% Kāvyādarśa of Daṇḍin
% ed. Rangacharya Raddi Shastri
% BORI, Gov. Or. Ser. A.4, Poona 1938.
% typed in by Somadeva Vasudeva

ācāryadaṇḍinaḥ kāvyādarśaḥ

1.1ab: caturmukhamukhāmbhojavanahaṃsavadhūr mama 
1.1cd: manase ramatāṃ nityaṃ  sarvaśuklā sarasvatī
1.2ab: pūrvaśāstrāṇi saṃhṛtya  prayogān upalakṣya ca
1.2cd: yathāsāmarthyam asmābhiḥ kriyate kāvyalakṣaṇam
1.3ab: iha śiṣṭānuśiṣṭānāṃ śiṣṭānām api sarvathā
1.3cd: vācām eva prasādena lokayātrā pravartate
1.4ab: idam andhatamaḥ kṛtsnaṃ jāyeta bhuvanatrayam
1.4cd: yadi śabdāhavayaṃ jyotir āsaṃsārān na dīpyate 
1.5ab: ādirājayaśobimbam ādarśaṃ prāpya vāṅmayam
1.5cd: teṣām asaṃnidhāne .api na svayaṃ paśya naśyati
1.6ab: gaur gauḥ kāmadughā samyak prayuktā smaryate budhaiḥ
1.6cd: duṣprayuktā punār gotvaṃ prayoktuḥ saiva śaṃsati
1.7ab: tad alpam api nopekṣyaṃ kāvye duṣṭaṃ kathaṃ cana
1.7cd: syād vapuḥ sundaram api śvitreṇaikena durbhagam
1.8ab: guṇadoṣān aśāstrajñaḥ kathaṃ vibhajate janaḥ
1.8cd: kim andhasyādhikāro .asti rūpabhedopalabdhiṣu
1.9ab: ataḥ prajānāṃ (vl. padānāṃ) vyutpattim abhisaṃdhāya sūrayaḥ
1.9cd: vācāṃ vicitramārgāṇāṃ nibabandhuḥ kriyāvidhiṃ
1.10ab: taiḥ śarīraṃ ca kāvyānām alaṃkārāś ca darśitāḥ
1.10cd: śarīraṃ tāvad iṣṭārthavyavacchinnā padāvalī
1.11ab: padyaṃ gadyaṃ ca miśraṃ ca tat tridhaiva vyavasthitam
1.11cd: padyaṃ catuṣpadī tac ca vṛttaṃ jātir iti dvidhā
1.12ab: chandovicityāṃ sakalas taprapañco nidarśitaḥ
1.12cd: sā vidyā naur vivikṣūṇāṃ gambhīraṃ kāvyasāgaram
1.13ab: muktakaṃ kulakaṃ koṣaḥ saṃghāta iti tādṛśaḥ 
1.13cd: sargabandhāṃśarūpatvād anuktaḥ padyavistaraḥ
1.14ab: sargabandho mahākavyam ucyate tasya lakṣaṇam
1.14cd: āśīrnamaskriyā vastunirdeśo vāpi tanmukham
1.15ab: itihāsakathodbhūtam itarad vā sadāśrayam
1.15cd: caturvargaphalāyattaṃ caturudāttanāyakam
1.16ab: nagarārṇavaśailārtucandrārkodayavarṇanaiḥ
1.16cd: udyānasalilakṛīḍāmadhupānaratotsavaiḥ
1.17ab: vipralambhair vivāhaiś ca kumārodayavarṇanaiḥ
1.17cd: mantradūtaprayāṇājināyakābhyudayair api
1.18ab: alaṃkṛtam asaṃkṣiptaṃ rasabhāvanirantaram
1.18cd: sargair anativistīrṇaiḥ śravyavṛttaiḥ susaṃdhibhiḥ
1.19ab: sarvatra bhinnavṛttāntair upetaṃ lokarañjanam
1.19cd: kāvyaṃ kalpāntarasthāyi jāyate sad alaṃkṛti
1.20ab: nyūnam apy atra yaiḥ kaiś cid aṅgaiḥ kāvyaṃ na duṣyati
1.20cd: yady upātteṣu saṃpattir ārādhayati tadvidhaḥ
1.21ab: guṇataḥ prāg upanyasya nāyakaṃ tena vidviṣām
1.21cd: nirākaraṇam ity eṣa mārgaḥ prakṛtisundaraḥ
1.22ab: vaṃśavīryaśrutādīni varṇayitvā ripor api
1.22cd: tajjayān nāyakotkarṣakathanaṃ ca dhinoti naḥ
1.23ab: apādaḥ padasaṃtāno gadyam ākhyāyikā kathā
1.23cd: iti tasya prabhedau dvau tayor ākhyāyikā kila
1.24ab: nāyakenaiva vācyānyā nāyakenetareṇa vā
1.24cd: svaguṇāviṣkriyādoṣo nātrā bhūrtārthaśaṃsinaḥ
1.25ab: api tv aniyamo dṛṣṭas tatrāpy anyair udīraṇāt
1.25cd: anyo vaktā svayaṃ veti kīdṛg vā  bhedakāraṇam (vl. #lakṣaṇam)
1.26ab: vaktraṃ cāparavaktraṃ ca socchvāsatvaṃ  ca bhedakam
1.26cd: cihnam ākhyāyikāyāś cet prasaṅgena kathāsv api
1.27ab: āryādivat praveśaḥ kiṃ na vaktrāparavaktrayoḥ
1.27cd: bhedaśÂ ca dṛṣṭo lambhādir ucchvāso vastu kiṃ tataḥ
1.28ab: tat kathākhyāyiketyuktā jātiḥ saṃjñādvayāṅkitā
1.28cd: atraivāntarbhaviṣyanti śeṣāś cākhyānajātayaḥ
1.29ab: kanyāharaṇasaṃgrāmavipralambhodayādayaḥ
1.29cd: sargabandhasamā eva naite vaiśeṣikā guṇāḥ
1.30ab: kavibhāvakṛtaṃ cihnam anyatrāpi na duṣyati
1.30cd: mukham iṣṭāsrthasaṃsiddhau kiṃ hi na syāt kṛtātmanām
1.31ab: miśrāṇi nāṭakādīni teṣām anyatra vistaraḥ
1.31cd: gadyapadyamayī kā cic campūr ity abhidhīyate
1.32ab: tad etad vāṅmayaṃ bhūyaḥ saṃskṛtaṃ prākṛtaṃ tathā
1.32cd: apabhraṃśāś ca miśraṃ cety āhur āryāś caturvidhaṃ
1.33ab: saṃskṛtaṃ nāma daivī vāg anvākhyātā maharṣibhiḥ
1.33cd: tadbhavas tatsamo deśīty anekaḥ prākṛtakramaḥ
1.34ab: mahārāṣṭrāśrayāṃ bhāṣāṃ prakṛṣṭaṃ prākṛtaṃ viduḥ
1.34cd: sāgaraḥ sūktiratnānāṃ setubandhādi yanmayaṃ
1.35ab: śaurasenī ca gauḍī ca lāṭī cānyā ca tādṛśī 
1.35cd: yāti prākṛtam ity evaṃ  vyavahāreṣu saṃnidhim
1.36ab: ābhīrādigiraḥ kāvyeṣv apabhraṃśa iti smṛtāḥ
1.36cd: śāstreṣu saṃskṛtād anyad apabhraṃśatayoditam
1.37ab: saṃskṛtaṃ sargabandhādi prākṛtaṃ skandhakādi yat
1.37cd: osarādir apabhraṃśo nāṭakādi tu miśrakam
1.38ab: kathā hi sarvabhāṣābhiḥ saṃskṛtena ca badhyate
1.38cd: bhūtabhāṣāmayīṃ prāhur adbhutārthāṃ bṛhatkathām
1.39ab: lāsyacchalitaśampādi prekṣārtham itarat punaḥ
1.39cd: śravyam eveti saiṣāpi dvayī gatir udāhṛtā
1.40ab: asty aneko girāṃ mārgaḥ sūkṣmabhedaḥ parasparam
1.40cd: tatra vaidarbhagauḍīyau varṇyete prasphuṭāntarau
1.41ab: śleṣaḥ prasādaḥ samatā mādhuryaṃ sukumāratā
1.41cd: arthavyaktir udāratvam ojaḥkāntisamādhayaḥ
1.42ab: iti vaidarbhamārgasya prāṇā daśa guṇāḥ smṛtāḥ
1.42cd: eṣāṃ viparyayaḥ prāyo dṛśyate gauḍavartmani
1.43ab: śliṣṭam aspṛṣṭaśaithilyam alpaprāṇākṣarottaram
1.43cd: śithilaṃ mālatīmālā lolālikalilā yathā
1.44ab: anuprāsadhiyā gauḍais tad iṣṭaṃ bandhagauravāt
1.44cd: vaidarbhamālatīdāma laṅghitaṃ bhramarair iti
1.45ab: prasādavat prasiddhārtham indor indīvaradyuti
1.45cd: lakṣma lakṣmīṃ tanotīti pratītisubhagaṃ vacaḥ
1.46ab: vyutpannam iti gauḍīyair nātirūḍham apīṣyate 
1.46cd: yathānatyarjunābjanmasadṛkṣāṅko valakṣaguḥ
1.47ab: samaṃ bandheṣv aviṣamaṃ te mṛdusphuṭamadhyamāḥ
1.47cd: bandhā mṛdusphuṭonmiśravarṇavinyāsayonayaḥ
1.48ab: kokilālāpavācālo mamaiti malayānilaḥ
1.48cd: ucchalacchīkarācchācchanirjharāmbhaḥkaṇokṣitaḥ
1.49ab: candanapraṇayodgandhir mando malayamārutaḥ
1.49cd: spardhate ruddhamaddhairyo  vararāmāmukhānilaiḥ
1.50ab: ity anālocya vaiṣamyam arthālaṃkāraḍamabarau
1.50cd: avekṣamāṇā vavṛdhe paurastyā kāvyapaddhatiḥ
1.51ab: madhuraṃ rasavad vāci vastuny api rasasthitiḥ
1.51cd: yena mādyanti dhīmanto madhuneva madhuvratāḥ
1.52ab: yayā kayā cic chrutyā yat samānam anubhūyate
1.52cd: tadrūpā hi padāsattiḥ sānuprāsā rasāvahā
1.53ab: eṣa rājā yadā lakṣmīṃ prāptavān brāhmaṇapriyaḥ
1.53cd: tadā prabhṛti dharmasya loke .asminn utsavo .abhavat
1.54ab: itīdaṃ nādṛtaṃ gauḍair anuprāsas tu tatpriyaḥ
1.54cd: anuprāsād api prāyo vaidarbhair idam īpsitam
1.55ab: varṇāvṛttir anuprāsaḥ pādeṣu ca padeṣu ca
1.55cd: pūrvānubhavasaṃskārabodhinī yady adūratā
1.56ab: candre śaranniśottaṃse kundastabakavibhrame
1.56cd: indranīlanibhaṃ lakṣma saṃdadhāty alinaḥ śriyam
1.57ab: cāru cāndramasaṃ bhīru bimbaṃ paśyaitad ambare
1.57cd: manmano manmathākrāntaṃ nirdayaṃ hantum udyataṃ
1.58ab: ity anuprāsam icchanti  nātidūrāntaraśrutim
1.58cd: na tu rāmāmukhāmbhojasadṛśaś candramā iti
1.59ab: smaraḥ kharaḥ khalaḥ kāntaḥ kāyaḥ kopaś ca naḥ kṛśaḥ
1.59cd: cyuto mānodhiko rāgo  moho jātosavo gatāḥ
1.60ab: ityādi bandhapāruṣyaṃ śaithilyaṃ ca niyacchati
