%Kalāvilāsa of Kṣemendra,
%ed. Paṇḍita Durgāprasāda and Kāśīnātha Pāṇḍuraṅga Paraba
%Kāvyamālā 1, Bombay 1886 pp. 34--79.
% typed by S.D.Vasudeva 1994

1.1ab: asti viśālaṃ kamalālulitapariṣvaṅgamaṅgalāyatanam
1.1cd: śrīpativakṣaḥsthalamiva ratnojjvalamujjvalaṃ nagaram 
1.2ab: maṇibhūbimbitamuktāpralambanivahena yatra śeṣāhiḥ 
1.2cd: bhavanāni bibharti sadā bahudhātmānaṃ vibhajyeva 
1.3ab: vighno.abhisārikāṇāṃ bhavanagaṇaḥ sphāṭikaprabhāvikaṭaḥ
1.3cd: yatra virājati rajanītimirapaṭaprakaṭaluṇṭhākaḥ
1.4ab: yatra trinayananayanajvalanajvālāvalīśalabhavṛttiḥ 
1.4cd: jīvati mānasajanmā śaśivadanāvadanakāntipīyūṣaiḥ
1.5ab: ratilulitalalitalalanāklamajalalavavāhino muhuryatra 
1.5cd: ślathakeśakusumaparimalavāsitadehā vahantyanilāḥ
1.6ab: navabisakisalayakavalanakaṣāyakalahaṃsakalaravo yatra 
1.6cd: kamalavaneṣu prasarati lakṣmyā iva nūpurārāvaḥ 
1.7ab: nṛtyanmugdhamayūrā marakatadhārāgṛhāvalī satatam
1.7cd: sendrāyudhadhananivahā prāvṛṇmūrteva yatrāste  
1.8ab: śaśikiraṇaprāvaraṇasphāṭikaharmyeṣu hariṇaśāvākṣyaḥ 		
1.8cd: yatra vibhānti sudhāmbudhidugdhataraṅgitthitā ivāpsarasaḥ
1.9ab: tatrābhūdabhibhūtaprabhūtamāyānikāyaśatadhūrtaḥ 
1.9cd: sakalakalānilayānāṃ dhuryaḥ śrīmūladevākhyaḥ 
1.10ab: nānādigdeśāgatadhūrtairupajīvyamānamativibhavaḥ 
1.10cd: sa prāpa vipulasaṃpadam ātmaguṇaiścakravartīva 
1.11ab: bhuktottaraṃ sahṛdayair āsthānīsaṃsthitaṃ kadācittam 
1.11cd: abhyetya sārthavāho dattamahārhopahāramaṇikanakaḥ 
1.12ab: praṇato hiraṇyaguptaḥ sahitaḥ putreṇa candraguptena 
1.12cd: prāptāsanasatkāraḥ provāca mhūrtaviśrāntaḥ 
1.13ab: atiparicayasapratibhā tava purato mādṛśāmiyaṃ vāṇī 
1.13cd: grāmyāṅganeva nagare na tathā pragalbhyamāyāti 
1.14ab: pihitabṛhaspatidhiṣaṇo ruciraḥ prajñāmarīcinicayaste 
1.14cd: tīkṣṇāṃśoriva sahajaḥ proṣitatimirāḥ karotyāśāḥ % 14
1.15ab: ājanmārjitabahuvidhamaṇimauktikakanakapūrṇakoṣasya 
1.15cd: eko mamaiṣa sūnuḥ saṃjātaḥ paścime vayasi %%1.15
1.16ab: mohasthānaṃ bālyaṃ yauvanamapi madanamānasonmādam 
1.16cd: anilāvalolanalinīdalajalacapalāśca vittacayāḥ 
1.17ab: hāriṇyo hariṇadṛśaḥ satataṃ bhogābjamadhukarā dhūrtāḥ 
1.17cd: patitā paraṃparaiṣā doṣāṇāṃ mama sutasyāsya %1.17
1.18ab: dhūrtakarakandukānāṃ vāravadhūcaraṇanūpuramaṇīnām 
1.18cd: dhanikagṛhotpannānāṃ muktirnāstyeva mugdhānām 
1.19ab: ajñātadeśakālāś capalamukhāḥ paṅgavo.api saplutayaḥ 
1.19cd: navavihagā iva mugdhā bhakṣyante dhūrtamārjāraiḥ %%1.19
1.20ab: āśritajanatanayo.ayaṃ tava vidvannijasutādhikaḥ satyam 
1.20cd: na yathā prayāti nāśaṃ tathāsya buddhiṃ prayaccha parām 
1.21ab: iti vinayanamraśirasā tena vaco yuktamuktamavadhārya 
1.21cd: tamuvāca mūladevaḥ prītiprasaraiḥ prasāritauṣṭhāgraḥ 
1.22ab: āstāmeṣa sutaste mama bhavane nija iva prayatnaparaḥ 
1.22cd: jñāsyati mayopadiṣṭaṃ śanakaiḥ sakalaṃ kalāhṛdayam %1.22
1.23ab: iti tasya śāsanena svasutaṃ niḥkṣaipya tadgṛhe matimān 
1.23cd: natvātha sārthavāhaḥ prayayau nijamandiraṃ muditaḥ 
1.24ab: atha śithilakiraṇajālo dhūmarakāntirnirambarastaraṇiḥ 
1.24cd: abhavadadṛkṣyaḥ śanakaiḥ dhūrtairiva nirjitaḥ kitavaḥ 
1.25ab: astamite divasakare timirabharadviradasaṃsaktā 
1.25cd: sindūrapaṭalapāṭalakāntirivāgre babhau sandhyā %1.25
1.26ab: tyaktāpi pratidivasaṃ divasadyutiranujagāma divasakaram 
1.26cd: na tu raktāpi hi sandhyā hṛdayaṃ jānāti kaḥ strīṇām 
1.27ab: gaganāṅgaṇakamalavane sandhyārāge gate śanaiḥ kvāpi 
1.27cd: aprāptasthitivikalaṃ babhrāma bhramaravibhramaṃ timiram %1.27
1.28ab: tīkṣṇāṃśuvirahamohaiḥ timirairiva mīlitā babhūva mahī 
1.28cd: tīvro.api janasya sadāyātaḥ khalu vallabho bhavati 
1.29ab: rajanī rarāja sitataratārakamuktākalāpakṛtaśobhā 
1.29cd: śabararamaṇīva paricitatimiramayūracchadābharaṇā 
1.30ab: atha pathikavadhūdahanaḥ śanakairudabhūnniśākarālokaḥ 
1.30cd: kumudaprabodhadūto vyasanaguruścakravākīṇām %% 1.30
1.31ab: manmathasitātapatraṃ digvanitāsphaṭikadarpaṇo vimalaḥ 
1.31cd: virarāja rajaniramaṇīsitatilako yāminīnāthaḥ %%1.31
1.32ab: nijakaramṛṇālavallīvalayavilāsī lalāsa sitakāntiḥ 
1.32cd: gaganataṭinītaṭānte rajanikaro rājahaṃsa iva 
1.33ab: śyāmā śuśubhe śaśinā tayā manobhūrmadhūtsavastena 
1.33cd: madamuditamānasānāṃ tenāpi mṛgīdṛśāṃ līlā 
1.34ab: dhūrtāḥ samṛddhisacivā vicchāyāṃ padminīṃ parityajya 
1.34cd: phullāni viviśuralayaḥ sānandāḥ kumudavṛndāni 
1.35ab: jyotsnābhasmasmerā sulalitaśaśiśakalapeśalakapālā 
1.35cd: tārāsthipaṭalahārā śuśubhe kāpālikīva niśā %%1.35
1.36ab: tasminprauḍhaniśākarakiraṇaprakaraprakāśitāśeṣe 
1.36cd: nijamaṇibhavanodyāne nirvartitabhāvanāsamādhānaḥ %1.36
1.37ab: sphaṭikāsanopaviṣṭaḥ saha śaśinā nirvibhāgamitreṇa 
1.37cd: kandalimukhyaiḥ śiṣyaiḥ parivāritapādapīṭhāntaḥ 
1.38ab: provāca mūladevo vīkṣya ciraṃ sārthavāhasutamagre 
1.38cd: kurvandaśanamayūkhaiḥ lajjālīnāmiva jyotsnām %%1.38
1.39ab: śṛṇu putra vañcakānāṃ sakalakalāhṛdayasāramatikuṭilam 
1.39cd: jñāte bhavanti yasmin kṣaṇarucicapalāḥ śriyo.apyacalāḥ 
1.40ab: eko.asminbhavagahane tṛṇapallavavalayajālasaṃcchannaḥ 
1.40cd: kūpaḥ patanti yasmin mugdhakuraṅgā nirālambe %1.40
1.41ab: so.ayaṃ nidhānakumbho dambho nāṃa svabhāvagambhīraḥ 
1.41cd: kuṭilaiḥ kuhakabhujaṃgaiḥ saṃvṛtavadanaḥ sthito loke 
1.42ab: māyārahasyamantraścintāmaṇirīpsitārthānām 
1.42cd: dambhaḥ prabhāvakārī dhūrtānāṃ śrīvaśīkaraṇam 
1.43ab: matsyāsyevāpsu sadā dambhasya jñāyate gatiḥ kena 
1.43cd: nāsya karau na ca pādau na śiro durlakṣya evāsau %%1.43
1.44ab: mantrabalena bhujaṃgā mugdhakuraṅgāśca kūṭayantreṇa 
1.44cd: sthalajālena vihaṅgā gṛhyante mānavāśca dambhena 
1.45ab: janahṛdayavipralambho māyāsthambho jagajjayārambhaḥ 
1.45cd: jayati sadānupalambho māyārambhodayo dambhaḥ 
1.46ab: satatāvartabhrānte duḥsahamāyāsahasrakuṭilāre 
1.46cd: mūlaṃ dambho nābhirvipulatare cakrikācakre 
1.47ab: nayananimīlanamūlaḥ suciraṃ snānārdracūlajalasiktaḥ 
1.47cd: dambhataruḥ śucikusumaḥ sukhaśataśākhāśataiḥ phalitaḥ 
1.48ab: vrataniyamairbakadambhaḥ saṃvṛtaniyamaiśca kūrmajo dambhaḥ 
1.48cd: nibhṛtagatinayananiyamairghoro mārjārajo dambhaḥ
1.49ab: bakadambho dambhapatirdambhanarendraśca kūrmajo dambhaḥ
1.49cd: mārjāradambha eva prāpto dambheṣu cakravartitvam %%%1.49
1.50ab: nīcanakhaśmaśrukacaścūlī jaṭilaḥ pralambakūrco vā 
1.50cd: bahumṛttikāpiśācaḥ parimitabhāṣī prayatnapādatraḥ %%%1.50
1.51ab: sthūlagranthipavitrakapṛṣṭhārpitahemavallīkaḥ 
1.51cd: kakṣārpitapatapallavaruddhabhujo bhāṇḍahasta iva 
1.52ab: aṅgulibhaṅgavikalpana vividhavivādapravṛttapāṇḍityaḥ 
1.52cd: japacapaloṣṭhaḥ sajane dhyānaparo nagararathyāsu %%1.52
1.53ab: sābhinayāñcitaculakairācamanaiḥ suciramajjanaistīrthe 
1.53cd: saṃruddhasakalalokaḥ punaḥ punaḥ karṇakoṇasaṃsparśī 
1.54ab: sītkṛtadantaninādāveditahemantaduḥsahasnānaḥ 
1.54cd: vistīrṇatilakacarcāsūcitasarvopacārasurapūjaḥ %1.54
1.55ab: śirasā bibarti kusumaṃ vinipatitāṃ kākadṛṣṭim iva racayan 
1.55cd: evaṃ rūpaṃ puruṣo yo yaḥ sa sa dāmbhiko jñeyaḥ 
1.56ab: nirguṇalokapraṇataḥsaguṇe stabdhaḥ svabandhuṣu dveṣī 
1.56cd: purajanakaruṇābandhuḥ kīrtyārthī dāṃbhiko dhūrtaḥ %% 1.56
1.57ab: kāryopayogakāle praṇataśirāścāṭuśatakārī 
1.57cd: sabhrūbhaṅgo maunī kṛtakāryo dāmbhikaḥ krūraḥ 
1.58ab: stambhitavibudhasamṛddhirdaityo yo.abhūtpurā jambhaḥ 
1.58cd: dambhaḥ so.ayaṃ nivasati bhūmitale bhūtadeheṣu 
1.59ab: śucidambhaḥ śamadambhaḥ snātakadambhaḥ samādhidambhaśca 
1.59cd: niḥspṛhadambhasya tulāṃ yānti tu naite śatāṃśena 
1.60ab: śaucācāravivādī mṛtkṣayakārī svabāndhavasparśī 
1.60cd: śucidambhena jano.ayaṃ viśvāmitratvamāyāti %1.60
1.61ab: saṃhṛtabahuvidhasattvo niḥkṣepadraviṇavāribahutṛṣṇaḥ 
1.61cd: satatamahiṃsādambho vaḍavāgniḥ sarvabhakṣo.ayam 
1.62ab: muṇḍo jaṭilo nagnaśchatrī daṇḍī kaṣāyacārī vā 
1.62cd: bhasmasmeraśarīro diśi diśi bhogī vijṛmbhate dambhaḥ 
1.63ab: khalvāṭaḥ sthūlavapuḥ śuṣkatanurmunisamānarūpo vā 
1.63cd: śāṭakaveṣṭitaśīrṣaścaityonnataśikharaveṣṭano vāpi 
1.64ab: lobhaḥ pitātivṛddho jananī māyā sahodaraḥ kūṭaḥ 
1.64cd: kuṭilākṛtiśca gṛhiṇī putro dambhasya huṃkāraḥ 
1.65ab: bhagavānpurā svayaṃbhūḥ kṛtvā bhuvanāni bhūtasargaṃ ca 
1.65cd: viratavyāpāratayā suciraṃ cintānvitastasthau %1.65
1.66ab: dṛṣṭvā sa martyaloke divyadṛśā mānuṣānnirālambān 
1.66cd: ārjavayogaviśeṣādaprāptadhanādisaṃbhogān 
1.67ab: mīlitanayanaḥ kṣaipraṃ sthitvā māyāmaye samādhāne 
1.67cd: asṛjannṛṇāṃ (nR̥ṇāṃ?) vibhūtyai dambhaṃ saṃbhāvanādhāram 
1.68ab: bibhrāṇaḥ kuśapūlīṃ pustakamāle kamaṇḍaluṃ śūnyam 
1.68cd: nijahṛdayakuṭilaśṛṅgaṃ daṇḍaṃ kṛṣṇājinaṃ khanitraṃ ca 
1.69ab: sthūlatarakuśapavitrakalāñchitakarṇaḥ pavitrapāṇiśca 
1.69cd: suvyaktamuṇḍamastakakuśaveṣṭitacūlamūlasitakusumaḥ 
1.70ab: kāṣṭhastabdhagrīvo japacapaloṣṭhaḥ samādhilīnākṣaḥ 
1.70cd: rudrākṣavalayahasto mṛtparipūrṇaṃ vahanpātram %%1.70
1.71ab: nayanāñcalaiḥ sakopairbhrukuṭīhuṃkāravadanasaṃjñābhiḥ 
1.71cd: bahuvidhakadarthanābhiḥ kathitākhilahṛdayavāñchito maunī 
1.72ab: rakṣanparasaṃsparśaṃ śaucārthī brahmaloke.api 
1.72cd: dambhaḥ puro.asya tasthāvutthita evāsanākāṅkṣī %%1.72
1.73ab: ākalpena sumahatā sahasāsya vaśīkṛtāḥ paraṃ tena 
1.73cd: saptarṣayo.api tasmai praṇatāstasthuḥ kṛtāñjalayaḥ 
1.74ab: taṃ dṛṣṭvā parameṣṭhī līlākṛtasakalasargavargo.api 
1.74cd: gauravavismayaharṣairniḥspandāndolitastasthau 
1.75ab: tasyātitīvraniyamādgraste.agastye.ativismayeneva 
1.75cd: alpatapovratalajjākuñcitapṛṣṭhe vasiṣṭhe ca %%1.75
1.76ab: atisaralanijamunivrataparigatakutse ca kūṇite kautse 
1.76cd: ḍambararahitātmataponirādare nārade vihite 
1.77ab: nijajānusaṃdhiśikhare jamadagnau magnavadane ca 
1.77cd: traste viśvāmitre valitagule gālavebhṛgau magne %1.77
1.78ab: sucirotthitamatikopādāsanakamale niviṣṭadṛṣṭiṃ ca 
1.78cd: śūlaprotamivāgre niḥspandamamandagarvagurugātram 
1.79ab: jñātvā tamāsanārthinamavadaddevaścaturmukhaḥ prītyā 
1.79cd: vikasannijadaśānarucā vihasanniva vāhanaṃ haṃsaṃ 
1.80ab: upaviśa putra mamāṅke niyamena mahīyasāticitreṇa 
1.80cd: arho.asi guṇagaṇodgatagauravasaṃvādinānena %%1.80
1.81ab: ityukto viśvasṛjā tasyāṅkamaśaṅkayā sasaṃkocaḥ 
1.81cd: abhyukṣya vārimuṣṭyā kṛcchreṇopāviśaddambhaḥ 
1.82ab: dambha uvāca // noccairvācyamavaśyaṃ yadi vācyaṃ hastapadmena 
1.82cd: ācchādya vaktrarandhraṃ spṛṣṭo na syāṃ yathāsyavātāṃśaiḥ 
1.83ab: tattasya śaucamatulaṃ dṛṣṭvā smerānano brahmā 
1.83cd: dambho.asīti jagāda prāyo hastāgramākampya 
1.84ab: uttiṣṭhā sakalajalanidhiparikhāvalimekhalāṃ mahīmakhilām 
1.84cd: avatīrya bhuṅkṣvā bhogānvibudhairapi tattvato na vijñātaḥ 
1.85ab: ityādarādvisṛṣṭo vidhinā saṃsārasāgaragatānām 
1.85cd: kaṇṭḥe śīlāṃ nibadhnanmartyānāmavatatāra mahīm 
1.86ab: atha martyalokametya bhrāntvā dambho vanāni nagarāṇi 
1.86cd: viniveśya gauḍaviṣaye nijajayaketuṃ jagāma diśaḥ 
1.87ab: vacane bāhlīkānāṃ vrataniyame prācyadākṣaiṇātyānāṃ 
1.87cd: adhikāre vīrāṇāṃ dambhaḥ sarvatra gauḍānām 
1.88ab: ete dambhasahāyāḥ pratigrahaśrāddhasiddhacūrṇena 
1.88cd: kurvanti ye prabhāte yatastato bhasmanā tilakam %%1.88
1.89ab: tūrṇaṃ sahasrabhāgairbhuvanatalae saṃvibhajya bhūtāni 
1.89cd: mūrtaḥ satataṃ nivasati dambho vadane.adhikaraṇabhaṭṭānām 
1.90ab: guruhṛdayamaviśādagre bālakahṛdayaṃ tapasvihṛdayaṃ ca 
1.90cd: kuṭilaṃ niyogihṛdayaṃ dīkṣaitahṛdayaṃ svayaṃ dambhaḥ %1.90
1.91ab: tadanu ca gaṇakacikitsakasevakavaṇijāṃ sahemakārāṇām 
1.91cd: naṭabhaṭagāyanavācakacakracarāṇāṃ ca hṛdayāni 
1.92ab: aṃśaiḥ praviśya hṛdayaṃ vividhavikāraiḥ samastajantūnām 
1.92cd: dambho viveśa paścādantaramiha pakṣaivṛkṣāṇām 
1.93ab: matsyārthī carati tapaḥ suciraṃ niḥspanda ekapādena 
1.93cd: tīrtheṣu bakatapasvī tena vihaṅgāngato dambhaḥ %1.93
1.94ab: vipulajaṭāvalkalinaḥ śītātapavātakarśitāḥ satatam 
1.94cd: vṛkṣā jalārthino yaddambhasya vijṛmbhitaṃ tadapi 
1.95ab: evaṃ vicāraṇīyaḥ sarvagataḥ sarvahṛtsadā dambhaḥ 
1.95cd: jñāte tasminvividhe viphalā māyāvināṃ māyā 
1.96ab: dambhavikāraḥ purato vañcakacakrasya kalpavṛkṣo.ayam 
1.96cd: vāmanadambhena purā hariṇā trailokyamākrāntam 

