṣṭabuddhīnām ity ājñā pārameśvarī 
24.90 pūjanīyaṃ prayatnena nit yam eva na saṃśayaḥ 
yogācārasamo yogī mānasaṃ samprapūjayet 
24.91 trikālam ekakālaṃ vā ṣoḍhānyāsaprapūrvakam 
ṣaṭprakāram idaṃ devi trisandhyaṃ samprapūjayet 
24.92 svaraiḥ ṣoḍaśabhir devyaḥ siddhāś caiva prapūjayet 
24.93 pīṭhaṃ pīṭheśvarīm īśaṃ pīṭhādhipasapālakam 
nāthadevyā samāyuktaṃ siddhadevyānvitaṃ yajet 
24.94 pañcamaṃ pīṭhamadhyasthaṃ devīcatuṣṭayānvitam 
siddhaiś caturbhiḥ saṃyuktaṃ pūjayet samanukramāt 
24.95 ṣaḍaṅgabhogasaṃsthānaṃ paṅkti ratnaṃ ca pañcakam 
guhyaṣaṭkaṃ tathā ḍādi sthānaṣaṭkam ataḥ param 
24.96 yoginīṣaṭkam etad dhi pañcakaṃ ca tataḥ punaḥ 
kṣetrāṣṭa-m-aṣṭakaṃ caiva aṣṭakaṃ ca catuṣṭayam 
24.97 ṣaṭkam anyat tato bāhye pūjanīyaṃ prayatnataḥ 
yo vetti yogyatā tasya anyathā nāmadhārakaḥ 
24.98 ṣoḍhānyāsaṃ tataḥ paścād vācanīyaṃ prayatnataḥ 
svabhrā caiva nirabhrā ca bhūcarī khecarī tathā 
24.99 gocarī gaṇamukhyā ca yoginyaḥ ṣaṭ kule sthitāḥ 
sūkṣmā caiva susūkṣmā ca antimāmṛta-m-antimā 
loo kāmarūpāditaḥ kṛtvā yoginyaḥ siddhasaṃyutāḥ 
kamalā barbarā caiva mahāntārī tṛtīyakā 
24.101 laghvinī ca caturthī syād bimbākhyā vṛddhapañcakam 
raktākhyā ca karālākhyā caṇḍā ucchuṣmasaṃjñikā 
24.102 khaṇḍikā pañcamī jñeyā pañca devyā udāhṛtāḥ 
mātaṅgī ca pulindā ca śabarī campakā tathā 
24.103 madhyataḥ kubjanāmā tu ratnabhūṣaṇabhūṣitā 
viśuddhānāhataṃ caiva tathā ca maṇipūrakam 
24.104 svādhiṣṭhānaṃ tathādhāraṃ pañcaratnaṃ prapūjayet 
ṣoḍhānyāsasya tattvajño anyathā ca vilomakṛt 
24.105 pūjyapūjakadigbhāge kramaśuddhikrameṇa tu 
sa ca yogyo 'nvayī śiṣyo anyathā nāmadhārakaḥ 
24.106 gandhaiś ca vividhaiḥ puṣpair javābandhūkapāṭalaiḥ 
karavīrakubjakuṇḍaiś ca jātīmallikacampakaiḥ 
24.107 saivalyotpalayūthībhiḥ sindūraiḥ kiṃśukais tathā 
ebhiś ca bahubhiś cānyaiḥ sugandhair dhūpaguggulaiḥ 
24.108 vāmāmṛtādibhir dravyaiḥ kuṇḍagolodbhavais tathā 
pañcāmṛtais tathā cānyair aliphalgusamanvitaiḥ 
24.109 mahāpiśitadhūpais tu nālājair dīpakaiḥ saha 
evaṃ kuryād vidhānena arcanaṃ vidhipūrvakam 
24.110 mahāśaṅkhārghapātreṇa arghaṃ dattvā yathākramam 
tasyāpi pūrvato devi maṇḍalānāṃ catuṣṭayam 
24.111 pītapuṣpaiḥ samabhyarcya ekaikasya krameṇa tu 
punar dakṣiṇato devi catvāraḥ kṛṣṇapuṣpakaiḥ 
24.112 uttare caiva catvāri raktapuṣpaiḥ prapūjayet 
catvāraḥ paścime devi śvetapuṣpaiḥ prapūjayet 
24.113 praṇāmaḥ kriyate paścād aṣṭāṅgaṃ mānasena tu 
stotraṃ paścāt prakurvīta tac ca devi vadāmy ah am 
24.114 namo 'stu te mahāmāye sūkṣmadehe parāpare 
ekākini viśuddhātme nādākhye bindumālini 
24.115 adehāc ca samutpanne acale viśvadhāriṇi 
mahākuṇḍalinī nitye haṃsamadhye vyavasthite 
24.116 somasūryāgnimadhyasthe vyomavyāpī parāpare 
oṃkāravigrahāvasthe hakārārdhārdhadhāriṇi 
24.117 vālāgraśatadhāsūkṣme anante cākṣaye 'vyaye 
hakārārdhakalādhāre padmakiñjalkam āśrite 
24.118 sakalākhye mahāmāye varade lokapūjite 
ekaikanāḍimadhyasthe marma-m-ekaikabhedini 
24.119 aṣṭatriṃśatkalā devi bhedini brahmarandhrage 
brahmā viṣṇuś ca rudraś ca īśvaraś ca sadāsivaḥ 
24.120 ete pañca mahāpretāḥ pādamūle vyavasthitāḥ 
trailokyajananī devi namas te śaktirūpiṇī 
24.121 iḍāpiṅgalamadhyasthe mṛṇālatanturūpiṇi 
bindumadhyagate devi kuṭile cārdhacandrike 
24.122 tuṣārakaṇikābhāse dvādaśāntāvalambini 
umākhye hṛdgate gauri dvādaśādityavarcase 
24.123 śūnye śūnyāntarāvasthe haṃsākhye prāṇadhāriṇi 
lambākhye parame devi dakṣiṇottaragāmini 
24.124 nāsāgre tu samuttīrṇe madhyasūtrapravāhini 
hṛllekhe paramānande tālumūrdhni vyavasthite 
24.125 nādaghaṇṭikasaṅghṛṣṭe guṇāṣṭakasamanvite 
sthūlasūkṣme tu saṅkṣubdhe dharmādharmapuṭadvaye 
24.126 kāryakāraṇakartṛtve triśūnye nādavigrahe 
parāparapare śuddhe caitanye śāśvate dhruve 
24.127 sarvavarṇadharī devi guhyatattveti viśrute 
aśarīre mahābhāge saṃsārārṇavatāriṇi 
24.128 jayā ca vijayā caiva jayantī cāparājitā- 
tumburubījamadhyasthe namas te pāpamocani 
24.129 bandhamokṣakarī devi ṣoḍaśānte vyavasthite 
bhrāmaṇī śaktiśūlena mahāvyūhasamanvite 
24.130 bhramaṇi bhrāmaṇī gauri māyāyantrapravāhini 
svacchandabhairavī devi krodha-unmattabhairavi 
24.131 pañcāśadvarṇarūpasthe tvayā rudrāḥ prakīrtitāḥ 
amṛtākhye ruruś caṇḍe namas te jñānabhairavi 
24.132 daṃṣṭrotkaṭe vidyujjihve tārakākṣi bhayānake 
namāmi devadeveśi aghore ghorarūpiṇi 
24.133 jvālāmukhī vegavatī umādevi sarasvati 
haṃsasvarodvahe devi gomukhi śaktimālini 
24.134 kroṣṭuke subhage devi durge kātyāyanī tathā 
nityaklinnāsamākhyāte rakte ekākṣare pare 
24.135 brāhmī māheśvarī caiva kaumārī vaiṣṇavī tathā 
vārāhī caiva māhendrī cāmuṇḍā tv abhayānanā 
24.136 yogeśī tvaṃ hi deveśi kulāṣṭakavibhūṣite 
aindrī caiva tu āgneyī yāmyā nairṛtyavāruṇī 
24.137 vāyavyā caiva kauberī īśānī samudāhṛtā 
prayāgā varuṇā kollā aṭṭahāsā jayantikā 
24.138 caritrekāmrake caiva devikoṭṭaṃ tu cāṣṭadhā 
tathā kālī umā devī devadūti namo 'stu te 
24.139 bhadrakāli mahādevi carmamuṇḍe bhayāvahe 
mahocchuṣme mahāśānte namas te śaktirūpiṇi 
24.140 bhūr bhuvaḥ sveti svāhānte dayāṃ nāthe kuruṣva me 
jñānārthino mahāmāye etad icchāmi veditum 
24.141 yas tv idaṃ paṭhate stotraṃ trisandhyaṃ caiva mānavaḥ 
prāpnoti cintitān kāmān strīṇāṃ bhavati vallabhaḥ 