1.60cd: ato naivam anuprāsaṃ dākṣiṇātyāḥ prayuñjate 
1.61ab: āvṛttiṃ varṇasaṃghātagocarāṃ yamakaṃ viduḥ
1.61cd: tat tu naikāntamadhuramataḥ paścād vidhāsyate
1.62ab: kāmaṃ sarvo .apy alaṃkāro rasam arthe niṣiñcati
1.62cd: tathāpy agrāmyataivainaṃ bhāraṃ vahati bhūyasā
1.63ab: kanye kāmayamānaṃ māṃ na tvaṃ kāmayase katham
1.63cd: iti grāmyo .ayam arthātmā vairasyāya prakalpate
1.64ab: kāmaṃ kandarpacāṇḍālo mayi vāmākṣi nirdayaḥ
1.64cd: tvayi nirmatsaro diṣṭyety agrāmo .artho rasāvahaḥ
1.65ab: śabde .api grāmyatāsty eva sā sabhyetarakīrtanāt
1.65cd: yathā yakārādipadaṃ  ratyutsavanirūpaṇe
1.66ab: padasaṃdhānavṛttyā vā vākyārthatvena vā punaḥ
1.66cd: duṣpratītikaraṃ grāmyaṃ yathā yā bhavataḥ priyā
1.67ab: kharaṃ prahatya viśrāntaḥ puruṣo vīryavān iti
1.67cd: evamādi na śaṃsanti mārgayor ubhayor api
1.68ab: bhaginībhagavatyādi sarvatraivānumanyate
1.68cd: vibhaktam iti mādhuryam ucyate sukumāratā
1.69ab: aniṣṭhurākṣaraprāyaṃ sukumāram iheṣyate 
1.69cd: bandhaśaithilyadoṣo .api darśitaḥ sarvakomale
1.70ab: maṇḍalīkṛtya barhāṇi kaṇṭhair madhuragītibhiḥ
1.70cd: kalāpinaḥ pranṛtyanti kāle jīmūtamālini
1.71ab: ity anūrjita evārtho nālaṃkāro .api tādṛśaḥ
1.71cd: sukumāratayaivaitad ārohati satāṃ manaḥ
1.72ab: dīptam ity aparair bhūmnā kṛcchrodyam api badhyate
1.72cd: nyakṣeṇa kṣapitaḥ pakṣaḥ kṣatriyāṇāṃ kṣaṇād iti
1.73ab: arthavyaktir aneyatvam arthasya hariṇoddhṛtā
1.73cd: bhūḥ khurakṣuṇṇanāgāsṛglohitād udadher iti
1.74ab: mahī mahāvarāheṇa lohitād uddhṛtodadheḥ
1.74cd: itīyaty eva nirdiṣṭe neyatvam uragāsṛjaḥ 
1.75ab: nedṛśaṃ bahu manyatne mārgayor ubhayor api
1.75cd: na hi pratītiḥ subhagā śabdanyāyavilaṅghinī
1.76ab: utkarṣavān guṇaḥ kaś cid  yasminn ukte pratīyate
1.76cd: tadudārāhvayaṃ tena sanāthā kāvyapaddhatiḥ
1.77ab: arthiṇāṃ kṛpaṇā dṛṣṭis tvanmukhe patitā sakṛt
1.77cd: tadavasthā punar deva  nānyasya mukham īkṣate
1.78ab: iti tyāgasya vākye .asminn utkarṣaḥ sādhu lakṣyate
1.78cd: anenaiva pathānyac ca samānanyāyam ūhyatām
1.79ab: ślāghyair viśeṣaṇair yuktam udāraṃ kaiś cid iṣyate
1.79cd: yathā līlāmbujakrīḍāsarohemāṅgadādayaḥ
1.80ab: ojaḥ samāsabhūyastvam etad gadyasya jīvitam
1.80cd: padye .apy adakṣiṇātyānām idam ekaṃ parāyaṇam
1.81ab: tadgurūṇāṃ laghūnāṃ ca bāhulyālpatvamiśraṇaiḥ
1.81cd: uccāvacaprakāraṃ tad dṛśyam ākhyāyikādiṣu
1.82ab: astamastakaparyastasamastārkāṃśusaṃstarā
1.82cd: pīnastanasthitātāṃrakamravastreva vāruṇī
1.83ab: iti padye .api paurastyā badhnanty ojasvinīgiraḥ
1.83cd: anye tv anākulaṃ hṛdyam icchanty ojo girāṃ yathā
1.84ab: payodharataṭotsaṅgalagnasaṃdhyātapāṃśukā
1.84cd: kasya kāmāturaṃ ceto vāruṇī na kariṣyati 
1.85ab: kāntaṃ sarvajagatkāntaṃ laukikārthān atikramāt
1.85cd: tac ca vārtābhidhāneṣu varṇanāsv api dṛśyate
1.86ab: gṛhāṇi nāma tāny eva taporāśir bhavādṛśaḥ
1.86cd: saṃbhāvayati yāny eva pāvanaiḥ pādapāṃsubhiḥ
1.87ab: anayor anavadyāṅgi stanayor jṛmbhamāṇayoḥ
1.87cd: avakāśo na paryāptas tava bāhulatāntare 
1.88ab: iti sambhāvyam evaitad viśeṣākhyānasaṃskṛtam
1.88cd: kāntaṃ bhavati sarvasya lokayātrānuvartinaḥ
1.89ab: lokātīta ivātyartham adhyāropya vivakṣitaḥ
1.89cd: yo .arthas tenātituṣyanti vidagdhā netare janāḥ
1.90ab: devādhiṣṇyam ivārādhyam adyaprabhṛti no gṛham
1.90cd: yuṣmatpādarajaḥpātadhautaniḥśeṣakilbiṣam
1.91ab: alpaṃ nirmitam ākāśam anālocyaiva vedhasā 
1.91cd: idam evaṃvidhiṃ bhāvi bhavatyāḥ stanajṛmbhaṇam
1.92ab: idam atyuktir ity uktam etad gauḍopalālitam
1.92cd: prasthānaṃ prākpraṇītaṃ tu sāram anyasya vartmanaḥ
1.93ab: anyadharmas tato .anyatra lokasīmānurodhinā
1.93cd: samyag ādhīyate yatra sa samādhiḥ smṛto yathā
1.94ab:  kumudāni nimīlanti kamalāny unmiṣanti ca 
1.94cd:  iti netrakriyādhyāsāl labdhā tadvācinī śrutiḥ
1.95ab:  niṣṭḥyūtodgīrṇavāntādi gauṇavṛttivyapāśrayam
1.95cd:  atisundaram anyatra grāmyakakṣāṃ vigāhate
1.96ab:  padmāny arkāṃśuniṣṭhyūtāḥ pītvā pāvakavipruṣaḥ
1.96cd:  bhūyo vamantīva mukhair  udgīrṇāruṇareṇubhiḥ 
1.97ab:  iti hṛdamahṛdyaṃ tu niṣṭhīvati vadhūr iti 
1.97cd:  yugapan naikadharmāṇām adhyāsaś ca smṛto yathā
1.98ab:  gurugarbhabharaklāntāḥ stanantyo meghapaṅktayaḥ
1.98cd:  acalādhityakotsaṅgam imāḥ  samadhiśerate
1.99ab:  utsaṅgaśayanaṃ sakhyāḥ stananaṃ gauravaṃ klamaḥ 
1.99cd:  itīme garbhiṇīdharmā bahavo .apy atra darśitāḥ
1.100ab:  tad etat kāvyasarvasvaṃ samādhir nāma yo guṇaḥ
1.100cd:  kavisārthaḥ samagro .api tam enam anugacchati
1.101ab:  iti mārgadvayaṃ bhinnaṃ tatsvarūpanirūpaṇāt
1.101cd:  tadbhedās tu na śakyante vaktuṃ pratikavisthitāḥ
1.102ab:  ikṣukṣīraguḍādīnāṃ  mādhuryasyāntaraṃ mahat
1.102cd:  tathāpi na tad ākhyātuṃ sarasvatyāpi śakyate
1.103ab:  naisargikī ca  pratibhā śrutaṃ ca bahunirmalam
1.103cd:  amandaś cābhiyogo .asyāḥ kāraṇaṃ kāvyasaṃpadaḥ
1.104ab:  na vidyate yady api pūrvavāsanāguṇānubandhi pratibhānam adbhutam
1.104cd:  śrutena yatnena ca  vāgupāsitā dhruvaṃ karoty eva kam apy anugraham
1.105ab:  tadastatandrair aniśaṃ sarasvatī śramād upāsyā khalu kīrtim īpsubhiḥ
1.105cd:  kṛśe  kavitve .api janāḥ kṛtaśramā vidagdhagoṣṭhīṣu vihartum īśate 

 ity ācāryadaṇḍinaḥ kṛtau kāvyādarśe  mārgavibhāgo nāma prathamaḥ paricchedaḥ  
 
 
2.1ab:  kāvyaśobhākārān dharmān alaṃkārān pracakṣate
2.1cd:  te cādyāpi vikalpyante kas tān kārtsnyena vakṣyati
2.2ab:  kiṃ tu bījaṃ vikalpānāṃ pūrvācāryaiḥ pradarśitam
2.2cd:  tad eva parisaṃskartum ayam asmatpariśramaḥ
2.3ab:  kāś cin mārgavibhāgārtham uktāḥ prāg apy alaṃkriyāḥ
2.3cd:  sādhāraṇam alaṃkārajātam anyat pradarśyate
2.4ab:  svabhāvākhyānam upamā rūpakaṃ dīpakāvṛttī
2.4cd:  ākṣepo .arthāntanyāso vyatireko vibhāvanā
2.5ab:  samāsātiśayotprekṣā hetuḥ sūkṣmo lavaḥ kramaḥ
2.5cd:  preyo rasavad ūrjasvi paryāyoktaṃ samāhitam
2.6ab:  udāttāpahnutiśleṣaviśeṣās tulyayogitā
2.6cd:  virodhāprastutastotre vyājastutinidarśane
2.7ab:  sahoktiḥ parivṛttyāśīḥ saṃkīrṇam atha bhāvikam
2.7cd:  iti vācām alaṃkārā darśitāḥ pūrvasūribhiḥ
2.8ab:  nānāvasthaṃ padārthānāṃ rūpaṃ sākṣād vivṛṇvatī
2.8cd:  svabhāvoktiś ca jātiś cetyādyā sālaṃkṛtir yathā
2.9ab:  tuṇḍair ātāmrakuṭilaiḥ pakṣair haritakomalaiḥ
2.9cd:  trivarṇarājibhiḥ kaṇṭhair ete mañjugiraḥ śukāḥ
2.10ab:  kalakvaṇitagarbheṇa kaṇṭhenāghūrṇitekṣaṇaḥ
2.10cd:  pārāvataḥ paribhramya riraṃsuś cumbati priyām
2.11ab:  badhnann aṅgeṣu romāñcaṃ kurvan manasi nirvṛtim
2.11cd:  netre cāmīlayann eṣa priyāsparśaḥ pravartate
2.12ab:  kaṇṭhekālaḥ karasthena kapālenenduśekharaḥ
2.12cd:  jaṭābhiḥ snigdhatāmrābhir āvir āsīd vṛṣadhvajaḥ
2.13ab:  jātikriyāguṇadravyasvabhāvākhyānam īdṛśam
2.13cd:  śāstreṣv asyaiva sāmrājyaṃ kāvyeṣv apy etad īpsitam
2.14ab:  yathākathaṃcit  sādṛśyaṃ  yatrodbhūtaṃ pratīyate