%sargaḥ 2
2.1ab: lobhaḥ sadā vicintyo lubdhebhyaḥ sarvato bhayaṃ dṛṣṭam 
2.1cd: kāryākāryavicāro lobhākṛṣṭasya nāstyeva %2.1
2.2ab: māyāvinimayavibhramanihnavavaicityakūṭakapaṭānām 
2.2cd: sañcayadurgapiśācaḥ sarvaharo mūlakāraṇāṃ lobhaḥ 
2.3ab: sattvapraśamatapobhiḥ sattvadhanaiḥ śāstravedibhirvijitaḥ 
2.3cd: lobho.avaṭaṃ praviṣṭaḥ kuṭilaṃ hṛdayaṃ kirāṭānām 
2.4ab: krayavikrayakūṭatulālāghavaniḥkṣeparakṣaṇavyājaiḥ 
2.4cd: ete hi divasacaurā muṣṇanti mudā janaṃ vaṇijaḥ %2.4
2.5ab: hṛtvā dhanaṃ janānāṃ dinamakhilaṃ vividhakūṭamāyābhiḥ 
2.5cd: vitarati gṛhe kirāṭaḥ kaṣṭena varāṭakatritayam 
2.6ab: ākhyāyikānurāgī vrajati sadā puṇyapustakaṃ śrotum 
2.6cd: daṣṭa iva kṛṣṇasarpaiḥ phalāyate dānadharmebhyaḥ %2.6
2.7ab: dvādaśyāṃ pitṛdivase saṃkramaṇe somasūryayorgrahaṇe 
2.7cd: suciraṃ snānaṃ kurute na dadāti kapardikāmekām 
2.8ab: dattvā diśi diśi dṛṣṭiṃ yācakacakito.avaguṇṭhanaṃ kṛtvā 
2.8cd: caura iva kuṭilacārī palāyate vikaṭarathyābhiḥ 
2.9ab: na dadāti prativacanaṃ vikrayakāle śaṭho vaṇiṅmaunī 
2.9cd: niḥkṣepapāṇipuruṣaṃ dṛṣṭvā saṃbhāṣaṇāṃ kurute 
2.10ab: uttiṣṭhati namati vaṇik pṛcchati kuśalaṃ dadāti ca sthānaṃ 
2.10cd: niḥkṣepapāṇipuruṣaṃ dṛṣṭvā dharmyāṃ kathāṃ kuruteka
2.11ab: kaścidvadati tametya draviṇaṃ niḥkṣipya hanta gantāsmi 
2.11cd: bhrātaḥ paraṃ prabhāte viṣṭidinaṃ kiṃ karomyadya 
2.12ab: tacchrutvā vikasitadṛgvadati sa mithyaiva nāṭayankhedam 
2.12cd: kārye prasāritākṣaḥ punaḥ punaḥ pārśvamavalokya %2.12
2.13ab: tvadadhīnaṃ sthānamidaṃ kiṃ tu ciraṃ nyāsapālanaṃ kaṭhinam 
2.13cd: viṣamau ca deśakālau sādhostava tadapi dāso.aham 
2.14ab: bhadrā  na dūṣitaiṣā niḥkṣepakṣemakāriṇī śastā 
2.14cd: ityanubhūtaṃ bahuśaḥ kāryajñaistvaṃ tu jānāsi 
2.15ab: viṣṭidine kimapi purā nyastaṃ kenāpi mitreṇa 
2.15cd: tūrṇaṃ punaśca śanakairnītaṃ kṣemeṇa kuśalena %2.15
2.16ab: ityādi mugdhabuddherasamannjasavarṇanaṃ rahaḥ kṛtvā 
2.16cd: gṛhṇāti kanakanikaraṃ nṛtyaṃstattanmanorathaiḥ pāpaḥ 
2.17ab: tatsaṃcūrṇanajātaiḥ krayavikrayalābharāśibhiranantaiḥ 
2.17cd: bhāṇḍapratibhāṇḍacayairupahasati dhanādhināthaṃ saḥ 
2.18ab: pūrṇāḥ kadaryavaṇijāṃ niḥsaṃbhogā nidhānadhanakumbhāḥ 
2.18cd: sīdanti kucataṭā iva duḥkhaphalā bālavidhavānām %2.18
2.19ab: dānopabhogavirahitahiraṇyarakṣākṛtakṣaṇāḥ satatam 
2.19cd: saṃsārajīrṇamandiraviṣayaviṣamamahāmūṣakā vaṇijaḥ 
2.20ab: aṭati samutkaṭaveṣṭitavikaṭapaṭasphuṭaphaṭāṭopaḥ 
2.20cd: kuṭilaḥ kaṇṭakanicitaḥ purapatināmā vidhivyālaḥ %2.20
2.21ab: atha puruṣaḥ sa digantaṃ bhrāntvā kenāpi daivayogena 
2.21cd: naṣṭadhano janarahitaḥ prāptaḥ sucirānnijaṃ deśam 
2.22ab: pṛcchati kamapi saśaṅkaḥ sa kirāṭaḥ kva nu gato mahāsattvaḥ 
2.22cd: tamupetya vadati kaścittasyādya sakhe vibhūtiranyaiva 
2.23ab: vividhanavāṃśukamṛgamadacandanakarpūramaricapūgaphalaiḥ 
2.23cd: khaṭikāhastaḥ sa sadā gaṇayati koṭīrmuhūrtena %2.23
2.24ab: asminmeruviśāle varabhavane rucirabhittikṛtacitre 
2.24cd: purapatināpyanuyāto vasati sukhaṃ sa hi mahājano yatra 
2.25ab: śrutvaitadatulavismayalolitamauliḥ sa tadgṛhaṃ gatvā 
2.25cd: dvāre sthagitastiṣṭhati niṣpratibho jīrṇakarpaṭaḥ suciram %2.25
2.26ab: taṃ tuṅgabhavanavalabhījālāntarato vaṇikparijñāya 
2.26cd: nocchvasiti naṣṭacetastāḍita iva mūrdhni vajreṇa 
2.27ab: upasṛtya mandamandaṃ kathamapi saṃprāptanirjanāvasaraḥ 
2.27cd: taṃ yācate sa puruṣo draviṇaṃ svaṃ prakaṭitābhikyaḥ 
2.28ab: taṃ vadati so.anyadṛṣṭiḥ sabhrūbhaṅgaṃ vidhūtahastāgraḥ 
2.28cd: vañcakavacanaḥ pāpo vṛttikṣīṇaḥ kuto.ayamāyātaḥ %2.28
2.29ab: kastvaṃ kasya kuto vā darśanamapi na smarāmi kiṃ kathanaiḥ 
2.29cd: ahaha kadā kutra tvaṃ vada kasya kimarpitaṃ kena 
2.30ab: paśyata kaṣṭhamaniṣṭaḥ kalikālaḥ kīdṛśo.ayamāyātaḥ 
2.30cd: matto.arthameṣa vāñchati loko jānāti vā sarvam %2.30
2.31ab: haraguptakule.asmākaṃ niḥkṣepagrahaṇamapyasaṃbhāvyam 
2.31cd: kiṃ punarapahnavodgataghoramahāpātakasparśaḥ 
2.32ab: tadapi satatābhiśaṃsī pratyākhyeyo janaḥ kathaṃ mahatām 
2.32cd: kathaya dinaṃ taddivase likhitaṃ sarvaṃ svayaṃ paśya 
2.33ab: vṛddho.ahaṃ nyastabharaḥ putre sarvaṃ mamāsti likhitaṃ hi 
2.33cd: iti tena vinaṣṭadhṛtiḥ sa visṛṣṭastatsutāntikaṃ prāptaḥ %2.33
2.34ab: tāto jānāti suto jānāti pitaiva likhati sakalaṃ yat 
2.34cd: iti tasya bhavati suciraṃ gatāgataṃ kandukasyeva 
2.35ab: rājakuladvāragate tasminprāptapravāsadattārthe 
2.35cd: sahate naraptikopaṃ tyajati kirāṭo na rūpakasyāṃśam 
2.36ab: paripīḍitaḥ sa rājñā vividhairapi yātanauśastraḥ 
2.36cd: mama haste niḥkṣiptaṃ kiṃcinnāstīti vaktyeva %2.36
2.37ab: evaṃ svabhāvalubdhāsva bhavanti dhanalavaṇavāribahutṛṣṇāḥ 
2.37cd: tṛṇalavamiva nijadehaṃ  tyajanti leśaṃ na vittasya 
2.38ab: devaṃ dhanādhināthaṃ vaiśravaṇaṃ sakalasaṃpadāṃ nilayam 
2.38cd: śukraḥ provāca purā vittārthī bālamittramabhyetya %2.38
2.39ab: pūrṇaḥ sakhe tavāyaṃ vibhavo vijitāmarāsuraiśvaryaḥ 
2.39cd: harṣaṃ vidadhāti paraṃ suhṛdāṃ śokaṃ ca śatrūṇām 
2.40ab: tvayi suhṛdi vittanāthe niḥsvo.ahaṃ bahukuṭumbasaṃbhāraḥ 
2.40cd: samaduḥkhasukhaṃ mittraṃ svādhīnatayoditaṃ praśaṃsanti 
2.41ab: yaśasi vihitādarāṇāmarthibhirupajīvyamānavibhavānām 
2.41cd: abhijātavaṃśajānāṃ suhṛdupabhogyāḥ śriyo mahatām %2.41
2.42ab: upanatamatipuṇyacayaiḥ saṃpūrṇaṃ rakṣitaṃ ca yatnena 
2.42cd: saṃpadi vipadi trāṇaṃ bhavati nidhānaṃ ca mittraṃ ca 
2.43ab: ityuktaḥ sapra~ayaṃ daityācāryeṇa nirjane dhanadaḥ 
2.43cd: tamuvāca vicintya ciraṃ saṃruddhaḥ snehalobhābhyām 
2.44ab: jānānami bālamittraṃ tvāmahamatyantasaṃbhṛtasneham 
2.44cd: kiṃ tu na jīvitajīvaṃ draviṇalavaṃ tyaktumīśo.asmi %2.44
2.45ab: snehārthī bandhujanaḥ kāryairbahubhirbhavanti mittrāṇi 
2.45cd: dārāḥ sutāśca sulabhā dhanamekaṃ durlabhaṃ loke 
2.46ab: atisāhasamatiduṣkaram atyāścaryaṃ ca dānamarthānām					 
2.46cd: yo.api dadāti śarīraṃ na dadāti sa vittaleśamapi %2.46
2.47ab: ityāśāparihāraiḥ pratyākhyāto dhanādhināthena 
2.47cd: bhagnamukho lulitamatirlajjāvaktro yayau śukraḥ %2.47
2.48ab: sa vicintya gṛhe suciraṃ sacivaiḥ saha māyayā mahāyogī 
2.48cd: hartuṃ draviṇamaśeṣaṃ viveśa hṛdayaṃ dhaneśasya 
2.49ab: śukrāviṣṭaśarīro vaiśravaṇaḥ sakalamadbutatyāgaḥ 
2.49cd: tatkṛtasaṃketebhyaḥ pradadau vittaṃ dvijātibhyaḥ %2.49
2.50ab: kauberaṃ dhanamakhilaṃ hṛtvā yāte.atha dānavācārye 
2.50cd: suciraṃ dhanādhināthaḥ śuśoca vijñāya tāṃ māyām 
2.51ab: hastanyastalalāṭaḥ saha śaṅkhamukundapadmādyaiḥ 
2.51cd: saṃcintya śukravikṛtiṃ sa jagādoṣṇaṃ viniḥśvasya 
2.52ab: suhṛdā marmajñena vyājānmāyāvinātilubdhena 
2.52cd: dhūrtena vañcito.ahaṃ daityāśrayadurjayena śukreṇa %2.52
2.53ab: adhunā dravyavihīnaḥ kṣaṇena tṛṇalāghavaṃ prāptaḥ 
2.53cd: kathayāmi kasya duḥkhaṃ karomi kiṃ vā kva gacchāmi 
2.54ab: dhanarahitaṃ tyajati jano janarahitaṃ paribhavāḥ samāyānti 
2.54cd: paribhūtasya śarīre vyasanavikāro mahābhārah 
2.55ab: dayiteṣu śarīravatāṃ bata dharmalatālavāleṣu 
2.55cd: draviṇeṣu jīviteṣu ca sarvaṃ yāti prayāteṣu %2.55
2.56ab: vidvānsubhago mānī viśrutakarmā kulonnataḥ śūraḥ 
2.56cd: vittena bhavati sarvo vittahīnastu sadguṇo.apyaguṇaḥ 
2.57ab: iti duḥsahadhanavirahakleśānalaśoṣitāśayo dhanapaḥ 
2.57cd: suciraṃ vimṛṣya sacivairdevaṃ śarvaṃ yayau śaraṇam 
2.58ab: prākpratipannasakho.asau viśvaśaraṇyo maheśvarastena 
2.58cd: vijñapto nijavrttaṃ dūtaṃ visasarja śukrāya %2.58
2.59ab: dūtāhūtaṃ sahasā prāptaṃ śukraṃ dhanaprabhāśukram 
2.59cd: añjaliviracitamukuṭaṃ provāca puraḥsthitaṃ purajit 
2.60ab: mittramayaṃ draviṇapatirbhavatā bata vañcitaḥ kṛtajñena 
2.60cd: mittradrohe prasarati na hi nāma janaḥ kṛtaghno.api %2.60
2.61ab: agaṇitayaśasā tyaktasthitinā kriyate.atha yākṛtajñena 
2.61cd: snigdhe suhṛdi sarāge mitre tava vañcanā na yuktā sā 
2.62ab: etatkiṃ śrutasadṛśaṃ tvadvratayogyaṃ kulānurūpaṃ vā 
2.62cd: kṛtavānasi yatsumate paribhūtaguṇodayaṃ karma %2.62
2.63ab: kimayaṃ sunayābhyāsaḥ praśamo vā gurujanopadeśo vā  
2.63cd: mativibhavaḥ sahajo vā vañcakatāṃ yena yāto.asi % 2.63
2.64ab: kasya na dayitaṃ vittaṃ cittaṃ hriyate na kasya vittena 
2.64cd: kiṃ tu yaśodhanalubdhā vāñchanti na duṣkṛtairarthān %2.64
2.65ab: mā mā malinaya vimalaṃ bhṛgukulamamalaṃ malena lobhena 
2.65cd: lobhajalado hi śatrurviśadayaśorājahaṃsānām 
2.66ab: tyaktvā kīrtimanantāmanilākulatṛṇalavopamānarthān 
2.66cd: gṛhṇāti yaḥ sa madhye dhūrtānāṃ kīdṛśo dhūrtaḥ %2.66
2.67ab: utsṛjya sādhuvṛttaṃ kutilādhiyā vañcitaḥ paro yena 
2.67cd: ātmaiva mūḍhamatinā kṛtasukṛto vañcitastena 
2.68ab: niyatā dūṣitayaśasāṃ bata kisalayakomalā prakṛtyaiva 
2.68cd: apavādaviṣatarūtthairāmodairmūrchitā lakṣmīḥ 
2.69ab: na hi nāma sajjanānāṃ śuddhayaśaḥsphaṭikakadarpaṇo vimalaḥ 
2.69cd: paribhavaduḥkhitajanatāniḥśvāsairmalinatāmeti %2.69
2.70ab: asamañjasamatimalinaṃ mohadvyaktiṃ samāgataṃ karma 
2.70cd: tasya viśuddhiḥ kriyatāṃ paravittasamarpaṇenaiva 
2.71ab: apavādadhūlidhūsaramamalayaśo mṛjyatāṃ svahastena 
2.71cd: asmadvacanaṃ kriyatāṃ paradhanamutsṛjyatāmetat %2.71
2.72ab: ityuktaḥ sānunayaṃ tribhuvanagurūṇāpi devadevena 
2.72cd: paradhananibaddhatṛṣṇaḥ provāca kṛtāñjaliḥ śukraḥ %2.72
2.73ab: bhagavanbhavataḥ śāsanamamarendrakirīṭakoṭiviśrāntam 
2.73cd: laṅghayati ko nu mohāddaurgatyaṃ sattvahāri yadi na syāt 
2.74ab: yasya kṣīṇasya gṛhe bhṛtyā dārāḥ sutāśca sīdanti 
2.74cd: kāryākāryavicāṛo draviṇādāneṣu kastasya 
2.75ab: mitramayaṃ dhananātho vipadi trāṇaṃ vicintitaḥ satatam 
2.75cd: vṛddhiṃ yātaḥ sumahānāśābandhaśca me hṛdaye %2.75
2.76ab: abhyetya yācito.api tyaktvā lajjāṃ mayā vihatalajjaḥ 
2.76cd: cicchedaiṣa mamāśāṃ sahasā pratiṣedhaśastreṇa 
2.77ab: tena prahatamaśastraṃ dāho.anagniśca nirviṣaṃ maraṇam 
2.77cd: vihitaṃ śaṭhena mohādāśābhaṅghaḥ kṛto yena 
2.78ab: tasmānmamaiṣa śatruḥ sukṛtasama śātruvañcanāpāpam 
2.78cd: riktasya nirapavādo vyājenopārjito.apyarthaḥ %2.78
2.79ab: aṇu dhanamapi na tyājyaṃ mama bhavatā jñāpite satyam 
2.79cd: vittaṃ jīvitamagryaṃ jīvitahānirdhanatyāgaḥ 
2.80ab: iti saṃbhāṣiṇamasakṛddaityaguruṃ prārthitaṃ punarbahuśāḥ 
2.80cd: kavalīcakāra sahasā pratiṣedharuṣā virūpākṣaḥ % 2.80
2.81ab: jaṭharāntare purāreḥ pralayānalavipulabhīṣaṇāboge 
2.81cd: prakvāthyamānakāyaḥ śukraścukrośa sākrośaḥ 
2.82ab: tyaja dhanamiti viṣamadṛśā punaḥ punaḥ prerito.avadacchukraḥ 
2.82cd: nidhanaṃ mamāstu bhagavandhanadadhanaṃ na tyajāmi kiṃcidapi 
2.83ab: atha dhāraṇāpravṛddhajvalanajvālāsahasravikarāle 
2.83cd: śukraścukrośa bhṛśaṃ ghoragabhīre harodare patitaḥ %2.83
2.84ab: tamuvāca devedevastyajya durgrahadagdha paravittam 
2.84cd: asminnudaramahodadhivaḍavāgnau mā gamaḥ pralayam 
2.85ab: so.avadadatiśayatāpasphuṭitāsthivasāpravāhabahalāgnau 
2.85cd: paramiha maraṇaṃ śreyo draviṇakaṇaṃ na tyajāmi socchvāsaḥ %2.85
2.86ab: punarapi ghoratarodgatakālānaladhāraṇānalajvalitaḥ 
2.86cd: śukraścakre devyāḥ stotraṃ kṣaṇaleśaśeṣāyuḥ 
2.87ab: stotrapadārādhitayā gauryā praṇayaprasādite rudre 
2.87cd: tadvacasā labdhadhṛtiḥ śukradvāreṇa niryayau śukraḥ 
2.88ab: evaṃ svabhāvalubdhāstīvratarāṃ yātanāmapi sahante 
2.88cd: na tu saṃtyajanti vittaṃ kauṭilyamivādhamaḥ sahajam %2.88
2.89ab: tasmāllobhasamutthā kapaṭakalā kuṭilavartinī māyā 
2.89cd: lubdhahṛdayeṣu nivasati nālubdho vañcanaṃ kurute 