iti śivaśaktisamarasamahāmāyāstavaḥ samāptaḥ 

śrīkubjikā uvāca 

24.142 kulajānāṃ maheśāna pavitrārohaṇaṃ katham 
kasmin kāle kathaṃ kāryaṃ kimarthaṃ vada me prabho 

śrībhairava uvāca 

24.143 purā devāsurair devi kṣīrodo mathito yadā 
tatra netro mahābhāge kaśyapasya suto balī 
24.144 manthāne yojito bhadre viṣanidrāvimūrchitaḥ 
na śaknoti talasyānte varṣāsu vasituṃ yadā 
24.145 tenāhaṃ rādhito devi pavitreṇa mahātmanā 
divyaṃ varṣasahasraṃ tu vāyubhakṣo mahābalaḥ 
24.146 tUṣṭo 'haṃ tasya deveśi kiṃ kartavyaṃ puroditam 
tato 'sau daṇḍavad bhūmau mama pādāgrataḥ sthitaḥ 
24.147 prāvṛṭkāle na śaknomi talānte vasituṃ hara 
tataḥ so 'pi mayā devi karābhyāṃ gṛhya bhūtalāt 
24.148 śirasā dhārito devi jaṭājūṭe varānane 
tataḥ sarvais tu deveśi śirasā dhāritaḥ śuciḥ 
24.149 daśakoṭis tu pūjānāṃ pavitrārohaṇe samā 
vṛthā dīkṣā vṛthā jñānaṃ gurvārādhanam eva ca 
24.150 harate nāgarājas tu vinā devi pavitrakāt 
vṛthā pariśramas tasya yo na kuryāt pavitrakam 
24.151 tasmāt sarvaprayatnena kartavyaṃ kulajaiḥ priye 
āṣāḍhe śuklapakṣe tu mithunasthe divākare 
24.152 tadālābhe prakartavyaṃ karkaṭasthe divākare 
avirodhena kartavyaṃ yāvat syāt tulapūrṇimā 
24.153 sauvarṇaṃ tu kṛtaṃ sūtraṃ sūkṣmaṃ tu triguṇīkṛtam 
tatra tantuśataṃ proktaṃ granthipādaṃ guror matam 
24.154 pūjyasya dvyadhikaṃ kāryaṃ pratipūjye caturādhikam 
saptādhikaṃ śivasyoktaṃ yogeśīnāṃ ṣaḍuttaram 
24.155 vidyāpīṭhasya sarvasya kuryāt tac ca ṣaḍuttaram 
pādukānāṃ prakartavyaṃ śatam aṣṭādhikaṃ priye 
24.156 aṣṭatriṃśac ca granthyo vai pañcāśad vā vikalpanā 
aṣṭādhikaṃ guror uktaṃ vaṭukasya tathā bhavet 
24.157 athavā rājataṃ sūtram abhāvād vastrajaṃ bhavet 
śuklasūtraṃ samādāya triguṇaṃ triguṇīkṛtam 
24.158 tena tantuśataṃ kuryād aṣṭādhikaṃ mahātape 
śrīkaṇṭhādi caturviṃśair ajeśādyais tu ṣoḍaśa 
24.159 aṣṭābhiś ca mahākālair vidyāmātā catuṣṭayam 
ṣaṭtantu ḍādiṣaṭkasya kulāṣṭe cāṣṭatantukam 
24.160 granthayaś ca yathāśobhā yathāśaktyā pavitrakam 
gorocanā prakartavyā athavā kuṅkumena tu 
24.161 evaṃ niṣpādayitvā tu yāgaṃ kṛtvā varānane 
dātavyaṃ bhaktiyuktena pūjānte tu pavitrakam 
24.162 gītaṃ nṛtyaṃ prakartavyaṃ sa evātra varānane 
hindolaṃ vātha kartavyaṃ mandatārayutena tu 
24.163 prāptāḥ samayino ye tu te pūjyās tu prayatnataḥ 
tat sarvaṃ tu prakartavyaṃ cāturmāsyaṃ varānane 
24.164 saptavāsaram evaṃ tu trīṇi vā ekam eva vā 
vīrakrīḍākṛte devi sampannaṃ bhavate priye 
24.165 tat pavitraṃ varārohe kṛtvā caiva kṣamāpayet 
bahuyajñaphalaṃ devi bahutīrthaphalaṃ tathā 
24.166 dānadharmasya deveśi kalāṃ nārghanti ṣoḍaśīm 
pavitraṃ paramaṃ puṇyaṃ sarvadoṣavivarjitam 
24.167 tena kāryam idaṃ devi kulajais tu varānane 
laṅghanaṃ samayānāṃ tu karma vidhivinākṛtam 
24.168 te doṣā nāśam āyānti pavitreṇa varānane 
varṣe varṣe prakartavyaṃ yathāvibhavavistarāt 
24.169 kāśaiḥ kuśaiḥ prakartavyaṃ bhaktiyuktena bhairavi 
vittaśāṭhyaṃ na kartavyam ihaiva tu kulāgame 
24.170 śāṭhyena yat kṛtaṃ karma na tat siddhipadaṃ bhavet 
evaṃ jñātvā varārohe vittaśāṭhyaṃ na kārayet 
24.171 tadgrahaś ca tathā pūjā pavitrārohaṇaṃ param 
etat sarvaṃ samākhyātaṃ kim anyat paripṛcchasi 

iti kulālikāmnāye śrīkubjikāmate tadgrahapūjāpavitrārohaṇaṃ nama caturviṃśatimaḥ paṭalaḥ 


%%%next 26 verses introducing chapter 25
%%%(maṇḍalavidhāna) only in EJT
%%%from appendix 4
%%%
śrīdevy uvāca 