2.14cd:  upamā nāma tasyāḥ prapañcodayaṃ pradarśyate
2.15ab:  ambhoruham ivātāmraṃ mugdhe karatalaṃ tava
2.15cd:  iti dharmopamā sākṣāt tulyadharmapradarśanāt
2.16ab:  rājīvam iva te vaktraṃ netre nīlotpale iva 
2.16cd:  iyaṃ pratīyamānaikadharmā vastūpamaiva sā 
2.17ab:  tvadānanam ivonnidram aravindam abhūd iti
2.17cd:  sā prasiddhiviparyāsād viparyāsopameṣyate
2.18ab:  tavānanam ivāmbhojam ambhojam iva te mukham
2.18cd:  ity anyonyopamā seyam anyonyotkarṣaśaṃsinī
2.19ab:  tvanmukhaṃ kamalenaiva tulyaṃ nānyena kena cit
2.19cd:  ity anyasāmyavyāvṛtter iyaṃ sā niyamopamā
2.20ab:  padmaṃ tāvat tavānveti mukham anyac ca tādṛśam
2.20cd:  asti ced astu tatkārīty asāv aniyamopamā
2.21ab:  samuccayopamāpy asti na kāntyaiva mukhaṃ tava
2.21cd:  hlādanākhyena cānveti karmaṇendum itīdṛśī
2.22ab:  tvayy eva tvanmukhaṃ dṛṣṭaṃ dṛśyate divi candramāḥ
2.22cd:  iyaty eva bhidā nānyety asāv atiśayopamā
2.23ab:  mayy evāsyā mukahśrīr ity alam indor vikatthanaiḥ
2.23cd:  padme .api sā yad asty evety asāv utprekṣitopamā
2.24ab:  yadi kiṃ cid bhavet padmaṃ subhru vibhrāntalocanam
2.24cd:  tat te mukhaśriyaṃ dhattām ity asāv adbhutopamā
2.25ab:  śaśīty utprekṣya tanvaṅgi tvanmukhaṃ tvanmukhāśayā
2.25cd:  indum apy anudhāvāmīty eṣā mohopamā smṛtā
2.26ab:  kiṃ padmam antarbhrāntāli kiṃ te lolekṣaṇaṃ mukham
2.26cd:  mama dolāyate cittam itīyaṃ saṃśayopamā
2.27ab:  na padmasyendunigrāhyasyendulajjākarī dyutiḥ
2.27cd:  atas tvanmukham evedam ity asau nirṇayopamā
2.28ab:  śiśirāṃśupratspardhi śrīmat surabhigandhi ca
2.28cd:  ambhojam iva te vaktram iti śleṣopamā smṛtā
2.29ab:  sarūpaśabdavācyatvāt sā samānopamā yathā
2.29cd:  bālevodyānamāleyaṃ sālakānanaśobhinī
2.30ab:  padmaṃ bahurajaś candraḥ kṣayī tābhyāṃ tavānanam
2.30cd:  samānam api sotsekam iti nindopamā smṛtā
2.31ab:  brahmaṇo .apy udbhavaḥ padmaś candraḥ śaṃbhuśirodhṛtaḥ
2.31cd:  tau tulyau tvanmukheneti sā praśaṃsopamocyate 
2.32ab:  candreṇa tvanmukhaṃ tulyam ity ācikhyāsu me manaḥ
2.32cd:  sa guṇo vāstu doṣo vety ācikhyāsopamāṃ viduḥ 
2.33ab:  śatapatraṃ śaraccandras tvadānanam iti trayam
2.33cd:  parasparavirodhīti sā virodhopamā matā
2.34ab:  na jātu śaktir indos te  mukhena pratigarjitum
2.34cd:  kalaṅkino jaḍasyeti pratiṣedhopamaiva sā
2.35ab:  mṛgekṣaṇāṅkaṃ te vaktraṃ mṛgeṇaivāṅkitaḥ śaśī
2.35cd:  tathāpi sama evāsau notkarṣīti caṭūpamā
2.36ab:  na padmaṃ mukham evedaṃ na bhṛṅgau cakṣuṣī ime
2.36cd:  iti vispaṣṭasādṛśyāt tattvākhyānopamaiva sā
2.37ab:  candrāravindayoḥ kāntim atikramya mukhaṃ tava
2.37cd:  ātmanaivābhavat tulyam ity asādhāraṇopamā
2.38ab:  sarvapadmaprabhāsāraḥ samāhṛta iva kvacit
2.38cd:  tvadānanaṃ vibhātīti tām abhūtopamāṃ viduḥ
2.39ab:  candrabimbād iva viṣaṃ candanād iva pāvakaḥ
2.39cd:  paruṣā vāg ito vaktrād ity asaṃbhāvitopamā 
2.40ab:  candanodakacandrāṃśucandrakāntādiśītalaḥ
2.40cd:  sparśas tavety atiśayaṃ bodhayanti bahūpamā
2.41ab:  candrabimbād ivotkīrṇaṃ padmagarbhādivoddhṛtam
2.41cd:  tava tanvaṅgi vadanam ity asau vikriyopamā
2.42ab:  pūṣṇyātapa ivāhṇīva pūṣā vyomnīva vāsaraḥ
2.42cd:  vikramas tvayy adhāl lakṣmīm iti mālopamā matā
2.43ab:  vākyarthenaiva vākyārthaḥ ko .api yady upamīyate
2.43cd:  ekānekevaśabdatvāt sā vākyārthopamā dvidhā 
2.44ab:  tvadānanam adhīrākṣam āvir daśanadīdhitiḥ
2.44cd:  bhramadbhṛṅgam ivālakṣyakesaraṃ bhāti paṅkajam
2.45ab:  nalinyā iva tanvaṅgyās tasyāḥ padmam ivānanam
2.45cd:  mayā madhuvrateneva pāyaṃ pāyam aramyata
2.46ab:  vastu kiṃcid upanyasya nyasanāt tatsadharmaṇaḥ
2.46cd:  sāmyapratītir astīti prativastūpamā yathā
2.47ab:  naiko .api tvādṛśo .adyāpi jāyamāneṣu rājasu
2.47cd:  nanu dvitīyo nāsty eva pārijātasya pādapaḥ
2.48ab:  adhikena samīkṛtya hīnam ekakriyāvidhau
2.48cd:  yad bruvanti smṛtā seyaṃ tulyayogopamā yathā
2.49ab:  divo jagarti rakṣāyai pulomārir bhuvo bhavān
2.49cd:  asurās tena hanyante sāvalepās tvayā nṛpāḥ
2.50ab:  kāntyā candramasaṃ dhāmnā sūryaṃ dhairyeṇa cārṇavam
2.50cd:  rājann anukaroṣīti saiṣā hetūpamā matā
2.51ab:  na liṅgavacane bhinne na hīnādhikatāpi vā
2.51cd:  upamādūṣaṇāyālaṃ yatrodvego na dhīmatām
2.52ab:  strīva gacchati ṣaṇḍho .ayaṃ vakty eṣā strī pumān iva
2.52cd:  prāṇā iva priyo .ayaṃ me vidyā dhanam ivārjitā
2.53ab:  bhavān iva mahīpāla devarājo virājate
2.53cd:  alam aṃśumataḥ kakṣām āroḍhuṃ tejasā nṛpah
2.54ab:  ityevamādau saubhāgyaṃ na jahāty eva jātu cit
2.54cd:  asty eva kva cid udvegaḥ prayoge vāgvidāṃ yathā
2.55ab:  haṃsīva dhavalaś candraḥ sarāṃsīvāmalaṃ nabhaḥ
2.55cd:  bhartṛbhakto bhaṭaḥ śveva khadyoto bhāti bhānuvat
2.56ab:  īdṛśaṃ varjyate sadbhiḥ kāraṇaṃ  tatra cintyatāṃ
2.56cd:  guṇadoṣavicārāya  svayam eva manīṣibhiḥ
2.57ab:  ivavadvāyathāśabdāḥ samānanibhasaṃnibhāḥ
2.57cd:  tulyasaṃkāśanīkāśaprakāśapratirūpakāḥ
2.58ab:  pratipakṣapratidvandvipratyanīkavirodhinaḥ 
2.58cd:  sadṛksadṛśasaṃvādisajātīyānuvādinaḥ
2.59ab:  pratibimbapraticchandasarūpasamasaṃmitāḥ
2.59cd:  salakṣaṇasadṛkṣābhasapakṣopamitopamāḥ
2.60ab:  kalpadeśīyadeśyādiḥ prakhyapratinidhī api
2.60cd:  savarṇatulitau śabdau ye cānyūnārthavādinaḥ 
2.61ab:  samāsaś ca bahuvrīhiḥ śaśāṅkavadanādiṣu
2.61cd:  spardhate jayati dveṣṭi druhyati pratigarjati
2.62ab:  ākrośaty avajānāti kadarthayati nindati
2.62cd:  viḍambayati saṃdhatte  hasatīrṣyaty asūyati
2.63ab:  tasya muṣṇāti saubhāgyaṃ tasya kāntiṃ vilumpati
2.63cd:  tena sārdhaṃ vigṛhṇāti tulāṃ tenādhirohati
2.64ab:  tatpadavyāṃ padaṃ dhatte tasya kakṣāṃ vigāhate
2.64cd:  tam anvety anubadhnāti tacchīlaṃ tan niṣedhati
2.65ab:  tasya cānukarotīti śabdāḥ sādṛśyasūcakāḥ
2.65cd:  upamāyām ime proktāḥ kavīnāṃ buddhisaukhyadāḥ  //ity upamācakram//
2.66ab:  upamaiva tirobhūtabhedā rūpakam ucyate 
2.66cd:  yathā bāhulatā  pāṇipadmaṃ caraṇapallavaḥ 
2.67ab:  aṅgulyaḥ pallavāny āsan kusumāni nakhārciṣaḥ
2.67cd:  bāhū late vasantaśrīs tvaṃ naḥ pratyakṣacāriṇī
2.68ab:  ity etad asamastākhyaṃ samastaṃ pūrvarūpakam
2.68cd:  smitaṃ mukhendor jyotsneti samastavyastarūpakam
2.69ab:  tāmrāṅgulidalaśreṇi nakhadīdhitikesaram
2.69cd:  dhriyate mūrdhni bhūpālair bhavaccaraṇapaṅkajam
2.70ab:  aṅgulyādau dalāditvaṃ pāde cāropya padmatām
2.70cd:  tadyogyasthānavinyāsād etat sakalarūpakam
2.71ab:  akasmād eva te caṇḍi sphuritādharapallavam
2.71cd:  mukhaṃ muktāruco dhatte dharmāmbhaḥkaṇamañjarīḥ
2.72ab:  mañjarīkṛtyadharmāmbhaḥ pallavīkṛtya cādharam
2.72cd:  nānyathā kṛtam atrāsyam  ato .avayavarūpakam
2.73ab:  valgitabhru galaddharmajalam ālohitekṣaṇam
2.73cd:  vivṛṇoti madāvasthām idaṃ vadanapaṅkajam
2.74ab:  avikṛtya mukhāṅgāni mukham evāravindatām
2.74cd:  āsīd gamitam atredam ato .avayavirūpakam
2.75ab:  madapāṭalagaṇḍena raktanetrotpalena te