%sargaḥ 3
3.1ab: kāmaḥ kamanīyatayā kimapi nikāmaṃ karoti saṃmoham 
3.1cd: viṣāmiva viṣamaṃ sahasā madhuratayā jīvanaṃ harati %3.1
3.2ab: ete hi kāmakalitāḥ parimalalīnālivalayahuṃkāraiḥ 
3.2cd: sūcitadānāḥ kariṇo badhyante kṣipramabalābhiḥ 
3.3ab: pādāghātāḥ śitāṅkuśaghaṭanā nigaḍādisaṃrodham 
3.3cd: viṣayamuṣitaḥ karīndraḥ kiṃ na smaravañcitaḥ sahate %3.3
3.4ab: dīrghavyasananiruddho bhrūbhaṅgajño vidheyatāṃ yātaḥ 
3.4cd: viṣayavivaśo manuṣyaḥ keliśikhaṇḍīva nartyate strībhiḥ 
3.5ab: raktākarṣaṇasaktā māyābhirmohatimirarajanīṣu 
3.5cd: nāryaḥ piśācikā iva haranti hṛdayāni mugdhānām %3.5
3.6ab: rāgimṛgavāgurāṇāṃ hṛdayadvipabandhaśṛṅkhalaughānām 
3.6cd: vyasananavavallarīṇāṃ strīṇāṃ na mucyate vaśagaḥ 
3.7ab: saṃsāracitramāyāṃ śambaramāyāṃ vicittimāyāṃ ca 
3.7cd: yo jānāti jitātmā so.api na jānāti yoṣitāṃ māyām %3.7
3.8ab: kusumasukumāradehā vajraśilākaṭhinahrdayasadbhāvāḥ 
3.8cd: janayanti kasya nāntarvicitracaritāḥ striyo moham 
3.9ab: anuraktajanaviraktā namrotsiktā viraktarāgiṇyaḥ 
3.9cd: vañcanavacanāsaktā nāryaḥ sadbhāvaśaṅkinyaḥ %3.9
3.10ab: jātaḥ sa eva loke bahujanadṛṣṭā vilāsakuṭilāṅgī 
3.10cd: dhairyadhvaṃsapatākā yasya na patnī prabhurgehe 
3.11ab: vijitasya madavikāraiḥ strībhirmūkasya naṣṭasaṃjñasya 
3.11cd: gṛhadhūlipaṭalamakhilaṃ vadane niḥkṣipyate bhartuḥ %3.11
3.12ab: kṛtakāparisphuṭākṣarakāmakalābhiḥ svabhāvamugdheva 
3.12cd: tilakāya candrabimbaṃ mugdhapatiṃ yācate prauḍha 
3.13ab: svairavihāragatāgatakhinnāyāstīrthadarśanavyājaiḥ 
3.13cd: bhartā vilāsavijitaścaraṇau mṛdnāti capalāyāḥ %3.13
3.14ab: nayanavikārairanyaṃ vacanairanyaṃ viceṣṭitairanyam 
3.14cd: ramayati suratenānyaṃ strī bahurūpā svabhāvena 
3.15ab: nijapayicapalakurāṅgī paratarubhṛṅgī svabhāvamātaṅgī 
3.15cd: mithyāvibhramabhṛṅgī kuṭilabhujaṅgī nijā kasya %3.15
3.16ab: bahuvidhataruṇanirargalasaṃbhogasukhārthabhoginī veśyā 
3.16cd: dhanyeti vadanti sadā socchvāsā nirjane nāryaḥ 
3.17ab: capalā tiṣṭhati harmye gāyati rathyāvalokinī svairam 
3.17cd: dhāvatyakāraṇaṃ vā hasati sphaṭikāśmamāleva 
3.18ab: paśuriva vaktuṃ kartuṃ kiṃcidayaṃ mama patirna jānāti 
3.18cd: uktveti gṛhe svajanaṃ puruṣavyāpāramaṅganā kurute %3.18
3.19ab: pratyutthānaṃ kurute vyavahāragatāgataiḥ svayaṃ yāti 
3.19cd: uccairvadati ca gṛhe gṛhiṇī jīvanmṛtasyaiva 
3.20ab: īrṣyāluvṛddhabhāryā sevakapatnī niyogibhāryā vā 
3.20cd: kārukuśīlavanārī lubdhavadhūḥ sārthavāhavanitā vā %3.20
3.21ab: goṣṭhīviharaṇaśīlā taruṇajane vatsalā prakṛtyaiva 
3.21cd: paraguṇagaṇane saktā nijapatidoṣābhidhāyinī satatam 
3.22ab: alpadhanā bahubhogā rūpavatī vikṛtarūpabhāryā vā 
3.22cd: mugdhavadhūḥ sakalakalāmānavatī nīcasaṃgamodvignā %3.22
3.23ab: dyūtamadhupānasaktā dīrghakathāgītarāgiṇī kuśalā 
3.23cd: bahupuṃścalīvayasyā śūrajane prakṛtipakṣapātaiva 
3.24ab: tyaktagṛhavyāpārā bahuvidhaveṣā nirargalābhyāsā 
3.24cd: pratyuttarasapratibhā satyavihīnā svabhāvanirlajjā %3.24
3.25ab: kuśalānāmayavārtāpraśnaparā prītipeśalālāpā 
3.25cd: vijane vividhakṛīḍāḍambaraśauṇḍā prakāśasāvitrī 
3.26ab: kratutīrthasuraniketanagaṇakabhiṣagbandhugehagamanaparā 
3.26cd: bhojanapānabahuvyayayātrotsavakāriṇī svatantreva %3.26
3.27ab: bhikṣutāpasabhaktā svajanaviraktā manoramāsaktā 
3.27cd: darśanadīkṣāraktā dayitaviraktā samādhisaṃyuktā 
3.28ab: goṣṭhīrañjanamitrā vijñeyā naṣṭacāritrā (kulakam) %no 3.28cd
3.29ab: satatānuraktadoṣā mohitajanatā bahugrahāścapalāḥ 
3.29cd: saṃdhyāḥ striyaḥ piśācyo raktacchāyāharāḥ krūrāḥ 
3.30ab: kasya na vahanayogyo mugdhadhiyastucchasādhane lagnāḥ 
3.30cd: prītatayā praśamarucaścapalāsu strīṣu ye.adāntāḥ 
3.31ab: śṛṅgāraśauryakatthanamasamañjasadānavarṇanā vividhāḥ 
3.31cd: etāvadeva tāsāmamantrayantraṃ vaśīkaraṇam %3.30/31
3.32ab: kalikālatimirarajanīrajanicarīṇāṃ sahasramāyānām 
3.32cd: strīṇāṃ nṛśamsacaritaiḥ kasya na saṃjāyate kampaḥ 
3.33ab: nirjitadhanapativibhavo babhūva bhuvi viśruto vaṇiṅnāthaḥ 
3.33cd: dhanadatto nāma purā ratnānāmāśrayaḥ payodhiriva %3.32/3
3.34ab: tasyābhavadvibhūtirmūrteva manobhuvaḥ sulalitāṅgī 
3.34cd: tanayā nayanavilāsairvijitāśā vasumatī nāma 
3.35ab: pradadau sa tāmaputraḥ putrapade vinihitāṃ priyāṃ putrīṃ 
3.35cd: vaṇije vibhavakulodayatulyāya samudradattāya %3.34/5
3.36ab: ramamāṇaḥ sa tayā saha hariṇākṣyā śvasuramandire suciram 
3.36cd: prayayau kadācidagre dvīpāyātasya sārthasya 
3.37ab: patyau yāte taruṇī janakagṛhe harmyaśikharamārūḍhā 
3.37cd: vilalāsa vilāsamahī kelivilolā sakhībhiḥ sā 
3.38ab: saudhe manmatharūpaṃ pṛthunayanā pathi dadarśa puruṣaṃ sā 
3.38cd: yaṃ dṛṣtvaiva gatāsyāḥ kvāpi dhṛtiḥ kumatikupiteva %3.37/8
3.39ab: sā tena capalanayanā sahasā muṣiteva hāritavicārā 
3.39cd: abhavadaśaktā nitarāṃ saṃvaraṇe smaravikārasya 
3.40ab: śīlaṃ pālasya capale mā pātaya nimnageva kulakūlam 
3.40cd: iti tāmvadadivoccaiḥ kampākulamukharamekhalā suciram %3.39/40
3.41ab: sā kṛtvā viditakathāṃ rahasi sakhīmānināya taṃ taruṇam 
3.41cd: calitaṃ hi kāminīnāṃ dhartuṃ śaknoti kaścittam 
3.42ab: kāmaṃ kāmavikāsaiḥ suratavilāsaiḥ sunarmaparihāsaiḥ 
3.42cd: sahajapremanivāsairmumude sā svairiṇī tena 
3.43ab: atha kṛtanijadhanakṛtyastvaritaṃ dayitāvilokanotkaṇṭhaḥ 
3.43cd: aviśatsamudradattaḥ śvaśurāvāsaṃ mahārambhaḥ %3.42/3
3.44ab: vipulamahotsavalīlāvyagrajanairbhogasaṃpadāṃ nicayaiḥ 
3.44cd: ativāhya dinaṃ dayitāsahitaḥ śayyāgṛhaṃ sa yayau 
3.45ab: viracitavarataraśayane baddhavitāne manoramasthāne 
3.45cd: jṛmbhitasaurabhadhūpe suragṛharūpe pradīptamaṇidīpe %3.44/5
3.46ab: tatra sa madhumadavilulitalocanakamalāṃ priyāṃ samāliṅgya 
3.46cd: madagaja iva navanalinīṃ bheje ratilālasaḥ śayyām 
3.47ab: sāpi hṛdayāntarasthitaparapuruṣadhyānabaddhalakṣaiva 
3.47cd: tasthau nimīlitākṣī dhyānaparā yoginīva ciram %3.46/7
3.48ab: āliṅganaparicumbananīvivimokṣeṣu bahutarocchvāsā 
3.48cd: patyau saṅkucitāṅgī sasmāra tameva śīlaharam 
3.49ab: praṇayakupiteti matvā mugdhapatistāṃ samudradatto.api 
3.49cd: praṇipatya cāṭukāraiḥ kimapi yayāce prasādāya 
3.50ab: parapuruṣarāgiṇīnāṃ vimukhīnāṃ praṇayakāmavāmānām 
3.50cd: puruṣapaśavo vimūḍhā rajyante yoṣitāmadhikam %3.49/50
3.51ab: kiṃ kriyate kāmo.ayaṃ paragatakāmaḥ svatantrakāmaśca 
3.51cd: dhanaśataraktāyāmapi saṃdhyāyāṃ bhāskaro rāgī 
3.52ab: gūḍhopavananikuñje nyastaṃ sā vallabhaṃ sasaṃketam 
3.52cd: saṃcintya ciraṃ svapatiṃ viṣamiva saṃmūrchitā mene 
3.53ab: nidrāmudritanayane praṇayaśrānte samudradatte sā 
3.53cd: utthāya racitaveṣā śanakairgamanonmukhī tasthau %3.52/3
3.54ab: cauraḥ kṣaṇe ca tasminmugdhamattajanaṃ praviśya tadbhavanam 
3.54cd: gamanotsukāmapaśyanmukharābharaṇāmalakṣyastām 
3.55ab: atrāntare śaśāṅkaḥ śanakaiḥ surarājavallabhāṃ kakubham 
3.55cd: cakita ivāśu cakampe mīlitatarāṃ samāliṅgya 
3.56ab: saṃkocitakamalāyāḥ kumudavijṛmbhāvirājamānāyāḥ 
3.56cd: prasasāra tuhinakiraṇo yāminyāḥ kapaṭahāsa iva % 3.55/6
3.57ab: raviparitāpaśrāntāṃ vīkṣya divaṃ prasaradindusānandām 
3.57cd: jahasuriva kumudavṛndairalikulakuṃkāraniebharā vāpyaḥ 
3.58ab: jagrāha rajaniramaṇī śaśikarahṛtatimirakañcukāvaraṇā 
3.58cd: lajjānviteva purataḥ kumudāmodākulālipaṭalapaṭam 
3.59ab: suptajane.atha niśārdhe candrāloke ca vipulatāṃ yāte 
3.59cd: tamasīva nirviśaṅkā sā śanakairupavanaṃ prayayau %3.58/9
3.60ab: atha sā viveśa vivaśā viṣamaśaraploṣitā nijopavanam 
3.60cd: channaṃ bhūṣaṇalobhādanuyātā vismitena caureṇa 
3.61ab: tatra dadarśa vibhūṣitamujjvalalalitāṃśukaṃ lasatkusumam 
3.61cd: śaṅkājanakaṃ vipine pakṣibhirupalakṣitaṃ dayitam 
3.62ab: hṛdayadayitāviyogajvalanajvālāvalītaptam 
3.62cd: diṅmukhavilasitarucinā candreṇa karānalairdagdham 
3.63ab: cirasaṅketasthityā muktāśaṃ priyatamāpunarmilane 
3.63cd: vṛkṣālambitavallīvalayālambena vigalitaprāṇam %3.62/3
3.64ab: taṃ dṛṣṭvaiva vilīnā vilapantī vyasanaśokasaṃtrāsaiḥ 
3.64cd: nipapāta vallarīva kvaṇadalivalayākulā tanvī 
3.65ab: saṃmohamīlitākṣī sthitvā suciraṃ mahīṃ samāliṅgya 
3.65cd: śanakairavāptajīvā vilalāpa laghusvaraiḥ svairam 
3.66ab: hā hā nayanānanda kva nu te viśadendusundaraṃ vadanam 
3.66cd: drakṣyāmi mandapuṇyā kimidaṃ kvāhaṃ kva me kāntaḥ %3.65/6
3.67ab: iti taruṇakaruṇamabalā vilapya pāśaṃ vimucya yatnena 
3.67cd: aṅke dhṛtvāsya mukhaṃ cucumba jīvaṃ kṣipantīva 
3.68ab: sā tasya vadanakamalaṃ nijavadane mohitā kṛtvā 
3.68cd: tāmbūlagarbhamakarotprakaṭitasākārarāgeva 
3.69ab: atha tasyāḥ kusumotkaramṛgamadadhūpādisaurabhāhūtaḥ 
3.69cd: āviśya śavakaśarīraṃ nāsāṃ ciccheda vetālaḥ 
3.70ab: sā prāpya cāpalocitamanayaphalaṃ chinnanāsikā gatvā 
3.70cd: bhavanaṃ praviśya bhartustāraṃ hāheti cukrośa 
3.71ab: pratibaddhe sakalajane nādatraste samudradatte ca 
3.71cd: sā nāsikā mameyaṃ bhartrā chinneti cakranda %3.70/71
3.72ab: śvaśurādibandhuvargaiḥ pṛṣṭaḥ kupitaiḥ samudradatto.api 
3.72cd: vikrītaḥ paradeśe mūka ivoce na kiṃcidapi 
3.73ab: atha cāsya suprabhāte bandhubhirāvedite nṛpasabhāyām 
3.73cd: tatrābhūnnṛpakopo bahudhanadaṇḍaḥ samudradattasya 
3.74ab: cauro.api nikhilavṛttaṃ pratyakṣamavekṣya vismayāviṣṭaḥ 
3.74cd: āvedya bhūpapurataḥ prāpya ca kalayādisatkāram 
3.75ab: udyāne śavavadane tasyāstāṃ nāsikāṃ ca saṃdarśya 
3.75cd: niṣkāraṇasuhṛducitāṃ śuddhiṃ vidadhe samudradattasya 
3.76ab: ityetāḥ kuṭilatarāḥ krūrācārā gatatrapāścapalāḥ 
3.76cd: yo nāma vetti sa strībhirnaiva vañcyate matimān 