1 maṇḍalānāṃ vidhānaṃ tu prasādaṃ kuru bhairava 
yena jānāmy ahaṃ deva kathayasva vidhānataḥ 
śrībhairava uvāca 
2 sāraṃ maṇḍalam ākhyātaṃ phalaṃ sāraṃ parāparam
lāti yasmād yamātītaṃ maṇḍalaṃ tena kīrtitam 
3 makāre mātaraḥ sarvā ḍakāre ḍāmarīgaṇam 
lakāre lākinīvargaṃ maṇḍalaṃ tena cocyate 
4 makāre nit yam ātmānaṃ ḍakāre khecarīgaṇam 
lakāre bhūcarīvargo maṇḍalaṃ tena kīrtitam 
5 makāre ' nāma yo devo ḍakāre śaktir iṣyate 
lakāre ṣaḍvidhā sṛṣṭir maṇḍalaṃ tena kīrtitam 
6 makāraṃ śivatattvaṃ ca vidyātattvaṃ ḍakāragam 
lakāram ātmatattvaṃ tu kīrtitaṃ tena maṇḍalam 
7 makāre tu śivaṃ vidyād ḍakāre parameśvarī 
lakāre saptakoṭyas tu mantrāṇāṃ parikīrtitam 
8 makāre kāraṇāḥ pañca ḍakāre tu parāparā 
lakāre aparāḥ pañca tena maṇḍala kīrtitam 
9 brahmā viṣṇuś ca rudraś ca īśvaraś ca sadāśivaḥ 
ucyate maṇḍalenaite tena maṇḍalam ucyate 
10 sarve grahāś ca dikpālā nāgā vai bhairavādayaḥ 
tiṣṭhanti maṇḍale līnāḥ sarvādhikyam ato punaḥ 
11 anantādyāḥ śivāntādhvā ṣaḍvidhaḥ samprakīrtitaḥ 
āste maṇḍalake so hi maṇḍalaṃ vyāpakaṃ tataḥ 
12 sarvavyāpitayā nānyo maṇḍalābhyadhiko yataḥ 
tena maṇḍalam abhyarcya[ṃ] bhuktimuktiphalārthibhiḥ 
13 itīṣṭaṃ maṇḍalādhyāyaṃ nirdiṣṭaṃ kubjikāmate 
kuryāt pradakṣiṇaṃ devi apasavye visarjanam 
14 śrīmatasyāgrato devi tad evaṃ gurusannidhau 
suprasiddhāṃ tato jyeṣṭhāṃ suparīkṣya prayatnataḥ 
15 saptāviṃśatibhir bhedaiḥ praśnam etat kramāgatam 
ṣaṭprakāratrayaś cājñā yeṣāṃ tīvrāvalokanam 
16 subhaktā vatsalāḥ śāntā dambhamāyāvivarjitāḥ 
teṣāṃ maṇḍalakaṃ kuryād anyathā tu vilomakṛt 
17 tasya pūjākramaś cāyaṃ jānunā bhūmisaṃsthitaḥ 
vidhāya mārjanī śuddhe prokṣite caiva bhūtale 
18 dakṣahastatalaṃ bhrāmyaṃ maṇḍalaṃ vārinirmitam 
supuṣpaprakarair yuktaṃ vilipya candanādibhiḥ 
19 tridhā tad yāgavidhinā dattvārghaṃ dravyasaṃyutam 
śiṣyo 'sya gandhadhūpādyaiḥ pūjāṃ kṛtvā purātmanaḥ 
20 sadvidhānasamāyuktaṃ tad abhyarcya samantataḥ 
gurupādāmbhujau bhaktyā stutvā stotrādibhiḥ kramāt 
21 paścāt triḥśuddhayā bhaktyā praṇamya tadanujñayā 
utthāya śirasā dhāryaṃ bhuktimuktiphalārthinā 
22 gurupādasthapuṣpaṃ tu kāryaṃ śisyeṇa sādarāt 
nīrājanaṃ subhaktyātha śubhavastunivedanam 
23 dūrāt karoti paryāyāt pārśvastho hi ca parvasu 
svāminaṃ praṇamed bhaktyā ity ājñā pārameśvarī 
24 puṣpāghrāya visarjyeta nītvā nāsam apuṣpatā 
vidhānaṃ maṇḍalasyoktaṃ svāmipūjāvidhikramaḥ 
25 kramaṃ kuryād idaṃ bhaktyā yaḥ śiṣyaḥ kubjikāmate 
svāmipādaprasādena divyājñāṃ labhate punaḥ 
26 etan maṇḍalam ākhyātaṃ yathārthaṃ tu mayā tava 
idānīṃ brūhi deveśi kim anyaṃ kathayāmi te 
%%%
%%%end of maṇḍalavidhāna insertion
%%%

śrīkubjikā uvāca 

25.1 pañcātmānaḥ kathaṃ deva saṃsthitaḥ katamaḥ śivaḥ 
kinniyogaratā deva kimpramāṇaṃ vyavasthitāḥ 

śrībhairava uvāca 

25.2 atyantanipunaṃ devi pṛcchase guṇavistaram 
savismayakaraṃ bhadre kathayāmy anupūrvaśaḥ 
25.3 paraḥ parāparaḥ siddhaḥ prasiddhaḥ pudgalātmakaḥ 
sthānanirdeśato vakṣye śṛṇu tvaṃ varavarṇini 
25.4 śatakoṭipramāṇena paro hy ātmā vyavasthitaḥ 
ṣaṇnavatyeva koṭīnāṃ vijñeyas tu parāparaḥ 
25.5 caturāśītipramāṇena siddho hy ātmā vyavasthitaḥ 
ṣaṭtriṃśatkoṭimadhyasthaḥ prasiddhaḥ kāraṇeśvaraḥ 
25.6 catvāriṃśāṣṭamānena saṃsthitaḥ pudgalātmakaḥ 
laḍahaiva sa vijñeyaḥ parāparavibhāgaśaḥ 
25.7 prasiddhakandharārūḍhaḥ siddhasārathināhataḥ 
sa yāti nīyate yatra parāparanirīkṣaṇāt 
25.8 paramāṇusamādiṣṭaḥ karmavṛttau niyāmitaḥ 
vāmādipathamārgeṇa prakṛtyarthabharālasaḥ 
25.9 prakṛtyākrāntaśakaṭo bhajyate mriyate gavi 
rodate sārathis tatra paśyate tu parāparaḥ 
25.10 vāmādipatham ārūḍho nadyāmbhodhisaritsaraiḥ 
yāti mad hyena teṣāṃ vai pasyate varṣaṇādikam 
25.11 yānakrīḍāṃ ca paśyeta kaphākrāntabharo yadi 
pudgalātmā vrajet tatra siddhasārathineritaḥ 
25.12 pittadravyabharākrānto jyeṣṭhāpathi niyojitaḥ 
jvālāvalīḍhamadhye tu jvalantaikapure 'pi vā 
25.13 kṣutpipāsābhibhūtas tu caurā gṛhṇanti tatpathe 
kopasaṅgrāmasaṃrambhaṃ striyāliṅganacumbanam 
25.14 rājyopadravam etad dhi paradārasamākulam 
sārathis tu bhavet tatra vadhyate māryate tu saḥ 
25.15 parāparo rudaty āśu paraḥ paśyati tatra vai 
yāty anekavidhopāyaiḥ jyeṣṭhāpathasamāśritaḥ 
25.16 kaphapittabharākrānto vātākrānto yathā punaḥ 
pathi raudre niyukto 'yaṃ yāty asau khecarāmukhaḥ 
25.17 svargapātālalokāntaṃ piśācabhuvanāni ca 
vidyādharapuraṃ paśyet puṣpitaṃ vanakānanam 
25.18 yoginīcakramelāpaṃ nṛtyagītaravākulam 
rājyābhiṣekam āpannaṃ chattrotkṣepitacāmaram 
25.19  vātapittabharākrāntaḥ pudgalātmā pathi sthitaḥ 
paśyate sārathiḥ sarvaṃ bhuñjate tu parāparaḥ 
25.20 atha vātabharākrānto yāti nīyati dūrataḥ 
santrāsitas tu ravinā viṣamaḥ samaparvatam 
25.21 khañjamāno 'py asau yatnād bhajyate mriyate tu saḥ 
atha vātakaphākrāntaḥ parasārathineritaḥ 
25.22 sarpavyāghravṛkākīrṇaṃ mārgaṃ paśyati sarvathā 
khādyate cāpy asau sarpair mriyate nīyate 'pi vā 
25.23 evaṃ pudgala-ātmā vai prasiddhaskandham āśritaḥ 
siddhasārathinā yuktaḥ parāparavaśānugaḥ 
25.24 prerito 'sau parātmānā krīḍate sa carācaram 
kathitaṃ sarahasyaṃ tu parātmānirṇayaṃ sphuṭam 
25.25 yan na kasyacid ākhyātaṃ bhrāntirūpaṃ jagasya ca 
śrīmataṃ ye na vindanti bhrāntis teṣāṃ pade pade 
25.26 parākāśe paro hy ātmā mantrākāśe parāparaḥ 
śaktyākāśe susiddhas tu padabhāve prasiddhadhīḥ 
25.27 bhūtākāśapathe saṃsthaḥ pudgalātmā nakiñcanaḥ 
pañcaite śambhunādiṣṭāḥ śambhuḥ sarvatra samarasaḥ 
25.28 ṣaṣṭhanāthaḥ paraḥ sākṣāt sarvajñaḥ sa parāparaḥ 
alakṣaṇam asaṃjño 'sau prasādāc chambhuvas tu saḥ 