2.75cd:  mukhena mugdhaḥ so .apy eṣa jano rāgamayaḥ krtaḥ
2.76ab:  ekāṅgarūpakaṃ caitad evaṃ dviprabhṛtīny api
2.76cd:  aṅgāni rūpayanty atra yogāyogau bhidākarau
2.77ab:  smitapuṣpojjvalaṃ lolanetrabhṛṅgam idaṃ mukham
2.77cd:  iti puṣpadvirephāṇāṃ saṃgatyā yuktarūpakam
2.78ab:  idam ārdrasmitajyotsnaṃ snigdhanetrotpalaṃ mukham
2.78cd:  iti jyotsnotpalāyogād ayuktaṃ nāma rūpakam
2.79ab:  rūpaṇād aṅgino .aṅgānāṃ rūpaṇārūpaṇāśrayāt
2.79cd:  rūpakaṃ viṣamaṃ nāma lalitaṃ jāyate yathā
2.80ab:  madaraktakapolena manmathas tvan mukhendunā 
2.80cd:  nartitabhrūlatenālaṃ mardituṃ bhuvanatrayam
2.81ab:  haripādaḥ śirolagnajahnukanyājalāṃśukaḥ
2.81cd:  jayaty asuraniḥśaṅkasurānandotsavadhvajaḥ
2.82ab:  viśeṣaṇasamagrasya rūpaṃ ketor yadīdṛśam
2.82cd:  pāde tadarpaṇād etat saviśeṣaṇarūpakam
2.83ab:  na mīlayati padmāni  na nabho .apy avagāhate 
2.83cd:  tvanmukhendur mamāsūnāṃ haraṇāyaiva  kalpate
2.84ab:  akriyā candrakāryāṇām anyakāryasya ca kriyā
2.84cd:  atra saṃdarśyate yasmād viruddhaṃ nāma rūpakam
2.85ab:  gāmbhīryeṇa samudro .asi gauraveṇāsi parvataḥ
2.85cd:  kāmadatvāc ca  lokānām asi tvaṃ kalpapādapaḥ 
2.86ab:  gāmbhīryapramukhair atra hetubhiḥ sāgaro giriḥ
2.86cd:  kalpadrumaś ca kriyate tad idaṃ heturūpakam
2.87ab:  rājahaṃsopabhogārhaṃ bhramaraprārthyasaurabham
2.87cd:  sakhi vaktrāmbujam idaṃ taveti śliṣṭarūpakam
2.88ab:  iṣṭaṃ sādharmyavaidharmyadarśanād gauṇamukhyayoḥ
2.88cd:  upamāvyatirekākhyaṃ rūpakādvitayaṃ yathā
2.89ab:  ayam ālohitacchāyo madena mukhacandramāḥ
2.89cd:  saṃnaddhodayarāgasya candrasya pratigarjati
2.90ab:  candramāḥ pīyate devair mayā tvanmukhacandramāḥ
2.90cd:  asamagro .apy asau śaśvadāpūrṇamaṇḍalaḥ
2.91ab:  mukhacandrasya candratvam ittham anyopatāpinaḥ
2.91cd:  na te sundari saṃvādīty etad ākṣeparūpakam
2.92ab:  mukhendur api te caṇḍi  māṃ nirdahati nirdayam
2.92cd:  bhāgyadoṣān mamaiveti tat samādhānarūpakam
2.93ab:  mukhapaṅkajaraṅge .asmin bhrūlatānartakī tava
2.93cd:  līlānṛtyaṃ karotīti ramyaṃ rūpakarūpakam
2.94ab:  naitan mukham idaṃ padmaṃ ta netre bhramarāv imau
2.94cd:  etāni kesarāṇy eva naitā dantārciṣas tava
2.95ab:  mukhāditvaṃ nivartyaiva padmāditvena rūpaṇāt 
2.95cd:  udbhāvitaguṇotkarṣaṃ tattvāpahnavarūpakam
2.96ab:  na paryanto vikalpānāṃ rūpakopamayor ataḥ
2.96cd:  diṅmātraṃ darśitaṃ dhīrair anuktam anumīyatām  //iti rūpakacakram//
2.97ab: jātikriyāguṇadravyavācinaikatra vartinā
2.97cd: sarvavākyopakāraś cet tam āhur dīpakaṃ yathā
2.98ab: pavano dakṣiṇaḥ pārṇaṃ jīrṇaṃ harati vīrudhām
2.98cd: sa evāvanatāṅgīnāṃ mānabhaṅgāya kalpate
2.99ab: caranti caturambhodhivelodyāneṣu dantinaḥ
2.99cd: cakravālādrikuñjeṣu kundabhāso guṇāś ca te
2.100ab: śyāmalāḥ prāvṛṣeṇyābhir diśo jīmūtapaṅktibhiḥ
2.100cd: bhuvaś ca sukumārābhir navaśādvalarājibhiḥ
2.101ab: viṣṇunā vikramasthena dānavānāṃ vibhūtayaḥ
2.101cd: kvāpi nītāḥ kuto .apy āsann ānītā devetarddhayaḥ
2.102ab: ityādidīpakāny uktāny evaṃ madhyāntayor api
2.102cd: vākyayor darśayiṣyāmaḥ  kāni cit tāni tad yathā
2.103ab: nṛtyanti niculotsaṅge gāyanti ca kalāpinaḥ
2.103cd: badhnanti ca payodeṣu dṛśo harṣāśrugarbhiṇīḥ
2.104ab: mando gandhavahaḥ kṣāro vahnir induś ca jāyate
2.104cd: carcācandanapātaś ca śastrapātaḥ pravāsinām
2.105ab: jalaṃ jaladharodgīrṇaṃ kulaṃ gṛhaśikhaṇḍinām
2.105cd: calaṃ ca taḍitāṃ dāma balaṃ kusumadhanvanaḥ
2.106ab: tvayā nīlotpalaṃ karṇe smareṇāstraṃ śarāsane
2.106cd: mayāpi maraṇe cetas trayam etat samaṃ kṛtam
2.107ab: śuklaḥ śvetārciṣo vṛddhyai pakṣaḥ pañcaśarasya saḥ
2.107cd: sa ca rāgasya rāgo .api yūnāṃ ratyutsavaśriyaḥ
2.108ab: ityādidīpakatve .api pūrvapūrvavyapekṣiṇī 
2.108cd: vākyamālā prayukteti tan mālādīpakaṃ matam
2.109ab: avalepam anaṅgasya vardhayanti balāhakāḥ 
2.109cd: karśayanti tu dharmasya mārutoddhūtaśīkarāḥ
2.110ab: avalepapadenātra balāhakapadena ca
2.110cd: kriye viruddhe saṃyukte tadviruddhārthadīpakam
2.111ab: haraty ābhogam āśānāṃ gṛhṇāti jyotiṣāṃ gaṇam
2.111cd: ādatte cādya me prāṇān asau jaladharāvalī
2.112ab: anekaśābdopādānāt kriyaikavātra dīpyate
2.112cd: yato jaladharāvalyā tasmād ekārthadīpakam
2.113ab: hṛdyagandhavahās tuṅgās tamālaśyāmalatviṣaḥ
2.113cd: divi bhramanti jīmūtā bhuvi  caite mataṅgajāḥ
2.114ab: atra dharmair abhinnānām abhrāṇāṃ dantināṃ tathā
2.114cd: bhramaṇenaiva saṃbandha iti śliṣṭārthadīpakam
2.115ab: anenaiva prakāreṇa śeṣāṇām api dīpake
2.115cd: vikalpānām avagatir vidhātavyā vicakṣaṇaiḥ  //iti dīpakacakram//
2.116ab: arthāvṛttiḥ padāvṛttir ubhayāvṛttir eva ca 
2.116cd: dīpakasthāna eveṣṭam alaṃkāratrayaṃ yathā
2.117ab: vikasanti kadambāni sphuṭanti kuṭajadrumāḥ
2.117cd: unmīlanti ca kandalyo dalanti kakubhāni ca
2.118ab: utkaṇṭhayati meghānāṃ mālā vṛndaṃ kalāpinām
2.118cd: yūnāṃ cotkaṇṭhayaty eṣa mānasaṃ makaradhvajaḥ
2.119ab: jitvā viśvaṃ bhavān atra viharaty avarodhanaiḥ
2.119cd: viharatv apsarobhis te ripuvargo divaṃ gataḥ  //ity āvṛtticakram//
2.120ab: pratiṣedhoktir ākṣepas traikālyāpekṣayā  tridhā
2.120cd: athāsya punar ākṣepyabhedānantyād anantatā
2.121ab: anaṅgaḥ pañcabhiḥ puṣpair viṣ√aṃ vyajayateṣubhiḥ
2.121cd: ityasaṃbhāvyam athavā vicitrā vastuśaktayaḥ
2.122ab: ityanaṅgajayāyogabuddhir hetubalād iha
2.122cd: pravṛttaiva yad ākṣiptā vṛttākṣepaḥ sa īdṛśaḥ
2.123ab: kutaḥ kuvalayaṃ karṇe karoṣi kalabhāṣiṇi
2.123cd: kim apāṅgam aparyāptam asmin karmaṇi manyase
2.124ab: sa vartamānākṣepo .ayaṃ kurvaty evāsitotpalam
2.124cd: karṇe kā cit  priyeṇaivaṃ cāṭukāreṇa rudhyate
2.125ab: satyaṃ bravīmi na tvaṃ māṃ draṣṭuṃ vallabha lapsyase
2.125cd: anyacumbanasaṃkrāntalākṣāraktena cakṣuṣa
2.126ab: so .ayaṃ bhaviṣyad ākṣepaḥ prāg evātimanasvinī
2.126cd: kadācid aparādho .asya bhāvīty evam arunddha yat
2.127ab: tava tanvaṅgi mithyaiva rūḍham aṅgeṣu mārdavam
2.127cd: yadi satyaṃ mṛdūny eva kim akāṇḍe rujanti mām
2.128ab: dharmākṣepo .ayam ākṣiptam aṅganāgātramārdavam
2.128cd: kāmukena yad atraivaṃ karmaṇā tadvirodhinā
2.129ab: sundarī sā na vety eṣa vivekaḥ kena jāyate
2.129cd: prabhāmātraṃ hi taralaṃ dṛśyate na tadāśrayaḥ
2.130ab: dharmyākṣepo .ayam ākṣipto dharmī dharmaṃ prabhāhvayam
2.130cd: anujñāyaiva yadrūpam atyāścaryaṃ vivakṣatā
2.131ab: cakṣuṣī tava rajyete sphuraty adharapallavaḥ
2.131cd: bhruvau ca bhugne na tathāpy aduṣṭasyāsti me bhayam
2.132ab: sa eṣa kāraṇākṣepaḥ pradhānaṃ kāraṇaṃ bhiyaḥ
2.132cd: svāparādho niṣiddho .atra yat priyeṇa paṭīyasā
2.133ab: dūre priyatamaḥ so .ayam āgato jaladāgamaḥ 
2.133cd: dṛṣṭaś ca phullā niculā na mṛtā cāsmi kiṃ nv idam
2.134ab: kāryākṣepaḥ sa kāryasya maraṇasya nivartanāt
2.134cd: tatkāraṇam upanyasya dāruṇaṃ jaladāgamam
2.135ab: na ciraṃ mama tāpāya tava yātrā bhaviṣyati 