%sargaḥ 4

4.1ab: tatrāpi veśayoṣāḥ kuṭilatarāḥ kūṭarāgahṛtalokāḥ 
4.1cd: kapaṭacaritena yāsāṃ vaiśravaṇaḥ śramaṇatāmeti %4.1
4.2ab: hāriṇyaścaṭulatarā bahulataraṅgāśca nimnagāminyaḥ 
4.2cd: nadya iva jaladhimadhye veśyāhṛdaye kalāścatuḥṣaṣṭiḥ 
4.3ab: veśakalā nṛtyakalā gītakalā vakravīkṣaṇakalā ca 
4.3cd: kāmaparijñānakalā grahaṇakalā mitravañcanakalā ca %4.3
4.4ab: pānakalā kelikalā suratakalāliṅganāntarakalā ca 
4.4cd: cumbanakalā parakalā nirlajjāvegasaṃbhramakalā ca 
4.5ab: īrṣyākalikelikalā ruditakalā mānasaṃkṣayakalā ca 
4.5cd: svedabhramakampakalā punarekāntaprasādhanakalā %4.5
4.6ab: netranimīlananiḥsahanispandakalā mṛtopamakalā ca 
4.6cd: virahāsaharāgakalā kopapratiṣedhaniścayakalā ca 
4.7ab: nijajananīkalahakalā sadgṛhagamanotsavekṣaṇakalā ca 
4.7cd: haraṇakalā jātikalā kelikalā caurapārthivakalā ca %4.7
4.8ab: gauravaśaithilyakalā niṣkāraṇadoṣabhāṣaṇakalā ca 
4.8cd: śūlakalābhyaṅgakalā nidrākṣirajasvalāmbarakalā ca %4.8
4.9ab: rūkṣakalā tīkṣṇakalā galahastagṛhārgalārpaṇakalā ca 
4.9cd: saṃtyaktakāmukāhṛtidarśanayātrāstutikalā ca %4.9
4.10ab: tīrthopavanasurālayaviharaṇahelākalā gṛhakalā ca 
4.10cd: vaśyauṣadhamantrakalā vṛkṣakalā keśarañjanakalā ca %4.10
4.11ab: bhikṣukatāpasabahuvidhapuṇyakalā dvīpadarśanakalā ca 
4.11cd: khinnā kalātriṣaṣṭyā paryante kuṭṭanīkalā veśyā %4.11
4.12ab: ajñātanāmavarṇeṣu ātmāpi yayārpyate dhanāṃśena
4.12cd: tasyā api sadbhāvaṃ mṛgayante moghasaṃkalpāḥ %4.12
4.13ab: nikhilajanavañcanārjita malinadhanaṃ rāgadagdhahrdayānām 
4.13cd: khādati guṇagaṇabhagno nagno hīno .athavā kaścit 
4.14ab: nīcasturagāroho hastipakaḥ khalataro .athavā śilpī 
4.14cd: vañcitasakalajanānāṃ tāsāmapi vallabho bhavati
4.15ab: rājā vikramasiṃho balavadbhirbhūmipaiḥ purā vijitaḥ 
4.15cd: mānī yayau vidarbhānguṇayaśasā mantriṇā sahitaḥ %4.15
4.16ab: tatra sa veśyābhavanaṃ praviśya bhuvi viśrutāṃ vilāsavatīm 
4.16cd: bheje gaṇikāṃ bahudhanabhogyām apy alpavibhavo .api
4.17ab: taṃ rājalakṣaṇocitabhājanānubhujaṃ vilokyapṛthusattvam 
4.17cd: vividhamaṇikanakakoṣaṃ cakre sā tadvyayādhīnam 
4.18ab: sahajamanurāgamadrutam aucityaṃ vīkṣya bhūpatis tasyāḥ 
4.18cd: vismayavivaśaḥ premṇā jagāda vijane mahāmātmyam 
4.19ab: citramiyaṃ bahu vittaṃ kṣapayati veśyāpi matkṛte tṛṇavat 
4.19cd: prītipadavīvisṛṣṭo veśyānāṃ dhananibandhano rāgaḥ 
4.20ab: mithyā dhanalavalobhād anurāgaṃ darśayanti bandhakyaḥ 
4.20cd: tadapi dhanaṃ visṛjati yā kastasyāḥ premṇi saṃdehaḥ 
4.21ab: iti vacanaṃ bhūmipateḥ śrutvā vihasya sāsūyaḥ 
4.21cd: tamuvāca kasya rājan veśyācarite .asti viśvāsaḥ 
4.22ab: etāḥ satyavihīnā dhanalavalīnāḥ sukhakṣaṇādhīnāḥ 
4.22cd: veśyā viśanti hṛdayaṃ mukhamadhurā nirvicārāṇām 
4.23ab: prathamasamāgamasukhadā madhye vyasanapravāsakāriṇyaḥ 
4.23cd: paryante duḥkhaphalāḥ puṃsāmāśāśca veśyāśca 
4.24ab: adyāpi hariharādibhiḥ amarairapi tattvato na vijñātāḥ 
4.24cd: bhramavibhramabahumohā veśyāḥ saṃsāramāyāśca 
4.25ab: iti sacivavaco nṛpatiḥ śrutvā kṛtvā ca saṃvidaṃ tena 
4.25cd: mithyāmṛtamātmānaṃ cakre veśyāparīkṣāyai %4.25
4.26ab: tasminkuṇapaśarīre vinyaste mantriṇā cittāvahnau 
4.26cd: sahasaiva vilāsavatī vahnibhuvaṃ bhūṣitā prayayau 
4.27ab: tāṃ prabalajvalitojjvalavahnijvālānipātasāvegām 
4.27cd: dorbhyāmāliṅgya nṛpo jīvāmītyabhidhānmuditaḥ %4.27
4.28ab: tattasyāḥ prema dṛḍhaṃ satyaṃ ca vicārya saṃbhṛtasnehaḥ 
4.28cd: rājā nininda mantriṇam asakṛdveśyaguṇābhimukhaḥ 
4.29ab: atha veśyādhanasaṃcayamātmādhīnaṃ mahīpatir vipulam
4.29cd: ādāya gajaturaṃgamabhaṭavikaṭāmādade senām
4.30ab: sambhṛtavipulabalaughaiḥ jitvā vasudhādhipānsa bhūpālaḥ 
4.30cd: nijamāsasāda maṇḍalam indurivānandakṛtpūrṇaḥ %4.30
4.31ab: sā cāntaḥpurakāntāmūrdhni kṛtvā bhūbhujā vilāsavatī 
4.31cd: śuśubhe śrīriva cāmarapavanākulitālakā tanvī 
4.32ab: sātha kadācinnarapatimekānte viracitāñjaliḥ praṇatā
4.32cd: ūce nātha mayā tvaṃ kalpataruḥ sevitaściraṃ dāsyā
4.33ab: yadi nāma kutracidahaṃ yātā te hetutāṃ vibho lakṣmyāḥ
4.33cd: tanmama saphalāmāśāmarhasi kartuṃ prasādena
4.34ab: puṇyaphalaprāpyānāṃ hṛtapararajasāṃ svabhāvavimalānām
4.34cd: tīrthānāmiva mahatāṃ na hi nāma samāgamo viphalaḥ
4.35ab: abhavanmama ko.api yuvā dayito dhanajīvitādhikaḥ praṇayī
4.35cd: baddhaḥ sa vidarbhapure daivavaśāccorarūpeṇa
4.36ab: tanmuktaye mayā tvaṃ śaktataraḥ sevito mahīnāthaḥ
4.36cd: adhunā kriyatāmucitaṃ sattvasya kulasya śauryasya
4.37ab: iti vañcanāmavāpto vismita iva tadvaco nṛpaḥ śrutvā
4.37cd: suciraṃ vilokya vasudhāṃ sasmārāmātyavacanaṃ saḥ
4.38ab: atha tāṃ tathaiva rājāśvāsya vidarbheṣu bhūbhujaṃ jitvā
4.38cd: bandhanamuktenāsyāścoreṇa samāgamaṃ cakre
4.39ab: ityevaṃ bahuhṛdayā bahujihvā bahukarāśca bahumāyāḥ
4.39cd: tattvena satyarahitāḥ ko jānāti sphuṭaṃ veśyāḥ
4.40ab: varṇanadayitaḥ kaściddhanadayito dāsakarmadayito.anyaḥ
4.40cd: rakṣādayitaścānyo veśyānāṃ narmadayito.anyaḥ

%%%sargaḥ 5
5.1ab: moho nāma janānāṃ sarvaharo harati buddhimevādau 
5.1cd: gūḍhataraḥ sa ca nivasati kāyasthānāṃ mukhe ca lekhe ca 
5.2ab: raudrakalā iva pūrṇā niṣpannā sasyasaṃpattiḥ 	 
5.2cd: grastā kṣaṇena dṛṣṭā niḥśeṣā divirarāhukalayeva 
5.3ab: jñātāḥ saṃsārakalā yogibhirapayātarāgasaṃmohaiḥ		 
5.3cd: na jñātā divirakalā kenāpi bahuprayatnena 
5.4ab: kūṭakalāśataśibiraiḥ janadhanavivaraiḥ kṣayakṣapātimiraiḥ
5.4cd: diviraireva samastā grastā janatā na kālena %4
5.5ab: ete hi kālapuruṣāḥ pṛthutaradaṇḍaprapātahatalokāḥ 
5.5cd: gaṇanāgaṇanapiśācāḥ caranti bhūrjadhvajā loke %5
5.6ab: kasteṣāṃ viśvāsaṃ yamamahiṣaviṣāṇakoṭikuṭilānām 
5.6cd: vrajati na yasya viṣaktaḥ kaṇṭhe pāśaḥ kṛtāntena 						 
5.7ab: kalamāgranirgatamaṣībinduvyājena sāñjanāśrukaṇaiḥ
5.7cd: kāyasthakhanyamānā roditi khinneva rājyaśrīḥ 			 
5.8ab: aṅkanyāsairviṣamaiḥ māyāvanitālakāvalīkuṭilaiḥ 
5.8cd: ko nāma jagati racitaiḥ kāyasthairmohito na janaḥ
5.9ab: māyāprapañcasaṃcayavañcitaviśvairvināśitaḥ satatam 
5.9cd: viṣayagrāmagrāsaiḥ kāyasthairindriyairlokaḥ %9
5.10ab: kuṭilā lipivinyāsā dṛśyante kālapāśasaṃkāśāḥ 
5.10cd: kāyasthabhūrjaśikhare maṇḍalalīnā iva vyālāḥ %10
5.11ab: ete hi citraguptāḥ citradhiyo guptahāriṇo divirāḥ 
5.11cd: rekhāmātravināśāt sahitaṃ kurvanti ye rahitam %11
5.12ab: loke kalāḥ prasiddhāḥ 	 svalpatarāḥ saṃcaranti divirāṇām
5.12cd: gūḍhakalāḥ kila teṣāṃ jānāti kaliḥ kṛtānto vā 
5.13ab: vakralipinyāsakalā sakalāṅkanimīlanakalā 
5.13cd: satatapraveśasaṃgrahalopakalā vyayavivardhanakalā ca %13
5.14ab: grāhyaparicchedakalā deyadhanādānakāraṇakalā ca 
5.14cd: utkocairharaṇakalā paryantabhuvaṃ palāyanakalā ca
5.15ab: śeṣasthavivekakalā calarāśisamagrabhakṣaṇakalā ca 
5.15cd: utpannagopanakalā naṣṭaviśīrṇapradarśanakalā ca 
5.16ab: krayamāṇairbharaṇakalā yojanacaryādibhiḥ kṣayakalā ca 
5.16cd: ekatra pañcadaśyāṃ luṇṭhicikitsāsamāsanakalā ca%16
5.17ab: niḥśeṣabhūrjadāhād āgamanāśaśca paryante 
5.17cd: yena vinā vyavahārī bhūryāgrahaṇe nirālokaḥ %17
5.18ab: sakalaṅkasya kṣayiṇo navanavarūpasya vṛddhibhājaśca 
5.18cd: divirasya kalāḥ kuṭilāḥ ṣoḍaśa doṣākarasyaitāḥ %18
5.19ab: kūṭasthāḥ kāyasthāḥsarvanakāreṇa siddhamantreṇa 
5.19cd: gurava iva viditamāyāvṛtticchedaṃ kṣaṇena kurvanti  %19
5.20ab: hāritadhanapaśuvasanaḥ cauryabhayādbandhubhiḥ parityaktaḥ
5.20cd: babhrāma mahīmakhilāṃ tīvravyasanaḥ purā kitavaḥ %20
5.21ab: sa kadācidetya puṇyaiḥ ujjayinīṃ tatra majjanaṃ kṛtvā 
5.21cd: vicaranvijane puraharamandiramavalokayāmāsa %21
5.22ab: śūnyāyatane gatvā varadaṃ devaṃ sadā mahākālam 
5.22cd: upalepanakusumaphalaiḥ nirvyāpāraḥ siṣeve saḥ %22
5.23ab: stotrajapagītadīpaiḥ vipuladhyānair niśāsu nirnidraḥ 
5.23cd: tasthau tatra sa suciraṃ duḥsahadaurgatyanāśāya
5.24ab: tasya kadācidbhaktyā śubhaśatakṛtayā prasāditaḥ sahasā 			
5.24cd: bhavabhayahārī bhagavān bhūtapatiḥ saṃbabhāṣe tam %24
5.25ab: putra gṛhāṇetyukte devena kapālamālikāśikhare
5.25cd: ekaṃ kapālamasakṛt cakre saṃjñāṃ purārāteḥ %25
5.26ab: ardhokte sthagitavaraḥ saṃpīḍanasaṃjñayā kapālasya 
5.26cd: tūṣṇīṃ cakāra rudro dāridryātkitavapuṇyānām %26
5.27ab: snātuṃ yāte tasmin vijane devaḥ kapālamavadattat
5.27cd: dantāṃśupaṭalapālīṃ gaṅgāmiva darśayannagre %27
5.28ab: asya kitavasya sādhoḥ bhaktasya cirasthitasya varadāne 
5.28cd: kasmāttvayā mamaiṣā vihitā saṃpīḍanaiḥ saṃjñā  %28
5.29ab: iti bhagavatā kapālaṃ pṛṣṭaṃ provāca sasmitaṃ śanakaiḥ 
5.29cd: viṣamanayanoṣmavigalan maulīndusudhārasairjīvat %29
5.30ab: śṛṇu bhagavanyena mayā vijñapto.asi svabhāvasaralātman 
5.30cd: sulabho.api bodhyate vā niṣkāraṇamīśvaraḥ kena  %30
5.31ab: eṣa kitavo.atiduḥkhī dāridryādviratasakalanijakṛtyaḥ 
5.31cd: prāsāde.asminracayati lepanabalikusumadhūpārgham 
5.32ab: duḥkhī bhavati tapasvī dhanarahitaḥ sādaro bhavati dharme
5.32cd: bhraṣṭādhikāravibhavaḥ sarvapraṇataḥ priyaṃvado bhavati %32
5.33ab: arcayati devaviprān japati ciraṃ vetti nirdhano mitram 
5.33cd: kaṭhino.api lohapiṇḍaḥ taptaḥ karmaṇyatāṃ eti %33
5.34ab: vyasanaparitaptahṛdayaḥ tiṣṭhati sarvaḥ sadācāre 
5.34cd: vibhavamadamohitānāṃ karmasmaraṇe kathā kaiva %34
5.35ab: aiśvaryārthī bhagavannrthī āśāpāśena lambamāno .asau 
5.35cd: kurute parāṃ saparyāṃ prāptārtho dṛśyate na punaḥ %35
5.36ab: svārthārthinaḥ prayattā prāptārthāḥ sevakāḥ sadā viphalāḥ 
5.36cd: na hi nāma jagati kaścit kṛtakāryaḥ sevako bhavati 
5.37ab: deva prāsāde.asmin phalajalakusumādibhogasāmagrīm
5.37cd: pūrṇe yāte kitave vijane nānye kariṣyanti %37
5.38ab: tasmātpuṇyopanataṃ kitavaṃ saṃrakṣa sevakaṃ satatam 
5.38cd: varadānamasya bhagavan nirvāsanamātmapūjāyāḥ 
5.39ab: śrutvaitadvakrataraṃ vacanaṃ pṛthuvismayasmeraḥ 
5.39cd: taṃ papraccha pinākī kastvaṃ tattvena kiṃ karma 
5.40ab: iti pṛṣṭaṃ punarūce sapadi kapālaṃ vicintya sadbhāvam 
5.40cd: magadhānāmahamabhavaṃ kāyasthakule svakarmaṇo vimukhaḥ %39
5.41ab: snānajapavratanirataḥ tīrtharato viditasarvaśāstrārthaḥ
5.41cd: tyaktvā bhāgīrathyāṃ śarīrakaṃ tvatpadaṃ prāptaḥ
5.42ab: ākarṇyavaṃ bhagavān ūce kāyastha eva satyaṃ tvam 
5.42cd: citraṃ kauṭilyakalāṃ na tyajasi kapālaśeṣo.api
5.43ab: ityuktvā smitakiraṇaiḥ kurvannāśālatāḥ kusumaśubhrāḥ 
5.43cd: snātvāgatāya tasmai kitavāya varaṃ dadau varadaḥ %42
5.44ab: kṛtvā tatkitavahitaṃ paśyata evāśu tasya śaśimauliḥ 
5.44cd: niṣkāsitavāṃstacchira uttamatamamuṇḍamālikāpaṅkteḥ 
5.45ab: ityevaṃ kuṭilakalāṃ sahajāṃ malināṃ janakṣaye niratām 
5.45cd: yamadaṃṣṭrāmiva muñcati kāyastho nāsthiśeṣo.api %44
5.46ab: susthaḥ ko nāma janaḥ satatāśucibhāvadūṣitakalānām 
5.46cd: doṣakṛtāṃ śakṛtāmiva kāyasthānāmavaṣṭambhaiḥ
5.47ab: asuraracitaprayatnād vijñātā diviravañcanā yena 
5.47cd: saṃrakṣaitā matimatā ratnavatī vasumatī tena 