śrīkubjikā uvāca 

25.29 anujñāto 'bhiṣiktas tu vīro vīratvam icchatā 
cared vidyāvrataṃ mantrī yathā tat kathayasva me 

śrībhairava uvāca 

25.30 śṛṇu devi pravakṣyāmi vidyāyā vratam uttamam 
jaṭī muṇḍī śikhī bhasmī brahmacārī tu snātakaḥ ll 
25.31 vratastho 'py avratastho vā sarvāvastho 'tha siddhidaḥ 
pañcamudrādharo vāpi bhasmaniṣṭho digambaraḥ 
25.32 cīravalkaladhārī vā sarvābharaṇabhūṣitaḥ 
malīmaso 'tha śuklo vā vastrābharaṇabhūṣitaḥ 
25.33 yena yena hi veṣeṇa vartate sādhakottamaḥ 
tat tad eva vrataṃ proktam iti śāstrasya niścayaḥ 
25.34 yad yad ābharaṇaṃ tasya yaṃ vā vadati vācayā 
sā caryā kathitā tasya mantrāś caiva na saṃśayaḥ 
25.35 vidyā nāma parā śaktir dvibhir bhedair vyavasthitā 
cicchaktirahitādhiṣṭhā avarṇā varṇagā śubhā 
25.36 vindate varṇagā yena tena vidyāvrataṃ priye 
cīrṇacaryā jagat sarvaṃ varṇāvarṇair vyavasthitam 
25.37 vrataṃ bhāvam iti proktaṃ tena vidyāvrataṃ smṛtam 
cic cinoti vida jñāne cicchaktipratibodhakam 
25.38 avarṇaṃ raktavat piṇḍaṃ vidyāmantrātmavigraham 
paśyanti ca vratāsaktāś cīrṇavidyā sa ucyate 
25.39 saptakoṭisahasrāṇāṃ vidyānām aprameyataḥ 
cicchaktibodhanaṃ yasmād avarṇā varṇatāṃ gatā 
25.40 ekā eva parā proktā vidyārūpā tu kuṇḍalī 
tena devi vrataṃ proktaṃ vidyāyāvaraṇaṃ śubham 
25.41 vidyāmārge cared yas tu śāstradṛṣṭena karmaṇā 
dhyānaṃ pūjā japo homaḥ samayānāṃ prapālanam 
25.42 etad vidyāvrataṃ proktaṃ nānyathā vīranāyike 
vidyā jñeyā tu yonisthā carate dvādaśāntagam 
25.43 vratasthāneṣu sarveṣu tena vidyāvrataṃ priye 
brahmā viṣṇus tathā rudra īśvaras tu sadāśivaḥ 
25.44 ete sthānā vratasyaiva yatra sā carate parā 
taṃ jñātvā paramaṃ sthānaṃ cīrṇavidyāvrato hi saḥ 
25.45 pañcamudrā bhaved devi pañcakāraṇakaṃ tataḥ 
bhūṣito hṛdi tiṣṭheta pañcamudrāvyavasthitaḥ 
25.46 etais tu bhūṣito mantrī paryaṭet kṣetram āśritaḥ 
śmaśāne kānane kūpe udyāne devakule 'pi vā 
25.47 śūnye rājagṛhe mantrī parvatāgre catuṣpathe 
tripathagrāmarathyāsu mahodadhitaṭe tathā 
25.48 nadīsaṅgamatīre vā ekavṛkṣe 'tha kānane 
ekaliṅge tathā ṣaṇḍe kṣetrair vā aṣṭabhiḥ kramāt 
25.49 prayāgā varuṇā kolā bhīmanādā jayantikā 
caritrekāmrakaṃ caiva koṭīvarṣaṃ tathāṣṭamam 
25.50 etais tu paryaṭen mantrī yoginīsiddhim icchatā 
khaṭvāṅgadhāriṇo maunī vegāt paryaṭate sadā 
25.51 ḍamaruṃ pāśakhaṭvāṅgaṃ triśūlaṃ kheṭakaṃ tathā 
nārācā kartarī cakram aṅkuśaṃ muśalaṃ dhanuḥ 
25.52 gadā kaṭṭārikā śaktis tathā daṇḍakamaṇḍalum 
ete tu āyudhāḥ śreṣṭhāś caryākāle tu dhārayet 
25.53 pañcadaivasikaṃ kāryam astrasamkhyā vratottamā 
dvādasāhaṃ caren mantrī pakṣamāsādito 'thavā  
25.54 ṣaṇmāsam athavābdaṃ ca dvirabdaṃ trīṇi-m-eva vā 
catuḥ pañca tathā ṣaṭsu sapta aṣṭa tathāpi vā 
25.55 nava dvipañcakaṃ vātha ekādaśa-m-athāpi vā 
dvādaśābdaṃ caren mantrī brahmaghno 'pi sa sidhyati 
25.56 abda-m-ekena deveśi maṇḍalīkaiḥ prapūjyate 
deśaṃ bhṛtyā[ḥ] puraṃ grāmaṃ samantrī sapurogamaḥ 
25.57 sāntaḥpuravaro rājā vaśyo bhavati śobhane 
dvirabdair yakṣakanyāś ca sidhyanti suranāyike 
25.58 trirabdāt saptapātālā yās tu daityāṅganāḥ śubhāḥ 
paśyate madamattās tu madavibhrāntalocanāḥ 
25.59 mātaṅgamadagāminyo akṣayā yauvanodvahāḥ 
kṣubhyanti sādhakendrasya prāṇān muñcanti tatkṣaṇāt 
25.60 catuḥ pañca tathā ṣaṭsu brahmalokādi sādhayet 
saptame 'bde varārohe rudrāntā yā vyavasthitāḥ 
25.61 sidhyanti sādhakendrasya iti śāstre pracoditāḥ 
aṣṭame īśvarākhyaṃ tu navame tu sadāśivam 
25.62 daśame vidyālayo bhūtvā krīḍate gagane mahān 
daśamaikādaśe devi dvādaśair guṇasaṃyutaḥ 
25.63 aṇimādiguṇair yukto gacchate khecaraiḥ saha 
akṣayo hy ajayo yogī krīḍate sarvagaḥ śubhaḥ 
25.64 vratasthasya phalaṃ hy etat kathitaṃ tu mayā priye 
sāmprataṃ yogamārgeṇa yathā bhavati tac chṛṇu 
25.65 śmaśānaṃ tu gṛhaṃ proktaṃ gṛho dehaḥ prakīrtitaḥ 
aṭate tu aviśrāntaḥ śmaśānagatacetasaḥ 
25.66 kaṃ śarīram iti proktaṃ tasyānte nayate bhṛśam 
paśyate mantrasaṃstho 'pi vāṅmayaṃ sacarācaram 
25.67 kānanaṃ tena cākhyātaṃ kāyānte saṃsthitaṃ priye 
manaḥ kūpaṃ samuddiṣṭaṃ saṅkalpaṃ kurute bahūn 
25.68 tatrādhāro vrajet kṣetrī tena kūpeti viśrutaḥ 
udyato mana nābhistho madhyataḥ sarvajantuṣu 
25.69 neti tat paramaṃ prāptaṃ udyānas tena ucyate 
dadāti satataṃ dehe amṛtaṃ tu nabhogatam 
25.70 kulānte ca cared yena dharmādharmātmabandhanaiḥ 
tena devi samākhyātaṃ dehī devakulaṃ sadā 