2.135cd: yadi yāsyasi yātavyam alam āśaṅkayātra te 
2.136ab: ity anujñāmukhenaiva kantasyākṣipyate gatiḥ
2.136cd: maraṇaṃ sūcayantyaiva so .anujñākṣepa ucyate
2.137ab: dhanaṃ ca bahu labhyaṃ te sukhaṃ kṣemaṃ ca vartmani 
2.137cd: na ca me prāṇasaṃdehas tathāpi priya mā sma gāḥ 
2.138ab: ity ācakṣāṇayā hetūn priyayātrānubandhinaḥ
2.138cd: prabhutvenaiva ruddhas tat prabhutvākṣepa ucyate
2.139ab: jīvitāśā balavatī dhanāśā durbalā mama 
2.139cd: gaccha tiṣṭha vā kānta svāvasthā tu niveditā 
2.140ab: asāv anādarākṣepo yad anādaravad vacaḥ
2.140cd: priyaprayāṇaṃ rundhatyā prayuktam iha raktayā
2.141ab: gaccha gacchasi cet kānta panthānaḥ santu te śivāḥ 
2.141cd: mamāpi janma tatraiva bhūyād yatra gato bhavān 
2.142ab: ity āśīrvacanākṣepo yad āśīrvādavartmanā
2.142cd: svāvasthāṃ sūcayantyaiva kāntayātrā niṣidhyate
2.143ab: yadi satyaiva yātrā te kāpy anyā mṛgyatāṃ tvayā 
2.143cd: aham adyaiva ruddhāsmi randhrāpekṣeṇa mṛtyunā 
2.144ab: ity eṣa paruṣākṣepaḥ paruṣākṣarapūrvakam
2.144cd: kāntasyākṣipyate yasmāt prasthānaṃ premanighnayā
2.145ab: gantā ced gaccha tūrṇaṃ te karṇau yānti purā ravāḥ 
2.145cd: ārtabandhumukhodgīrṇāḥ prayāṇaparipanthinaḥ
2.146ab: sācivyvākṣepa evaiṣa yad atra pratiṣidhyate
2.146cd: priyaprayāṇaṃ sācivyaṃ kurvaty evātiraktayā
2.147ab: gaccheti vaktum icchāmi matpriya tvatpriyaiṣiṇī 
2.147cd: nirgacchati mukhād vāṇī mā gā iti karomi kim 
2.148ab: yatnākṣepaḥ sa yatnasya kṛtasyāniṣṭavastuni
2.148cd: viparītaphalotpatter ānarthakyopadarśanāt
2.149ab: kṣaṇaṃ darśanavighnāya pakṣmaspandāya kupyataḥ 
2.149cd: premṇaḥ prayāṇaṃ tvaṃ brūhi mayā tasyeṣṭam iṣyate
2.150ab: so .ayaṃ paravaśākṣepo yat premaparatantrayā
2.150cd: tayā niṣidhyate yātrānyasyārthasopasūcanat
2.151ab: sahiṣye virahaṃ nātha dehy adṛśyāñjanaṃ mama 
2.151cd: yad aktanetrāṃ kandarpaḥ prahartā māṃ na paśyati
2.152ab: duṣkaraṃ jīvanopāyam upanyasyoparudhyate
2.152cd: patyuḥ prasthānam ity āhur upāyākṣepam īdṛśam
2.153ab: pravṛttaiva prayāmīti vāṇī vallabha te mukhāt
2.153cd: ayatāpi tvayedānīṃ mandapremṇā mamāsti kim 
2.154ab: roṣākṣepo .ayam udriktasnehaniryantritātmanā
2.154cd: saṃrabdhayā priyārabdhaṃ prayāṇaṃ yan niṣidhyate
2.155ab: mugdhā kāntasya yātroktiśravaṇād eva mūrchitā 
2.155cd: buddhvā vakti priyaṃ dṛṣṭvā kiṃ cireṇāgato bhavān 
2.156ab: iti tatkālasaṃbhūtamūrchayākṣipyate gatiḥ
2.156cd: kāntasya kātarākṣyā yan mūrchākṣepa sa īdṛśaḥ
2.157ab: nāghrātaṃ  na kṛtaṃ karṇe strībhir madhuni nārpitam
2.157cd: tvaddviṣāṃ dīrghikāsyeva viśīrṇaṃ nīlam utpalam
2.158ab: asāv anukrośākṣepaḥ sānukrośam ivotpale
2.158cd: vyāvartya karma tadyogyaṃ śocyāvasthopadarśanāt
2.159ab: amṛtātmani padmānāṃ dveṣṭari snigdhatārake
2.159cd: mukhendau tava satyasminn apareṇa kim indunā
2.160ab: iti mukhyendur ākṣipto guṇān gauṇenduvartinaḥ 
2.160cd: tatsamān darśayitveha śliṣṭākṣepas tathāvidhaḥ
2.161ab: artho na saṃbhṛtaḥ kaś cin na vidyā kā cid arcitā
2.161cd: na tapaḥ saṃcintaṃ kiṃ cid gataṃ ca sakalaṃ vayaḥ
2.162ab: asāv anuśayākṣepo yasmād anuśayottaram
2.162cd: arthārjanāder vyāvṛttir darśiteha gatāyuṣā 
2.163ab: kim ayaṃ śaradambhodaḥ kiṃ vā haṃsakadambakam
2.163cd: rutaṃ nūpurasaṃvādi śrūyate tan na toyadaḥ
2.164ab: ity ayaṃ saṃśayākṣepaḥ saṃśayo yan nivartyate
2.164cd: dharmeṇa haṃsasulabhenāspṛṣṭaghanajānitā
2.165ab: citram ākrāntaviśvo .api vikramas te na tṛpyati
2.165cd: kadā vā dṛśyate tṛptir udīrṇasya havir bhujaḥ
2.166ab: ayam arthāntarākṣepaḥ prakrānto yan nivāryate
2.166cd: vismayo .arthantarasyeha darśanāt tatsadharmaṇaḥ
2.167ab: na stūyase narendra tvaṃ dadāsīti kadā cana
2.167cd: svam eva matvā gṛhṇanti yatas tvad dhanam arthinaḥ
2.168ab: ityevamādir ākṣepo hetvākṣepa iti smṛtaḥ
2.168cd: anenaiva diśānye .api vikalpāḥ śakyam ūhitum // ity ākṣepacakram//
2.169ab: jñeyah so .arthāntaranyāso vastu prastutya kiṃ cana
2.169cd: tatsādhanasamarthasya nyāso  yo .anyasya vastunaḥ 
2.170ab: viśvavyāpī viśeṣasthaḥ śleṣāviddho virodhavān
2.170cd: ayuktakārī yuktātmā yuktāyukto viparyayaḥ
2.171ab: ityevamādayo bhedāḥ prayogeṣv asya lakṣitāḥ 
2.171cd: udāharaṇamālaiṣāṃ rūpavyaktyai nidarśyate
2.172ab: bhagavantau jagannetre sūryācandramasāv api
2.172cd: paśya gacchata evāstaṃ niyatiḥ kena laṅghyate
2.173ab: payomucaḥ parītāpaṃ haranty eva śarīriṇām
2.173cd: nav ātmalābho mahatāṃ paraduḥkhopaśāntaye
2.174ab: utpādayati lokasya prītiṃ malayamārutaḥ
2.174cd: nanu dākṣiṇyasaṃpannaḥ sarvasya bhavati priyaḥ
2.175ab: jagad ānandayaty eṣa malino .api niśākaraḥ
2.175cd: anugṛhṇāti hi parān sadoṣo .api dvijeśvaraḥ
2.176ab: madhupānakalāt kaṇṭhān nirgato .apy alināṃ dhvaniḥ
2.176cd: kaṭur bhavati karṇasya kāmināṃ pāpam īdṛśam
2.177ab: ayaṃ mama dahaty aṅgam ambhojadalasaṃstaraḥ
2.177cd: hutāśanapratinidhir dāhātmā nanu yujyate
2.178ab: kṣiṇotu kāmaṃ śītāṃśuḥ kiṃ vasanto dunoti mām
2.178cd: malinācaritaṃ karma surabher nanv asāṃpratam
2.179ab: kumudāny api dāhāya kim ayaṃ kamalākaraḥ
2.179cd: na hīndugṛhyeṣūgreṣu sūryagṛhyo madhur bhavet //ity arthāntaranyāsacakram//
2.180ab: śabdopātte prātīte vā sādṛśye vastunor dvayoḥ
2.180cd: tatra yad bhedakathanaṃ vyatirekaḥ sa kathyate
2.181ab: dhairyalāvaṇyagāmbhīryapramukhais tvam udanvataḥ
2.181cd: guṇais tulyo .asi bhedas tu vapuṣaivedṛśena te
2.182ab: ity ekavyatireko .ayaṃ dharmeṇaikatravartinā
2.182cd: pratītiviṣayaprāpter bhedasyobhayavartinaḥ
2.183ab: abhinnavelau gambhīrāv amburāśir bhavān api
2.183cd: asāv añjanasaṃkāśas tvaṃ tu cāmīkaradyutiḥ
2.184ab: ubhayavyatireko .ayam ubhayor bhedakau guṇau
2.184cd: kārṣṇyaṃ piśaṅgatā cobhau yat pṛthag darśitāv iha
2.185ab: tvaṃ samudraś ca durvārau mahāsattvau satejasau
2.185cd: ayaṃ tu yuvayor bhedaḥ sa jaḍātmā paṭur bhavān
2.186ab: sa eṣa śleṣarūpatvāt saśleṣa iti gṛhyatām
2.186cd: sākṣepaś ca sahetuś ca darśyate tad api dvayam
2.187ab: sthitimān api dhīro .api ratnānām ākaro .api san
2.187cd: tava kakṣāṃ na yāty eva malino makarālayaḥ
2.188ab: vahann api mahīṃ kṛtsnāṃ saśailadvīpasāgarām
2.188cd: bhartṛbhāvād bhujaṅgānāṃ  śeṣas tvatto nikṛṣyate
2.189ab: śabdopādānasādṛśyavyatireko .ayam īdṛśaḥ 
2.189cd: pratīyamānasādṛśyo .apy asti so .apy abhidhīyate
2.190ab: tvanmukhaṃ kamalaṃ ceti dvayor apy anayor bhidā
2.190cd: kamalaṃ jalasaṃrohi tvanmukhaṃ tvadupāśrayam
2.191ab: abhrūvilāsam aspṛṣtamadarāgaṃ mṛgekṣaṇam
2.191cd: idaṃ tu nayanadvandvaṃ tava taguṇabhūṣitam
2.192ab: pūrvasmin bhedamātroktir asminn ādhikyadarśanam
2.192cd: sadṛśavyatirekaś ca punar anyaḥ pradarśyate
2.193ab: tvanmukhaṃ puṇḍarīkaṃ ca phulle surabhigandhinī
2.193cd: bhramadbhramaram ambhojaṃ lolanetraṃ mukhaṃ tu te 
2.194ab: candro .ayam ambarottaṃso haṃso .ayaṃ toyabhūṣaṇam