%ṣaṣṭhaḥ sargaḥ madavarṇanam

6.1ab: ekaḥ sakalajanānāṃ hṛdayeṣu kṛtāspado madaḥ śatruḥ
6.1cd: yenāviṣṭaśarīro na śṛṇoti na paśyati stabdhaḥ 
6.2ab: vijitātmanāṃ janānām abhavadyaḥ kṛtayuge damo nāma 
6.2cd: so.ayaṃ viparītatayā madaḥ sthitaḥ kaliyuge puṃsām
6.3ab: maunaṃ vadananikūṇanam ūrdhvekṣaṇamanyalakṣyatā cākṣṇoḥ
6.3cd: gātravilepanaveṣṭanam agryaṃ rūpaṃ madasyaitat %6.3
6.4ab: śauryamado rūpamadaḥ śṛṅgāramadaḥ kulonnatimadaśca
6.4cd: vibhavamadamūlajātā madavṛkṣā dehināmante
6.5ab: śūlārūḍhasamāno vātastabdhopamo.atha bhūtasamaḥ 
6.5cd: bahubhoge vibhavamadaḥ praśamajvarasaṃnipātasamaḥ
6.6ab: śauryamado bhujadarśī rūpamado darpaṇādidarśī ca 
6.6cd: kāmamadaḥ strīdarśī vibhavamadastveṣa jātyandhaḥ
6.7ab: antaḥsukharasamūrcchāmīlitanayanaḥ samāhitadhyānaḥ 
6.7cd: dhanamada eṣa narāṇām ātmārāmopamaḥ ko.api 
6.8ab: unmādayatyaviṣaye vividhavikāraḥ samastaguṇahīnaḥ 
6.8cd: mūḍhamadastvanyo.ayaṃ jayati vicitro nirālambaḥ 
6.9ab: stambhānna paśyati bhuvaṃ khecaradarśī sadā tapasvimadaḥ 
6.9cd: bhaktimado.adbhutakārī vismṛtadehaścalaḥ prakṛtyaiva
6.10ab: ākoparaktanayanaḥ paravāṅmātrāsahaḥ pralāpī ca
6.10cd: viṣamaḥ śrutamadanāmā dhātukṣobho nṛṇāṃ mūrtaḥ 
6.11ab: satatabhrukuṭikarālaḥ paruṣākrośī haṭhābhighātaparaḥ 
6.11cd: adhikāramadaḥ puṃsāṃ sarvāśī rākṣasaḥ krūraḥ
6.12ab: pūrvapuruṣapratāpaprathitakathāvismṛtānyanijakṛtyaḥ 
6.12cd: kulamada ekaḥ puṃsāṃ sudīrghadarśī mahājñānaḥ
6.13ab: varjitasakalasparśaḥ sarvāśucibhāvanānnirālambaḥ
6.13cd: ākāśe.api salepaḥ śaucamado nityasaṃkocaḥ %6.13
6.14ab: sāvadhayaḥ sarvamadā nijanijamūlakṣaye vinaśyanti 
6.14cd: varamada ekaḥ kuṭilo vijṛmbhate niravadhirbhogī 
6.15ab: pānamadastu jaghanyaḥ sarvajugupsāspadaṃ mahāmohaḥ 
6.15cd: kṣaṇiko.api harati sahasā varṣasahasrārjitaṃ śīlam 
6.16ab: vidyāvati vipravare gavi hastini bhūpatau śvapāke ca 
6.16cd: madyamadaḥ samadarśī svaparavibhāgaṃ na jānāti %6.16
6.17ab: vigalitasadasadbhedaḥ samakāñcanaloṣṭapāṣāṇaḥ 
6.17cd: prāpto yogidaśāmapi narake kṣībaḥ svayaṃ patati
6.18ab: roditi gāyati vihasati gāyati vilapaty uccair upaiti saṃmoham
6.18cd: bhajate vividhavikārān saṃsārādarśamaṇḍalaḥ kṣībaḥ 
6.19ab: parapaticumbanasaktāṃ paśyati dayitāṃ na yāti saṃtāpam 
6.19cd: kṣībo.atigāḍharāgaṃ pītvā madhu vītarāgaḥ kim %6.19
6.20ab: visṛjati vasanaṃ dūre vyasanaṃ gṛhṇāti duḥsahaṃ kṣībaḥ
6.20cd: añjalipātre pibati ca nijamūtravijṛmbhitaṃ candram
6.21ab: cyavanaḥ purā maharṣiḥ yauvanamaśviprayogato labdhvā 
6.21cd: yajñe svayaṃ kṛtajñaḥ tau cakre somapānārhau
6.22ab: kruddhastametya śakraḥ provāca mune na vetsi kimapi tvam
6.22cd: bhiṣajāvapaṅktiyogyo somārhāvaśvinau yasya 
6.23ab: iti bahuśaḥ surapatinā pratiṣiddho.api svatejasā cyavanaḥ 
6.23cd: na cacāla niścitātmā nijakṛtyādaśvinoḥ prītyā 
6.24ab: tatkopodyatavajraṃ jambhārerāyataṃ bhujastambham
6.24cd: astambhayanmunīndraḥ prabhāvasaṃbhāvanāpātram 
6.25ab: asṛjacca tadvadhāya pralambakāyopamaṃ caturdaṃṣṭram
6.25cd: yojanasahasravipulaṃ kṛtyārūpaṃ mahāsuraṃ ghoram
6.26ab: tenāviṣṭaḥ sahasā bhīto vajrī tamāyayau śaraṇam
6.26cd: somo.astu devabhiṣajoḥ iti covāca praṇaṣṭadhṛtiḥ 
6.27ab: munirapi karuṇāsindhuḥ bhītaṃ praṇataṃ mahendramāśvāsya
6.27cd: madamutsasarja ghoraṃ dyūtastrīpānamṛgayāsu
6.28ab: so.ayamasuraḥ pramāthī muninā kruddhena nirmito hṛdaye 
6.28cd: nivasati śarīrabhājāṃ stambhākāro guṇairbaddhaḥ 
6.29ab: maune śrīmattānāṃ niḥspandadṛśi pravṛddhavibhavānām
6.29cd: bhrūbhaṅgamukhavikāre dhanikānāṃ bhrūyuge viṭādīnām 
6.30ab: jihvāsu dūtaviduṣāṃ rūpavatāṃ daśanavasanakeśeṣu 
6.30cd: vaidyānāmoṣṭhapuṭe grīvāyāṃ guṇiniyogigaṇakānām 
6.31ab: skandhataṭe subhaṭānāṃ hṛdaye vaṇijāṃ kareṣu śilpavatām 
6.31cd: galapatrāṅgulibhaṅge chātrāṇāṃ stanataṭeṣu taruṇīnām %6.31
6.32ab: udare śrāddhārhāṇāṃ jaṅghāsu ca lekhahārapuruṣāṇām
6.32cd: gaṇḍeṣu kuñjarāṇāṃ barhe śikhināṃ gateṣu haṃsānām 
6.33ab: ityevaṃ madanāmā madāgraho bahuvikāradṛḍhamohaḥ
6.33cd: aṅge kāṣṭhībhūto vasati sadā sarvabhūtānām 

iti mahākaviśrīkṣemendraviracite kalāvilāse madavarṇananāma ṣaṣṭhaḥ sargaḥ 

%saptamaḥ sargaḥ gāyanavarṇanam

7.1ab: artho nāma janānāṃ jīvitamakhilakriyākalāpasya 
7.1cd: tamapi haranty atidhūrtāḥ ślakṣṇagalā gāyanā loke 
7.2ab: niḥśeṣaṃ kamalākarakoṣaṃ jagdhvāpi kumudamāsvādya 
7.2cd: kṣīṇā gāyanabhṛṅgā mātaṅgapraṇayatāṃ yānti 
7.3ab: ghaṭapaṭaśakaṭaskandhā bahuḍimbhā muktakeśakakalāpāḥ 
7.3cd: ete yonipisācā bhūpabhujo gāyanā loke . 3 .
7.4ab: tamasi varākaś cauro hāhākāreṇa yāti saṃtrastaḥ 
7.4cd: gāyanacauraḥ prakaṭaṃ hāhākṛtvaiva harati sarvasvam . 4 .
7.5ab: pā pā dha dha ni ni ga ma sā dhā dhā mā mā sa mā sa gā dhā mā 
7.5cd: kṛtvā svarapadapālīṃ gāyanadhūrtāś caranty ete . 5 .
7.6ab: kuṭilāvartabhrāntaiḥ veṣavikāraiś ca mukhavikāraiś ca 
7.6cd: gāyati gāyanasaṃgho mardalahastaś ciraṃ maunī . 6 .
7.7ab: āmantraṇajayaśabdaiḥ pratipadahuṃkāraghargharārāvaiḥ
7.7cd: svayamuktasādhuvādaiḥ antarayati gāyano gītam . 7 .
7.8ab: jalapatite saktukaṇe matsyairbhukte.asti kāpi dharmāptiḥ 
7.8cd: gāyanadattāsu paraṃ koṭiṣvapi nāsti phalaleśaḥ . 8 .
7.9ab: mugdhadhanānāṃ vidhinā ruddhānāmandhakūpakoṣeṣu 
7.9cd: vihito vivṛtamahāsyo gāyananāmā praṇālaughaḥ . 9 .
7.10ab: naitat prakaṭitadaśanā gāyanadhūrtāḥ sadaiva gāyanti 
7.10cd: ete gatānugatikān hasanti dhūrtā gṛhītārthān . 10 .
7.11ab: prātargāyanadhūrtā bhavanti dhīrāḥ sahārakeyūrāḥ 
7.11cd: madhyāhne dyūtajitā nagnā bhagnā nirādhārāḥ . 11 .
7.12ab: stutivāgurānibaddhaiḥ vacanaśaraiḥ kapaṭakūṭaracanābhiḥ 
7.12cd: gītairgāyanalubdhā mugdhamṛgāṇāṃ haranti sarvasvam . 12 .
7.13ab: naṣṭasvarapadagītaiḥ kṣaṇena lakṣāni gāyano labdhvā 
7.13cd: dāsyāḥ sutena dattaṃ kimiti vadarduḥkhito yāti . 13 .
7.14ab: varjitasādhudvijavaravṛddhāyāḥ sakalaśokakalitāyāḥ 
7.14cd: śāpo.ayameva lakṣmyā gāyanabhojyaiva yat satatam . 14 .
7.15ab: devaḥ purā surāṇām adhinātho nāradaṃ cirāyātam 
7.15cd: papraccha lokavṛttaṃ mahītale bhūmipālānām . 15 .
7.16ab: so.avadaravanipatīnāṃ jayināṃ bahudānadharmayajñānām 
7.16cd: caratā mayā nṛloke surapatiyogyāḥ śriyo dṛṣṭāḥ . 16 .
7.17ab: te tu tvāṃ spardhante vibhavairvaruṇaṃ dhanādhināthaṃ ca 
7.17cd: śatamakhasaṃjñāmasakṛd bahutarayajñā hasanty eva . 17 .
7.18ab: śrutvā tarmunivacanaṃ jātadveṣaḥ śatakratuḥ kopāt 
7.18cd: hartuṃ dhanaṃ piśācān visasarja bhuvaṃ narendrāṇām . 18 .
7.19ab: te gītanāmamantrāḥ surapatidiṣṭāḥ piśācasaṃghātāḥ 
7.19cd: hartuṃ sakalanṛpāṇāṃ dhanamakhilaṃ bhūtalaṃ prayayuḥ . 19 .
7.20ab: māyādāsaḥ prathamaṃ ḍambaradāsaś ca vajradāsaś ca 
7.20cd: jh[kṣ?]ayadāsaluṇṭhadāsau kharaharadāsaḥ prasiddhadāsaś ca . 20 .
7.21ab: vāḍavadāsaś cāṣṭau te gatvā martyalokamatibhayadāḥ 
7.21cd: vivṛtāsyaghorakuharā gāyanasṛṣṭiṃ sasarjurativikaṭām . 21 .
7.22ab: yairetairhṛtavibhavā diśi diśi hṛta[?]sakalalokasarvasvāḥ 
7.22cd: yajñādiṣu bhūpatayo jātāḥ śithilodyamāḥ sarve . 22 .
7.23ab: ete hi karṇavivaraiḥ praviśya gītacchalena bhūpānām 
7.23cd: sahasā haranti hṛdayaṃ karṇapiśācā mahāghorāḥ . 23 .
7.24ab: tasmāreṣāṃ rāṣṭre na dadāti vikāriṇāṃ praveśaṃ yaḥ 
7.24cd: tasya sakalārthasaṃpadyajñavatī bhūmirādhīnā . 24 .
7.25ab: naṭanartakacakracarāḥ kuśīlavāścāraṇā viṭāścaiva 
7.25cd: aiśvaryaśāliśalabhāḥ caranti tebhyaḥ śriyaṃ rakṣet . 25 .
7.26ab: gāyanasaṃghasyaikyād uttiṣṭhati gītaniḥsvanaḥ sumahān 
7.26cd: asthāne dattāyā lakṣmyā iva saṃbhramākrandaḥ . 26 .