25.71 rājā cātmā samuddiṣṭaḥ ṣaṭtriṃśe 'py athavādhvani 
śabdādiguṇabhūyiṣṭho manaḥkoṣṭhagataḥ prabhuḥ 
25.72 tena sthitena tiṣṭhanti tenaiva saha gacchati 
unmanatve sadā yuktaḥ śūnyo mana-m-udāhṛtaḥ 
25.73 śūnyaṃ rājagṛhaṃ tena unmanatve sadā priye 
parvataṃ guruvaktraṃ tu tasyāgram avalambayet 
25.74 parvatāgraṃ smṛtaṃ tena paryāyena surārcite 
catuṣpathaṃ bhaved devi vāmā jyeṣṭhā ca raudrikā 
25.75 ambikāyā samāyuktam aṭanaṃ pudgalātmakam 
catuṣkaṃ tena cākhyātaṃ patham etad udāhṛtam 
25.76 pathaṃ nāḍītrayaṃ proktam iḍādyā tu kuleśvari 
tripathastho-r-aṭen nityaṃ kurute gati-r-āgatim 
25.77 tripathasthaikabhāvastho yaḥ karoti sa sidhyati 
grāmaṃ deham iti proktam ātmā deham iti smṛtaḥ 
25.78 ālayaḥ sarvasattvānāṃ sukhaduḥkhaparāparaḥ 
gacchate adha ūrdhvaṃ tu rathyādhāro jagatpatiḥ 
25.79 tena rathyā smṛtā nāḍī brahmādyā ātmanaś ca tu 
taṭaṃ tīraṃ samākhyātaṃ sindhūccāraṃ nigadyate 
25.80 duḥkhānte tu layātītaṃ taṭam udadhisaṃjñakam 
vācānte vyāpinaṃ devaṃ śivaṃ paramakāraṇam 
25.81 tiṣṭhate satataṃ mantrī tatra caryā prakāśitā 
nadate cāntarādhārā parā kuṇḍalinī tu yā 
25.82 sā nadī oghabhūtā tu vyomārṇe vahate sadā 
saṅgamaṃ parayā yuktam unmanāyāḥ prakīrtitam 
25.83 saṅgamaṃ tena cākhyātaṃ nadī tu samudāhṛtā 
tīraṃ tu samavāyinyā vibhvīyā sā parā kalā 
25.84 tadātīto bhaved vyāpī nadyās tīram udāhṛtam 
ekavṛkṣaṃ samākhyātam ekā śaktir ihocyate 
25.85 vṛkṣam indriyam ākhyātaṃ vṛkṣaṃ śaktir iti smṛtā 
kṣayaṃ gatā pare vyomni amanaske nirāmaye 
25.86 tena devi mayā proktam ekavṛkṣas tu caryayā 
ekam eva paraṃ tattvaṃ liṅgādhāraṃ vibhuṃ priye 
25.87 paryaṭe[t] tu divā rātrau aviśrāntaḥ punaḥ punaḥ 
ekaliṅgaṃ samākhyātaṃ ṣaṇḍaṃ tu kathayāmi te 
25.88 hṛdayaṃ tu saraḥ proktaṃ padmaṃ vai aṣṭapattrakam 
udānena tu deveśi vikāśe tu ravis tu saḥ 
25.89 sevyate pudgalālīnaṃ sarojaṃ hṛdayātmakam 
ramate tatra haṃsākhyaḥ śaktir ādyā manonmanī 
25.90 taṃ ṣaṇḍaṃ kathitaṃ śāstre kṣetrāṇi kathayāmi te 
kṣetraṃ nāma paraṃ śāntaṃ śarīraṃ tattvasaṃyutam 
25.91 kṣetrajño aṭate nityaṃ sthānāṣṭakagatisthitaḥ 
tenedaṃ kathitaṃ devi kṣetrāṣṭakam udāhṛtam 
25.92 ye pīṭhās te bhavet kṣetrāḥ kṣetrāḥ pīṭhā udāhṛtāḥ 
nāmaparyāyasaṃjñā tu śāstre śāstre pṛthak pṛthak 
25.93 prayāgaṃ nābhisaṃsthaṃ tu varuṇā hṛtpradeśataḥ 
kolāgiryaṃ tu kaṇṭhasthaṃ bhīmanādaṃ ca tāluke 
25.94 bindusthāne jayantyākhyaṃ nādākhye tu caritrakam 
ekāmraṃ śaktimadhye tu jñātavyaṃ viditātmakaiḥ 
25.95 guruvaktragataṃ proktaṃ koṭīvarṣaṃ tu cāṣṭamam 
ete sthānā mayā proktā adhyātmaṃ pudgalāśritāḥ 
25.96 aṭate satataṃ yena hṛccakrasthaḥ sanātanaḥ 
yāvad evaṃ na vindec ca pīṭham adhyātmikaṃ priye 
25.97 tāvat tasya kutaḥ siddhir aṭato 'pi jagattrayam 
bahirantarabhāvaṃ tu antarambahiraṅgayoḥ 
25.98 lokapravṛttihetvarthe bahiḥpīṭhāḥ prakīrtitāḥ 
antaraṅgaṃ yadā śuddhaṃ paśyate manasā priye 
25.99 tadā paśyati bāhye tu sūkṣmarūpā gabhastayaḥ 
melakaṃ ca prayacchanti caruṃ vā pāśavīṃ vidhim 
25.100 sampradāyaṃ prayacchanti sthānaṃ vā kathayanty api 
aśuddhena tu bhāvena paryaṭet pṛthivīṃ yadi 
25.101 na tasya darśanaṃ devi dadate manasā kvacit 
paśyann api ca deveśi paśyanto 'pi na paśyati 
25.102 saṅkīrṇalakṣaṇā devyo miśrā jñātuṃ na śakyate 
prabhāvo 'syāḥ samuddiṣṭo vinā tāsām anugrahāt 
25.103 grāme grāme tathāraṇye nagare catvare pure 
kheṭake caiva sandohe pīṭhakṣetre vane tathā 
25.104 udyānopavane caiva pūrvam ukte tathaiva ca 
deśe deśe 'bhijāyante jñānarūpā gabhastayaḥ 
25.105 pārthivācaraṇe proktā āpe teje tathānile 
ākāśe caiva suśroṇi tāsāṃ saṅkhyā na vidyate 
25.106 pīṭhāśrayavibhāgena utpadyante hy anekadhā 
khānapānaratā nityaṃ krīḍante cāntyajeṣv api 
25.107 tena devi mayā proktāḥ pīṭhā bāhyasvarūpataḥ 
veśyāgṛhaṃ prayāgākhyaṃ varuṇā sauṇḍikī viduḥ 
25.108 kaivartikī bhavet kollā aṭṭahāsaṃ tu khaṭṭakī 
jayantī kandukī vidyāc caritraṃ rajakīgṛham 
25.109 ekāmrakaṃ bhavec chippī koṭākhyeti ca kauṣaṭī 
purasthitāni kṣetrāṇi jñānātmā lakṣayet tu tā[ḥ ] 
25.110 bāhyataḥ kathito bhedo gṛhasthaṃ śṛṇu sāmpratam 
prayāgaṃ madhyadeśe tu varuṇā dvāram āsritā 
25.111 kolāpuraṃ tu kañjinyāṃ cullī caivāṭṭahāsakam 
caritraṃ peṣaṇī jñeyā ekāmraṃ kaṇḍanī smṛtā 
25.112 devikoṭṭaṃ gharaṭṭaṃ ca upakṣetrāṇy ataḥ sṛṇu 
vardhamānī-m-upālambhī dehalyā muṣalaṃ tathā 