2.194cd: nabho nakṣatramālīdam utphullakumudaṃ payaḥ
2.195ab: pratīymānaśauklyādisāmyayor viyadambhasoḥ
2.195cd: kṛtaḥ pratītaśuddhyoś ca bhedo .asmiṃś candrahaṃsayoḥ
2.196ab: pūrvatra śābdavat sāmyam ubhayatrāpi bhedakam
2.196cd: bhṛṅganetrādi tulyaṃ tat sadṛśavyatirekatā
2.197ab: aratnālokasaṃhāryam ahāryaṃ sūryaraśmibhiḥ
2.197cd: dṛṣṭirodhakaraṃ yūnāṃ yauvanaprabhavaṃ tamaḥ
2.198ab: sajātīvyatireko .ayaṃ tamojāter idaṃ tamaḥ
2.198cd: dṛṣṭirodhitayā tulyaṃ bhinnam anyair adarśi tat //iti vyatirekacakram//
2.199ab: prasiddhahetuvyāvṛttyā yat kiṃciṭ kāraṇāntaram
2.199cd: yatra svābhāvikatvaṃ vā vibhāvyaṃ sā vibhāvanā
2.200ab: apītakṣībakādambam asaṃmṛṣṭābhalāmbaram
2.200cd: aprasāditaśuddhāmbu jagad āsīn manoharam
2.201ab: anañjitāsitā dṛṣṭir bhrūr anāvarjitā natā
2.201cd: arañjito .aruṇaś cāyam adharas tava sundari
2.202ab: yad apītādijanyaṃ syāt  kṣībatvādyanyahetujam
2.202cd: ahetukaṃ ca tasyeha vivakṣety aviruddhatā
2.203ab: vaktraṃ nisargasurabhi vapur avyājasundaram
2.203cd: akāraṇaripuś candro nirnimittāsuhṛt smaraḥ
2.204ab: nisargādipadair atra hetuḥ sākṣān nivartitaḥ
2.204cd: uktaṃ ca surabhitvādi phalaṃ tat sā vibhāvanā //iti vibhāvanācakram//
2.205ab: vastu kiṃcid abhipretya tattulyasyānyavastunaḥ
2.205cd: uktiḥ saṃkṣeparūpatvāt sā samāsoktir iṣyate
2.206ab: piban madhu yathākāmaṃ bhramaraḥ phullapaṅkaje 
2.206cd: apy asaṃnaddhasaurabhyaṃ paśya cumbati kuḍmalam
2.207ab: iti prauḍhāṅganābaddharatilīlasya rāgiṇaḥ
2.207cd: kasyāṃ cid iha bālāyām icchāvṛttir vibhāvyate
2.208ab: viśeṣyamātrabhinnāpi tulyākāraviśeṣaṇā
2.208cd: asty asāv aparāpy asti bhinnābhinnaviśeṣaṇā
2.209ab: rūḍhamūlaḥ phalabharaiḥ puṣṇann aniśam arthinaḥ
2.209cd: sāndracchāyo mahāvṛkṣaḥ so .ayam āsādito mayā
2.210ab: analpaviṭapābhogaḥ phalapuṣpasamṛddhimān
2.210cd: socchrayaḥ sthairyavān daivād eṣa labdho mayā drumaḥ
2.211ab: ubhayatra pumān kaś cid vṛkṣatvenovarṇitaḥ
2.211cd: sarve sādhāraṇā dharmāḥ pūrvatrānyatra  tu dvayam
2.212ab: nivṛttavyālasaṃsargo nisargamadhurāśayaḥ
2.212cd: ayam ambhonidhiḥ kaṣṭaṃ kālena  pariśuṣyati
2.213ab: ity āpūrvasamāsoktiḥ pūrvadharmanivartanāt
2.213cd: samudreṇa samānasya puṃso vyāpattisūcanāt //iti samāsokticakram//
2.214ab: vivakṣā yā viśeṣasya lokasīmātivartinī
2.214cd: asāv atiśayoktiḥ syād  alaṃkārottamā yathā
2.215ab: mallikāmālabhāriṇyaḥ sarvāṅgīṇārdracandanāḥ [[com: sarvāṅgaṃ vyāpnotīti sarvāṅgīṇam]]
2.215cd: kṣaumavatyo na lakṣyante jyotsnāyām abhisārikāḥ
2.216ab: candrātapasya bāhulyam uktam utkarṣavattayā 
2.216cd: saṃśayātiśayādīnāṃ vyaktyai  kiṃ cin nidarśyate
2.217ab: stanayor jaghanasyāpi madhye madhyaṃ priye tava
2.217cd: asti nāstīti saṃdeho na me .adyāpi nivartate
2.218ab: nirṇetuṃ śakyam astīti madhyaṃ tava nitambini
2.218cd: anyathānupapattyaiva  payodharabharasthiteḥ
2.219ab: aho viśālaṃ bhūpāla bhuvanatritayodaram
2.219cd: māti mātum aśakyo .api  yaśorāśir yad atra te
2.220ab: alaṃkārāntarāṇām apy ekam āhuḥ parāyaṇam
2.220cd: vāgīśamahitām uktim imām atiśayāhvayam //ity atiśayokticakram//
2.221ab: anyathaiva sthitā vṛttiś cetanasyetarasya vā 
2.221cd: anyathotprekṣyate yatra tām utprekṣāṃ vidur yathā
2.222ab: mādhyaṃdinārkasaṃtaptaḥ sarasīṃ gāhate gajaḥ
2.222cd: manye mārtaṇḍagṛhyāṇi  padmāny uddhartum udyataḥ
2.223ab: snātuṃ pātuṃ bisāny attuṃ kariṇo jalagāhanam
2.223cd: tadvairaniṣkrayāyeti  kavinotprekṣya varṇyate
2.224ab: karṇasya bhūṣaṇam idaṃ mamāyātivirodhinaḥ 
2.224cd: iti karṇotpalaṃ prāyas tava dṛṣṭyā vilaṅghyate
2.225ab: apāṅgabhāgapātinyā dṛṣṭer aṃśubhir utpalam
2.225cd: spṛśyate vā na vety evaṃ kavinotprekṣya varṇyate
2.226ab: limpatīva tamo .aṅgāni varṣatīvāñjanaṃ nabhaḥ
2.226cd: itīdam api bhūyiṣṭham utprekṣālakṣaṇānanvitam
2.227ab: keṣāṃ cid upamābhrāntir ivaśrutyeha jāyate
2.227cd: nopamānaṃ tiṅantenety atikramyāptabhāṣitam
2.228ab: upamānopameyatvaṃ tulyadharmavyapekṣayā
2.228cd: limpates tamasaś cāsau dharmaḥ ko .atra samīkṣyate
2.229ab: yadi lepanam eveṣṭaṃ limpatir nāma ko .aparaḥ
2.229cd: sa eva dharmo dharmī cety anunmatto na bhāṣate
2.230ab: kartā yady upamānaṃ syān nyagbhūto .asau kriyāpade
2.230cd: svakriyāsādhanavyagro nālam anyad apekṣitum
2.231ab: yo limpaty amunā tulyaṃ tama ity api śaṃsataḥ
2.231cd: aṅgānīti na saṃbaddhaṃ so .api mṛgyaḥ samo guṇaḥ
2.232ab: yathendur iva te vaktram iti kāntiḥ pratīyate
2.232cd: na tathā limpater lepād anyad atra pratīyate
2.233ab: tad upaśleṣaṇārtho .ayaṃ limpatir dhvāntakartṛkaḥ
2.233cd: aṅgakarmā ca puṃsaivam utprekṣyata itīṣyatām
2.234ab: manye śaṅke dhruvaṃ prāyo nūnam ityevamādibhiḥ
2.234cd: utprekṣā vyajyate śabdair ivaśabdo .api tādṛśaḥ // ity utprekṣācakram//
2.235ab: hetuś ca sūkṣmaleśau ca vācām uttamabhūṣaṇam
2.235cd: kārakajñāpakau hetū tau cānekavidhau yathā
2.236ab: ayam āndolitaprauḍhacandanadrumapallavaḥ
2.236cd: utpādayati sarvasya prītiṃ malayamārutaḥ
2.237ab: prītyutpādanayogyasya rūpasyātropabṛṃhaṇam
2.237cd: alaṃkāratayoddiṣṭaṃ nivṛttāv api tat samam
2.238ab: candanāraṇyam ādhūya spṛṣṭvā malayanirjharān
2.238cd: pathikānām abhāvāya pavano .ayam upasthitaḥ
2.239ab: abhāvasādhanāyālam evaṃbhūto hi mārutaḥ 
2.239cd: virahajvarasaṃbhūtamanojñārocake  jane
2.240ab: nivartye ca vikārye ca hetutvaṃ tadapekṣayā
2.240cd: prāpye tu karmaṇi prāyaḥ kriyāpekṣaiva hetutā
2.241ab: hetur nirvartanīyasya darśitaḥ śeṣayor dvayoḥ
2.241cd: dattvodāharaṇadvandvaṃ jñāpako varṇayiṣyate
2.242ab: utpravālāṇy araṇyāni vāpyaḥ saṃphullapaṅkajāḥ
2.242cd: candraḥ pūrṇaś ca kāmena pānthadṛṣṭer viṣaṃ kṛtam
2.243ab: mānayogyāṃ karomīti priyasthānasthitāṃ sakhīm
2.243cd: bālā bhrūbhaṅgajihmākṣī paśyati sphuritādharā
2.244ab: gato .astam arko bhātīndur yānti vāsāya pakṣiṇaḥ
2.244cd: itīdam api sādhv eva kālāvasthānivedane
2.245ab: avadhyair indupādānām asādhyaiś candanāmbhasām
2.245cd: dehoṣmabhiḥ subodhaṃ te sakhi kāmāturaṃ manaḥ
2.246ab: iti lakṣyāḥ prayogeṣu  ramyā jñāpakahetavaḥ 
2.246cd: abhāvahetavaḥ ke cid vyāhriyante  manoharāḥ
2.247ab: anabhyāsena vidyānām asaṃsargeṇa dhīmatām
2.247cd: anigraheṇa cākṣāṇāṃjāyate vyasanaṃ nṛṇām
2.248ab: gataḥ kāmakathonmādo galito yauvanajvaraḥ
2.248cd: kṣato  mohaś cyutā tṛṣṇā kṛtaṃ puṇyāśrame manaḥ
2.249ab: vanāny amūni na gṛhāṇy etā nadyo na yoṣitaḥ
2.249cd: mṛgā ime na dāyādās tan me nandati mānasam
2.250ab: atyantam asad āryāṇāṃ analocitaceṣṭitam
2.250cd: atas teṣāṃ vivardhante satataṃ sarvasaṃpadaḥ
2.251ab: udyānasahakārāṇām anudbhinnā na mañjarī 
2.251cd: deyaḥ pathikanārīṇāṃ satilaḥ salilāñjaliḥ
2.252ab: prāgabhāvādirūpasya  hetutvam iha vastunaḥ
2.252cd: bhāvābhāvasvarūpasya kāryasyotpādanaṃ prati
2.253ab: dūrakāryas tatsahajaḥ kāryānantarajas tathā