%sarga 8
8.1ab: tatrāpi hemakārā haraṇakalāyoginaḥ pṛthudhyānāḥ 
8.1cd: ye dhāmni bahulalakṣmyāḥ śūnyatvaṃ darśayanty eva . 1.
8.2ab: sāraṃ sakaladhanānāṃ saṃpatsu vibhūṣaṇaṃ vipadi rakṣā 
8.2cd: ete haranti pāpāḥ  satataṃ tejaḥ paraṃ hema . 2.
8.3ab: sahasaiva dūṣayanti sparśena suvarṇamupahatacchāyām 
8.3cd: nityāśucayaḥ pāpāḥ caṇḍālā hemakārāś ca . 3.
8.4ab: masṛṇakaṣāśmani nikaṣo mandarucikramagatā kalā teṣām 
8.4cd: yeṣāṃ paruṣakaṣāśmani vikrayakāle.api lābhakalā . 4.
8.5ab: sopasnehaḥ svedyaḥ sikthakamudro.api bālukāprāyaḥ 
8.5cd: soṣmā ca yuktibhedāt tulopalānāṃ kalāḥ pañca . 5.
8.6ab: dvipuṭā sphoṭavipākā suvarṇarasapāyinī sutāmrakalā 
8.6cd: sīsamalakācacūrṇagrahaṇaparā ṣaṭkalā mūṣā . 6.
8.7ab: vakramukhī viṣamapuṭā suṣiratalā nyastapāradā mṛdvī 
8.7cd: pakṣakaṭā granthimatī sikthakalā bahuguṇā puronamrā . 7.
8.8ab: vātabhrāntā tanvī gurvī vā paruṣavātadhṛtacūrṇā 
8.8cd: nirjīvanā sajīvā ṣoḍaśa hemnastulāsu kalāḥ . 8.
8.9ab: mandaḥ sāvego vā madhyacchinnaḥ saśabdlphūtkāraḥ 
8.9cd: pātī śīkarakārī phūtkāraḥ ṣaṭkalāsteṣām . 9.
8.10ab: jvālāvalayī dhūmo visphoṭī mandakaḥ sphuliṅgī ca 
8.10cd: pūrvadhṛtatāmracūrṇas teṣāṃ api ṣaṭkalo vahniḥ . 10.
8.11ab: praśnaḥ kathā vicitrā kaṇḍūyanamaṃśukāntarākṛṣṭiḥ
8.11cd: dinavelārkanirīkṣaṇamatihāso makṣikākṣepaḥ
8.12ab: kautukadarśanamasakṛtsvajanakaliḥ salilapātrabhaṅgaśca
8.12cd: bahirapi gamanaṃ bahuśo dvādaśa ceṣṭākalās teṣām
8.13ab: ghaṭitasyopari pākaḥ kṛtrimavarṇaprakāśanotkarṣī 
8.13cd: tanugomayāgnimadhye lavaṇakṣārānulepena 
8.14ab: sāmānyalohapātrādbhūminyaste.api kāntalohatale 
8.14cd: dhāvati vadanena tulā riktāpi muhuḥ supūrṇeva
8.15ab: pratibaddhe jatuyogye prakṣiptanighūḍhakanakakaṇam
8.15cd: tulitaṃ pūraṇakāle sukhena hartuṃ samāyāti %8.15
8.16ab: ujjvalane.api ca teṣāṃ pātanamatisukaramaśmakāle ca 
8.16cd: sadṛśavicitrābharaṇe parivartanalāghavaprasāraśca
8.17ab: pūrṇādāne ghaṭane nekṣā māṣārpaṇaṃ prabhāyogaḥ
8.17cd: kālāharaṇavināśaḥ pratipūraṇayācanaṃ bahuśleṣaḥ
8.18ab: ekādaśa yuktikālasteṣāmetāḥ samāsena
8.18cd: ekaiva kalā mahatī niśi gamanaṃ sarvamādāya
8.19ab: etā hemakārāṇāṃ vicāralabhyāḥ kalāścatuḥṣaṣṭiḥ
8.19cd: anyā gūḍhāśca kalāḥ sahasranetro.api no vetti 
8.20ab: meruḥ sthito.atidūre manuṣyabhūmiṃ cirātparityajya
8.20cd: bhīto.avaśyaṃ cauryādghorāṇāṃ hemakārāṇām
8.21ab: kanakaśilāśatasaṃdhiprasṛtamahāvivarakoṭisaṃghātaiḥ
8.21cd: utkīrṇanikhilaśikharaḥ purā kṛto mūṣakairmeruḥ
8.22ab: tatrākhilākhusenānikhātanakharāvalekhanotkhātaiḥ
8.22cd: śithilitamūlaḥ sahasā babhūva meruḥ purā niyatam
8.23ab: mūṣakanakharotkhātaḥ sumeruruccaistarāṃ śuśubhe
8.23cd: uddhatasuvarṇadhūlīpaṭalaiḥ kapilā bahuḥ kakubhaḥ
8.24ab: tasmiñjarjaraśikhare vivarodaradalitakanakakūṭataṭe
8.24cd: kalpāntāgamaśaṅkābhayamāvirabhūdamartyānām
8.25ab: āha ca divyadṛśā tadvilokya sarvaṃ surānāthāgastyaḥ
8.25cd: ete te brahmaghnā niśācārāstridaśasaṃgare nihatāḥ
8.26ab: jātā mūṣakarūpā merunipāte kṛtārambhāḥ
8.26cd: vadhyāḥ punarapi bhavatāmāśramabhaṅgān munīnāṃ ca
8.27ab: śrutvaitanmunivacanaṃ dhūmena bilāvalīṃ samāpūrya
8.27cd: śāpena pūrvadagdhāñjagdhustridaśā mahāmūṣān
8.28ab: ete ta eva mūṣāḥ suvarṇkārāḥ kṣitau punarjātāḥ
8.28cd: janmābhyāsādaniśaṃ kāñcanacūrṇaṃ nikarṣanti
8.29ab: tasmānmahīpatīnāmasaṃbhave garadacoradasyūnām
8.29cd: ekaḥ suvarṇakāro nigrāhyaḥ sarvathā nityam %8.29


%navamaḥ sargaḥ nānādhūrtavarṇanam 

9.1ab: vāñcakamāyā mahatī mahītale jaladhimekhale nikhile 
9.1cd: naṣṭadhiyāṃ matsyānāṃ jālālī dhīvarairvihitā 
9.2ab: sarvasvameva paramaṃ prāṇā yeṣāṃ kṛte prayatno.ayam 
9.2cd: vaidyā vedyāḥ satataṃ yeṣāṃ haste sthitāste.api 
9.3ab: ete hi dehadāhād virahā iva duḥsahā bhiṣajaḥ 
9.3cd: grīṣmadivasā ivogrā bahutṛṣṇaḥ śoṣayanty eva 
9.4ab: vividhauṣadhaparivatairyogaiḥ jijñāsayā svavidyāyāḥ 
9.4cd: hatvā nṛṇāṃ sahasraṃ paścādvaidyo bhavetsiddhaḥ 
9.5ab: vinyasya rāśicakraṃ grahacintāṃ nāṭayarmukhavikāraiḥ 
9.5cd: anuvadati cirārgaṇako yat kiṃcit prāśnikenoktam 
9.6ab: gaṇayati gagane gaṇakaḥ candreṇa samāgamaṃ viśākhāyāḥ 
9.6cd: vividhabhujaṃgakrīḍāsaktāṃ gṛhiṇīṃ na jānāti 
9.7ab: prathamaṃ svavittamakhilaṃ kanakārthī bhasmasāt kṛtvā  
9.7cd: paścāt sadhanānrasikān vināśayaty eṣa varṇikānipunaḥ 
9.8ab: śatavedhī siddho me sahasravedhī raso.api niryātaḥ  
9.8cd: iti vadati dhātuvādī nagno malinaḥ kṛśo rūkṣaḥ  
9.9ab: tāmraghaṭopamaśīrṣo dhūrto hi rasāyanī jarājīrṇaḥ  
9.9cd: keśotpādanakathayā khalvāṭāneva muṣṇāti  
9.10ab: prahlādanaśucitārakaśambararamaṇījane .api baddhāśaḥ
9.10cd: bilvādibhiratikāmī hutvā dhūmāndhatāmeti
9.11ab: khecaryaḥ sukhasādhyā yatnādyadi labhyate nabhaḥkusumam  
9.11cd: uktāḥ prayogavidbhiḥ maśakāsthiṣu siddhayo bahudhā  
9.12ab: kṛṣṇāśvaśakṛdvṛtyā paśyati gagane surendrabhavanāni  
9.12cd: maṇḍūkavasālipto bhavati pumārvallabho.apsarasām  
9.13ab: ity uktvā punarāśāṃ diśi diśi vilasanti dhūrtasaṃghātāḥ  
9.13cd: yairvividhasiddhilubdhāḥ kṣaiptāḥ śataśo narāḥ śvabhre  
9.14ab: vaśyākarṣaṇayogī pathi pathi rakṣāṃ dadāti nārīṇām  
9.14cd: ratikāmatantramūlaṃ mūlaṃ mantraṃ na jānāti  
9.15ab: bahavo rathyāguravo laghudīkṣāḥ svalpayogamutpādya  
9.15cd: vyādhā iva vardhante mugdhānāṃ draviṇadāraharāḥ  
9.16ab: hastasthā dhanarekhā vipulatarāsyā patiś ca calacittaḥ  
9.16cd: mṛdnāti kulavadhūnām ity uktvā kamalakomalaṃ pāṇim  
9.17ab: baddhe.aṅguṣṭhe salile paśyati vividhaṃ janabhramaṃ kanyā 
9.17cd: na prāpyate ca coro moho.asāv indrajālasya  
9.18ab: khādati pibati ca dhūrtaḥ pralāpakārī nṛṇāṃ talāghātaiḥ  
9.18cd: ceṭāveśaṃ kṛtvā nirmantrakṣudradhūpena  
9.19ab: kakṣapuṭe nāgārjunalikhitā yuktir vidhīyatāṃ dhūpe  
9.19cd: yo hartuṃ mohāditi dhūrto.agnau kṣipati paravittam  
9.20ab: yakṣīputrāś corā vijñeyāḥ kūṭadhūpakartāraḥ  
9.20cd: yeṣāṃ pratyakṣaphalaṃ dārirdyaṃ rājabhaṅgaś ca  
9.21ab: bahutaradhanena vaṇijā putrī sā putravargṛhītaiva  
9.21cd: madadhīneti kathābhiḥ kanyārthaṃ bhujyate dhūrtaḥ  
9.22ab: cintyaḥ sveṅitavādī marmajño hṛdayacaura evāsau  
9.22cd: tiṣṭhati paraprayukto mithyābadhiro.athavā mūkaḥ  
9.23ab: bhasmasmerā veśyā vṛddhāḥ śramaṇāḥ sadaivatā gaṇikāḥ  