25.113 khaṭvā śūrpagharaṭṭaṃ ca vardhamānyāditaḥ kramāt 
pādenaitān na saṃspṛśya yad icchec chriyam ātmanaḥ 
25.114 mārjanīśūrpavātaṃ vā dūrataḥ parivarjayet 
vātāviṣṭāḥ praviśyanti chidraṃ matvā tu sādhake 
25.115 vighnāni siddhayoginyaḥ śreyaṃ gṛhṇanty ato 'rthataḥ 
kaṇikā śiravākhyaṃ tu kālikālālayaṃ śivam 
25.116 kālañjaraṃ mahākālaṃ kṣetrasaṃsthānam āśritaḥ 
pīṭhopapīṭhasandohaṃ purasthaṃ gṛhadehagam 
25.117 jñātavyaṃ cumbakenaiva bhuktimuktiphalapradam 
bāhyataḥ kathitā hy evaṃ pīṭhāḥ kṣetrās tu suvrate 
25.118 paryaṭed eṣu sthāneṣu pūjanīyāḥ sadā budhaiḥ 
bhakṣyabhojyānnapānaiś ca tarpayen mantravit sadā 
25.119 eteṣāṃ saṃsthitis teṣāṃ yoginām aprameyatā 
bhavantīha na sandeho varadāḥ sādhakasya tu 
25.120 tarpitāḥ pūjitā devyaḥ sādhakasya dadanti hi 
ṣaṇmāsād yuktamārgasya samayavratapālake 
25.121 mantavyaṃ sādhakendreṇa toṣayitvā guruṃ priye 
athānyaṃ sampravakṣyāmi paribhāṣāstravādinām 
25.122 adhyātmikaṃ bahiś caiva yathā jñāyanti tattvataḥ 
tathā te kathayiṣyāmi śṛṇuṣvāyatalocane 
25.123 adhyātmaṃ kurute bāhyaṃ vratacaryā tu sādhanam 
evaṃ kṛte bhavet siddhiḥ satyaṃ satyaṃ na saṃśayaḥ 
25.124 khaṭvāṅgaṃ kathayiṣyāmi khagatīkaraṇaṃ param 
āpādatalamūrdhnāntaṃ yathā bhavati tac chṛṇu 
25.125 śirādau sarva-m-aṅgeṣu aṅgapratyaṅgakeṣvapi 
khaṭvāyate tu suśroṇi khaṭvāṅgī tena ucyate 
25.126 maunena vartayen nityaṃ hṛdi gūḍhaṃ parāparam 
tena maunīti vijñeyaḥ sarvabhāveṣu bhāvini 
25.127 vegena paryaṭed dehe aviśrāntaḥ punaḥ punaḥ 
tena vegān mayākhyātam aṭanaṃ pudgalasya tu 
25.128 ḍamarukaṃ pravakṣyāmi yathā śāstre udāhṛtam 
amā nāma parā sūkṣmā kalā cāmṛtavāhinī 
25.129 ātmā sañcarate tasmin rāvaṃ muñcanti binduke 
visargastho mahātmāno vādayet kathayeti ca 
25.130 ḍamarukaṃ smṛtaṃ tena amanaske nirāmaye 
nābhisthā yasya tiṣṭheta māyārūpā tu kuṇḍalī 
25.131 pāśam etad vinirdiṣṭaṃ khaḍgaṃ caivādhunā śṛṇu 
khasthā chinatti pāśāṃs tu visargāstreṇa mohanī 
25.132 khaḍgavan nirmalā yena khagamadhye kuleśvari 
gatā sā brahmasāyujyaṃ ghaṭate śaktir avyayā 
25.133 tena khaḍgam iti proktam āyudhaṃ suranāyike 
ekā eva parā śaktis tripathā cakramaṇḍale 
25.134 vāmā jyeṣṭhā tathā raudrī icchājñānakriyātmikā 
triśūlaṃ tripathaṃ khyātaṃ triśaktim anupūrvaśaḥ 
25.135 kharūpā vyomagā śāntā nirmalā aṭate priye 
kheṭakaṃ tena nāmaṃ tu dvādaśānte vyavasthitam 
25.136 nārā ca śakti-r-uccāraṃ karaṇātmavyavasthitam 
vedhate tu nirodhinyā kāraṇaṃ pañca eva tu 
25.137 tena nārācam ākhyātaṃ paryāyeṇa varānane 
kartarī jñānaśaktis tu yena pāśāñ chinatty asau 
25.138 sā kalā paramā sūkṣmā mantrāṇāṃ bodhanī parā 
kartarī kartṛrūpeṇa jñātavyā sādhakena tu 
25.139 carate dvādaśānte tu kramāt tattvāni muñcati 
cakraved bhramate nit yam aṅkuśasthā parāparā 
25.140 aṅgamaṅgagatā devī bahirantarasaṃsthitā 
kurute satataṃ ceṣṭām āsane śayane tathā 
25.141 dhāvanaṃ valganaṃ rodham aṅkuśasthānam āśritaḥ 
muṣalatve sthito nādo rekhākārordhvagaḥ priye 
25.142 taṃ bhittvā gamanaṃ cordhvaṃ muṣalākhyaṃ sadāśivam 
dhanur lakṣye manākhyaṃ tu yena vedhayate param 
25.143 āpūrya savisargeṇa pareṇa manacakṣuṣā 
karaṇena phaḍantena visargasthena susvane 
25.144 ṛtudvayaviśuddhena kānanāntargatena tu 
anena karaṇāntena kaṭṭārikā parāparā 
25.145 prāpnoti tattvasāyojyaṃ gadayā ca sulocane 
gatā hy ekā parā randhraṃ dadate cāmṛtaṃ śubham 
25.146 gatās tu na nivartante ye gatā gadayā saha 
śaktiḥ śaktisthabhāvena ātmānaṃ nayate sadā 
25.147 tadbhāvayogaviddhas tu śaktinā tu surādhipe 
daṇḍavadṛjurekhā tu nādāntapadam avyayam 
25.148 tena mārgeṇa gantavyaṃ daṇḍadhāreṇa suvrate 
kaṃ śarīram iti khyātaṃ maṇḍalākārasaṃsthitam 
25.149 atrādhvā tu varārohe śodhanīyo manīṣibhiḥ 
kulādyā yā parā śuddhā sarva-adhvahṛdi sthitā 
25.150 tenedaṃ kathitaṃ bhadre kamaṇḍalur iti smṛtaḥ 
ete tu āyudhāḥ sūkṣmāḥ paryāyāt kathitāḥ sphuṭam 
25.151 samayinyagatā sūkṣmā kalā sūkṣmātināyikā 
kathitās tu mayā devi parāparavibhāgaśaḥ 
25.152 bāhyataḥ kathayiṣyāmi dūtīnāṃ lakṣaṇaṃ subham 
antaraṅge tathā hy evaṃ śrūyatāṃ teṣu niścayam 
25.153 mātā duhitā bhaginī sahajā tu tathā ntyajā 
rajakī carmakārī ca mātaṅgī cāgrajanmikā 
25.154 annapānaṃ tathā bhakṣyam ācarec chaktibhiḥ saha 
antyajānāṃ dvijānāṃ ca ekatra carubhojanam 
25.155 kartavyaṃ sādhakenaiva yad icchet siddhim uttamām 