2.253cd: ayuktayuktakāryau cety asaṃkhyāś citrahetavaḥ 
2.254ab: te .amī prayogamārgeṣu gauṇavṛttivyapāśrayāḥ
2.254cd: atyantasundarā dṛṣṭās  tadudāhṛtayo yathā
2.255ab: tvadapāṅgāhvayaṃ jaitram anaṅgāstraṃ yad aṅgane 
2.255cd: muktaṃ tad anyatas tena so .apy ahaṃ manasi kṣataḥ
2.256ab: āvirbhavati nārīṇāṃ vayaḥ  paryastaśaiśavaṃ 
2.256cd: sahaiva vividhaiḥ puṃsām aṅgajonmādavibhramaiḥ
2.257ab: paścāt paryasya kiraṇānudīrṇaṃ candramaṇḍalam
2.257cd: prāg eva hariṇākṣīṇām udīrṇo rāgasāgaraḥ
2.258ab: rājñāṃ hastāravindāni kuḍmalīkurute kutaḥ
2.258cd: deva tvaccaraṇadvandvarāgabālātapaḥ spṛśan
2.259ab: pāṇipadmāni bhūpānāṃ saṃkocayitum īśate
2.259cd: tvatpādanakhacandrāṇām arciṣaḥ kundanirmalāḥ 
2.260ab: iti hetuvikalpānāṃ darśitā gatir īdṛśī // iti hetucakram//
2.260cd: iṅgitākāralakṣyo .arthaḥ saukṣmyāt sūkṣma iti smṛtaḥ 
2.261ab: kadā nau saṃgamo bhāvīty ākīrṇe vaktum akṣamam
2.261cd: avetya kāntam abalā līlāpadmaṃ nyamīlayat
2.262ab: padmasaṃmīlanād atra sūcito niśi saṃgamaḥ 
2.262cd: āśvāsayitum icchantyā priyam aṅgajapīḍitam
2.263ab: madarpitadṛśas tasyā gītagoṣṭhyām avardhata
2.263cd: uddāmarāgataralā chāyā kāpi mukhāmbuje 
2.264ab: ity anudbhinnarūpatvād ratyutsavamanorathah
2.264cd: anullaṅhgyaiva sūkṣmatvam abhūd atra vyavasthitaḥ //iti sūkṣmacakram//
2.265ab: leśo leśena nirbhinnavasturūpanigūhanam
2.265cd: udāharaṇa evāsya rūpam āvirbhaviṣyati
2.266ab: rājakanyānuraktaṃ māṃ romodbhedena rakṣakaḥ
2.266cd: avagaccheyur ā jñātam aho śītānilaṃ vanam
2.267ab: ānandāśru pravṛttaṃ me kathaṃ dṛṣṭvaiva kanyakām
2.267cd: akṣi me puṣparajasā vātoddhūtena dūṣitam
2.268ab: ity evam ādisthāne .ayam alaṃkāro .atiśobhate
2.268cd: leśam eke vidur nindāṃ stutiṃ vā leśataḥ kṛtām
2.269ab: yuvaiṣa guṇavān rājā yogyas te patir ūrjitaḥ
2.269cd: raṇotsave manaḥ saktaṃ yasya kāmotsavād api 
2.270ab: vīryotkarṣastutir nindaivāsmin bhāvanivṛttaye 
2.270cd: kanyāyāḥ kalpate bhogān nirvivikṣor nirantaram
2.271ab: capalo nirdayaś cāsau janaḥ kiṃ tena me sakhi
2.271cd: āgaḥpramārjanāyaiva cāṭavo yena śikṣitāḥ
2.272ab: doṣābhāso guṇaḥ ko .api darśitaś cāṭukāritā
2.272cd: mānaṃ sakhijanoddiṣṭaṃ kartuṃ rāgād aśaktayā // iti leśacakram//
2.273ab: uddiṣṭānāṃ padārthānām anūddeśo yathākramam
2.273cd: yathāsaṃkhyam iti proktaṃ saṃkhyānaṃ krama ity api
2.274ab: dhruvaṃ te coritā tanvi smitekṣaṇamukhadyutiḥ
2.274cd: snātum ambhaḥpraviṣṭāyāḥ kumudotpalapaṅkajaiḥ // iti kramaḥ//
2.275ab: preyaḥ priyatarākhyānaṃ rasavad rasapeśalam
2.275cd: ūrjasvi rūḍhāhaṃkāraṃ yuktotkarṣaṃ ca tat trayam
2.276ab: adya yā mama govinda jātā tvayi gṛhāgate 
2.276cd: kālenaiṣā bhavet prītis tavaivāgamanāt punaḥ
2.277ab: ity āha yuktaṃ viduro nānyatas tādṛśī dhṛtiḥ
2.277cd: bhaktimātrasamārādhyaḥ suprītaś ca tato hariḥ
2.278ab: somaḥ sūryo marudbhūmir vyoma hotānalo jalam
2.278cd: iti rūpāṇy atikramya tvāṃ draṣṭuṃ deva ke vayam
2.279ab: iti sākṣātkṛte deve rājño yad rātavarmaṇaḥ
2.279cd: prītiprakāśanaṃ tac ca preya ity avagamyatām
2.280ab: mṛte .ati pretya saṃgantuṃ yayā me maraṇaṃ matam
2.280cd: saivāvantī mayā labdhā katham atraiva janmani 
2.281ab: prāk prītir darśitā seyaṃ ratiḥ śṛṅgāratāṃ gatā
2.281cd: rūpabāhulyayogena tad idaṃ rasavadvacaḥ 
2.282ab: nigṛhya keśeṣv ākṛṣṭā kṛṣṇā yenāgrato mama
2.282cd: so .ayaṃ duḥśāsanaḥ pāpo labdhaḥ kiṃ jīvati kṣaṇam
2.283ab: ity āruhya parāṃ koṭiṃ krodho raudrātmatāṃ gataḥ
2.283cd: bhīmasya paśyataḥ śatrum ity etad rasavadvacaḥ 
2.284ab: ajitvā sārṇavām urvīm aniṣṭvā vividhair makhaiḥ
2.284cd: adatvā cārtham arthibhyo  bhaveyaḥ pārthivaḥ katham
2.285ab: ity utsāhaḥ prakṛṣṭātmā tiṣṭhan vīrarasātmanā
2.285cd: rasavattvaṃ girām āsāṃ samarthayitum īśvaraḥ
2.286ab: yasyāḥ kusumaśayyāpi  komalāṅgyā rujākarī
2.286cd: sādhiśete kathaṃ tanvī hutāśanavatīṃ citām
2.287ab: iti kāruṇyam udriktam alaṃkāratayā smṛtam
2.287cd: tathāpare .api bībhatsahāsyādbhutabhayānakāḥ
2.288ab: pāyaṃ pāyaṃ tavārīṇāṃ śoṇitaṃ pāṇisaṃpuṭaiḥ
2.288cd: kauṇapāḥ saha nṛtyanti kabandhair antrabhūṣaṇāḥ
2.289ab: idam amlānamānāyā lagnaṃ stanataṭe tava
2.289cd: chādyatām uttarīyeṇa navaṃ nakhapadaṃ sakhi
2.290ab: aṃśukāni pravālāni puṣpaṃ hārādibhūṣaṇam
2.290cd: śākhāś ca mandirāṇy eṣāṃ  citraṃ nandanaśākhinām
2.291ab: idaṃ maghonaḥ kuliśaṃ dhārāsaṃnihitānalam
2.291cd: smaraṇaṃ yasya daityastrīgarbhapātāya kalpate
2.292ab: vākyasyāgrāmyatāyonir mādhurye darśito rasaḥ
2.292cd: iha tv aṣṭarasāyattā rasavattā  smṛtā girām //iti rasavaccakram//
2.293ab: apakartāham asmīti hṛdi te mā sma bhūd bhayam
2.293cd: vimukheṣu na me khaḍgaḥ prahartuṃ jātu vāñchati 
2.294ab: iti muktaḥ paro yuddhe niruddho darpaśalinā
2.294cd: puṃsā kenāpi taj jñeyam ūrjasvītyevamādikam //ity ūrjasvi//
2.295ab: artham iṣṭam anākhyāya sākṣāt tasyaiva siddhaye 
2.295cd: yat prakārāntarākhyānaṃ paryāyoktaṃ tad iṣyate
2.296ab: daśaty asau parabhṛtah sahakārasya mañjarīm
2.296cd: tam ahaṃ vārayiṣyāmi yuvābhyāṃ svairam āsyatām
2.297ab: saṃgamayya sakhīṃ yūnā saṃkete tadratotsavaṃ
2.297cd: nirvartayitum icchantyā kayāpy apasṛtaṃ tataḥ  //iti paryāyoktam//
2.298ab: kiṃcidārabhamāṇasya kāryaṃ daivavaśāt punaḥ
2.298cd: tatsādhanasamāpattir yā tad āhuḥ samāhitam
2.299ab: mānam asyā nirākartuṃ pādayor me patiṣyataḥ
2.299cd: upakārāya diṣṭyaitad udīrṇaṃ ghanagarjitam // iti samāhitam//
2.300ab: āśayasya vibhūter vā yan mahatvam anuttamam
2.300cd: udāttaṃ nāma taṃ prāhur alaṃkāraṃ manīṣibhiḥ 
2.301ab: guroḥ śasanam atyetuṃ na śaśāka sa rāghavaḥ
2.301cd: yo rāvaṇaśiraśchedakāryabhāre .apy aviklavaḥ
2.302ab: ratnabhittiṣu saṃkrāntaiḥ pratibimbaśatair vṛtaḥ
2.302cd: jñāto laṅkeśvaraḥ kṛcchrād āñjaneyena tattvataḥ
2.303ab: pūrvatrāśayamāhātmyam atrābhyudayagauravam
2.303cd: suvyañjitam iti proktaṃ udāttadvayam apy adaḥ // ity udāttam//
2.304ab: apahnutir apahnutya kiṃcid anyārthadarśanam
2.304cd: na pañceṣu smaras tasya sahasraṃ patriṇām iti
2.305ab: candanaṃ candrikā mando gandhavāhaś ca dakṣiṇaḥ
2.305cd: seyam agnimayī sṛṣṭir mayi śītā parān prati
2.306ab: śaiśiryam abhyupetyaiva pareṣvātmani kāminā
2.306cd: auṣṇyaprakāśanāt tasya seyaṃ viṣayaniḥnutiḥ
2.307ab: amṛtasyandikiraṇaś candramā nāmato mataḥ
2.307cd: anya evāyam arthātmā viṣaniṣyandidīdhitiḥ
2.308ab: iti candratvam evendau nivartyārthāntarātmatā
2.308cd: uktā smarārtenety eṣā svarūpāpahnutir matā
2.309ab: upamāpahnutiḥ pūrvam upamāsv eva darśitā
2.309cd: ity apahnutibhedānāṃ lakṣyo lakṣyeṣu vistaraḥ //ity apahanutiḥ//
2.310ab: śliṣṭam iṣṭam anekārtham ekarūpānvitaṃ vacaḥ
2.310cd: tad abhinnapadaṃ bhinnapadaprāyam iti dvidhā
2.311ab: asāv udayam ārūḍhaḥ kāntimān raktamaṇḍalaḥ
2.311cd: rājā harati lokasya hṛdayaṃ mṛdubhiḥ karaiḥ