9.23cd: etāḥ kulanārīṇāṃ caranti dhanaśīlahāriṇyaḥ  
9.24ab: vidhavā taruṇī sadhanā vāñcati divyaṃ bhavadvidhaṃ ramaṇam  
9.24cd: dhūrto jaḍamity uktvā sarvasvaṃ tasya bhakṣayati  
9.25ab: pratyahavetanayuktāḥ karmasu ye kāryśilpino dhūrtāḥ  
9.25cd: vilasantikarmavighnaiḥ vijñeyāḥ kālacaurāste  
9.26ab: akṣavyājairvividhaiḥ gaṇanahastādilāghavair nipuṇāḥ  
9.26cd: dhūrtāś caranti gūḍhaṃ prasiddhakitavā videśeṣu  
9.27ab: bhojanamātrotpattiḥ bahuvyayo dyūtamadyaveśyābhiḥ  
9.27cd: vijñeyo gṛhacauro bandhujano veśmadāso vā  
9.28ab: kṛtakaṃ śāstramasatyaṃ sākṣārdṛṣṭaś ca kena paralokaḥ  
9.28cd: iti vadati yaḥ sa śaṅkyo niraṅkuśo mattamātaṅgaḥ  
9.29ab: bahulābhalubdhamanasāṃ haranti ye duḥsahena lābhena  
9.29cd: ṛṇadhanamadhikavidagdhā vijñeyā lābhacorāste  
9.30ab: adhikaraṇāmbudhimadhye jvalanti vaḍavāgnayaḥ satatabhakṣāḥ  
9.30cd: janadhanaghanamanaso ye bhaṭṭākhyā nyāyacorāste  
9.31ab: vibhavāmbhoruhamadhupā duḥsahavipadanilavegavimukhā ye  
9.31cd: suhṛdaste sukhacaurāḥ caranti lakṣmīlatāhūtāḥ  
9.32ab: yadyat kiṃcirapūrvaṃ paricaritaṃ kalpanādasaṃbaddham  
9.32cd: varṇayati harṣakārī bahuvacanaḥ karṇacauro.asau  
9.33ab: doṣeṣu guṇastutibhiḥ śraddhāmutpādya caturavacanā ye  
9.33cd: kurvantyabhinavasṛṣṭiṃ sthiticaurāste nirācārāḥ  
9.34ab: ātmaguṇakhyātiparāḥ paraguṇamācchādya vipulayatnena  
9.34cd: prabhavanti paramadhūrtā guṇacaurāste vimūḍhahṛdayeṣu  
9.35ab: vallabhatāmupayātāḥ paravāllabhyaṃ vicitrapaiśunyaiḥ  
9.35cd: ye nāśayanti dhūrtā mātsaryārvṛtticaurāste  
9.36ab: śamadamabhaktivihīnas tīvravratadurgrahagrastaḥ  
9.36cd: abhibhavati pratipattyā sādhujanaṃ kīrticauro.asau  
9.37ab: deśāntarasaṃbhavibhiḥ bhogavarairvarṇanāramyaiḥ  
9.37cd: ye.api nayanti videśaṃ paśusadṛśārdeśacaurāste  
9.38ab: nānāhāsavikāraiḥ bahuvaidagdhyaiḥ sanamavaicirtyaḥ  
9.38cd: ramayati divasamaśeṣaṃ prakṛtivyāpāracauro.a sau  
9.39ab: bhakṣaitanijabahuvibhavāḥ paravibhavakṣapaṇadīkṣaitāḥ paścāt  
9.39cd: aniśaṃ veśyāveśastutimukharamukhā viṭāś cintyāḥ  
9.40ab: atiśucitayā na vittaṃ gṛhṇāti karoti cāgryamadhikāram
9.40cd: yo niyamasalilamatsyaḥ parihāryo niḥspṛhaniyogī
9.41ab: rathyāvaṇijaḥ pāpāḥ svayametya gṛheṣu yatprayacchanti
9.41cd: tatsvakarārpitamakhilaṃ bhavati paraṃ kācaśakalamapi
9.42ab: chandānuvartino ye śvabhrāpāte.api sādhuvādaparāḥ
9.42cd: sarvasvahāriṇaste madhurā viṣavdviśantyantaḥ
9.43ab: tava narapatiḥ prasādī guṇagaṇanaparaḥ paraṃ vijane
9.43cd: uktveti rājadāsaiḥ sevakalokaḥ sadā muṣitaḥ
9.44ab: svapne mayābjahastā dṛṣṭā śrīstvadgṛhaṃ praviṣṭā sā 
9.44cd: māsopaviṣṭatuṣṭā devī śrīḥ sādarā prāha
9.45ab: madbhaktaste dāsyati sarvaṃ tattvaṃ mayā labdhaḥ
9.45cd: ityuktvā saralāṇāṃ vilasanti gṛhe gṛhe dhūrtāḥ
9.46ab: puraviplavanagarodayayajñavivāhotsavādijanasaṃghe
9.46cd: praviśanti bandhuveṣāḥ pare.api sarvāpahārāya
9.47ab: parijanapānāvasare pibati na madyaṃ niśāsu jāgarti
9.47cd: dhyānaparaḥ sevārthī kimapi ca kartuṃ kṛtodyogaḥ
9.48ab: na dadāti prativacanaṃ dadāti vā gadgadākṣarairviṣamam
9.48cd: naṣṭamukhaḥ socchvāsaḥ pravepate tatkṣaṇaṃ coraḥ
9.49ab: yaścādhikapariśuddhiṃ prārthayate raṭati yaśca sāṭopah
9.49cd: ghorāpahnavakārī śaṅkāyatanaṃ sa pāpaḥ syāt %9.49
9.50ab: pratyakṣe.api parokṣe kṛtamakṛtaṃ kathitamapyanuktaṃ ca
9.50cd: yaḥ kurute nirvikṛtiḥ sa paraṃ puṃsāṃ bhayasthānam
9.51ab: kṛtakṛtakamugdhabhāvaḥ ṣaṇḍha iva strīsvabhāvasaṃlāpaḥ
9.51cd: vicarati yaḥ strīmadhye sa kāmadevo gṛhe dhūrtaḥ
9.52ab: satatamadhomukhadṛṣṭiḥ koṣagṛhe mūṣakaścintyaḥ
9.52cd: vilikhankoṣaniyuktaḥ koṣagṛhe mūṣakaścintyaḥ
9.53ab: tiṣṭhati yaḥ sakaladinaṃ gṛhadāsaḥ prītaveśmabhavaneṣu
9.53cd: gṛhadīrghakathāḥ kathayansa caraḥ sarvātmanā tyājyaḥ
9.54ab: nindye bahudaṇḍārhe karmaṇi yaḥ sarvathā pratārayati
9.54cd: ājīvabhītibhojyastena nibaddhaḥ sthiro rāśih %9.54
9.55ab: dṛṣṭvā guhyamaśeṣaṃ tasya rahasyaṃ ca līlayā labdhvā
9.55cd: dhūrtena mugdhlokastena śilāpaṭṭake likhitaḥ
9.56ab: rājaviruddhaṃ dravyaṃ rūpaṃ vā kūṭalekhyamanyadvā
9.56cd: niḥkṣipya yātyalakṣyaṃ dhūrto dhanināṃ vināśāya %9.56
9.57ab: kṣudraḥ kṣīno.api gṛhe labdhāsvādaḥ kṛto dhanairyena
9.57cd: śastraviṣapāśahastaḥ sa pāśahasto dhṛtastena
9.58ab: lajjādhanaḥ kulīnaḥ saṃbhāvitaśuddhaśīlamaryādah
9.58cd: nārīkriyate dhūrtaiḥ prāyeṇa sagarbhanārībhiḥ
9.59ab: dṛṣṭābhiradṛṣṭābhiḥ krūrābhiḥ kṛtakavacanamudrābhiḥ
9.59cd: dhūrto muṣṇāti vadhūṃ mugdhāṃ viproṣite patyau
9.60ab: sajane.api sādhuveṣā vidhṛtābharaṇāśca helayā dhūrtāḥ
9.60cd: dhīrā haranti sakalaṃ dṛṣṭe hāso.anyathā lābhaḥ
9.61ab: deśe kṛtvā sphīte kumbhadhano ḍambarairgṛhaṃ pūrṇam
9.61cd: niḥkṣepalakṣahārī varṣeṇa palāyate dhūrtaḥ %9.61
9.62ab: śucitarakanakavibhūṣaṇatanuvastrāḥ saṃbhrameṇa pūjyante
9.62cd: ripubhagnarājaputravyājena gṛhe gṛhe dhūrtāḥ
9.63ab: ādāya devavṛṣabhaṃ puṇyaṃ chāgaṃ dhūrtavikrītaṃ
9.63cd: mugdhasya duḥkhapākaḥ samarghalābhodito harṣaḥ 
9.64ab: sādhikṣepatyāgo mahatāṃ saṃpatsu yaḥ kṛtāsūyaḥ 
9.64cd: tasmai bhayena vittaṃ rikto .api dadāti yatnena
9.65ab: niḥsārabhūrjasāraiḥ kṛtvā yuktaṃ mahāsārtham
9.65cd: dhūrto diśi diśi viṃcarandhanikasahasrāṇi muṣṇāti
9.66ab: dhūrto vasanvideśeṣūddiśya surāpagāgayāyātrām 
9.66cd: mṛtabandhūnāmārthe draviṇaṃ gṛhṇāti mugdhebhyaḥ
9.67ab: muṣṇāti sārtharamaṇī śāṭīmādāya nidrayā mugdhān
9.67cd: dhūrtena kūṭarūpaṃ dattvā niśi vañcyate sāpi %9.67
9.68ab: badhiraṃ vā mūkaṃ vā vaṇijaṃ niḥkṣipya bhāṇḍaśālāyām
9.68cd: dhūrto nayati tvarayā bahumūlyaṃ varṇakadravyam
9.69ab: kiṃcitparicayamātraiḥ kiṃciddhārṣṭyaiḥ sakalpanaiḥ kiṃcit
9.69cd: kiṃcidvivādakalahaiḥ sarvajño vañcakaś carati 
9.70ab: mithyāḍambaradhanikaḥ pustakavidvānkathājñānī
9.70cd: varṇanaśūraścapalaḥ caturmukho jṛmbhate dhūrtaḥ 
9.71ab: sarvāvayavavidhūnanakṛtasaṃketān visṛjya geheṣu
9.71cd: bhoktuṃ vrajati digantānsvecchācārī mahādhūrtaḥ 
9.72ab: śatavārṣikamāmalakaṃ bhuktvā śrīparvatādahaṃ prāptaḥ
9.72cd: dhūrto vadati gurūṇāṃ purataḥ śakunaṃ smarāmīti %9.72
9.73ab: etā leśena mayā kathitā māyāścatuḥṣaṣṭiḥ 
9.73cd: ko veda vañcakānāṃ māyānāṃ śatasahasrāṇi 