śrīkubjikā uvāca 

25.156 kutsitaṃ kathitaṃ deva ayuktaṃ śāstravādinām 
paśūnāṃ yat samākhyātam ācāraṃ parameśvara 
yatīnāṃ tu yadā so hi tad āścaryaṃ mahāprabho 

śrībhairava uvāca 

25.157 sādhu devi mahāprājñe praśnam etat sudurlabham 
kathayāmi samāsena tvatprītyā suranāyike 
25.158 māteva saṃsthitā śaktir jagato yonirūpiṇī 
atrotpannaṃ samastaṃ hi vāṅmayaṃ sacarācaram 
25.159 tena māteti vikhyātā kathitā parameśvarī 
udbhavasthā duhitrī tu duhanāt tu jagasya ca 
25.160 duhitrī tu dvitīyā tu bhaginī tv atha-m-ucyate 
bhagarūpā parā sūkṣmā nānyena tu sunirmitā 
25.161 svatotpannā svayaṃ jātā tenoktā sahajā kalā 
antasthā sarvabhūtānāṃ vartate cāntagā parā 
25.162 ante ca saṃsthitā hy ekā antyajā parameśvarī 
rajastamovinirmuktā mahānte rajakī ume 
25.163 carate carmagā yena svaraṅgena tu rañjitā 
carmakārī tu sā caikā mātaṅgī ca tatocyate 
25.164 ātmasthā satataṃ nityaṃ gītasyāntapathe sthitā 
mātaṅgī kathitā dūtī agrajanmī tathocyate 
25.165 sarveṣāṃ caiva śāstrāṇām agrotpannā tu agraṇī 
nānyat tatra bhavet kiñcic chaktir ādyā manonmanī 
25.166 agrajanmā samākhyātā parā hy amṛtavāhinī 
paryāyāt kathitā devi śaktis taddharmadharmiṇī 
25.167 ajñātvā dehajāṃ śaktiṃ bahusthānagatāṃ priye 
ācaranti ca ye mūḍhāḥ paśavaḥ samudāhṛtāḥ 
25.168 apākteyā asambhāṣyāḥ śivavrataviḍambakāḥ 
khānaṃ pānaṃ tathā devi kartavyaṃ na ca taiḥ saha 
25.169 evaṃ yuktaḥ sadā tiṣṭhen madirānandacetasaḥ 
madirā yā parā śakti rañjitaṃ tu jagattrayam 
25.170 ānandaṃ tatsamatvaṃ hi madirānandacetasaḥ 
sidhyate nātra sandeho yathā bhairava-m-abravīt 
25.171 jñānāmṛtena tṛptasya kṛtakṛtyasya yoginaḥ 
naivāsti kiñcit kartavyam asti cen na sa tattvavit 
25.172 athānyat sampravakṣyāmi avasthāṃ jñānabodhikām 
ghoṣaṇī piṅgalā caiva vidyunmālā ca candriṇī 
25.173 mano'nugā ca sukṛtā saumyā caiva nirañjanā 
nirālambā tathā devī anyā caiva mahābalā 
25.174 helā lolā tathā līlā bodhābodhavatīti ca 
nirāmayāḥ samākhyātā etāḥ pratyakṣamātarāḥ 
25.175 ājñāsiddhipradātārā ājñāsiddhikulānvaye 
ghoṣaṇī ghoṣamārgasthā śikhā dhūmrā ca piṅgalā 
25.176 rātrau dyotayate śuklaṃ vidyunmāleti cocyate 
candriṇī candragarbheṇa sandhyābindu mano'nugā 
25.177 nimīlitākṣe yat pītaṃ sukṛtā samudāhṛtā 
kaṃsadhvanis tathā saumyā ghaṇṭā caiva nirañjanā 
25.178 haṃsākhyā tu nirālambā kiṅkiṇī tu mahābalā 
gudadeśe prajāyeta sadā siddhipradāyikā 
25.179 ghoṣamārge tu yo haṃso helā nāmeti cocyate 
tasya madhye tu yaḥ śabdo lolākhyā sā prakīrtitā 
25.180 līlā caivāṇavā proktā khecaratvapradāyinī 
cītkṛtaṃ karṇadeśe tu bodhābodhavatī tu sā 
25.181 ātmānaṃ haṃsam ity āhur māyārūpā tu bodhanī 
kuṇḍalī tu samākhyātā rudraśaktis tu bindukam 
25.182 gagane dṛśyate yas tu prabhākāreṇa suprabhaḥ 
akhaṇḍamaṇḍalākāraṃ dyotayantaṃ nabhastalam 
25.183 acalaṃ tat samākhyātam acalatvena saṃsthitam 
etāvasthāḥ samākhyātā udayanti krameṇa tu 
25.184 ājñātatparabhāvajñaḥ sugupto gurupūjakaḥ 
tasya siddhir bhavaty āśu nānyathā kubjike vacaḥ 
25.185 pitu[ḥ] prāptaṃ yathā saukhyaṃ tat sukhaṃ bhuñjate svayam 
mṛtyur yena sukheneha tat sukhaṃ dhyānam ucyate 