2.312ab: doṣākareṇa saṃbadhnannakṣatrapathavartinā
2.312cd: rājñā pradoṣo mām ittham apriyaṃ kiṃ na bādhate
2.313ab: upamārūpakākṣepavyatirekādigocarāḥ
2.313cd: prāg eva darśitāḥ śleṣā darśyante ke canāpare
2.314ab: asty abhinnakriyaḥ kaś cid aviruddhakriyo .aparaḥ
2.314cd: viruddhakarmā cāsty anyaḥ śleṣo niyamavān api
2.315ab: niyamākṣeparūpoktir avirodhī virodhy api
2.315cd: teṣāṃ nidarśaneṣv eva  rūpam āvirbhaviṣyati
2.316ab: vakrāḥ svabhāvamadhurāḥ śaṃsantyo rāgam ulbaṇam
2.316cd: dṛśo dūtyaś ca karṣanti kāntābhiḥ preṣitāḥ priyān
2.317ab: madhurā rāgavardhinyaḥ komalāḥ kokilāgiraḥ
2.317cd: ākarṇyante madakalāh śliṣyante cāsitekṣanāḥ
2.318ab: rāgam ādarśayann eṣa vāruṇīyogavardhitam
2.318cd: tirobhavati dharmāṃśur aṅgajas tu vijṛṃbhate
2.319ab: nistriṃśatvam asāv eva dhanuṣy evāsya vakratā
2.319cd: śareṣv eva narendrasya mārgaṇatvaṃ ca vartate
2.320ab: padmānām eva daṇḍeṣu kaṇṭakas tvayi rakṣati
2.320cd: athavā dṛśyate rāgimithunāliṅganeṣv api
2.321ab: mahībhṛdbhūrikaṭakas tejasvī niyatodayaḥ
2.321cd: dakṣaḥ prajāpatiś cāsīt  svāmī śaktidharaś ca saḥ
2.322ab: acyuto .apy avṛṣacchedī rājāpy aviditakṣayaḥ
2.322cd: devo .apy  avibudho jajñe śaṃkaro .apy abhujaṅgavān //iti śleṣacakram//
2.323ab: guṇajātikriyādīnāṃ yat tu vaikalyadarśanam
2.323cd: viśeṣadarśanāyaiva sā viśeṣoktir iṣyate
2.324ab: na kaṭhoraṃ na vā tīkṣṇam āyudhaṃ puṣpadhanvanaḥ
2.324cd: tathāpi jitam evāsīd amunā bhuvanatrayam
2.325ab: na devakanyakā nāpi gandharvakulasaṃbhavā
2.325cd: tathāpy eṣā tapobhaṅgaṃ vidhātuṃ vedhaso .apy alam
2.326ab: na baddhā bhrūkuṭir nāpi sphurito daśanacchadaḥ
2.326cd: na ca raktābhavad dṛṣṭir jitaṃ ca dviṣatāṃ kulam
2.327ab: na rathā na ca mātaṅgā na hayā na ca pattayaḥ
2.327cd: strīṇām apāṅgadṛṣṭyaiva jīyate jagatāṃ trayam
2.328ab: ekacakro ratho yantā vikalo viṣamā hayāḥ
2.328cd: ākrāmaty eva tejasvī tathāpy arko nabhastalam
2.329ab: saiṣā hetuviśeṣoktis tejasvīti viśeṣaṇāt 
2.329cd: ayam eva kramo .anyeṣāṃ bhedānām api kalpane//iti viśeṣokticakram//
2.330ab: vivakṣitaguṇotkṛṣtair yat samīkṛtya kasya cit
2.330cd: kīrtanaṃ stutinindārthaṃ sā matā tulyayogitā
2.331ab: yamaḥ kubero varuṇaḥ sahasrākṣo bhavān api
2.331cd: bibhranty ananyaviṣayāṃ lokapāla iti śrutim
2.332ab: saṃgatāni mṛgākṣīṇāṃ taḍidvilasitāni ca
2.332cd: kṣaṇadvayaṃ na tiṣṭhanti ghanārabdhāny api svayam //iti tulyayogitā//
2.333ab: viruddhānāṃ padārthānāṃ yatra saṃsargadarśanam
2.333cd: viśeṣadarśanāyaiva  sa virodhaḥ  smṛto yathā
2.334ab: kūjitaṃ rājahaṃsānāṃ vardhate madamañjulam
2.334cd: kṣīyate ca mayūrāṇāṃ rutam utkrāntasauṣṭhavam
2.335ab: prāvṛṣeṇyair jaladharair ambaraṃ durdināyate
2.335cd: rāgeṇa punar ākrāntaṃ jāyate jagatāṃ manaḥ
2.336ab: tanumadhyaṃ pṛthuśroṇi raktauṣṭham asitekṣaṇam
2.336cd: natanābhi vapuḥ strīṇāṃ kaṃ na haraty unnatastanam
2.337ab: mṛṇālabāhu rambhoru padmotpalamukhekṣaṇam
2.337cd: api te rūpam asmākaṃ tanvi tāpāya kalpate
2.338ab: udyānamārutoddhūtāś cūtacampakareṇavaḥ
2.338cd: udaśrayanti pānthānām aspṛśanto .api locane
2.339ab: kṛṣṇārjunānuraktāpi dṛṣṭiḥ karṇāvalambinī
2.339cd: yāti viśvasanīyatvaṃ kasya te kalabhāṣini
2.340ab: ity anekaprakāro .ayam alaṃkāraḥ pratīyate //iti virodhacakram//
2.340cd: aprastutapraśaṃsā syād aprakrānteṣu yā stutiḥ 
2.341ab: sukhaṃ jīvanti hariṇā vaneṣv aparasevinaḥ
2.341cd: annair ayatnasulabhais tṛṇadarbhāṅkurādibhiḥ
2.342ab: seyam aprastutaivātra  mṛgavṛttiḥ praśasyate
2.342cd: rājānuvartanakleśanirviṇṇena  manasvinā //ity aprastutapraśaṃsā//
2.343ab: yadi nindann iva stauti vyājastutir asau smrtā
2.343cd: doṣābhāsā guṇā eva labhante hy atra saṃnidhim
2.344ab: tāpasenāpi rāmeṇa jiteyaṃ bhūtadhāriṇī
2.344cd: tvayā rājñāpi saiveyaṃ jitā mā bhūn madas tava
2.345ab: puṃsaḥ purāṇād ācchidya śrīs tvayā paribhujyate
2.345cd: rājann ikṣākuvaṃśasya kim idaṃ tava yujyate
2.346ab: bhujaṅgabhogasaṃsaktā kalatraṃ tava medinī
2.346cd: ahaṅkāraḥ parāṃ koṭim ārohati kutas tava
2.347ab: iti śleṣānuviddhānām anyeṣāṃ copalakṣyatām
2.347cd: vyājastutiprakārāṇām aparyantas tu vistaraḥ //iti vyājastutiḥ//
2.348ab: arthāntarapravṛttena kiṃ cit tatsadṛśaṃ phalam
2.348cd: sad asad vā nidarśyeta yadi tat syān nidarśanam
2.349ab: udayann eṣa savitā padmeṣv arpayati śriyam
2.349cd: vibhāvayitum ṛddhīnāṃ phalaṃ suhṛdanugraham
2.350ab: yāti candrāṃśubhiḥ spṛṣṭā dhvāntarājī parābhavam
2.350cd: sadyo rājaviruddhānāṃ sūcayantī durantatām //iti nidarśanam//
2.351ab: sahoktiḥ sahabhāvena kathanaṃ guṇakarmaṇām
2.351cd: arthānāṃ yo vinimayaḥ parivṛttis tu sā smṛtā
2.352ab: saha dīrghā mama śvāsair imāḥ samprati rātrayaḥ
2.352cd: pāṇḍurāś ca mamaivāṅgeḥ saha tāś candrabhūṣaṇāh
2.353ab: vardhate saha pānthānāṃ mūrcchayā cūtamañjarī 
2.353cd: patanti ca samaṃ teṣām asubhir malayānilāḥ 
2.354ab: kokilālāpasubhagā sugandhivanavāyavaḥ 
2.354cd: yānti sārdhaṃ janānandair vṛddhiṃ surabhivāsarāḥ
2.355ab: ity udāhṛtayo dattāḥ sahokter atra kāś cana //iti sahoktiḥ//
2.355cd: kriyate parivṛtteś ca  kiṃ cid rūpanidarśanam
2.356ab: śastraprahāraṃ dadatā bhujena  tava bhūbhujām 
2.356cd: cirārjitaṃ hṛtaṃ teṣāṃ yaśaḥ kumudapāṇḍuram //iti parivṛttiḥ//
2.357ab: āśīrnāmābhilaṣite vastuny āśaṃsanaṃ yathā
2.357cd: pātu vaḥ paramaṃ jyotir avāṅmanasagocaram //ity āśīḥ//
2.358ab: ananvayasasaṃdehāv  upamāsv eva darśitau
2.358cd: upamārūpakaṃ cāpi rūpakeṣv eva darśitam
2.359ab: utprekṣābheda evāsāv utprekṣāvayavo .api ca
2.359cd: nānālaṃkārasaṃsṛṣṭiḥ saṃsṛṣṭis tu nigadyate
2.360ab: aṅgāṅgibhāvāvasthānaṃ sarveṣāṃ samakakṣatā
2.360cd: ity alaṃkārasaṃsṛṣṭer lakṣaṇīyā dvayī gatiḥ
2.361ab: ākṣipanty aravindāni mugdhe tava mukhaśriyam
2.361cd: kośadaṇḍasamagrāṇāṃ kim eṣām asti duṣkaram
2.362ab: limpatīva tamo .aṅgāni varṣatīvāñjanaṃ nabhaḥ
2.362cd: asatpuruṣaseveva dṛṣṭir niṣphalatāṃ gatā
2.363ab: śleṣaḥ sarvāsu puṣṇāti prāyo vakroktiṣu śriyam
2.363cd: bhinnaṃ dvidhā svabhāvoktir vakroktiś ceti vāṅmayam //iti saṃsṛṣtiḥ//
2.364ab: tad bhāvikam iti prāhuḥ prabandhaviṣayaṃ guṇam
2.364cd: bhāvaḥ kaver abhiprāyaḥ kāvyeṣv āsiddhi saṃsthitaḥ
2.365ab: parasparopakāritvaṃ sarveṣāṃ vastuparvaṇām
2.365cd: viśeṣāṇāṃ vyarthānām akriyā sthānavarṇanā
2.366ab: vyaktir uktikramabalād gambhīrasyāpi vastunaḥ
2.366cd: bhāvāyattām idaṃ sarvam iti tad bhāvikaṃ viduḥ //iti bhāvikam//
2.367ab: yac ca saṃdhyaṅgavṛttyaṅgalakṣaṇādy āgamāntare 
2.367cd: vyāvarṇitam idaṃ ceṣṭam alaṅkāratayāiva naḥ 
2.368ab: panthāḥ sa eṣa vivṛtaḥ  parimāṇavṛttyā   saṃhṛtya vistaram anantam alaṅkriyāṇām
2.368cd: vācām atītya viṣayaṃ parivartamānān   abhyāsa eva vivarītum alaṃ viśeṣān

ity ācāryadaṇḍinaḥ kṛtau kāvyādarśe .arthālaṅkāravibhāgo nāma dvitīyo paricchedaḥ //