iti mahākaviśrīkṣemendraviracite kalāvilāse nānādhūrtavarṇanaṃ nāma navamaḥ sargaḥ

%daśamaḥ sargaḥ

10.1ab: etā vañcakamāyā vijñeyā na tu punaḥ svayaṃ sevyāḥ
10.1cd: dharmyaḥ kalākalāpo viduṣāmayam īpsito bhūtyaiḥ 
10.2ab: dharmasya kalā jyeṣṭhā bhūtadayākhyā paropakāraśca 
10.2cd: dānaṃ kṣamānasūyā satyamalobhaḥ prasādaśca
10.3ab: arthasya sadotthānaṃ niyamaparīpālanaṃ kriyājñānam
10.3cd: sthānatyāgaḥ paṭutānudvegaḥ strīṣvaviśvāsaḥ
10.4ab: kāmasya veṣaśobhā peśalatā cārutā guṇotkarṣaḥ
10.4cd: nānāvidhāśca līlāścittajñānaṃ ca kāntānām
10.5ab: mokṣasya vivekaratiḥ praśamastṛṣṇākṣayaśca saṃtoṣaḥ
10.5cd: saṅgatyāgaḥ svalayasthānaṃ pramaprakāśaśca 
10.6ab: etāścatuṣṭayakalā dvātriṃśatkramadhṛtāḥ samastā vā
10.6cd: saṃsāravañcakānāṃ vidyā vidyāvatāmeva
10.7ab: mātsaryasya tyāgaḥ priyavāditvaṃ sadhairyamakrodhaḥ
10.7cd: vairāgyaṃ ca parārthe sukhasya siddhāḥ kalāḥ pañca 
10.8ab: satsaṅgaḥ kāmajayaḥ śaucaṃ gurusaṃvena sadācāraḥ
10.8cd: śrutamamalaṃ yaśasi ratirmūlakalāḥ sapta śīlasya
10.9ab: tejaḥ sattvaṃ buddhir vyavasāyo nītiriṅgitajñānam
10.9cd: prāgalbhyaṃ susahāyaḥ kṛtajñatā mantrarakṣaṇaṃ tyāgaḥ 
10.10ab: anurāgaḥ pratipattirmitrārjanamānṛśaṃsyamastambhaḥ
10.10cd: āśritajanavātsalyaṃ saptadaśakalāḥ prabhāvasya 
10.11ab: maunamalaulyamayācñā mānasya ca jīvitaṃ kalātritayam
10.11cd: etāḥ kalā vidagdhaiḥ svagatāḥ kāryāścatuḥṣaṣṭiḥ 
10.12ab: śaktavirodhe gamanaṃ tatpraṇatirvā balodaye vairam
10.12cd: ārtasya dharmacaryā duḥkhe dhairyaṃ sukheṣvanutsekaḥ %10.12
10.13ab: vibhaveṣu saṃvibhāgaḥ satsu ratirmantrasaṃśaye prajñā
10.13cd: nindyeṣu parāṅmukhatā bheṣajametatkalādaśakam
10.14ab: guruvacanaṃ satyānāṃ kāryāṇāṃ godvijātisurapūjā
10.14cd: lobhaḥ pāpatamānāṃ krodhaḥ sarvopatāpajanakānām
10.15ab: prājña sarvaguṇānāṃ yaśasvitā vipulavittavibhāvānām
10.15cd: sevā duḥkhatamānāmāśā pṛthukālabhujagapāśānām %10.15
10.16ab: dānaṃ ratnanidhīnāṃ nirvairatvaṃ sukhapradeśānām
10.16cd: yācñā mānaharāṇāṃ dāridryaṃ copatāpasārthānām
10.17ab: dharmaḥ patheyānāṃ satyaṃ mukhapadmapāvanakarāṇām
10.17cd: vyasanaṃ rogagaṇānām ālasyaṃ gṛhasamṛddhināśānām
10.18ab: niḥspṛhatā ślāghyānāṃ priyavacanaṃ sarvamadhurāṇām
10.18cd: darpastimirakarāṇāṃ dambhaḥ sarvopahāsapātrāṇām
10.19ab: adrohaḥ śaucānām acāpalaṃ vrataviśeṣaniyamānām
10.19cd: paiśunyamapriyāṇāṃ vṛtticchedo nṛśamsacaritānām
10.20ab: kāruṇyaṃ puṇyānāṃ kṛtajñatā puruṣacihnānām
10.20cd: māyā mohamatīnāṃ kṛtaghnatā narakapātahetūnām
10.21ab: madanaścalacaurāṇāṃ strīvacanaṃ jñātibhedānām
10.21cd: krūraścaṇḍālānāṃ māyāvī kaliyugāvatārāṇām
10.22ab: śāstraṃ maṇidīpānām upadeśaścābhiṣekāṇām
10.22cd: vṛddhatvaṃ kleśānāṃ rogitvaṃ maraṇatulyaduḥkhānām
10.23ab: sneho viṣamaviṣāṇāṃ veśyārāgo visarpakuṣṭhānām
10.23cd: bhāryā gṛhasārāṇāṃ putraḥ paralokabandhūnām
10.24ab: śātruḥ śalyaśatānāṃ duṣputraḥ kulavināśānām
10.24cd: tāruṇyaṃ ramaṇīnāṃ rūpaṃ ruciropacāraveṣāṇām
10.25ab: saṃtoṣo rājyānāṃ satsaṅgaścakravartivibhāvānām
10.25cd: cintā śoṣakarāṇāṃ vidveṣaḥ koṭarāgnidāhānām
10.26ab: maitrī visrambhānāṃ niryantraṇatā mahārhabhogānām
10.26cd: saṃkoco vyādhīnāṃ kauṭilyaṃ nirjalāndhakūpānām
10.27ab: ārjavamamalakarāṇāṃ vinayo vararatnamukuṭānām
10.27cd: dyūtaṃ durvyasanānāṃ strījitatā marutaṭīpiśācānām
10.28ab: tyāgo maṇivalayānāṃ śrutamujjvalakarṇaratnānām
10.28cd: khalamaitrī capalānāṃ durjanasevā vṛthāprayāsānām %10.28
10.29ab: nirvṛtirudyānānāṃ priyadarśanamamṛtavarṣāṇām
10.29cd: tattvaratirlabhyānāṃ mūrkhasabhā sadvivekanāśānām
10.30ab: kulajaḥ saphalatarūṇāṃ saubhāgyaṃ kṛtayugāvatārāṇām
10.30cd: rājakulaṃ śaṅkyānāṃ strīhṛdayaṃ prakṛtikuṭilānām
10.31ab: aucityaṃ stutyānāṃ guṇarāgaścandanādilepānām
10.31cd: kanyā śokakarāṇāṃ buddhivihīno .anukampyānām
10.32ab: vibhavaḥ saubhāgyānāṃ janarāgaḥ kīrtikandānām
10.32cd: madyaṃ vetālānām mṛgayā gajagahanayakṣāṇām
10.33ab: praśamaḥ svāsthyakarāṇām ātmaratistīrthasevānām
10.33cd: lubdhaḥ phalarahitānām ācāravivarjitaḥ śmaśānānām
10.34ab: nītiḥ strīrakṣaṇānām indriyavijayaḥ prabhāvāṇām
10.34cd: īrṣyā yakṣmaśatānām ayaśaḥ kusthamaraṇānām
10.35ab: mātā maṅgalyānāṃ janakaḥ sukṛtotsavopadeśānām
10.35cd: ghātastīkṣṇatarāṇāṃ chedastīkṣṇāsiśastrāṇām
10.36ab: praṇatirmanyuharāṇāṃ sauhārdaṃ kṛcchrayācñānām
10.36cd: mānaḥ puṣṭikarāṇāṃ kīrtiḥ saṃsārasārāṇām
10.37ab: prabhubhaktirnītānāṃ yudhi nidhanaṃ saukhyavīthīnām
10.37cd: vinayaḥ kalyāṇānāmutsāhaḥ sarvasiddhīnām
10.38ab: puṇyaṃ prāpyatamānāṃ jñānaṃ paramaprakāśānām
10.38cd: kīrtiḥ samsāre.asmin sāratarā sarvalokānām
10.39ab: jñeyaḥ kalākalāpe kuśalaḥ sarvārthatattvavijñānī
10.39cd: pravarataro loke.asmin brāhmaṇa iva sarvavarṇānām
10.40ab: ityuktaṃ śatametad yo vetti śubhāśubhodayakalānām
10.40cd: tasyaiva vyavahāre dṛṣṭā dṛṣṭaprayojanā lakṣmīḥ
10.41ab: uktveti mūladevo visṛjya śiṣyānkṛtocitācāraḥ 
10.41cd: kiraṇakalikāvikāsāṃ nināya nijamandire rajanīm
10.42ab: kelīmayaḥ smitavilāsakalābhirāmaḥ sarvāśrayāntarakalāprakaṭapradīpaḥ
10.42cd: lokopadeśaviṣayaḥ sukathāvicitro bhūyātsatāṃ dayita eṣa kalāvilāsaḥ
10.43ab: kalāvilāsaḥ kṣemendrapratibhāmbhodhinirgataḥ
10.43cd: śaśīva mānasānandaṃ karotu satataṃ satām

iti mahākaviśrīkṣemendraviracite kalāvilāse sakalakalānirūpaṇaṃ nāma daśamaḥ sargaḥ