śrībhairava uvāca 

25.186 samastedaṃ varārohe durlabhaṃ prakaṭīkṛtam 
tvaṃ punaś cāvatāritvā kramaughaṃ samprakāśaya 
25.187 sugopyaṃ gopanībhūtvā kramaṃ pūjyārihā bhava 
25.188 yā sā kubji parā mahaughajananī sañcodito 'haṃ tvayā
tvaṃ kubjā parakubjinī mama punas tvāhaṃ mayā tvaṃ punaḥ 
tvayādiṣṭacatuṣṭayaṃ kramapathaṃ teṣāṃ kramo vai yathā
sampreṣyātmagataṃ kramaughaparamaṃ cājñā gṛhītānaghe 
25.189 śatakoṭisuvistīrṇaṃ tantredaṃ pārameśvaram 
asya bhedopabhedāś ca bhaviṣyanti hy anekadhā 
25.190 atra kalpe varārohe sūtrasaṅgrahalakṣaṇam 
caturviṃśatisāhasraṃ kiṃ tu tat prakaṭaṃ na hi 
25.191 kartavyaṃ tu tvayā bhadre kiṃ tu pīṭhacatuṣṭaye 
prakāśayasva cājñāto yathā gopyataraṃ bhavet 
25.192 sudurlabhataraṃ devi tantredaṃ paramādbhutam 
yatra vā tiṣṭhate deśe sa deśo bhuktibhāg bhavet 
25.193 kiṃ punaḥ puramadhyasthaṃ gṛhāvasthagataṃ hṛdi 
tiṣṭhate yasya 'sau nāthe puraṃ pīṭhasamaṃ bhavet 
25.194 gṛhaṃ tad yogapīṭhaṃ ca mantavyam anvayānvitaiḥ 
āgamaṃ maṇḍalādyais tu pūjyoghaṃ pārameśvaram 
25.195 yatredaṃ tiṣṭhate sthāne divyāmnāyaṃ sudurlabham 
divyais tu pūjyate so hi yadi gopyataraṃ bhavet 
25.196 vidhānavihitā pūjā yady aṣṭamyāṃ caturdaśī 
pūjayet paramāmnāyaṃ pūjyate sa marīcibhiḥ 
25.197 yas tv evaṃ vindate devi granthataś cārthato 'pi vā 
sa jyeṣṭhaḥ kulasantāne pūjyo 'sau bhairavo yathā 
25.198 avajñāṃ kurute yas tu yasya tasya prakāśayet 
sāmarthyena satāṃ dviṣṭo bhraṣṭo duḥkhī sa sarvataḥ 
25.199 āgamādhārabhāṇḍasya dṛṣṭvāvajñāṃ karoti yaḥ 
namaskāreṇa tat pīṭhaṃ tasyaivāyaṃ puroditam 
25.200 śrutvaivaṃ vismayāpannā ūcus tv evaṃ kuleśvarī 
prerayitvāditoddiṣṭā atrājñānavirodhinī 
25.201 ājñāśrutaṃ samastedaṃ dṛṣṭam asmād virjṛmbhitam 
vrajatoḍādisiddhānāṃ teṣu sarvaṃ samarpayet 
25.202 samayinyaś ca saṃyojya tasya tvāmoghaśālinī 
bhaviṣyasi purāvasthā tadavasthāntare sthitā 
25.203 prathamaṃ madguṇair bhadre dvitīyaṃ ca khagāntare 
tṛtīyaṃ bhūcarīnāthaḥ paścānantabhavātmikā 
25.204 trayānte gurupaṅktisthā Pṛthakpūjākrame sthitā 
bhaviṣyasi purāvasthā hrāsyamānā pade pade 
25.205 jīvikopāyahetvartham utkarṣārtham athāpi vā 
teṣu tyajya parāmnāyaṃ bhūtāveśakarī bhava 
25.206 vyatikramaṃ yadā kāle bhaviṣyat kubjinīmate 
tadā kāle tu taṃ hatvā samāpyevaṃ punar bhaja 
25.207 sārasaṅgraham etad dhi anāmāmatam uttamam 
asyoccāraṃ na kartavyam uccārād ay utaṃ japet 
25.208 kubjikā yā varārohe pañcabhiḥ praṇavaiḥ saha 
tair vinā na hi coccāraṃ kubjāmnāyamahādhvare 
25.209 yais tu tāni varārohe kathayāmi svarūpataḥ 
binduyuktāni sarvāṇi jīvabhūtāni śāsane 
25.210 ādimaṃ ca tṛtīyaṃ ca daśamaṃ caikaviṃśakam 
dvitīyaṃ caikaviṃśena varjitaṃ pañcamaṃ tu tat 
25.211 kiṃ tu vāmena jaṅghāyā hataṃ bījena kārayet 
tad bījaṃ param uddiṣṭaṃ sarvajñānāvatārakam 
25.212 ambikā bindunādaṃ ca kuṇḍalī ca paraḥ śivaḥ 
ratnānāṃ pañcakaṃ devi vyāpayitvā sudurlabham 
25.213 anenābhyāsayogena khecarīkulanandanaḥ 
sidhyate nātra sandeho guruvaktraprasādataḥ 
25.214 khecarā bhūcarā caiva dikcarā gocarā tathā 
dadanti melakaṃ sarvaṃ yasyedaṃ hṛdi saṃsthitam 
25.215 devadevena devyāyā mataṃ divyaṃ mayā tava 
kartavyaṃ tu tathā gopyam ity ājñā pārameśvarī 
25.216 pūjā cāsya prakartavyā viśeṣeṇa varānane 
śuklapakṣe tṛtīyāyāṃ vaiśākhasya tathā punaḥ 
25.217 kṛṣṇapakṣe trayodaśyāṃ nabhasyanavamī punaḥ 
āśvine śuklapakṣasya pūrṇimā phālgune matā 
25.218 āṣāḍhe śrāvaṇe caiva bhādrapadyāṃ tathaiva ca 
śuklapakṣe caturdaśyāṃ kartavyaṃ ca pavitrakam 
25.219 ātmavittānusāreṇa uttamādhamamadhyamāḥ 
guruparvam iti khyātaṃ pālanīyaṃ kulāmbike 
25.220 yugādayaḥ samākhyātā atra pīṭhāvatāraṇam 
pīṭhamārgakramāyātam āgamo 'yaṃ tad eva hi 
25.221 āgame pūjite sarvaṃ pūjitaṃ jñānasāgaram 
yenedaṃ pustakaṃ devyāḥ pūrvoktaṃ yan mayā tava 
25.222 anyat tat paramopāyaṃ siddhiparyāyaśāsane 
divyasiddhipradātāraṃ divyabhāṣāvibhūṣitam 
25.223 kusumaṃ ca rajaṃ raktaṃ rathyaṃ śivakusumbhakam 
taḍid amṛtamadhuraṃ kṣatajodbhavanetrajam 
25.224 kādambarī prasannā ca parisruṅ madirā surā 
vāmāmṛtam aliś caiva somapānaṃ madālasī 
25.225 dhārāmṛtaṃ śivāmbuṃ ca rativiṣṇuvaruṇodbhavam 
varco brahmā dvijanmā ca sarojaḥ kamalāsanaḥ 
25.226 bukapuṣpakaṇākhyaṃ ca liṅgapaṅkamalaṃ tathā 
kuṇḍagolodbhavaṃ śukraṃ śaśiś caiva sitaṃ madhu 
25.227 kaṭaṃ māṃsaṃ palaṃ kravyaṃ piṣitaṃ phalguṣāmiṣam 
jāṅgalaṃ devadāruṃ ca kṣmā vai khaḍgodbhavaṃ smṛtam 
25.228 tailaṃ vasā tathā snehaṃ kaṭutailaṃ tu tīkṣṇakam 
turuṣkaṃ sihṇakaṃ proktaṃ kapālapuṭamadhyagam 
25.229 laśunaṃ nāsikāvasthaṃ tac ca hiṅgu prakīrtitam 
gajaṃ caiva tu kuṣmāṇḍaṃ palāṇḍuṃ ca viśeṣataḥ 
25.230 paryuṣitācchāly agaruṃ pippalyaḥ kṛṣṇataṇḍulāḥ 
kṛṣṇacchāgo mahānetrī palalaṃ meṣātmakaṃ smṛtam 
25.231 sāmarthajñavidānāṃ ca iti pūjā prakīrtitā 
siddhadravyaṃ samākhyātaṃ prasaṅgād yoginīkule 
25.232 nānena rahitā siddhir bhuktimuktir na vidyate 
nirācārapadaṃ hy etat tenedaṃ paramaṃ smṛtam 

iti kulālikāmnāye śrīkubjikāmate samastajñānāvabodhacaryānirdeśo nāma pañcaviṃśatimaḥ paṭalaḥ 

iti caturviṃśatisāhasre sārāt sārataraṃ śrīkubjikāmnāyaṃ śrīoḍiyānapīṭhavinirgataṃ pañcaviṃśatipaṭalaṃ sārdhatrīṇi sahasrāṇi śrīmataṃ parisamāptam